တစ်ရက်တာ ကုန်ဆုံးသွားခဲ့သည်။ ဟုန်အာနျိုသည် အဆင့်နိမ့် ဝိညာဉ်ကျောက်တုံး ငါးဆယ်တိတိ အကုန်အကျခံလိုက်ပြီးနောက်တွင်မှ... နက်မှောင်သစ်တောဂိုဏ်း၏ အောက်ခြေအခြေအနေ အမှန်တရားများကို စုံစမ်းသိရှိသွားခဲ့ရတော့သည်။
သတင်းအချက်အလက်အားလုံးကို ရရှိပြီးနောက်... သူ၏ ပုံမှန်အားဖြင့် ခံစားချက်မရှိသော မျက်နှာထက်တွင် အလွန်အမင်း စိုးရိမ်သောအရိပ်အယောင်များ ပြည့်နှက်သွားခဲ့ရချေပြီ။ နက်မှောင်သစ်တောဂိုဏ်းသည် ကျန်းရှမြို့၏ မိုင်တစ်ရာပတ်လည်အတွင်း၌ အင်အားအကြီးမားဆုံးသော ဂိုဏ်းကြီးများထဲက တစ်ခု ဖြစ်နေခဲ့သည်။
သူတို့၏ ဂိုဏ်းချုပ်သည် ‘နတ်ဝိညာဉ်အဆင့် ’ တွင် ရှိနေခဲ့ပြီး... ဂိုဏ်းအတွင်း၌လည်းရွှေအမြုတေအဆင့် အကြီးအကဲ ငါးဦး၊ အခြေခံအုတ်မြစ် တည်ဆောက်ခြင်းအဆင့် တာဝန်ခံ ဒါဇင်ကျော်နှင့် အတွင်းစည်းတပည့် ရာပေါင်းများစွာအပြင် မရေမတွက်နိုင်သော အပြင်ပည်းအစေခံများ ရှိနေခဲ့ကြသည်။
သူတို့သည် ဘေးပတ်ပတ်လည်ရှိ ဂိုဏ်းငယ်လေးများကို အတင်းအကျပ် ဝါးမြိုဖျက်ဆီးပစ်ခြင်းဖြင့် သူတို့၏ အခြေခံအုတ်မြစ်ကို တည်ဆောက်ခဲ့ကြခြင်းဖြစ်ရာ... သူတို့၏ လုပ်ဆောင်ချက်များမှာ ရက်စက်ကြမ်းကြုတ်လှပြီး မည်သည့်ရန်သူကိုမျှ အသက်ရှင်သန်ခွင့် ပေးလေ့မရှိချေ။
သူ၏ ဂျူနီယာညီလေးနှင့် ညီမလေးတို့သည် ချီသန့်စင်ခြင်းအဆင့်၉ရှိ ထိုတပည့်နှစ်ဦးကို ဒီအတိုင်း ပြန်လွှတ်ပေးလိုက်ခြင်းက... နောင်တစ်ချိန်တွင် ချုံးရှင်းဂိုဏ်းဆီသို့ ကပ်ဘေးကြီးတစ်ခုကို သေချာပေါက် ဆွဲခေါ်လာခဲ့တော့မည် မဟုတ်ပါလား။
စားသောက်ဆိုင်သို့ ပြန်ရောက်သည့် အခါတွင်မူ... ကပ်ဘေးကြီး ဆိုက်ရောက်တော့မည်ကို မသိရှာကြသေးသော ဂျူနီယာညီလေးများနှင့် ညီမလေးများကို သူ စုဝေးစေလိုက်သည်။
လူတိုင်း၏ ဝေခွဲမရဖြစ်နေသော မျက်ဝန်းများအောက်၌... ဟုန်အာနျိုသည် မိမိ၏ ရင်ဘတ်ထဲမှ စုဆောင်းလာခဲ့သော သတင်းအချက်အလက် စာအုပ်ငယ်ကို ဆွဲထုတ်လိုက်ပြီး သူတို့၏ အရှေ့သို့ ချ ပေးလိုက်တော့သည်။
ဇဝေဇဝါဖြစ်သွားသော ချန်ကျင်းတောက် စားပွဲပေါ်က စာအုပ်ငယ်ကို ကောက်ယူလိုက်ပြီး တစ်စာမျက်နှာချင်းစီ လှန်လှောကြည့်ရှုလိုက်သည်။
စာအုပ်အတွင်း၌ နက်မှောင်သစ်တောဂိုဏ်း၏ အတိတ်က ရက်စက်လှသော လုပ်ဆောင်ချက်များကို သေသေချာချာ သိပ်သည်းစွာ မှတ်တမ်းတင်ထားခဲ့ခြင်း ဖြစ်သည်။ ဖတ်ရှုလေလေ... ချန်ကျင်းတောက်၏ ရင်ထဲတွင် ပိုမို အေးစက်လာခဲ့ရလေလေဖြစ်ပြီး၊ ဟုန်အာနျို ဘာကို ဆိုလိုချင်သလဲဆိုတာကို သူ ကောင်းကောင်းကြီး သဘောပေါက်သွားခဲ့ရတော့သည်။
"စီနီယာအစ်ကိုဟုန်... ကျွန်တော် တောင်းပန်ပါတယ်" ချန်ကျင်းတောက် မိမိ၏ နှုတ်ခမ်းကို ကိုက်လိုက်မိရင်း လေသံမှာ အောတောတော နိုင်သွားခဲ့ရသည်။
ထို့နောက်တွင်မူ... သူသည် မိမိ၏ ရင်ထဲက သတ္တိအားလုံးကို စုစည်းလိုက်သကဲ့သို့ ရင်ဘတ်ကို မတ်လိုက်ပြီး ဘေးနားရှိ ဂိုဏ်းတူ မောင်နှမများကို စိုက်ကြည့်လိုက်သည် ...
