အခန်း (၁၉၇) သွေးနီရောင် မန်ဒါလာ ပါ ဒီကို ရောက်နေတာလား

“သခင်လေး ခုနက အလှလေးက အမှန်အတိုင်း ပြောရရင် တကယ်ကို ချောတာပဲနော်”

လေယာဉ်ပေါ် တက်ပြီးတဲ့နောက် ကျွင်းဇီက သူ့ခေါင်းကို အားနာဟန်နဲ့ ကုတ်ရင်း ချင်းလန်ကို ရိုးသားဖြူစင်တဲ့ အပြုံးလေး ပြုံးပြလိုက်လေသည်။

ဂေါက်ကွင်းမှာ တွေ့ခဲ့တဲ့ အဲ့ဒီ အထက်တန်းလွှာ အမျိုးသမီး အုပ်စုဟာ အရည်အသွေးပိုင်းမှာတော့ တကယ့်ကို ထိပ်တန်းတွေ ဖြစ်တယ်လို့ ဆိုရမှာပင်။

ချင်းလန် သွားရောက် စကားပြောခဲ့တဲ့ အမျိုးသမီးလေးဆိုရင်လည်း ရိုးရှင်းပြီး ချစ်စဖွယ် ကောင်းတဲ့ ဆွဲဆောင်မှုမျိုး အပြည့်ရှိလေသည်။

ဒီနေရာမှာ တစ်ခု အလေးအနက် ပြောချင်တာကတော့ ရုပ်ရှင်တွေ၊ ဗီဒီယိုတွေထဲမှာ ဖော်ပြလေ့ရှိတဲ့ “ဟန်ဆောင်ကောင်းတဲ့ မိန်းမဆိုး” ပုံစံမျိုးတွေကို ဘယ်တော့မှ မယုံကြည်ဖို့ပင်။

အဲ့ဒါတွေက အလိမ်အညာတွေချည်းပင်ဖြစ်၏။

တကယ်လို့ အဲ့ဒီ အမျိုးသမီးတွေသာ မျက်နှာက မြွေလိုမျိုး မေးစေ့တွေက ချွန်မြနေမယ်ဆိုရင် ဘယ်လိုလုပ်ပြီး ချမ်းသာတဲ့သူတွေနဲ့ မိတ်ဆွေ ဖြစ်နိုင်မှာလဲ။

အဲ့ဒီ သူဌေးကြီးတွေက လှပတဲ့ မိန်းကလေးတွေကို တစ်ခါမှ မမြင်ဖူးဘူးလို့ ထင်နေကြတာလား။

သာမန်လူတွေကပဲ အမြင်စူးရှပြီး ချမ်းသာတဲ့သူတွေကပဲ မျက်စိကန်းနေကြတယ်လို့ ထင်နေတာလား။

အဓိပ္ပာယ် မရှိတာတွေ။

အဲ့ဒါတွေက ဇာတ်ကောင်တွေကို ပုံသေကားကျ ဖြစ်စေဖို့နဲ့ ဗီလိန်မက မင်းသမီးထက် ပိုပေါ်လွင်သွားမှာ စိုးလို့ ဖန်တီးထားတဲ့ အချက်တွေသာ ဖြစ်လေသည်။

တကယ့် လက်တွေ့လောကမှာတော့ အထက်တန်းလွှာ အသိုင်းအဝိုင်းထဲမှာ ကျင်လည်နိုင်တဲ့ အဲ့ဒီ အမျိုးသမီးတွေထဲမှာ ဘယ်သူကမှ ရိုးရိုးလေးနဲ့ ရင်ဆိုင်နိုင်မယ့်သူတွေ မဟုတ်ပေ။

သူတို့က ရုပ်ရည်ချောမောရုံတင် မကဘဲ ကိုယ်လုံးကိုယ်ပေါက်နဲ့ အမူအရာပိုင်းမှာပါ အများကြီး ပြင်ဆင်ထားကြသူတွေ ဖြစ်လေသည်။

ဒါကြောင့်လည်း ကျွင်းဇီတစ်ယောက် စိတ်လှုပ်ရှားသွားရခြင်း ဖြစ်ပေသည်။

အဲ့ဒီ အမျိုးသမီးတွေက သူ့ကို တကယ်ပဲ ဆွဲဆောင်နိုင်ခဲ့တာ မဟုတ်လား။

“ဘာလဲ မင်းက အနောက်ကို ပြန်ပျံသွားပြီး သူတို့နဲ့ အတူတူ ဂေါက်သွားရိုက်ချင်လို့လား” ချင်းလန်က ကျွင်းဇီကို ပြုံးစစနဲ့ ကြည့်လိုက်လေသည်။

