အခန်း (၅၃) လူငယ်လေး ဒီရေပြင်က နက်တယ်ကွ
ဧည့်ခန်းထဲမှာ တင်းမာမှုတွေ မြင့်တက်လာပြီး ပေါက်ကွဲလုနီးပါး ဖြစ်နေချိန်မှာပဲ အပြင်ဘက်မှာ ရန်ဖြစ်သံတွေ ထွက်ပေါ်လာတာကြောင့် အမျိုးသမီးနှစ်ယောက်စလုံးရဲ့ အာရုံကို ဆွဲဆောင်သွားလေသည်။
“ရှောင်းရှောင်း ထင်တယ် အပြင်ထွက်ကြည့်လိုက်ဦးမယ်”
ပိုင်ရူယွီ က ပြောလိုက်ပြီး တံခါးဆီ လျှောက်သွားလိုက်လေသည်။
သူမက ဒီနေ့မှ စုရှောင်းရှောင်း နဲ့ တွေ့ဖူးတာဖြစ်ပြီး ချင်းလန် ရဲ့ အိမ်ဖော်ဆိုတာ သိထားရုံသာ ရှိသေးသည်။ အသံကို နားထောင်ရတာ သူမ ဒုက္ခတစ်ခုခု ကြုံနေရသလိုပင်။
မူယွီယန် ဒေါသထွက်နေတုန်း ဖြစ်ပေမယ့် သည်းခံပြီး လိုက်သွားရုံသာ တတ်နိုင်တော့သည်။
ဗီလာနဲ့ မလှမ်းမကမ်းမှာတော့ သစ်သီးတွေ၊ ဟင်းသီးဟင်းရွက်တွေ သယ်လာတဲ့ စုရှောင်းရှောင်း က သူမရှေ့က ရဲ့ဖန် ကို ဒေါသတကြီး စိုက်ကြည့်ပြီး အော်ဟစ်ဆူပူလိုက်လေသည်။
“ရဲ့ဖန်၊ ငါ့ကို မနှောင့်ယှက်နဲ့လို့ နင့်ကို အခါခါ ပြောထားတယ်လေ၊ နင်က နားမထောင်တဲ့အပြင် ငါ့နောက်ကို လိုက်လာသေးတယ်ပေါ့။”
ဒီနှစ်တွေအတွင်းမှာ နင် ဘာတွေ ဖြတ်သန်းခဲ့ရလို့လဲ နင် ဘယ်လိုလုပ် ဒီလို ဖြစ်လာရတာလဲ။
သူမရှေ့က ရဲ့ဖန် က သူစိမ်းတစ်ယောက်လို ဖြစ်နေပြီး သူမလည်း နည်းနည်း ကြောင်တောင်တောင် ဖြစ်သွားလေသည်။
တကယ်ပဲ၊ လူတွေက ပြောင်းလဲတတ်ကြတာပဲ။
နှစ်ပေါင်းများစွာ ကြာသွားပြီဆိုတော့ ရှောင်ဖန် က တခြားလူတစ်ယောက် ဖြစ်သွားခဲ့ပြီ။
“ရှောင်းရှောင်း၊ ငါ တကယ် မရည်ရွယ်ပါဘူး။”
ရဲ့ဖန် က သူ ပြည်ပမှာ ရှိနေစဉ် အလွမ်းကြီး လွမ်းခဲ့ရတဲ့ စုရှောင်းရှောင်း ကို ကြည့်ပြီး စိတ်မကောင်း ဖြစ်နေမိလေသည်။
သူတို့ ငယ်ငယ်တုန်းက သူ့ကို ကာကွယ်ဖို့ ကြိုးစားရင်း ရှောင်းရှောင်း က မိဘမဲ့ဂေဟာက ကလေးဆိုးတွေ ဝိုင်းရိုက်တာ ခံခဲ့ရတာကို သူ မှတ်မိနေသေးသည်။
