အခန်း (၈၆)အဆင့်မြင့် ဆေးပညာ ကျွမ်းကျင်မှု
ဟူး.....
ကျောက်တုံးပေါ်မှာ ထိုင်နေပြီး ခါးနာနေတဲ့ ချင်းလန် က မီးခိုးငွေ့တစ်ရှိုက် မှုတ်ထုတ်လိုက်ကာ တော်တော် ကျေနပ်သွားသလို ခံစားလိုက်ရလေသည်။
ဆိုရိုးစကားအတိုင်းပင် ကိစ္စပြီးလို့ စီးကရက်သောက်ရတာက အကောင်းဆုံးပဲ။
ထို့ပြင် ကံကြမ္မာအမျိုးသမီး ရဲ့ ကံကောင်းခြင်းတွေက ကံကြမ္မာအမျိုးသား သေဆုံးသွားတာနဲ့ ပျောက်ကွယ်သွားတာ မဟုတ်ဘူး ဆိုတာကို စမ်းသပ်ချက်တွေက သက်သေပြလိုက်လေပြီ။
ဒါ့ထက် ပျော်စရာ ကောင်းတာ ဘာရှိဦးမှာလဲ။
“ဒီစီးကရက်နဲ့ မီးခြစ် ဘယ်ကရတာလဲ”
ချူကျူအာ အားအင် မရှိတော့ပေမယ့် သူမရဲ့ သွယ်လျတဲ့ လက်ကို ဆန့်ထုတ်ပြီး ချင်းလန် ကိုင်ထားတဲ့ စီးကရက်ကို လုယူကာ မြေကြီးပေါ် ပစ်ချလိုက်ပြီး
သူမ စိတ်ဆိုးသလို ပြောလိုက်လေသည်။
“ရှင် ဘာလို့ စီးကရက်တွေ အများကြီး သောက်နေရတာလဲ အနံ့က ဆိုးလိုက်တာ။ ကျွန်မရှေ့မှာ နောက်တစ်ခါ ထပ်သောက်ရင် ကျွန်မကို ထိဖို့ စိတ်မကူးနဲ့။”
သူမက လက်ဖြင့် ပါးစပ်နဲ့နှာခေါင်းကို အုပ်ထားပြီး တော်တော် ရွံရှာနေပုံ ပေါက်လေသည်။
ဒါပေမဲ့ ချင်းလန် က ဘယ်သူလဲ။
ချူကျူအာ က သူ့ကျန်းမာရေးကို စိတ်ပူပြီး ဆေးလိပ် မသောက်စေချင်တာ သက်သက်သာ ဖြစ်လေသည်။ တကယ်တမ်းကျတော့ သူမက ဆေးလိပ်နံ့ကို မမုန်းပေ။
နဂါးနက် အသင်း ရဲ့ နှင်းဆီခန်းမ ခေါင်းဆောင် အနေနဲ့ သူမကိုယ်တိုင် ဆေးလိပ်မသောက်ပေမယ့် နဂါးနက် အသင်း ရဲ့ အစည်းအဝေး တိုင်းမှာ ဆေးလိပ်ငွေ့တွေနဲ့ ပြည့်နှက်နေလေ့ ရှိသည်။
ချူကျူအာ သာ ဒီကိစ္စကို တကယ် ဂရုစိုက်ရင် ဘာလို့ အရင်က မပြောခဲ့တာလဲ။
ချင်းလန် သူမကို ဖွင့်မပြောခဲ့ပေ။ အစားထိုး အနေနဲ့ အိတ်ကပ်ထဲကနေ တကယ်တမ်းကျတော့ စနစ် ကျောပိုးအိတ်ထဲကနေစီးကရက် တစ်လိပ် ထုတ်လိုက်ပြီး မီးညှိလိုက်ကာ ချူကျူအာ စကားမပြောနိုင်ခင် မေးလိုက်လေသည်။
“မင်း ဟင်းချက်တတ်လား”
ချူကျူအာ မျက်လုံး လှန်ကြည့်လိုက်လေသည်။
“ရှင် ကျွန်မကို ဘယ်သူလို့ ထင်နေတာလဲ “
“ကျွန်မတို့ နှင်းဆီ ခန်းမ က လူတွေက လူတွေကို ဓားနဲ့ ထိုးတတ်တာပဲ သိတယ်၊ အိုးတွေ ခွက်တွေ ဆိုတာတွေကို မကိုင်ဘူး။”
ချင်းလန် သက်ပြင်းချလိုက်လေသည်။
“အာ... နှမြောစရာပဲ။ ကျူအာ က မိန်းမဆန်တဲ့ ဆွဲဆောင်မှု ရှိတော့ အိမ်မှုကိစ္စ နိုင်နင်းမယ့်သူလို့ ကိုယ် ထင်ထားတာ။ တကယ်တော့ ကိုယ် အထင်လွဲနေတာပဲ...”
