လူအုပ်ကြီးထဲတွင် အကဲခတ်ညဏ် အနည်းငယ်ရှိသော တပည့်အချို့မှာလည်း မျက်နှာပျက်လျက် တစ်ယောက်ကိုတစ်ယောက် ကြောင်တမ်းတမ်းဖြင့် လှမ်းကြည့်နေကြသည်။
"ဂိုဏ်းချုပ်က ကျမ်းစာမှားထုတ်ပေးတာလား"
"ဂိုဏ်းရဲ့ အခြေခံအုတ်မြစ် ကျင့်စဉ်က... ဒါပဲလား"
ချန်ကျင်းတောက်ပင် ဆွံ့အသွားခဲ့ရသည်။ သူသည် ယခင်က မကျင့်ကြံဖူးသော်လည်း စာပေဗဟုသုတ ကြွယ်ဝသူဖြစ်သည်။ ဤ ‘ထာဝရစိမ်းလန်း ဝိညာဉ်လမ်းညွှန်ကျင့်စဉ်’ ၏ လမ်းညွှန်ချက်များကို မည်သို့ပင် ကြည့်ကြည့်... ဒါသည် အခြေခံအကျဆုံး အမှိုက်ပစ္စည်းတစ်ခု ဖြစ်နေသည် မဟုတ်ပါသလော။
"ဒါက... တုနှိုင်းမဲ့ကျင့်စဉ် ဟုတ်လား"
ကြီးမားလှသော စိတ်ပျက်မှု အရိပ်အယောင်များသည် လူအုပ်ကြီးကြားတွင် စတင် ပျံ့နှံ့လာခဲ့သည်။
စင်မြင့်ထက်တွင် ရပ်နေသော ဖန်ယွမ်သည် လူတိုင်း၏ ခံစားချက် အပြောင်းအလဲကို အကဲခတ်မိလိုက်သည်။
’အို…ဟို့... ဒါက အမှိုက်ကျင့်စဉ်ဆိုတာကို ရိပ်မိတဲ့ကောင်တွေ ရှိနေတာပဲ…ထားလိုက်ပါတော့... ငါပဲ ဇာတ်လမ်းထွင်ပြီး လှည့်စားလိုက်ရုံပေါ့’
သူသည် အပြင်ပန်းတွင် မျက်ခုံးများကို တင်းတင်းကျုတ်လိုက်ပြီး အေးစက်စွာ နှာခေါင်းရှုံ့လိုက်သည်။ "ဘာလဲ... မင်းတို့က ဒီကျင့်စဉ်ကို အထင်သေးနေကြတာလား"
အေးစက်လှသော နှာခေါင်းရှုံ့သံသည် မိုးခြိမ်းသံကဲ့သို့ ဟည်းထွက်သွားသဖြင့် တပည့်အားလုံး တုန်လှုပ်သွားကြရသည်။
"တပည့်တို့ မဝံ့ရဲပါဘူး" လူတိုင်း အလျင်အမြန် ခေါင်းငုံ့လိုက်ကြသည်။
"ဒါပေမဲ့... ဒီကျင့်စဉ်က နည်းနည်းလေး ရိုးရှင်းလွန်းနေသလို ခံစားရလို့ပါ..."