အခု သူ စွမ်းဆောင်နိုင်ပြီဆိုတော့ သူမကို ပြန်လာ ကာကွယ်ချင်တာ သဘာဝပါပဲ။
ဒါပေမဲ့ လက်တွေ့ဘဝက သူ့ကို ရက်ရက်စက်စက် နောက်ပြောင်လိုက်သလို ဖြစ်ပြီး ကြီးမားတဲ့ နားလည်မှု လွဲမှားခြင်းကို ဖြစ်ပေါ်စေခဲ့သည်။
ရှောင်းရှောင်း ကို ကာကွယ်ဖို့ ထားလိုက်ပါဦး၊ သူ့မှာ သူမရဲ့ ဆက်သွယ်ရန် အချက်အလက်တောင် မရှိတော့ပေ။
“ရှောင်းရှောင်း၊ နင် ငါ့နဲ့ ဆက်သွယ်ဖို့ အချက်အလက်တွေကို ဖျက်လိုက်ပြီး ဖုန်းနံပါတ်ကိုလည်းဘလော့ ထားတယ်လေ။ အများသုံး ဖုန်းကနေ ခေါ်တုန်းကလည်း ငါမှန်း သိတာနဲ့ ဖုန်းချပစ်လိုက်တယ်။ တကယ်ပဲ နားလည်မှုလွဲနေတာ ငါ့ကို ရှင်းပြခွင့် ပေးပါ၊ ကောင်းပြီလား”
ရဲ့ဖန် က တိုးညှင်းစွာ ပြောလိုက်လေသည်။
စုရှောင်းရှောင်း က သဘာဝအတိုင်း စိတ်ထား နူးညံ့သူမို့ ရဲ့ဖန် ရဲ့ စိတ်ပျက်အားငယ်နေတဲ့ မျက်နှာထားကို မြင်လိုက်ရတော့ သနားမိသွားသည်။ ဒါပေမဲ့ အဲ့ဒီညက သခင်လေးရဲ့ လက်မောင်းကနေ သွေးတွေ စီးကျလာတာကို ပြန်သတိရလိုက်တော့ သူမ သွားကြိတ်ပြီး စိတ်ကို မာကျောလိုက်ကာ ပြောလိုက်လေသည်။
“ဘာတွေ ရှင်းပြစရာ ရှိသေးလို့လဲ နင် အခု စွမ်းရည်တွေရှိလာပြီဆိုတာ ငါ သိတယ်၊ ဒါပေမဲ့ နင် သခင်လေးကို မထိခိုက်သင့်ဘူး”
“သခင်လေးကို ထိခိုက်စေတယ် ဟုတ်လား ဒါမတိုင်ခင်က ငါ ချင်းလန် ကိုတောင် မသိဘူးလေ၊ ငါက ဘယ်လိုလုပ် သူ့ကို ထိခိုက်အောင် လုပ်နိုင်မှာလဲ ဒါ့အပြင် ထျန်ဟိုင်မြို့ ကို ရောက်နေတဲ့ ငါ့ လက်အောက်ငယ်သားတွေဆီက ဘာသတင်းမှ မကြားရသေးဘူး၊ သူတို့ အကုန်လုံး အရှင်းခံလိုက်ရပြီလို့ ငါ သံသယဝင်နေတာ”
ရဲ့ဖန် က ဒေါသတကြီး ပြောလိုက်လေသည်။
သူ့အတွက်တော့ ဒီကိစ္စတစ်ခုလုံးက မယုံနိုင်လောက်အောင် ထူးဆန်းနေသည်။ သက်သေအထောက်အထား အားလုံးနီးပါးက သူ့ကို ညွှန်ပြနေသည်။
“ရှောင်းရှောင်း၊ ဒီလောကမှာ နင် ထင်ထားတာထက် ပိုပြီး ရှုပ်ထွေးတဲ့ ကိစ္စတွေ၊ လူတွေ အများကြီး ရှိတယ်။ သူတို့က ငါ့ကိုအကောတ်ကြံ နေတာလည်း ဖြစ်နိုင်တယ်။”
