အခန်း (၁၉၉) မှော်အတတ်ကို အနိုင်ယူဖို့ မှော်အတတ်ကိုပဲ သုံးရမယ်

“သခင်လေး ချင်း...”

ဖျော့တော့တော့ အပြာရောင် ဆွယ်တာအင်္ကျီနဲ့ စကတ်တိုလေး ဝတ်ဆင်ထားတဲ့ မိန်းကလေးတစ်ယောက် အပြင်ကနေ လှမ်းဝင်လာလေသည်။

“ထိုင်ပါ”

ချင်းလန်က လက်မြှောက်ပြပြီး သူ့ရှေ့က ဆိုဖာမှာ ထိုင်ဖို့ အချက်ပြလိုက်၏။

ဒီအမျိုးသမီးက ဇာတ်ညွှန်းနဲ့ သရုပ်ဆောင်ရွေးချယ်ပွဲ သတင်းထွက်လာပြီးနောက် အပြေးအလွှား ရောက်လာတဲ့ နာမည်သိပ်မရှိလှတဲ့ မင်းသမီးလေး တစ်ယောက်ဖြစ်လေသည်။

မိန်းကလေးက ဆွဲဆောင်မှုရှိတဲ့ အပြုံးလေးနဲ့ “သခင်လေး ချင်း... ကျွန်မနာမည်က ကျန်းမေယု ပါ။ ကျွန်မက မြို့ပြအချစ်ဦး နဲ့ လှပတဲ့နတ်သမီး စတဲ့ ရုပ်ရှင်နဲ့ ရုပ်သံဇာတ်လမ်းတွဲတွေမှာ ပါဝင်ခဲ့ဖူးပါတယ်။ သရုပ်ဆောင်ပိုင်းမှာ အခြေခံရှိပြီးသားဖြစ်လို့ သခင်လေး လိုအပ်တဲ့ သရုပ်ဆောင် အရည်အချင်းမျိုး ပြည့်မီလိမ့်မယ်လို့ ယုံကြည်ပါတယ်” လို့ မိတ်ဆက်လိုက်လေသည်။

ချင်းလန်က ဘေးမှာရပ်နေတဲ့ ချူမုန်ယောင်ကို အေးစက်စက် တစ်ချက်ကြည့်လိုက်ပြီး စိတ်ထဲကနေ နှာခေါင်းရှုံ့လိုက်၏။ ထို့နောက် သူ့ရှေ့က ကျန်းမေယုကို ကြည့်ကာ

“ကြည့်ကောင်းရုံသက်သက် ဇာတ်ကွက်တွေကို အားကိုးပြီး နာမည်နည်းနည်းရလာတဲ့ လက်ရာအသေးစားလေးတွေက သရုပ်ဆောင်ပညာတောင် လိုတာမဟုတ်ဘူး”

ဟု ခနဲ့လိုက်လေသည်။

ဒီလောက် မှတ်တမ်းလေးနဲ့ ငါ့ရဲ့ ရိုက်ကူးရေးအဖွဲ့မှာ နေရာရမယ်လို့ ထင်နေတာလား။

ဒီမတိုင်ခင်က ချင်းလန်ဟာ ကျန်းမေယုနဲ့ တစ်ခါမှ မတွေ့ဖူးပေမဲ့ ကျွင်းဇီရှိနေတာပဲ မဟုတ်လား။

စုံစမ်းကြည့်လိုက်တာနဲ့ သူမရဲ့ နောက်ကြောင်းတွေက ပေါ်လာပြီးသားပင်။ သူမက သူမရဲ့ ကိုယ်လုံးကိုယ်ပေါက်ကိုပဲ အသုံးချပြီး ပရိသတ်စိတ်ဝင်စားအောင် လုပ်တတ်တဲ့ အမျိုးသမီး အနုပညာရှင်တစ်ယောက်သာ ဖြစ်လေသည်။ သူမ ဂုဏ်ယူနိုင်တာဆိုလို့ သူမရဲ့ ထင်ရှားတဲ့ ရင်သားအလှပဲ ရှိတာလေ။

ကျန်းမေယုက အဆူခံရလို့ စိုးရိမ်မသွားဘဲ စိတ်ထဲကနေ တိတ်တဆိတ် ဝမ်းသာနေမိသည်။

ဘာကြောင့်လဲဆိုတော့ အခန်းထဲကို ဝင်လာချင်း ချူမုန်ယောင်ကို မြင်လိုက်ရတဲ့ အချိန်မှာ သူမဟာ ချူမုန်ယောင်ရဲ့ အလှအပကြောင့် မှင်သက်သွားခဲ့ရလို့ပင်။တစ်စုံတစ်ယောက်က သူမထက် အရင်ဦးအောင် ရောက်နေရုံတင်မကဘဲ အနောက်တိုင်း နယ်ခြားဒေသ ကချေသည် ဝတ်စုံနဲ့ ဆွဲဆောင်မှုအပြည့် ပြင်ဆင်ထားတာကို မြင်တော့ သူမ ကြောက်သွားမိတာ အမှန်ပဲ။

