"အစ်ကို ကျင်းတောက်... ကျွန်တော့်ရဲ့ ဝိညာဉ်စွမ်းအင်တွေက ရှန်းသောက် အမှတ်နားမှာ ပိတ်ဆို့နေပြီး ဖောက်ထွက်လို့ မရတော့ဘူး"
ချန်ကျင်းတောက်၏ ညာဘက်ခုတင်မှ အခန်းဖော် ဝမ်အာကော်သည် သူ၏ ခန္ဓာကိုယ်အတွင်းမှ ဝိညာဉ်စွမ်းအင်များ ယိုစိမ့်လာသည်ကို ခံစားလိုက်ရသည်။ သူသည် တစ်ကိုယ်လုံး ချွေးရွှဲလာပြီး စိုးရိမ်လွန်းသဖြင့် မျက်ရည်ပင် ဝဲလာခဲ့ရှာသည်။
"မလန့်နဲ့"
ချန်ကျင်းတောက်က သူ၏ ကျင့်ကြံခြင်း အတွေ့အကြုံကို မမျှဝေရသေးမီ... ဘေးခုတင်မှ ဟုန်အာနျိုက လှမ်း၍ ဝမ်အာကော်၏ ကျောပြင်ကို လက်ဖြင့် ဖိပေးလိုက်သည်။
ဟုန်အာနျိုက တည်ငြိမ်သော လေသံဖြင့် "ငါ့ရဲ့ ဝိညာဉ်စွမ်းအင်နဲ့ မင်းကို လမ်းညွှန်ပေးမယ်။ ငါ့ရဲ့ စီးဆင်းမှုအရှိန်အတိုင်း လိုက်ခဲ့ ဒီ ‘ထာဝရစိမ်းလန်း ဝိညာဉ်လမ်းညွှန်ကျင့်စဉ်’ က မျှတပြီး အေးချမ်းတာပဲ အားသာချက်…ဒါကို ဖောက်ထွက်နိုင်ရင် ရှေ့ဆက်ရတာ ချောမွေ့သွားလိမ့်မယ်" ဟု ပြောလိုက်သည်။
"ကျေးဇူးတင်ပါတယ် အစ်ကိုအာနျို"
ဝမ်အာကော်သည် နွေးထွေးသော စွမ်းအင်စီးကြောင်းတစ်ခု ဝင်ရောက်လာသည်ကို ခံစားလိုက်ရပြီး... ပိတ်ဆို့နေသော သွေးကြောများမှာ ချက်ချင်း ပွင့်လင်းသွားခဲ့ရသည်။
ဒီလို အချင်းချင်း ရိုင်းပင်းကူညီကြသည့် မြင်ကွင်းမျိုးသည် အိပ်ဆောင်တိုင်းတွင် ဖြစ်ပေါ်နေခဲ့သည်။ အဘယ်ကြောင့်ဆိုသော် သူတို့သည် ဂိုဏ်းချုပ် ပြောခဲ့သည့် စကားကို မှတ်မိနေကြသောကြောင့် ဖြစ်သည်။
“ငါတို့တွေက မိသားစုဝင်တွေပဲ"
သူတို့က မိသားစုဝင်တွေ ဖြစ်ကြသည့်အတွက် အတူတူ သန်မာလာကြရမည်။ ဂိုဏ်းချုပ်ကို အရှက်ရစေမည့်သူ တစ်ယောက်မှ မရှိစေရပါ။
အိပ်ဆောင်များ၏ အပြင်ဘက်တွင်မူ... ယွဲ့လင်သည် နီမြန်းသော တိုင်လုံးကြီးတစ်ခုကို မှီလျက် အခန်းများအတွင်းမှ မြင်ကွင်းကို တိတ်ဆိတ်စွာ စောင့်ကြည့်နေခဲ့သည်။
သူမ၏ အေးစက်လှသော မျက်နှာမှာ ပုံမှန်ထက် အနည်းငယ် ဖြူလျော်နေခဲ့သည် ဒါက လွန်ခဲ့သော သုံးနှစ်က အခြေခံတည်ဆောက်ခြင်းအဆင့် ကျရှုံးခဲ့မှုကြောင့် ကျန်ရစ်ခဲ့သော လမ်းစဉ်ဒဏ်ရာ ပြန်ထလာခြင်း ဖြစ်သည်။
