အခန်း (၉၃) ရင်သပ်ရှုမောဖွယ် လှပသော ပါမောက္ခ ကျိုးဇယ်ချင်း
နေဝင်ပြီးကာစ အချိန်တွင် သွေးနီရောင် မန်ဒါလာ သည် နာရီအနည်းငယ် စောရောက်လာလေသည်။
ဖြစ်နိုင်တာက ကုသမှုက အရမ်း ထိရောက်လွန်းလို့ လူနာကိုယ်တိုင် နက်နက်ရှိုင်းရှိုင်း ခံစားရပြီး၊ ဒီရက်ပိုင်း သူမ နေ့တိုင်း ပိုပိုစောလာတာ ဖြစ်နိုင်သည်။
နှမြောစရာပဲ......
မတတ်သာဘဲ ချင်းလန် က ကုသမှုကို ဆက်မလုပ်နိုင်တော့ကြောင်း အမှန်အတိုင်း ပြောပြလိုက်ရလေသည်။
သွေးနီရောင် မန်ဒါလာ လှည့်ထွက်သွားသော်လည်း သူမ ပြန်လှည့်ကြည့်လိုက်သည့်အခါ ချင်းလန် ကို ကြည့်သော အကြည့်တွင် သတ်ဖြတ်လိုစိတ် နည်းပါးသွားပြီး နာကြည်းစိတ် ပိုများလာလေသည်။
“ဒင်! ဇာတ်လိုက်မင်းသမီး သွေးနီရောင်မန်ဒါလာ သည် စိတ်ခံစားမှု အတက်အကျ တစ်ခုကို ကြုံတွေ့ခဲ့ရသည်။ ဂုဏ်ယူပါတယ် သင်သည် ဗီလိန်အမှတ် +1000 ရရှိသွားပါပြီ။”
“ဒင်! ရွေးချယ်ခံ ချန်ဖျင်အန်း ၏ ကံတရားတန်ဖိုး အမှတ် ၅၀၀ လျော့နည်းသွားပါသည်။ ဂုဏ်ယူပါတယ် သင်သည် ဗီလိန်အမှတ် +10,000 ရရှိသွားပါပြီ။”
“ဒင်! ရွေးချယ်ခံ၏ အခွင့်အရေးကို ကြားဖြတ်ရယူနိုင်သည့်အတွက် ဂုဏ်ယူပါသည် ဆုလာဘ်: မက်မွန်ပွင့် (အချစ်ရေး) အဆောင်လက်ဖွဲ့ +1။”
“…”
ချင်းလန် နားထဲက စနစ် အသိပေးသံကို နားထောင်ပြီး စိတ်လှုပ်ရှားမှု လှိုင်းဂယက်ကို ခံစားလိုက်ရလေသည်။
သူအားတဲ့အချိန်တုန်းက သွေးနီရောင် မန်ဒါလာ ခဏခဏ လာခဲ့ပေမယ့်၊ အခု သူ မအားတော့တဲ့အခါကျတော့ ကျောခိုင်းပြီး ထွက်သွားတာလား။
သေချာတာပေါ့၊ မိန်းမတွေ အားလုံးက သစ္စာမရှိတဲ့သူတွေချည်းပဲ။
ကံကောင်းစွာနဲ့ ဗီလိန်အမှတ် ၁၀၀၀ ရလိုက်လို့သာ မဟုတ်ရင် ငါအများကြီး ရှုံးသွားတော့မှာ။
