တစ်လတာ အချိန်ကာလမှာ မျက်စိတစ်မှိတ်အတွင်း ကုန်ဆုံးသွားခဲ့လေသည်။
ဝိညာဉ်ကျောက်တုံး ရှစ်သိန်းစလုံးကို ချုံးရှင်းဂိုဏ်း တပည့်များက နောက်ဆုံးတစ်ပြားအထိ ပြောင်စင်အောင် လိုက်လံဖြုန်းတီးပစ်ခဲ့ကြပြီး ဖြစ်သည်။
ချန်ကျင်းတောက်... လင်းမြောင်မြောင်နှင့် အခြားသူများ ဂိုဏ်းဆီသို့ ခရီးပန်းလာကြစဉ်အတွင်း သူတို့၏ မျက်နှာထက်၌ မောပန်းနွမ်းနယ်မှုများ ပြည့်နှက်နေခဲ့ကြသော်လည်း...
သူတို့၏ မျက်ဝန်းအစုံမှာမူ ကြောက်မက်ဖွယ်ကောင်းလောက်အောင် တောက်ပနေခဲ့ကြသည်။
သာမန်လူ့လောက၏ ဆင်းရဲဒုက္ခများကို ကိုယ်တိုင်ကိုယ်ကျ ကြုံတွေ့ခဲ့ရပြီးနောက်... သူတို့၏ ကျင့်ကြံခြင်း တာအိုနှလုံးသား များ ဆင့်ကဲပြောင်းလဲသွားခဲ့ပြီးမှသာ ထွက်ပေါ်လာတတ်သည့် အလင်းရောင်မျိုးပင် ဖြစ်ပေသည်။
ဖန်ယွမ်သည် လေ့ကျင့်ရေးကွင်းပြင်ကြီးအတွင်း၌ သူတို့ကို စောင့်ဆိုင်းနေခဲ့သည်မှာ ကြာမြင့်နေခဲ့ပြီ ဖြစ်သည်။
ညစ်ပေနေသော ဝတ်စုံများနှင့် ဖုန်မှုန့်များ ပေကျံနေသည့် တပည့်တစ်စုကို ကြည့်ရှုလိုက်မိရင်း... သူ၏ နှလုံးသားထဲ၌ ပျော်ရွှင်မှုများက ပန်းပွင့်များအလား ဝေဆာသွားခဲ့ရတော့သည်။
’သူတို့ကိုလည်း ကြည့်ကြပါဦး... တစ်ယောက်ချင်းစီ ခွေးတစ်ကောင်လို မောပန်းနေကြတာ သူတို့တွေ ကျင့်ကြံခြင်းဘက်ကို လှည့်မကြည့်နိုင်ခဲ့ကြတာ တော်တော်လေး ကြာသွားပြီဖြစ်မှာ သေချာတယ် တကယ်ကို..အဆင်ပြေပြီဒီတစ်ခါ’
“မင်းတို့အားလုံး ပင်ပန်းသွားကြပြီ" ဖန်ယွမ် သူ၏ လက်နှစ်ဖက်ကို အနောက်တွင် ပစ်ထားရင်း... ပညာရှင်ကြီးတစ်ဦး၏ အရှိန်အဝါကို ဖန်တီးလိုက်ကာ မေးမြန်းလိုက်သည် ... “ကိစ္စတွေက ဘယ်လိုလဲ”
“ကျွန်တော်တို့ တာဝန်ကို အောင်မြင်စွာ ထမ်းဆောင်နိုင်ခဲ့ပါတယ်” ချန်ကျင်းတောက် ရှေ့သို့ တစ်လှမ်းတိုးလာခဲ့ပြီး... ထူထဲလှသော မှတ်တမ်းစာအုပ်ကြီးကို လက်နှစ်ဖက်ဖြင့် ရိုသေစွာ ဆက်သလိုက်တော့သည် ...
“ဝိညာဉ်ကျောက်တုံး ရှစ်သိန်းစလုံးကို... ဒုက္ခရောက်နေကြတဲ့ လူတွေရဲ့ လက်ထဲကို အကုန်အစင် ဝေငှပေးခဲ့ပြီးပါပြီ ဒါက အလှူခံရရှိသူတွေရဲ့ စာရင်းဖြစ်ပါတယ်... ဂိုဏ်းချုပ်ကြီးအနေနဲ့ ကြည့်ရှုစစ်ဆေးပါဦး"
ဖန်ယွမ် ထိုစာရင်းကို ကြည့်ရန်ပင် စိတ်မဝင်စားချေ။ သူသည် ထိုမှတ်တမ်းစာအုပ်ကို ဘေးနားရှိ ယွဲ့လင်း၏ လက်ထဲသို့ အသာအယာ လွှဲပြောင်းပေးလိုက်ရင်း ...
