စကားပြောပြီးနောက် သူသည်ထိုင်ခုံဆီသို့ ဖြည်းညှင်းစွာ လျှောက်လှမ်းသွားကာ... လက်နှစ်ဖက်ကို နောက်ပစ်လျက် ထိုင်ချလိုက်ပြီး ရေနွေးခွက်ကို ကောက်ကိုင်လိုက်သည်။
သူ ပျင်းရိချင်နေ၍ မဟုတ်ပေ၊ ထိုအရာကို သူ အမှန်တကယ်ပင် မလုပ်ဆောင်တတ်၍ ဖြစ်သည်။
သူ၏ နတ်ဝိညာဉ်အဆင့် ကျင့်ကြံခြင်းမှာ စနစ်၏ အတင်းအကျပ် ထည့်သွင်းပေးမှုကြောင့်သာ ဖြစ်ပြီး... သူသည် အခြေခံအကျဆုံးသော ဝိညာဉ်စုဆောင်းခြင်းအစီအရင်ကိုပင် ကောင်းမွန်စွာ မဆွဲတတ်ပါဘဲလျက်နှင့်... ဒီလောက် အဆင့်မြင့်လှသောအရာကို မည်သို့ လုပ်ဆောင်နိုင်ပါ့မလဲ။
ကျော်ကြားလှသော မိသားစုကြီးတစ်ခုကနေ လာခဲ့ပြီး ကြိုးစားပမ်းစား ကျင့်ကြံအားထုတ်နေခဲ့သူဖြစ်သည့် တပည့်ကြီး ယွဲ့လင်ထံသို့ လွှဲအပ်လိုက်ခြင်းကသာ... အန္တရာယ်အကင်းဆုံးသော ရွေးချယ်မှု ဖြစ်ပေလိမ့်မည်။
ထိုအချိန်တွင် ယွဲ့လင်သည် သစ်သားသေတ္တာလေးကို ကိုင်ဆောင်ထားခဲ့ရင်း... သူမ၏ လက်ချောင်းများမှာ ထိန်းမနိုင်သိမ်းမရအောင် တုန်ရီနေခဲ့ရသည်။
ဝိညာဉ်ကျောက်တုံး ငါးသိန်းတန် အစီအရင်ကြီးတစ်ခု ဟုတ်လား…
အထက်တန်းစား မိသားစုကြီးတစ်ခုကနေ လာခဲ့သူဖြစ်တာမို့... သူမအနေဖြင့် ကိုးကွေ့စိတ်အာရုံလှည့်စားခြင်းအစီအရင်၏ တန်ဖိုးကို သဘာဝကျကျပင် သိရှိနားလည်သည်။ ဒါက နတ်ဝိညာဉ်အဆင့် ကျွမ်းကျင်သူတစ်ဦး၏ တိုက်ခိုက်မှုကို တောင့်ခံနိုင်စွမ်းရှိသည့် ထိပ်တန်း အစီအရင်ကြီးတစ်ခု ဖြစ်သည် မဟုတ်ပါလား
သူတို့ကို ကာကွယ်ပေးရန်အတွက်... ဂိုဏ်းချုပ်သည် ပထမဆုံးအနေဖြင့် ဝိညာဉ်ကျောက်တုံး နှစ်သန်းကျော်ကို အကုန်အကျခံကာ ဝိညာဉ်ရေးရာပစ္စည်းများနှင့် မန္တန်အင်းပြားများကို ဝယ်ယူပေးခဲ့ပြီး... အခုအချိန်မှာတော့ ဒီလောက် အဖိုးတန်လှသော အစီအရင်ကြီးကို ဝယ်ယူရန်အတွက် နောက်ထပ် ငါးသိန်းကို ထပ်မံ ရင်းနှီးမြှုပ်နှံလိုက်ပြန်ချေပြီ။
သူမ အတိတ်က ဖန်ယွမ်အပေါ် ထားရှိခဲ့ဖူးသော အမြင်စောင်းမှုများကို ပြန်လည် တွေးတောလိုက်မိသည့် အခါတွင်မူ... အလွန်အမင်း ရှက်ရွံ့အားနာသွားခဲ့ရတော့သည်။
“ဂိုဏ်းချုပ်...” ယွဲ့လင်၏ မျက်ဝန်းအစုံ နီရဲလာခဲ့ပြီး... လေသံမှာ အနည်းငယ် တုန်ရီပြတ်တောင်းနေခဲ့သည်။
