အခန်း (၁၂၈) ပိုင်ရူယွီ ၏ နှလုံးသားကို အလွယ်တကူ သိမ်းပိုက်နိုင်ခြင်း
“ဟွန်း!”
ပိုင်ရှောင်ယွင် သူမရဲ့ လက်သေးသေးလေးတွေနဲ့ ပါးစပ်နဲ့ နှာခေါင်းကို အုပ်လိုက်ပြီး၊ လက်တစ်ဖက်ကို လေထဲမှာ ယမ်းပြကာ သူမ ဘယ်လောက် ရွံရှာကြောင်း ပြသလိုက်လေသည်။
ပိုင်ရူယွီ ရဲ့ မျက်နှာကလည်း သိပ်မကောင်းလှပေ။ တီဗီ ဇာတ်လမ်းတွဲတွေထဲမှာဆိုရင် ဆေးလုံး စားပြီးတာနဲ့ တစ်ကိုယ်လုံး တုန်ခါသွားပြီး အလင်းရောင်တွေ ထွက်လာရမှာ မဟုတ်ဘူးလား။
ချူထျန်ဖုန်း ကျမှ ဘာလို့ ဒီလောက် အနံ့ဆိုးကြီး ဖြစ်သွားရတာလဲ။
“သခင်လေး ချင်း၊ ဘာဖြစ်တာလဲဟင်”
ချူမုန်ယောင် နည်းနည်း ရှက်ရွံ့စွာ မေးလိုက်လေသည်။
ချင်းလန် ပခုံးတွန့်လိုက်လေသည်။
“ရိုးတွင်းခြင်ဆီ သန့်စင်ဆေးလုံး ဆိုတာ နာမည်နဲ့ လိုက်အောင်ပဲ ခန္ဓာကိုယ်ထဲက အညစ်အကြေးတွေကို သန့်စင်ဖို့ သုံးတာလေ။ မူလက ကျွန်တော် ထင်ထားတာက ရိုးတွင်းခြင်ဆီ သန့်စင်ဆေးလုံး က ခင်ဗျားအဖေ ကိုယ်ထဲက အညစ်အကြေးတွေကို သိပ်များများစားစား သန့်စင်ပေးနိုင်မှာ မဟုတ်ဘူးလို့ပါ။”
“ဒါပေမဲ့ အခု ကြည့်ရတာ ခင်ဗျားအဖေရဲ့ ကိုယ်ထဲမှာ အညစ်အကြေးတွေ အရမ်း များလွန်းနေပုံရတယ်။ အစိတ်အပိုင်း တစ်ခုလောက်ပဲ သန့်စင်ပေးရင်တောင်၊ သူ အိမ်သာထဲမှာ အချိန်ပိုကြာကြာ နေရလိမ့်မယ်။”
ဒါကို ကြားလိုက်ရတော့ ချူမုန်ယောင် အလွန် ဝမ်းသာသွားလေသည်။ ဒါက ဆေးစွမ်းပြနေပြီ ဆိုတာ ထင်ရှားနေတာကိုး။
သူမအဖေက နှစ်ပေါင်းများစွာ စုဆောင်းလာတဲ့ အဆိပ်အတောက်တွေကို ဖယ်ရှားနေတာ ဖြစ်ပြီး၊ သူ့ခန္ဓာကိုယ်က တဖြည်းဖြည်း ပုံမှန် အခြေအနေ ပြန်ရောက်လာတော့မယ် ဆိုတာ တွေးမိလိုက်လေသည်။
ချင်းလန် ကို ကြည့်တဲ့ သူမရဲ့ အကြည့်တွေက နူးညံ့သွားပြီး၊ ကျေးဇူးတင်ခြင်းတွေ ပြည့်နှက်နေလေသည်။
“ဒင်! ရွေးချယ်ခံ ချန်ဖျင်အန်း ၏ ကံတရား အမှတ်များ ၅၀၀ လျော့နည်းသွားပါသည်။ ဂုဏ်ယူပါတယ် ဗီလိန်အမှတ် +10000 ရရှိသွားပါပြီ!”