“ကောင်းပြီ မင်းတို့အားလုံး ရက်ပေါင်းများစွာတိုင်အောင် ခရီးသွားခဲ့ကြရတာမို့... ကိုယ့်အခန်းကိုယ်ပြန်ပြီး ကောင်းကောင်း အနားယူကြတော့ ကျင့်ကြံခြင်းရဲ့ လမ်းစဉ်ဆိုတာ... အလုပ်နဲ့ အနားယူခြင်းကို မျှတအောင် ထိန်းညှိရတာမျိုးပဲ"
“အမိန့်အတိုင်းပါ” တပည့်အားလုံး ပြန်လည်ဖြေကြားလိုက်ကြသည်။ ဖန်ယွမ်ကို သူတို့ ကြည့်ရှုလိုက်ကြသည့် မျက်ဝန်းများအတွင်း၌မူ... ကြည်ညိုလေးစားမှုများအပြင် သက်ဝင်ယုံကြည်မှုများပါ ပိုမိုတိုးပွားနေခဲ့ကြချေပြီ။
ဖန်ယွမ် ထိုအကြည့်များကြောင့် တစ်ကိုယ်လုံး ကြက်သီးမွေးညင်းများ ထောင်လွှားသွားခဲ့ရတာမို့... သူတို့ကို လူစုခွဲရန်အတွက် လက်ကို အလျင်အမြန် ဝှေ့ယမ်းပြလိုက်တော့သည်။
သူ၏ ကျင့်ကြံခြင်းဂူဆီသို့ ပြန်လည်ရောက်ရှိလာခဲ့ပြီးနောက်... ဖန်ယွမ် သက်တောင့်သက်သာဖြင့် အကြောဆန့်လိုက်သည်။ သူသည် တစ်ရေးတစ်မော အိပ်စက်အနားယူရင်း... တစ်ချိန်တည်းမှာပင် ဂိုဏ်းကြီးကို မည်ကဲ့သို့ ဆက်လက်ပြီး ဖျက်ဆီးပစ်ရမည်ကို အစီအစဉ်ဆွဲရန် ပြင်ဆင်လိုက်တော့သည်။
အတိအကျပင် ထိုအချိန်၌... သူ၏ စိတ်ဝိညာဉ် အနက်ရှိုင်းဆုံးနေရာဆီကနေ စောင့်ဆိုင်းခဲ့ရသော စနစ်၏ အသံက ဒင်…ဆိုပြီး ထွက်ပေါ်လာခဲ့တော့သည် ...
【 ဒင်…ယခု စက်ဝန်းတာဝန်၏ အောင်မြင်မှု စာရင်းရှင်းတမ်း စတင်ပါပြီ။ 】
ဖန်ယွမ် ချက်ချင်းပင် မတ်မတ်ထိုင်လိုက်မိရင်း... သူ၏ အာရုံအားလုံးကို စုစည်းလျက် သေချာစွာ နားထောင်လိုက်တော့သည်။
【 အိမ်ရှင် သည် ရန်သူ့ဂိုဏ်းကို ဖျက်ဆီးပစ်နိုင်ခဲ့ပြီး... သုံ့ပန်းများကိုလည်း သင့်တော်စွာ ကိုင်တွယ်နိုင်ခဲ့သည်။ ပိုင်ဆိုင်မှုများကို လိုက်လံဖြုန်းတီးပစ်ခဲ့သည့် လုပ်ရပ်ကြောင့်... ဂိုဏ်း၏ ကျော်ကြားမှုနှင့် စည်းလုံးညီညွတ်မှု အဆင့်အတန်းမှာ အဆမတန် မြင့်တက်သွားခဲ့ချေပြီ တပည့်များ၏ ပျမ်းမျှအင်အား... ဂိုဏ်း၏ ကျော်ကြားမှု စသည်တို့ကို ပေါင်းစပ်တွက်ချက်မှုအရ... ဂိုဏ်း၏ ဘက်စုံအင်အား သတ်မှတ်ချက်မှာ စုစုပေါင်း ‘၉၃၀ မှတ်’ တိုးတက်သွားခဲ့ပါသည် 】
ဖန်ယွမ် သက်ပြင်းတစ်ချက်ကို ပြင်းပြင်း ချလိုက်မိသည်။
ဂိုဏ်း၏ ဘက်စုံအင်အား မြင့်တက်လာခြင်းမှာမူ... သူ မျှော်လင့်ထားခဲ့ပြီးသား ကိစ္စတစ်ခု ဖြစ်ပေသည်။
မည်သို့ပင်ဖြစ်စေ... စနစ် ၏ တာဝန်သတ်မှတ်ချက်အတွင်း၌ ပါဝင်သော ဝိညာဉ်ကျောက်တုံးများကို အကုန်အစင် သုံးစွဲပစ်နိုင်ခဲ့သဖြင့်... သူ၏ ကျင့်ကြံခြင်းအဆင့်အတန်း လျှော့ချမခံရခြင်းကပင် ကံကောင်းလှပြီ မဟုတ်ပါလား။
ဘာပဲဖြစ်ဖြစ်... ကျင့်ကြံခြင်းလမ်းစဉ်ဆိုတာ ရှည်လျားလှတဲ့ ခရီးလမ်းကြီးတစ်ခုပဲ။ ဒီတစ်ခေါက် ကျရှုံးသွားခဲ့ရင်တောင် နောက်တစ်ခေါက်မှာ အခွင့်အရေး ရှိနေသေးတာပဲ။ သူသာ ဂိုဏ်းကြီးကို ဆက်လက်ဖျက်ဆီးရန်အတွက် အမြဲ ကြိုးပမ်းသွားမည်ဆိုပါက... အင်မော်တယ်အဆင့်သို့ ရောက်ရှိရန်မှာ အချိန်ပိုင်း ကိစ္စတစ်ခုသာ ဖြစ်ပေသည်။
စနစ်၏ သတင်းပေးချက် အသံကြီးမှာ ဆက်လက်ထွက်ပေါ်နေခဲ့သည် ...
