“ဝိညာဉ်ကျောက်တုံး နှစ်သန်း ဟုတ်လား… အဆင့်မရှိတဲ့ စနစ်စုတ်... မင်း ငါ့ကို သတ်မလို့ ကြံနေတာလား"
နှစ်သန်းတောင် ကိုသုံးလပဲ အချိန်ရသည်။
ပြီးခဲ့သည့်အကြိမ်က ဝိညာဉ်ကျောက်တုံး တစ်သန်းကို ကုန်အောင် သုံးစွဲရန်အတွက် တပည့်သစ် ခေါ်ယူပွဲ ကျင်းပခြင်း... အသားဝယ်ကျွေးခြင်းနှင့် အဆောက်အအုံများ ဆောက်လုပ်ခြင်းစသည့် အရာများကို အသည်းအသန် လုပ်ဆောင်ခဲ့ရသည်။ ဒီတစ်ကြိမ်တွင် ပမာဏက နှစ်ဆအထိ တိုးသွားခဲ့ပြီ ဖြစ်သည်။
ပြီးတော့ အရေးကြီးဆုံးအချက်က... ဒီတပည့်တွေက ဘာဖြစ်နေကြတာလဲ။
ဖန်ယွမ်သည် ရုတ်တရက် ရင်ဘတ်ကို မတ်လိုက်ပြီး သူ၏ မျက်ဝန်းအစုံတွင် ဒေါသအရိပ်အယောင်များ ဖြတ်ပြေးသွားခဲ့သည်။
‘မဖြစ်နိုင်တာ’
‘ငါကိုယ်တိုင် သွားကြည့်မှ ဖြစ်မယ်’
‘ဘယ်နေရာမှာများ မှားသွားလို့လဲ သူတို့ ကျင့်နေတာက အမှိုက်ကျင့်စဉ် သက်သက်ပဲလေ ဘာလို့ ဂိုဏ်းရဲ့ အင်အားက ဒီလောက်အနည်းငယ်ပဲ လျော့ကျသွားရတာလဲ ပြီးတော့ လူတိုင်းက ဝိညာဉ်စွမ်းအင်ကိုပါ ခံစားသိရှိသွားကြတယ် ဟုတ်လား’
သူသည် ဝတ်ရုံလက်ကို ခါယမ်းလျက် မျက်နှာပျက်ပျက်ဖြင့် ဂူအပြင်ဘက်သို့ လှမ်းလျှောက်လာခဲ့တော့သည်။ ဒီသူပုန်တပည့်များက သူ့ကွယ်ရာတွင် ဘာတွေလုပ်နေကြသည်ကို သူကိုယ်တိုင် သွားရောက် စစ်ဆေးရန် ဆုံးဖြတ်လိုက်ချေပြီ။
ထိုအချိန်တွင် လေ့ကျင့်ရေး ကွင်းပြင်ထက်၌...
ဖန်ယွမ် နတ်ဝိညာဉ်အဆင့်သို့ ဖောက်ထွက်စဉ်က ထွက်ပေါ်လာခဲ့သော ဖိအားများမှာ ခဏတာမျှသာ ဖြစ်သော်လည်း... တပည့်အားလုံး၏ နှလုံးသားကိုမူ ပြင်းထန်စွာ တုန်ခါသွားစေခဲ့သည်။
“အခုနက အရှိန်အဝါက ဂိုဏ်းချုပ်ဆီကလား"
ဟုန်အာနျိုသည် နောက်တောင်ကုန်းဆီသို့ လှမ်းကြည့်လိုက်ရာ သူ၏ မျက်သူငယ်အစုံ ပြင်းထန်စွာ ကျုံ့သွားခဲ့ရသည်။
ဒီခံစားချက်က ဝိညာဉ်၏ အနက်ဆုံးနေရာမှ တုန်ရင်လာခြင်း ဖြစ်ပေသည်။ ‘ဘယ်အဆင့်လဲ... တကယ့်ကို ကြောက်စရာကောင်းတဲ့ အရှိန်အဝါပဲ။ ငါအရင်က မြင်ဖူးခဲ့တဲ့ ရွှေအမြုတေအဆင့် အကြီးအကဲတွေထက်တောင် အဆပေါင်း ရာနဲ့ချီ ပိုပြီး သန်မာနေသလိုပဲ’