ဖန်ယွမ်၏ မျက်ခွံများ တွန့်ခနဲ ဖြစ်သွားခဲ့ရပြီး... အလျင်အမြန်ပင် လက်ဝှေ့ယမ်းလိုက်သည် ... “စကားနည်းနည်းပြောပြီး အစီအရင်ကို မြန်မြန် နေရာချစမ်းပါ နက်မှောင်သစ်တောဂိုဏ်းက လူတွေ ဘယ်အချိန်မဆို ရောက်လာနိုင်တယ်"
ယွဲ့လင် ခေါင်းကို လေးနက်စွာ ညိတ်လိုက်ပြီးနောက်... လေထဲသို့ ပျံတက်သွားခဲ့တော့သည်။
သူမ၏ အဝတ်အစားများမှာ လေထဲတွင် လွင့်ပျံနေခဲ့ပြီး... သူမ၏ ကျောက်စိမ်းကဲ့သို့ ဖြူစင်သော လက်ချောင်းလေးများမှာ ကပြကစားနေခဲ့ကြကာ၊ ဝိညာဉ်မန္တန်အလင်းတန်းများမှာ အစီအရင်ကျောက်ပြားအတွင်းသို့ တရစပ် စီးဝင်သွားခဲ့ကြတော့သည်။
နှင်းဆီသစ်သားသေတ္တာလေး ပွင့်ဟသွားခဲ့ပြီး... ပါးကွ အစီအရင်ကျောက်ပြားမှာ လေထဲတွင် ပေါလောပေါ်လျက် တောက်ပ ဆန်းကြယ်လှသော အလင်းတန်းများကို ထုတ်လွှတ်နေခဲ့သည်။
လင်းထိန်လှသော အလင်းတန်း ရှစ်ခုမှာ ကောင်းကင်ယံဆီသို့ ထိုးတက်သွားခဲ့ကြပြီး... ချုံးရှင်းဂိုဏ်း၏ ကွဲပြားခြားနားသော အရပ်မျက်နှာ ရှစ်ခုဆီသို့ ကျရောက်သွားခဲ့ကြတော့သည်။
တောင်တစ်ခုလုံး၏ ဝိညာဉ်စွမ်းအင်များမှာ ချက်ချင်းပင် ခန်းခြောက်သွားခဲ့ရပြီး... ထို့နောက် တောက်ပလင်းထိန်နေသော အလင်းဒိုင်းကြီးတစ်ခုအဖြစ် ပြောင်းလဲသွားခဲ့ကာ၊ ဖန်ယွမ်၊ တပည့်များနှင့်၊ ဝိညာဉ်ကျောက်တုံး သန်းပေါင်းများစွာ အကုန်အကျခံ တည်ဆောက်ထားသော ဇိမ်ခံအဆောက်အဦးကြီးများအားလုံးကို အလုံးစုံ လွှမ်းခြုံပိတ်ဆို့ပစ်လိုက်တော့သည်။
အလင်းဒိုင်းကြီး ဖြစ်ပေါ်လာခဲ့သည့် ခဏတွင်ပင်... တောင်တစ်တောင်ကဲ့သို့ လေးလံလှသော ဖိအားကြီးတစ်ခုက ပတ်ဝန်းကျင်တစ်ခုလုံးသို့ ပျံ့နှံ့သွားခဲ့ရသည်။
ချန်ကျင်းတောက်သည် သူ၏ လက်ထဲက မန္တန်အင်းပြားကို တင်းတင်းဆုပ်ကိုင်ထားခဲ့ရင်း... ဖန်ယွမ်၏ နောက်ကျောပုံရိပ်ကို ကြည့်ကာ မျက်ရည်များ စီးကျလာခဲ့ရတော့သည်။
“ညီနောင်တို့” ချန်ကျင်းတောက် နောက်သို့ လှည့်လျက်... ရာဂဏန်းမျှရှိသော ဂျူနီယာညီငယ် ညီမငယ်များကို ရင်ဆိုင်ရင်း၊ သူ၏ လက်ထဲက မန္တန်အင်းပြားကို မြှောက်ကာ လည်ချောင်းကွဲမတတ် အော်ဟစ်လိုက်သည် ... “ဂိုဏ်းချုပ်က ငါတို့အတွက်နဲ့ သူ့ရဲ့ စည်းစိမ်ဥစ္စာအားလုံးကို သုံးဖြုန်းပစ်ခဲ့ပြီ တောင်တွေ၊ လွင်ပြင်တွေအနှံ့ ပုံကျနေတဲ့ ဒီဝိညာဉ်ရေးရာပစ္စည်းတွေနဲ့၊ ငါတို့ဂိုဏ်းကို ကာကွယ်ပေးထားတဲ့ ဒီအစီအရင်ကြီးက... အားလုံးက ဂိုဏ်းချုပ်ရဲ့ သွေးနဲ့ချွေးတွေပဲ”