‘ဘာရိုးရှင်းတာလဲ... ဒါက အမှိုက်သက်သက်သာ ပဲလေ’
"ဟွန့်... အမြင်ကျဉ်းမြောင်းလိုက်ကြတာ"
ဖန်ယွမ်သည် ရှေ့သို့ တစ်လှမ်းလှမ်းလိုက်ပြီး သူ၏ အရှိန်အဝါကို မြှင့်တင်လျက် လှည့်စားခြင်း...ကို စတင်လိုက်တော့သည်။
"လောကလူသားတွေက ဖြတ်လမ်းကိုပဲ ရှာဖွေချင်ကြပြီး စွမ်းအားကြီးမားပြီး အောင်မြင်မှု မြန်ဆန်တဲ့ ကျင့်စဉ်တွေကိုပဲ သဘောကျကြတယ်"
"ဒါပေမဲ့ သူတို့ မသိကြတာက... အထပ်တစ်သောင်းရှိတဲ့ အဆောက်အအုံကြီးက မြေပြင်ကနေပဲ စတင် တည်ဆောက်ရတာ ဖြစ်တယ်ဆိုတာပဲ"
"ကျင့်စဉ်တစ်ခုက ပိုပြီး ရိုးရှင်းလေလေ... လူတစ်ယောက်ရဲ့ အခြေခံအုတ်မြစ်ကို ပိုပြီး ခိုင်မာစေလေလေပဲ… လူတစ်ယောက်ရဲ့ လမ်းစဉ်နှလုံးသားကို ပိုပြီး သန့်စင်ပေးနိုင်လေလေပဲ"
ဖန်ယွမ်သည် တောင်ကုန်းအနှံ့ရှိ သားနားထည်ဝါလှသော အဆောက်အအုံများကို လက်ညှိုးထိုးပြလျက် ကျယ်လောင်စွာ မေးခွန်းထုတ်လိုက်သည်။
"ငါက မင်းတို့ကို အဖိုးတန်ဆုံး အစားအစာတွေ... အကောင်းဆုံး အိပ်ဆောင်တွေနဲ့ အမြင့်မားဆုံး ခံစားခွင့်တွေကို ပေးထားတာ…ကျင့်စဉ်ကျမ်းစာတွေ ပေးတဲ့နေရာကျမှ မင်းတို့ကို ငါက နှိမ်ချဆက်ဆံပါ့မလား"
ထိုမေးခွန်းသည် သူတို့၏ ဝိညာဉ်အနက် ဆုံးဆီသို့ တိုက်ရိုက် ထိုးနှက်သွားခဲ့သည်။
ဟုတ်ပေသည်…ဂိုဏ်းချုပ်သည် သူတို့အတွက် အနည်းဆုံး ဝိညာဉ်ကျောက်တုံး သိန်းပေါင်းများစွာကို သုံးစွဲပေးခဲ့ပြီး ဖြစ်သည်။ သူတို့အားလုံး ပိုမို အစွမ်းထက်လာပြီး ဂိုဏ်းကို ပြန်လည် အကျိုးပြုနိုင်ရန် မျှော်လင့်နေမည်မှာ သေချာသည်။ သူတို့အပေါ် ရည်ရွယ်ချက်ရှိရှိ အမှိုက်ကျင့်စဉ်ပေးပြီး ဒုက္ခပေးရန် မည်သို့မျှ မဖြစ်နိုင်ပေ။
ဒါဆို တစ်ခုတည်းသော ရှင်းလင်းချက်က...
ချန်ကျင်းတောက်သည် ရုတ်တရက် ခေါင်းမော့လိုက်ပြီး သူ၏ မျက်ဝန်းအစုံတွင် ကျွမ်းကျင်လိမ္မာခြင်း အရောင်အဝါများ ပြန်လည် တောက်ပလာခဲ့ပြန်သည်။
"ကျွန်တော် နားလည်သွားပြီ"
သူသည် ကျယ်လောင်စွာ အော်ဟစ်လိုက်သဖြင့် ဘေးနားရှိ ဟုန်အာနျိုပင် လန့်ဖျတ်သွားခဲ့ရသည်။ ချန်ကျင်းတောက်သည် စိတ်လှုပ်ရှားမှုကြောင့် မျက်နှာတစ်ခုလုံး နီမြန်းနေခဲ့ပြီး လက်သီးများကို ဝှေ့ယမ်းကာ လူတိုင်းကို အော်ပြောလိုက်သည်။
"အားလုံးပဲ... ဒါက ဘယ်လိုလုပ်ပြီး သာမန် ကျန်းမာရေးလေ့ကျင့်ခန်း ဖြစ်နိုင်မှာလဲ"
"ဂိုဏ်းချုပ်က ကြီးမားလှတဲ့ စစ်တုရင်ကစားပွဲကြီးတစ်ခုကို ကစားနေတာ"
"စဉ်းစားကြည့်ကြစို့…ငါတို့အများစုက ပါရမီ ညံ့ဖျင်းကြသူတွေ ဖြစ်သလို... အချို့ဆိုရင် ဝိညာဉ်အမြစ် တောင် မရှိကြဘူး"