ချူကျူအာ စိတ်တိုသလို ပြောလိုက်လေသည်။
“အိပ်မက် မက်နေလိုက်။ ကျွန်မက ဘာကိစ္စ အိမ်မှုကိစ္စ နိုင်နင်းဖို့ လိုမှာလဲ ကျွန်မ နှင်းဆီ ခန်းမ ကို နိုင်နင်းရင် ပြီးတာပဲ။”
ချင်းလန် နဲ့ စကားဆက်ပြောပြီး အချိန်မဖြုန်းချင်တော့တာကြောင့် သူမ လှည့်ထွက်သွားပြီး အနက်ရောင် သားရေ အင်္ကျီကို ဝတ်ဆင်လိုက်ကာ စိတ်ကောက်နေပုံ ပေါက်နေလေသည်။
ချင်းလန် ကတော့....
သူက တိတ်တဆိတ် စနစ် မျက်နှာပြင်ကို ဖွင့်လိုက်ပြီး ကံကြမ္မာ ဗီလိန် အမှတ် ၂၀၀၀၀၀ သုံးကာ
“ကောင်းကင်နဂါးကိုးသွယ် ကျင့်စဉ်” ကို ပထမအဆင့်မှ ဒုတိယအဆင့်သို့ မြှင့်တင်လိုက်ရာ စွမ်းအားက ၁.၅ ဆမှ ၂.၂၅ ဆသို့ တိုးတက်သွားလေသည်။
ဆိုလိုတာက ခန္ဓာအမှတ် ၂၅၀ ကို သူက ဒုတိယအဆင့် “ကောင်းကင်နဂါးကိုးသွယ် ကျင့်စဉ်” ကို အသုံးပြုလိုက်ရင် ခန္ဓာအမှတ် ၅၆၂.၅ စွမ်းအားကို ပေါက်ကွဲထွက်စေနိုင်မည် ဖြစ်သည်။
အဲ့ဒါ ဘာအဓိပ္ပာယ်လဲ။
မူလက ညီတူညီမျှ ဖြစ်နေသူ တစ်ယောက်ကို၊ ချင်းလန် က ရုတ်တရတ် “ကောင်းကင်နဂါးကိုးသွယ် ကျင့်စဉ်” ကို ထုတ်သုံးလိုက်တာနဲ့ လက်သီးတစ်ချက်တည်းနဲ့ လွယ်လွယ်ကူကူ သတ်ပစ်နိုင်တယ် ဆိုတဲ့ သဘောပင်။
အသေအချာဆုံး အရာက မမျှော်လင့်ဘဲရုတ်တရတ် တိုက်ခိုက်ခြင်းပင်။
“ကံစမ်းမဲ”
သူ စိတ်ထဲကနေ အမိန့်ပေးလိုက်ရာ ဖျော့တော့သော ရွှေရောင် ဘီးတစ်ဘီး ချင်းလန် ရှေ့မှာ ပေါ်လာပြီး စတင် လည်ပတ်လေသည်။
သူ့စိတ်ထဲမှာ အတည်ပြုချင်နေတဲ့ ကိစ္စတချို့ ရှိနေပြီး သူ့ရဲ့ ပထမဆုံး အတွေးက စနစ် အဆင့်မြှင့်တင်မှုရဲ့ အကျိုးသက်ရောက်မှုတွေကို ကြည့်ချင်တာ ဖြစ်လေသည်။
အထူးသဖြင့် ဒီကံစမ်းမဲက တစ်ကြိမ်နှိုက်ရင် အမှတ် ၁၀၀ ကနေ ၁၀၀၀ အထိ တိုးသွားတာ၊ ၁၀ ဆ တိုးသွားတာ ဆိုတော့ ဆုလာဘ်တွေကလည်း ၁၀ ဆ တိုးလာသင့်တယ် မဟုတ်လား။