စနစ် မျက်နှာပြင် မှာ ဝင်ငွေရင်းမြစ်တွေကို စစ်ဆေးပြီးနောက်၊ ချင်းလန် အံ့ဩတကြီး တွေ့လိုက်ရတာက ရွေးချယ်ခံ ရဲ့ ကံတရား အမှတ်တွေ လျော့နည်းသွားပြီး၊ သူက ၁၀ဆ ပြန်မရတော့ဘဲ၊ အစားထိုး အနေနဲ့ ဗီလိန်အမှတ် အဆ ၂၀ ပြန်ရရှိနေခြင်းပင်။
ချန်ဖျင်အန်း ရဲ့ ကံတရား အမှတ် ၅၀၀ လျော့သွားပေမယ့်၊ သူက ဗီလိန်အမှတ် ၁၀၀၀၀ ရလိုက်တယ်လေ။
ရဲ့ဖန် သာ လွတ်လပ်စွာ စားသောက်နေရတဲ့ သိုး တစ်ကောင် ဆိုရင်၊ ချန်ဖျင်အန်း ကတော့ အိမ်ကနေ ထွက်ပြေးသွားတာ နှစ်အနည်းငယ် ကြာနေပြီဖြစ်တဲ့ သိုးတစ်ကောင် ဖြစ်မှာ သေချာတယ်။
ဘာလို့လဲဆိုတော့ ချန်ဖျင်အန်း ဆိုတဲ့ ဒီသိုးက အပြင်လောကမှာ နှစ်အနည်းငယ်လောက် လေလွင့်နေပြီး ဘယ်တုန်းကမှ အမွေးညှပ်မခံခဲ့ရဖူးလို့၊ သူ့ဆီမှာ အရင်းအမြစ်တွေ ပေါများနေတာလေ။
လိုချင်သလောက် ညှပ်ယူလို့ ရတယ်၊ ထိပ်ပြောင်သွားမှာ စိတ်ပူစရာ မလိုပေ။
စနစ် ကျောပိုးအိတ် ထဲမှာ တောက်ပတဲ့ အနီရောင် အဆောင်လက်ဖွဲ့ တစ်ခုက ထင်ရှားပေါ်လွင်နေလေသည်။
ချင်းလန် စနစ် ကျောပိုးအိတ်ထဲကနေ မက်မွန်ပွင့် ကံကောင်းခြင်း အဆောင်လက်ဖွဲ့ ကို ထုတ်လိုက်ပြီး ရှင်းလင်းချက် အပိုင်းကို နှိပ်လိုက်လေသည်။
မက်မွန်ပွင့် ကံကောင်းခြင်း အဆောင်လက်ဖွဲ့: တစ်ကြိမ်သုံး ပစ္စည်း။ အသုံးပြုပြီးနောက် သင်သည် ကံကောင်းသော အမျိုးသမီး တစ်ဦးနှင့် ကျပန်း တွေ့ဆုံနိုင်ပြီး မျက်နှာသာပေးမှု ကို ဆက်တိုက် တိုးမြှင့်နိုင်မည်။
“ဒင်! မက်မွန်ပွင့် ကံကောင်းခြင်း အဆောင်လက်ဖွဲ့ ကို အသုံးပြုလိုပါသလား”
“သုံးမယ်”
သူ ပြောလိုက်တာနဲ့ မက်မွန်ပွင့် ကံကောင်းခြင်း အဆောင်လက်ဖွဲ့ က အနီရောင် အလင်းတန်း တစ်ခုအဖြစ် ပြောင်းလဲသွားပြီး သူ့ခန္ဓာကိုယ်ထဲသို့ အငွေ့အသက်များ အဖြစ် ပျောက်ကွယ်သွားလေသည်။
ချင်းလန် သူ့ကိုယ်သူ အပေါ်အောက် ကြည့်လိုက်ပေမယ့် ဘာထူးခြားမှုမှ မတွေ့ရပေ။
ဒါပေမဲ့ ဒါက စနစ်ရဲ့ ထုတ်ကုန် ဖြစ်တာကြောင့် ထိရောက်မှု ရှိမရှိ သူ မပူပေ။