အချိန်အကြာကြီး နေမှ အိမ်သာတံခါး ပွင့်လာလေသည်။
ချူထျန်ဖုန်း က ချင်းလန် နဲ့ တခြား သုံးယောက် ရှိရာဘက်ကို မျက်နှာမူပြီး၊ နည်းနည်း ထူးဆန်းတဲ့ ကိုယ်ဟန်အနေအထားနဲ့ လျှောက်လာကာ ခါးသက်သက် ပြုံးပြီး ပြောလိုက်လေသည်။
“သခင်လေး ချင်း၊ ဒီ ရိုးတွင်းခြင်ဆီ သန့်စင်ဆေးလုံး က တကယ် အံ့ဩစရာ ကောင်းတာပဲ။ ကျွန်တော် တစ်ကိုယ်လုံး ပိုပြီး ပေါ့ပါးလွတ်လပ်သွားသလို ခံစားရတယ်၊ ပြီးတော့ ဟို ပြင်းထန်တဲ့ နာကျင်မှုတွေလည်း ပျောက်သွားပြီ။”
ချင်းလန် တိုးတိုးလေး
“အင်း”
လို့ ဖြေလိုက်လေသည်။
သူ ဘယ်လိုလုပ် စိတ်သက်သာရာ မရဘဲ နေမလဲ ချူထျန်ဖုန်း လေတွေ မရေမတွက်နိုင်အောင် လည်ခဲ့ပြီး မစင်တွေ အများကြီး စွန့်ထုတ်ခဲ့တာလေ။
အနည်းဆုံး ပေါင်ချိန် ၂ ပေါင်လောက်တော့ လျော့သွားလောက်တယ်။
သူ ဒီကိစ္စနဲ့ ပတ်သက်ပြီး စကားအများကြီး မပြောချင်တော့ဘဲ တိုက်ရိုက် ပြောလိုက်လေသည်။
“ဒါက ပထမ အဆင့် ကုသမှုရဲ့ အာနိသင်ပဲ ရှိပါသေးတယ်။ ခင်ဗျားတို့ သားအဖ နှစ်ယောက် ရိုးတွင်းခြင်ဆီ သန့်စင်ဆေးလုံး အကြောင်းကို လျှို့ဝှက်ထားပေးမယ်လို့ မျှော်လင့်ပါတယ်။ ဘယ်သူ့ကိုမှ မပြောရဘူး၊ ဟို ရှောင်ချန် အပါအဝင်ပေါ့။”
“ဘာပဲဖြစ်ဖြစ်၊ ဒီဆေးလုံးက ဘယ်လောက် အံ့ဩစရာ ကောင်းလဲ ဆိုတာ ခင်ဗျားတို့ အားလုံး သိကြတာပဲ။ သတင်းသာ ပြန့်သွားရင်၊ ကျွန်တော် ကိုယ့်ကိစ္စ ကိုယ် ဂရုစိုက်ဖို့ အချိန်မရှိတော့ဘဲ၊ လာတောင်းတဲ့ သူတွေကို ဖြေရှင်းနေရတာနဲ့တင် အချိန်ကုန်နေလိမ့်မယ်။”
ချူထျန်ဖုန်း အမြန် ခေါင်းညိတ်လိုက်လေသည်။
“စိတ်မပူပါနဲ့ သခင်လေး ချင်း၊ ကျွန်တော် တခြား ဘယ်သူ့ကိုမှ ပေးမသိစေရပါဘူး။”
“ရှယ်ယာကိစ္စနဲ့ ပတ်သက်လို့၊ ကျွန်တော် နောက်မှ ရူယွီ ကို ဆက်သွယ်လိုက်ပါ့မယ်။ ဒီနေ့တော့ သခင်လေးကို ဆက်ပြီး အနှောင့်အယှက် မပေးတော့ပါဘူး။ ယောင်ယောင် နဲ့ ကျွန်တော် အခုပဲ ပြန်လိုက်ပါဦးမယ်။”