အမှန်ဆိုလျှင်... သူမတွင် ဝိညာဉ်သားရဲအသားများ၏ အာဟာရနှင့် ဝိညာဉ်စွမ်းအင်များ သိပ်သည်းလှသော အိပ်ဆောင် ရှိနေပြီ ဖြစ်ရာ ကောင်းကောင်း အနားယူပြီး အခြေခံတည်ဆောက်ခြင်းအဆင့်ကို ထပ်မံ ကြိုးစားသင့်ပေသည်။
သို့သော်လည်း ကျင့်ကြံခြင်းလမ်းစဉ်သို့ စတင်ဝင်ရောက်လာကြသော ဂျူနီယာငယ်များကို သူမ တကယ်ပင် စိတ်မချနိုင်ခဲ့ချေ။
သူမသည် လူတိုင်းကို ကူညီပေးရန်အတွက် ဟိုဟိုဒီဒီ ပြေးလွှားနေခဲ့သည်။ သူမ၏ ဒဏ်ရာကို ကုသရန် အချိန်ပင် မရှိသလောက် နည်းပါးသွားခဲ့ရပြီး ကျင့်ကြံရန် အချိန်ကိုမူ ပြောနေစရာပင် မလိုတော့ပေ။
"စီနီယာအမ... ကျွန်မနဲ့ အတူတူ နည်းနည်းလောက် စားမလားဟင်"
သူမ၏ အနောက်ဘက်မှ ရှက်ရွံ့တုန်ရီသော အသံလေးတစ်ခု ထွက်ပေါ်လာခဲ့သည်။ ယွဲ့လင် လှည့်ကြည့်လိုက်သောအခါ ဝေးလံခေါင်ဖျားသော တောရိုင်းဒေသမှ လာသည့် မိန်းကလေးငယ် လင်းမြောင်မြောင်က ဝိညာဉ်သားရဲအသားတစ်တုံးကို ကိုင်ဆောင်လျက် မျက်နှာလေး နီမြန်းကာ ကြည့်နေသည်ကို တွေ့လိုက်ရသည်။
"လင်းမြောင်မြောင်... ညနက်သန်းခေါင်ကြီးမှာ မအိပ်ဘဲ... ဒါမှမဟုတ် မကျင့်ကြံဘဲ အပြင်မှာ ဘာထွက်လုပ်နေတာလဲ" ယွဲ့လင်က မျက်မှောင်အနည်းငယ် ကျုတ်လိုက်ပြီး သူမ၏ လက်ထဲမှ အသားတုံးကို ကြည့်ကာ မေးလိုက်သည်။
"စားသောက်ဆောင်မှာ ဝအောင်မစားခဲ့ရဘူးလား…ဒါမှမဟုတ် တစ်ယောက်ယောက်က မင်းကို အနိုင်ကျင့်လို့လား"
"မဟုတ်ပါဘူး စီနီယာအမ စားသောက်ဆောင်မှာ ဝအောင် စားခဲ့ရပါတယ်…အားလုံးက ကျွန်မအပေါ် အရမ်းကောင်းကြပါတယ်"
လင်းမြောင်မြောင်က အလောတကြီး ငြင်းဆန်လိုက်သဖြင့် သူမ၏ မျက်နှာလေးမှာ ပို၍ပင် နီမြန်းလာခဲ့သည်။
"ကျွန်မက ကျင့်ကြံခြင်းကို စတင်လိုက်တာနဲ့ ချက်ချင်း ဗိုက်ဆာလာတတ်လို့ပါ…ပြီးတော့ အမြဲတမ်း အသားစားချင်စိတ် ပေါက်လာတတ်လို့... ဒါပေမဲ့ အသားနံ့က ပြင်းလွန်းတော့ တခြားသူတွေရဲ့ ကျင့်ကြံခြင်းကို အနှောင့်အယှက် ဖြစ်မှာစိုးလို့ အပြင်ကို ခိုးထွက်စားနေတာပါ"
"..."