ချန်ကျင်းတောက်၏ လက်ထဲမှ စုတ်တံမှာ မြေပြင်ပေါ်သို့ ‘တောက်’ ခနဲ ပြုတ်ကျသွားခဲ့သော်လည်း သူကမူ သတိမပြုမိဘဲ ထိုအရပ်ဆီသို့ ကြည်ညိုလေးစားမှု အပြည့်ဖြင့် ငေးကြည့်နေရှာသည်။
“ဂိုဏ်းချုပ်ပဲ"
“သေချာပေါက် ဂိုဏ်းချုပ်ပဲ ဖြစ်ရမယ်"
“ဂိုဏ်းချုပ်က အဆင့်တက်သွားပြီ"
လူတိုင်း သံသယဝင်နေကြစဉ်မှာပင်... ကောင်းကင်ယံမှ ဆင်းသက်လာသော အင်မော်တယ်တစ်ဦးကဲ့သို့ ဆီးနှင်းကဲ့သို့ ဖြူစင်လှသော ဝတ်စုံကို ဆင်မြန်းထားသည့် ပုံရိပ်တစ်ခုသည် လေ့ကျင့်ရေး ကွင်းပြင်ထက်တွင် ရုတ်တရက် ပေါ်ပေါက်လာခဲ့သည်။
ဖန်ယွမ်သည် မည်သည့် ရတနာပစ္စည်းကိုမျှ အသုံးမပြုဘဲ လေဟာနယ်ကို နင်းလျက် တိတ်ဆိတ်စွာ လာခဲ့သည်။ နတ်ဝိညာဉ်အဆင့် ကျင့်ကြံသူတစ်ဦးအတွက် လေထဲတွင် လမ်းလျှောက်ရခြင်းမှာ မြေပြင်ပေါ်တွင် လမ်းလျှောက်ရသကဲ့သို့ပင် ရိုးရှင်းလှပေသည်။
သူသည် အပေါ်စီးမှနေ၍ လျှပ်စီးကဲ့သို့ စူးရှသော မျက်ဝန်းများဖြင့် သူ၏ ‘အင်မော်တယ်အိပ်မက်ကို ဖျက်ဆီးပစ်ခဲ့ကြသော’ တရားခံ လူအုပ်ကြီးကို အေးစက်စွာ လှမ်းကြည့်လိုက်သည်။
ကွင်းပြင်တစ်ခုလုံး ချက်ချင်း တိတ်ဆိတ်သွားခဲ့ရသည်။ တပည့်ရာပေါင်းများစွာသည် အဆမတန် နက်ရှိုင်းလှသော ပင်လယ်ပြင်ကဲ့သို့ ပြင်းထန်လှသည့် ဂိုဏ်းချုပ်၏ ဖိအားကြောင့် ဦးနှောက်များ ဗလာဖြစ်သွားခဲ့ရရှာသည်။
ဒါ... ဒါ သူတို့ရဲ့ ဂိုဏ်းချုပ်လား ပုံမှန်အချိန်တွင် ရိုးရိုးရှင်းရှင်းသာ နေထိုင်ပြီး သူတို့ကို အသားစားရန်နှင့် အဆောက်အအုံ ဆောက်ရန်သာ ခိုင်းစေတတ်သော ဂိုဏ်းချုပ်ဖန်က... ဒီလောက်အထိ သန်မာနေလိမ့်မည်ဟု မည်သူမျှ မထင်မှတ်ထားခဲ့ကြပေ။ အသက်ရှူကျပ်မတတ် ပြင်းထန်လွန်းလှသည်။
“ဂိုဏ်းချုပ် အောင်မြင်စွာ အဆင့်တက်ပြီး ထွက်လာတာကို ကြိုဆိုပါတယ် "