“နက်မှောင်သစ်တောဂိုဏ်းက လူတွေက အတင့်ရဲလွန်းလှတယ်... ငါတို့ဂိုဏ်းကို ဖျက်ဆီးပစ်ဖို့ ကြိုးစားနေကြတယ် ငါတို့ ဒါကို ခွင့်ပြုနိုင်ပါ့မလား"
“မပြုနိုင်ဘူး မပြုနိုင်ဘူး” ရာဂဏန်းမျှရှိသော တပည့်များ၏ မျက်ဝန်းအစုံမှာ နီရဲနေခဲ့ကြပြီး... သူတို့၏ အော်ဟစ်အားပေးသံများက ကောင်းကင်ယံတစ်ခုလုံးကို တုန်ခါသွားစေခဲ့တော့သည်။
“ဒီနေ့... ငါတို့ နောက်ဆုံး သွေးတစ်စက် ကျန်တဲ့အထိ တိုက်ခိုက်သွားရရင်တောင်မှ၊ ဘယ်တော့မှ နောက်တစ်လှမ်းမှ ဆုတ်မှာ မဟုတ်ဘူး ဂိုဏ်းနဲ့အတူ အသက်ရှင်သန်ပြီး ဂိုဏ်းနဲ့အတူ သေဆုံးသွားမယ်လို့ ကျိန်ဆိုတယ်” ဟုန်အာနျို သူ၏ ဓားရှည်ကြီးကို ဆွဲထုတ်လိုက်ရင်း... ဓားသွားကို ကောင်းကင်ယံဆီသို့ တိုက်ရိုက် ချိန်ရွယ်လျက် အော်ဟစ်လိုက်သည်။
“ဂိုဏ်းနဲ့အတူ အသက်ရှင်သန်ပြီး ဂိုဏ်းနဲ့အတူ သေဆုံးသွားမယ်”
ဟိန်းဟောက်သံများမှာ ပိုမိုကျယ်လောင်လာခဲ့ပြီး... တောင်နောက်ဘက်က သစ်တောအတွင်းရှိ ငှက်ငယ်များကိုပင် ထိတ်လန့်တုန်လှုပ်သွားစေခဲ့သည်။
မူလက အခြေခံ စားဝတ်နေရေးအတွက်သာ ရုန်းကန်နေခဲ့ကြရရှာသော ထိုသာမန်လူသားလေးများမှာ... ယခုအချိန်တွင် ဖန်ယွမ်၏ ‘စွန့်လွှတ်အနစ်နာခံမှု’ ကြောင့် တိုက်ခိုက်လိုစိတ်များ အပြည့်အဝ တောက်လောင်သွားခဲ့ကြရချေပြီ။
သူတို့သည် အရည်မရ အဖတ်မရသော သူရဲဘောကြောင်သည့် လူစုလူဝေးတစ်ခု မဟုတ်တော့ဘဲ...ရွှေအမြုတေအဆင့်နှင့် နတ်ဝိညာဉ်အဆင့် ကျင့်ကြံသူများကိုပင် ဓားချင်းယှဉ်ရဲသော သေရဲသည့် စစ်သည်တော်ကြီးများအဖြစ် ပြောင်းလဲသွားခဲ့ကြရချေပြီ
ထိုအချိန်တွင် ဖန်ယွမ်သည် ဆရာကြီးထိုင်ခုံပေါ်၌ ထိုင်နေခဲ့ရင်း... စိတ်ဓာတ်များ အလွန်အမင်း တက်ကြွနေကြသော သူ၏တပည့်များကို ကြည့်ကာ၊ ရေနွေးခွက်ကို ကိုင်ထားသော လက်ကြီးမှာ လေထဲတွင်ပင် တောင့်တင်းသွားခဲ့ရတော့သည်။
‘ဒီကလေးတွေ... အခု ဘာတွေကို လျှောက်ပြီး စိတ်ကူးယဉ်နေကြတာလဲ’
’မင်းတို့ကို ဂိုဏ်းနဲ့အတူ သေပစ်ဖို့ ဘယ်သူက ပြောလို့လဲ’
‘ငါ ဒီပစ္စည်းအစုတ်အပြဲတွေကို ဝယ်ပေးခဲ့တာက... မင်းတို့ အချိန်ဆွဲထားနိုင်ဖို့အတွက်လေ’