သိမ်းငှက်သူရဲကောင်း ရိုက်ကူးရေးအဖွဲ့က အဓိက မင်းသမီးအဖြစ် စူပါစတား ရှီယာ ပါဝင်မှာဖြစ်ကြောင်း ကြေညာထားသလို ရှီယာကိုယ်တိုင်လည်း အတည်ပြုထားပြီးသားပင်။ဒါက ဘာကို ဆိုလိုတာလဲ။

ဒီဇာတ်လမ်းတွဲဟာ ပြသတာနဲ့ နာမည်ကြီးမှာ သေချာနေပြီလို့ ဆိုလိုတာပေါ့။

ပေါက်မှာကတော့ မြေကြီးလက်ခတ်မလွဲပင်ဖြစ်၏။တကယ်လို့ သူမသာ ဒီဇာတ်လမ်းမှာ ဒုတိယ ဒါမှမဟုတ် တတိယ မင်းသမီး နေရာလေး ရခဲ့မယ်ဆိုရင် ရှီယာရဲ့ နာမည်ကျော်ကြားမှုကို အသုံးချပြီး သူမ ရရှိလာမယ့် အကျိုးအမြတ်တွေက အရင်ကထက် အဆပေါင်းများစွာ သာလွန်နေမှာပင်။

ဒီလို အခွင့်အရေးမျိုးကို ဘယ်သူက လက်လွှတ်ခံမှာလဲ။

ချူမုန်ယောင် ရှိနေတဲ့အတွက် သူမက ယဉ်ယဉ်ကျေးကျေး မိတ်ဆက်ခဲ့ပေမဲ့ ချူမုန်ယောင်အပေါ်မှာတော့ ရန်လိုစိတ်နဲ့ စိုးရိမ်စိတ်တွေ ရှိနေမိ​​လေသည်။ သူမရဲ့ ဆွဲဆောင်မှုက ချူမုန်ယောင်ကို ယှဉ်နိုင်မှာ မဟုတ်ဘူးလို့ ခံစားနေရလို့ပင်။

ကံကောင်းတာက ချင်းလန်ရဲ့ အကြည့်တွေက သူမရဲ့ ရင်ဘတ်ဆီမှာပဲ ရှိနေတာပင်။

ဟဲဟဲ ယောကျ်ားတွေဆိုတာ ဒါမျိုးတွေပဲ။

ချင်းလန်ရဲ့ အကြံအစည်ကို သူမ ဘာလို့ မရိပ်မိဘဲ နေမလဲ။ ဒီလို ကိစ္စတွေမှာ သူမက ဆရာကြီးပဲလေ။

သူမက ဂုဏ်ယူဝင့်ကြွားစွာနဲ့ ခါးကို မတ်လိုက်ပြီး ချင်းလန် သူမရဲ့ ကိုယ်လုံးကိုယ်ပေါက်ကို သေချာမြင်ရအောင် လုပ်လိုက်သလို နှုတ်ခမ်းလေးဆူကာ

“သခင်လေး ချင်း... ကျွန်မက ကျွန်မရဲ့ သရုပ်ဆောင်ပညာကို ပြသနိုင်မယ့် ဇာတ်ညွှန်းမျိုးကို အမြဲ ရှာနေခဲ့တာပါ။ ဒါပေမဲ့ အခွင့်အရေး မရခဲ့ဘူး”

“ကျွန်မ နာမည်ကြီးချင်တယ်၊ အစ်မရှီယာလို ကြယ်ပွင့်တစ်ယောက် ဖြစ်ချင်တယ်၊ ဒါကြောင့် အဲ့ဒီ ဇာတ်ကားတွေကို မတတ်သာလို့ ရိုက်ခဲ့ရတာပါ။ ကျွန်မတကယ် ရိုက်ချင်တာက သခင်လေးရဲ့ ဇာတ်ညွှန်းပါ”

