အခန်း (၁၉၂) ကောင်မလေး ရင်ကွဲနာကျသွားပြီ

ချင်းလန်သည် နွားနို့ကို ဂရုတစိုက် တစ်ငုံချင်း သောက်ရင်း ပတ်ဝန်းကျင်ကို ဝေ့ကြည့်ကာ မေးမြန်းလိုက်လေသည်။ “မှိုအိမ်ကလေးမှာ ကွန်ပျူတာ ရှိလား”

ဇီဖုန်းက ခေါင်းညိတ်ပြပြီး “ရှိပါတယ် ဒါပေမဲ့ ထုတ်လုပ်ရေး အဖွဲ့ဆီက ကွန်ပျူတာ အများစုက အလုပ်အတွက် သုံးနေတာလေ။ ချင်းလန် ကွန်ပျူတာ လိုလို့လား။ သမီး သွားယူပေးမယ်” ဟု ဆိုလိုက်၏။

သူမသည် အခန်းထဲသို့ အပြေးပြန်သွားပြီး အနောက်ဘက်တွင် ကာတွန်းရုပ်ပုံလေးများ ပါရှိသည့် ပန်းရောင် ကွန်ပျူတာလေးကို အမြန် သယ်လာခဲ့လေသည်။

မကြာသေးမီက သူမသည် ဤဖျော်ဖြေရေး အစီအစဉ်ကို စိတ်ဝင်စားသည့်အပြင် အခြား ရုပ်ရှင် တစ်ခုတွင် ပါဝင် သရုပ်ဆောင်ရန်လည်း ဖိတ်ခေါ်ခြင်း ခံထားရသည်။ သူမသည် ရည်မှန်းချက် ကြီးမားသူ ဖြစ်သဖြင့် သရုပ်ဆောင် နည်းပညာများ လေ့လာရန်အတွက် ကွန်ပျူတာကိုပါ တစ်ပါတည်း ယူလာခဲ့ခြင်း ဖြစ်လေသည်။

“ဒါဆို ကျွန်တော် သုံးလိုက်မယ်” ချင်းလန်သည် စားပွဲတွင် ထိုင်ကာ ကွန်ပျူတာကို ဖွင့်လိုက်ပြီး ဇီဖုန်းကလည်း အနားသို့ လိုက်လာကာ လျှို့ဝှက်နံပါတ်ကို ရိုက်ထည့်ပေးလိုက်လေသည်။ ဖန်သားပြင် ပေါ်လာသည်နှင့် ရွှင်လန်းသော တေးဂီတသံများ ထွက်ပေါ်လာတော့သည်။

“တစ်နေ့ပြီးတစ်နေ့ တစ်နှစ်ပြီးတစ်နှစ်”

“ဝေဝါးနေတဲ့ ကလေးဘဝ”

…

ဖန်သားပြင်ပေါ်တွင် ပြီးခဲ့သည့် ညက ချင်းလန် ဂစ်တာတီးပြီး သီချင်းဆိုနေသည့် ဗီဒီယို ဖိုင်တစ်ခု ပွင့်နေခြင်း ဖြစ်လေသည်။

အင်း။

ဒါကို မြင်လိုက်ရသည်နှင့် ဇီဖုန်း၏ ပါးပြင်များမှာ ပန်းသီး တစ်လုံးကဲ့သို့ ချက်ချင်း နီရဲသွားတော့သည်။ သူမသည် မနေ့ညက အခန်းထဲတွင် ထိုဗီဒီယိုကို ပြန်ကြည့်နေရင်း ကွန်ပျူတာ ပိတ်ရန် မေ့သွားခဲ့ခြင်း ဖြစ်လေသည်။

“ငါတော့ အမိခံလိုက်ရပြီ”

“အရမ်း ရှက်ဖို့ကောင်းတာပဲ”

ချင်းလန်က ဟန်ဆောင်ပြီး “သီချင်းကတော့ ကောင်းပါတယ် ဒါပေမဲ့ ကျွန်တော့် အသံက သိပ်မကောင်းဘူး” ဟု ရယ်မောလျက် ဆိုလိုက်လေသည်။