"ဒီပြဿနာကို ကျွန်တော် ကိုယ်တိုင် ဖန်တီးခဲ့တာဆိုတော့... ကျွန်တော် အခုချက်ချင်း ဂိုဏ်းကို ပြန်ပြီး ဂိုဏ်းချုပ်ထံမှာ အပြစ်ပေးခံရဖို့ သွားရောက် တောင်းခံပါ့မယ်။ တကယ်လို့ နက်မှောင်သစ်တောဂိုဏ်းချုပ်က ကျွန်တော့်ကို သတ်ချင်ရင်ဖြစ်ဖြစ်၊ အပြစ်ပေးချင်ရင်ဖြစ်ဖြစ်... ကျွန်တော် တစ်ယောက်တည်းပဲ ခေါင်းခံလိုက်ပါ့မယ်။ ဂိုဏ်းကိုတော့ လုံးဝ ဒုက္ခမပေးပါဘူး"
"ဘာတွေ လာလျှောက်ပြောနေတာလဲ ငါတို့ ချုံးရှင်းဂိုဏ်းရဲ့ စည်းကမ်းချက်တွေအရ... မင်း ဂိုဏ်းထဲကို ဝင်လာကတည်းက ငါတို့အားလုံးက မိသားစုဝင်တွေ ဖြစ်သွားကြပြီ ဘာဖြစ်လို့ တစ်ယောက်တည်း ခေါင်းခံရမှာလဲ" ဟုန်အာနျို ဆဲဆိုလိုက်သည်။
"နက်မှောင်သစ်တောဂိုဏ်းချုပ်က နတ်ဝိညာဉ်အဆင့်မှာ ရှိနေတယ်ဆိုပေမဲ့... ငါတို့ရဲ့ ဂိုဏ်းချုပ်ကလည်း နတ်ဝိညာဉ်အဆင့်မှာပဲ ရှိနေတာပဲ။ ငါတို့အတွက် မျှော်လင့်ချက် ရှိနေပါသေးတယ်"
သူတို့၏ စကားဝိုင်းကို ကြားရသောအခါ အခြားသော တပည့်များသည်လည်း အလောတကြီးဖြင့် စာအုပ်ငယ်ကို ကောက်ယူကာ သေသေချာချာ စစ်ဆေးကြည့်ရှုလိုက်ကြသည်။
ဖတ်ရှုပြီးနောက်... မနေ့ညက သူရဲကောင်းဆန်ဆန် တိုက်ခိုက်နိုင်ခဲ့မှုအပေါ် ပျော်ရွှင်မြူးတူးနေကြဆဲ ဖြစ်သော တပည့်များ၏ ရင်ထဲတွင် ချက်ချင်းပင် အေးစက်ခြင်းများ ပြည့်နှက်သွားခဲ့ရပြီး ကျောရိုးများပါ စိမ့်တက်သွားခဲ့ရတော့သည်။
မိမိတို့ ရိုက်နှက်လိုက်သော လူများက... ဒီလောက်အထိ အာဏာကြီးမားပြီး ရက်စက်လှသော ဂိုဏ်းကြီးတစ်ခုက ဖြစ်နေရတာလဲ။ ကျန်းရှောက်ရှန်း တံတွေးကို ခက်ခဲစွာ မျိုချလိုက်ရပြီး ခြေထောက်များပင် ပျော့ခွေသွားခဲ့ရချေပြီ။ လင်းမြောင်မြောင် မိမိ၏ ဝတ်ရုံစွန်းကို ဆွဲကိုင်ထားမိရင်း လည်ပင်းကို ကျုံ့လိုက်မိကာ... မနေ့တုန်းက မိမိကိုယ်မိမိ အလွန်အမင်း စွမ်းလှပြီဟု ထင်မှတ်ထားခဲ့မိသမျှ ယခုအခါတွင်မူ ထိတ်လန့်ခြောက်ခြားနေခဲ့ရပြီ ဖြစ်သည်။
"ဒါဆို... အခု ငါတို့ ဘာဆက်လုပ်ကြမလဲ"
ဟုန်အာနျို မျက်မှောင်ကို တင်းကြပ်စွာ တွန့်ချိုးလိုက်သည်။ သူ အတိတ်က အတွေ့အကြုံများကို ခဏမျှ ပြန်လည် စဉ်းစားလိုက်ပြီးနောက်... အလျင်အမြန်ပင် ပြောလိုက်တော့သည် ...