"တကယ်လို့ ငါတို့က စွမ်းအားပြင်းထန်တဲ့ အဆင့်မြင့်ကျင့်စဉ်တွေကို တိုက်ရိုက် ကျင့်ကြံမယ်ဆိုရင် ငါတို့ရဲ့ သွေးကြောတွေက ခံနိုင်ရည် ရှိပါ့မလား…ငါတို့ရဲ့ ခန္ဓာကိုယ်တွေက တောင့်ခံနိုင်ပါ့မလား"
"အဲဒါက ငါတို့ကို ကူညီတာမဟုတ်ဘဲ ဒုက္ခပေးတာ ဖြစ်သွားလိမ့်မယ်"
ချန်ကျင်းတောက်သည် စကားကို ပိုမို အဆင်ပြေချောမွေ့စွာ ပြောဆိုလာခဲ့ပြီး သူ၏ အတွေးအမြင်မှာ လုံးဝကို ပြည့်စုံလွန်းနေသည်။
"ဒါကြောင့် ဒီ ‘ထာဝရစိမ်းလန်း ဝိညာဉ်လမ်းညွှန်ကျင့်စဉ်’ က ချီမျှတပြီး အေးချမ်းစေတဲ့အပြင် အရာအားလုံးကို လက်ခံနိုင်စွမ်း ရှိတယ်… ဂိုဏ်းက ပေးထားတဲ့ ဝိညာဉ်သားရဲအသားတွေ... ဝိညာဉ်စုဆောင်းခန်းတွေနဲ့ ပေါင်းစပ်လိုက်ရင်... ဒါက ငါတို့အတွက် အသင့်တော်ဆုံး လမ်းညွှန်နတ်ဘုရားကျင့်စဉ် ဖြစ်သွားတာပဲ"
"ဂိုဏ်းချုပ်က ငါတို့ရဲ့ အရည်အချင်းအလိုက် သွန်သင်ဆုံးမပေးနေတာ... ငါတို့အတွက် သောကအများကြီး ခံစားနေရတာ"
"ငါတို့က ဂိုဏ်းချုပ်ရဲ့ စေတနာကို သံသယ ဝင်မိကြတယ်... ငါတို့တွေက တကယ့်ကို... တိရစ္ဆာန်တွေထက်တောင် ယုတ်ညံ့ကြတယ်"
ချန်ကျင်းတောက်သည် စကားပြောပြီးနောက် နောင်တတရားများကြောင့် မိမိကိုယ်မိမိ ပါးတစ်ချက် ရိုက်လိုက်သည်။
ဖြောင်း….
ပါးရိုက်သံသည် လေ့ကျင့်ရေး ကွင်းပြင်တစ်ခုလုံးတွင် ပဲ့တင်ထပ်သွားခဲ့သည်။ ကွင်းပြင်တစ်ခုလုံး တိတ်ဆိတ်သွားခဲ့ရပြီးနောက် လူတိုင်း ဖန်ယွမ်ကို ကြည့်သည့် မျက်ဝန်းများသည် ချက်ချင်း ပြောင်းလဲသွားခဲ့ပြန်သည်။ သူတို့သည် နောင်တတရားများ... ကြည်ညိုလေးစားမှုများနှင့် အရူးအမူး စွဲလမ်းမှုများ ဖြစ်ပေသည်။
"ဂိုဏ်းချုပ်က အမြော်အမြင် ကြီးမားလှပါတယ်... တပည့်တို့ကသာ ဉာဏ်ပညာ နုနယ်မိတာပါ" ဟုန်အာနျိုသည် ရှက်ရွံ့မှုများကြောင့် သူ၏ ရင်ဘတ်ကို ပြင်းထန်စွာ ထုရိုက်လိုက်သည်။
သူသည် သာမန်လူသားတစ်ဦး၏ အမြင်ဖြင့် ဂိုဏ်းချုပ်၏ ဉာဏ်ပညာကို တိုင်းတာမိခဲ့သည် သူ သေထိုက်လှပေသည်။
ဂိုဏ်းချုပ်က သူတို့ကို အကောင်းဆုံးအရာများ ကျွေးမွေးခဲ့ခြင်းမှာ ဤကျင့်စဉ်ကို ထောက်ပံ့ပေးရန်အတွက် ဖြစ်ပေသည်။ ခြေလှမ်းတိုင်းမှာ ဂိုဏ်းချုပ်၏ တွက်ချက်မှုအတွင်းမှာပင် ရှိနေခဲ့သည်။
"ဂိုဏ်းချုပ်ရဲ့ ကြီးမားလှတဲ့ ကျေးဇူးတရားကို ကျေးဇူးတင်ပါတယ် တပည့်တို့ သေချာပေါက် ကြိုးစားကျင့်ကြံပြီး ဂိုဏ်းချုပ်ရဲ့ မျှော်လင့်ချက်တွေကို အပျက်စီးမခံပါဘူး"
တပည့်ရာပေါင်းများစွာသည် တပြိုင်နက်တည်း ဒူးထောက်လိုက်ကြပြီး သူတို့၏ အော်ဟစ်သံများမှာ ယခင်ကထက်ပင် ပိုမို ပြင်းထန်လာခဲ့တော့သည်။
စင်မြင့်ထက်တွင်မူ...
