အခန်း (၁၄၇) ချန်ဖျင်အန်း အထဲမှာ ဘယ်လိုများနေ နေမလဲ

ချင်းလန် ကသူမကို စိတ်မလှုပ်ရှားစေတော့ဖို့ ဆုံးဖြတ်လိုက်ပြီး မက်ဆေ့ခ်ျ တစ်စောင်နဲ့ ပြန်ဖြေလိုက်လေသည်။

 “လမ်းမှာမို့လို့၊ ပြန်ဖြေဖို့ မေ့သွားတာ။ မင်း ကိုယ်နဲ့ စကားမပြောချင်တော့ဘူးလို့ ထင်နေတာ။”

ကျိုးဇယ်ချင်းက

“ရှင် ဘာတွေ တွေးနေတာလဲ ကျွန်မက ဘယ်လိုလုပ် ရှင်နဲ့ စကားမပြောချင်ဘဲ နေမှာလဲ ကျွန်မရဲ့ ကျေးဇူးရှင်ပဲဟာ ကျွန်မ ထင်နေတာ ရှင် တကယ် စိတ်ဆိုးပြီး၊ ကျွန်မ မက်ဆေ့ခ်ျတွေကို ပြန်မဖြေတာလို့”

“နေပါဦး၊ ရှင် ဘာလို့ ဒီလောက် စောစော ပြန်ရောက်နေတာလဲ ဦးလေးနဲ့ အန်တီက ညစာ စားသွားဖို့ မဖိတ်ဘူးလား ဒါမှမဟုတ် သူတို့ ဒီရက်ပိုင်း ဆိုင်ခန်းသစ် ရှာနေလို့ အိမ်မှာ မရှိကြတာလား”

လင်းရှီးအာ နဲ့ ကျိုးဇယ်ချင်း က ဆက်ဆံရေး အရမ်း ကောင်းမွန်ကြပြီး၊ သတင်းအချက်အလက်တွေကို အပြန်အလှန် မျှဝေတတ်ကြလေသည်။

သူတို့ ဆိုင်ခန်းနေရာသစ် ရှာနေကြတယ် ဆိုတဲ့ အချက်ကို ဖုံးကွယ်မထားခဲ့ပေ။

“ဦးလေးနဲ့ အန်တီ အိမ်မှာ မရှိရင်တောင်၊ ရှီးအာ ချက်ပြုတ်နိုင်ပါသေးတယ်။ အိမ်မှာ လိုအပ်တာတွေ အကုန် ရှိတယ်၊ ပြီးတော့ ရှီးအာ ချက်တဲ့ ခေါက်ဆွဲက အရသာ ရှိတယ်။”

ချင်းလန် တခစ်ခစ် ရယ်မောလိုက်လေသည်။

 “ရှီးအာ ကို ကျွန်တော့်အတွက် ခေါက်ဆွဲ ချက်ကျွေးစေချင်တာလား”

“တကယ်တော့၊ ကျွန်မ အဲ့လောက်ကြီး မမျှော်လင့်ပါဘူး၊ ဒါကြောင့် ရှီးအာ ကို ဒုက္ခမပေးတော့ပါဘူး။”

သူတို့နှစ်ယောက် ဟိုအကြောင်း ဒီအကြောင်း စကားစမြည် ပြောနေကြရင်း၊ တစ်ခဏတာတော့၊ ချင်းလန် သူ့ဘဝဟောင်း တက္ကသိုလ်တက်တုန်းက ရည်းစားနဲ့ ချိန်းတွေ့ခဲ့တဲ့ အချိန်တွေကို ပြန်ရောက်သွားသလို ခံစားလိုက်ရလေသည်။

ရိုးရိုးသားသား ပြောရရင်၊ ကျိုးဇယ်ချင်း ရဲ့ ချက်ချင်း စာပြန်တတ်တဲ့ အကျင့်လေးက တော်တော် ကောင်းတာပဲ။

ဗီလာကို ပြန်ရောက်တော့၊ ချင်းလန် ဆိုဖာပေါ် ထိုင်ပြီး၊ ဖုန်းကို ဘေးဖယ်ထားကာ၊ သူ့ဘေးနားမှာ ရပ်နေတဲ့ ကျွင်းဇီ ကို ကြည့်ပြီး လေးလေးနက်နက် ပြောလိုက်လေသည်။ 