တစ်ယောက်က စတင်၍ အော်ဟစ်လိုက်သည်နှင့် တပည့်ရာပေါင်းများစွာသည် တပြိုင်နက်တည်း ဒူးထောက်လိုက်ကြရာ ထိုအသံမှာ မိုးခြိမ်းသံကဲ့သို့ ဟည်းထွက်သွားခဲ့သည်။ သူတို့၏ မျက်ဝန်းများတွင်လည်း ကြည်ညိုလေးစားမှုများနှင့် ပြည့်နှက်နေခဲ့သည်။
ဖန်ယွမ်သည် အောက်တွင် ဒူးထောက်နေကြသော လူအုပ်ကြီးကို ကြည့်ကာ ရင်ထဲတွင် မီးတောက်မတတ် ခံစားနေရသည်။
‘ဒူးထောက်တာ ဟုတ်လား ဒူးထောက်လို့ ဘာထူးမှာလဲ…မင်းတို့တွေ ငါ့အတွက် အားနည်းမပေးကြဘဲနဲ့’
သူသည် လေ့ကျင့်ရေး ကွင်းပြင်ထက်သို့ ဖြည်းညှင်းစွာ ဆင်းသက်လိုက်သည်။ သူသည် သူတို့ကို ထခိုင်းခြင်းမရှိဘဲ တည်တင်းသော မျက်နှာပေးဖြင့် အရှေ့ဆုံးတွင်ရှိသော ချန်ကျင်းတောက်ထံသို့ တိုက်ရိုက် လျှောက်လှမ်းသွားခဲ့သည်။
"မင်းရဲ့ လက်ကို ဆန့်ထုတ်လိုက်စမ်း"
ဖန်ယွမ်၏ အသံမှာ မကျယ်လောင်သော်လည်း ငြင်းဆန်ရန်မဝံ့သော အရှိန်အဝါများ ပါဝင်နေသည်။ ချန်ကျင်းတောက်သည် တစ်ကိုယ်လုံး တုန်ရင်သွားခဲ့ရပြီး မဆိုင်းမတွဘဲ စုတ်တံကို နှစ်ပေါင်းများစွာ ကိုင်ဆောင်ခဲ့သော သူ၏ လက်ကို အလျင်အမြန် ဆန့်ထုတ်ပေးလိုက်သည်။
ဖန်ယွမ်က သူ၏ သွေးခုန်နှုန်းကို ဖမ်းကိုင်လိုက်ပြီး ဝိညာဉ်စွမ်းအင်တစ်ခုကို ခန္ဓာကိုယ်အတွင်းသို့ စေလွှတ်၍ စစ်ဆေးလိုက်သည်။ နောက်တစ်စက္ကန့်တွင်မူ... ဖန်ယွမ်၏ မျက်ခုံးများမှာ တင်းတင်းကျုတ်သွားခဲ့ရသည်။
ကျယ်ပြန့်လှသော သွေးကြောများ။ နဂါးတစ်ကောင်ကဲ့သို့ အားကောင်းလှသော သွေးသားစွမ်းအား…ထို့ပြင်... သူ၏ ဒန်တျန်အတွင်း၌ ပဲစေ့အရွယ်အစားရှိသော ဝိညာဉ်စွမ်းအင် ဝဲဂယက်တစ်ခု တည်ဆောက်မိနေပြီ ဟုတ်လား။
ဒါက ‘ထာဝရစိမ်းလန်း ဝိညာဉ်လမ်းညွှန်ကျင့်စဉ်’ ကို တစ်လပဲ ကျင့်ကြံထားတဲ့သူတစ်ယောက်မှာ ရှိသင့်တဲ့ အကျိုးသက်ရောက်မှု ဟုတ်လို့လား။
ဖန်ယွမ်သည် စိတ်မလျှော့သေးဘဲ ဘေးနားရှိ လယ်သမားဘဝမှ လာသော ဝမ်အာကော်၏ လက်ကို ထပ်မံ ဖမ်းကိုင်လိုက်ပြန်သည်။
