"ကတုံးကြီး... နောက်တစ်လှည့်က မင်းပဲဟေ့"
ချန်ကျင်းတောက်၏ အနောက်က ကျန်းရှောက်ရှန်းသည် ဒေါသတကြီး ဟိန်းဟောက်လိုက်ပြီး ဘေးနားရှိ သစ်သားခုံတန်းလျားကြီးတစ်ခုကို ကောက်ယူကာ... လေခွဲသံများနှင့်အတူ ထိုထွားကျိုင်းလှသော ကတုံးကြီးဆီသို့ ပြင်းထန်စွာ ရိုက်ချလိုက်တော့သည်။
ထိုကတုံးကြီးသည် ထိတ်လန့်တကြားဖြင့် မိမိ၏ ဓားရှည်ကို ဆွဲထုတ်ကာ ကာကွယ်လိုက်ရသည်။ လွင့်ပျံလာသော ခုံတန်းလျားကြီးမှာ ဓားချက်ကြောင့် နှစ်ပိုင်းပြတ်သွားခဲ့သော်လည်း... ကျန်းရှောက်ရှန်း၏ နောက်ဆက်တွဲ ဝုန်းခနဲ ကန်ချက်ကသာ အစစ်အမှန် တိုက်ကွက်ဖြစ်ချေပြီ။
သူသည် ထိုကတုံးကြီး၏ ဝမ်းဗိုက်ကို အားပြင်းပြင်းဖြင့် ကန်ချလိုက်ရာ... ထိုကတုံးကြီးသည် ချက်ချင်းပင် ပုစွန်ထုပ်တစ်ကောင်ကဲ့သို့ ခန္ဓာကိုယ်ကြီး လိမ်တွန့်သွားခဲ့ရပြီး လက်ထဲက ဓားရှည်ကြီးလည်း မြေပြင်ပေါ်သို့ ကျသွားခဲ့ရတော့သည်။
ချက်ချင်းပင်... ချုံးရှင်းဂိုဏ်းက တပည့် ဒါဇင်ပေါင်းများစွာ ဝိုင်းအုံလာခဲ့ကြပြီး လက်သီးများ၊ ခြေထောက်များဖြင့် ဝိုင်းဝန်း ထိုးနှက်ကန်ကျောက်ကြတော့သည်။ မီတာအမြောက်အမြား အကွာအဝေးသို့ လွင့်ထွက်သွားခဲ့သော နှာခေါင်းကောက်ကောက်နှင့် လူငယ်ပင်လျှင် အဝတ်စမှ ဆွဲခေါ်ခြင်း ခံလိုက်ရပြီး ပြင်းထန်စွာ အရိုက်ခံလိုက်ရရှာသည်။
ကျန်းရှောက်ရှန်းသည် တစ်ဖက်လူ၏ အရေးကြီးသော နေရာများကိုသာ အဓိကထားလျက် အားပြင်းပြင်း ကန်ကျောက်ရင်း ဆဲဆိုလိုက်သည် ... "မင်းက ငါ့မရီးရဲ့ ပိုက်ဆံကို ဘယ်လိုလုပ်ပြီး လုယူရဲရတာလဲ မင်းက ငါတို့ဂိုဏ်းကို ဘယ်လိုလုပ်ပြီး အဆင့်မရှိတဲ့ တောဂိုဏ်းလို့ ခေါ်ရဲရတာလဲ"
လင်းမြောင်မြောင်သည် အနောက်ဘက်တွင် ပုန်းအောင်းနေခဲ့ပြီး... ကျိုးကြေနေသော သစ်သားစတစ်ခုကို ကောက်ယူကာ၊ ထိုကတုံးကြီး၏ ဦးခေါင်းအနောက်ဘက်ကို ခိုးကြောင်ခိုးဝှက်ဖြင့် ဝုန်းခနဲ ရိုက်နှက်လိုက်ပြီးမှ ချက်ချင်း အပြေးအလွှား ပြန်လည် ပုန်းအောင်းနေခဲ့သည်။
မည်သည့် ဆန်းပြားလှသော မန္တန်မျိုးမျှ မပါဝင်ခဲ့သလို... ဆန်းကြယ်လှသော သိုင်းကွက်မျိုးလည်း မရှိခဲ့ချေ။ ရုပ်ပိုင်းဆိုင်ရာ အားအင်များဖြင့်သာ နှိပ်စက်ခြေမှုန်းနေခြင်း ဖြစ်သည်။
အမှန်တော့... သူတို့ ကျင့်ကြံနေကြသော ‘ထာဝရစိမ်းလန်း ဝိညာဉ်လမ်းညွှန်ကျင့်စဉ်’ ဟူသည်မှာ နက်နဲလှသော ကျင့်စဉ်မျိုး မဟုတ်သလို မည်သည့် တိုက်ခိုက်ရေး သိုင်းကွက်မျိုးကိုမျှလည်း သင်ကြားပေးထားခြင်း မရှိသောကြောင့် ဖြစ်သည်။