“ကိစ္စက ဘယ်လို ရှိလဲ ဒီရက်ပိုင်း မင်းတို့ကို ချန်ဖျင်အန်း နောက် မလိုက်ခိုင်းတာနဲ့၊ အပျင်းထူနေကြတာတော့ မဟုတ်ပါဘူးနော်”

ပြီးခဲ့တဲ့ ရွေးချယ်ခံ ရဲ့ဖန် သေမသွားခင်တုန်းက ကျွင်းဇီ နဲ့ သူ့အဖွဲ့က ၂၄ နာရီပတ်လုံး သုံးဆိုင်းခွဲပြီး အလုပ်လုပ်ခဲ့ရတာ၊ ပင်ပန်းလွန်းလို့ သေမတတ်ပဲ။

ချန်ဖျင်အန်း အလှည့် ရောက်တော့၊ သူတို့ကရက်အနည်းငယ်ခြား တစ်ခါလောက်ပဲ သွားကြည့်ရလေသည်။ဘာလို့ဆို သူကထောင်ထမင်းစားနေရတာကိုး။ 

သူ ဘယ်သွားလဲ လိုက်ကြည့်စရာ မလိုတော့ပေ ဒါကြောင့် ကျွင်းဇီ တို့ကို ပေးထားတဲ့ တာဝန်က ချန်ဖျင်အန်း နောက်လိုက်ဖို့ မဟုတ်တော့။

အခု ကိစ္စအတော်များများ ပြီးသွားပြီ ဆိုတော့၊ နောက်ဆက်တွဲ ဘာလုပ်ရမလဲ ဆိုတာ စီစဉ်ရမယ့် အချိန် ရောက်ပြီ။

ကျွင်းဇီ ခေါင်းကို အမြန် ခါလိုက်လေသည်။

 “ဘယ်လိုလုပ် ဖြစ်နိုင်မှာလဲ ဘာမှ လုပ်စရာ မရှိရင်တောင်၊ ညီအစ်ကိုတွေ အရည်အချင်း မကျသွားအောင် လေ့ကျင့်ပေးဖို့ ကျွန်တော် စီစဉ်ထားပါတယ်။”

“ဒါ့အပြင်၊ သခင်လေး ရှာခိုင်းတဲ့ လူအိုကြီးကို တွေ့ပါပြီ။ အဲ့ဒီ လူအိုကြီးက သာမန်လူ မဟုတ်ဘူး သူက မီတာ ရာပေါင်းများစွာ အမြင့်မှာ ပျံသန်းနေတဲ့ ဒရုန်း ကို လှမ်းမြင်နိုင်ပြီး၊ ကျွန်တော်တို့ကို ဆက်တိုက် စိုက်ကြည့်နေတာ။”

“ဒါတင် မကဘူး၊ ကျွန်တော်တို့ ဒရုန်း အစင်းအနည်းငယ်ကို အဲ့ဒီ လူအိုကြီးက ပစ်ချလိုက်သေးတယ်။ ကံကောင်းလို့၊ ပုံရိပ်တွေက အချိန်နဲ့တပြေးညီ ပေးပို့နေတာ၊ မဟုတ်ရင် ကျွန်တော်တို့ သူ့ရဲ့ လှုပ်ရှားမှုတွေကို အဝေးကနေ ခြေရာခံနိုင်မှာ မဟုတ်ဘူး။”

“အဲ့ဒီနေ့ကဗီဒီယိုမှာ မြင်ခဲ့ရတဲ့ လူအိုကြီးကို ပြန်စဉ်းစားကြည့်ရင် ခံစားမိတာက တစ်ချက်ကြည့်လိုက်ရုံနဲ့တင် သူက သာမန်လူ မဟုတ်ဘူး ဆိုတာ သိသာတယ်၊ ဒရုန်းကို ကျောက်ခဲနဲ့ ပစ်ချနိုင်တဲ့ စွမ်းရည် ဆိုရင် ပြောမနေနဲ့တော့”

ချင်းလန် မျက်မှောင်ကြုတ်လိုက်လေသည်။

 “နောက်ဆက်တွဲ ကိစ္စတွေကို ရှင်းပြီးပြီလား”

ကျွင်းဇီ နဲ့ အဖွဲ့ကို စုံစမ်းဖို့ လွှတ်လိုက်တဲ့ လူအိုကြီးက သဘာဝကျကျ ချန်ဖျင်အန်း ရဲ့ ဆရာပင်။