ဇီဖုန်းက အလျင်အမြန် ခေါင်းခါပြကာ “မဟုတ်တာ မဟုတ်တာ ချင်းလန်။ မနေ့ညက ဒီသီချင်းကို ဆိုပြီးတဲ့နောက် အင်တာနက်ပေါ်မှာ ဘယ်လောက်တောင် နာမည်ကြီးသွားလဲဆိုတာ ရှင် မသိလို့ပါ။ ကြည့်ရှုသူ အရေအတွက် တစ်သန်းတောင် ကျော်နေပြီလေ။ သမီး ဒီဗီဒီယိုကို တိုက်ရိုက်ထုတ်လွှင့်မှု ပြီးတာနဲ့ အင်တာနက်ကနေ ရှာတွေ့ခဲ့တာ” ဟု ပြောလိုက်လေသည်။

“တကယ်ကြီး အဲ့လောက်တောင် ဖြစ်သွားတာလား” ချင်းလန်မှာ အနည်းငယ် အံ့အားသင့်သွားရသည်။

ထိုအချိန်တွင် ဒါရိုက်တာ ချန်သည် အပြင်မှ လမ်းလျှောက်ဝင်လာပြီး ၎င်းနှင့်အတူ မနက်ခင်း လေ့ကျင့်ခန်း လုပ်ရာမှ ပြန်လာသည့် စားဖိုမှူး ဟွမ်နှင့် ရှီယာတို့လည်း ပါလာကြလေသည်။

“ဘာတွေ ပြောနေကြတာလဲ” ဒါရိုက်တာ ချန်က မေးမြန်းလိုက်၏။

ဇီဖုန်းက စိတ်လှုပ်ရှားစွာဖြင့် “ဦးချန် ချင်းလန် မနေ့ညက ဆိုတဲ့ သီချင်းက အင်တာနက်မှာ အရမ်း နာမည်ကြီးနေတယ် မလား။ ကြည့်ရှုသူ တစ်သန်းတောင် ကျော်နေပြီ။ သမီး ပြောတာကို သူက မယုံဘူး ဖြစ်နေတယ်” ဟု ဆိုလေသည်။

တစ်သန်းတောင် ကျော်သွားပြီတဲ့လား။

ဤအချက်အလက်ကို ကြားလိုက်ရသည့်အခါ ဒါရိုက်တာ ချန်က အားရပါးရ ရယ်မောလိုက်ပြီး “ဇီဖုန်း မင်း အဲ့ဒီ အချက်အလက်ကို ဘယ်တုန်းက ကြည့်တာလဲ။ လွန်ခဲ့တဲ့ ငါးမိနစ်လောက်ကတင် ချင်းလန်ရဲ့ ကလေးဘဝ သီချင်းက ကြည့်ရှုသူ ဆယ်သန်း ကျော်သွားပြီ။ လူမှုကွန်ရက်ရဲ့ ထိပ်တန်း ခေါင်းစဉ်မှာလည်း နံပါတ်တစ် ဖြစ်နေတယ်။ လူတွေ ဘယ်လောက်များများက ချင်းလန်ကို အယ်လ်ဘမ် ထုတ်စေချင်ပြီး ဒီသီချင်းကို သွင်းစေချင်နေလဲဆိုတာ ငါတောင် သိချင်မိတယ်” ဟု ပြောလိုက်လေသည်။

ရှီယာက နှုတ်ခမ်းဆူပြကာ “ဂျူနီယာ မောင်လေး မင်းက တကယ်ကို တော်တာပဲ။ မင်းရဲ့ ပထမဆုံး ကိုယ်ပိုင်သီချင်းက ချက်ချင်းကို ပေါက်သွားတာပဲ” ဟု ဆိုလေသည်။

“ကံကောင်းလို့ပါ” ချင်းလန်က ပြုံးလျက် ပြန်ပြောလိုက်သော်လည်း သူကိုယ်တိုင်လည်း တကယ် အံ့အားသင့်နေမိသည်။

ကလေးဘဝ သီချင်း၏ လူကြိုက်များမှုသည် တစ်ညတည်းနှင့် ဤမျှအထိ မြင့်တက်သွားလိမ့်မည်ဟု သူ မမျှော်လင့်ထားခဲ့ပေ။

ဒါရိုက်တာ ချန်သည် ခဏမျှ တွန့်ဆုတ်နေပြီးမှ လိုရင်းကို တိုက်ရိုက် ပြောလိုက်လေသည်။ “ချင်းလန် မင်းအနေနဲ့ ဒီအစီအစဉ်မှာ အမြဲတမ်း ပါဝင်မယ့် ဧည့်သည် တစ်ယောက် ဖြစ်လာဖို့ စိတ်ဝင်စားလား”