ယွဲ့လင်၏ နှလုံးသားထဲတွင် အနည်းငယ် ဝမ်းနည်းစိတ် ထွက်ပေါ်လာခဲ့ရသည်။
သူမသည် လင်းမြောင်မြောင်အကြောင်းကို သိရှိထားသည်။ ဒီမိန်းကလေးငယ်သည် စားသောက်ဆောင်တွင် အစားအသောက်ကို အတက်ကြွဆုံး စားသောက်တတ်သူ ဖြစ်သည်။ ဘာမျှမပေါက်ရောက်သော တောရိုင်းဒေသတောင်တန်းများတွင် မွေးဖွားခဲ့သဖြင့် သူမသည် အမြဲတမ်း ငတ်မွတ်ခေါင်းပါးမှုဒဏ်ကို ခံစားခဲ့ရသည်။
ထို့နောက် ထိုတောင်တန်းများတွင် ‘လျို့၀ှက်နယ်မြေ’ တစ်ခုကို ရှာဖွေတွေ့ရှိခဲ့ကြပြီး... အင်အားကြီးဂိုဏ်းတစ်ခုက မိုင်တစ်ရာပတ်လည်ကို အပိုင်စီးလျက် သာမန်လူသားများ ဝင်ရောက်ခြင်းကို ပိတ်ပင်ကာ ဖောက်ဖျက်ပါက ချက်ချင်း သတ်ဖြတ်ရန် အမိန့်ထုတ်ခဲ့သည်။
ထို့ကြောင့် သူမနှင့် သူမ၏ မိဘများသည် နေရပ်ကို စွန့်ခွာကာ လှည့်လည်တောင်းရမ်းခဲ့ကြရသည်။ လမ်းခရီးတွင် တောင်းရမ်းစားသောက်ရင်း မိဘနှစ်ပါးစလုံး ငတ်မွတ်ကာ သေဆုံးသွားခဲ့ကြသဖြင့် သူမတစ်ဦးတည်းသာ အသက်ရှင် ကျန်ရစ်ခဲ့ခြင်း ဖြစ်ပေသည်။
ဘဝတွင် ငတ်မွတ်ခြင်းဒဏ်ကို အလွန်အမင်း ခံစားခဲ့ရဖူးသဖြင့် ယခုအချိန်တွင် ဗိုက်ပြည့်နေသည့်တိုင်အောင် နောင်အတွက် ရည်ရွယ်၍ ပါးစပ်ထဲသို့ အသားတုံးအချို့ကို အမြဲတမ်း အတင်းထိုးထည့်ထားတတ်ရှာသည်။
"စားပါ... ဝအောင်စား" ယွဲ့လင်က သက်ပြင်းချလိုက်သည်။ "ဗိုက်ပြည့်ရင် ကောင်းကောင်း ကျင့်ကြံပါ မင်းသာ အင်မော်တယ် ဖြစ်သွားရင် နောင်ကို ငတ်မွတ်ခြင်းဒဏ်ကို ကြောက်စရာ မလိုတော့ဘူး"
"တကယ်လား" လင်းမြောင်မြောင်က ဝိညာဉ်သားရဲအသားကို ဝါးစားရင်း သူမ၏ မျက်ဝန်းအစုံတွင် မျှော်လင့်ချက် အလင်းရောင်များ တောက်ပလာခဲ့သည်။ "စီနီယာအမ... ကျွန်မ စားပြီးရင် သေချာပေါက် ကြိုးစားကျင့်ကြံပါ့မယ်"
"အင်း"
ယွဲ့လင်က ညင်သာစွာ ပြုံးပြလျက် ခေါင်းညိတ်လိုက်သည်။ သို့သော်လည်း လင်းမြောင်မြောင်တွင် ပါရမီအဆင့်အတန်း လုံးဝမရှိသည်ကို သူမ ကောင်းကောင်းသိသည်။
ကုန်ကျစရိတ်ကို ဂရုမစိုက်ဘဲ ရင်းနှီးမြှပ်နှံပေးနေသည့်တိုင်အောင် အင်မော်တယ်တစ်ဦးဖြစ်ရန် မည်မျှအထိ ခက်ခဲလိုက်မည်နည်း။
ထို့ပြင်... ထိုကတ်စေးနှဲ ဂိုဏ်းချုပ်ဖန်က ယခုအချိန်တွင် ဝိညာဉ်ကျောက်တုံး တစ်သန်းကို ထုတ်ပေးခဲ့ခြင်းမှာပင် သူမ၏ မျှော်လင့်ချက်ထက် ကျော်လွန်နေခဲ့ပြီ ဖြစ်သည်။
ဝိညာဉ်ကျောက်တုံးများ ကုန်ဆုံးသွားပါက ဒီဂျူနီယာလေးများ မည်သို့ဖြစ်သွားကြမည်နည်း။ သူတို့သည် မြေမှုန့်ဘဝသို့သာ ပြန်လည် ရောက်ရှိသွားကြပေလိမ့်မည်။
ယွဲ့လင်သည် ဖန်ယွမ်၏ မျှော်လင့်ချက်များကို အပျက်စီးမခံရန်အတွက် အသေအလဲ ကြိုးစားကျင့်ကြံနေကြသော သာမန်လူသား တပည့်များကို ပြန်လည်ကြည့်ရှုရင်း စိတ်မကောင်း ဖြစ်လာခဲ့ရသည်။
ထိုတပည့်များတွင် ပါရမီ လုံးဝမရှိကြဘဲ သူတို့၏ ကျင့်စဉ်များမှာလည်း အခြေခံအကျဆုံး အမှိုက်ပစ္စည်းများ ဖြစ်ကြသည်။ သို့သော် အခြားဂိုဏ်းမှ တပည့်များတွင် မရှိသောအရာ... ဖြူစင်လှသော လမ်းစဉ်နှလုံးသားတစ်ခုကိုမူ သူတို့ ပိုင်ဆိုင်ထားကြသည်။
"ဖန်ယွမ်..."