"အခြေအနေတွေက ဒီလိုဖြစ်လာမှတော့... လက်ရှိ အရေးကြီးဆုံး တာဝန်က ဂိုဏ်းကို ချက်ချင်း ပြန်ပြီး ဂိုဏ်းချုပ်ထံ အစီရင်ခံဖို့ပဲ"
"ဂျူနီယာညီလေးချန်... မင်းနဲ့ငါ အဖွဲ့တစ်ဖွဲ့ကို ဦးဆောင်ပြီး ချုံးရှင်းဂိုဏ်းဆီကို အခုချက်ချင်း အရင်ဆုံး ပြန်ကြစို့"
"ကျန်းရှောက်ရှန်း... မင်းက ကျန်တဲ့လူတွေကို ဦးဆောင်ပြီး ဘေးပတ်ပတ်လည်က မြို့တွေဆီ သွားရောက်လျက် အားလပ်ရက် ခံစားနေကြတဲ့ အခြားဂိုဏ်းတူ မောင်နှမတွေကို အမြန်ဆုံး သွားရှာလိုက်"
"ရန်သူက အရှေ့ကို ရောက်နေပြီဆိုတော့... ငါတို့ ချုံးရှင်းဂိုဏ်းရဲ့ တပည့်တွေ အားလုံး အတူတကွ သေအတူ ရှင်အတူ တိုက်ကြတာပေါ့"
"ကောင်းပါပြီ" လူတိုင်း သဘောတူလိုက်ကြပြီးနောက်... အဖွဲ့နှစ်ဖွဲ့ ခွဲကာ စီမံကိန်းအတိုင်း ချက်ချင်း လှုပ်ရှားလိုက်ကြတော့သည်။
ချုံးရှင်းဂိုဏ်း…ဂိုဏ်းချုပ်၏ အခန်းမကြီးအတွင်း၌။
ဖန်ယွမ်သည် ကြီးမားလှသော ကုလားထိုင်ကြီးပေါ်တွင် ခြေထောက်တစ်ဖက် ချိတ်လျက် ထိုင်နေခဲ့ပြီး လက်ထဲတွင်မူ လတ်ဆတ်စွာ ခတ်ထားသော ဝိညာဉ်လက်ဖက်ရည်ခွက်ကို ကိုင်ဆောင်ထားမိသည်။
"ယွဲ့လင်... ဒီလက်ဖက်ရည်က အချိန်ကြာသွားပြီ သွန်ပစ်လိုက်ပြီး အသစ်တစ်ခွက် ထပ်ခတ်ခဲ့ဦး"
ယွဲ့လင် ဘေးနားတွင် မတ်တပ်ရပ်နေခဲ့ပြီး... သူမ၏ အဝတ်အစားများက လေပြင်းကြောင့် ညင်သာစွာ လွင့်ပျံနေခဲ့ကာ မျက်ခုံးအစုံမှာမူ ဒေါသကြောင့် တွန့်ချိုးနေခဲ့ရသည်။
ယခုအခါ ဂိုဏ်း၏ တပည့်အများစု တောင်အောက်သို့ ဆင်းသက်သွားခဲ့ကြပြီ ဖြစ်သဖြင့်... ကျယ်ဝန်းလှသော တောင်ထိပ်ကြီးတစ်ခုလုံး ခြောက်ကပ်ပြီး တိတ်ဆိတ်နေခဲ့သည်။ နေ့တိုင်း နေ့တိုင်း ဖန်ယွမ်သည် လက်ဖက်ရည်သောက်ခြင်း သို့မဟုတ် ငေးငိုင်နေခြင်းမှတစ်ပါး ဘာမျှ လုပ်ဆောင်ခြင်း မရှိချေ။ တကယ်လို့ ဒီအတိုင်းသာ ဆက်သွားနေဦးမယ်ဆိုရင်... အရှိန်အဟုန် အနည်းငယ် ရခါစ ရှိသေးသော ချုံးရှင်းဂိုဏ်းကြီးမှာ အတိတ်ကကဲ့သို့ ပျက်စီးခြင်းလမ်းစဉ်ဆီသို့ ပြန်လည် ရောက်ရှိသွားပေလိမ့်မည်။