【 ဂိုဏ်း၏ ဘက်စုံအင်အားမှာ သိသိသာသာ တိုးတက်လာခဲ့သည်။ အိမ်ရှင် အနေဖြင့် တိုးတက်မှု၏ ‘တစ်ထောင်ပုံ တစ်ပုံ’ ကို ကျင့်ကြံခြင်းအဆင့်အဖြစ် ပြန်လည်ရရှိပါမည်။ 】
【 ကျင့်ကြံခြင်းအဆင့်: +၀.၉၃ မှတ် 】
အလွန်အမင်း အားနည်းလွန်းလှသဖြင့် လျစ်လျူရှုထားနိုင်လောက်သော ဝိညာဉ်စွမ်းအင် အနည်းငယ်မှာ... လေထုထဲကနေတစ်ဆင့် ရုတ်တရက် ပေါ်ထွက်လာခဲ့ကာ သူ၏ သွေးကြောများအတွင်း၌ တစ်ပတ်ခန့် လှည့်ပတ်စီးဆင်းသွားခဲ့ပြီးနောက်... နောက်ဆုံးတွင်တော့ သူ၏ နတ်ဝိညာဉ် အတွင်းသို့ ပေါင်းစပ်သွားခဲ့တော့သည်။
ဖန်ယွမ် သူ၏ ခန္ဓာကိုယ်အတွင်းပိုင်းက ဝိညာဉ်ပင်လယ်ကို ပြန်လည်စစ်ဆေးကြည့်လိုက်ရာ... သူ၏ ကျင့်ကြံခြင်းအဆင့်အတန်းမှာ အနည်းငယ်မျှသာ လှုပ်ခတ်သွားခဲ့သည်ကို တွေ့ရှိရသည်။
‘နတ်ဝိညာဉ် အလယ်အလတ်အဆင့်’ သို့ ရောက်ရှိရန်မှာမူ... အဝေးကြီး လိုအပ်နေသေးဆဲ ဖြစ်ပေသည်။
သူ၏ စိတ်ပိုင်းဆိုင်ရာ အခြေအနေမှာ ချက်ချင်းပင် ပြိုလဲသွားခဲ့ရတော့သည်။
’ဒါက ဘာကြီးလဲ’
‘ငါ့က ပြင်းပြင်းထန်ထန် ကြိုးစားခဲ့ရတယ်... ရေချိုးဆောင်တွေ ဆောက်ခဲ့ရတယ်... ဝိညာဉ်ရတနာတွေ ဝယ်ခဲ့ရတယ်... ပြီးတော့ ဦးနှောက်ကို အခြောက်ခံပြီး ကျေးလက်တောရွာတွေအထိ နွေးထွေးမှုတွေ လိုက်ပေးခဲ့ရတယ် နောက်ဆုံးကျတော့မှ... ငါ့ရဲ့ ကျင့်ကြံခြင်းအဆင့်က ဒီလောက်လေးပဲ တိုးတက်လာရတယ် ဟုတ်လား’
သူသည် အခုအချိန်တွင်မူ... ‘တလွဲတပည့်တစ်စု’ နှင့် မိုင်တစ်ရာပတ်လည်အတွင်းက သာမန်လူသားများအတွက်... သက်သက်မဲ့ အလုပ်အကျွေးပြုပေးနေရသည့် ‘ကျွဲ... နွား’ တစ်ကောင်အဖြစ် ပြောင်းလဲနေခဲ့ပြီလားဆိုသည်ကို သံသယဝင်လာခဲ့မိတော့သည်။ မိမိမှာ ပင်ပန်းဆင်းရဲစွာ အလုပ်လုပ်နေရသော်လည်း... အကျိုးအမြတ်အားလုံးကို အခြားသူများကသာ ရရှိသွားကြခြင်း ဖြစ်ပေသည်
ဖန်ယွမ် တံတွေးတစ်ချက် ထွေးလိုက်မိရင်း... သူ၏ ပေါင်ကို လက်သီးဖြင့် ပြင်းထန်စွာ ထုရိုက်လိုက်မိတော့သည် ...