"အား... မရိုက်ပါနဲ့တော့"
"... ကယ်ပါဦး... အသက်ချမ်းသာပေးပါ"
ရှည်လျားလှသော လမ်းမကြီးပေါ်တွင်မူ... ပုံမှန်အားဖြင့် မာနကြီးပြီး မောက်မာလှသော နက်မှောင်သစ်တောဂိုဏ်း၏ အတွင်းစည်းတပည့်နှစ်ဦးမှာ၊ မိမိတို့ထက် ကျင့်ကြံခြင်းအဆင့် နိမ့်ကျလှသော ချီသန့်စင်ခြင်းအဆင့် ကျင့်ကြံသူတစ်စု၏ မြေပြင်ပေါ်တွင် ဖိနှိပ်ထားခြင်းကို ခံလိုက်ရပြီး... ပြန်လည် မခုခံနိုင်လောက်အောင်အထိ ပြင်းထန်စွာ ရိုက်နှက်ခြင်းကို ခံနေကြရရှာသည်။
ဘေးနားရှိ လမ်းသွားလမ်းလာထဲရှိ ကျင့်ကြံသူများအားလုံး ပါးစပ်အဟောင်းသား ဖြစ်သွားခဲ့ကြရသည်။ ထိုမြင်ကွင်းက ကျင့်ကြံသူများနှင့် ပတ်သက်၍ သူတို့၏ အသိပညာများကို လုံးဝ ပျက်ပြားသွားစေခဲ့သည်။
အဆင့်မြင့်မားသော ကျင့်ကြံသူက အဆင့်နိမ့်သော ကျင့်ကြံသူကို လွယ်ကူစွာ နှိမ်နင်းနိုင်သည်ဟူသော အချက်က ဘယ်ရောက်သွားသလဲ။ ဆန်းပြားလှသော မန္တန်တိုက်ပွဲများကော ဘယ်ပြေးပြီလဲ။
မိမိတို့ကိုယ်မိမိ ချုံးရှင်းဂိုဏ်းဟု ခေါ်ဝေါ်နေကြသော ထိုလူစုသည်... ဘာဖြစ်လို့ လမ်းဘေးက လူမိုက်ဂိုဏ်းများကဲ့သို့ ရန်ဖြစ်နေကြပြီး၊ ဒီလောက်အထိ ကြောက်မက်ဖွယ်ကောင်းသော တိုက်ခိုက်ရေးအင်အားများ ရှိနေကြရတာလဲ။
ချန်ကျင်းတောက် ဘေးနားတွင် မတ်တပ်ရပ်နေခဲ့ပြီး ထပ်မံ၍ ဝင်ရောက်တိုက်ခိုက်ခြင်း မပြုတော့ချေ။ သူသည် ကော့ရှောင်ယီဘက်သို့ လှည့်ကြည့်လိုက်ပြီး သူ၏ လေသံမှာ အလွန်အမင်း ညင်သာနေခဲ့သည် ... "အဆင်ပြေသွားပါပြီ... အစ်ကို ရှိနေတာပဲ"
ကော့ရှောင်ယီ အဝတ်အိတ်လေးကို ပိုက်ထားမိရင်း မျက်စိရှေ့မှအံ့သြဖွယ်ကောင်းသော မြင်ကွင်းကို ကြည့်ကာ နောက်ဆုံးတွင် ဝမ်းသာပီတိဖြစ်လျက် ခေါင်းကို ညိတ်လိုက်တော့သည်။
"အင်း... အစ်ကို ကျင်းတောက်က အကောင်းဆုံးပဲ"
မကြာမီအတွင်း... မြေပြင်ပေါ်က နက်မှောင်သစ်တောဂိုဏ်းက တပည့်နှစ်ဦးလုံးမှာ မျက်နှာတစ်ခုလုံး ညိုမည်းယောင်ကိုင်းသွားခဲ့ရပြီး သူတို့၏ မိခင်ရင်းပင် လာကြည့်ရင် မှတ်မိနိုင်တော့မည် မဟုတ်ချေ။ ချုံးရှင်းဂိုဏ်းက တပည့် ဒါဇင်ပေါင်းများစွာသည်လည်း နောက်ဆုံးတွင် တိုက်ခိုက်မှုကို ရုပ်သိမ်းလိုက်ကြတော့သည်။
သူတို့အားလုံးသည် လူကောင်းများ ဖြစ်ကြပြီး... ကျင့်ကြံခြင်းလောက၏ လှည့်စားမှုများကို အသားမကျသေးသဖြင့် တစ်ဖက်လူ၏ အသက်ကို ချမ်းသာပေးခဲ့ကြခြင်း ဖြစ်သည်။