သူမ လက်ဖက်ရည်အိုးကို ကောက်ယူကာ အပြင်ဘက်သို့ လှမ်းထွက်လာခဲ့ပြီး... သူမ၏ ကျောပြင်လေးထံမှ စိတ်ပျက်အားလျော့ခြင်း အရိပ်အယောင်များ ထွက်ပေါ်နေခဲ့သည်။ ဒါက ယနေ့အတွင်းမှာတင် သူမ တည်ပေးခဲ့ရသည့် တစ်ဆယ့်နှစ်အိုးမြောက် လက်ဖက်ရည် ဖြစ်နေခဲ့ပြီဖြစ်ရာ... ဖန်ယွမ်အနေဖြင့် သူမကို ဘယ်လောက်အထိ ထပ်ပြီး နှိပ်စက်နေဦးမလဲဆိုတာ မသိနိုင်တော့ချေ။
ဒီလို အားလပ်ချိန်မျိုး ရှိနေမည့်အစား... သူမအနေဖြင့် မိမိ၏ ကျင့်ကြံခြင်းအဆင့်ကို ပိုမို ခိုင်မာအောင် ပြုလုပ်ချင်နေခဲ့ပြီး အခြေခံအုတ်မြစ် တည်ဆောက်ခြင်းအဆင့်သို့ အမြန်ဆုံး ထပ်မံ ချိုးဖျက်ဝင်ရောက်ချင်နေခဲ့သည်။
သို့သော်လည်း သူမ မသိရှိခဲ့သည့် အချက်မှာ... ဖန်ယွမ်သည် လက်ဖက်ရည် သောက်ချင်နေခဲ့ခြင်း မဟုတ်ချေ။ သူသည် ယွဲ့လင်တစ်ယောက် အားလပ်ချိန် ရှိနေပြီး တင်ပလ္လင်ခွေထိုင်လျက် ကျင့်ကြံခြင်းကို ပြုလုပ်နေမည်ကို လုံးဝ မလိုလားသောကြောင့် သာ ဖြစ်သည်။
ဒီမိန်းမပျိုလေး၏ အရည်အချင်းက အလွန်အမင်း မြင့်မားလှသည်။ တကယ်လို့ သူမ၏ ကျင့်ကြံခြင်းအဆင့်ကို ထပ်မံ တိုးတက်ခွင့် ပေးလိုက်မယ်ဆိုရင်... စနစ် ၏ အကဲဖြတ်မှု ရောက်ရှိလာသည့် အခါတွင် ဂိုဏ်း၏ အဆင့်အတန်းက ထပ်မံပြီး မြင့်မားသွားပေလိမ့်မည်။ ထို့ကြောင့်... လက်ဖက်ရည်ခတ်ခိုင်းခြင်း၊ ရေလောင်းခိုင်းခြင်း၊ ကြမ်းပြင်လှည်းခိုင်းခြင်း၊ စားပွဲသုတ်ခိုင်းခြင်း စသည့် အချိန်ကုန်စေမည့် အလုပ်ကြမ်း မှန်သမျှကို ဖန်ယွမ်က ယွဲ့လင်တစ်ယောက်တည်းကိုသာ ခိုင်းစေနေခဲ့ခြင်း ဖြစ်သည်။
"ဂိုဏ်းချုပ်"
ယွဲ့လင် လက်ဖက်ရည် အိုးအသစ်ကို ကိုင်လျက် ပြန်လည် ရောက်ရှိလာခဲ့ပြီး နောက်ဆုံးတွင် စိတ်မထိန်းနိုင်တော့ဘဲ ရှေ့သို့ လှမ်းတက်လိုက်သည် ... "လက်ဖက်ရည် ရပါပြီ တကယ်လို့ အခြား ခိုင်းစရာ မရှိတော့ဘူးဆိုရင်... ယွဲ့လင် အိပ်ဆောင်ကို ပြန်ပြီး သီးသန့်ကျင့်ကြံချင်ပါတယ်"
"ဘာတွေ အလောတကြီး ဖြစ်နေရတာလဲ" ဖန်ယွမ် မျက်ခုံးကိုပင် မပင့်ဘဲ လက်ဖက်ရည်ခွက်ကို မြှောက်လျက် တစ်ကျိုက် သောက်လိုက်သည် ...