“ရပါတယ် ကြီးကျယ်တဲ့ ကိစ္စရပ်တွေကို လုပ်ဆောင်မယ့်သူဆိုတာ... သာမန်လူတွေ မခံစားနိုင်တဲ့ ဆင်းရဲဒုက္ခတွေကို သည်းခံနိုင်ရမယ် ငါ သည်းခံမယ်”
သူ သူ၏ စိတ်ပိုင်းဆိုင်ရာကို ပြန်လည်ပြင်ဆင်လိုက်ပြီး... စိတ်ဓာတ်ကို ပြန်လည်မြှင့်တင်ရန် ပြင်ဆင်လိုက်စဉ်မှာပင်... စနစ်က နောက်ဆုံး အကြောင်းကြားချက်ကို ထပ်မံထုတ်လွှတ်လိုက်တော့သည် ...
【 ဂိုဏ်း၏ ဘက်စုံအင်အား ရမှတ်မှာ ‘၁,၂၆၀ မှတ်’ သို့ ပြောင်းလဲသွားခဲ့ပါပြီ။ စက်ဝန်းအသစ်အတွက် တာဝန်ကို ထုတ်ပြန်ပေးလိုက်ပါသည်။ 】
【 သတ်မှတ်ချက်: နောက်ထပ် ၆ လအတွင်း၌... ဝိညာဉ်ကျောက်တုံး အနိမ့်စား ‘၄.၈ သန်း (၄,၈၀၀,၀၀၀)’ ကို စနစ် ၏ စည်းမျဉ်းများနှင့်အညီ အကုန်အစင် သုံးစွဲပစ်ရန်။ 】
【 တာဝန်အတွက် အသုံးပြုမည့် ရန်ပုံငွေများကို ဂိုဏ်း၏ စာရင်းအတွင်းသို့ ထည့်သွင်းပေးပြီးပါပြီ။ 】
ဖန်ယွမ် ခုတင်ပေါ်ကနေ ဗုန်းခနဲ ချက်ချင်း ခုန်ဆင်းလိုက်မိတော့သည်။
‘၄.၈ သန်း တဲ့လား’
‘ပြီးခဲ့တဲ့ အခေါက်တုန်းက သုံးသန်းကိုတောင် မနည်း ဖြုန်းတီးပစ်ခဲ့ရတာကို... အခုတစ်ခေါက်ကျတော့မှ နောက်ထပ် ၁.၈ သန်းတောင် ပိုများလာရတယ် ဟုတ်လား’
’ဒီစနစ်က... နက်မှောင်သစ်တောဂိုဏ်းဆီကနေ သိမ်းဆည်းရမိခဲ့တဲ့ ဝိညာဉ်ကျောက်တုံးတွေနဲ့ အဖိုးတန် ရတနာတွေအားလုံးကိုပါ ထည့်တွက်လိုက်တာ လား’
သူ တုန်ရီနေသော လက်များဖြင့် စနစ်၏ မျက်နှာပြင် ကို ဖွင့်လှစ်လိုက်မိရင်း... အကြိမ်ကြိမ်အခါခါ သေချာစွာ စစ်ဆေးကြည့်လိုက်တော့သည်။
【 လက်ရှိ ဂိုဏ်း၏ အကောင့်လက်ကျန်ငွေ: ၄,၈၀၀,၀၀၀ ဝိညာဉ်ကျောက်တုံး အနိမ့်စား 】
သူ ဘယ်လိုပဲ ကြည့်ကြည့်... ထို ၄.၈ သန်းဟူသော ဂဏန်းကြီးမှာ လုံးဝ ပြောင်းလဲမသွားခဲ့ချေ။
“ဒီ... စောက်စနစ်စုတ်”
ဖန်ယွမ် ဒေါသတကြီးဖြင့် ကျောက်စားပွဲကြီးကို ကန်ကျောက်လိုက်တော့ရာ... စားပွဲပေါ်ရှိ ရေနွေးအိုးနှင့် ရေနွေးကန်တော့ခွက်များမှာ မြေပြင်ထက်သို့ ပြန့်ကျဲကာ ကျိုးပျက်ကုန်ကြတော့သည်။
“ဂိုဏ်းတစ်ခုကို ဖျက်ဆီးပစ်ဖို့က... ဘာဖြစ်လို့ ဒီလောက်တောင် ခက်ခဲနေရတာလဲကွာ”
သူ၏ ဒေါသတကြီး အော်ဟစ်သံကြီးမှာ... ကျင့်ကြံခြင်းဂူတစ်ခုလုံးအတွင်း၌ ထပ်ခါတလဲလဲ ပဲ့တင်ထပ်နေခဲ့တော့သည်။