ယွဲ့လင်သည် နောက်တောင်ကုန်းပေါ်ရှိ ဂိုဏ်းချုပ်၏ သီးသန့်ဂူဗိမာန်ဆီသို့ ရှုပ်ထွေးလှသော မျက်နှာပေးဖြင့် မော့ကြည့်လိုက်သည်။
‘ရှင်က... ဒီလိုအဖိုးတန်တဲ့ အရင်းအမြစ်တွေကို သုံးပြီး အနိမ့်ဆုံးအဆင့်မှာရှိတဲ့ မြက်ပင်လေးတွေကို ရေလောင်းပေးနေတာဟာ... ကောင်းကင်ဘုံရဲ့ အလိုတော်ကို ဆန့်ကျင်ပြီး သူတို့တွေ ဒီကောင်းကင်ကြီးကို ပြောင်းလဲပစ်နိုင်မလားဆိုတာကို ကြည့်ချင်လို့လား’
‘ဒါပေမဲ့ အခုအချိန်မှာ... ကောင်းကင်လမ်းစဉ်က ညှိုးနွမ်းနေပြီ... ဝိညာဉ်စွမ်းအင်တွေကလည်း လျော့နည်းလာနေပြီ။ လောကမှာရှိတဲ့ ဂိုဏ်းအားလုံးက အကျိုးအမြတ်ကိုပဲ ကြည့်ပြီး တပည့်တွေကို ခေါင်းပုံဖြတ် အနိုင်ကျင့်နေကြတာ။ ကျင့်ကြံသူတွေကလည်း တစ်ယောက်ကိုတစ်ယောက် လုပ်ကြံရင်း သူတို့ရဲ့ မူလရည်ရွယ်ချက်တွေကို မေ့လျော့နေကြပြီ။ လောကကြီးက ဒီလိုဖြစ်နေတာကို... ငါတို့လို ဂိုဏ်းအသေးလေးက ဒီလိုကြီးကျယ်ခမ်းနားတဲ့ ကိစ္စကြီးကို ထမ်းဆောင်နိုင်မယ့် အရည်အချင်းနဲ့ အခြေခံအုတ်မြစ် ဘယ်မှာရှိမှာလဲ...’
