အခန်း (၄၃) ပိုင်ရူယွီ နှင့် ညဘက်စကားဝိုင်း
ညအချိန်ကသည်းခံရ အလွန်ခက်ခဲလွန်းတာကြောင့် ချင်းလန် အကျပ်ရိုက်နေလေသည်။
ပိုင်ရှောင်ယွင် က သူ့ဘေးမှာ ရှိနေပြီး သူ့လည်ပင်းကို ဖက်ထားကာ အိပ်မောကျနေသည်။
သူ ဗီလိန်အမှတ်တွေ ယူသင့်လား ဒါမှမဟုတ် အရင်ဆုံး ကျင့်ကြံသင့်လား။
ချင်းလန် ဆုံးဖြတ်ချက် မချနိုင်ခင်မှာပဲမဖိတ်ခေါ်ထားတဲ့ ဧည့်သည်တစ်ယောက် ဗီလာကို ရောက်လာလေသည်။
ခွန်အား ၁၀၀ ရှိနေပြီဖြစ်တဲ့ ချင်းလန် ကအလွန်နားပါးပြီး အသံအနည်းငယ်ကြားရုံနဲ့တင် သိလိုက်လေသည်။
သူက ပိုင်ရှောင်ယွင် ရဲ့ အိပ်ခန်းထဲကနေ အလျင်အမြန် ထွက်လာပြီး ခဏတာရှောင်တိမ်းဖို့ ဘေးခန်းကို သွားလိုက်လေသည်။
ဘေးခန်းမှ တံခါးဖွင့်သံသဲ့သဲ့ကြားလိုက်ရတော့ ချင်းလန် က လန့်နိုးလာသလို ဟန်ဆောင်လိုက်ပြီး အိပ်ချင်မူးတူးနဲ့ တံခါးဖွင့်လိုက်ရာ ပိုင်ရှောင်ယွင် ရဲ့ အိပ်ခန်းတံခါးဝမှာ ရပ်နေတဲ့ ပိုင်ရူယွီ နဲ့ အကြည့်ချင်း ဆုံသွားလေသည်။
“ရှူး”
ပိုင်ရူယွီ က တိတ်တိတ်နေဖို့ လက်ဟန်ခြေဟန် ပြလိုက်ပြီး သူမရဲ့ အိပ်ခန်းထဲက ထွက်လာတဲ့ ချင်းလန် ကို ကြည့်လိုက်သည်။
သူမ နည်းနည်း ရှက်ရွံ့ပြီး စိတ်အနှောင့်အယှက် ဖြစ်သွားပေမယ့် စိတ်သက်သာရာလည်း ရသွားလေသည်။
ကံကောင်းစွာနဲ့ ချင်းလန်က အသိစိတ်ရှိပြီး သူ့ညီမလေးနဲ့ အတူမအိပ်ဘဲ သူ့အခန်းမှာ သွားအိပ်ခဲ့လို့သာပဲ။
မဟုတ်ရင် ညီမလေးရဲ့ အချစ်စိတ်မွှန်တဲ့သဘာဝနဲ့ အိပ်နေရင်း ဟိုလှိမ့်ဒီလှိမ့် လုပ်တတ်တဲ့ အကျင့်ကြောင့် သူမညီမလေးနစ်နာမှု အမျိုးမျိုး ခံစားရနိုင်ပေသည်။
“သခင်လေး ချင်း၊ အောက်ထပ်ဆင်းပြီး စကားပြောကြရအောင်”
ပိုင်ရူယွီ က အောက်ထပ် ဧည့်ခန်းကို ညွှန်ပြပြီး တိုးတိုးလေး ပြောလိုက်လေသည်။
ချင်းလန် ခေါင်းညိတ်လိုက်ပြီး သူတို့နှစ်ဦး ဗီလာရဲ့ ဧည့်ခန်းဆီကို ရှေ့ဆင့်နောက်ဆင့် ဆင်းသွားကြလေသည်။