သူ့ရဲ့ အဆင့်အတန်းနဲ့ဆိုရင် အဲ့ဒီလို အမျိုးသမီးတွေအပေါ် စိတ်ဝင်စားမှု သိပ်မရှိပေ။ အဓိက ပြဿနာကတော့ သူ့မှာ သန့်ရှင်းမှုနဲ့ ပတ်သက်ရင် အရမ်း စည်းကမ်းကြီးတဲ့ အကျင့်ရှိနေတာကြောင့်ပင်။

တခြားလူတွေ သုံးထားတဲ့ နေရာမျိုးမှာ သူကတော့ သွားပြီး ပတ်သက်ချင်စိတ် မရှိပေ။

ကျွင်းဇီက တံတွေးကို ခက်ခဲစွာ မျိုချလိုက်ပြီး လက်နှစ်ဖက်ကို ပွတ်သပ်ရင်း “သခင်လေးကလည်း ဘာတွေ ပြောနေတာလဲ ကျွန်တော်က ဒီအတိုင်း ပါးစပ်ထဲ ရှိတာ ပြောမိတာပါ” ဟု ဆိုလိုက်၏။

“ဟုတ်လို့လား” ချင်းလန်က အင်း ဟု ဆိုကာ “တကယ်တော့ ငါ့ရဲ့ ဇာတ်လမ်းတွဲအတွက် သရုပ်ဆောင် ရွေးချယ်တဲ့ ကိစ္စကို မင်းကို တာဝန်ပေးမလို့ပဲ ဒါပေမဲ့ မင်းက အဲ့လို ပြောမှတော့ အိုဟွမ် တို့ကိုပဲ ခိုင်းရတော့မှာပေါ့”

“သိမ်းငှက်သူရဲကောင်း” ကို ရိုက်ကူးဖို့ကတော့ သေချာသလောက် ရှိနေလေပြီ။ သရုပ်ဆောင်တွေ အဆင်သင့် ဖြစ်တာနဲ့ ပိုက်ဆံ သန်းအနည်းငယ်လောက် သုံးလိုက်ရင် ရိုက်ကူးရေး အဖွဲ့ တစ်ဖွဲ့လုံးကို အသစ်ကနေ စတင် ဖန်တီးနိုင်မှာပင်ဖြစ်သည်။

နာမည်ကြီး စူပါစတား ရှီယာ ပါဝင်မှာ ဖြစ်တဲ့အပြင် ချင်းလန်ရဲ့ နာမည်ကလည်း အခုမှ ဟိုးဟိုးကျော်နေတာ မဟုတ်လား။

ကြော်ငြာတွေအတွက် ပိုက်ဆံပုံအော သုံးလိုက်မယ်ဆိုရင် လူတွေကို ဆွဲဆောင်ဖို့က မခက်ခဲပေ။

သရုပ်ဆောင်တွေ ရှားပါးနေမှာလား။

ဒီသတင်းသာ အပြင်ထွက်သွားရင် သရုပ်ဆောင်တွေက သူတို့ဘာသာ လာရောက် လျှောက်ထားကြမှာ သေချာလှပေသည်။

ရွေးချယ်စရာတွေကတော့ အများကြီးပင်။

ဘယ်သူ့ကို ရွေးမလဲ ဆိုတာကတော့ သူတို့ရဲ့ ကိုယ်ပိုင် အရည်အချင်းတွေပေါ်မှာပဲ မူတည်ပေလိမ့်မည်။

ဒီစကားကို ကြားလိုက်ရတဲ့အခါ ကျွင်းဇီတစ်ယောက် ချက်ချင်း နောင်တရသွားတော့သည်။ “သခင်လေးကလည်း ကျွန်တော့်ကို စိတ်မကောင်းအောင် လုပ်နေပြန်ပြီ ကျွန်တော်က သခင်လေး ခိုင်းတာမှန်သမျှ အကုန် လုပ်ပေးမှာပါ”

“ဒါ့အပြင် အိုဟွမ် တို့က လူကြမ်းကြီးတွေလေ သူတို့ကို ဒီလို ကိစ္စမျိုး ခိုင်းလိုက်ရင် လူတွေကို ခြောက်လှန့်သလို ဖြစ်ကုန်မှာပေါ့ အဲ့ဒါက မကောင်းပါဘူး”

“ကောင်းပြီလေ ငါ့ရှေ့မှာ ဟန်ဆောင်မနေနဲ့တော့ မင်း ရှာပေးရမယ့် လူကိုပဲ သေချာ မှတ်ထားပြီး အချိန်တန်ရင် ဂရုစိုက်လိုက်ဦး”