ဖန်ယွမ် ရေနွေးခွက်ကို ပြန်ချလိုက်ပြီး... မတ်တပ်ရပ်လျက် လေ့ကျင့်ကွင်းပြင်၏ အစွန်းဘက်ဆီသို့ လျှောက်လှမ်းသွားခဲ့သည်။ သူသည် မိမိ၏ ဦးခေါင်းထက်တွင် ဆန်းကြယ်လှသော အလင်းတန်းများ ထုတ်လွှတ်နေသည့် အစီအရင်ဒိုင်းကြီးကို မော့ကြည့်ရင်း... လေပူတစ်ချက်ကို ပြင်းထန်စွာ မှုတ်ထုတ်လိုက်မိသည်။
အခြေအနေက တည်ငြိမ်သွားခဲ့ပြီ။
ကိုးကွေ့စိတ်အာရုံလှည့်စားခြင်းအစီအရင်ကို ယွဲ့လင်က ကိုင်တွယ်ခဲ့ခြင်း ဖြစ်သော်လည်း... သူသည် အစောပိုင်းကတင် လျိုထောင်အာကို အစီအရင်အတွင်း၌ တိတ်တဆိတ် ‘နောက်ဖေးပေါက် ’ တစ်ခု ဖန်တီးခိုင်းထားခဲ့ပြီး ဖြစ်သည်။
နက်မှောင်သစ်တောဂိုဏ်းက လူတွေ ရောက်ရှိလာတာနဲ့တစ်ပြိုင်နက်... သူက အစီအရင်အတွင်း၌ ၀င်ပေါက်တစ်ခုကို လျှို့ဝှက်စွာ ဖွင့်လှစ်ပေးပြီး ထိုပြဿနာရှာမည့်သူများကို အတွင်းထဲ ပေးဝင်လိုက်မည်။ ထို့နောက်တွင်မူ... ၀င်ပေါက်ကို ပြန်ပိတ်ပစ်လိုက်မည်…
နက်မှောင်သစ်တောဂိုဏ်းက လူတွေ အတွင်းထဲကို ရောက်ရှိလာသည့် အခါတွင်မူ... တစ်ကြိမ်သုံး ဝိညာဉ်ရေးရာပစ္စည်းတွေကို ကိုင်ဆောင်ထားကြတဲ့ ချီသန့်စင်ခြင်းအဆင့် အောက်ခြေတပည့်တစ်စုကို မြင်တွေ့လိုက်ရပြီး ‘အမေရေ... သွားပြီ’ လို့ အော်ဟစ်သွားကြပေလိမ့်မည်။
သူတို့ သေချာပေါက် ကစဉ့်ကလျား တိုက်ခိုက်ကြတော့မည်ဖြစ်ရာ... ထိုအချိန်ကျလျှင် ဂိုဏ်းရဲ့ အဆောက်အဦးတွေကလည်း သေချာပေါက် ထိခိုက်ပျက်စီးကုန်တော့မည်။
ထိုနံသာသစ်သား အိပ်ဆောင်တွေကော၊ ဝိညာဉ်ကျောက်တုံး သန်းနဲ့ချီ ကုန်ကျထားတဲ့ တင်းယွမ် အဆောင်ကြီးကော... သေချာပေါက် ပြာပုံအဖြစ် ပြောင်းလဲသွားကြပေလိမ့်မည်။
အဆောက်အဦးတွေ ပျက်စီးသွားပြီး... ဝိညာဉ်ကျောက်တုံးတွေလည်း အလဟဿ ဖြစ်သွားရတာမို့၊ ဂိုဏ်းရဲ့ အခြေခံအုတ်မြစ်က တိုက်ရိုက်ကို သုညအဖြစ် ပြောင်းလဲသွားပေလိမ့်မည်။
စနစ်က အခြေအနေကို တွက်ချက်လိုက်တာနဲ့... အဆင့်အတန်း သတ်မှတ်ချက်က ထိုးဆင်းသွားမှာဖြစ်ပြီး၊ သူကတော့ ဆုလာဘ် အဆပေါင်းတစ်သောင်း ပြန်လည် ရရှိပေလိမ့်မည် အင်မော်တယ်ဧကရာဇ် အဆင့်... လက်တစ်ကမ်းအကွာမှာတင် ရှိနေခဲ့ပြီ မဟုတ်ပါလား…
ဘေးကင်းလုံခြုံမှုအတွက်ဆိုလျှင်မူ...