သူ ဟန်ချက်မညီ ဖြစ်စပြုလာပြီလေ။
အင်း... ဘယ်လို ပြောရမလဲ။
ဝမ်းလျှောနေတဲ့ အချိန်မှာ၊ ဘယ်လေလည်သံကိုမှ မယုံမိစေနဲ့။
သူက အခု အကောင်းဆုံး သာဓကပင်။
ထွက်ခွာဖို့ စိတ်လောနေပြီး၊ ချင်းလန် ရဲ့ ခွင့်ပြုချက်လည်း ရတာကြောင့်၊ သူတို့ ဗီလာထဲကနေ ထူးဆန်းတဲ့ ပုံစံနဲ့ အလျင်အမြန် ထွက်ပြေးသွားကြလေသည်။
ပိုင်ရူယွီ ရဲ့ အပြုံးက နည်းနည်း ခါးသက်သက် ဖြစ်နေလေသည်။
“တကယ်တော့ ကျွန်မတို့ အခု အသေးစိတ် ဆွေးနွေးလို့ ရနေတာပဲ၊ အဲ့လောက် အလောတကြီး လုပ်စရာ မလိုပါဘူး။”
ချင်းလန် တခစ်ခစ် ရယ်မောလိုက်ပြီး ပြောလိုက်လေသည်။
“အဲ့ဒါက ချူထျန်ဖုန်း မှာ ရည်ရွယ်ချက် ရှိမရှိ ဆိုတာပေါ် မူတည်တယ်။ သူ သေချာပေါက် ရှိမှာပါ၊ မဟုတ်ရင် သူ ဒီလောက် ထိတ်လန့်တကြား ထွက်ပြေးသွားမှာ မဟုတ်ဘူး။”
ချူထျန်ဖုန်း က အရမ်း ရက်ရောပြီး ယဉ်ကျေးတဲ့ ပုံစံ ပြုမူခဲ့ပေမယ့်၊ သူ့လမ်းလျှောက်တဲ့ ပုံစံမှာ အားနည်းချက် တချို့ ရှိနေသေးတယ်လေ။
“ရှင်နော် ဦးလေး ချူ ဒီလို စိတ်မကောင်းစရာ အခြေအနေ ဖြစ်နေတာကို ဘာလို့ ကြိုမပြောလိုက်တာလဲ”
ပိုင်ရူယွီ စိတ်ပျက်စွာ မျက်လုံး လှန်ကြည့်လိုက်လေသည်။
“ဒါပေမဲ့ ရှင် ဒီနေ့ ကုမ္ပဏီ အတွက်မှတ်သားလောက်တဲ့ အကျိုးပြုမှု တစ်ခု လုပ်ပေးခဲ့ပါတယ်။”
ချူ လုပ်ငန်းစုက ထျန်ဟိုင်မြို့ တစ်ခုလုံးနဲ့ ဒေသတွင်းမှာပါ ဂုဏ်သတင်း အတိုင်းအတာ တစ်ခုထိ ရှိလေသည်။
ဒီအကျပ်အတည်းက လက်ရှိ အခြေအနေရဲ့ ရှောင်လွှဲမရတဲ့ အကျိုးဆက် တစ်ခုသာသာပင်။
တကယ်လို့ သူတို့ ဒါကို ချောချောမွေ့မွေ့ ကျော်လွှားနိုင်ရင်၊ သူတို့ရဲ့ ဖွံ့ဖြိုးတိုးတက်မှု အလားအလာက အရမ်း ကောင်းမွန်နေပြီး ချူ လုပ်ငန်းစုရဲ့ ရှယ်ယာတွေကို ပိုင်ဆိုင်ထားခြင်းက နောက်ပိုင်း အမြတ်ငွေ တွေကို ထိုင်စားနေရုံင်။
အကျိုးကျေးဇူးတွေကို ခံစားမယ်.....
မဟုတ်ဘူး၊ မဟုတ်ဘူး၊ မဟုတ်ဘူး......