တစ်လတာ သတ်မှတ်ရက် ရောက်ရှိလာခဲ့ပြီ ဖြစ်သည်။
နံနက်ခင်း၏ ပထမဆုံး နေခြည်လိုင်းများသည် ဂိုဏ်းချုပ်၏ ဂူဗိမာန် ကျောက်တံခါးဝဆီသို့ ဖြာကျလာခဲ့သည်။ ဖန်ယွမ်သည် မျက်လုံးများကို ချက်ချင်း ဖွင့်လိုက်ပြီး ခုတင်ထက်မှ ဖျတ်ခနဲ ထထိုင်လိုက်သည်။
"စာရင်းရှင်းပြီ….စာရင်းရှင်းပြီ"
သူသည် လက်နှစ်ဖက်ကို ပွတ်သပ်လျက် သူ၏ မျက်နှာတွင် ထိန်းမနိုင်သိမ်းမရသော ဝမ်းသာအားရ အပြုံးကြီးတစ်ခု ပေါ်ပေါက်နေခဲ့သည်။
တစ်လလုံးလုံး သူသည် တကယ်ပင် ပင်ပန်းဆင်းရဲခံခဲ့ရသည်။ ရန်ပုံငွေအားလုံးကို ကုန်သလောက် သုံးစွဲခဲ့ပြီး ဖြစ်သည်။ သူခေါ်ယူထားသော လူများမှာလည်း အသုံးမကျသော အမှိုက်များ ဖြစ်ကြသည်။ သူပေးထားသော ကျင့်စဉ်မှာလည်း ကျန်းမာရေးလေ့ကျင့်ခန်းအဆင့်သာ ရှိသည်။
ဒီလို အခြေအနေမျိုးတွင်မှ သူ၏ အင်အားက ထပ်မံ တိုးတက်လာဦးမည်ဆိုပါက သူ၏ ‘ဖန်ယွမ်’ ဟူသော နာမည်ကို ပြောင်းပြန်ပြန်ရေးပစ်မည်။ ထိုအချိန်မှစ၍ သူ၏ နာမည်ကို ‘ယွမ်ဖန်’ ဟု ပြောင်းလဲပစ်မည် ဖြစ်သည်။
"စနစ်... သေဟန်ဆောင်မနေနဲ့ဦး... အမြန်ဆုံး စာရင်းရှင်းစမ်း"
ဖန်ယွမ်သည် တက်ကြွစွာဖြင့် စနစ်မျက်နှာပြင်ကို ခေါ်ယူလိုက်သည်။
【ဒင်…ပထမဆုံး လ၏ စာရင်းရှင်းခြင်း စတင်ပါပြီ...】
【ဂိုဏ်းရန်ပုံငွေ သုံးစွဲမှုကို စစ်ဆေးနေပါသည်...】
【ဂိုဏ်း၏ အလုံးစုံအင်အား အပြောင်းအလဲကို တွက်ချက်နေပါသည်...】
ဖန်ယွမ်သည် ရင်တထိတ်ထိတ်ဖြင့် အသက်ရှူပင် အောင့်ထားမိသည်။ တကယ်လို့ ဂိုဏ်း၏ အင်အားက အမှတ်တစ်ရာမျှ လျော့ကျသွားလျှင်ပင်... အဆပေါင်းတစ်သောင်း ပြန်လည်ပေးဆပ်ခြင်း စည်းကမ်းအရ သူသည် အင်မော်တယ်ဧကရာဇ်အဆင့်ကနေ စတင်ရတော့မည် မဟုတ်ပါသလော။
စွမ်းအားကြီးမားလှသော စွမ်းရည်များကို ရရှိပြီး ဘလူးစတားကမ္ဘာသို့ စူပါမန်းအဖြစ် ပြန်လည် ရောက်ရှိသွားနိုင်ချေ ရှိသည်။
【စစ်ဆေးခြင်း ပြီးဆုံးပါပြီ】
【အိမ်ရှင် - ဖန်ယွမ်】
【အိမ်ရှင်အဆင့် - သာမန်လူသား】
【လက်ရှိ ဂိုဏ်းရန်ပုံငွေ - ၁,၀၂၃ ဝိညာဉ်ကျောက်တုံး (ဝိညာဉ်ကျောက်တုံး တစ်သန်း သုံးစွဲရမည့် အလုပ်ကို အောင်မြင်စွာ ပြီးဆုံးပါပြီ)】
【ဂိုဏ်း၏ အလုံးစုံအင်အား အပြောင်းအလဲအဆင့် - ၀.၀၁ မှတ် လျော့ကျသွားသည်။】
ဖန်ယွမ်၏ မျက်နှာထက်မှ အပြုံးများသည် ချက်ချင်း ပျောက်ကွယ်သွားခဲ့ရပြီး ကြောင်တောင်တောင် ဖြစ်သွားခဲ့ရသည်။ သူသည် မျက်လုံးကို ပွတ်လိုက်ပြီး ထပ်မံ ကြည့်ရှုလိုက်သည်။ သူ၏ မျက်လုံးများ ပြူးထွက်မတတ် ကြည့်နေသည့်တိုင်အောင် ထိုတောက်ပလှသော အနီရောင်ဂဏန်းမှာ "၀.၀၁" အဖြစ်သာ ရှိနေခဲ့သည်။