ကံကောင်းလှစွာပင်... သူ၏ ကျင့်ကြံခြင်းဂူတွင် အပြင်ဘက်နှင့် အသံလုံစေမည့် တားမြစ်ချက် အစီအရင်များ တပ်ဆင်ထားခြင်းကြောင့်သာ ဖြစ်ပေသည်။ မဟုတ်ပါက... အော်ဟစ်သံကြီးကြောင့် ချုံးရှင်းဂိုဏ်းတစ်ခုလုံးမှာ သူတို့၏ ကြီးမြတ်လှသော ဂိုဏ်းချုပ်ကြီးတစ်ယောက် စိတ်ပိုင်းဆိုင်ရာ ပြိုလဲသွားခဲ့ပြီဖြစ်ကြောင်း သိရှိသွားကြပေလိမ့်မည်။
နောက်ထပ် ဆယ်ရက်ကျော်တိုင်အောင်... ဖန်ယွမ် ကျင့်ကြံခြင်းဂူအပြင်ဘက်သို့ တစ်လှမ်းမျှပင် မလှမ်းခဲ့ချေ။
ယွဲ့လင်းသည် ဂိုဏ်း၏ ကိစ္စရပ်များကို လာရောက်တိုင်ပင်ရန်နှင့် ပိုက်ဆံဝေငှခြင်း လုပ်ငန်းစဉ်၏ အခြေအနေများကို လာရောက်သတင်းပို့ရန် ကြိုးပမ်းခဲ့သော်လည်း... သူမသည်လည်း ငြင်းပယ်ခြင်းကိုသာ ခံခဲ့ရရှာသည်။
လူတိုင်းကမူ... ဂိုဏ်းချုပ်ကြီးသည် ‘နတ်ဝိညာဉ် အဆင့်အတန်းရှိသော ကျင့်ကြံသူ’ ကို သတ်ဖြတ်ခဲ့ပြီးနောက်ပိုင်း ဒဏ်ရာများကို ကုသရန်အတွက် သီးသန့်တံခါးပိတ် ကျင့်ကြံနေခြင်းဖြစ်သည်ဟု ထင်မှတ်ထားကြတာမို့... သူတို့အားလုံး၏ ရင်ထဲ၌ ဂိုဏ်းချုပ်ကြီးအပေါ် ကြည်ညိုလေးစားမှုများနှင့် စိတ်လှုပ်ရှားမှုများက နောက်ထပ်တစ်ကြိမ် ထပ်မံ၍ ပြည့်နှက်လာခဲ့ပြန်သည်။
အမှန်တကယ်တော့ ဖန်ယွမ် ဒဏ်ရာများကို ကုသနေခြင်း မဟုတ်သည်မှာ ထင်ရှားလှပေသည်။
သူသည် ကျင့်ကြံခြင်းဂူအတွင်း၌ နံရံကို မျက်နှာမူလျက် ထိုင်နေမိရင်း... ပြီးခဲ့သော လအနည်းငယ်အတွင်းက သူပြုလုပ်ခဲ့သမျှသော အစီအစဉ်များနှင့် လုပ်ရပ်တိုင်းကို စိတ်ထဲကနေ ပြန်လည်သုံးသပ်နေခဲ့ခြင်း ဖြစ်သည်။
‘အရည်အချင်းမရှိတဲ့ အမှိုက်တပည့်တွေကို စုဆောင်းခဲ့ပြီး... အမှိုက်ကျင့်စဉ်တွေကို သင်ကြားပေးခဲ့တာတောင်... လူတိုင်းက ဝိညာဉ်စွမ်းအင်ကို အောင်မြင်စွာ ခန္ဓာကိုယ်ထဲ သွင်းယူနိုင်ခဲ့ကြတယ်’
‘ဝိညာဉ်ကျောက်တုံး သန်းနဲ့ချီ အကုန်အကျခံပြီး ရေချိုးဆောင် ဆောက်ပေးခဲ့တာတောင်... တပည့်တွေက ရေချိုးရင်းနဲ့ တစ်ပြိုင်နက်တည်း ကျင့်ကြံနိုင်သွားခဲ့ကြတယ်’
‘ဝိညာဉ်ကျောက်တုံး သန်းနဲ့ချီ အကုန်အကျခံပြီး တိုက်ခိုက်ရေး တံဆိပ်ပြားတွေနဲ့ စစ်မဟာဗျူဟာ အစီအရင်တွေကို ဝယ်ယူခဲ့တာတောင်... နောက်ဆုံးကျတော့ နက်မှောင်သစ်တောဂိုဏ်းကြီး ပဲ ဖျက်ဆီးခံလိုက်ရတယ်’