ဟု ထစ်ထစ်ငေါ့ငေါ့နဲ့ ပြောလိုက်လေသည်။

ကျန်းမေယုဟာ စိတ်လှုပ်ရှားစွာ ပြောဆိုပြီးနောက် ဆိုဖာကနေ ထလိုက်ကာ ချူမုန်ယောင်ရဲ့ ပခုံးကို တမင်တကာ တိုက်ပြီး ချင်းလန်ရဲ့ ဘေးမှာ သွားထိုင်လိုက်၏။ ထို့နောက် ချင်းလန်ရဲ့ လက်ကို ကိုင်ကာ သနားစရာကောင်းတဲ့ မျက်နှာလေးနဲ့

“သခင်လေး ချင်း... ကျွန်မကို အခွင့်အရေး တစ်ခုလောက် ပေးပါနော်။ ကျွန်မမှာ သရုပ်ဆောင် အရည်အချင်း ရှိပါတယ်”

“ကျွန်မမှာ အလားအလာတွေ အများကြီး ရှိသလို သခင်လေး လိုအပ်တဲ့ ဘယ်လို သရုပ်ဆောင်မျိုးကိုမဆို ကျွန်မ လုပ်ပေးနိုင်ပါတယ်”

ဟု ဆိုကာ ချင်းလန်ရဲ့ လက်ကို သူမရဲ့ ရင်ဘတ် ဘယ်ဘက်ခြမ်းပေါ် တင်ပေးလိုက်လေသည်။ သူမရဲ့ ရင်ခုန်သံတွေကို ခံစားကြည့်ဖို့ ပြောနေသလိုပါပင်။

ရှူး...

ချင်းလန် အသက်ကို ခပ်ပြင်းပြင်း တစ်ချက် ရှူလိုက်၏။

ရိုက်ကူးရေးအဖွဲ့ရဲ့ အနာဂတ် ဆုံးဖြတ်ချက်ချမယ့်သူ အနေနဲ့ သရုပ်ဆောင် တစ်ယောက်ချင်းစီရဲ့ စိတ်ကူးကို နားလည်ဖို့က အရေးကြီးတယ် မဟုတ်လား။

ကျန်းမေယုက သူမအနေနဲ့ ဘာကိုမဆို လုပ်ဆောင်ဖို့ အသင့်ရှိကြောင်း ပြသနေခြင်း ဖြစ်လေသည်။

ဒါပေမဲ့ သူမရဲ့ စကားတွေကို နားထောင်နေရင်း ချင်းလန်ရဲ့ လက်ချောင်းတွေက တစ်ခုခု မှားယွင်းနေတာကို သတိပြုမိသွားလေသည်။ သူ မျက်မှောင်ကြုတ်ဖို့ လုပ်နေတုန်းမှာပဲ ဘေးမှာရပ်နေတဲ့ ချူမုန်ယောင်က ဆက်ပြီး ကြည့်မနေနိုင်တော့ဘဲ

“ဒီမှာ လူရှိနေတာ မမြင်ဘူးလား။ တခြားလူ ရှေ့မှာ ဒီလိုလုပ်ရတာ မရှက်ဘူးလား”

ဟု အော်လိုက်လေသည်။

ကျန်းမေယုက ချင်းလန်ကို ကြည့်လိုက်ရာ သူ မျက်မှောင်ကြုတ်နေတာကို တွေ့လိုက်ရ၏။ သူမက ချက်ချင်း ထရပ်ပြီး ချူမုန်ယောင်ကို လက်ညှိုးထိုးကာ

“မင်းက ဘယ်သူမို့လို့လဲ။ ဒီမှာ စကားပြောဖို့ မင်းမှာ ဘာအခွင့်အရေး ရှိလို့လဲ”

“မင်း ငါ့ကို စော်ကားတာ ထားလိုက်ဦး၊ သခင်လေး ချင်းကိုပါ စော်ကားနေတာက ဘာသဘောလဲ”

ဟု ဒေါသတကြီး ပြန်ပြောလိုက်လေသည်။

ချူမုန်ယောင်ဟာ ဒေါသ ထွက်လာလေသည်။သူမက ငယ်စဉ်ကတည်းက အလိုလိုက်ခံခဲ့ရပြီး ဘယ်သူ့ရဲ့ အနိုင်ကျင့်မှုကိုမှ မခံခဲ့ရသူပါ။ ဒါပေမဲ့ ချင်းလန်နဲ့ တွေ့ပြီးကတည်းက သူမ အကြိမ်ကြိမ် အရှက်ခွဲခံခဲ့ရလေသည်။။ အခုလည်း သူမကို ခြိမ်းခြောက်ပြီး ဒီမှာပဲ ရပ်နေခိုင်းတဲ့အတွက် မသွားရဲဘဲ ဖြစ်နေရတာပင်။