"ဘယ်လောက်လဲ"
ဖန်ယွမ်သည် ရုတ်တရက် ခုန်ထလိုက်ပြီး လေဟာနယ်ထဲရှိ စနစ်မျက်နှာပြင်ကို လက်ညှိုးထိုးကာ အော်ဟစ်လိုက်သည်။ "ဒီစနစ်စုတ်က ပျက်နေတာလား… ငါက အသုံးမကျတဲ့လူ ရာပေါင်းများစွာကို ခေါ်ယူထားတာ. ငါက သူတို့ကို ကျန်းမာရေးလေ့ကျင့်ခန်းပဲ ပေးကျင့်ထားတာ…အဲဒါကို ၀.၀၁ ပဲ လျော့ကျတယ် ဟုတ်လား"
【စနစ်သတိပေးချက် - အချက်အလက် စစ်ဆေးမှု မှန်ကန်ပါသည်။ ဂိုဏ်းဝင်အားလုံးသည် ဝိညာဉ်စွမ်းအင်ကို အောင်မြင်စွာ ခံစားသိရှိနိုင်ခဲ့ကြပြီး ချီစွမ်းအင် ဖြစ်ပေါ်ခဲ့သည်။ တပည့်အချို့မှာ ချီသန့်စင်ခြင်း အဆင့်၆ သို့ ဖောက်ထွက်အောင်မြင်ခဲ့ကြသဖြင့် ဂိုဏ်း၏ ပျမ်းမျှအင်အားမှာ ၀.၀၁ မျှသာ လျော့ကျသွားခြင်း ဖြစ်သည်။】
‘အားလုံးက ဝိညာဉ်စွမ်းအင်ကို အောင်မြင်စွာ ခံစားသိရှိနိုင်ခဲ့ကြတယ် ဟုတ်လား'
ဖန်ယွမ်၏ ဦးနှောက်တစ်ခုလုံး ဝုန်းကနဲ ဖြစ်သွားခဲ့ရသည်။ ထို ‘ထာဝရစိမ်းလန်း ဝိညာဉ်လမ်းညွှန်ကျင့်စဉ်’ ဟာ ဆယ်နှစ်ကျင့်ရင်တောင် ချီသန့်စင်ခြင်းအဆင့်သို့ ရောက်ရန် မသေချာဟု နာမည်ကြီးနေသည် မဟုတ်ပါသလော။ ဒီလူတွေက ဘာဆေးတွေ သောက်ထားကြလို့လဲ။ လူတိုင်းက တစ်လတည်းနဲ့ အောင်မြင်သွားကြရတယ် ဟုတ်လား။
ဖန်ယွမ် ဒီသတင်းဆိုးကို မချေဖျက်နိုင်သေးမီမှာပင် စနစ်၏ ဆုလာဘ်ပေးခြင်း သတိပေးချက်က ထပ်မံ ထွက်ပေါ်လာခဲ့ပြန်သည်။
【စာရင်းရှင်းခြင်း ဆုလာဘ်များကို ပေးအပ်နေပါသည်...】
【အိမ်ရှင်သည် အဆပေါင်းတစ်သောင်း ကျင့်ကြံခြင်း ပြန်လည်ပေးဆပ်မှုကို ရရှိသည့်အတွက် ဂုဏ်ယူပါသည်】
ဝုန်း…
ကြီးမားလှပြီး ဖော်ပြ၍မရနိုင်သော စွမ်းအင်အဆီအနှစ်များသည် ဖန်ယွမ်၏ ဒန်တျန်အတွင်း၌ အလိုအလျောက် ပေါ်ပေါက်လာခဲ့သည်။ သူ တုံ့ပြန်ရန် အခွင့်အရေးပင်မရမီ ထိုစွမ်းအင်များသည် ပြင်းထန်သော ရေလှိုင်းကြီးတစ်ခုကဲ့သို့ သူ၏ ပိတ်ဆို့နေသော သွေးကြောအားလုံးကို ချက်ချင်း ဖောက်ထွက်ပစ်လိုက်တော့သည်။
ချီသန့်စင်ခြင်း အဆင့်၁... အဆင့် ၅... ချီသန့်စင်ခြင်း ပြီးပြည့်စုံသောအဆင့်။
ဖျောက်…
သူ၏ ခန္ဓာကိုယ်အတွင်းရှိ အချုပ်အနှောင်အချို့ ကွဲအက်သွားသကဲ့သို့ ခံစားလိုက်ရသည်။
အခြေခံအုတ်မြစ်တည်ဆောက်ခြင်းအဆင့် အစောပိုင်း... အလယ်ပိုင်း... အခြေခံအုတ် မြစ်တည်ဆောက်ခြင်း ပြီးပြည့်စုံသောအဆင့်
ရွှေအမြုတေအဆင့် ဖြစ်ပေါ်လာခဲ့ကာ..