ပိုင်ရူယွီ က မီးကို ဖွင့်လိုက်ပြီး မီးဖိုချောင်ထဲ ဝင်ကာ လက်ဖက်ရည် တစ်အိုး ဖျော်ပြီး ချင်းလန် ကို ဧည့်ခံလိုက်သည်။
“သခင်လေး ချင်း၊ ဒီနေ့ ကိစ္စတွေအတွက် ကျွန်မ ရှင့်ကို အရမ်း ကျေးဇူးတင်ပါတယ်။ မဟုတ်ရင် ကျွန်မ ဘယ်လို ဒုက္ခမျိုး ရောက်သွားမလဲ မသိဘူး။”
ချင်းလန် က လက်ဖက်ရည် တစ်ငုံ သောက်လိုက်ကာ
ပိုင်ရှောင်ယွင် ရဲ့ ကုတင်ပေါ်မှာ အိပ်ခဲ့တာ မဟုတ်သလိုမျိုး သူ့မျက်နှာကဘာသိဘာသာပင်။
သူက တည်ငြိမ်စွာနဲ့
“ကျေးဇူးတင်စရာ မလိုပါဘူး။ အခြေအနေတွေ ဘယ်လိုလဲ။”
ဟု မေးလိုက်လေသည်။
ပိုင်ရူယွီက နှုတ်ခမ်းကို ကိုက်လိုက်ပြီး သူမရဲ့လှပတဲ့ မျက်လုံးတွေထဲမှာ အမုန်းတရား အရိပ်အယောင်တွေ ပေါ်လာလေသည်။
ပိုင်ရူယွီ က မိန်းမသား ဖြစ်နေလို့လျှော့မတွက်လိုက်သင့်ပေ။ စီးပွားရေးလောကမှာ နာမည်တစ်ခု ရအောင် လုပ်နိုင်သူက သူရဲဘောကြောင်တဲ့သူမဟုတ်ပေ။
စီးပွားရေးလုပ်ငန်းမှာ သွေးထွက်သံယိုက မရှိမဖြစ် လိုအပ်လေသည်။
ဒါပေမဲ့ အခြေအနေတွေ ဒီအထိ ရောက်လာလိမ့်မယ်လို့ သူမ ဘယ်တုန်းကမှ မမျှော်လင့်ခဲ့မိပေ။
ကျားတောင်မှ သူ့သားသမီးကို ပြန်မစားဘူး။
ပိုင်ရှောက်ချွမ် က ဘယ်လိုလုပ် ညီအစ်မနှစ်ယောက်ကို ထပ်ခါထပ်ခါ နာကျင်အောင် လုပ်ရက်တာလဲ။
ပထမဆုံး သူ့ညီမကို နာကျင်အောင် လုပ်တယ်၊ အခု ကုမ္ပဏီအတွင်းမှာ သူမကို ချောက်ချဖို့ အကွက်ဆင်ထားပြန်ပြီ။
ချင်းလန် သာ ဝင်မပါခဲ့ရင် သူမ ကုမ္ပဏီကနေ ဘေးဖယ်ထုတ်ခံရပြီး ကုမ္ပဏီနဲ့ ဘာပတ်သက်မှုမှ မရှိတော့တဲ့ အခြေအနေ ရောက်သွားလောက်ပြီ။
“ကျွန်မအဖေက သမီးတွေထက် သားတွေကို အမြဲတမ်း ပိုဦးစားပေးတယ်။ ကျွန်မနဲ့ ယွင်ယွင် ကို ပိုင်မိသားစု ရဲ့ အမွေဆက်ခံသူတွေ အဖြစ် သူ ဘယ်တုန်းကမှ တကယ် သဘောမထားခဲ့ဘူး။ သူ့မျက်လုံးထဲမှာ သားတွေကပဲ ပိုင်မိသားစု ရဲ့ ပိုင်ဆိုင်မှုတွေကို ဆက်ခံနိုင်တာ။”