ဖန်ယွမ် : "..."
မိမိဘာသာ ဇာတ်လမ်းဆင်ပြီး အတွေးလွန်နေသော ချန်ကျင်းတောက်ကို ကြည့်ကာ ဖန်ယွမ်၏ မျက်လုံးများ ပြာဝေသွားခဲ့ရသည်။
’နေဦး... ညီလေး... မင်းရဲ့ ဦးနှောက်က ဘယ်လိုတွေ တည်ဆောက်ထားတာလဲ ငါက မင်းတို့ကို လှည့်စားဖို့ အမှိုက်စာအုပ်စုတ်တစ်အုပ်ကို အလွယ်တကူ ထုတ်ပေးလိုက်တာကို... မင်းက 'လမ်းညွှန် နတ်ဘုရားကျင့်စဉ်' အဖြစ်အထိ တွေးတောပစ်လိုက်တယ် ဟုတ်လား…အရည်အချင်း အလိုက် သွန်သင်တာ ဟုတ်လား’
လောကတွင် သာမန်လူသား အမြောက်အမြား ရှိသည်။ အရည်အချင်းအလိုက် သွန်သင်ရုံမျှဖြင့် အခြေခံတည်ဆောက်ခြင်း... ရွှေအမြုတေအဆင့်သို့ ရောက်ရှိပြီး အင်မော်တယ် ဖြစ်နိုင်မည်ဆိုပါက လောကတွင် ပါရမီရှင်နှင့် သာမန်လူဟူ၍ အဘယ်ကြောင့် ကွာခြားချက် ရှိနေတော့မည်နည်း။
သို့သော်လည်း... လူတိုင်း၏ မျက်ရည်ဝဲလျက် ကျေးဇူးတင်နေကြသော မျက်နှာများကို မြင်တွေ့ရသောအခါ ဖန်ယွမ် စိတ်သက်သာရာ ရသွားခဲ့သည်။ သူတို့ ဘာပဲတွေးတွေး... ဒီကျင့်စဉ်က အမှိုက်ဖြစ်သည်ဟူသော အချက်ကတော့ ပြောင်းလဲမည်မဟုတ်ပေ။
သူတို့ ဘာအောင်မြင်မှုမှ မရရှိသရွေ့ ဂိုဏ်း၏ အင်အားက တိုးတက်လာမည်မဟုတ်ဘဲ သူသည် ထာဝရအင်မော်တယ် လမ်းစဉ်ကို အောင်မြင်မည် ဖြစ်သည်။
ထို့အပြင် ဝိညာဉ်ကျောက်တုံးအားလုံးကို သူတို့အပေါ် သုံးစွဲပေးခဲ့ပြီး ဖြစ်သဖြင့် သူတို့ကို လှည့်စားမိခြင်းအတွက် အကျိုးအမြတ် အပြန်အလှန် ရရှိသည်ဟု သတ်မှတ်၍ရပေသည်။
"အဟမ်း... မင်းတို့ နားလည်ရင်လည်း... လူစုခွဲကြတော့" ဖန်ယွမ်သည် ဆက်နေလျှင် အခြေအနေ ပျက်ပြားသွားမည်ကို စိုးရိမ်သဖြင့် အလျင်အမြန် လက်ဝေ့ယမ်းလိုက်သည်။ "ပြန်ပြီးတော့ ကိုယ့်ဘာသာကိုယ် ကျင့်ကြံကြချေ"
"ဟုတ်ကဲ့ပါ"