"အင်မော်တယ်လမ်းစဉ်ကို ကျင့်ကြံတယ်ဆိုတာ... မိမိရဲ့ စိတ်နှလုံးကို ကျင့်ကြံခြင်းပဲ မင်းက ဒီလောက်အထိ စိတ်မရှည်ဖြစ်နေရင်... ဘယ်လိုလုပ်ပြီး တာအိုနိယာမ တွေကို သဘောပေါက်နိုင်ပါ့မလဲ"
"ဒါပေမဲ့ နေ့တိုင်း ဒီလိုမျိုး အဓိပ္ပာယ်မရှိတဲ့ အလုပ်ကြမ်းတွေကိုပဲ လုပ်နေရတာ... စိတ်နှလုံးကို ကျင့်ကြံရာ မရောက်ပါဘူး..." ယွဲ့လင် တိုးတိုးလေး ရေရွတ်လိုက်ပြီးနောက်...
ရင်ထဲက ဒေါသများကို အတင်းအကျပ် ဖိနှိပ်လျက် အခြားတစ်ဖက်မှ နေ၍ မေးမြန်းလိုက်သည် ... "ဂိုဏ်းချုပ်... ဂိုဏ်းချုပ်ရဲ့ ရင်ထဲမှာ စိုးရိမ်ပူပန်စရာ ကိစ္စတစ်ခုခု ရှိနေလို့လား ဒါကြောင့်မို့လို့ ယွဲ့လင်ကို ဘေးနားမှာ အဖော်အဖြစ် ထားရှိပြီး အထီးကျန်တာတွေကို ဖြေဖျောက်နေတာလား"
"အထီးကျန်တာကို ဖြေဖျောက်ဖို့ ဟုတ်လား... မထင်ပါဘူး" ဖန်ယွမ် မျက်ခုံးကို ပင့်လိုက်ပြီးနောက် သက်ပြင်းအရှည်ကြီး တစ်ချက် ချလိုက်သည် ... "ဒါပေမဲ့... ငါ့ရဲ့ ရင်ထဲမှာ စိုးရိမ်ပူပန်စရာ ကိစ္စတစ်ခု ရှိနေတာတော့ အမှန်ပဲ..."
စနစ် ၏ တာဝန်ဖြစ်သော ဝိညာဉ်ကျောက်တုံး သုံးသန်းကို ဘယ်လိုမျိုး ကုန်ဆုံးအောင် သုံးပစ်ရမလဲ ပိုက်ဆံတွေက များလွန်းလှသည်... သူ ဘယ်လိုမှ သုံးပစ်လို့ မကုန်နိုင်ချေ။
အဆောက်အဦး ဆောက်လုပ်ရေး ရင်းမြစ်တွေ သွားဝယ်ရမလား... ထျန်းကုန်းဂိုဏ်း က အလွန်အမင်း ဇိမ်ခံဆန်လှသော ရေချိုးကန်ကြီးကို ဆောက်လုပ်ပေးထားခဲ့ပြီးပြီဖြစ်ရာ၊ ထပ်မံ ဆောက်လုပ်ခြင်းက အပိုအလုပ် ဖြစ်နေခဲ့သဖြင့် စနစ်ကလည်း အသိအမှတ်ပြုမည် မဟုတ်ချေ။
တပည့်တွေကို အကျိုးခံစားခွင့်တွေ ထပ်ပေးရမလား... တပည့်တွေ အားလုံးကလည်း အခုဆိုရင် စည်းစိမ်တွေ လျှံပယ်နေကြပြီ ဖြစ်သည်။ သူသည် ရတနာများ၊ ကျင့်စဉ်များနှင့် ဆေးလုံးများကိုလည်း လုံးဝ မဝယ်ယူရဲချေ။ တကယ်လို့ တပည့်တွေရဲ့ စွမ်းအားတွေ ထပ်ပြီး တိုးတက်သွားခဲ့ရင်... ဒါက သူ့အတွက် သေတွင်း ဖြစ်သွားပေလိမ့်မည်။
ဟူး... နေ့တိုင်း နိုးလာတိုင်းမှာ ဝိညာဉ်ကျောက်တုံး သုံးသန်း ကုန်ဆုံးအောင် သုံးရမည့် တာဝန် ရှိနေသည့် ခံစားချက်ကို... မည်သူကများ နားလည်ပေးနိုင်ပါ့မလဲ။
"ဒါပေမဲ့... ငါ့ရဲ့ စိုးရိမ်ပူပန်မှုတွေက မင်းနဲ့ ဘာမှမဆိုင်ပါဘူး၊ မင်းလည်း စိတ်ပူနေစရာ မလိုပါဘူး"