စုရှောင်းရှောင်း ၏ လှပသော မျက်လုံးများ ပြူးကျယ်သွားလေသည်။
“နင် ဘာအဓိပ္ပာယ်မရှိတာတွေ ပြောနေတာလဲ”
သူမ မယုံကြည်နိုင်လောက်အောင် ဖြစ်သွားသည်။ ရဲ့ဖန် က သခင်လေးကို တကယ်ပဲ ချောက်ချဖို့ ကြိုးစားခဲ့တာလား။ ဘယ်လိုလုပ် ဒီလောက် အရှက်မရှိတဲ့ လူစားမျိုး ရှိနိုင်ရတာလဲ။
ရဲ့ဖန် က သူမအတွက် ပိုပြီး စိမ်းကားလာသလို ဖြစ်လာလေသည်။
“ရှောင်းရှောင်း၊ ငါ ဘယ်တုန်းကမှ မပြောင်းလဲပါဘူး။ ငါက ငယ်ငယ်တုန်းက ရဲ့ဖန် အတိုင်းပါပဲ၊ ပြီးတော့ ငါက နင့်ရဲ့ ရှောင်ဖန် အဖြစ် အမြဲ ရှိနေမှာပါ ဒီကိစ္စမှာ တကယ်ပဲ ထူးဆန်းတာ တစ်ခုခု ရှိနေတယ်”
ရဲ့ဖန် က အလျင်အမြန် ရှင်းပြလိုက်လေသည်။
“ငါ လုပ်တာ ဟုတ်မဟုတ် ခဏထားလိုက်ဦး၊ တကယ်လို့ ငါ လုပ်ခဲ့တယ် ဆိုရင်တောင် ဒီလို အခြေအနေမျိုး မဖြစ်နိုင်ဘူး။ ငါ့လူတွေရဲ့ စွမ်းရည်ကို ငါ မသိဘူးလို့ ထင်နေလား ချင်းလန် လို သူဌေးသား တစ်ယောက်က လုပ်ကြံသတ်ဖြတ်မှုကနေ အသက်ရှင် လွတ်မြောက်ဖို့ ဆိုတာ မဖြစ်နိုင်ဘူး။ သူ့လက်မောင်းမှာ ဒဏ်ရာလေး တစ်ခုလောက်ပဲ ရတယ်ဆိုတာ ဘယ်လိုလုပ် ဖြစ်နိုင်မှာလဲ”
“ဒါ့အပြင် ငါ့ရဲ့ သွေးဝံပုလွေ အမှတ်အသားပါတဲ့ ပစ္စည်းက ဘာလို့ အခင်းဖြစ်ပွားရာ နေရာမှာ ကျန်ခဲ့ပြီး ငါ့အထောက်အထားကို ဖော်ထုတ်ရတာလဲ နင် ချင်းလန် ကို ငါ့အထောက်အထား အကြောင်း အရင်က ပြောပြဖူးမှာ သေချာတယ်၊ ဒါကြောင့် သူက တမင်တကာ လုပ်ကြံတာ။”
ရှောင်းရှောင်း ကို ပြန်လည် ရယူနိုင်ရန်အတွက် ရဲ့ဖန် က လိုရင်းကို တိုက်ရိုက် ပြောပြီး သံသယဖြစ်ဖွယ် အချက်အလက် အားလုံးကို ထုတ်ဖော် ပြောဆိုလိုက်လေသည်။
ဖြောင်း ဖြောင်း ဖြောင်း
ဗီလာ အတွင်းမှ လက်ခုပ်သံများ ထွက်ပေါ်လာလေသည်။
စုရှောင်းရှောင်း ဘာမှ မပြောနိုင်ခင်မှာပင် မူယွီယန် နှင့် ပိုင်ရူယွီ တို့သည် အထဲမှ ထွက်လာကြလေသည်။