စစ်ဆေးလိုက်သည့်အခါ... ဘုရားရေ ဝမ်အာကော်၏ ခန္ဓာကိုယ်အတွင်းရှိ ဝိညာဉ်စွမ်းအင်မှာ အနည်းငယ် အားနည်းသော်လည်း သူ၏ သွေးကြောများမှာမူ ဝိညာဉ်စွမ်းအင်များ၏ အကြိမ်ကြိမ် သန့်စင်မှုကို ခံထားရသကဲ့သို့ အလွန်အမင်း ခိုင်မာနေခဲ့သည်။
ထို့နောက် သူသည် ထောင့်တစ်နေရာတွင် ရှိနေသော လင်းမြောင်မြောင်ကို လှမ်းကြည့်လိုက်သည်။
ထိုမိန်းကလေးငယ်၏ မျက်နှာလေးမှာ နီမြန်းနေခဲ့ပြီး သူမ၏ အရေပြားထက်တွင် ကျောက်စိမ်းကဲ့သို့သော အလင်းရောင်များပင် သန်းနေခဲ့သည်။ သူမ၏ ခန္ဓာကိုယ်အတွင်းရှိ သွေးသားစွမ်းအားမှာ သာမန် ချီသန့်စင်ခြင်း ပထမအဆင့် ကျင့်ကြံသူများထက်ပင် ပိုမို အားကောင်းနေခဲ့ချေပြီ။
ဖန်ယွမ်သည် သူမ၏ လက်ကို လွှတ်လိုက်ပြီး တစ်ကိုယ်လုံး ထုံကျင်သွားခဲ့ရသည်။
‘ငါကိုယ်တိုင် စိတ်ကြိုက်ရွေးချယ်ခဲ့တဲ့ ဒီအမှိုက်တွေအားလုံးက တကယ်ပဲ ဝိညာဉ်စွမ်းအင်ကို ခံစားသိရှိသွားကြပြီး ကျင့်ကြံခြင်းလမ်းစဉ်ပေါ်ကို ရောက်သွားကြပြီ ဟုတ်လား တကယ့်ကို ကွယ်ရာမှာ ခိုးပြီး ကြိုးစားနေကြတဲ့ မြေခွေးတွေပဲ'
“ဂိုဏ်းချုပ်...”
ဖန်ယွမ်၏ ပုံစံမှာ အမျိုးမျိုး ပြောင်းလဲနေသည်ကို မြင်တွေ့ရသောအခါ ချန်ကျင်းတောက်သည် ရင်တထိတ်ထိတ်ဖြင့် သတိထားကာ မေးလိုက်သည်။
“တပည့်တို့ရဲ့ ကျင့်ကြံခြင်းမှာ တစ်ခုခု မှားယွင်းနေလို့လား ဂိုဏ်းချုပ်ကို စိတ်ပျက်အောင် လုပ်မိသွားပြီလား"
ဖန်ယွမ်သည် သက်ပြင်းကို ပြင်းထန်စွာ ချလိုက်ပြီး ဆဲဆိုချင်စိတ်ကို အတင်းအကျပ် ထိန်းချုပ်လိုက်ရသည်။
‘စိတ်ပျက်တာ ဟုတ်လား… ငါက စိတ်ပျက်ရုံတင်မကဘူး... ရင်ကျိုးရမယ့်အဆင့် ရောက်နေပြီ.မင်းတို့ မြေခွေးတွေက ဒီလောက်တောင် တော်နေကြရင်... ငါက ဘယ်လိုလုပ်ပြီး ထာဝရအင်မော်တယ် လမ်းစဉ်ကို အောင်မြင်တော့မှာလဲ’
ဖန်ယွမ်သည် မှုန်မှိုင်းသော မျက်နှာဖြင့် တပည့်ရာပေါင်းများစွာကို ထပ်မံ ကြည့်ရှုလိုက်ပြီး သူ၏ စိတ်ထဲတွင် အတွေးပေါင်းစုံ ဝင်ရောက်လာခဲ့သည်။