ဘယ်ကံကောင်းတဲ့ အမျိုးသမီး ဖြစ်မလဲ ဆိုတာပဲ သူ သိချင်နေမိသည်။
ဘယ်သူ့ကို ကျပန်း ရွေးချယ်မလဲ။
အမြန်ဆုံး ထိရောက်မှု ရှိစေဖို့ ချင်းလန် ထရပ်လိုက်ပြီး ဗီလာထဲကနေ ထွက်ခွာသွားလေသည်။
ဒီည ကျွင်းဇီ က အနီးအနားမှာ တာဝန်ကျနေလေသည်။ သခင်လေး ထွက်သွားတာ မြင်တော့ သူ လျှောက်လာပြီး စိတ်ဝင်တစား မေးလိုက်လေသည်။
“သခင်လေး ဘယ်သွားမလို့လဲ ကျွန်တော် ကားသွားယူပေးပါ့မယ်။”
ချင်းလန် လက်ဝှေ့ယမ်းပြလိုက်လေသည်။
“မလိုဘူး၊ ငါ လမ်းလျှောက် ထွက်မလို့။ မင်း တကယ် လုပ်စရာ မရှိရင် ငါ့အတွက် လျှပ်စစ် နှိပ်စက် နှစ်ခုလောက် သွားဝယ်ပေးပါ၊ အကြီးစားမျိုး၊ ဓာတ်ခဲ ခြောက်လုံး သုံးရတဲ့ ဟာမျိုး၊ မဟုတ်ဘူး၊ ဓာတ်ခဲ ရှစ်လုံး သုံးရတဲ့ ဟာမျိုး”
ကျွင်းဇီ ဘာမှ ဆက်မမေးတော့ဘဲ
“ဟုတ်”
လို့ ဖြေလိုက်ပြီး ပစ္စည်းသွားဝယ်ဖို့ လိမ္မာစွာ ထွက်ခွာသွားလေသည်။
ချင်းလန် ကတော့ ဗီလာ ဧရိယာကနေ ထွက်ခွာပြီး လမ်းမတွေပေါ်မှာ ရည်ရွယ်ချက် မရှိလျှောက်သွားနေလေသည်။
သူ သိပ်အဝေးကြီး မရောက်သေးခင်မှာပဲ အနီးနားက လမ်းကြားတစ်ခုထဲကနေ အမျိုးသမီး တစ်ယောက်ရဲ့ အကူအညီ တောင်းသံကို ကြားလိုက်ရလေသည်။
“ကယ်ကြပါဦး ကယ်ကြပါဦး”
သေစမ်း.......
ဒါပဲလား.....
ဒီလောက် ဦးနှောက်မရှိတဲ့ ဇာတ်ကွက်မျိုး တကယ် ဖြစ်နိုင်လို့လား။
ချင်းလန် အဲ့ဒီနေရာမှာ ကြောင်ပြီး ရပ်နေမိကာ မှောင်မိုက်နေတဲ့ လမ်းကြားကို စိုက်ကြည့်နေကာ သူ စိတ်ထဲကနေ သက်ပြင်းချလိုက်လေသည်။
မျှော်လင့်ထားတဲ့အတိုင်း စနစ်ရဲ့ ထုတ်ကုန်ပဲ ဇာတ်လိုက်တွေမှ ကြုံတွေ့ရနိုင်တဲ့ ဒီလို တုံးအတဲ့ ဇာတ်ကွက်မျိုးကို သူ တကယ် ကြုံတွေ့လိုက်ရလေပြီ။
သူ လမ်းကြားထဲသို့ ခြေလှမ်းကျဲကြီးတွေနဲ့ လျှောက်သွားလိုက်ရာ တောက်ပတဲ့ အရောင်အသွေးစုံ ကြက်မွေးတွေ တပ်ထားတဲ့ လူမိုက်တစ်စုက ကောင်မလေး တစ်ယောက်........