ချင်းလန်တွင် ကြီးမားသော အလားအလာများ ရှိပေသည်။

သူ၏ လူအများ စိတ်ဝင်စားအောင် လုပ်နိုင်စွမ်းမှာ အံ့ဩစရာပင် ဖြစ်လေသည်။

မနေ့က လွမ်းဆွတ်ဖွယ် ဘဝ အစီအစဉ်၏ ပထမဆုံး အပိုင်းကို စတင် ပြသခဲ့ရာ အခြားသော ဖျော်ဖြေရေး အစီအစဉ်များအားလုံးကို အပြတ်အသတ် ကျော်ဖြတ်ပြီး ထိပ်ဆုံးသို့ ရောက်ရှိသွားခဲ့သည်။

ရှီယာ ပါဝင်နေခြင်းကလည်း အများကြီး အထောက်အကူ ဖြစ်စေခဲ့သည်မှာ အမှန်ပင်။

သို့သော် ချင်းလန်မှာလည်း အလွန် အရေးကြီးသည့် အချက်တစ်ချက် ဖြစ်နေလေသည်။

လူအများ ဆွေးနွေးစရာ ဖြစ်လာသည့် ခေါင်းစဉ် အားလုံးနီးပါးကို ချင်းလန် တစ်ယောက်တည်းက ဖန်တီးပေးခဲ့ခြင်း ဖြစ်ပြီး ၎င်းတို့ထဲတွင် နာမည်ကြီးသွားသည့် ကလေးဘဝ သီချင်းလည်း ပါဝင်ပေသည်။

ဤမျှ ငယ်ရွယ်သည့် လူငယ်တစ်ယောက်တွင် ဤကဲ့သို့ နက်ရှိုင်းသော အသိပညာများ ရှိနေလိမ့်မည်ဟု မည်သူမှ မထင်ထားခဲ့ကြပေ။

သူ၏ မိသားစု နောက်ခံက ထူးခြားလှသည်သာမက သူ၏ ကိုယ်ပိုင် အရည်အချင်းမှာလည်း အလွန်ပင် ကောင်းမွန်လှပေသည်။

စားဖိုမှူး ဟွမ်က ပြုံးလျက် ချင်းလန်၏ အဖြေကို စောင့်နေလေသည်။

ဘေးတွင် ရပ်နေသည့် ဇီဖုန်းမှာမူ စိုးရိမ်စိတ်ကြောင့် လက်ကလေးများကို တင်းတင်းဆုပ်ထားမိရာ လက်ထိပ်လေးများ ဖြူဖပ်သွားသည်အထိပင် ဖြစ်လေသည်။

သူမသည် ချင်းလန်ကို ဆက်နေစေချင်သော်လည်း သူက သဘောမတူမှာကိုလည်း စိုးရိမ်နေမိသည်။

“ဒါရိုက်တာ ချန်ရဲ့ စေတနာကို ကျေးဇူးတင်ပါတယ် ဒါပေမဲ့ ကျွန်တော်က ဒီနယ်ပယ်မှာ အလုပ်လုပ်ဖို့ အစီအစဉ် မရှိဘူး။ အမြဲတမ်း ပါဝင်မယ့် ဧည့်သည် နေရာကိုတော့ ငြင်းပယ်ပါရစေ” ချင်းလန်က ပြုံးလျက် ငြင်းပယ်လိုက်လေသည်။

ဒါရိုက်တာ ချန်၏ မျက်နှာမှာ ညှိုးငယ်သွားရသည်။ သူသည် ဤကဲ့သို့ ဖြစ်လာမည်ဟု ကြိုတင် ခန့်မှန်းထားပြီးသား ဖြစ်လေသည်။

ဆရာ ဟယ်နှင့် စားဖိုမှူး ဟွမ်တို့ကလည်း နှမြောတသ ဖြစ်သွားကြရသည်။

ဇီဖုန်းမှာမူ ဘာစကားမှ မပြောတော့ဘဲ နှုတ်ခမ်းလေး ဆူကာ သူမ၏ အခန်းထဲသို့ ခေါင်းငုံ့ပြီး ဝင်သွားတော့သည်။