သူမက ဒေါသတွေ ချောင်းချောင်းထွက်နေပေမဲ့ ချင်းလန်ကိုတော့ ရန်မမူရဲပေ။။ အခုတော့ တစ်ယောက်ယောက်က သူမရဲ့ ကျော့ကွင်းထဲ အလိုလို ဝင်လာမှတော့ ဘယ်လိုလုပ် ငြိမ်ခံနေမှာလဲ။ သူမက ချက်ချင်းပဲ

“မင်းကရော ဘာမို့လို့လဲ။ ကိုယ်လုံးကိုယ်ပေါက်ကို သုံးပြီး တက်လာတဲ့ တတိယတန်းစား မင်းသမီးလေးပဲဟာကို”

“မင်းကိုယ်မင်း ရွံဖို့မကောင်းဘူးလား။ ငါ့ရှေ့မှာ ဘာလို့ ဒီလောက် ရဲတင်းနေရတာလဲ”

ဟု ပြန်အော်လိုက်လေသည်။

ကျန်းမေယုကတော့ ရယ်ချင်သွားလေသည်။ သူမ အမြင်မှာတော့ ချူမုန်ယောင်ဟာ သူမကို မနာလို ဖြစ်နေတာပင်။ သူမက ချင်းလန်ရဲ့ ဘေးမှာ ပြန်ထိုင်လိုက်ပြီး

“သခင်လေး ချင်း... ဒီမိန်းမကို ဒီကနေ ထွက်သွားခိုင်းလိုက်ပါလား။ သရုပ်ဆောင်ပညာကို ကြည့်ချင်တယ် ဆိုရင်လည်း ကျွန်မ ပြပေးပါ့မယ်”

ဟု ချွဲနွဲ့စွာ ပြောလိုက်လေသည်။ သူမက ချင်းလန်ရဲ့ လက်မောင်းကို သူမရဲ့ ပေါင်ပေါ် တင်လိုက်ပြီး ဆွဲဆောင်မှုရှိတဲ့ ကိုယ်ဟန်ကို အစွမ်းကုန် ပြသလိုက်လေသည်။

ချူမုန်ယောင်က ချင်းလန်ကို မသိမသာ လှမ်းကြည့်လိုက်မိသည်။ သူမရဲ့ မျက်ဝန်းတွေထဲမှာ ဒေါသတွေ ရှိနေဆဲ ဖြစ်ပေမဲ့ ချင်းလန်ရဲ့ အေးစက်စက် မျက်နှာကို မြင်လိုက်ရတဲ့အခါမှာတော့ ချက်ချင်းပဲ အားငယ်သွားမိသည်။

ဒါဆိုရင်...

သူမ တကယ်ပဲ မောင်းထုတ်ခံရတော့မှာလား။

သူမ ဒီကနေ ထွက်သွားချင်တာ မှန်ပေမဲ့ အခုလို ကျန်းမေယုရဲ့ မောင်းထုတ်မှုကြောင့် ထွက်သွားရမယ်ဆိုရင် ဒါဟာ ပိုပြီး အရှက်ရစရာ မဟုတ်ဘူးလား။

ကျန်းမေယုလို အောက်တန်းကျတဲ့ နည်းလမ်းမျိုးနဲ့ အမောင်းထုတ်ခံရမယ့်အစား ချင်းလန်ရဲ့ အဆူအဆဲကို ခံပြီး ဒီမှာပဲ ဆက်နေချင်မိလေသည်။

ဒါပေမဲ့ အခုတော့ သူမမှာ ချင်းလန်ရဲ့ စိတ်ကို ပြောင်းလဲနိုင်မယ့် နည်းလမ်း မရှိတော့ပေ။ သူမက ချင်းလန်ကို ဒေါသထွက်အောင် လုပ်ခဲ့မိသလို အခုလည်း ချင်းလန်ရဲ့ အစီအစဉ်တွေကို နှောင့်ယှက်တဲ့ အတားအဆီးတစ်ခု ဖြစ်နေခဲ့ပြီ မဟုတ်ပါလား။

ချူမုန်ယောင်က ချင်းလန်ရဲ့ မျက်နှာက ပိုပိုပြီး အေးစက်လာတာကို ကြည့်ရင်း သူမရဲ့ နှုတ်ခမ်းကို ကိုက်ကာ လက်သီးကို ကျစ်ကျစ်ပါအောင် ဆုပ်ထားလိုက်မိသည်။ သူမက သူမဘဝရဲ့ အရှက်ရဆုံး အချိန်ကို ရင်ဆိုင်ဖို့အတွက် မျက်လုံးကို တင်းတင်းမှိတ်ထားလိုက်တော့သည်။