သူ ပြုလုပ်ခဲ့သမျှသော ခြေလှမ်းတိုင်းမှာ... သူ မျှော်လင့်ထားခဲ့သည့် လားရာနှင့် လုံးဝကို ဆန့်ကျင်ဘက်ဖြစ်သော ဘက်ဆီသို့သာ ပြီးပြည့်စုံစွာ ဦးတည်သွားခဲ့ကြခြင်း ဖြစ်ပေသည်။
ဖန်ယွမ် သူ၏ ဦးခေါင်းကို လက်နှစ်ဖက်ဖြင့် ဆုပ်ကိုင်ထားမိရင်း... ဂူ၏ ထောင့်စွန်းတစ်ခု၌ ထိုင်ကာ... နောက်ဆုံးမှာတော့ ပြဿနာ၏ မြစ်ဖျားခံရာ အချက်တစ်ချက်ကို ရှာဖွေတွေ့ရှိသွားခဲ့တော့သည်။
ပြဿနာအားလုံး၏ အရင်းအမြစ်မှာ... တပည့်များ၏ ဦးနှောက်အတွင်းက အတွေးအခေါ် လမ်းကြောင်းများကြောင့်ပင် ဖြစ်ပေသည်။
တပည့်တစ်စုလုံးမှာ... ကျေးဇူးသိတတ်လွန်းလှသည့်အပြင် အလုပ်လုပ်ချင်စိတ် ကလည်း ပြင်းထန်လွန်းလှသည်။ မိမိက ခံစားခွင့်များကို ပိုမိုပေးအပ်လေလေ... သူတို့က ထိုအရာများကို ဂိုဏ်းချုပ်၏ အထူးဂရုစိုက် စောင့်ရှောက်မှုအဖြစ် ထင်မှတ်ကြလေလေဖြစ်ပြီး... ထို့နောက်တွင်တော့ ဂိုဏ်းချုပ်၏ ကျေးဇူးကို ဆပ်ရန်အတွက် ကျင့်ကြံခြင်းများကို ပိုမို၍ အစွမ်းကုန် ကြိုးပမ်းအားထုတ်ကြတော့ခြင်း ဖြစ်ပေသည်
“လူတိုင်းကို ခံစားခွင့်တွေ အညီအမျှ ပေးနေတာက... ဂိုဏ်းအတွင်းမှာ ပိုပြီးတော့ ပြင်းထန်တဲ့ ပြိုင်ဆိုင်မှုတွေကိုပဲ မွေးဖွားပေးရာ ရောက်လိမ့်မယ်” ဖန်ယွမ် သူ၏ နီမြန်းနေသော မျက်ဝန်းများဖြင့် ဂူ၏ ဒေါင့်စွန်းကို စူးစိုက်ကြည့်ရှုရင်း တစ်ကိုယ်တည်း ရေရွတ်လိုက်မိသည်။
ဂိုဏ်းကြီးကို ဖျက်ဆီးပစ်ရန်အတွက်ဆိုလျှင်... သူသည် ထိုတပည့်များ၏ အလုပ်လုပ်ချင်စိတ်ကို လုံး၀ ဖျက်ဆီးပစ်ရမည် ဖြစ်သည်။
ခံစားခွင့်များကို မပေးဘဲ နေ၍လည်း မရချေ... မဟုတ်ပါက စနစ် ၏ တာဝန်ကို ပြီးမြောက်အောင် လုပ်ဆောင်နိုင်လိမ့်မည် မဟုတ်ပေ။
သို့သော်လည်း... သူသည် ပိုက်ဆံများကိုလည်း အကုန်အစင် သုံးစွဲပစ်နိုင်ပြီး... တစ်ချိန်တည်းမှာပင် ဒီ တလွဲတွေးတက်သော တပည့်များ အလုပ်လုပ်ချင်စိတ်ကို ကုန်ဆုံးသွားစေရန် မည်ကဲ့သို့ ပြုလုပ်ရပါမည်နည်း။
ဖန်ယွမ် ရုတ်တရက် မတ်တပ်ရပ်လိုက်မိပြီး... သူ၏ မျက်ဝန်းများ တောက်ပလာခဲ့ကာ... ကျင့်ကြံခြင်းဂူအတွင်း၌ ဟိုဟိုဒီဒီ လျှောက်လှမ်းနေခဲ့တော့သည်။
ကျင့်ကြံခြင်းလောကကြီး၏ မပြောင်းလဲသော သံမဏိစည်းမျဉ်းက ဘာလဲ
‘အားကြီးသူက အသားစားပြီး... အားနည်းသူက ဟင်းရည်သောက်ရတယ် အရည်အချင်း ပိုမိုမြင့်မားပြီး ကျင့်ကြံခြင်းအဆင့် ပိုမိုထက်မြက်တဲ့ တပည့်တွေကသာ... သယံဇာတ အရင်းအမြစ်တွေကို ပိုပြီး ရရှိကြတယ်’