ဖန်ယွမ် တည်ငြိမ်စွာ ပြန်လည် ဖြေကြားလိုက်ရာ... ယွဲ့လင်တစ်ယောက် ဒေါသကြောင့် ပါးဖောင်းသွားခဲ့ရတော့သည်။
သူတို့နှစ်ဦး တိတ်ဆိတ်စွာ စိုက်ကြည့်နေကြစဉ်အတွင်း... ရုတ်တရက် ဂိုဏ်း၏ တံခါးဝအပြင်ဘက်မှနေ၍ ပြင်းထန်လှသော လေခွဲသံကြီးတစ်ခု ဝုန်းခနဲ ထွက်ပေါ်လာခဲ့တော့သည်။
ဖန်ယွမ် မိမိ၏ နတ်ဘုရားအာရုံ ကို ဝေ့ဝဲကြည့်လိုက်ပြီးနောက် မျက်မှောင်ကြုတ်သွားခဲ့ရသည်။ ချုံးရှင်းဂိုဏ်း၏ သာမန်ဝတ်စုံများကို ဝတ်ဆင်ထားကြသော တပည့်လူအုပ်ကြီးသည် တောင်ပေါ်သို့ အင်တိုက်အားတိုက် အပြေးအလွှား တက်လာနေကြခြင်း ဖြစ်သည်။ အရှေ့ဆုံးက ဦးဆောင်လာသူများမှာ အခြားသူများ မဟုတ်ဘဲ... ချန်ကျင်းတောက်နှင့် ဟုန်အာနျိုတို့ ဖြစ်ကြသည်။
"တောက်... ဒီကောင်တွေကတော့ကွာ"
အားလပ်ရက် မပေးခင်တုန်းက... သူ ပြင်းထန်လှသော ခြိမ်းခြောက်မှုကြီးတစ်ခု ပြုလုပ်ထားခဲ့ဖူးသည် ... ‘ဘယ်သူမဆို တစ်လအတွင်း ဂိုဏ်းကို ပြန်လာခဲ့မယ်ဆိုရင် ခြေထောက်ကို ရိုက်ချိုးပစ်မည်’ ဟု ဖြစ်သည်။
ဒီမြေခွေးလေးတွေက သူ၏ စကားလုံးများကို လေထဲက ဖုန်မှုန့်တွေလို သဘောထားနေကြတာလား။ သူတို့ အားလပ်ရက် သွားခဲ့ရတာ ရက်အနည်းငယ်မျှသာ ရှိသေးသော်လည်း... ယခုအခါ ဂိုဏ်းသို့ ပြန်လည် ရောက်ရှိလာခဲ့ကြချေပြီ။
ဖန်ယွမ် မတ်တပ်ရပ်လိုက်ပြီး အပြင်ဘက်သို့ ထွက်ကာ ထိုတပည့်များကို ဆဲဆိုရန် ပြင်ဆင်လိုက်စဉ်အတွင်း... ချန်ကျင်းတောက်နှင့် ဟုန်အာနျိုတို့ အခန်းမကြီးအတွင်းသို့ အလောတကြီး ဝင်ရောက်လာခဲ့ကြပြီး မြေပြင်ပေါ်သို့ ဝုန်းခနဲ ဒူးထောက်လိုက်သည်ကို မြင်တွေ့လိုက်ရတော့သည်။
"ဂိုဏ်းချုပ်... တပည့် အလွန်ကြီးမားတဲ့ ကပ်ဘေးတစ်ခုကို ဖန်တီးခဲ့မိလို့ ချုံးရှင်းဂိုဏ်းကို ဒုက္ခရောက်စေခဲ့ပါပြီ" ချန်ကျင်းတောက် ဦးခေါင်းကို မြေပြင်နှင့် စိုက်လျက် လေသံမှာ တုန်ရင်နေခဲ့ရှာသည်။
"တပည့် ကျန်းရှမြို့ကို ပြန်သွားတဲ့ အချိန်မှာ... မိသားစုအတွက် ကာကွယ်ပေးရင်းနဲ့ နက်မှောင်သစ်တောဂိုဏ်းက တပည့်နှစ်ယောက်ကို ပြင်းပြင်းထန်ထန် ဒဏ်ရာရအောင် လုပ်မိခဲ့ပါတယ်။ ကျွန်တော် နက်မှောင်သစ်တောဂိုဏ်းနဲ့ ရန်ငြိုးဖွဲ့မိသွားခဲ့ပြီလို့ ထင်ပါတယ်။ ဂိုဏ်းချုပ်အနေနဲ့ ကျွန်တော့်ကို အပြစ်ပေးပါဦး... တပည့် အပြစ်အားလုံးကို တစ်ယောက်တည်း ခေါင်းခံဖို့ အသင့်ပါပဲ"