ဖန်ယွမ်၏ အကြည့်များက စိတ်လှုပ်ရှားနေကြသော တပည့်များကို ကျော်ဖြတ်လျက်... လေ့ကျင့်ရေးကွင်းပြင်၏ နောက်ဘက်ဆီသို့ ကျရောက်သွားခဲ့သည်။
ထိုနေရာတွင် တောင်နောက်ဘက်က ကမ်းပါးဆီသို့ တိုက်ရိုက် ဦးတည်နေသော လျှို့ဝှက် ဆန်းကြယ်လှသည့် လမ်းကြောင်းငယ်လေးတစ်ခု ရှိနေခဲ့သည်။ ကျောက်ကမ်းပါး၏ အောက်ခြေတွင်မူ... ပြင်းထန်စွာ စီးဆင်းနေသော မြေအောက်မြစ်ကြီးတစ်ခု ရှိနေခဲ့သည်။
သူ ထွက်ပြေးမည့် လမ်းကြောင်းကို ကြိုတင်၍ စူးစမ်းရှာဖွေထားခဲ့ပြီး ဖြစ်သည်။ နက်မှောင်သစ်တောဂိုဏ်းက လူတွေ အစီအရင်ကြောင့် အချိန်ဆွဲခြင်းခံထားရသရွေ့... သူ နောက်သို့ လှည့်ကာ လစ်ပြေးပစ်လိုက်ရုံသာ ရှိသည်။ ကောင်းမှုကုသိုလ်ပြုသည့်အနေဖြင့် တပည့်များကိုပါ တစ်ပါတည်း ခေါ်ဆောင်သွားရန်စိတ်ကူးထားသည်။
အချိန်တန်လျှင်... နက်မှောင်သစ်တောဂိုဏ်းက ဒီနေရာကို ဖျက်ဆီးပစ်ပြီး တောင်ကို သူတို့ဘာသာ သိမ်းပိုက်လိုက်သည့် အခါ၌၊ စနစ်၏ သတ်မှတ်ချက် ကျဆင်းသွားမည်ဖြစ်ရာ၊ သူ ထိုနေရာတင် ချက်ချင်းပင် အင်မော်တယ်အဖြစ်သို့ ကူးပြောင်းသွားခဲ့ပြီးနောက်... ပြန်လာကာ နက်မှောင်သစ်တောဂိုဏ်းကို အမှုန့်ခြေပစ်ပြီး ဖျက်ဆီးပစ်ရုံသာ ရှိသည်။
ငါ့အစီအစဉ်က ပြည့်စုံလွန်းလှပေစွ။
ဖန်ယွမ် သူ၏ အနည်းငယ် တွန့်ကြေနေသော ဝတ်စုံဖြူကြီးကို ပြန်လည် ပြင်ဆင်လိုက်ပြီးနောက်...ထိုင်ခုံပေါ်သို့ ပြန်လည် ထိုင်ချလိုက်သည်။ သူသည် အချင်းချင်း ရင်ဘတ်ကာကွယ်ရေး အင်္ကျီများကို ဝတ်ဆင်ပေးနေကြပြီး... မန္တန်အင်းပြား ပစ်ပေါက်သည့် ပုံစံများကို လေ့ကျင့်နေကြသော တပည့်များကို ကြည့်ကာ နှုတ်ခမ်းကို မဲ့လိုက်မိသည်။
ကလေးတို့... တိုက်ပွဲစပြီဆိုတာနဲ့ မင်းတို့ သေချာပေါက် တောင့်ခံထားကြရမယ်နော်။ မန္တန်အင်းပြားတွေကို များများ ပစ်ပေါက်ကြစမ်းပါ... ပြီးရင် မင်းတို့ရဲ့ ဆရာနဲ့အတူ မြန်မြန် လစ်ပြေးကြစမ်း၊ ချက်ချင်းကြီးတော့ အသတ်မခံလိုက်ကြနဲ့ဦး။