အဲ မဟုတ်ဘူးအမျိုးသမီး တစ်ယောက်ကို လမ်းကြားထဲမှာ ပိတ်ဆို့ထားတာ တွေ့လိုက်ရလေသည်။
အဖြူရောင်တီရှပ် ဒူးဖုံးတဲ့အနက်ရောင်စကတ်ကျပ်ကျပ် နဲ့ အနက်ရောင် အသားကပ်ခြေအိတ်ရှည် နဲ့ ဒေါက်ဖိနပ် ကိုဝတ်ဆင်ထားလေသည်။
ထို့အပြင် အမျိုးသမီးက ကြက်သွေးရောင် မျက်မှန် တစ်လက်ကိုလည်း တပ်ထားပြီး၊ ဒါက သူမရဲ့ နဂိုကတည်းက နူးညံ့သိမ်မွေ့တဲ့ မျက်နှာကို ပိုပြီး ပေါ်လွင်စေကာ ဉာဏ်ပညာ ကြွယ်ဝတဲ့ အသွင်အပြင်ကို ပေးစွမ်းနေလေသည်။
ကျိုးဇယ်ချင်း......
ဒီအမျိုးသမီးက မူရင်း ဝတ္ထုထဲက ရင်သပ်ရှုမောဖွယ် လှပတဲ့ ပါမောက္ခ ကျိုးဇယ်ချင်း သေချာပေါက် ဖြစ်ရမယ်။
သံသယဖြစ်စရာ မလိုပေ အဲ့ဒီ ကြက်သွေးရောင် မျက်မှန်ရယ်၊ ဒီ ဆရာမဝတ်စုံရယ် ကျိုးဇယ်ချင်း ရဲ့ ရင်သပ်ရှုမောဖွယ် ပါမောက္ခ စတိုင်ကလွဲရင် ဘယ်သူက ဒီလို ဝတ်ဆင်နိုင်မှာလဲ။
ဘုန်း......
ချင်းလန် ရှေ့တိုးသွားပြီး လူမိုက်တစ်ယောက်ကို အားကုန် ကန်လိုက်ရာ မျက်နှာနဲ့ မြေကြီး မိတ်ဆက်သွားလေသည်။
သူ့ကြံရာပါတွေ ပြန်မတုံ့ပြန်နိုင်ခင်မှာပဲ တစ်ယောက်ချင်းစီ အကန်ခံလိုက်ရပြီး အကုန်ကြမ်းပြင်ပေါ် လဲကျသွားကြလေသည်။
သူ အားအများကြီး မသုံးခဲ့ပေ မဟုတ်ရင် ဒီလူမိုက်တွေ သေချာပေါက် သေကုန်ကြမှာ။
သူက သူတို့ရဲ့ တိုက်ခိုက်နိုင်စွမ်းကို ဖျက်ဆီးလိုက်ရုံ သက်သက်ပင် ပြီးတော့ ရှေ့တိုးသွားပြီး နွေးထွေးတဲ့ အပြုံးနဲ့ ကြင်နာစွာ မေးလိုက်လေသည်။
“ခင်ဗျား အဆင်ပြေရဲ့လား ဒီလူတွေ ခင်ဗျားကို ထိခိုက်အောင် လုပ်လိုက်သေးလား”
“ကျေးဇူးတင်ပါတယ်၊ ကျွန်မ အဆင်ပြေပါတယ်။”
ကျိုးဇယ်ချင်း က ကြက်သွေးရောင် မျက်မှန်ကို ပင့်တင်လိုက်ပြီး တိုးတိုးလေး ပြောလိုက်ရာ သူမရင်ထဲမှာ အနည်းငယ် တုန်ခါသွားလေသည်။
သူမ ဖြည်းညှင်းစွာ ပြောလိုက်လေသည်။