တပည့်များသည် အမိန့်ကို နာခံလိုက်ကြသည်။ ချန်ကျင်းတောက်နှင့် ဟုန်အာနျိုတို့၏ ဦးဆောင်မှုဖြင့် သူတို့သည် ‘ထာဝရစိမ်းလန်း ဝိညာဉ်လမ်းညွှန်ကျင့်စဉ်’ များကို အလွန်တန်ဖိုးထားစွာ ကိုင်ဆောင်လျက် အိပ်ဆောင်များဆီသို့ လျှောက်လှမ်းသွားခဲ့ကြသည်။
သူတို့၏ ပုံစံမှာ အင်မော်တယ်ဧကရာဇ်အဆင့်သို့ ရောက်ရှိစေနိုင်မည့် ကောင်းကင်အဆင့် ကျင့်စဉ်ကြီးကို ကိုင်ဆောင်ထားသကဲ့သို့ တရိုတသေ ရှိလှပေသည်။
ဖန်ယွမ်သည် ဟာလာဟင်းလင်း ဖြစ်ကာကျန်ရစ်ခဲ့သော လေ့ကျင့်ရေး ကွင်းပြင်ကို ကြည့်ကာ ကျေနပ်စွာ ခေါင်းညိတ်လိုက်သည်။
အရမ်းကောင်းသည်။ ရန်ပုံငွေတွေ ကုန်သလောက် ဖြစ်သွားပြီ။ တပည့်တွေ အားလုံးကလည်း အမှိုက်ကျင့်စဉ်ကို သွားပြီး ကျင့်ကြံနေကြပြီ။ နောက်ထပ် သူ လုပ်ဆောင်ရမည့်အရာမှာ အခန်းသို့ ပြန်ကာ လှဲလျောင်းနေရုံသာ ဖြစ်ပြီး... ဂိုဏ်း ဘဏ္ဍာတိုက် ပြောင်သလင်းခါသွားမည့်အချိန်နှင့် စနစ်၏ စာရင်းရှင်းမည့်ရက်ကို အေးဆေးစွာ စောင့်ဆိုင်းရုံသာ ဖြစ်ပေတော့သည်။
ဒီတစ်ကြိမ်တော့... အောင်မြင်မှုက လက်တစ်ကမ်းမှာတင် ရှိနေချေပြီ။
ညဉ့်မှောင်မိုက်လှသော အချိန်... ချုံးရှင်းဂိုဏ်း၏ နောက်တောင်ကုန်းရှိ သားနားထည်ဝါလှသော တပည့်ဆောင်များတွင်မူ နေ့ခင်းဘက်ကဲ့သို့ မီးများ လင်းထိန်နေခဲ့သည်။
ပုံမှန်အားဖြင့် ကျင့်ကြံခြင်းကို စတင်ခါစ ရှိသေးသော တပည့်သစ်များသည် ယခုအချိန်တွင် နှစ်ခြိုက်စွာ အိပ်ပျော်နေသင့်ချေပြီ။ ကျင့်ကြံခြင်းသည် ခန္ဓာကိုယ်နှင့် စိတ်ဓာတ်ခွန်အားကို အလွန်အမင်း ကုန်ခမ်းစေသဖြင့် အချိန်ကြာမြင့်စွာ လေ့ကျင့်ပါက အိပ်ငိုက်ခြင်းကို လွယ်ကူစွာ ဖြစ်ပေါ်စေနိုင်သည်။ သို့သော်လည်း အိပ်ဆောင်တိုင်းတွင်မူ အိပ်စက်ခြင်းမရှိဘဲ ပြင်းထန်စွာ ကြိုးစားအားထုတ်နေကြသည့် မြင်ကွင်းများဖြင့် ပြည့်နှက်နေသည်။
ချန်ကျင်းတောက်နှင့် ဟုန်အာနျိုတို့ အတူတူ နေထိုင်သော ခြောက်ယောက်ခန်း အတွင်း၌...
