"စီနီယာအစ်မ... ဒီနေရာက ကျွန်မတို့ ကျင့်ကြံတဲ့ နေရာလေ"
လင်းမြောင်မြောင်က အဝတ်အစားများထည့်ထားသော ရေချိုးပုံးလေးကို ကိုင်လျက် ပြုံးရွှင်စွာ မိတ်ဆက်ပေးလိုက်သည်။
"အစ်ကိုကျင်းသောက် ပြောပြတာတော့... ဒီရေချိုးဆောင်ကြီးကို ဂိုဏ်းချုပ်က ဝိညာဉ်ကျောက်တုံး တစ်သန်းအကုန်ခံပြီး ဆောက်ပေးထားတာတဲ့… အံ့သြစရာကြီး မဟုတ်ဘူးလားဟင်"
"ဝိညာဉ်ကျောက်တုံး တစ်သန်း ဟုတ်လား…ဒါ... ဒါက တကယ့်ကို အဓိပ္ပာယ်မရှိတာပဲ" ယွဲ့လင် ဒေါသထွက်လွန်းသဖြင့် တုန်ရင်နေခဲ့ရသည်။
"အဲဒီပိုက်ဆံတွေနဲ့ ဆေးလုံးတွေ အများကြီးဝယ်ရင် ပိုမကောင်းဘူးလား ဒီလောက်အထိ ခမ်းနားလှတဲ့ ရေချိုးဆောင်ကြီးကို ဘယ်သူ့အတွက် ဆောက်ပေးထားတာလဲ"
"စီနီယာအစ်မကလည်း... စမ်းကြည့်လိုက်ရင် သိရမှာပေါ့…တကယ့်ကို နေလို့ကောင်းတာ"
လင်းမြောင်မြောင်သည် ယွဲ့လင်ကို ငြင်းဆန်ခွင့်မပေးဘဲ အမျိုးသမီး ရေချိုးဆောင်အတွင်းသို့ အတင်းဆွဲခေါ်သွားခဲ့တော့သည်။
ပင်မတံခါးကြီးကို ဖြတ်သန်းလိုက်သည်နှင့် နွေးထွေးလှသော မြူခိုးလှိုင်းတစ်ခုက သူတို့ထံသို့ ရိုက်ခတ်လာခဲ့သည်။ ၎င်းက သာမန်ရေနွေးငွေ့မဟုတ်ဘဲ ကရမက်နံ့သင်းသင်းနှင့် အားနည်းသော ဝိညာဉ်စွမ်းအင်များ ပေါင်းစပ်နေသည့် မြူခိုးများ ဖြစ်သည်။
ကြမ်းပြင်ကို ကျောက်စိမ်းနွေးများဖြင့် ခင်းကျင်းထားသဖြင့် ခြေဗလာဖြင့် နင်းလိုက်သည်နှင့် နွေးထွေးသော စွမ်းအင်စီးကြောင်းတစ်ခုက ခြေဖဝါးမှတစ်ဆင့် ဦးခေါင်းထိပ်အထိ စိမ့်ဝင်သွားခဲ့ရသည်။ အဝတ်လဲဆောင်ကို ကျော်ဖြတ်လိုက်သောအခါ... မြင်ကွင်းက ရုတ်တရက် ကျယ်ပြန့်သွားခဲ့ချေပြီ။