ရဲ့ဖန် ကို မြင်လိုက်သောအခါ မူယွီယန် က အရင်ဆုံး လှောင်ပြောင်လိုက်ပြီးနောက် မေးခွန်းထုတ်လိုက်လေသည်။
“ရဲ့ဖန် ရှင်က တော်တော်လေး ဟန်ဆောင်ကောင်းတာပဲနော် ရှင်က ဘယ်သူလဲ ရှင့်ရဲ့ စရိုက်က
အရင်တုန်းကတည်းက မိန်းကလေးတွေကို လိပ်စာကတ်ပေးပြီး ကာကွယ်ပေးချင်တယ်လို့ လိုက်ပြောနေတာလား”
ရဲ့ဖန် သည် အတွေးထဲတွင် နစ်မြောနေပြီး သူ့စိတ်အာရုံက စုရှောင်းရှောင်း အပေါ်တွင်သာ အပြည့်အဝ ရောက်နေသဖြင့် ဒီနှစ်ယောက် ရောက်လာတာကို သတိမထားမိလိုက်ပေ။
တိုက်ဆိုင်စွာပင် မူယွီယန် က မနေ့ညက ရဲ့ဖန် ၏ ချဉ်းကပ်မှုကို နာကြည်းနေဆဲ ဖြစ်ပြီး၊ အခု လူချင်း တွေ့လိုက်ရတော့ သူ့ကို ထပ်ပြီး လှောင်ပြောင်လိုက်ခြင်း ဖြစ်လေသည်။
ရဲ့ဖန် ၏ မျက်နှာ ဖြူဖျော့သွားလေသည်။ သူ ရှင်းပြချင်သော်လည်း ဘယ်က စပြောရမှန်း မသိတော့ပေ။
သူက ချင်းလန် နဲ့ တွေ့မယ်လို့ မျှော်လင့်ထားပေမယ့် မူယွီယန် နဲ့ တွေ့ရလိမ့်မယ်လို့ လုံးဝ မမျှော်လင့်ထားခဲ့ပေ။
ပိုင်ရူယွီ ၏ မျက်နှာကလည်း အေးစက်နေပြီး နှာမှုတ်လိုက်လေသည်။
“မစ္စတာ ရဲ့ဖန်၊ ရှင့်ရဲ့ အမြင်တချို့ကို ကျွန်မ သဘောတူတယ် ဆိုပေမယ့်၊ ချင်းလန် ရဲ့ စရိုက်က မေးခွန်းထုတ်စရာ ဖြစ်နေရင်တောင်မှ ရှင်က လူတွေကို ထပ်ခါထပ်ခါ အပုပ်ချနေလို့ မရဘူးလေ၊ ဟုတ်တယ်မလား”
“မနေ့ညက ရှင်က ချင်းလန် ကို ကျွန်မညီမလေး ပြန်ပေးဆွဲခံရမှုရဲ့ နောက်ကွယ်က ကြိုးကိုင်သူ ဆိုပြီး စွပ်စွဲခဲ့တယ်။ ဒါပေမဲ့ တကယ့် ကြိုးကိုင်သူက ဘယ်သူလဲ ဆိုတာ ကျွန်မ သိပြီးပြီဆိုတာ ရှင် သိရဲ့လား”
“ချင်းလန် သာ မရှိခဲ့ရင် ကျွန်မညီမလေး အချိန်အကြာကြီး အဖမ်းခံထားရနိုင်တယ်။ သက်သေအထောက်အထား မရှိဘဲ တစ်ယောက်ယောက်ရဲ့ အပြစ်ကင်းစင်မှုကို အသရေဖျက်တဲ့အခါ သူတို့ရဲ့ ခံစားချက်ကို ရှင် ထည့်စဉ်းစားဖူးလား”
တိုက်ဆိုင်လိုက်တာ....