“ခဏလောက် ဒီမှာ စောင့်ပေးပါ။ ဒီလူတွေ ကျွန်မနောက် လိုက်နေမှန်း သတိထားမိကတည်းက ကျွန်မ ရဲကို ဖုန်းဆက်ထားပြီးပြီ။ သူတို့ကို ကျွန်မ တည်နေရာ ပြောပြဖို့ သူငယ်ချင်း တစ်ယောက်နဲ့ ဖုန်းပြောနေသလို ဟန်ဆောင်ခဲ့တာ။”
“ကျွန်မ မူလက အာရုံစိုက်မှု ရအောင်လို့ ကယ်ကြပါ လို့ အော်ပြီး ဒီလူမိုက်တွေ ဖရိုဖရဲ မဖြစ်အောင် တားဖို့ ရည်ရွယ်ခဲ့တာ၊ ဒါပေမဲ့ ရှင် ရောက်လာပြီး သူတို့ကို ရိုက်နှက်လိမ့်မယ်လို့ ကျွန်မ မမျှော်လင့်ထားခဲ့ဘူး။”
ဉာဏ်ကောင်းတယ်၊ ရင့်ကျက်တယ်၊ ပညာတတ်ဆန်တယ်၊ နူးညံ့သိမ်မွေ့တယ်၊ ဆွဲဆောင်မှု ရှိတဲ့ ကိုယ်လုံးကိုယ်ပေါက် ရှိတယ်၊ ပြီးတော့ ရင်သပ်ရှုမောဖွယ် လှပတဲ့ ပါမောက္ခ ဆိုတဲ့ အားသာချက်ပါ ရှိသေးတယ်...
မူရင်း ဝတ္ထုထဲမှာ ကျိုးဇယ်ချင်း က ပြီးပြည့်စုံလုနီးပါး နတ်ဘုရားမ တစ်ပါးပင်။
သူတို့ ပထမဆုံး တွေ့ဆုံချိန်မှာ ချင်းလန် က အလုပ်အကျွေးပြုတဲ့ လက်ပါးစေ တစ်ယောက်သာ ဖြစ်ခဲ့သည်။
ချင်းလန် သာ မရှိရင် ကျိုးဇယ်ချင်း အနေနဲ့ ဘာပြဿနာမှ ကြုံတွေ့ရမှာ မဟုတ်လောက်ပေ။
သို့သော် ဘာပဲဖြစ်ဖြစ် ဒီပထမဆုံး တွေ့ဆုံမှုက မကောင်းတဲ့ အထင်အမြင်ကို ချန်မထားခဲ့ပေ ကောင်းတဲ့အမြင် ဖြစ်တယ်လို့ ပြောလို့ ရလေသည်။
ထို့ပြင် မက်မွန်ပွင့် အဆောင်လက်ဖွဲ့ က တစ်ကြိမ်တည်းသော တွေ့ဆုံမှု အတွက်ပဲ မဟုတ်ပေ။ နောက်ပိုင်းမှာ တခြား အခွင့်အရေးတွေ အများကြီး ရှိလာဦးမှာဖြစ်လေသည်။
“ခင်ဗျား ဘာမှ မဖြစ်တာ ကောင်းပါတယ်။ ကျွန်တော် ခင်ဗျားနဲ့အတူ ခဏလောက် စောင့်ပေးပါ့မယ်။”
ချင်းလန် ပြုံးလိုက်ပြီး ဘေးမှာ ရပ်နေကာ ရံဖန်ရံခါ ကျိုးဇယ်ချင်း ရဲ့ လှပတဲ့ မျက်နှာကို မျက်လုံးထောင့်ကနေ ခိုးကြည့်နေလေသည်။
ဒီရက်ပိုင်း သူက ရင်သပ်ရှုမောဖွယ် လှပတဲ့ ပါမောက္ခ ကျိုးဇယ်ချင်း ကို ဘယ်လို အနိုင်ယူရမလဲ ဆိုတာ ခေါင်းခြောက်အောင် စဉ်းစားနေခဲ့တာ။