ထိုအချိန်တွင်... နှာခေါင်းကောက်ကောက်နှင့် လူငယ်သည် မြေပြင်ပေါ်တွင် အားအင်ချိနဲ့စွာ လဲကျနေရင်း သွေးတစ်လုပ်ကို အန်ထုတ်လိုက်ရပြီး၊ သူ၏ မျက်ဝန်းများထဲက နာကျည်းမှုများကိုမူ မဖုံးကွယ်နိုင်ခဲ့ချေ။ သူ၏ စိတ်ထဲတွင် ကလဲ့စားချေဖို့ရန်သာ တွေးတောနေခဲ့ပြီး... နက်မှောင်သစ်တောဂိုဏ်းဆီသို့ ပြန်ရောက်သည်နှင့်တစ်ပြိုင်နက် ယနေ့ဖြစ်ရပ်များကို အကြီးအကဲများထက်သို့ ချက်ချင်း တိုင်ကြားရန် ကြံစည်နေခဲ့သည်။
သူ့အနေဖြင့် စကားလုံးများကို အနည်းငယ် ချဲ့ထွင်ပြီး... ဤလူစု၏ ကိုယ်ပေါ်တွင် ဝိညာဉ်ကျောက်တုံး အမြောက်အမြား ရှိနေကြောင်း ပြောပြလိုက်ရုံဖြင့်၊ နက်မှောင်သစ်တောဂိုဏ်းသည် ချုံးရှင်းဂိုဏ်းကို သေချာပေါက် ချေမှုန်းပစ်လိမ့်မည် မဟုတ်ပါလား။ ထိုအခါကျရင် သူ၏ ကလဲ့စားချေမှု အောင်မြင်သွားပေလိမ့်မည်။
သို့သော်လည်း... လက်ရှိအချိန်တွင် သူတစ်ပါး၏ လက်အောက်သို့ ရောက်ရှိနေသဖြင့် ခေါင်းကို ငုံ့ထားရုံသာ ရှိတော့သည်။ ယနေ့တွင်မူ သူ အောင့်အည်းသည်းခံရပေလိမ့်မည်။
"ချုံးရှင်းဂိုဏ်းက ကျင့်ကြံဖော်တို့ရယ်..."
နှာခေါင်းကောက်ကောက်နှင့် လူငယ်၏ မျက်ဝန်းထဲက ရက်စက်မှုများ ချက်ချင်း ပျောက်ကွယ်သွားခဲ့ရပြီး... သူ၏ ယောင်ကိုင်းနေသော မျက်နှာထက်တွင် အပြုံးများ ထွက်ပေါ်လာခဲ့သည် ...
"ကျွန်တော်တို့နှစ်ယောက်လုံး မှားသွားခဲ့ပါတယ် တောင်းပန်ပါတယ် နောက်တစ်ခါကျရင် ကျွန်တော်တို့ လုံးဝ မလုပ်ဝံ့တော့ပါဘူး"
"..."
ချုံးရှင်းဂိုဏ်းက ရိုးသားလှသော တပည့်များ အချင်းချင်း မျက်လုံးချင်း ဆုံလိုက်ကြမိသည်။
နောက်ဆုံးတွင်... ချန်ကျင်းတောက် ရှေ့သို့ တစ်လှမ်းတိုးလိုက်ပြီး အေးစက်စွာ ပြောလိုက်သည် ... "ငါတို့က မင်းတို့ကို သင်ခန်းစာတစ်ခု ပေးချင်ရုံတင်ပဲ... မင်းတို့က ကျင့်ကြံသူတွေဖြစ်နေလို့ ဆိုပြီးတော့ ဒီလိုမျိုး ယုတ်မာတဲ့ လုပ်ရပ်တွေကို အလွယ်တကူ မလုပ်ဆောင်သင့်ဘူး"
"အမှားကို သိပြီး ပြင်ဆင်တာက မွန်မြတ်တဲ့ လုပ်ရပ်ပဲ။ တကယ်လို့ နောက်တစ်ခါ မင်းတို့တွေ ဒီလိုမျိုး ယုတ်မာတာကို ငါတို့ ထပ်ပြီး တွေ့ရှိရဦးမယ်ဆိုရင်တော့... ဘယ်လိုမှ လွယ်လွယ်နဲ့ လွှတ်ပေးမှာ မဟုတ်ဘူး"
ချန်ကျင်းတောက်၏ စကားလုံးများကို ကြားရသောအခါ လင်းမြောင်မြောင်၊ ကျန်းရှောက်ရှန်းနှင့် အခြားသော တပည့်များက ခေါင်းကို အကြိမ်ကြိမ် ညိတ်လိုက်ကြတော့သည်။ ဒါက သူတို့၏ ရင်ထဲက စစ်မှန်သော ခံစားချက်များ ဖြစ်ကြသည်။
"..."