ချင်းလန် က အကျိုးကျေးဇူး ခံစားရုံနဲ့ မကျေနပ်ပေ။
သူက ချူ လုပ်ငန်းစု တစ်ခုလုံးကို အရိုးပါမကျန် ဝါးစားပစ်ဖို့ စီစဉ်ထားတာဖြစ်လေသည်။
အနာဂတ်မှာ ချူထျန်ဖုန်း ဘာဖြစ်သွားမလဲ ဆိုတာနဲ့ ပတ်သက်လို့ကတော့....
သူ ဂရုမစိုက်ပါဘူး၊ အဲ့ဒါက ချူမုန်ယောင် ရဲ့ စွမ်းဆောင်ရည်ပေါ် မူတည်လိမ့်မယ်။
“အစ်ကိုကြီး၊ အဲ့ဒီ ရိုးတွင်းခြင်ဆီ သန့်စင်ဆေးလုံး က တကယ်ပဲ အဲ့လောက် စွမ်းလားဟင်”
ပိုင်ရှောင်ယွင် ချင်းလန် ဘေးနားမှာ ရပ်ပြီး တိုးတိုးလေး မေးလိုက်လေသည်။
ပိုင်ရှောင်ယွင် က အသစ်အဆန်းနဲ့ စိတ်ဝင်စားစရာ ကောင်းတဲ့ အရာတွေကို အမြဲ စပ်စုချင်စိတ် ရှိလေသည်။
ချင်းလန် ဘာမှ ဖုံးကွယ်မထားဘဲ ခေါင်းညိတ်ပြီး ရှင်းပြလိုက်လေသည်။
“အဲ့ဒါက အရမ်း ဈေးကြီးတဲ့ ဆေးလုံးလေ။ ချူထျန်ဖုန်း ကိုယ်ထဲမှာ နှစ်ပေါင်းများစွာ စုဆောင်းနေတဲ့ အဆိပ်အတောက်တွေကို ဖယ်ရှားပေးရုံတင် မကဘူး၊ သူ့ရဲ့ ခန္ဓာကိုယ် ကြံ့ခိုင်မှုကိုပါ တိုးမြှင့်ပေးနိုင်တယ်။”
“သူလို လူနာကို ထားလိုက်ပါတော့၊ သာမန်လူတွေရဲ့ ကိုယ်ထဲမှာတောင် အညစ်အကြေး တချို့ ရှိတတ်ကြတယ်။ ဒီ ရိုးတွင်းခြင်ဆီ သန့်စင်ဆေးလုံး က အဲ့ဒီ အညစ်အကြေးတွေကို သန့်စင်ပေးနိုင်တယ်လေ”
“သာမန်လူတွေ အတွက် ဆိုရင်၊ ဒီပစ္စည်းကို သုံးစွဲတာက ရုပ်ပိုင်းဆိုင်ရာ ဖွဲ့စည်းပုံကို တိုးမြှင့်ပေးရုံတင် မကဘူး၊ ခန္ဓာကိုယ်ထဲက အညစ်အကြေးတွေကို သန့်စင်ပေးလိုက်တာကြောင့် အသားအရေ ပိုဖြူဝင်းပြီး ချောမွေ့လာစေတယ်။”
ပိုင်ရူယွီ နည်းနည်း စိတ်ဝင်စားသွားလေသည်။
“အဲ့လောက်တောင် စွမ်းလား တကယ်လို့ အဲ့ဒါ အမှန်ဆိုရင်၊ အလှအပဆိုင်ရာ ဆေးလုံး ထက်တောင် ပိုမကောင်းနေဘူးလား”
ဘယ်မိန်းကလေးမှ အလှအပ ပစ္စည်းတွေရဲ့ ဆွဲဆောင်မှုကို မလွန်ဆန်နိုင်ပါဘူး၊ ပိုင်ရူယွီ လည်း ခြွင်းချက် မဟုတ်ပါပေ။
ရိုးတွင်းခြင်ဆီ သန့်စင်ဆေးလုံး က အလွန် တန်ဖိုးရှိတယ် ဆိုတာ သူမ သိလေသည်။ ချူထျန်ဖုန်း လို သူဌေးကြီးတောင် တခြားနေရာက မရနိုင်ဘဲ ချင်းလန် ကို မျက်နှာလိုမျက်နှာရ လုပ်နေရတာ။ ဘယ်လိုလုပ် အလွယ်တကူ ရနိုင်မှာလဲ။
ချင်းလန် အိတ်ကပ်ထဲကနေ ရေရောထားတဲ့ ရိုးတွင်းခြင်ဆီ သန့်စင်ဆေးလုံး ၆ လုံး ထုတ်လိုက်လေသည်။
“ချူထျန်ဖုန်း က ကုသမှုရဲ့ သုံးပုံတစ်ပုံပဲ ယူသွားရသေးတာ။ မင်းတို့ နှစ်ယောက်၊ တစ်ယောက်ကို ၃ လုံးစီ သောက်ပြီး ကုသမှု တစ်ခုလုံး ပြီးမြောက်အောင် လုပ်လိုက်။ ခန္ဓာကိုယ်ထဲက အညစ်အကြေးတွေကို သန့်စင်ပြီး ကျန်းမာရေး ပိုကောင်းအောင် လုပ်ကြ။”
ရက်ရောတယ် မဟုတ်လား....