ကံကောင်းခြင်း အဆောင်လက်ဖွဲ့က သူမအပေါ် သက်ရောက်မှု ရှိလိမ့်မယ်လို့ လုံးဝ မမျှော်လင့်ထားခဲ့မိဘူး။ ထီပေါက်သလိုပဲ။
တီ တီ~ တီ တီ~
ခဏကြာတော့ ရဲကားတွေ ရောက်လာလေသည်။
ရဲအရာရှိ အနည်းငယ်နှင့် အပြာရင့်ရောင် ယူနီဖောင်း ဝတ်ဆင်ထားသော ရဲမေ တစ်ဦး အပေါ်မှ ဆင်းလာကြလေသည်။
“ဒီလူတွေကို ခေါ်သွားလိုက်ကြ။ ရှင်တို့နှစ်ယောက် အဆင်ပြေရင် ထွက်ဆိုချက် ပေးဖို့ ကျွန်မနဲ့အတူ လိုက်ခဲ့ပေးပါ။”
ကျိုးဇယ်ချင်း ခေါင်းလှည့်လိုက်ပြီး ပွင့်လန်းနေတဲ့ ကြာပန်းလေးလို နူးညံ့စွာ ပြုံးလိုက်ကာ ချင်းလန် ကို တိုးတိုးလေး ပြောလိုက်လေသည်။
“ရှင် အားရဲ့လား မအားရင် ကျွန်မ ရှင့်အစား ရှင်းပြပေးပြီး အရင် ပြန်ခိုင်းလိုက်လို့ ရပါတယ်။ ဒီနေ့ကိစ္စက ရှင့်ကို ဒုက္ခပေးပြီးသား ဖြစ်နေပြီ၊ အခု ထပ်ပြီး ဒုက္ခပေးရမှာ ကျွန်မ တကယ် အားနာတယ်။”
“ဘာမှ ကြီးကြီးမားမား မဟုတ်ပါဘူး၊ ပြီးတော့ ကျွန်တော်လည်း အားနေတာမို့ ခင်ဗျားနဲ့အတူ လိုက်ခဲ့ပေးပါ့မယ်။”
ချင်းလန် နွေးထွေးတဲ့ အပြုံးနဲ့ ပြောလိုက်လေသည်။
သူ နည်းနည်း စိတ်ဝင်စားသွားလေသည်။
ဒီ မက်မွန်ပွင့် ကံကောင်းခြင်း အဆောင်လက်ဖွဲ့ ရဲ့ ရှင်းလင်းချက်က မှားနေတာလား။
ကံကောင်းတဲ့ အမျိုးသမီး တစ်ယောက်နဲ့ ကျပန်း တွေ့ဆုံခြင်းပဲ မဟုတ်ဘူးလား။
ဒါပေမဲ့ ဘာလို့ ရဲမေ ချန်ဇီချီ ပါ ဒီနေရာ ရောက်နေရတာလဲ။
သူ့ရှေ့က ရဲကားပေါ်က ဆင်းလာတဲ့ အပြာရင့်ရောင် ယူနီဖောင်းနဲ့ ရဲမေ၊ အဲ့ဒီ ရဲရင့်ပြီး လုပ်ရည်ကိုင်ရည် ရှိတဲ့ ရဲမေက ချန်ဇီချီ မှတပါး တခြားသူ မဖြစ်နိုင်ပေ။
ကျွင်းဇီ ကို ကံကြမ္မာ အမျိုးသမီးတွေရဲ့ ဓာတ်ပုံတွေ စုဆောင်းခိုင်းစရာ မလိုဘဲ၊ အဲ့ဒီ ရဲမေက ချန်ဇီချီ ဖြစ်ကြောင်း သူ သေချာနေလေသည်။
တစ်ညတည်းမှာ ကံကောင်းတဲ့ အမျိုးသမီး နှစ်ယောက်နဲ့ ကြုံတွေ့လိုက်ရတယ်။ မက်မွန်ပွင့် အဆောင်လက်ဖွဲ့ အာနိသင်က လုပ်ဆောင်တဲ့အချိန်မှာ အမှားအယွင်းဖြစ်သွားတာလား။