ရှေ့မှာက သိုင်းကွင်းပြင်တစ်ခု၏ ထက်ဝက်ခန့် ကျယ်ဝန်းသော အလွန်ကြီးမားလှသည့် ရေချိုးကန်ကြီး ဖြစ်သည်။ ကန်အောက်ခြေတွင် အမျိုးမျိုးသော ရတနာကျောက်မျက်ရတနာများကို ခင်းကျင်းထားသဖြင့် လှိုင်းထနေသော ရေမျက်နှာပြင်အောက်တွင် တလက်လက် တောက်ပနေခဲ့သည်။
လက်ရှိတွင် ရေချိုးကန်ကြီးမှာ မြူခိုးများဖြင့် ဖုံးလွှမ်းနေပြီး အမျိုးသမီးတပည့် ဆယ်ဂဏန်းခန့်မှာ ရေထဲတွင် ခေါင်းလေးများသာ ဖော်လျက် မျက်လုံးများကို မှိတ်ကာ တရားထိုင်သကဲ့သို့ ထိုင်နေကြသည်။ ရေစီးဆင်းသံများလည်း တဖျန်းဖျန်း မြည်ဟည်းနေခဲ့သည်။
ယွဲ့လင်သည် ရေထွက်ပေါက်မှ စီးကျလာသော ရေများထဲတွင် အားနည်းသော ဝိညာဉ်စွမ်းအင်များ မျောပါနေသည်ကို အကဲခတ်မိလိုက်သည်။ ထိုဝိညာဉ်စွမ်းအင်များက အလွယ်တကူ ပျယ်လွင့်သွားတတ်သော်လည်း စီးဆင်းလာသော ပမာဏမှာ အလွန်အမင်း များပြားလှပေသည်။ ဤနေရာ၏ ဝိညာဉ်စွမ်းအင် သိပ်သည်းဆမှာ ယခင်က ဝိညာဉ်စုဆောင်းအစီအရင် ရှိခဲ့သော အိပ်ဆောင်ဟောင်းများထက်ပင် အဆပေါင်းများစွာ ပိုမိုမြင့်မားနေခဲ့သည်။
"စီနီယာအစ်မ... ဆင်းလာခဲ့လေ"
လင်းမြောင်မြောင်ကမူ ကျွမ်းကျင်စွာဖြင့် ဝတ်ရုံများကို ချွတ်ပစ်လိုက်ပြီး ကန်ထဲသို့ ဗြုန်း ကနဲ ခုန်ချကာ စိတ်ကျေနပ်မှုအပြည့်ဖြင့် သက်ပြင်းချလိုက်သည်။
ယွဲ့လင်သည် ကန်ဘေးတွင် ရပ်လျက် မျက်မှောင်ကြုတ်နေမိသည်။
‘ဒီရေက... တစ်ခုခုတော့ မှားနေပြီ'
သူမသည် ထိုင်ချလိုက်ပြီး သူမ၏ သွယ်လျသော လက်ချောင်းလေးဖြင့် နွေးထွေးလှသော ကန်ရေကို အသာအယာ တို့ထိကြည့်လိုက်သည်။ အပေါ်ယံကြည့်လျှင် ဘာမှ ထူးခြားမှု မရှိသော်လည်း... သူမ၏ ကျင့်ကြံခြင်း စွမ်းအင်ကို အနည်းငယ် နှိုးဆွလိုက်သောအခါ...
ဝူး...