မူရင်း ဝတ္ထုထဲမှာ၊ သူက အစောပိုင်း အဆင့်တွေမှာ ချန်ဖျင်အန်း ထက်တောင် ပိုစွမ်းအားကြီးတဲ့ သူတစ်ယောက်ဖြစ်လေသည်။

ပြီးခဲ့တဲ့ ကံဆိုးတဲ့ ကောင် ရဲ့ဖန် တုန်းက သူ့ရဲ့ ဝှက်ဖဲက သွေးဝံပုလွေ ကြေးစားစစ်သည် အဖွဲ့လေ။ သူတို့က ပြည်ပမှာ အခြေစိုက်ထားတာမို့ လုံးဝ ဝင်လာလို့ မရခဲ့ဘူး။

ဒါပေမဲ့ အခု ချန်ဖျင်အန်း ရဲ့ နောက်ခံလူက တရုတ်ပြည်ထဲမှာ ရှိနေတော့ သူ သဘာဝကျကျ မျက်ခြေမပြတ် စောင့်ကြည့်ဖို့ လိုတယ်၊ မဟုတ်ရင် ပြဿနာ အကြီးအကျယ် တက်နိုင်လေသည်။ 

ကျွင်းဇီ အမြန် ပြန်ဖြေလိုက်လေသည်။

 “သေချာပေါက် ဖြေရှင်းပြီးပါပြီ။ ဒရုန်း ပျက်ကျသွားပြီးတော့ ကျွန်တော် ဒေသခံ လမ်းတံတား စီမံခန့်ခွဲရေးရုံး က လူတွေကို ချက်ချင်း လွှတ်ပြီး စုံစမ်းခိုင်းလိုက်တယ်။ ကျွန်တော်တို့ အဲ့ဒီ လူအိုကြီးကို ပြည်သူပိုင် ပစ္စည်းတွေကို ယုတ်မာတဲ့ ရည်ရွယ်ချက်နဲ့ ဖျက်ဆီးမှု၊ မြေပြင် တိုင်းတာရေး လုပ်ငန်းကို နှောင့်ယှက်မှုတွေနဲ့ တိုင်ကြားလိုက်တယ်။ မူလက ကျွန်တော်တို့ သူ့ကို ဖမ်းဆီးပြီး ရက်အနည်းငယ်လောက် ထိန်းသိမ်းထားမလို့ပါ၊ ဒါပေမဲ့ အဲ့ဒီ လူအိုကြီးက တခြား ဘယ်သူ့ထက်မဆို မြန်မြန် ထွက်ပြေးသွားလို့၊ ကျွန်တော်တို့ သူ့ကို မဖမ်းမိလိုက်ဘူး”

ဘုရားရေ......

မင်း ပညာပြည့်ဝသွားပြီပဲ။

ချင်းလန် ကျွင်းဇီ ကို အံ့ဩမှု အတော်အတန်နဲ့ စိုက်ကြည့်နေမိလေသည်။ ဒီကောင် သူသိထားတဲ့ အရည်အချင်းတွေ အကုန်လုံး သင်ယူသွားသလို ခံစားလိုက်ရသည်။

သူ မသိမသာနဲ့ အနာဂတ် ဗီလိန်တစ်ယောက်ကို ပြုစုပျိုးထောင်နေမိတာများလား။

“ကောင်းတယ်။ ငါတို့ အကြီးအကဲဂျီ ရဲ့ တည်နေရာကို အကြမ်းဖျင်း သတ်မှတ်နိုင်ခဲ့ပြီ။ အခု လိုတာက သူ့ဓာတ်ပုံပဲ။”

ချင်းလန် သူ့ရင်ဘတ်ထဲကနေ ရိုးတွင်းခြင်ဆီ သန့်စင်ဆေးလုံးတစ်လုံး ထုတ်လိုက်သလို လုပ်ပြပြီး၊ တကယ်တမ်းကျတော့ သူ့ရဲ့ စနစ် ကျောပိုးအိတ် ထဲကနေ ထုတ်ပြီး ကျွင်းဇီ ဆီ ပစ်ပေးလိုက်လေသည်။