သူမ၏ စိတ်ထဲတွင် ခံစားနေရသည့် ဝမ်းနည်းမှုများကို မည်သူ့ကိုမှ ထုတ်မပြောနိုင်ခဲ့ပေ။

…

မိနစ်အနည်းငယ် ကြာပြီးနောက်

ဒါရိုက်တာ ချန် ထွက်သွားသည်နှင့် ထုတ်လုပ်ရေး အဖွဲ့သားများသည် အခန်းထဲတွင် ကင်မရာ ပစ္စည်းများကို အမြန် ပြင်ဆင်လိုက်ကြလေသည်။

မကြာမီမှာပင် မှောင်နေသည့် တိုက်ရိုက်ထုတ်လွှင့်မှု အခန်းထဲတွင် ပုံရိပ်များ ပေါ်လာတော့သည်။

မနက်စောစော ဖြစ်သော်လည်း ကြည့်ရှုသူ အများအပြားမှာ စောင့်ဆိုင်းနေကြပြီ ဖြစ်သည်။ တိုက်ရိုက်ထုတ်လွှင့်မှု စသည်နှင့် ကြည့်ရှုသူ အရေအတွက်မှာ လျင်မြန်စွာ မြင့်တက်လာလေသည်။

ငါးထောင်

တစ်သောင်း

ငါးသောင်း

…

ရှစ်သိန်း

“ဝါး မနက်စောစောမှာ ငါ့ယောကျ်ားကို အရင်ဆုံး မြင်လိုက်ရတာပဲ သူက အရမ်း ချောတာပဲ။ အိပ်ယာဝင် ဝတ်စုံလေးနဲ့ ကြည့်ရတာ အရမ်း ချစ်ဖို့ကောင်းတယ် သူ့ကို ဖက်ပြီး နမ်းပစ်လိုက်ချင်တာပဲ”

“ငါ့အဖေက အလုပ်ရှုပ်နေမှာပေါ့။ ဟိုးအပေါ်က အလှလေးရေ လာပါ ငါ့ဆီကို”

“ရှက်ဖို့ကောင်းလိုက်တာ။ ငါသာ အစကတည်းက သိရင် ငါ့ယောကျ်ားကို ကာကွယ်ဖို့ တစ်ခုခု လုပ်ခိုင်းမှာပေါ့”

“ချင်းလန်ရဲ့ အချက်အလက်တွေကို အင်တာနက်မှာ ရှာကြည့်တာ ဒီအစီအစဉ်က ဗီဒီယိုကလွဲရင် ဘာမှ မရှိဘူး။ သူ့ရဲ့ ကိုယ်ပိုင် စာမျက်နှာတောင် မရှိဘူးနော်”

“သောက်ကျိုးနည်း ငါလည်း အခုပဲ ရှာကြည့်တာ မတွေ့ဘူး။ ဒါက တကယ့်ကို အံ့ဩစရာပဲ။ သူက သာမန်လူ တစ်ယောက်လို့ ပြောပေမဲ့ ဒီလောက် နာမည်ကြီးတဲ့ အစီအစဉ်မှာ ပါနေတာတောင် ကိုယ်ပိုင် စာမျက်နှာ မရှိဘူး ဆိုတာ ထူးဆန်းတယ်”

“ကလေးဘဝ သီချင်းကတော့ နေရာအနှံ့ ပေါက်နေပြီ ဘယ်ကနေ ဘယ်လို ပေါ်လာမှန်းတောင် မသိဘူး။ ဒါပေမဲ့ အဲ့ဒီ သီချင်းကို ရေးတဲ့သူက ကိုယ်ပိုင် စာမျက်နှာ မရှိဘူးတဲ့လား”

တိုက်ရိုက်ထုတ်လွှင့်မှု စသည်နှင့် စကားပြောခန်းတွင် မှတ်ချက်များစွာနှင့် ပြည့်နှက်သွားတော့သည်။

ဒါရိုက်တာ ချန်သည် ဖန်သားပြင်၏ အနောက်တွင် ထိုင်ကာ မနက်ခင်း လက်ဖက်ရည် သောက်ရင်း စိတ်ထဲတွင် တစ်မျိုး ခံစားနေရသည်။ ဖန်သားပြင်ပေါ်မှ မှတ်ချက် အားလုံးနီးပါးမှာ ချင်းလန် အကြောင်း ဖြစ်နေသောကြောင့် ဖြစ်လေသည်။

အမှန်တကယ်တွင် ချင်းလန်သည် ယနေ့တွင် ထွက်ခွာသွားတော့မည် ဖြစ်ရာ ပရိသတ်များက မကျေမနပ် ဖြစ်ပြီး သူ့ကို ပြင်းပြင်းထန်ထန် ဝေဖန်ကြပေလိမ့်မည်။