ဟုန်အာနျိုသည်လည်း သူ၏ ရင်ဘတ်ထဲမှ ထူထဲလှသော စာအုပ်ငယ်ကို ဆွဲထုတ်လိုက်ပြီး လက်နှစ်ဖက်ဖြင့် ဦးခေါင်းထက်သို့ မြှောက်တင်လိုက်သည် ... "ဂိုဏ်းချုပ်... ဒါက တပည့် ညတွင်းချင်း စုံစမ်းလာခဲ့တဲ့ နက်မှောင်သစ်တောဂိုဏ်းရဲ့ သတင်းအချက်အလက်တွေပါ ရန်သူက အမှောင်ထဲမှာ ရှိနေပြီး ကျွန်တော်တို့က အလင်းထဲမှာ ရှိနေတာဆိုတော့... ဂိုဏ်းချုပ်အနေနဲ့ ကြိုတင် ပြင်ဆင်မှုတွေ ပြုလုပ်ထားနိုင်ဖို့ တောင်းဆိုပါတယ်"
ဖန်ယွမ် ကြောင်အသွားခဲ့ရသည်။
‘နက်မှောင်သစ်တောဂိုဏ်း ဟုတ်လား ရန်သူကို ရင်ဆိုင်ရမယ် ဟုတ်လား'
သူ သတင်းအချက်အလက် စာအုပ်ငယ်ကို ကောက်ယူလိုက်ပြီး စာမျက်နှာ အနည်းငယ်ကို ဒီအတိုင်း လှန်လှောကြည့်ရှုလိုက်သည်။
စာအုပ်အတွင်း၌ နက်မှောင်သစ်တောဂိုဏ်း၏ အင်အားအတန်းအစား၊ သူတို့ ကျူးလွန်ခဲ့သော ယုတ်မာမှုများနှင့်... ချန်ကျင်းတောက်နှင့် အခြားသော တပည့်များက သာမန်လူသား မိန်းမပျိုလေးတစ်ဦးအတွက်ကြောင့် နက်မှောင်သစ်တောဂိုဏ်းက အတွင်းစည်းတပည့်နှစ်ဦးကို ကျန်းရှမြို့၌ ဝက်ခေါင်းဖြစ်အောင်အထိ မည်သို့ ရိုက်နှက်ခဲ့ကြသလဲဟူသော အချက်များကို သေသေချာချာ သိပ်သည်းစွာ ရေးသားထားခဲ့ခြင်း ဖြစ်သည်။
ဖတ်ရှုပြီးနောက်... ဖန်ယွမ် လုံး၀ ဒေါသထွက်မသွားခဲ့ရုံတင်မကဘဲ ရင်ထဲတွင် အလွန်အမင်း ပျော်ရွှင် စိတ်လှုပ်ရှားသွားခဲ့ရတော့သည်။
ဒီတပည့်တွေက တကယ်ပဲ အလိုက်သိလွန်းလှသည်။ အားလပ်ရက် သွားနေတာတောင်မှ ဒီလောက်အထိ အစွမ်းထက်ပြီး ရက်စက်လှသော ဒေသတွင်း ဂိုဏ်းကြီးတစ်ခုကို ရန်သွားစနိုင်ခဲ့ကြသည်။
ထိုနက်မှောင်သစ်တောဂိုဏ်းဟူသည်မှာ ကြည့်ရတာ မည်သည့် အကြောင်းပြချက်ကိုမျှ ဂရုမစိုက်ဘဲ ရန်စသတ်ဖြတ်တတ်သော မိစ္ဆာဂိုဏ်းမျိုး သေချာပေါက် ဖြစ်ပေလိမ့်မည်။
သူတို့သာ ဂိုဏ်းတံခါးဝအထိ လာရောက် တိုက်ခိုက်ကြမယ်ဆိုရင်... သူက အခြေအနေကို ကြည့်ပြီး ဝိညာဉ်ကျောက်တုံး တစ်သန်း သို့မဟုတ် နှစ်သန်းလောက်ကို ဒီအတိုင်း လျော်ကြေးအဖြစ် ပေးအပ်လိုက်ရုံဖြင့်၊ စနစ် ၏ ဝိညာဉ်ကျောက်တုံး သုံးသန်း ကုန်ဆုံးအောင် သုံးရမည့် တာဝန်ကြီးမှာ လွယ်ကူစွာ ပြီးဆုံးသွားပေလိမ့်မည် မဟုတ်ပါလား။
တကယ်လို့ အခြေအနေတွေသာ ဒီထက်ပိုမို ကောင်းမွန်သွားခဲ့မယ်ဆိုရင်... သူတို့က ချုံးရှင်းဂိုဏ်း၏ အဆောက်အဦးအသစ်တွေကိုပါ ဖျက်ဆီးပစ်ကြလိမ့်မည်ဖြစ်ရာ၊ ထိုအခါကျရင် ဂိုဏ်း၏ အဆင့်အတန်းကလည်း ထပ်မံပြီး နိမ့်ကျသွားပေလိမ့်မည်။