နှာခေါင်းကောက်ကောက်နှင့် လူငယ်နှင့် သူ၏ ဘေးနားက ကတုံးကြီးတို့သည် ဒီစကားလုံးများကို အလွန်အမင်း ရယ်စရာကောင်းသည်ဟု ထင်မှတ်နေခဲ့ကြသော်လည်း... အသက်ရှင်သန်ခွင့်ရပြီး မိမိတို့ဂိုဏ်းဆီသို့ ပြန်ခွင့်ရရှိသွားခဲ့သဖြင့် ကျေနပ်နေခဲ့ကြသည်။
"ကျေးဇူးတင်ပါတယ်... ချုံးရှင်းဂိုဏ်းက ကျင့်ကြံဖော်တို့… ကျွန်တော် ပြန်ရောက်တဲ့ အခါကျရင်... ချုံးရှင်းဂိုဏ်းရဲ့ ကောင်းမြတ်လှတဲ့ လုပ်ရပ်တွေကို သေချာပေါက် ကြေညာပေးပါ့မယ် ကျွန်တော်လည်း မင်းတို့ဆီကနေ သင်ယူနိုင်ဖို့ ကြိုးစားပါ့မယ်"
စကားပြောနေစဉ်အတွင်းပင်... ထိုလူနှစ်ဦး အချင်းချင်း တွဲဖက်လျက်၊ အတင်းအကျပ် ပြုံးပြရင်း ဆိုင်အပြင်ဘက်သို့ ဒီယိမ်းဒယိုင် ထွက်ခွာသွားကြတော့သည်။
ထိုလူနှစ်ဦး ထွက်ခွာသွားသည်ကို မြင်ရသည့် အခါကျမှသာ... ချုံးရှင်းဂိုဏ်းက တပည့် ဒါဇင်ပေါင်းများစွာ စိတ်အေးသွားခဲ့ကြရပြီး မျက်နှာထက်တွင် ပျော်ရွှင်မှုများ ပြည့်နှက်သွားခဲ့ကြတော့သည်။ သူတို့အားလုံး အလွန်အမင်း စိတ်လှုပ်ရှားနေခဲ့ကြပြီး... တစ်ယောက်တစ်ပေါက်ဖြင့် စောစောက တိုက်ပွဲအကြောင်းကို ပြန်လည် ဆွေးနွေးနေကြတော့သည်။
"ကျန်းရှောက်ရှန်း... မင်းစောစောက သုံးလိုက်တဲ့ တိုက်ကွက်က ‘နက်မှောင်သောကျား သစ်သားနှလုံးသားကို ခိုးယူခြင်း’ လား... မဟုတ်ပါဘူး၊ ဒါက ခြေထောက်ကြားကို ပျံသန်းကန်လိုက်တဲ့ တိုက်ကွက်ပဲ တအား လန်းတယ်"
"ဟာဟာ... မင်းစောစောက အဲဒီ ကတုံးကြီးရဲ့ မျက်နှာ စိမ်းဖတ်သွားတာကို မမြင်လိုက်ဘူးလား ငါ လောင်းရဲတယ်... သူ တစ်သက်လုံး အဲဒီ ခံစားချက်ကို မေ့နိုင်တော့မှာ မဟုတ်ဘူး"
ကျန်းရှောက်ရှန်း လက်နှစ်ဖက်ကို ခါးထောက်လိုက်ပြီး မာနတကြီးဖြင့် မေးစေ့ကို ပင့်လိုက်သည် …
"ဒါပေါ့…ကျွန်တော်တို့တွေ ဆန်းပြားလှတဲ့ အင်မော်တယ်ကျင့်စဉ်တွေကို မသင်ယူခဲ့ရဘူး ဆိုပေမဲ့... ဂိုဏ်းချုပ် ပေးအပ်ထားတဲ့ ဝိညာဉ်သားရဲအသားတွေကိုတော့ အလကား စားခဲ့တာ မဟုတ်ဘူး။ အခုဆိုရင် ကျွန်တော် လက်သီးတစ်ချက်တည်းနဲ့ နွားတစ်ကောင်ကို သတ်ပစ်နိုင်တယ်လို့ ခံစားနေရတယ်"
"နွားတစ်ကောင်တင် ဘယ်ကမလဲ"
တပည့်တစ်ဦးက မိမိ၏ လက်သီးကို ကျစ်ကျစ်ပါအောင် ဆုပ်လိုက်ပြီး ခန္ဓာကိုယ်အတွင်း၌ စီးဆင်းနေသော ချီစွမ်းအားများကို ခံစားလိုက်ရင်း စိတ်လှုပ်ရှားစွာ ပြောလိုက်သည် ...