“ဒင်! ဂုဏ်ယူပါတယ် သင်သည် နှလုံးသားချင်းဆက်ပစ္စည်း +3 ရရှိခဲ့ပါပြီ။”
“ဒင်! ဂုဏ်ယူပါတယ် မမဟွီ ရဲ့ အစားထိုး အရုပ် +1 ရရှိခဲ့ပါပြီ။”
“ဒင်! ဂုဏ်ယူပါတယ် ခြင်ဆီသန့်စင်ဆေးလုံး တစ်လုံး ရရှိခဲ့ပါပြီ။”
“အာ....”
ထွက်လာတဲ့ ပစ္စည်းတွေကို မြင်လိုက်ရတော့ ချင်းလန်ရဲ့ မျက်နှာ မည်းမှောင်သွားလေသည်။
သေစမ်း......
ဒီကံစမ်းမဲက လုံးဝ ထောင်ချောက်ပဲ......
သူ ဒါကို ကိုယ်တိုင် ဝယ်လို့ မရဘူးလား ဝယ်မယ် ဆိုရင်တောင် အများကြီး ဝယ်လိုက်မယ်။
စနစ်က ဒီပစ္စည်းလောက်ပဲ ပေးပြီးတော့ အားလုံးက အဲ့ဒီကိစ္စနဲ့ပဲ ပတ်သက်နေတယ်လား။
ခြင်ဆီသန့်စင်ဆေးလုံးတစ်လုံး ပါလာလို့သာ၊ အဲ့ဒါက သုံးစွဲသူရဲ့ ရုပ်ပိုင်းဆိုင်ရာ အခြေအနေကို တိုးတက်စေနိုင်လို့ တော်သေးသည်၊ မဟုတ်ရင် သူ ဒီအရာကို ဆဲပစ်မိတော့ပေမည်။
ဒါက လိမ်လည်မှုပဲ.......
အားလုံးက အလိမ်အညာတွေချည်းပဲ.....
အံကြိတ်ပြီး ချင်းလန် စနစ် စတိုးဆိုင်ကို တစ်ချက် ကြည့်လိုက်ရာ ခြင်ဆီသန့်စင်ဆေးလုံး မရှိသေးတာ တွေ့လိုက်ရလေသည်။ သူ မတတ်သာဘဲ ကံစမ်းမဲမှာ သူ့ကံကို လောင်းကြေးထပ်ရုံသာ ရှိတော့သည်။
တစ်ခါတလေတော့ မမျှော်လင့်ထားတဲ့ အရာတွေရတတ်လေသည်။
အဆင့်မြင့် ကျွမ်းကျင်မှု တစ်ခု၊ နှစ်ခုလောက် မဲပေါက်သွားတာနဲ့ ဘာပဲဖြစ်ဖြစ် အရင်းကျေပြီ။
တကယ်လို့ အကြီးအကျယ် ရှုံးသွားရင်တောင်၊ ငါ့အနေနဲ့ ချူကျူအာ နဲ့ ပိုင်ရူယွီ ဆိုတဲ့ သွေးမတော် သားမစပ် ညီအစ်မ နှစ်ယောက်ကို ဒုက္ခပေးလို့ ရတာပဲ။
ဒါမှမဟုတ် စုရှောင်းရှောင်း ကို နည်းလမ်းလေးတွေ သင်ပေးလို့ ရတာပဲ။
အနည်းဆုံးတော့ ရင်းနှီးမြှုပ်နှံမှု တချို့ ပြန်ရနိုင်သေးတာပေါ့။
“…”
“ဒင်! ဂုဏ်ယူပါတယ် ခြင်ဆီသန့်စင်ဆေးလုံး တစ်လုံး ရရှိခဲ့ပါပြီ။”