ဤကိစ္စအတွက် အပြစ်ပုံချခြင်း ခံရမည့်သူမှာ သူ၏ အစီအစဉ် ထုတ်လုပ်ရေး အဖွဲ့သာ ဖြစ်လေသည်။

မှိုအိမ်ကလေး အတွင်းတွင်မူ ရှီယာသည် သူမ၏ မေးစေ့ကို လက်နှင့် ထောက်ကာ ချင်းလန်၏ ဘေးတွင် စိတ်ရှည်စွာ ထိုင်နေလေသည်။ သူမသည် ကွန်ပျူတာ ဖန်သားပြင်ကို စိုက်ကြည့်ရင်း “မောင်လေး ဘာတွေ ရေးနေတာလဲ” ဟု သံသယဖြင့် မေးမြန်းလိုက်၏။

ချင်းလန်က သူမကို တစ်ချက် ကြည့်လိုက်ကာ “ဘာလို့ ထင်လို့လဲ။ ဘယ်သူကများ ဒီရက်ပိုင်း ရုပ်ရှင် ကမ်းလှမ်းချက် ကောင်းကောင်းတွေ မရှိဘူးလို့ ပြောခဲ့တာလဲ။ ပြီးတော့ ဘယ်သူကများ အဲ့ဒီ ပစ္စည်းတွေကို ကြော်ငြာရတော့မယ်လို့ ပြောခဲ့တာလဲ” ဟု ဆိုလိုက်လေသည်။

“တကယ်လို့ ငါ ရုပ်ရှင် စာချုပ် ကောင်းကောင်း တစ်ခု မရရင် နောင်ကျရင် မင်းက တခြားသူတွေဆီမှာ ကိုယ့်ကိုယ်ကိုယ် ရောင်းစားနေဦးမှာ မဟုတ်ဘူးလား”

“ဒါဆို ဒါက ဝတ္ထု ဇာတ်ညွှန်း ပေါ့”

အကြောင်းပြချက် တစ်ခုခုကြောင့် ရှီယာသည် ဆူပူကြိမ်းမောင်း ခံနေရသော်လည်း စိတ်မဆိုးသည့်အပြင် သူမ၏ စိတ်ထဲတွင် နွေးထွေးမှုကို ခံစားလိုက်ရသည်။

မနေ့ညက သူမ ပြောခဲ့သည့် စကားလေး တစ်ခွန်းကြောင့် ချင်းလန်သည် ယနေ့ မနက်စောစောမှာပင် ဇာတ်ညွှန်း စရေးပေးနေခြင်း ဖြစ်လေသည်။

သူမအနေဖြင့် ရှနယ်လ် ကြော်ငြာကို မရိုက်စေချင်သောကြောင့် ဖြစ်မည်။

ချင်းလန်၏ စိတ်ထဲတွင် သူမက ဧကရီ တစ်ယောက် ဖြစ်လာနိုင်သည့် အလားအလာ ရှိနေဆဲပင် ဖြစ်လေသည်။

“အချစ် ဇာတ်လမ်းလား ဒါမှမဟုတ် မိသားစု ဇာတ်လမ်းလား” ရှီယာက သိချင်စိတ် ပြင်းပြနေသည့် ကလေး တစ်ယောက်ကဲ့သို့ ဆက်လက် မေးမြန်းလိုက်၏။

ဤဇာတ်လမ်း အမျိုးအစား နှစ်ခုမှာ ယနေ့ခေတ် ဖျော်ဖြေရေး လောကတွင် အလွန် လူကြိုက်များလေသည်။ ရှီယာသည် အချစ် ဇာတ်လမ်းများနှင့် အနုပညာ လောကထဲသို့ စတင် ဝင်ရောက်ခဲ့ပြီး ထိပ်တန်း ကြယ်ပွင့် တစ်ဦး ဖြစ်လာခဲ့ခြင်း ဖြစ်လေသည်။

ချင်းလန်က ခေါင်းခါပြလိုက်ကာ “ဘယ်ဟာမှ မဟုတ်ဘူး ဒါက သိုင်းလောက အကြောင်းပဲ” ဟု ဆိုလေသည်။