ဒီစည်းမျဉ်းကြီးမှာ နှစ်ပေါင်းသောင်းချီတိုင်အောင် တည်ရှိခဲ့ခြင်းဖြစ်ပြီး မည်သည့်ဂိုဏ်းကမျှ ချွင်းချက်မရှိ လိုက်နာကြရသည်။
’ဒါဆိုရင်... ငါက အဲဒီစည်းမျဉ်းကို ပြောင်းပြန် လုပ်ပစ်မယ်’
မည်သူက ကျင့်ကြံခြင်းအဆင့် အနိမ့်ဆုံးဖြစ်ပြီး... မည်သူက အပျင်းဆုံး ဖြစ်နေသလဲ... ထိုသူကသာ အကောင်းဆုံးသော အရင်းအမြစ်များကို ရရှိစေရမည်။
ယွဲ့လင်း... ချန်ကျင်းတောက်နှင့် ဟုန်အာနျိုကဲ့သို့... အပေါ်သို့ တက်လှမ်းရန်အတွက် အသက်လုကာ ကြိုးပမ်းနေကြသည့် လူများအနေဖြင့်မူ... ဝိညာဉ်ကျောက်တုံး တစ်ခုတည်းကိုပင် ရရှိရန်အတွက် စိတ်ကူးပင် မယဉ်စေရချေ။
ဖန်ယွမ် တွေးမိလေလေ ပိုမို၍ စိတ်လှုပ်ရှားလာလေလေဖြစ်ပြီး... သူ၏ စိတ်ထဲ၌ နောက်ထပ် ခြေလှမ်းများအတွက် အစီအစဉ်များကို စတင်ရေးဆွဲလိုက်တော့သည် ...
‘ကျင့်ကြံခြင်းအဆင့် အမြင့်ဆုံး တပည့်များ: ခံစားခွင့် သုည... ထောက်ပံ့ကြေး သုည... ကိုယ့်ခြေထောက်ပေါ်ကိုယ် ရပ်တည်ကြရန်’
‘ကျင့်ကြံခြင်းအဆင့် အနိမ့်ဆုံး တပည့်များ: ထိပ်တန်းအဆင့် ဆေးလုံးများ... ပြီးတော့ သူတို့ သုံးစွဲနိုင်သမျှသော ဝိညာဉ်ကျောက်တုံးများအားလုံးကို အကန့်အသတ်မရှိ ပေးအပ်ရန်’
ဒါကို ဘာလို့ ခေါ်သလဲ ဒါကို “ညံ့ဖျင်းသူများအား ဆုလာဘ်ပေးသည့် စနစ်” လို့ ခေါ်တယ်
အရင်းအမြစ်အားလုံးကို ကျောင်းစာညံ့ဖျင်းသူများ (သို့မဟုတ်) အောက်ခြေလူတန်းစားများဘက်သို့သာ အလုံးအရင်းဖြင့် ပေးအပ်မည်ဖြစ်ပြီး... ထိပ်တန်းကျောင်းသားများမှာမူ ဘာတစ်ခုမျှ ရရှိလိမ့်မည် မဟုတ်ပေ။
ပုံမှန်လူတစ်ယောက်အနေဖြင့် မိမိ၏ စာသင်ကြားမှု (သို့မဟုတ်) အလုပ်ခွင်အတွင်း၌... မိမိက အသက်လုကာ ပြင်းထန်စွာ ကြိုးပမ်းနေခဲ့သော်လည်း ဘာဆုလာဘ်မျှ မရရှိဘဲ... တစ်နေ့လုံး အလုပ်မလုပ်ဘဲ အပျော်ပတ်နေသည့် အသုံးမကျသော အတန်းဖော် (သို့မဟုတ်) လုပ်ဖော်ကိုင်ဖော်များကသာ ဆုလာဒ်ရပြီး ဘုရင်တစ်ပါးကဲ့သို့ စည်းစိမ်ခံစားနေရသည်ကို မြင်တွေ့လိုက်ရလျှင်... ထိုသူအနေဖြင့် ဆက်လက်ပြီး ကြိုးစားချင်စိတ် ရှိပါဦးမည်လား ဘဝကို အရှုံးပေးပြီး သူတို့ပါ ပျက်စီးသွားကြလိမ့်မည် မဟုတ်ပါလား။
သူတို့ တကယ်ကို ပျက်စီးသွားကြမှာ သေချာတယ်။