နက်မှောင်သစ်တောဂိုဏ်းက ငါတို့ရဲ့ ဂိုဏ်းအစုတ်အပြဲလေးကို အပြတ်အသတ် ဖျက်ဆီးပစ်လိုက်တာနဲ့... ငါ အင်မော်တယ်အဆင့်ကို ရရှိသွားမှာဖြစ်ပြီး၊ အဲဒီအချိန်ကျရင် မင်းတို့ကို နေ့တိုင်း ကောင်းမွန်တဲ့ အစားအသောက်တွေ၊ အဖျော်ယမကာတွေနဲ့ လိုက်လံ ကျွေးမွေးပြုစုပေးပါ့မယ်။
အရာအားလုံးက အဆင်သင့် ဖြစ်နေခဲ့ပြီဖြစ်ရာ... အရှေ့လေပြေ သွေးရုံသာ ကျန်တော့သည်။
ဖန်ယွမ် ထိုင်ခုံပေါ်သို့ နောက်မှီလိုက်ရင်း... မျက်ဝန်းအစုံကို ပိတ်လိုက်ကာ၊ လက်ချောင်းများဖြင့် လက်တန်းပေါ်သို့ စည်းချက်ညီညီ တောက်တောက် တောက်တောက် တီးခတ်နေခဲ့မိသည်။
နက်မှောင်သစ်တောဂိုဏ်းက လူတို့... မြန်မြန် လာကြစမ်းပါ ငါက မင်းတို့ လာပြီး ငါ့ဂိုဏ်း ဖျက်ဆီးပေးမှာကို စောင့်မျှော်နေတာ…
အချိန်ကို နာရီဝက်ခန့် နောက်သို့ ပြန်လည် ဆွဲယူလိုက်မည်ဆိုပါက...
မိုင်တစ်ရာခန့် အကွာအဝေးရှိ နက်မှောင်သစ်တောဂိုဏ်း။
ဆန်းကြယ်ပြီး ထူးဆန်းလှသော အဓိက နန်းဆောင်ကြီး၏ အတွင်းပိုင်း... ဂိုဏ်း၏ သက်ကြီးဝါရင့် အကြီးအကဲများ၏ သက်စောင့်ကျောက်ပြား များ ထားရှိရာ ‘ဝိညာဉ်အဆောင်’ အတွင်း၌၊ ရုတ်တရက်ဆိုသလို စူးရှလှသော အက်ကွဲသံတစ်ခု ထွက်ပေါ်လာခဲ့သည်။
စည်းကမ်းထိန်းသိမ်းရေး အကြီးအကဲ ကျောက်ဝူကျိကို ကိုယ်စားပြုထားသည့် ကျောက်စိမ်းပြားလေးမှာ... မှုန့်မှုန့်ညက်ညက် ကြေမွလျက် ဖုန်မှုန့်များအဖြစ် ပြောင်းလဲသွားခဲ့ချေပြီ
ဝိညာဉ်ဆောင်ကို စောင့်ကြပ်နေသော တပည့်ဖြစ်သူ ထိတ်လန့်တုန်လှုပ်စွာဖြင့် နိုးထလာခဲ့ပြီး... မော့ကြည့်လိုက်သည့် အခါတွင်မူ၊ ချက်ချင်းပင် လိပ်ပြာလွင့်မတတ် ထိတ်လန့်သွားခဲ့ရတော့သည်။ သူသည် ဝိညာဉ်ဆောင်အပြင်ဘက်သို့ ပြေးထွက်လာခဲ့ပြီး... အဓိက တောင်ထိပ်၏ နန်းဆောင်ကြီးဆီသို့ ခြေဦးတည့်ရာ အပြေးအလွှား သွားရောက်ခဲ့တော့သည်။
“ဂိုဏ်းချုပ် ကိစ္စကြီး ဖြစ်ကုန်ပါပြီ အကြီးအကဲ ကျောက်ရဲ့ သက်စောင့်ကျောက်ပြား... ကြေမွ ပျက်စီးသွားပါပြီ”
နန်းဆောင်ကြီး၏ အတွင်းပိုင်း၌... နက်မှောင်သစ်တောဂိုဏ်း၏ ဂိုဏ်းချုပ် ‘မိုယာ’ သည် ကျားရေခင်းထားသော ထိုင်ခုံကြီးပေါ်တွင် ထိုင်နေခဲ့သည်။