စ…လယ်..နှောင်း….
ထို့နောက် ရွှေအမြုတေ ကွဲအက်သွားကာ နတ်ဝိညာဉ်အဆင့်သို့ ရောက်ရှိသွားခဲ့သည်။
ကြောက်မက်ဖွယ်ကောင်းလှသော အရှိန်အဝါများသည် ဖန်ယွမ်ကို ဗဟိုပြုလျက် ပေါက်ကွဲထွက်သွားခဲ့ပြီး... မြင်တွေ့နိုင်သော ဝိညာဉ်စွမ်းအင် တိုင်လုံးကြီးတစ်ခုအဖြစ် ပြောင်းလဲကာ ဂူဗိမာန်၏ အမိုးကို ဖောက်ထွက်လျက် ကောင်းကင်ယံထက်ဆီသို့ ထိုးတက်သွားခဲ့တော့သည်။
ချုံးရှင်းဂိုဏ်း၏ တောင်ကုန်းတစ်ခုလုံး ပြင်းထန်စွာ တုန်ခါသွားခဲ့ရသည်။
လေ့ကျင့်ရေး ကွင်းပြင်ထက်တွင်မူ... တပည့်အမြောက်အမြားသည် ဝိညာဉ်စွမ်းအင်များ ပေါက်ကွဲထွက်လာရာ အရပ်ဆီသို့ ကြည့်လျက် နှလုံးသားများ တုန်လှုပ်သွားခဲ့ကြရသည်။
‘ဂိုဏ်းချုပ်က... အဆင့်တက်သွားတာလား'
ယခုအချိန်တွင် ဖန်ယွမ်သည် ဂူဗိမာန်အတွင်း လေထုထဲ၌ ဝဲပျံနေခဲ့ပြီး သူ၏ ဆံပင်ရှည်များသည် လေထဲတွင် ဝေ့ဝဲလျက်... သူ၏ တစ်ကိုယ်လုံးမှ အသက်ရှူကျပ်မတတ် ပြင်းထန်သော ဖိအားများကို ထုတ်လွှတ်နေခဲ့သည်။
နတ်၀ိညာဥ်အဆင့်…
ချုံးရှင်းဂိုဏ်း တည်ရှိရာ ဒီတိုက်ကြီး၏ အစွန်အဖျားဒေသတွင် နတ်ဝိညာဉ်အဆင့်ဟူသည် ဂိုဏ်းငယ်တစ်ခုကို တည်ထောင်ကာ လူပေါင်းသောင်းချီ၏ ကြည်ညိုလေးစားမှုကို ခံယူနိုင်သည့် ဘိုးဘေးအဆင့်အတန်းမျိုး ဖြစ်ပေသည်။
ဖန်ယွမ်သည် သူ၏ လက်သီးများကို ကျစ်ကျစ်ပါအောင် ဆုပ်လိုက်ပြီး သူ၏ ခန္ဓာကိုယ်အတွင်းရှိ ကြီးမားလှသော စွမ်းအားများကို ခံစားလိုက်ရသည်။
သန်မာလား…
အလွန် သန်မာသည်…
ဒါပေမဲ့ သူ ငိုချင်နေခဲ့သည်…
"ငါ့ရဲ့ အင်မော်တယ်ဧကရာဇ်အဆင့်က ဘယ်မှာလဲ… ငါ့ရဲ့ ထာဝရအင်မော်တယ်လမ်းစဉ်က ဘယ်မှာလဲ။ ငါ အိမ်ပြန်မယ့်လမ်းက ဘယ်မှာလဲ"
ဖန်ယွမ်သည် ဝမ်းနည်းလွန်းသဖြင့် စကားပင် မပြောနိုင်တော့ပေ…မင်းက ငါ့ကို နတ်ဝိညာဉ်အဆင့်ပဲ ပေးတယ် ဟုတ်လား ဒါက ထီသိန်းငါးဆယ် ပေါက်သော်လည်း ဆုငွေထုတ်သည့်အခါကျမှ ဇင်ဘာဘွေဒေါ်လာဖြင့် ပေးသကဲ့သို့ ဖြစ်နေသဖြင့် ကွာခြားချက်က ကြီးမားလွန်းလှပေသည်။