ယွဲ့လင်းသည် အတိတ်တုန်းက သူမနေရာတွင် ရှိခဲ့ဖူးသော ‘ကပ်စေးနှဲ ဂိုဏ်းချုပ်ဟောင်း’ ၏ နှိပ်စက်မှုကြောင့် ‘အခြေခံအုတ်မြစ် တည်ဆောက်ခြင်းအဆင့်’ ကို မအောင်မြင်နိုင်ဘဲ ဘဝပျက်လုနီးပါး ဖြစ်ခဲ့ဖူးသည်။
တကယ်လို့ မိမိအနေဖြင့် ဤ “ညံ့ဖျင်းသူများအား ဆုလာဘ်ပေးသည့် စနစ်” ကိုသာ ထုတ်ပြန်လိုက်မည်ဆိုပါက... သူမအနေဖြင့် ချက်ချင်းပင် စိတ်ပျက်အားငယ်သွားခဲ့ရပြီး... သူမ၏ ကျင့်ကြံခြင်းတာအိုနှလုံးသား လည်း လုံးဝ ကျိုးပျက်သွားလိမ့်မည်မှာ သေချာပေသည်။
ချန်ကျင်းတောက်... ဟုန်အာနျိုနှင့် အခြားသူများသည်လည်း... ဂိုဏ်း၏ မမျှတလှသော သယံဇာတ ခွဲဝေမှုများကို သိရှိသွားကြသည့် အခါတွင်မူ... သူတို့၏ ကြိုးပမ်းအားထုတ်ချင်စိတ်များလည်း ချက်ချင်းပင် ရိုက်ချိုးခြင်း ခံရပေလိမ့်မည်။
ထိုအချိန်ကျရောက်လာပြီး လူတိုင်းက စုပေါင်းကာ ဘဝကို အရှုံးပေးလိုက်ကြမည်ဆိုပါက... ဂိုဏ်း၏ ဘက်စုံအင်အား သတ်မှတ်ချက်မှာလည်း ဇောက်ထိုးမိုးမျှော် ကျဆင်းသွားတော့မည် မဟုတ်ပါလား။
ဖန်ယွမ် သူ၏ ပေါင်ကို အားရပါးရ ရိုက်လိုက်မိတော့သည် ...
“ ဟားဟားဟား”
သူ စားပွဲခုံဆီသို့ သုံးလှမ်းတည်းဖြင့် ပြေးသွားလိုက်မိပြီး... ကျောက်စိမ်းပြား တစ်ခုကို ထုတ်ယူကာ... သူ၏ စွမ်းအင်များကို စုစည်းလိုက်တော့သည်။ သူ၏ စိတ်ဝိညာဉ်အသိကို ကျောက်စိမ်းပြားအတွင်းသို့ ထည့်သွင်းလိုက်မိရင်း... ပြတ်သားလှသော သတ်မှတ်ချက်များနှင့် “ညံ့ဖျင်းသူများအား ဆုလာဘ်ပေးသည့် စနစ်” ကြီးတစ်ခုကို အလျင်အမြန်ပင် မှတ်တမ်းတင်လိုက်တော့သည်။
ပြီးတော့ ဒီစည်းကမ်းချက်ကြီးကို အလွန်အမင်း လှပဆန်းပြားလှသော အမည်နာမတစ်ခု ပေးလိုက်တော့သည် ... “ချုံးရှင်းဂိုဏ်း၏ ထောက်ပံရေး မူဝါဒ”(သံချေးတက်ဓား မဟာဗျူဟာ)
မှတ်တမ်းတင်ခြင်း လုပ်ငန်းစဉ်များအားလုံး ရာနှုန်းပြည့် ပြီးမြောက်သွားခဲ့သည့် အခါတွင်မူ... ဖန်ယွမ် ထိုကျောက်စိမ်းပြားကို ကောက်ယူလိုက်မိရင်း သူ၏ စိတ်ဝိညာဉ်အသိဖြင့် သေချာစွာ ပြန်လည်စစ်ဆေးကြည့်လိုက်သည်။
‘အင်း... ပြီးပြည့်စုံလှပေတယ်’
ဒီတစ်ခေါက်တွင်တော့... သူသည် ချုံးရှင်းဂိုဏ်းအတွင်းက ‘ထိပ်တန်းထူးချွန်သူများ’ အားလုံးအား ဘဝကို အရှုံးပေးထားသော ‘ငါးခြောက်များ’ အဖြစ်သို့ လုံးဝ ပြောင်းလဲပစ်တော့မည် ဖြစ်ပေသည်။