“ဒင်! ဂုဏ်ယူပါတယ် သင့်ရဲ့ ခန္ဓာကိုယ် ကြံ့ခိုင်မှု +၁ တိုးလာပါပြီ။”
“…”
“ဒင်! ဂုဏ်ယူပါတယ် အဆင့်မြင့် ဆေးပညာ ကျွမ်းကျင်မှု ကို ရရှိခဲ့ပါပြီ။”
“ဒင်! ဂုဏ်ယူပါတယ် အသစ်စက်စက် လျှပ်စစ် ဆေးဘက်ဆိုင်ရာ ကိရိယာ +1 ရရှိခဲ့ပါပြီ။”
ကံကြမ္မာ ဗီလိန် အမှတ် ၅၀၀၀၀၀ သုံးပြီးနောက် ချင်းလန် စနစ် မျက်နှာပြင်ကို တစ်ချက် ကြည့်လိုက်ပြီး မလိုလားစွာနဲ့ ကံစမ်းမဲ မျက်နှာပြင်ကို ပိတ်လိုက်လေသည်။
ကံကောင်းစွာနဲ့ အဆင့်မြင့် ဆေးပညာ နည်းစနစ် တစ်ခု ရခဲ့လို့သာ၊ မဟုတ်ရင် ခြင်ဆီသန့်စင်ဆေးလုံး ရရင်တောင်မှ အဲ့ဒီ ကံကြမ္မာ ဗီလိန် အမှတ် ၅၀၀၀၀၀ ကုန်သွားတာက နာကျင်စရာ ကောင်းနေဦးမှာပဲ။
စနစ် မျက်နှာပြင်:
ဇာတ်ကောင်: ချင်းလန်
အသက်: ၂၅
ခန္ဓာ: ၃၂၀
ဆွဲဆောင်မှု : ၉၉
ဗီလိန် အမှတ်: ၃၁၆,၇၀၀
ကျင့်ကြံမှု နည်းစနစ်: ကောင်းကင်နဂါးကိုးသွယ် ကျင့်စဉ် (ဒုတိယအဆင့်တွင် ၂.၂၅ ဆ တိုးလာသည် တတိယ အဆင့်သို့ မြှင့်တင်ရန် ကံကြမ္မာ ဗီလိန် အမှတ် ၅၀၀၀၀၀ လိုအပ်သည်။)
ကျွမ်းကျင်မှုများ : ရင်းနှီးမှု LV8 (အုပ်စု ရင်းနှီးမှု +80), အဆင့်မြင့် စန္ဒရား ကျွမ်းကျင်မှု, အဆင့်မြင့် လက်ဖက်ရည် အခမ်းအနား ကျွမ်းကျင်မှု, အဆင့်မြင့် လက်ရေးလှ ကျွမ်းကျင်မှု, ရုပ်ဖျက်ခြင်း, အဆင့်မြင့် သေနတ်ပစ်ခတ်မှု ကျွမ်းကျင်မှု, အလယ်အလတ်အဆင့် အန္တရာယ် အာရုံခံနိုင်စွမ်း, အဆင့်မြင့် ဆေးပညာ ကျွမ်းကျင်မှု။
စတိုးဆိုင်: ဖွင့်ထားသည်
ကံစမ်းမဲ စင်တာ : ဖွင့်ထားသည် (မဲတစ်ကြိမ်နှိုက်လျှင် ကံကြမ္မာ ဗီလိန် အမှတ် ၁၀၀၀ ကုန်ကျမည်)
စနစ် ကျောပိုးအိတ် : ခြင်ဆီသန့်စင်ဆေးလုံး +18,
မစ္စချူ၏ ဓာတ်ပုံ အယ်လ်ဘမ်, ချင်းဖန် တစ်ရှူး +1 (တစ်ရှူး ၁၂၀ သုံးပြီး), မစ္စ ပိုင်၏ ဓာတ်ပုံ အယ်လ်ဘမ်, မမဟွီ၏အစားထိုးအရုပ် +1, , အသစ်စက်စက် လျှပ်စစ် ဆေးဘက်ဆိုင်ရာ ကိရိယာ