【ဒင်…အိမ်ရှင်သည် ဂိုဏ်း၏ အင်အားကို ပထမဆုံးအကြိမ် လျော့ကျအောင် လုပ်ဆောင်နိုင်ခဲ့သည့်အတွက် ဂုဏ်ယူပါသည် အထူးစွမ်းရည်တစ်ခု ဖြစ်သော 'ငါးစက္ကန့် စွမ်းအားရှင်' ကို ရရှိပါသည်】
【စွမ်းရည်ဖော်ပြချက် - ဒီစွမ်းရည်ကို အသုံးပြုလိုက်ပါက အိမ်ရှင်သည် ငါးစက္ကန့်အတွင်း လုံးဝ ထိခိုက်ဒဏ်ရာမရရှိနိုင်သော အခြေအနေသို့ ရောက်ရှိသွားမည်ဖြစ်ပြီး... မည်သည့်တိုက်ခိုက်မှုကိုမဆို ခုခံနိုင်သည့်အပြင် မည်သည့် ကျင့်ကြံခြင်းအဆင့်၏ ဖိနှိပ်မှုကိုမဆို လျစ်လျူရှုနိုင်မည် ဖြစ်သည်။ အေးခဲချိန်- ၂၄ နာရီ】
ဖန်ယွမ်၏ မျက်လုံးများ ပြာဝေသွားခဲ့ရသည်။ ဒီအစွမ်းနာမည်က... စနစ်... မင်း တကယ်ပဲ နောက်နေတာလား ဒီစွမ်းရည်၏ အကျိုးသက်ရောက်မှုက ကောင်းကင်ဘုံကို ဆန့်ကျင်နိုင်လောက်အောင် အစွမ်းထက်သော်လည်း... ဒီနာမည်ကို ကျယ်လောင်စွာ အော်ဟစ်လိုက်ပါက လူမှုရေးအရ သေဆုံးသွားနိုင်သည် မဟုတ်ပါသလော။
【စက်ဝန်း( ဂိမ်းတွေလိုပေါ့ season အသစ်ပြန်စ)အသစ်၏ တာ၀န်ကို ပေးအပ်လိုက်ပါပြီ】
【တာ၀န်ရည်မှန်းချက် - သုံးလအတွင်း ဂိုဏ်းရန်ပုံငွေထဲမှ ဝိညာဉ်ကျောက်တုံး နှစ်သန်းကို ကုန်ဆုံးအောင် သုံးစွဲပါ】
【တာ၀န်ကန့်သတ်ချက် - ဝိညာဉ်ကျောက်တုံးများကို တိုက်ရိုက်လက်ဆောင်ပေးခြင်း... စွန့်ပစ်ခြင်း သို့မဟုတ် ဖျက်ဆီးပစ်ခြင်းများ မပြုလုပ်ရ…မချေးရ …သုံးစွဲမှုများသည် ဂိုဏ်း၏ ပုံမှန်လည်ပတ်မှု လုပ်ငန်းစဉ်များနှင့် ကိုက်ညီသော ယုတ္တိရှိသည့် နည်းလမ်းများသာ ဖြစ်ရမည်။】
【လက်ရှိ ဂိုဏ်းအကောင့် လက်ကျန် - ဝိညာဉ်ကျောက်တုံး နှစ်သန်း (အလုပ်ရန်ပုံငွေ နှစ်သန်းကို ထည့်သွင်းပေးပြီးဖြစ်ပါသည်)】
【စနစ်၏ တာ၀န်ကို ပြီးမြောက်ရန်အတွက် ရန်ပုံငွေများကို အမြန်ဆုံး သုံးစွဲပေးပါ…တကယ်လို့ အလုပ်မပြီးမြောက်ပါက ကျန်ရှိသော ရန်ပုံငွေများပေါ် မူတည်၍ ကျင့်ကြံခြင်းအဆင့်ကို ပြန်လည် နုတ်ယူသွားမည် ဖြစ်သည်။】
"နှစ်သန်း ဟုတ်လား"
ထိုဂဏန်းကြီးကို ကြည့်ရင်း ဖန်ယွမ်၏ မျက်စိရှေ့တွင် မှောင်မိုက်သွားခဲ့ရချေတော့သည်။