 “ဒီပစ္စည်းကို ဈေးကြီးပေးပြီး ဝယ်ထားတာ။ သူက မင်းရဲ့ ရိုးတွင်းခြင်ဆီကို သန့်စင်ပေးနိုင်ပြီး၊ မင်းရဲ့ ရုပ်ပိုင်းဆိုင်ရာ အခြေအနေကို နောက်တစ်ဆင့် မြှင့်တင်ပေးနိုင်တယ်။ မင်းက အပြင်မှာ အမြဲ သွားလာလှုပ်ရှားနေရတာ ဆိုတော့၊ ဘေးကင်းအောင် မင်း ပိုသန်မာလေ ပိုကောင်းလေပဲ။”

“သခင်လေး၊ ဒါ မဖြစ်ပါဘူး! ကျွန်တော်က ဒီလို ဈေးကြီးတဲ့ ဆေးလုံးတွေနဲ့ မထိုက်တန်ပါဘူး။ ကျွန်တော် ဒါကို လက်မခံနိုင်ပါဘူး”

ဟန်ဆောင် ငြင်းပယ်ပြီးနောက်၊ ကျွင်းဇီ ရိုးတွင်းခြင်ဆီ သန့်စင်ဆေးလုံး ကို သူ့အိတ်ကပ်ထဲ ထိုးထည့်လိုက်ပြီး၊ မျက်နှာပေါ်မှာ ကျေးဇူးတင်ရှိမှုတွေ အပြည့်နဲ့ ဖြစ်နေလေသည်။

ချင်းလန် မျက်လုံး လှန်ကြည့်လိုက်ပြီး လက်ဝှေ့ယမ်းပြလိုက်လေသည်။ 

“တော်စမ်းပါ၊ ထွက်သွားတော့ လုပ်စရာ ရှိတာ သွားလုပ်၊ တနေ့ကုန် ငါ ဘာတွေးနေလဲ ဆိုတာ လိုက်စဉ်းစားမနေနဲ့။”

ကျွင်းဇီ တခစ်ခစ် ရယ်မောလိုက်ပြီး၊ ခေါင်းကုတ်ကာ၊ ဆေးလုံးကို အိတ်ကပ်ထဲ သေချာ ထည့်ပြီး၊ ပြုံးဖြီးဖြီးနဲ့ ပျော်ရွှင်စွာ ထွက်ခွာသွားလေသည်။

“ဘာလို့လဲ...”

ချင်းလန် ဆိုဖာပေါ် လှဲပြီး သက်ပြင်းချလိုက်လေသည်။

ဝေဖန်မှုတွေ ရှိပေမယ့်၊ ကျွင်းဇီ ရဲ့ လုပ်ရပ်တွေက သူ့ရဲ့ သဘောကျမှုကို ရရှိခဲ့လေသည်။

သူ ဗီလိန်အကြီးစား တစ်ယောက်ကို လေ့ကျင့်ပေးချင်ရင် ပေးပါစေလေ။ အနည်းဆုံးတော့ သူ ကိုယ်တိုင် အရာအားလုံး လုပ်စရာ မလိုတော့ဘူးပေါ့။ ကျွင်းဇီ ရှိနေရင်၊ သူ အမိန့်ပေးစရာ မလိုဘဲ အရာအားလုံးကို ပြီးပြည့်စုံအောင် ကိုင်တွယ်နိုင်မှာ။

သစ္စာရှိမှု အတွက် သူ သိပ်မပူပေမယ့် အာဏာကို လူတစ်ယောက်တည်း လက်ထဲမှာ အမြဲ စုပြုံထားတာက လုံးဝ သင့်လျော်တာတော့ မဟုတ်ပေ။

တကယ်လို့ ကျွင်းဇီ သစ္စာဖောက်မှာကို မစိုးရိမ်ရင်တောင်၊ သူ အမှားလုပ်မိမှာနဲ့ ကြီးလေးတဲ့ အမှားတွေ ကျူးလွန်မိမှာကို ကာကွယ်ဖို့ လိုအပ်လေသည်။

ဒါပေမဲ့ အခု၊ ကျွင်းဇီ ကလွဲရင်၊ သူ့ဘေးနားမှာ ဘယ်သူမှ ကျွင်းဇီရဲ့ အင်အားနဲ့ မယှဉ်နိုင်သေးပေ။

သူ့ကို ရင်ဆိုင်နိုင်တဲ့ တစ်ဦးတည်းသော သူက နောက်ပိုင်းမှ သူတို့နဲ့ လာပူးပေါင်းတဲ့ သွေးနီရောင် မန်ဒါလာ ပင်။