ချင်းလန် တစ်ချက် ကြည့်လိုက်ပြီး၊ နောက်ထပ် ရွေးချယ်ခံ ရဲ့ ဇာတ်လမ်းကို ကြိုတင် သိရှိဖို့ ၂၀၀၀၀၀ သုံးခဲ့တယ်။
ကောင်းကင်နဂါးကိုးသွယ် ကျင့်စဉ် ကို ဒုတိယ အဆင့် မြှင့်တင်ဖို့ နောက်ထပ် ၂၀၀၀၀၀ သုံးခဲ့တယ်။
ပြီးတော့ ကံစမ်းမဲ နှိုက်ဖို့ ကံကြမ္မာ ဗီလိန် အမှတ် ၅၀၀၀၀၀ ထပ်သုံးပြီး အဆင့်မြင့် ဆေးပညာ ကျွမ်းကျင်မှုနဲ့ တခြား ပစ္စည်းတွေ ရရှိခဲ့တယ်။
ကံကြမ္မာ ဗီလိန် အမှတ် ၃၁၀၀၀၀ ကျော် ကျန်သေးတယ်။ တန်ပါတယ်၊ ဒါက သေချာပေါက် အမြတ်ပဲ။
သူ့ရဲ့ ခွန်အားအမှတ် ၃၂၀ ကို ခံစားပြီးနောက်၊ ရဲ့ဖန် သာ အဆင့်တက်ပြီး မသေခဲ့ရင်တောင် သူ့ကို အနိုင်ယူနိုင်မယ့် အခွင့်အလမ်းက လုံးဝမရှိတော့ပေ။
တကယ်လို့ ကောင်းကင်နဂါးကိုးသွယ် ကျင့်စဉ် ကို သုံးမယ် ဆိုရင်တော့ နိုင်ခြေက ပြောစရာပင်မလိုတော့ပေ။
“ငါ ပြန်တော့မယ်။”
ချူကျူအာ တစ်ခုခု ရေရွတ်လိုက်ပြီးနောက် အနီးနားမှာ ရှာဖွေနေတဲ့ နှင်းဆီ ခန်းမ ဒုတိယ ခေါင်းဆောင်ကို တွေ့လိုက်ရလေသည်။
သူမ အနည်းငယ် ယိုင်နဲ့သွားသော်လည်း ဇွဲမလျှော့ဘဲ ထရပ်ကာ သစ်တောထူထပ်တဲ့ နေရာဆီ တစ်လှမ်းချင်း လျှောက်သွားလေသည်။
“ကူညီပေးမယ် ...”
ချင်းလန် သူမကို တွဲထူပေးဖို့ ထလိုက်ပေမယ့် ချူကျူအာ ငြင်းဆန်လိုက်ပြီး စိတ်ကောက်နေပုံ ပေါက်လေသည်။
ဒုတိယ ခန်းမ ခေါင်းဆောင်နဲ့ တွေ့ဆုံပြီး ဝေးကွာသွားတဲ့ အခါမှ ချူကျူအာ နောက်ဆုံးမှာ စကားပြောလာလေသည်။
“နှင်းဆီ ခန်းမ က စားဖိုမှူးတွေ ဒီရက်ပိုင်း စွမ်းဆောင်ရည် သိပ်မကောင်းဘူး။ ဒီည သူတို့ကို ငါ့ဆီ ခေါ်လိုက်၊ သူတို့ရဲ့ ဟင်းချက်စွမ်းရည်ကို ငါကိုယ်တိုင် ကြည့်ချင်တယ်။ သူတို့ ငါ့စံနှုန်းနဲ့ မကိုက်ရင် အလုပ်ထုတ်ပစ်မယ်။”