"ကျွန်တော်ဆိုရင် အရင်က ကျွန်တော့်ရဲ့ ခန္ဓာကိုယ် ဆယ်ခုလောက်ကိုတောင် အေးဆေး မနိုင်တယ်လို့ ခံစားရတယ်။ ဒါက ကျင့်ကြံသူတစ်ဦးရဲ့ စွမ်းအားလား... တအားကို ကျေနပ်ဖို့ ကောင်းတာပဲ"
ဤစကားလုံးများကြောင့် လူတိုင်း၏ ရင်ထဲတွင် ဖော်ပြမတတ်နိုင်သော စိတ်လှုပ်ရှားမှုများ ချက်ချင်း ထွက်ပေါ်လာခဲ့တော့သည်။
မှန်ပေသည်…လွန်ခဲ့သော အချိန်တုန်းက သူတို့အားလုံးသည် အောက်ခြေလူတန်းစားများ သာ ဖြစ်ခဲ့ကြသည်။
ကျင့်ကြံသူများကို မြင်တွေ့ဖို့ နေနေသာသာ... ရွာက လူမိုက်များ သို့မဟုတ် မြို့က သူဌေးကြီးများကို မြင်တွေ့ရလျှင်ပင်၊ တစ်ဖက်လူက မိမိကို စိတ်အလိုမကျ၍ ရိုက်နှက်ဆဲဆိုမှာ စိုးရိမ်သဖြင့် ခေါင်းငုံ့ပြီး အရိုအသေ ပေးခဲ့ကြရသည်။
သို့သော်လည်း ယနေ့တွင်... သူတို့သည် ဂိုဏ်းကြီးတစ်ခု၏ တပည့် နှစ်ဦးကို မြေပြင်ပေါ်တွင် ဖိနှိပ်ထားပြီး ရွှံ့နွံထဲ ရောက်အောင်အထိ ရိုက်နှက်နိုင်ခဲ့ကြချေပြီ။ ဒီလို အဆင့်အတန်း ပြောင်းလဲသွားမှုနှင့် စွမ်းအားများကြောင့် ရရှိလာသည့် ရိုက်ခတ်မှုများက... ကျင့်ကြံခြင်းအဆင့် တိုးတက်လာခြင်းထက်ပင် သူတို့၏ သွေးများကို ပိုမို ဆူပွက်စေခဲ့သည်။
"နောက်နောင်ကျရင်... ဘယ်သူက ငါတို့ကို အမှိုက်လို့ ထပ်ပြောရဲသေးလဲ"
"အခြားဂိုဏ်းက ကျင့်ကြံသူတွေ ဟုတ်လား... နောက်နောင် ငါတို့ကို ရန်လာစတဲ့ အကြိမ်တိုင်း ဝိုင်းရိုက်ပစ်မယ်"
ချန်ကျင်းတောက် မိမိ၏ ဂိုဏ်းတူ မောင်နှမများ၏ မျက်နှာထက်က လျှံထွက်နေသော ယုံကြည်ချက်များကို ကြည့်ရင်း သူ၏ ရင်ထဲတွင် ခံစားချက်မျိုးစုံ ထွက်ပေါ်လာခဲ့သည်။ သူတို့အားလုံးသည် သူတို့ ‘ချုံးရှင်းဂိုဏ်း’ သို့ ဝင်ရောက်ခွင့်ရခဲ့ပြီး ဖန်ယွမ်နှင့် တွေ့ဆုံခွင့်ရခဲ့၍သာ ကံကြမ္မာကို ပြောင်းလဲနိုင်ခဲ့ခြင်း ဖြစ်သည်။
သူ ခါးကို ညွတ်လိုက်ပြီး မြေပြင်ပေါ်က ဖရိုဖရဲဖြစ်နေသော ဝိညာဉ်ကျောက်တုံးများကို ကောက်ယူလိုက်ကာ... တုန်လှုပ်ခြောက်ခြားနေသော ဆိုင်ရှင်အဘိုးကြီးထံမှ ငွေပြား ငါးသောင်းတန် ငွေစက္ကူများနှင့် လဲလှယ်လိုက်ပြီးနောက်၊ ကော့ရှောင်ယီ၏ လက်ကို ဆွဲလိုက်သည် ... "သွားကြစမ်းစို့... မင်းအဖေအတွက် ဆေးဝါးတွေ သွားဝယ်ပြီး အိမ်ဟောင်းကြီးကိုလည်း သွားရွေးကြတာပေါ့"
ကော့ရှောင်ယီ ခေါင်းကို အားပြင်းပြင်း ညိတ်လိုက်ပြီး... သူမ၏ မျက်ဝန်းများထဲတွင် ကိုးကွယ်ယုံကြည်မှုများနှင့် ချစ်ခြင်းမေတ္တာများ ပြည့်နှက်နေလျက် ချန်ကျင်းတောက်ကို စိုက်ကြည့်နေမိရှာသည်။