ရဲ့ဖန် က ချင်းလန် ကို ချောက်ချခဲ့တယ်။ မနေ့ညက ကိစ္စသာ မဖြစ်ခဲ့ရင် ပိုင်ရူယွီ က ဖြစ်နိုင်ခြေကို ထည့်သွင်းစဉ်းစားမိမှာ သေချာသည်။ ဘာပဲဖြစ်ဖြစ် သူမလည်း ချင်းလန် ရဲ့ စရိုက်ကို သံသယဝင်နေခဲ့တာကိုး။
ဒါပေမဲ့ မနေ့ညက ကိစ္စ ဖြစ်ပျက်ခဲ့ပြီး၊ အခု ရဲ့ဖန် က စုရှောင်းရှောင်း ကို လိုက်ပိုးပန်းနေတဲ့ မြင်ကွင်းကိုပါ မြင်လိုက်ရတော့၊ ပိုင်ရူယွီ က ရဲ့ဖန် ကို လူဆိုးအဖြစ်သတ်မှတ်လိုက်ပြီဖြစ်သည်။
စုရှောင်းရှောင်း က ရဲ့ဖန် ကို မှုန်မှိုင်းသော မျက်နှာထားဖြင့် စိုက်ကြည့်နေပြီး သူမ၏ နာကြည်းမှုများ ပိုမို ပြင်းထန်လာလေသည်။
ရဲ့ဖန် ဘာလုပ်ရမှန်း မသိတော့ပေ။ သူ လက်သီးကို ကျစ်ကျစ်ပါအောင် ဆုပ်ထားပြီး အလွန်အမင်း ဒေါသထွက်နေသော်လည်း ဒေါသကို မျိုသိပ်ကာ ရှင်းပြရုံမှတပါး အခြားရွေးချယ်စရာ မရှိတော့ပေ။
“ရှောင်းရှောင်း၊ ကိစ္စတွေက တကယ် နင် ထင်သလို မဟုတ်ပါဘူး။ နားလည်မှု လွဲနေတာပါ။ ငါ အဲ့ဒီ လူနှစ်ယောက်နဲ့ မရင်းနှီးပါဘူး။ နင် ငါ့ကို မသိဘူးလား”
စုရှောင်းရှောင်း က ပြန်ပြောလိုက်လေသည်။
“နင့်အကြောင်း ငါ ဘာသိလို့လဲ ရဲ့ဖန် ငါတို့ မတွေ့ရတာ နှစ်ပေါင်းများစွာ ကြာနေပြီ။ နင် ဘာဖြစ်သွားပြီလဲ ဆိုတာ ငါ ဘယ်လို သိမှာလဲ”
“ဒါ့အပြင် တခြားသူတွေရဲ့ အမြင်ကို ခဏထားလိုက်ဦး၊ ငါ နင့်ကို ပြောရမယ့် အရာတစ်ခု ရှိသေးတယ် နင် အပြင်မှာ ဘာလုပ်ခဲ့လဲ ဆိုတာနဲ့ ပတ်သက်ပြီး သခင်လေးကို ငါ တစ်လုံးမှ မပြောပြခဲ့ဖူးဘူး။ နင် ဘယ် ကြေးစားစစ်သား အဖွဲ့ဝင်လဲ အပြင်မှာ တကယ်တမ်း ဘာတွေ လုပ်နေလဲ ဆိုတာ သူ လုံးဝ မသိဘူး သူက ဘာကိစ္စ နင့်ကို ချောက်ချရမှာလဲ”
“တော်ပြီ ရဲ့ဖန်၊ ထွက်သွားတော့။ ငါ နင့်ကို နောက်တစ်ခါ ထပ်မတွေ့ချင်တော့ဘူး။”
ပိုင်ရူယွီ နဲ့ မူယွီယန် ပဲ ဖြစ်ဖြစ်၊ စုရှောင်းရှောင်း ပဲ ဖြစ်ဖြစ် သက်သေအထောက်အထား အားလုံးက ရဲ့ဖန် ကို ညွှန်ပြနေလေသည်။
မူလက စုရှောင်းရှောင်း ရဲ့ စိတ်ထဲမှာ သူက သူချစ်ရတဲ့သူကို မပိုင်ဆိုင်ရလို့ သခင်လေးကို နာကျင်အောင် လုပ်တဲ့သူ တစ်ယောက်လို့ပဲ ထင်ခဲ့တာ။
အခုတော့ နောက်ထပ် အချက်တစ်ချက် ထပ်တိုးရတော့မယ် သူက သခင်လေးရဲ့ အပြစ်ကင်းစင်မှုကို အခြေအမြစ်မရှိ စော်ကားလိုက်ကြတာပဲ။
အမျိုးသမီး သုံးဦးစလုံး လှည့်ထွက်သွားကြလေသည်။
လမ်းလျှောက်ထွက်လာသော အဘိုးအို တစ်ဦးက ဒီမြင်ကွင်းကို မြင်လိုက်ရပြီး ရဲ့ဖန် အနားသို့ လျှောက်သွားကာ ပခုံးပေါ် လက်တင်ပြီး သက်ပြင်းချလိုက်လေသည်။
“လူငယ်လေး သုံးပွင့်ဆိုင်အချစ်ဇာတ်လမ်းမှာရေပြင်က နက်တယ်ကွ။ မင်း ကိုင်တွယ်နိုင်မှာ မဟုတ်ပါဘူး။”