သူသည် အနက်ရောင် ငှက်မွှေးဝတ်ရုံကြီးကို ဝတ်ဆင်ထားခဲ့ပြီး... သူ၏ မျက်နှာထားမှာ ကြောက်မက်ဖွယ်ကောင်းလှကာ၊ သူ၏ လက်ထဲ၌ ‘ခရမ်းရွှေ သစ်ကြားသီး ’ နှစ်လုံးကို လှည့်ပတ် ကစားနေခဲ့သည်။
သတင်းပို့ချက်ကို ကြားလိုက်ရသောအခါ... သူသည် ရုတ်တရက်ဆိုသလို သူ၏ လက်ဖဝါးအတွင်းသို့ စွမ်းအင်များ ထည့်သွင်းလိုက်သဖြင့်၊ သစ်ကြားသီးနှစ်လုံးမှာ စူးရှလှသော ကြိတ်ခြေသံများကို ထုတ်လွှတ်သွားခဲ့ရတော့သည်။ နန်းဆောင်ကြီး၏ ဘေးတစ်ဖက်တစ်ချက်စီတွင်မူ...ရွှေအမြုတေအဆင့် အကြီးအကဲ လေးဦးမှာ ညီညာစွာ မတ်တပ်ရပ်လိုက်ကြသည်။
“ကျောက်ဝူကျိ သေသွားပြီ ဟုတ်လား" ဂိုဏ်းချုပ်မိုယာ၏ လေသံမှာ အက်ကွဲနေခဲ့ပြီး... မည်သည့် ခံစားချက်မျှ ပါရှိနေခြင်း မရှိပေ။
“အကြီးအကဲ ကျောက်ရဲ့ သက်စောင့်ကျောက်ပြားက... ပြာအဖြစ် ပြောင်းလဲသွားခဲ့တာပါ သူ သေချာပေါက်... သေဆုံးသွားခဲ့ရပါပြီ” တပည့်ဖြစ်သူ မြေပြင်ပေါ်သို့ ဝပ်စင်းလျက်... တုန်ရီနေခဲ့ရှာသည်။
ထိုအချိန်တွင်ပင်... အပြင်ဘက်ကနေ ပေကျံနေသော ပုံရိပ်အချို့မှာ နန်းဆောင်ကြီးအတွင်းသို့ ထိတ်လန့်တုန်လှုပ်စွာဖြင့် ပြေးဝင်လာခဲ့ကြသည်။
ထိုသူများမှာ ကျောက်ဝူကျိနှင့်အတူ ချုံးရှင်းဂိုဏ်းကို သွားရောက် ခြိမ်းခြောက်ခဲ့ကြသော ထိပ်တန်း အထူးတပည့်များပင် ဖြစ်ကြသည်။
သူတို့သည် မိမိတို့၏ ပျံသန်းခြင်းရတနာများကို အစွမ်းကုန် အသက်သွင်းလျက် ပြန်လည် ထွက်ပြေးလာခဲ့ကြခြင်းဖြစ်တာမို့... ဒီလောက် မြန်ဆန်လှသော နှုန်းထားဖြင့် နက်မှောင်သစ်တောဂိုဏ်းဆီသို့ ပြန်လည် ရောက်ရှိလာနိုင်ခဲ့ကြခြင်း ဖြစ်သည်။
နှာခေါင်းကွေးကွေးနှင့် လူမှာ ဒူးထောက်ချလိုက်ရင်း... သူ၏ မျက်နှာတစ်ခုလုံး ပျာယာခတ်လျက် အော်ဟစ်လိုက်တော့သည် ... “ဂိုဏ်းချုပ် ကျွန်တော်တို့ အကြီးအကဲ ကျောက်အတွက် သေချာပေါက် ကလဲ့စားချေရပါမယ် အဲဒီ ချုံးရှင်းဂိုဏ်းက... အတင့်ရဲလွန်းလှပါတယ်”
ဂိုဏ်းချုပ်မိုယာ သူတို့ကို အထက်စီးကနေ ငေးမောကြည့်ရှုလိုက်မိရင်း... သူ၏ မျက်ခုံးအစုံ အနည်းငယ် တွန့်ချိုးသွားခဲ့ရသည်။
“ရှင်းရှင်းလင်းလင်း ပြောစမ်းပါ... ဘာတွေ ဖြစ်ခဲ့တာလဲ"