“သူ့ရဲ့ မူလ အစီအစဉ်က ကျွန်မတို့ ညီအစ်မတွေကို ၁၀% ထားခဲ့ဖို့ပဲ၊ ဒါပေမဲ့ ယွင်ယွင် ကိစ္စ ဖြစ်ပြီးတဲ့နောက် ၂၀% ပေးဖို့ သဘောတူခဲ့တယ်။ ဒါပေမဲ့ ကျွန်မ ပြန်ရောက်ပြီး သူနဲ့ အကြီးအကျယ် စကားများပြီးတဲ့အခါကျတော့ ကုမ္ပဏီကို ထိန်းချုပ်ခွင့် လုံးဝ စွန့်လွှတ်ရမယ် ဆိုတဲ့ အချက်နဲ့ ၄၀% ပေးဖို့ သဘောတူလိုက်တယ်။”
ပိုင်ရူယွီ ဒီစကားတွေ ပြောတဲ့အခါ သူမ အရမ်း နာကျင်နေလေသည်။
ဖခင် အနားယူပြီးနောက် ပိုင်မိသားစု အုပ်စုကြီး တည်ငြိမ်ဖို့ သူမ နှစ်ပေါင်းများစွာ ကြိုးစားအားထုတ်ခဲ့တာတွေကို ခဏထားလိုက်ဦး၊ သူမ ကြီးမားတဲ့ အကျိုးပြုမှုတွေ မလုပ်ခဲ့ရင်တောင် တော်တော်လေး ပင်ပန်းခံခဲ့ရတာတော့ သေချာပါသည်။
ကုမ္ပဏီ အုပ်စုအတွက် အလုပ်လုပ်ရင်း အလွန်အမင်း ပင်ပန်းပြီး ဆုံးပါးသွားတဲ့ သူမရဲ့ မိခင်ကိုပဲ ကြည့်လိုက်ဦး။
မိခင်နဲ့ သမီးနှစ်ယောက် ပေါင်းထားတဲ့ တန်ဖိုးကတရားမဝင် သား တစ်ယောက်တည်းရဲ့ တန်ဖိုးလောက်တောင် မရှိတော့ဘူးလား။
ရိုးရိုးသားသား ပြောရရင် ပိုင်ရူယွီ က ပိုင်မိသားစု ရဲ့ ပိုင်ဆိုင်မှုတွေကို တကယ် ဂရုမစိုက်ပေ။ သူမမျိုသိပ်မထားနိုင်တဲ့ နာကြည်းချက်ကိုသာ ဆုပ်ကိုင်ထားမိခြင်း ဖြစ်သည်။
ချင်းလန် က ခဏလောက် တုံ့ဆိုင်းနေပြီးမှ
“ဒါဆို မင်းရဲ့ အစီအစဉ်က ဘာလဲ။”
ဟု မေးလိုက်လေသည်။
ပိုင်ရူယွီ ခါးသက်သက် ပြုံးလိုက်သည်။
“အရင်တုန်းကသာဆိုရင် ကျွန်မ ပိုက်ဆံတစ်ပြားမှ မရရင်တောင် အဲ့ဒီတရားမဝင်သား ကို လွယ်လွယ်နဲ့ လွှတ်ပေးမှာ မဟုတ်ဘူး။ ကျွန်မ အသက်ရှင်နေသရွေ့ ပိုင်မိသားစု ရဲ့ ပိုက်ဆံတွေကို လွယ်လွယ်နဲ့ လွှဲပြောင်းလို့ ရမှာ မဟုတ်ဘူး”
“ဒါပေမဲ့ အခု ကျွန်မ ကြောက်နေပြီ။ အဖေ နောက်ထပ် ဘယ်လို ခြိမ်းခြောက်မှုတွေ လုပ်ဦးမလဲ မသိဘူး။ အမေက မရှိတော့ဘူး၊ အဖေကလည်း အဲ့ဒီ သား ကိုပဲ ဂရုစိုက်တယ်။ ကျွန်မမှာ မိသားစုဆိုလို့ ယွင်ယွင် ပဲ ရှိတော့တာ၊ သူ့အတွက် ကျွန်မ ခေါင်းမာဖို့ မရဲတော့ဘူး...”