ချင်းလန်က လက်ယမ်းပြလိုက်ပြီး ဒီအကြောင်းကို ဆက်မပြောတော့ပေ။ 

ချင်းလန်မှာ ဒီကိစ္စနဲ့ ပတ်သက်ပြီး ဘာမှ ကန့်ကွက်စရာ မရှိပေ။ 

ဒါက ရှေးခေတ်က မိသားစုကြီးတွေမှာ အိမ်ဖော်မလေးတွေ အများကြီး ရှိနေသလိုပါပဲ။ သခင်လေး ဖြစ်သူက အိမ်ဖော်မလေးတိုင်းအပေါ် စိတ်ဝင်စားနေမှာ မဟုတ်ပါဘူး။

ကိုယ့်ရဲ့ ယုံကြည်ရတဲ့ လက်ရုံးကို အခွင့်အရေး ပေးလိုက်ခြင်းက လူတွေရဲ့ စိတ်ကို ရရှိစေသလို အိမ်ထောင်ရေး ကိစ္စတွေမှာပါ ကူညီပေးရာ ရောက်တာကြောင့် တကယ်ကို ကောင်းမွန်လှပေသည်။

ရုပ်ရှင်လောကက မင်းသမီးတွေနဲ့ ခုနက အထက်တန်းလွှာ အမျိုးသမီးတွေက ပုံစံချင်း မတူပေမဲ့ အနှစ်သာရကတော့ အတူတူပါပင်။

ရိုးသားဖြူစင်တဲ့ အမျိုးသမီး အနည်းငယ်ကလွဲရင် တခြား သရုပ်ဆောင်တွေနဲ့ အဲ့ဒီ အမျိုးသမီးတွေကြားမှာ ဘာထူးခြားမှု ရှိလို့လဲ။

တစ်ယောက်က ကင်မရာ ရှေ့မှာ ရှိနေပြီး နောက်တစ်ယောက်က ကင်မရာ အနောက်မှာ ရှိနေတာပဲ ကွာတာပင်။

“ကဲ ရှေ့ကို ထွက်ခဲ့တော့ ဘယ်သူမှ မသိဘူးလို့ ထင်နေတာလား”

ချင်းလန်ရဲ့ စကားကြောင့် ကျွင်းဇီတစ်ယောက် ကြောင်သွားရလေသည်။

လေယာဉ် မောင်းနှင်ခန်းထဲက တံခါး ပွင့်လာတော့သည်။

မကျေမနပ် ဖြစ်နေတဲ့ မျက်နှာထားနဲ့ သွေးနီရောင် မန်ဒါလာ ထွက်လာခဲ့လေသည်။ သူမရဲ့ မျက်နှာမှာ မသက်မသာ ဖြစ်နေတဲ့ အရိပ်အယောင်တွေ ရှိနေ၏။

ကျွင်းဇီကတော့ လူလည် ဖြစ်တဲ့အတိုင်း ချက်ချင်း ထလိုက်ပြီး မောင်းနှင်ခန်းထဲကို သွားကာ အနောက်ခန်းက စပီကာတွေကို ပိတ်ခိုင်းလိုက်လေသည်။

ခဏအကြာမှာတော့ ရှေ့ခန်းနဲ့ နောက်ခန်းက လုံးဝ သီးခြား ဖြစ်သွားပြီး ဘာအသံမှ မကြားရတော့ပေ။

ချင်းလန်က မျက်မှောင်ကြုတ်လိုက်ကာ “ဘာလဲ မင်းက ငါ့ကိုတောင် အသိမပေးဘဲ ဒီအထိ လိုက်လာတာလား” ဟု မေးလိုက်လေသည်။

တကယ်လို့ ကျွင်းဇီနဲ့ သရုပ်ဆောင်တွေ အကြောင်း ပြောနေတုန်းမှာ သွေးနီရောင် မန်ဒါလာ ဆီကနေ စွမ်းအင် အရိပ်အယောင်လေးတွေ ထွက်မလာခဲ့ရင် ဒီမိန်းကလေးက ဒီနေရာအထိ လိုက်လာခဲ့မှန်း သူ သတိထားမိမှာ မဟုတ်ပေ။

“သတင်းတွေ မကြားရတာ ကြာပြီလေ ကျွန်မက ရှင် နေကောင်းရဲ့လားဆိုတာ လာကြည့်လို့ မရဘူးလား” သွေးနီရောင် မန်ဒါလာ က သူမရဲ့ နှုတ်ခမ်းကို ကိုက်လိုက်ရင်း မနာလိုတဲ့ လေသံနဲ့ ချင်းလန်ကို စိုက်ကြည့်ကာ ပြောလိုက်လေသည်။

အထူးသဖြင့် ချင်းလန်က လေယာဉ်ပေါ် တက်ကတည်းက စကားတွေ အများကြီး ပြောခဲ့ပေမဲ့ သူမနဲ့ ပတ်သက်တဲ့ စကားတစ်လုံးမှ မပါတဲ့အတွက် သူမက ပိုပြီး မကျေမနပ် ဖြစ်နေခြင်း ဖြစ်သည်။