အလွန်အမင်း သန့်စင်ပြီး နူးညံ့သိမ်မွေ့လှသော ဝိညာဉ်စွမ်းအင် စီးကြောင်းတစ်ခုက သူမ၏ လက်ချောင်းထိပ်မှတစ်ဆင့် သွေးကြောများအတွင်းသို့ ချက်ချင်း စိမ့်ဝင်သွားခဲ့တော့သည်။
ထိုခံစားချက်က ခြောက်သွေ့နေသော မြေပြင်ပေါ်သို့ မိုးဦးကျရေစက်များ ကျရောက်လာသကဲ့သို့ သော်လည်းကောင်း... နွေဦးလေပြေညင်းက စိတ်ဝိညာဉ်ကို လာရောက်ပွတ်သပ်ပေးသကဲ့သို့ သော်လည်းကောင်း အလွန် နေလို့ကောင်းလှသည်။
ယွဲ့လင်၏ မျက်ဝန်းများ ပြာဝေသွားခဲ့ရသည်။ သူမသည် သူမ၏ ဖခင်တစ်ချိန်က ပြောပြဖူးသော ကျင့်ကြံခြင်း အထောက်အကူပြု အရာတစ်ခုကို သတိရသွားခဲ့သည် … ဝိညာဉ်စမ်းရေ။
"ဒါက... ဝိညာဉ်စမ်းရေလား"
သူမသည် ရေထွက်ပေါက်ဆီသို့ ချက်ချင်း လှည့်ကြည့်လိုက်သည်။ သေချာစိုက်ကြည့်လိုက်သောအခါ... ၎င်းက သဘာဝအတိုင်း ထွက်ပေါ်လာသော ဝိညာဉ်စမ်းရေတွင်း မဟုတ်ဘဲ... တစ်စုံတစ်ဦးက အစီအရင်ကို သုံးပြီး ဝိညာဉ်ကျောက်တုံးတွေကို အတင်းအကျပ် အရည်ပျော်စေကာ ရေထဲကို ပေါင်းစပ်ပေးထားခြင်း ဖြစ်သည်ကို သိလိုက်ရသည်။
ဒီလိုနည်းလမ်းက အလွန်အမင်း ကုန်ကျစရိတ် များပြားလှပေသည်။ ဒါက ပိုက်ဆံကို မီးရှို့နေခြင်း သက်သက်ပင်။ ရေထဲရှိ ဝိညာဉ်စွမ်းအင်များသည် အလွယ်တကူ ပျယ်လွင့်သွားတတ်သဖြင့် အချိန်စက္ကန့်တိုင်း ကုန်ဆုံးသွားခြင်းက ဝိညာဉ်ကျောက်တုံးများ ဆုံးရှုံးနေခြင်းနှင့် တန်းတူ ဖြစ်သည်။
ဒါက ရေချိုးနေကြခြင်း မဟုတ်ချေ။ သူတို့က ဝိညာဉ်ကျောက်တုံးတွေထဲမှာ ဇိမ်ခံစိမ်နေကြခြင်း ဖြစ်သည်။
"ဖန်ယွမ်... သူ တကယ်ပဲ ရူးသွားတာလား"
ယွဲ့လင် အတိုင်းအဆမရှိ တုန်လှုပ်ခြောက်ခြားသွားခဲ့ရသည်။ ဒီလောက်ကြီးမားသော ဝိညာဉ်စမ်းရေပြောင်းလဲခြင်း အစီအရင်က စက္ကန့်တိုင်းမှာ ဝိညာဉ်ကျောက်တုံး အမြောက်အမြားကို ဝါးမြိုနေမည် ဖြစ်သည်။
ယန်ရှန့်တိုက်ကြီး ရှိ ထိပ်တန်းဂိုဏ်းကြီးများတောင်မှ ဒီလောက်အထိ ရက်ရက်ရောရော ဖြုန်းတီးဝံ့ကြမည် မဟုတ်ပေ။ ဖန်ယွမ်က ချုံးရှင်းဂိုဏ်း၏ ကျန်ရှိသမျှသော အခြေခံအုတ်မြစ်အားလုံးကို တပည့်တွေရဲ့ ရေချိုးရေထဲမှာပဲ အကုန်အကျခံ ပစ်လိုက်တာလား။