ထိုတပည့်က စကားများကို ထစ်ထစ်ငေါ့ငေါ့ဖြင့်... ချုံးရှင်းဂိုဏ်းတွင် ကြုံတွေ့ခဲ့ရသမျှ အရာအားလုံးကို ရေပက်မဝင်အောင် အကုန် ပြောပြလိုက်တော့သည်။
ဖန်ယွမ်က နစ်နာကြေးအဖြစ် ဝိညာဉ်ကျောက်တုံး နှစ်သန်းကို ပေါ့ပေါ့ပါးပါး ထုတ်ပေးခဲ့သည်ဟု သူ ပြောဆိုလိုက်သည့် အခါတွင်မူ... နန်းဆောင်အတွင်းရှိ အကြီးအကဲများနှင့် ဂိုဏ်းချုပ်မိုယာတို့ အားလုံး၏ မျက်နှာထက်တွင် သံသယ မျက်နှာထားများ ထွက်ပေါ်လာခဲ့ကြရတော့သည်။
မကြာမီမှာပင်... ဆိတ်မုတ်ဆိတ်နှင့် အကြီးအကဲလင်းသည် တစ်စုံတစ်ခုကို သတိရသွားခဲ့ဟန်ဖြင့် သူ၏ မျက်ဝန်းအစုံ တောက်ပလာခဲ့ရကာ၊ ရှေ့သို့ တစ်လှမ်း တက်လှမ်းလိုက်ပြီး ဂိုဏ်းချုပ်မိုယာထံသို့ လက်ယှက် ဦးညွှတ်လျက် အကြံပြုလိုက်သည် ...
“ဂိုဏ်းချုပ်... ကျွန်တော် ပြီးခဲ့တဲ့အကြိမ်က ပစ္စည်းတွေ ဝယ်ယူဖို့ ထျန်းပေါင်အဆောင်ကို သွားခဲ့တုန်းက... ချုံးရှင်းဂိုဏ်းရဲ့ ဂိုဏ်းချုပ်က ဝိညာဉ်ကျောက်တုံးတွေကို ရက်ရက်ရောရော သုံးစွဲနေခဲ့တာကို အမှန်တကယ် မြင်တွေ့ခဲ့ရပါတယ် သူက ကံကောင်းထောက်မစွာနဲ့ ရတနာသိုက်တစ်ခုခုကို ရှာဖွေတွေ့ရှိထားခဲ့တာလို့ ကြားသိရပါတယ်...”
“အဲလိုလား သူ ဘယ်လောက်အထိ သုံးစွဲခဲ့လို့လဲ" ဂိုဏ်းချုပ်မိုယာ သူ၏ လက်ချောင်းများကို ပွတ်သပ်လိုက်သည်။
“ထျန်းပေါင်အဆောင်ရဲ့ တာ၀န်ခံ ခုန်ရှင်းရှန်း ပြောပြချက်အရဆိုရင်တော့... အဲဒါက ဝိညာဉ်ကျောက်တုံး တစ်သန်းငါးသိန်းကျော် ရှိပါတယ်” အကြီးအကဲလင်း ထိုနေ့က ကြားသိခဲ့ရသော ကိန်းဂဏန်းကို မဆိုင်းမတွဘဲ ပြန်လည် ဖြေကြားလိုက်သည်။
နန်းဆောင်ကြီးအတွင်း၌... လေအေးများကို ပြင်းထန်စွာ ရှူသွင်းလိုက်ကြသံများ ထွက်ပေါ်လာခဲ့ရတော့သည်။
ဝိညာဉ်ကျောက်တုံး တစ်သန်းငါးသိန်း ဟုတ်လား…
နက်မှောင်သစ်တောဂိုဏ်းအနေဖြင့်... ပတ်ဝန်းကျင်ရှိ ဂိုဏ်းငယ်လေးများကို အစွမ်းကုန် ဓားပြတိုက် လုယက်ခဲ့လျှင်ပင်... တစ်နှစ်တာ ပိုလျှံငွေမှာ ဝိညာဉ်ကျောက်တုံး တစ်သောင်းငါးထောင်ပင် ပြည့်မီရန် ပင်မလွယ် ထိုချုံးရှင်းဂိုဏ်းက... အမှန်တကယ်ပင် ဒီလောက်အထိ ချမ်းသာကြွယ်ဝနေခဲ့တာလား။