"အာနျို... မအိပ်နဲ့ဦး ဝိညာဉ်စွမ်းအင်ကို မင်းရဲ့ ဒန်တျန် ထဲ စုစည်းပြီး ဆက်ပြီး ကျင့်ကြံစမ်း"
ချန်ကျင်းတောက်သည် သူ၏ ခုတင်ထက်တွင် တင်ပျဉ်ခွေထိုင်လျက် မျက်လုံးဖွင့်ကာ မျက်စိမှိတ်လုနီးပါး ဖြစ်နေသော အခန်းဖော်ကို ကြည့်ပြီး အံကြိတ်ကာ ပြောလိုက်သည်။
"ဂိုဏ်းချုပ်က ငါတို့ကို ပေးထားတဲ့ ဝိညာဉ်သားရဲအသားတွေကို စဉ်းစားကြည့်စမ်း အဖိုးမဖြတ်နိုင်တဲ့ ဝိညာဉ်စုဆောင်းအစီအရင် သစ်သားအိပ်ဆောင်တွေကို စဉ်းစားကြည့်စမ်း… မင်း တကယ်ပဲ အိပ်ပျော်နိုင်သေးလို့လား"
သူသည် မျက်ဝန်းများ နီမြန်းလျက် တိုးတိုးလေး ပြောလိုက်သည်။ သူသည်လည်း ပင်ပန်းနွမ်းနယ်မှုများကို အတင်းအကျပ် အောင့်အည်းကာ ကျင့်ကြံနေခြင်း ဖြစ်သည်။ ဘေးပတ်ပတ်လည်ရှိ ခုတင်များထက်မှ အခြားတပည့်များသည်လည်း သွားများကို တင်းတင်းကြိတ်ကာ မျက်နှာများ နီမြန်းလျက် ကျင့်ကြံနေကြသည်။
တကယ်လို့ ပြင်ပလူတစ်ယောက်သာ ထိုမြင်ကွင်းကို မြင်တွေ့လိုက်ရပါက အံ့ဩလွန်းသဖြင့် ပါးစပ်အဟောင်းသား ဖြစ်သွားပေလိမ့်မည်။
ဒီတပည့်သစ်များ ဒီလောက်အထိ ကြိုးစားအားထုတ်နေကြသည်ကို ထားလိုက်ဦး... ကျင့်ကြံခြင်း လောက၏ "လမ်းစဉ်ကို အလွယ်တကူ မမျှဝေရ... ကျင့်စဉ်ကို အတူတူ မကျင့်ရ" ဆိုသည့် သံမဏိစည်းကမ်းကို သူတို့ ချိုးဖောက်နေကြခြင်းမှာပင် အလွန် တုန်လှုပ်ဖွယ် ကောင်းလှပေသည်။
အခြားဂိုဏ်းများတွင်မူ တပည့်များသည် ဝိညာဉ်စွမ်းအင် အနည်းငယ် သို့မဟုတ် ဆေးလုံးတစ်လုံးအတွက် တစ်ယောက်ကိုတစ်ယောက် အသေအလဲ တိုက်ခိုက်ကြခြင်း ဖြစ်သည်။
မိမိ၏ ကျင့်ကြံခြင်းကို အခြားသူများထက် သာလွန်စေရန်အတွက် ဖုံးကွယ်ထားကြသည်မှာ သဘာဝပင် ဖြစ်သည်။ သို့သော်လည်း ချုံးရှင်းဂိုဏ်းတွင်မူ တပည့်အားလုံးသည် တစ်ယောက်ကိုတစ်ယောက် ကူညီပေးနေကြပြီး ကျင့်ကြံခြင်းအပေါ် အာရုံစိုက်ရန် အချင်းချင်း သတိပေးနေကြခြင်း ဖြစ်သည်။
တကယ်လို့ အခန်းဖော်တစ်ဦး၏ ကျင့်ကြံခြင်းအဆင့်က ယနေ့ ပိုမိုမြင့်မားသွားခဲ့လျှင်... မနက်ဖြန်တွင် သူသည် ဂိုဏ်း၏ ဆုလာဘ်များကို ပိုမိုရရှိကာ ပိုမိုကောင်းမွန်သော ဖွံ့ဖြိုးတိုးတက်မှုများကို ရရှိသွားနိုင်သည် မဟုတ်ပါသလော။
အချို့သော ကျင့်ကြံသူများသည် နေ့ခင်းဘက်တွင် အပျော်အပါး မက်ဟန်ဆောင်ပြီး ညဘက်တွင်မူ ရူးသွပ်စွာ ကျင့်ကြံလေ့ရှိကြသည်။ ရည်ရွယ်ချက်မှာ နေ့ခင်းဘက်တွင် အခြားသော တပည့်များကို လွှမ်းမိုးကာ သူတို့၏ ကျင့်ကြံခြင်း အရှိန်အဟုန်ကို နှေးကွေးစေရန် ဖြစ်ပေသည်။ သို့မဟုတ် မိမိကိုယ်မိမိ ပါရမီရှင်တစ်ဦးကဲ့သို့ ပြုမူလျက် အခြားသူများ၏ စိတ်ဓာတ်ကို ချိုးနှိမ်ရန် ကြိုးပမ်းကြသည်။ အခြားသူများ၏ ကျင့်ကြံခြင်းကို နှောင့်နှေးစေနိုင်မည့် မည်သည့်နည်းလမ်းကိုမဆို သုံးစွဲကြသည်သာ ဖြစ်သည်။
သို့သော် ဤချုံးရှင်းဂိုဏ်း၏ တပည့်များကမူ...