တစ်နာရီခန့် ကြာပြီးနောက်၊ ထျန်းရှန်းမျှော်စင်၏ ဒုတိယထပ်၌။
ချန်ကျင်းတောက်နှင့် လူအုပ်ကြီးသည် ဆေးဝါးအိတ်များနှင့် အိမ်ပိုင်ဆိုင်မှု စာချုပ်အသစ်စက်စက်ကို ကိုင်ဆောင်လျက် ပြန်လည် ရောက်ရှိလာခဲ့ကြရာ... ဒုတိယထပ်တစ်ခုလုံး ချက်ချင်းပင် ဆူညံသွားခဲ့တော့သည်။
စားသောက်ဆိုင်အတွင်း၌ ကျန်ရှိနေခဲ့ပြီး အပြင်မထွက်ခဲ့ကြသော တပည့်များသည်... ကျန်းရှောက်ရှန်းနှင့် အခြားသော လူများ၏ ၀မ်ပေါင်ဆိုင်အတွင်းက တိုက်ပွဲအကြောင်းကို ကွက်ကွက်ကွင်းကွင်း ပြန်လည် ပြောပြချက်များကို ကြားရသောအခါ၊ မိမိတို့၏ ရင်ဘတ်ကို တီးလျက် နောင်တရလွန်းသဖြင့် အူမကြီးများပင် စိမ်းဖတ်သွားခဲ့ရတော့သည်။
"အိုင်း... ကျွန်တော် ဒီနေ့မနက် လျှို့ဝှက်စွာ ကျင့်ကြံမနေခဲ့သင့်ဘူး လွဲချော်သွားခဲ့ပြီ... အားလုံးကို လွဲချော်သွားခဲ့ပြီ"
"ဘုရားရေ... မင်းတို့ မမြင်လိုက်လို့ပါ၊ အဲဒီ နက်မှောင်သစ်တောဂိုဏ်းက တပည့်တွေဆိုရင် ရိုက်နှက်ခံရလွန်းလို့ ဝက်ခေါင်းတွေလို ဖြစ်သွားတာ"
"ကျွန်တော်သာ ကြိုတင်သိခဲ့ရင် သေချာပေါက် လိုက်လာမှာပေါ့ ချီသန့်စင်ခြင်းအဆင့် ထိပ်ဆုံးသို့ ရောက်နေတဲ့ ကျင့်ကြံသူတစ်ဦးကို မြေပြင်ပေါ်မှာ ဖိနှိပ်ထားပြီး ရိုက်နှက်ရတဲ့ ခံစားချက်က ဘယ်လိုမျိုးလဲဆိုတာကို ကျွန်တော်လည်း စမ်းသပ်ကြည့်ချင်တာပေါ့"
ဒုတိယထပ်တစ်ခုလုံးတွင် ပျော်ရွှင်မြူးတူးဖွယ်ကောင်းသော အငွေ့အသက်များ ပြည့်နှက်နေခဲ့သည်။ တပည့်များသည် ချန်ကျင်းတောက်နှင့် ကော့ရှောင်ယီတို့ကို ဝိုင်းရံထားကြပြီး အရက်ခွက်များကို မြှောက်လျက် ဂုဏ်ပြုနေကြတော့သည်။
သူတို့သည် မိမိတို့ကိုယ်မိမိ ချီသန့်စင်ခြင်းအဆင့်ရှိ ကျင့်ကြံသူအသေးစားလေးများသာ ဖြစ်ကြသေးကြောင်း မေ့လျော့နေခဲ့ကြသလို... နက်မှောင်သစ်တောဂိုဏ်းသည် မိုင်တစ်ရာပတ်လည်အတွင်း၌ အကြီးဆုံးသော ဂိုဏ်းကြီးတစ်ခု ဖြစ်နေကြောင်းကိုလည်း မေ့လျော့နေခဲ့ကြပုံရသည်။ သူတို့၏ ရိုးသားလှသော အတွေးအခေါ်အရ... နိုင်ရင် နိုင်တာပဲဖြစ်ပြီး၊ တစ်ဖက်လူက အရှုံးပေးသွားခဲ့ရင် ကြောက်ရွံ့သွားခြင်း သာ ဖြစ်သည်။
လူတိုင်း ဆူညံစွာ စနောက်နေကြစဉ်အတွင်း... တတိယထပ်က အိပ်ခန်းတံခါးတစ်ခု ဂျိမ်းခနဲ ပွင့်ထွက်သွားခဲ့သည်။