ရှီယာက စေတနာဖြင့် “ချင်းလန် ဒီရက်ပိုင်းမှာ သိုင်းဇာတ်လမ်းတွေက ဈေးကွက် မကောင်းဘူးနော်။ နာမည်ကြီး သိုင်းဝတ္ထုတွေကို ရုပ်သံ ဇာတ်လမ်းတွဲ အဖြစ် ပြန်ရိုက်တာတွေ အကုန်လုံး ရှုံးကုန်ကြတာ။ အချစ် ဇာတ်လမ်းတွေနဲ့ စုံထောက် ဇာတ်လမ်းတွေကမှ နည်းနည်း တော်သေးတယ် အနည်းဆုံးတော့ နာမည် မပျက်ဘူးလေ” ဟု သတိပေးလိုက်လေသည်။

ချင်းလန်က ခေါင်းခါပြလိုက်ကာ “မင်း စိုးရိမ်နေစရာ မလိုပါဘူး။ ငါက ဝတ္ထု ရေးနေတာပဲ ရှိသေးတာ” ဟု ဆိုလိုက်၏။

“လုံးဝ ရှုံးသွားမလား ဒါမှမဟုတ် အရမ်း နာမည်ကြီးသွားမလား ဆိုတာတော့ ကြည့်ရမှာပေါ့”

“ငါကတော့ ဒီဇာတ်လမ်းကို သေချာပေါက် ရိုက်မှာပဲ။ တကယ်လို့ မင်း သရုပ်မဆောင်ချင်ရင်လည်း ငါ အတင်း အကျပ် မခိုင်းပါဘူး”

ဒါ့အပြင် ဒါကို တကယ်ပဲ ဘယ်သူမှ မကြည့်ကြဘူး ဆိုတာ ဟုတ်လို့လား။

သိုင်းဝတ္ထု လောကတွင် မစ္စတာ ကျင်းယုံ၏ လွှမ်းမိုးမှုမှာ မည်မျှအထိ ကြီးမားသနည်း။ ဤဝတ္ထုများကို ရုပ်ရှင်နှင့် ရုပ်သံ ဇာတ်လမ်းတွဲများ အဖြစ် အကြိမ်ပေါင်း မည်မျှအထိ ပြန်လည် ရိုက်ကူးခဲ့ကြသနည်း။ မစ္စတာ ကျင်းယုံတစ်ခါမှ မပေါ်လာဖူးသေးတဲ့ ဒီကမ္ဘာမှာ ဆိုရင်တော့ ပြောနေစရာပင် မလိုတော့ပေ။

“သရုပ်ဆောင်မှာပေါ့ ဘာလို့ သရုပ်မဆောင်ရမှာလဲ။ တစ်ယောက်ယောက်က ပိုက်ဆံ အကုန်ခံချင်နေမှတော့ ငါကလည်း အဲ့ဒီ လစာကို ယူရမှာပေါ့။ ဘယ်သူကများ ပိုက်ဆံ အများကြီး ရတာကို မလိုချင်ဘဲ နေမှာလဲ” ရှီယာက ချင်းလန်ကို ဆွဲဆောင်မှု ရှိသော အကြည့်ဖြင့် ကြည့်လိုက်လေသည်။

ချင်းလန်က ရုပ်ရှင်အတွက် ရင်းနှီးမြှုပ်နှံပေးမည် ဖြစ်သလို ဇာတ်ညွှန်းကိုလည်း ကိုယ်တိုင် ရေးထားခြင်း ဖြစ်သဖြင့် အမြဲတမ်း အနီးကပ် ကြီးကြပ်နေပေလိမ့်မည်။

သူမက အဓိက မင်းသမီး အဖြစ် သရုပ်ဆောင်မည် ဆိုလျှင် ရိုက်ကူးရေး ကွင်းထဲတွင် ချင်းလန်နှင့် အတူရှိရန် အချိန်များစွာ ရရှိမည် မဟုတ်ပါလား။

ဒါက သူမအတွက်တော့ အကောင်းဆုံးပင် ဖြစ်လေသည်။

ချင်းလန်သည် စာရိုက်နေခြင်းကို ရပ်လိုက်ကာ ခေါင်းလှည့်ပြီး “မေးဖို့ မေ့နေတာ မင်း အခု ရုပ်သံ ဇာတ်လမ်းတွဲ တစ်ခုမှာ သရုပ်ဆောင်ရင် လစာ ဘယ်လောက် ရလဲ” ဟု စပ်စုလိုက်လေသည်။