"စီနီယာအစ်မ... ဆင်းလာပြီး ကျင့်ကြံလေ ဒီရေက ခန္ဓာကိုယ်ထဲက အညစ်အကြေးတွေကို ဖယ်ရှားပေးနိုင်တယ်နော်" လင်းမြောင်မြောင်က ရေထဲတွင် ကူးခတ်ဆော့ကစားရင်း မျက်နှာလေး ရဲပန်းနေခဲ့သည်။
ယွဲ့လင်သည် ကန်ထဲရှိ ညီမလေးများကို ထပ်မံ ကြည့်ရှုလိုက်မိသည်။
သေချာပေသည်… ဝိညာဉ်စမ်းရေ၏ စိမ်ထားမှုအောက်တွင်... သူတို့၏ အရေပြားများမှာ မသိမသာ တောက်ပနေပြီး မည်းညစ်သော အညစ်အကြေးများမှာလည်း ချွေးပေါက်များမှတစ်ဆင့် မသိမသာ စိမ့်ထွက်လာကာ စီးဆင်းနေသော ရေများနှင့်အတူ မျောပါသွားခဲ့ကြသည်။
ဒါက... ရိုးတွင်းခြင်ဆီ သန့်စင်ခြင်း ပဲ။ အရာရာကို တိတ်တဆိတ် ပြုပြင်ပြောင်းလဲပေးနေတာပဲ။
ယခင်က ဝိညာဉ်စုဆောင်းအစီအရင်သည် ကျင့်ကြံခြင်းကို မြှင့်တင်ပေးနိုင်သော်လည်း... အတင်းအကျပ် ဝိညာဉ်စွမ်းအင်များကို ခန္ဓာကိုယ်ထဲ ထိုးသွင်းခြင်းဖြစ်သဖြင့် အပင်ကို အတင်းဆွဲနှုတ်၍ ကြီးထွားအောင် လုပ်သကဲ့သို့ ဖြစ်သည်။ သို့သော်လည်း ယခု ဝိညာဉ်စမ်းရေချိုးခြင်းကမူ... အခြေခံအုတ်မြစ်ကို ခိုင်မာစေပြီး ရုပ်ပိုင်းဆိုင်ရာ ကြံ့ခိုင်မှုကို မြှင့်တင်ပေးခြင်း ဖြစ်သည်။
ပါရမီညံ့ဖျင်းပြီး အညစ်အကြေးများပြားလှသော သာမန်လူတပည့်များအတွက်ကမူ... ဒီအရာက အသင့်တော်ဆုံးသော ကျင့်ကြံခြင်း အထောက်အကူပြု နည်းလမ်းကောင်းကြီး ဖြစ်ပေသည်။
"ဂိုဏ်းချုပ်... ရှင်က တပည့်တွေရဲ့ ကျင့်ကြံခြင်းကို အတင်းအကျပ် မြှင့်တင်ပေးပြီး ကောင်းကင်ဘုံရဲ့ ကံကြမ္မာကို ဆန့်ကျင်ပြောင်းလဲပေးချင်တာလား"
ယွဲ့လင်သည် ဖြည်းညှင်းစွာ မတ်တပ်ရပ်လိုက်မိပြီး သူမ၏ မျက်ဝန်းလေးများမှာ အနည်းငယ် ရဲတက်လာခဲ့ရသည်။
ခမ်းနားလှသော တင်းယွမ်ဆောင်ကြီးကို တည်ဆောက်ခြင်းက စည်းစိမ်ခံစားရန်အတွက် မဟုတ်ဘဲ... အလွန်စျေးကြီးလှသော်လည်း အနူးညံ့ဆုံးသော နည်းလမ်းကို အသုံးပြုကာ တပည့်များအတွက် လူသားလောက၏ အညစ်အကြေးများကို ဖယ်ရှားပေးရန်အတွက် ဖြစ်ပေသည်။
ဒါက ပိုက်ဆံ ဘယ်လောက်တောင် ကုန်ကျလိုက်မလဲ။
ဒါက ဘယ်လောက်တောင်ကြီးမားတဲ့ သတ္တိမျိုး လိုအပ်မလဲ။
ဒါက အရင်က ကပ်စေးကုတ်လှတဲ့ ဂိုဏ်းချုပ် ဟုတ်ပါသေးရဲ့လား။