ကျွန်မ ကြောက်တယ်။
ပိုင်ရူယွီ တကယ် ကြောက်လန့်နေခဲ့ပြီ။
အမှန်တရားတွေက သူမရှေ့မှာ ပေါ်မလာခဲ့ရင် တရားမဝင်သား အတွက်နဲ့ သူမဖခင်က ယွင်ယွင် ကို ဒီလို အန္တရာယ်ရှိတဲ့ အခြေအနေမျိုး ရောက်အောင် လုပ်လိမ့်မယ်လို့ သူမ တကယ် မယုံကြည်ခဲ့မိပေ။
သူမ မကျေနပ်ချက်နဲ့ ပြန်တုံ့ပြန်ဖို့ မရဲတော့ပေ။ အဲ့ဒါက ညီမလေးကို ထိခိုက်စေမယ့် ကိစ္စတွေ ဖြစ်လာမှာကို ကြောက်လေသည်။
“သခင်လေး ချင်း...”
ပိုင်ရူယွီ က သူမရဲ့ ဝမ်းနည်းမှုကို ဖိနှိပ်ပြီး ချင်းလန် ကို စိုက်ကြည့်လိုက်လေသည်။
“ဒီနေ့ ဖြစ်ခဲ့တဲ့ ကိစ္စတွေအတွက် ရှင့်ကို ကျွန်မ အရမ်း ကျေးဇူးတင်ပါတယ်။ ကိုယ့်သွေးသားရင်း ဖခင်က ဒီလို ရက်စက်တဲ့ အလုပ်မျိုး လုပ်လိမ့်မယ်လို့ ကျွန်မ ဘယ်တုန်းကမှ မထင်ခဲ့မိဘူး။”
ပိုင်ရူယွီ နှုတ်ခမ်းကို ကိုက်လိုက်ပြီး
“ပြီးခဲ့တဲ့ တစ်ခေါက်က ရှင် အကြံပြုခဲ့တာကို ကျွန်မ သဘောတူလိုက်ပြီ”
ဟု ပြောလိုက်လေသည်။
“ကျွန်မ ရှင့်ကုမ္ပဏီကို တာဝန်ယူပြီး ရှင့်အတွက် လည်ပတ်ပေးဖို့ ဆန္ဒရှိပါတယ်၊ ရှင်က ရှယ်ယာ ခွဲဝေမပေးချင်ရင်တောင် ကျွန်မ လက်ခံပါ့မယ်”
ပိုင်မိသားစု....
သူမဖခင်က ဒီလောက် အစွန်းရောက်နေပြီဆိုတော့ သူမ ဆုပ်ကိုင်ထားစရာ ဘာကျန်သေးလို့လဲ၊ ဘာကို စိတ်ကူးယဉ်နေရဦးမှာလဲ။
အဖေ လာပြီး တောင်းပန်မယ့် အချိန်ကို စောင့်နေရမှာလား။
ဒါက ဖြစ်နိုင်လို့လား။ အဲ့ဒါက စိတ်ကူးယဉ် သက်သက်ပဲ။ ဖခင်ရဲ့ နှလုံးသားထဲမှာ သမီးနှစ်ယောက်ကို လုံးဝ ဂရုမစိုက်ဘူး အခြေခံယုံကြည်မှုတောင် မရှိပေ။
ဒီလို ရက်စက်တဲ့ ဖခင်ကို ယုံကြည်မယ့်အစား သူမက ညီအစ်မနှစ်ယောက်ရဲ့ အနာဂတ်ကို ချင်းလန် ဆီမှာပဲ ပုံအပ်လိုက်ချင်သည်။