"ကောင်းတယ်... တအားကို ကောင်းတာပဲ"
ဖန်ယွမ် မိမိ၏ ပေါင်ကို ဖြတ်ရိုက်လိုက်မိရင်း ရင်ထဲက ပျော်ရွှင်မှုများကို မထိန်းချုပ်နိုင်တော့ဘဲ အော်ဟစ်လိုက်တော့သည်။
မြေပြင်ပေါ်တွင် ဒူးထောက်နေကြဆဲ ဖြစ်သော ချန်ကျင်းတောက်နှင့် ဟုန်အာနျိုတို့ အချင်းချင်း မျက်လုံးချင်း ဆုံလိုက်ကြမိသည်။ ‘ဂိုဏ်းချုပ်က... တအားကို ကောင်းတယ်လို့ ပြောတာလား'
ချန်ကျင်းတောက်၏ ဦးနှောက်က အလျင်အမြန်ပင် လည်ပတ်သွားခဲ့ရတော့သည်။ ဂိုဏ်းချုပ်သည် နက်မှောင်သစ်တောဂိုဏ်းက အစွမ်းထက်ကြောင်း သိရှိထားသော်လည်း လုံးဝ ထိတ်လန့်ခြင်းမရှိခဲ့သလို မည်သည့် ဆဲဆိုပြစ်တင်မှုမျိုးမျှလည်း ပြုလုပ်ခြင်း မရှိခဲ့ချေ။ ဒါက ဘာကို ဆိုလိုတာလဲ။
ဒါက ဂိုဏ်းချုပ်အနေဖြင့် ထိုနက်မှောင်သစ်တောဂိုဏ်းကို မကျေမနပ် ဖြစ်နေခဲ့တာ ကြာပြီဖြစ်ကြောင်း ဆိုလိုခြင်း သာ ဖြစ်သည်။ သူတို့ကို တောင်အောက်သို့ အားလပ်ရက် လွှတ်လိုက်ခြင်းက... နက်မှောင်သစ်တောဂိုဏ်းကို ဖမ်းဆီးရန်အတွက် ရည်ရွယ်ချက်ရှိရှိ ငါးစာချခဲ့ခြင်း သာ ဖြစ်ပေလိမ့်မည်။
"ဂိုဏ်းချုပ်က ဒီလောက်အထိ အမြော်အမြင် ကြီးမားလိမ့်မယ်လို့ တပည့် လုံးဝ ထင်မထားခဲ့မိပါဘူး... တပည့် အလွန်အမင်း လေးစားမိရပါတယ်။ တပည့်အနေနဲ့ ဂိုဏ်းချုပ်ရဲ့ နယ်ရုပ်တစ်ရုပ်အဖြစ် အသုံးတော်ခံဖို့ အသင့်ပါပဲ" ချန်ကျင်းတောက်၏ မျက်ဝန်းများ နီမြန်းလာခဲ့ရပြီး မိမိကိုယ်မိမိ ခံစားချက်များဖြင့် ပြည့်နှက်အောင် ပြုလုပ်နေခဲ့ပြန်သည်။
"လစ်စမ်း" ဖန်ယွမ် ချန်ကျင်းတောက်၏ ဖင်ကို ခြေထောက်ဖြင့် ကန်ချလိုက်သည် ... "တစ်နေ့တစ်နေ့ အတွေးတွေ များမနေနဲ့... နားထောင်ရတာ တအား စိတ်ပျက်ဖို့ ကောင်းတယ်"
ဖန်ယွမ် ချန်ကျင်းတောက်ကို ဆက်ပြီး ဂရုမစိုက်နိုင်တော့ချေ။ သူ၏ စိတ်ထဲတွင်မူ ယခုအခါ ဒီအခွင့်အရေးကြီးကို အသုံးချလျက် ဝိညာဉ်ကျောက်တုံး သုံးသန်းလုံးကို မည်သို့ ကုန်ဆုံးအောင် သုံးပစ်ရမလဲဟူသော အချက်ကိုသာ တွေးတောနေခဲ့တော့သည်။
တစ်ချိန်တည်းမှာပင်... နက်မှောင်သစ်တောဂိုဏ်းအတွင်း၌မူ၊ရွှေအမြုတေအဆင့် အကြီးအကဲဖြစ်သော ‘ကျောက်ဝူကျိ ’ သည် ချန်ကျင်းတောက်နှင့် အခြားသော တပည့်များ၏ ပြင်းထန်စွာ ရိုက်နှက်ခြင်းကို ခံခဲ့ရသော အတွင်းစည်းတပည့်နှစ်ဦးကို မြင်တွေ့သွားခဲ့ရချေပြီ။