‘တစ်ခုခုတော့ လုံးဝကို မှားနေပြီ။ ပါရမီညံ့ဖျင်းတဲ့ သာမန်လူတစ်စုက အမှိုက်အကျဆုံး ကျန်းမာရေးကျင့်စဉ်ကို ကျင့်တာ... တစ်လအတွင်းမှာ ဘယ်လိုလုပ်ပြီး လူတိုင်း ဝိညာဉ်စွမ်းအင်ကို ခံစားသိရှိနိုင်မှာလဲ။ တချို့ဆိုရင် ချီသန့်စင်ခြင်း အဆင့်၆ရဲ့ အနားသတ်ကိုတောင် ထိတွေ့နေပြီ။ ဒါက ကျင့်ကြံခြင်းလောကရဲ့ သဘောတရားနဲ့ လုံးဝ မကိုက်ညီဘူး’
‘ဒါမှမဟုတ်... ငါတို့ထဲမှာ တုနှိုင်းမဲ့ ပါရမီရှင်တစ်ယောက်ယောက် ခိုးဝင်နေလို့လား။ ဒါမှမဟုတ် တစ်ယောက်ယောက်က အစွမ်းထက်လျက်နဲ့ အားနည်းဟန်ဆောင်ပြီး တခြားသူတွေကိုပါ ဆွဲခေါ်ပြီး ကြိုးစားနေကြတာလား’
ဖန်ယွမ်သည် သက်ပြင်းကို အသာချလိုက်ပြီး သူ၏ အသံကို နည်းဗျူဟာမြောက်စွာဖြင့် မြှင့်တင်လျက် မေးခွန်းထုတ်လိုက်သည်။
"ငါ မင်းတို့ကို မေးမယ်။ ဂိုဏ်းထဲကို ဝင်တုန်းက မင်းတို့ထဲက ဘယ်သူကများ မိမိရဲ့ စစ်မှန်တဲ့ ပါရမီကို ဖုံးကွယ်ထားခဲ့လဲ"
ခဏမျှ ရပ်တန့်လိုက်ပြီး ထပ်လောင်း ပြောကြားလိုက်သည်။
"တကယ်လို့ မင်းတို့ထဲမှာ တုနှိုင်းမဲ့ ပါရမီရှင် ရှိနေတယ်ဆိုရင် အခုချက်ချင်း ကိုယ့်ဘာသာကိုယ် ရှေ့ကို ထွက်လာခဲ့ပါ ငါက... မင်းတို့ကို ကြီးမားလှတဲ့ ဆုလာဘ်တွေ ပေးမှာပါ"
တကယ်လို့ သူသည် ထိုကဲ့သို့သော ‘အဖျက်သမား’ များကို ရှာဖွေတွေ့ရှိပြီး ဂိုဏ်းထဲကနေ နှင်ထုတ်နိုင်ခဲ့လျှင် ကျန်ရှိသော အမှိုက်များ၏ ကျင့်ကြံခြင်း အရှိန်အဟုန်မှာ အလိုအလျောက် ရပ်တန့်သွားပေလိမ့်မည်။
သို့သော်လည်း တပည့်ရာပေါင်းများစွာမှာမူ စကားတစ်လုံးမျှ မဆိုကြဘဲ တစ်ယောက်ကိုတစ်ယောက် လှမ်းကြည့်နေကြသော်လည်း မည်သူမျှ ရှေ့သို့ မထွက်လာခဲ့ကြပေ။
‘နောက်နေတာလား’ လွန်ခဲ့သော တစ်လက ကျင်းပခဲ့သော တပည့်သစ်ခေါ်ယူပွဲ မြင်ကွင်းမှာ သူတို့၏ စိတ်ထဲတွင် လတ်ဆတ်နေဆဲ ဖြစ်သည်။