"ဖန်ယွမ်..." ယွဲ့လင်က တစ်ဦးတည်း ရေရွတ်မိလိုက်သည်… “ရှင်က တပည့်တွေအတွက် ရည်ရွယ်တယ်ဆိုရင်တောင်မှ... ဒီလောက်အထိ ဆက်ပြီး ဖြုန်းတီးနေမယ်ဆိုရင် ချုံးရှင်းဂိုဏ်းရဲ့ အနာဂတ်က ဘယ်လိုဖြစ်သွားမှာလဲ"
သူမ သက်ပြင်းရှည်ကြီးတစ်ချက် ချလိုက်ပြီး ပိုမို တွေးတောမနေတော့ပေ။ သူမသည် သူမ၏ ဓားကို အသာချထားလိုက်ပြီး ပိုးထည်ဝတ်စုံကို ချွတ်ပစ်ကာ... ရေသူမလေးတစ်ကောင်ကဲ့သို့ နွေးထွေးလှသော ဝိညာဉ်စမ်းရေကန်ကြီးထဲသို့ ဖြည်းညှင်းစွာ လျှောဆင်းသွားခဲ့တော့သည်။
ဝိညာဉ် စမ်းရေများက သူမ၏ ခန္ဓာကိုယ်ကို လွှမ်းခြုံသွားသည့် ခဏတွင်... သူမ သက်တောင့်သက်သာရှိလွန်းသဖြင့် အသံပင် ထွက်မိလုနီးပါး ဖြစ်သွားခဲ့ရသည်။ အသစ်စက်စက် ပျောက်ကင်းသွားသော သွေးကြောဟောင်းများသည် ထိုဝိညာဉ်အရည်များ၏ ပြုစုပျိုးထောင်မှုအောက်တွင် ပိုမို သန်မာကျယ်ပြန့်လာခဲ့သည်။ သူမသည် မျက်လုံးများကို မှိတ်လျက် ကျင့်စဉ်ကို လည်ပတ်စေလိုက်တော့သည်။
ထိုခဏတွင်... သူမသည် အေးစက်လှသော စီနီယာအစ်မ မဟုတ်တော့ဘဲ... ချုံးရှင်းဂိုဏ်း၏ သာမန်တပည့်တစ်ဦးကဲ့သို့ ဂိုဏ်းချုပ် ပေးသနားထားသော အတိုင်းအဆမရှိလှသည့် ဂရုဏာကို ငြိမ်းချမ်းစွာ ခံစားနေခဲ့တော့သည်။
အချိန်ကာလများ တရွေ့ရွေ့ ကုန်ဆုံးသွားခဲ့ရာ ရက်များစွာ ကုန်လွန်သွားခဲ့ပြီ ဖြစ်သည်။
နေမင်းကြီးက တောင်တန်းများနောက်ကွယ်သို့ ကွယ်ပျောက်သွားခဲ့ပြီ။
ချုံးရှင်းဂိုဏ်း၏ ဂိုဏ်းချုပ် အင်မော်တယ်ဂူဗိမာန် တံခါးကြီးက ဖြည်းညှင်းစွာ ပွင့်ဟလာခဲ့သည်။ ဖန်ယွမ်သည် ပျင်းရိစွာဖြင့် အကြောဆန့်လျက် အပြင်သို့ လှမ်းထွက်လာခဲ့ရာ တစ်ကိုယ်လုံး လန်းဆန်းတက်ကြွနေခဲ့သည်။
"အာ… တကယ့်ကို သာယာလှပတဲ့ နေ့ရက်တစ်နေ့ပါပဲလား"
သူ၏ စိတ်ခံစားချက်က အလွန် ကောင်းမွန်နေခဲ့သည်။
သူသည် ဒီကာလအတွင်း ဂူဗိမာန်ထဲမှာပဲ အောင်းနေခဲ့ခြင်းက... တပည့်များ အသည်းအသန် ကျင့်ကြံနေကြသည်ကို မြင်ရပြီး စိတ်အနှောင့်အယှက်ဖြစ်ရမည်ကို စိုးရိမ်သောကြောင့် ဖြစ်သည်။ ယခုအခါတွင်မူ တင်းယွမ်ဆောင်ကြီး တည်ဆောက်ပြီးစီးသည်မှာ နှစ်လပင် ရှိခဲ့ပြီ ဖြစ်သည်။