ဟုန်အာနျိုသည် မည်သည့် ခံစားချက်မျိုးမျှမရှိသော မျက်နှာထားဖြင့် လှမ်းထွက်လာခဲ့သည်။ သူသည် လွန်ခဲ့သော လေးနာရီလုံးလုံး ‘ထာဝရစိမ်းလန်း ဝိညာဉ်လမ်းညွှန်ကျင့်စဉ်’ ကို လှည့်ပတ်ကျင့်ကြံနေခဲ့ခြင်း ဖြစ်ပြီး... သူ၏ ခန္ဓာကိုယ်အတွင်းရှိ အရှိန်အဝါများမှာလည်း ပေါက်ကွဲထွက်တော့မည့် မြစ်ရေကြီးကဲ့သို့ ဖြစ်နေခဲ့ကာ၊ အခြေခံအုတ်မြစ် တည်ဆောက်ခြင်းအဆင့်သို့ ချိုးဖျက်ဝင်ရောက်တော့မည့် အရိပ်အယောင်များ ပြသနေခဲ့သည်။
သို့သော်လည်း ထိုအချိန်တွင်... သူ၏ အာရုံစူးစိုက်မှုအားလုံးမှာ အောက်ထပ်က ဆူညံသံများကြောင့် လုံးဝ ဆွဲဆောင်ခြင်း ခံလိုက်ရတော့သည်။ ဟုန်အာနျို လှေကားထိပ်သို့ လှမ်းလျှောက်လာခဲ့ပြီး... အခန်းမကြီးအတွင်း၌ အောင်ပွဲခံနေကြသော ဂျူနီယာညီလေးများနှင့် ညီမလေးများကို ငုံ့ကြည့်လိုက်မိသည်။
ကျန်းရှောက်ရှန်း၏ ကြွားဝါလှသော စကားလုံးတစ်လုံးချင်းစီတိုင်းက... သူ၏ မျက်ခုံးများကို ပိုမို တွန့်ချိုးသွားစေခဲ့သည်။
‘နက်မှောင်သစ်တောဂိုဏ်းက အတွင်းစည်းတပည့်တွေကို ရိုက်နှက်လိုက်တယ် ဟုတ်လား'
‘သူတို့က အမှားကို ဝန်ခံသွားတယ် ဟုတ်လား'
‘သူတို့ကို ဒီအတိုင်း ပြန်လွှတ်ပေးလိုက်တယ် ဟုတ်လား'
"ဟူး..." ဟုန်အာနျို သက်ပြင်းချလိုက်မိသည်။
ဒီဂျူနီယာညီလေးများနှင့် ညီမလေးများသည်... ဘာပဲပြောပြော အလွန်အမင်း ရိုးအ သေးသည်။ ကျင့်ကြံခြင်းလောကတွင်... ‘အမှားကို သိပြီး ပြင်ဆင်ခြင်း’ ဟူသော အရာက ဘယ်မှာ ရှိပါ့မလဲ။ နက်မှောင်သစ်တောဂိုဏ်းဟူသည်မှာ မိုင်တစ်ရာပတ်လည်အတွင်း၌ အာဏာရှိလှသော ဂိုဏ်းကြီးတစ်ခု ဖြစ်နေခဲ့ရာ... သူတို့၏ ဂိုဏ်းတွင်း လုပ်ဆောင်ချက်များက ပိုမို ရက်စက်ကြမ်းကြုတ်လှသည်။
ယခုအခါ... အတွင်းစည်းတပည့်နှစ်ဦးလုံးမှာ သာမန်လူသား မြို့ငယ်လေးတစ်ခုအတွင်း၌ ဘာမဟုတ်သော လူစုတစ်ခု၏ ပြင်းထန်စွာ ရိုက်နှက်ခြင်းကို ခံလိုက်ရခြင်းက၊ နက်မှောင်သစ်တောဂိုဏ်း၏ မျက်နှာကို အားပြင်းပြင်းဖြင့် ဖြတ်ရိုက်လိုက်ခြင်း သာ ဖြစ်သည်။ ထိုလူနှစ်ဦး ဂိုဏ်းသို့ ပြန်ရောက်သွားသည့် အခါတွင်မူ... စကားလုံးများကို ချဲ့ထွင်လျက် အကြီးအကဲများထက်သို့ သေချာပေါက် တိုင်ကြားကြပေလိမ့်မည်။
ထိုအချိန်ကျရင် နက်မှောင်သစ်တောဂိုဏ်းဘက်မှ စေလွှတ်လာမည့်သူများမှာ ချီသန့်စင်ခြင်းအဆင့် တပည့်များ မဟုတ်တော့ဘဲ... အခြေခံအုတ်မြစ် တည်ဆောက်ခြင်းအဆင့် တာဝန်ခံများ၊ သို့မဟုတ်ရွှေအမြုတေအဆင့် အကြီးအကဲများပင် ဖြစ်လာနိုင်ချေ ရှိသည်။