မိမိကိုယ်မိမိ ပါရမီရှင်ဟု ကြွေးကြော်ခဲ့ကြသောသူများကို ဂိုဏ်းချုပ်က “ချုံးရှင်းဂိုဏ်းက ပါရမီရှင်တွေကို လက်မခံဘူး” ဟု ဆိုကာ တောင်အောက်သို့ ကန်ချခဲ့သည် မဟုတ်ပါသလော။
ယခု ဂိုဏ်းချုပ်၏ စကားမှာ... သေချာပေါက် သူတို့ကို စမ်းသပ်ရန် ထောင်ချောက်ဆင်နေခြင်း ဖြစ်ရမည်။
ဘယ်သူက ရှေ့ထွက်ဝံ့မှာလဲ။ ရှေ့ထွက်လိုက်ရင် ဂိုဏ်းထဲကနေ နှင်ထုတ်ခံရမှာ သေချာသည်။ ထို့ကြောင့် အမှန်တကယ် ပါရမီ အသင့်အတင့် ရှိကြသော တပည့်အချို့မှာလည်း ဂိုဏ်းချုပ် မိမိတို့၏ ပါရမီကို ရိပ်မိသွားမည်ကို စိုးရိမ်သဖြင့် ခေါင်းများကို ပို၍ပင် ငုံ့ထားကြရှာသည်။
ဖန်ယွမ်သည် အချိန်အတော်ကြာ စောင့်ဆိုင်းသော်လည်း မည်သည့်တုံ့ပြန်မှုမျှ မရှိသည်ကို မြင်တွေ့ရသောအခါ သူ၏ မျက်နှာမှာ ပိုမို ညှိုးမှိန်သွားခဲ့ရသည်။
”ကောင်းပြီ…မင်းတို့အားလုံးက ကိုယ့်ရဲ့ အရောင်အဝါကို ဖုံးကွယ်ထားတတ်နေကြပြီပေါ့ ဟုတ်လား”
"ဘယ်သူမှ ဝန်မခံရင်လည်း... ငါကိုယ်တိုင် တစ်ယောက်ချင်းစီ လိုက်ပြီး စစ်ဆေးရုံပေါ့"
ဖန်ယွမ်သည် အေးစက်စွာ နှာခေါင်းရှုံ့လိုက်ပြီး သူ၏ ပုံရိပ်မှာ ဝေဝါးသွားခဲ့ကာ ချန်ကျင်းတောက်၏ လက်ကို ထပ်မံ ဖမ်းကိုင်လိုက်ပြန်သည်။ ချန်ကျင်းတောက်သည် လန့်ဖျတ်သွားခဲ့ရပြီး တစ်ကိုယ်လုံး တုန်ရင်လျက် "ဂိုဏ်း... ဂိုဏ်းချုပ်..." ဟု ခေါ်မိရှာသည်။
ဖန်ယွမ်က စကားတစ်လုံးမျှ မဆိုဘဲ သူ၏ စင်ကြယ်လှသော နတ်ဝိညာဉ်အဆင့် ဝိညာဉ်စွမ်းအင်များကို သုံးစွဲလျက် စစ်ဆေးလိုက်သည်။
ပါရမီပေါင်းစုံ ရောပြွမ်းနေသော သာမန် အောက်တန်းစား အရည်အချင်း... တကယ်ကို ဘာမျှ ထူးခြားမှု မရှိပေ။
သူသည် လှည့်၍ ကြွက်သားကြီးမားလှသော အခြားတပည့်တစ်ဦး၏ လက်ကို ဖမ်းကိုင်လိုက်ပြန်ရာ ဖန်ယွမ်၏ မျက်ခုံးများ ပို၍ပင် ကျုတ်သွားခဲ့ရသည်။ ပါရမီ ရောပြွမ်းနေသည့်အပြင် သွေးကြောများမှာလည်း ကျဉ်းမြောင်းလှရာ... အမှိုက်ထဲမှ အမှိုက်ပင် ဖြစ်သည်။
“တကယ်ပဲ အားလုံးက အမှိုက်တွေချည်းပဲကို...”