ထိုနေရာက တကယ့်ကို ပျော်ပါးရုံသက်သက် နေရာလေး ဖြစ်သည်။ ဝိညာဉ်စုဆောင်းအစီအရင် မရှိသည့်အပြင် ဝိညာဉ်စမ်းရေထဲက ဝိညာဉ်စွမ်းအင်တွေကလည်း ထိန်းသိမ်းထားလို့ မရချေ။ ရေချိုးတာကို သက်တောင့်သက်သာဖြစ်စေတာကလွဲရင် ဘာမှ အသုံးမဝင်လှပေ။
သူ၏ အစီအစဉ်အရဆိုလျှင်... ထိုတပည့်များသည် နေ့တိုင်း ရေချိုးဆောင်ထဲမှာပဲ စိမ်နေကြပြီး သူတို့၏ စိတ်ဓာတ်များ ပျက်ပြားကာ ကျင့်ကြံခြင်းအဆင့်များ ရပ်တန့်နေရမည် ဖြစ်သည်။ သူတို့ ကျင့်ကြံခြင်း မလုပ်သရွေ့ ဂိုဏ်း၏ အင်အားက ဆုတ်ယုတ်သွားလိမ့်မည်။ ဒါ့အပြင် စက္ကန့်တိုင်း ပိုက်ဆံဖြုန်းနေတဲ့ တင်းယွမ်ဆောင်ကြီးလည်း ရှိနေသေးတယ်...
‘ဟိ…ဟိ... ဂိုဏ်းကြီး ပျက်စီးမယ့်နေ့က လက်တစ်ကမ်းအလိုပဲဟေ့'
ဖန်ယွမ်သည် လက်နှစ်ဖက်ကို နောက်ပစ်လျက် မိမိ၏ နယ်မြေကို လှည့်လည်ကြည့်ရှုစစ်ဆေးနေသော မြေရှင်သူဌေးကြီးတစ်ဦးကဲ့သို့ သီချင်းတစ်ပုဒ်ကို သီဆိုကာဖြင့် တောင်အောက်သို့ ဝင့်ကြွားစွာ လျှောက်လှမ်းလာခဲ့သည်။
လမ်းခရီးတစ်လျှောက်တွင် သိုင်းကွင်းပြင်ကြီးမှာ လုံးဝ ဟာလာဟင်းလင်း ဖြစ်နေခဲ့သည်။ သီးသန့် အိပ်ဆောင်နယ်မြေမှာလည်း တိတ်ဆိတ်ငြိမ်သက်နေပြီး လူရိပ်လူယောင်ပင် မတွေ့ရချေ။
"လူတွေ အကုန်လုံး ဘယ်ရောက်ကုန်ကြတာလဲ"
ဖန်ယွမ် ရင်ထဲတွင် ဝမ်းသာပီတိ ဖြစ်သွားခဲ့ရသည်။
‘ဘယ်သူမှ ကျင့်ကြံခြင်း မလုပ်ကြဘူးပဲ.. ဒါ တကယ့်ကို နိမိတ်ကောင်းပဲဟေ့'
သူ ဇဝေဇဝါ ဖြစ်နေစဉ်မှာပင်... တပည့်တစ်ဦး ရေပုံးတစ်ပုံးကို သယ်ဆောင်လျက် ဖြတ်သန်းသွားသည်ကို မြင်တွေ့လိုက်ရသည်။
"ရှောင်ရှန်း..." ဖန်ယွမ်က ထိုတပည့်ကို နွေဦးလေပြေညင်းကဲ့သို့ နူးညံ့သောအသံဖြင့် လှမ်းခေါ်လိုက်သည် …"မင်းရဲ့ ဂိုဏ်းတူညီအစ်ကိုတွေ အကုန်လုံး ဘယ်ရောက်ကုန်ကြလဲ"
ကျန်းရှောင်ရှန်းသည် ဂိုဏ်းချုပ်ဖြစ်နေသည်ကို မြင်သောအခါ အလျင်အမြန် ရေပုံးကို ချထားလိုက်ပြီး ရိုးသားစွာ ပြုံးလျက် ပြန်လည်ဖြေကြားလိုက်သည် …
"ဂိုဏ်းချုပ်ကို တင်ပြရရင်... ဂိုဏ်းတူညီအစ်ကိုတွေ အကုန်လုံး တင်းယွမ်ဆောင် မှာ ရှိနေကြပါတယ်"
"အို..."