ချုံးရှင်းဂိုဏ်းတွင်မူ နက်ရှိုင်းလှသော နောက်ခံအာဏာများ ရှိနေခဲ့ပြီး ဖန်ယွမ်ကလည်း နတ်ဝိညာဉ်အဆင့် အစွမ်းထက် ပုဂ္ဂိုလ်ကြီးတစ်ဦး ဖြစ်နေခဲ့သော်လည်း... တကယ်လို့ နက်မှောင်သစ်တောဂိုဏ်းက လူများကို လျှို့ဝှက်စွာ စေလွှတ်လျက် ကျန်းရှမြို့တွင် လုပ်ကြံမှုများ ပြုလုပ်ရင်ဖြစ်စေ၊ သို့မဟုတ် ချုံးရှင်းဂိုဏ်းကို လျှို့ဝှက်စွာ ဝင်ရောက်တိုက်ခိုက်ရင်ဖြစ်စေ... ကြိုတင်ပြင်ဆင်မှုမရှိသော ဂိုဏ်းတူ မောင်နှမများနှင့် ဂိုဏ်းချုပ်တို့ ဘာလုပ်ကြမလဲ။
"မဖြစ်ဘူး... ငါ ကြိုတင်ပြင်ဆင်မှုတွေ လုပ်ရမယ်" ဟုန်အာနျို မိမိကိုယ်မိမိ တိုးတိုးလေး ရေရွတ်လိုက်ရင်း လက်သီးကို ကျစ်ကျစ်ပါအောင် ဆုပ်လိုက်သည်။
သူသည် နောက်ဆုံးတွင် မိသားစုဝင်တစ်စုနှင့် နွေးထွေးသော အိမ်တစ်အိမ်ကို ရှာဖွေတွေ့ရှိထားခဲ့ပြီ ဖြစ်သည်။ သူ့အနေဖြင့် ချုံးရှင်းဂိုဏ်းအတွက် မိမိ၏ အစွမ်းကုန် ကြိုးစားအားထုတ်ပေးရပေလိမ့်မည်။
ဟုန်အာနျို လူတိုင်း၏ ပျော်ရွှင်မှုများကို မဖျက်ဆီးချင်သဖြင့် အောက်ထပ်သို့ လှမ်းဆင်းမသွားခဲ့ချေ။ သူသည် အိပ်ခန်းအတွင်းသို့ တိတ်ဆိတ်စွာ ပြန်လည် ဝင်ရောက်လိုက်ပြီး... တတိယထပ်က ပြတင်းပေါက်မှနေ၍ အောက်သို့ ဝုန်းခနဲ ခုန်ချလိုက်တော့သည်။
စားသောက်ဆိုင်၏ အနောက်ဘက် လမ်းကြားလေးအတွင်းသို့ ဘေးကင်းစွာ ဆင်းသက်လိုက်ပြီးနောက်... သူ မိမိ၏ ရင်ဘတ်အတွင်းသို့ လက်လှမ်းလျက်၊ အဆင့်နိမ့် ဝိညာဉ်ကျောက်တုံး ငါးရာ ပြည့်နှက်နေသော သိုလှောင်မှုအိတ် ကို စမ်းသပ်ကြည့်လိုက်သည်။
‘ငွေရှိရင် နတ်ဘုရားကိုပင် ကြိတ်ဆုံ တွန်းခိုင်းလို့ ရသည်’ မဟုတ်ပါလား။
မြို့တိုင်းတွင် မှောင်ခိုဈေးကွက် ဟူ၍ ရှိစမြဲဖြစ်ပြီး... ထိုမှောင်ခိုဈေးကွက်အတွင်း၌လည်း နယ်ပယ်စုံက သတင်းရောင်းဝယ်သူများ သေချာပေါက် ရှိနေပေလိမ့်မည်။
သူတို့အနေဖြင့် နက်မှောင်သစ်တောဂိုဏ်းနှင့် ရန်ငြိုးဖွဲ့မိသွားခဲ့ပြီဖြစ်ရာ... အရင်ဆုံး သတင်းအချက်အလက်များကို ကြိုတင် စုဆောင်းထားရပေလိမ့်မည်။ မိမိကိုယ်မိမိ သိပြီး ရန်သူကိုလည်း သိရှိထားမှသာလျှင် တိုက်ပွဲတိုင်းတွင် အောင်ပွဲခံနိုင်မည် မဟုတ်ပါလား။
ဒါ့အပြင်... သူ အလျင်အမြန်ပင် လှုပ်ရှားရပေလိမ့်မည်။
ထိုနက်မှောင်သစ်တောဂိုဏ်းက တပည့်များ မိမိတို့ဂိုဏ်းဆီသို့ မပြန်နိုင်ခင်မှာတင်... သူ ဒီဂျူနီယာညီလေးများနှင့် ညီမလေးများကို ချုံးရှင်းဂိုဏ်းဆီသို့ ဘေးကင်းစွာ အမြန်ဆုံး ပြန်လည် ခေါ်ဆောင်သွားရမည်ဖြစ်ပြီး၊ ထိုအကြောင်းအရာအားလုံးကိုလည်း ဂိုဏ်းချုပ်ထံသို့ ချက်ချင်း အစီရင်ခံ တင်ပြရပေလိမ့်မည်။