ဖန်ယွမ်သည် နောက်ထပ် ခုနစ်ယောက်... ရှစ်ယောက်ခန့်ကို ဆက်လက် စစ်ဆေးပြီးနောက် မိမိဘာသာ ရေရွတ်လိုက်သည်။ ရလဒ်များမှာ အတူတူပင် ဖြစ်ကြသည်။ သူတို့၏ အခြေခံအုတ်မြစ်မှာ တကယ်ကို ဆိုးရွားလှသဖြင့် အခြားဂိုဏ်းများတွင်ဆိုလျှင် အခြေခံ အလုပ်သမားအဆင့်ပင် အလုပ်ခန့်အပ်ခြင်း ခံရမည်မဟုတ်ပေ။
သို့သော်လည်း... သူတို့တစ်ယောက်ချင်းစီ၏ ခန္ဓာကိုယ်အတွင်း၌မူ တစ်စုံတစ်ယောက်က ဝိညာဉ်စွမ်းအင်များကို အတင်းအကျပ် ထိုးထည့်ပေးထားသကဲ့သို့ ကြီးမားလှသော ဝိညာဉ်စွမ်းအင်များ စုစည်းနေခဲ့ကြသည်။
ဖန်ယွမ်၏ မျက်ဝန်းများသည် လူအုပ်ကြီး၏ အနောက်ဘက်ဆီသို့ ရောက်ရှိသွားခဲ့သည်။ ထိုနေရာတွင် သန်မာထွားကျိုင်းလှသော လူတစ်ယောက်သည် ခေါင်းငုံ့လျက် သူ၏ တည်ရှိမှုကို အတတ်နိုင်ဆုံး ဖုံးကွယ်ရန် ကြိုးပမ်းနေခဲ့သည်။
ဟုန်အာနျို၏ ကျောပြင်တစ်ခုလုံး ချွေးစေးများဖြင့် စိုရွှဲနေခဲ့ပြီ ဖြစ်သည်။
သူသည် ဒုတိယတန်းစား ပါရမီရှိသူ ဖြစ်သည့်အပြင် ယခင်က ချီသန့်စင်ခြင်း အထွတ်အထိပ်အဆင့်သို့ ရောက်ရှိခဲ့ဖူးသူ ဖြစ်သည်။
လမ်းစဉ်ဒဏ်ရာကြောင့်သာ အဆင့်ကျသွားခဲ့ခြင်း ဖြစ်ပြီး ယခုအခါ ပြန်လည်ကျင့်ကြံရာတွင် ချီသန့်စင်ခြင်း အဆင့်၆ သို့ ရောက်ရှိနေခဲ့ပြီ ဖြစ်သည်။ တကယ်လို့ ဂိုဏ်းချုပ်က သူ့ကို စစ်ဆေးလိုက်ပါက သူ ပါရမီကို ဖုံးကွယ်ပြီး ဂိုဏ်းထဲ ဝင်ရောက်ခဲ့သည့် အချက်မှာ သေချာပေါက် ပေါ်ပေါက်သွားပေလိမ့်မည်။
ဖန်ယွမ်သည် ဟုန်အာနျိုထံသို့ လျှောက်လှမ်းလာခဲ့သည်။
တစ်လှမ်း... နှစ်လှမ်း...
ဟုန်အာနျိုသည် လက်သီးကို ကျစ်ကျစ်ပါအောင် ဆုပ်လိုက်ပြီး ရင်ဘတ်ထဲတွင် အလွန်အမင်း ထိတ်လန့်နေခဲ့ကာ အရာအားလုံးကို ဝန်ခံရန် အသင့်ပြင်လိုက်ချေပြီ။
သို့သော်လည်း ဖန်ယွမ်၏ လက်သည် ဟုန်အာနျိုထံသို့ ထိတွေ့ခါနီးအချိန်တွင် ရုတ်တရက် ရပ်တန့်သွားခဲ့သည်။ ဖန်ယွမ်သည် သူ၏ လက်ကို ပြန်လည် ရုပ်သိမ်းလိုက်ပြီး စိတ်ပျက်လက်ပျက်ဖြင့် ဝတ်ရုံလက်စွပ်ကို ခါယမ်းလိုက်တော့သည်။
‘ဘာတွေ လိုက်စစ်နေမှာလဲ’
ရှေ့က ခုနစ်ယောက်... ရှစ်ယောက်စလုံးက ဒီလိုအခြေအနေမျိုးပဲလေ။ ဒီနောက်ကောင်က နွားတစ်ကောင်လို သန်မာနေပေမယ့်လည်း... သူလည်း သေချာပေါက် ပါရမီညံ့ဖျင်းတဲ့ အောက်တန်းစား အမှိုက်တစ်ယောက်ပဲ ဖြစ်မှာပါ။