“ထွက်သွား”

ထိုအေးစက်တဲ့ အမိန့်သံဟာ ထင်ထားတဲ့အတိုင်း ရောက်ရှိလာလေသည်။

ချူမုန်ယောင်ရဲ့ ရင်ထဲမှာ ဟာသွားရသည်။ အတိုင်းအထက်အလွန် အရှက်ရတဲ့ ခံစားချက်ကြီးက ရင်ထဲကနေ တိုးထွက်လာတော့သည်။ သူမဟာ ငိုချင်စိတ်ကို အောင့်ထားပြီး ဒီနေရာကနေ အမြန်ဆုံး ထွက်ပြေးဖို့ အနောက်ကို လှည့်လိုက်လေသည်။

ချင်းလန်ရဲ့ အေးစက်စက် မျက်နှာကိုလည်း ဆက်ပြီး မကြည့်ချင်တော့သလို ကျန်းမေယုရဲ့ အောင်နိုင်သူ အပြုံးကိုလည်း ရင်မဆိုင်ချင်တော့ပေ။

ဒါပေမဲ့ သူမ အနောက်လှည့်လိုက်တဲ့ အချိန်မှာပဲ ကျန်းမေယုရဲ့ အော်ဟစ်သံကို ကြားလိုက်ရတာကြောင့် အလိုလို ပြန်လှည့်ကြည့်မိလိုက်သည်။

ဆိုဖာပေါ်မှာ ရှိနေတဲ့ ကျန်းမေယုဟာ ကြမ်းပြင်ပေါ်ကို တွန်းချခံလိုက်ရပြီး သူမက အံ့ဩတကြီးနဲ့ ချင်းလန်ကို ကြည့်ကာ

“သခင်လေး ချင်း... ဒါက ဘာသဘောလဲဟင်”

ဟု ဇဝေဇဝါ မေးလိုက်လေသည်။

“ထွက်သွားလို့ ပြောနေတာလေ။ နားမကြားဘူးလား”

ချင်းလန်ရဲ့ မျက်နှာက ဆီးနှင်းတွေလို အေးစက်နေလေသည်။ ကျန်းမေယု ဆိုတာက ချူမုန်ယောင်ကို ပညာပေးဖို့ ခေါ်လာတဲ့ ကိရိယာတစ်ခု သက်သက်ပင်။

ဒါပေမဲ့ မထင်မှတ်ဘဲ ဒီမိန်းကလေးရဲ့ ကိုယ်လုံးကိုယ်ပေါက်က အတုအယောင်တွေ ဖြစ်နေခဲ့လေသည်။ အထိအတွေ့က လုံးဝကို ကွဲပြားနေခဲ့ပေသည်။

ချင်းလန်အတွက်တော့ ဒါဟာ ချေးနင်းမိသလိုမျိုး တကယ်ကို ရွံစရာကောင်းလှသည်။ ရေချိုးခန်းထဲ အမြန်ပြေးပြီး လက်ကို အကြိမ်တစ်ရာလောက် ပြန်ဆေးချင်စိတ် ပေါက်သွားရလေသည်။

ကျန်းမေယုဟာ ထိတ်လန့်တကြားနဲ့ ထွက်ပြေးသွားတော့သည်။ သူမလို နာမည်မရှိတဲ့ သူတစ်ယောက်အနေနဲ့ စူပါစတား ရှီယာကိုတောင် ဖိတ်ခေါ်ရဲတဲ့သူကို ဘယ်လိုမှ မယှဉ်နိုင်မှန်း သူမ သိလေသည်။ဒီလို အချိန်မျိုးမှာ ဆွဲဆောင်မှုတွေ သုံးပြီး ပြန်ချော့ဖို့လည်း သူမ မရဲတော့ပါဘူး။ သူမဟာ ထျန်ဟိုင်မြို့ကနေ အမြန်ဆုံး ထွက်သွားရတော့မှာပင်။

ချူမုန်ယောင်ကတော့ ဇဝေဇဝါနဲ့ ရပ်နေမိဆဲပင်ဖြစ်လေသည်။ သူမက ချင်းလန်ရဲ့ အေးစက်တဲ့ မျက်နှာကို ကြောင်စီစီနဲ့ ငေးကြည့်နေမိသည်။

ဒါက ပြောပြလို့မရတဲ့ ခံစားချက်မျိုး ဖြစ်သလို သူမရဲ့ ရင်ထဲမှာလည်း ကြီးမားတဲ့ ပျော်ရွှင်မှုတစ်ခု တိုးလျှိုးဝင်ရောက်လာလေသည်။