အနည်းဆုံးတော့ အခုအချိန်အထိ ချင်းလန် က ညီအစ်မနှစ်ယောက်ကို ထိခိုက်အောင် ဘာမှ မလုပ်ခဲ့ပေ။ တကယ်တော့ ချင်းလန် ကြောင့်သာ ညီမလေးက အဲ့ဒီ အန္တရာယ်ရှိတဲ့ နေရာကနေ လွတ်မြောက်နိုင်ခဲ့တာ။
“သခင်လေး ချင်း၊ ဒီနေ့ကစပြီး ကျွန်မ ပိုင်ရူယွီ ကုမ္ပဏီကို သစ္စာဖောက်တဲ့ အလုပ် ဘယ်တော့မှ လုပ်မှာ မဟုတ်ပါဘူး။ ကုမ္ပဏီအတွက် အရာအားလုံး ပေးဆပ်ဖို့ ဆန္ဒရှိသလို ဘယ်လို တန်ဖိုးမျိုးမဆို ပေးဆပ်ဖို့လည်း ဆန္ဒရှိပါတယ်”
ပိုင်ရူယွီ က ချင်းလန် ကို စူးစိုက်ကြည့်လိုက်ပြီး သူမရဲ့ လှပတဲ့ မျက်လုံးတွေထဲမှာ ထူးဆန်းတဲ့ အကြည့်တစ်ခု ပေါ်လာလေသည်။
“ကျွန်မ ကိုယ်တိုင် အပါအဝင်ပေါ့”
အခုချိန်မှာ သူမ ဘာတွေ တွေးနေလဲ၊ ဘာလို့ ဒီစကားတွေ ပြောနေလဲဆိုတာ ဘယ်သူမှ မသိနိုင်ပေ။
ချင်းလန် စိတ်ချလက်ချ ဖြစ်စေဖို့နဲ့ ညီအစ်မနှစ်ယောက်ကို ဆက်လက် ကာကွယ်ပေးစေချင်လို့လား။
ညီမလေးကို ကာကွယ်ဖို့အတွက်လား။
ဒါမှမဟုတ် ဖခင်နဲ့ လမ်းခွဲလိုက်ရလို့ စိတ်ဓာတ်ကျသွားတာလား။
ဒါမှမဟုတ် ချင်းလန် က သူမအပေါ် အကန့်အသတ်မရှိ ယုံကြည်မှု ပေးထားတာကြောင့် သူမ မှီခိုချင်စရာ အားအင်တစ်ခု ရရှိသွားလို့လား။
“ရူယွီ၊ မင်း အလေးအနက် ပြောနေတာလား။”
ချင်းလန် က ဒီအကြောင်းပြချက်တွေကို ထည့်မစဉ်းစားဘဲ အံ့ဩတကြီး ပါးစပ်အဟောင်းသား ဖြစ်သွားလေသည်။
ပြန်ရောက်လာတဲ့ ပိုင်ရူယွီ က ဒီစကားတွေကို ကိုယ်တိုင် စတင် ပြောလာလိမ့်မယ်လို့ သူ မမျှော်လင့်ထားခဲ့ပေ။
ငြင်းမလား။
သူ ရူးနေမှပဲ ငြင်းမှာပေါ့။
သူ သိတာက ပိုင်ရှောင်ယွင် ရဲ့ အိပ်ခန်းထဲမှာကတည်းက သူမနေနိုင် တော့ဘူးဆိုတာပင်။
ပိုင်ရူယွီ က ပြောပြီးပြီ ဆိုတော့ သူ သေချာပေါက် ငြင်းလို့ မရတော့ဘူးလေ။
“ဒင်! အိမ်ရှင်သည် ဇာတ်လိုက်မင်းသမီး ပိုင်ရူယွီ ကို သိမ်းပိုက်လိုက်နိုင်ပါပြီ။ ဂုဏ်ယူပါတယ် အိမ်ရှင်သည် ဗီလိန်အမှတ် +50000 ရရှိသွားပါပြီ။”