အကြောင်းပြချက် တစ်ခုခုကြောင့် သူမက သူမရဲ့ အဆင့်အတန်းနဲ့ နေရာကို ကောင်းကောင်း သိရှိထားပေသည်။

ဒါပေမဲ့ သူတို့ကို တိတ်တဆိတ် စောင့်ကြည့်နေတုန်းမှာ သူတို့က တခြား မိန်းကလေးတွေ အကြောင်းပဲ ပြောနေကြတာလေ... သူမကတော့ အဲ့ဒီ မိန်းကလေးတွေကို သတ်ပစ်ဖို့ အခွင့်အရေး ရှာချင်နေတာပင်ဖြစ်လေသည်။

ချင်းလန်က လက်လှမ်းလိုက်ပြီး သွေးနီရောင် မန်ဒါလာ ကို သူ၏ ရင်ခွင်ထဲသို့ ဆွဲသွင်းလိုက်လေသည်။ သူက သူမ၏ ပုခုံးပေါ်သို့ မေးစေ့တင်ကာ ရယ်မောလျက်

“မင်းက အပြင်မှာ တစ်ယောက်တည်း ကြာကြာ နေလိုက်ရလို့ စိတ်တွေ ပြန်ဖောက်နေတာလား”

ဟု မေးလိုက်၏။

“ရှင် ထင်ချင်သလို ထင်နိုင်ပါတယ်” သွေးနီရောင် မန်ဒါလာ က ပြန်မပြောဘဲ နေလိုက်လေသည်။

သူမက သူမရဲ့ ရင်ထဲမှာ ရှိနေတဲ့ အထီးကျန် ဆန်တဲ့ ခံစားချက်တွေ ပျောက်ကွယ်သွားပြီလို့ ထင်ခဲ့ပေမဲ့ တကယ်တော့ မပျောက်သေးပေ။

ချင်းလန် ပျောက်ဆုံးနေတဲ့ အချိန်တုန်းက သူမဟာ အိမ်ခြေမဲ့ တောကြောင်လေး တစ်ကောင်လို ဖြစ်နေခဲ့တာပင်။ ရည်မှန်းချက်တွေ ကင်းမဲ့ပြီး ကြောက်ရွံ့နေခဲ့လေသည်။

ဒါ့အပြင် ချင်းလန်ရဲ့ ဂရုစိုက်မှုကို ခံခဲ့ရဖူးတဲ့အတွက် သူမက ဒီခံစားချက်ကို ပိုပြီး တမ်းတနေမိတာ ဖြစ်လေသည်။

တစ်နည်းအားဖြင့် ချင်းလန် ပြောလိုက်တဲ့ စကားက သူမရဲ့ စိတ်ကို ထိခိုက်သွားစေခဲ့တာဖြစ်သည်။

ပုဂ္ဂလိက လေယာဉ်ပေါ်မှာ ဖြစ်တဲ့အတွက် အသံလုံလှပေသည်။

သွေးနီရောင် မန်ဒါလာ ရဲ့ ရင်ထဲက မကျေမနပ် ဖြစ်နေတဲ့ ခံစားချက်တွေက တဖြည်းဖြည်းနဲ့ ပျောက်ကွယ်သွားတော့သည်။ သူမ ဘာမှ မပြောတော့ဘဲ ချင်းလန်ရဲ့ ရင်ခွင်ထဲမှာ မှီတွယ်နေပြီး သူ့ကို တစ်ချက်တစ်ချက် မော့ကြည့်နေမိသည်။

စကားမပြောပေမဲ့ သူမရဲ့ အဓိပ္ပာယ်ကတော့ ရှင်းလင်းလှပေသည်။

“ရှင် တကယ်ပဲ လုပ်နိုင်မှာလား” လို့ မေးနေသလိုပါပဲ။

သူမရဲ့ မျက်ဝန်းတွေက သူမကို စိတ်ကြိုက် လုပ်နိုင်တယ် ဆိုတဲ့ အနေအထားမျိုး ဖြစ်နေလေသည်။

ချင်းလန်က သက်ပြင်းတစ်ချက် ချလိုက်ပြီး သွေးနီရောင် မန်ဒါလာ ရဲ့ ချောမွေ့ရှည်လျားတဲ့ ဆံပင်တွေကို ပုတ်ပေးလိုက်ကာ

“လူတစ်ယောက်မှာ အရိုး ၂၀၆ ချောင်း ရှိတယ်လို့ ပြောကြတယ်၊ ဒါပေမဲ့ မင်းနဲ့ တွေ့ပြီးတဲ့နောက်မှာတော့ ငါ့မှာ ၂၀၇ ချောင်း ဖြစ်သွားပြီ”

ဟု ရေရွတ်လိုက်တော့သည်။