ဖန်ယွမ်၏ မျက်ဝန်းများ အရောင်တောက်သွားခဲ့ပြီး နှုတ်ခမ်းထောင့်များကလည်း မထိန်းနိုင်မသိမ်းနိုင် ပြုံးယောင်သန်းသွားခဲ့ရသည်။
"သူတို့အားလုံး အဲဒီမှာ ရှိနေကြတာ ဟုတ်လား"
"ဟုတ်ပါတယ် သူတို့အားလုံး အဲဒီမှာပဲ စိမ်နေကြတာပါ…နေ့စဉ်ရက်ဆက် စားသောက်ပြီး ရေချိုးတာကလွဲရင် ဘာမှ မလုပ်ကြတော့ပါဘူး… ဘယ်သူမှလည်း အပြင်ကို ပြန်မထွက်ချင်ကြတော့ဘူး"
"ဟားဟားဟား... ကောင်းတယ်... အရမ်ကောင်းတယ်"
ဖန်ယွမ် မအောင့်နိုင်တော့ဘဲ အော်ဟစ်ရယ်မောလိုက်မိပြီး မိမိ၏ ပေါင်ကို ဖြတ်ခနဲ ရိုက်လိုက်မိတော့သည်။
‘ငါ ထင်ထားတဲ့အတိုင်းပါပဲလား'
‘လူသားလောကက မမြင်ဖူး မကြားဖူးတဲ့ တောသားလေးတွေမို့လို့... ဒီလောက်အထိ ခမ်းနားလှတဲ့ ရေချိုးဆောင်ကြီးကို မြင်လိုက်ရတော့ တကယ့်ကို စွဲလမ်းသွားကြပြီပဲ'
‘ဒါက ငါ အလိုချင်ဆုံးသော ရလာဒ်ပဲ'
‘ဒါက ငါ အလိုချင်ဆုံးသော နူးညံ့တဲ့ ထောင်ချောက်ပဲ'
‘စိမ်စမ်း... မင်းတို့ စိတ်ကြိုက် စိမ်ကြစမ်း'
‘မင်းတို့ရဲ့ တိုက်ပွဲဝင်စိတ်ဓာတ်တွေ ကုန်ဆုံးသွားတဲ့အထိ စိမ်စမ်း…မင်းတို့ရဲ့ အင်မော်တယ် အိပ်မက်တွေ ပျက်ပြားသွားတဲ့အထိ စိမ်စမ်း'
"လာ... ငါ့အတွက် လမ်းပြစမ်း"
ဖန်ယွမ်က လက်ကို ဝှေ့ယမ်းလိုက်ပြီး ထိုတပည့်များ၏ ပျက်စီးဆုတ်ယုတ်နေသော အခြေအနေကို ကိုယ်တိုင်ကိုယ်ကျ သွားရောက် ကြည့်ရှုအပန်းဖြေရန်အတွက် စိတ်အားထက်သန်စွာဖြင့် လှမ်းထွက်လိုက်တော့သည်။