ဒီအမျိုးသမီးက အေးစက်ပြီး ခပ်တန်းတန်း နေတတ်တယ်၊ ကြီးကျယ်တဲ့ ကိစ္စတွေ လုပ်ဆောင်ဖို့ ကံပါလာတဲ့ သူတွေလိုပင်။

ဒါပေမဲ့ လက်တွေ့မှာတော့၊ သူမက လုံးဝ တည်ငြိမ်မှု မရှိဘဲ၊ တော်တော်လေး မဆင်မခြင် လုပ်တတ်လေသည်။

တခြားအရာတွေ ဘေးဖယ်ထားလိုက်ဦး ဒီကာလအတွင်း သူမရဲ့ လုပ်ရပ်တွေ တစ်ခုတည်းနဲ့တင် ချင်းလန် ကို အံ့ဩမှင်သက်စေခဲ့လေသည်။

ပထမတုန်းက၊ သွေးနီရောင် မန်ဒါလာ က လုပ်ကြံသတ်ဖြတ်သူ တစ်ယောက်ရဲ့ ဂုဏ်သိက္ခာကို ထိန်းသိမ်းဖို့ သူ့ကို သတ်ချင်ခဲ့တယ်၊ ဒါပေမဲ့ နောက်ပိုင်းကျတော့ သူမ ညတိုင်း ရောက်လာပြီး၊ သူ့ကို သတ်ချင်တယ် လို့ ပြောပေမယ့်၊ ချင်းလန် ခံစားရတာက သွေးနီရောင် မန်ဒါလာ က အိမ်တိုင်ရာရောက် ဝန်ဆောင်မှု လာပေးနေသလိုပဲ။

အဲ့ဒါ သောက်ရမ်း လွန်လွန်းတယ်။

“ပိုက်ကွန် သိမ်းရမယ့် အချိန်ရောက်ရင်၊ သိမ်းရမှာပေါ့။”

ချင်းလန် ခေါင်းကို ဆိုဖာပေါ် မှီချလိုက်ပြီး၊ အာဏာ ခွဲဝေပေးတဲ့ ကိစ္စကို ခေတ္တ ဘေးဖယ်ထားကာ၊ တိုးတိုးလေး ပြောလိုက်လေသည်။

လက်ရှိမှာတော့၊ သူက ကံကောင်းခြင်းတွေ ပိုင်ဆိုင်ထားတဲ့ အမျိုးသမီးတွေ အားလုံးကို သူနဲ့ ဆက်သွယ်ထားပြီးပြီ၊ ချန်ဖျင်အန်း မပါဝင်ရင်တောင်၊ ရလဒ်က အဖြေထွက်ပြီးသားပင်။

ချန်ဖျင်အန်း ကို အနားမှာ ဆက်ထားတာက ကပ်ဘေးတစ်ခု ဖြစ်လာရုံပဲ ရှိမှာဖြစ်သည်။

ပြဿနာ တစ်ခုကို ဖြေရှင်းရမယ့် အချိန်ရောက်ရင်၊ ဖြေရှင်းပစ်ဖို့ လိုတယ်။

ချန်ဖျင်အန်း ကို သတ်လိုက်ရင် သူ ဘယ်လောက် အမြတ်ရမလဲ သူတွေးမိလေသည်။

နောက်ထပ် ရွေးချယ်ခံက ဘယ်လို လူစားမျိုး ဖြစ်မလဲ ဖျော်ဖြေရေး လောကသားလား၊ စစ်သား ဘုရင်လား၊ နတ်သမားတော်လား၊ ညီအစ်မ ခုနစ်ဖော်လား၊ စစ်ဘုရားသခင်ရဲ့ ဇနီးသည် ပြည့်တန်ဆာအိမ် ရောက်သွားတာလား၊ ဒါမှမဟုတ် ကောင်းကင်ဘုံသားတော် ပြန်လာတာလား။

ဒီအချိန်ဆို အန်းအန်း  ထောင်ထဲမှာ အိပ်ပျော်နေမလား သူတွေးမိလေသည်။

လွန်ခဲ့တဲ့ ရက်ပိုင်းက သတင်းခေါင်းကြီးပိုင်းမှာ ပါခဲ့တဲ့ လူမည်းကြီးက အန်းအန်း နဲ့ အခန်းတူတူ ကျနေမလားလဲ ထပ်တွေးမိလေသည်။