ဟီးဟီး..
ချင်းလန် အဆင်သင့် ပြင်ထားပြီးသားပင်။
ဘာလို့ ရိုးတွင်းခြင်ဆီ သန့်စင်ဆေးလုံး အစစ်ကို မထုတ်ပေးရတာလဲ ဆိုတော့ သူမတုံးပေ။
သူကရောထားတာ ၃ လုံးကို တစ်ပြိုင်နက် ထုတ်ပေးလိုက်တော့ အာနိသင်က တူညီပေမယ့်၊ ပိုင် ညီအစ်မတွေ ခံစားရတာက ကွာခြားသွားပြီလေ။
သေချာ စဉ်းစားကြည့်လိုက်ရင် နားလည်ပါလိမ့်မယ်။
ချူမုန်ယောင် ချင်းလန် ရှေ့မှာ ဒူးထောက်ပြီး အသနားခံတော့မှ၊ သူက မလိုလားစွာနဲ့ တစ်လုံး ပေးလိုက်တာ။
ဒါပေမဲ့ ပိုင် ညီအစ်မတွေ ပါးစပ်ဟလိုက်တာနဲ့၊ သူက ကုသမှု တစ်ခုလုံးစာ ဖြစ်တဲ့ ဆေးလုံး ၃ လုံး တိတိကို၊ ပိုင် ညီအစ်မတွေ ကောင်းတဲ့စကား တစ်ခွန်းမှ ပြောစရာ မလိုဘဲ ထုတ်ပေးလိုက်တာလေ။
“ကွာဟချက်”ဆိုတာ ဘာကို ဆိုလိုတာလဲ။
ဒါကို ကွာဟချက် လို့ ခေါ်တယ်။
ဒါက ပိုင်ရူယွီ နဲ့ ပိုင်ရှောင်ယွင် ဆီ ပေးပို့လိုက်တဲ့ သတင်းစကား တစ်ခုပင်။
ချူမုန်ယောင် က ကျောင်းမယ်ဖြစ်ပြီး လှပပေမယ့်၊ သူ့နှလုံးသားထဲမှာ မင်းတို့ ညီအစ်မ နှစ်ယောက်လောက် အရေးမပါဘူး ဆိုတာပါပဲ။
ပိုင် ညီအစ်မတွေကို ဘယ်လို ကိုင်တွယ်ရမလဲ ဆိုတာနဲ့ ပတ်သက်ရင်၊ ချင်းလန် အားလုံး တွက်ချက်ထားပြီးသားပင်။
“မဖြစ်ဘူး၊ ဒီဆေးလုံးတွေက အရမ်း တန်ဖိုးရှိလွန်းတယ်။ တစ်လုံးတည်းနဲ့တင် ယွမ် သန်းပေါင်းများစွာ တန်နေပြီ။ ၆ လုံး ဆိုရင် သန်း ၁၀၀ ကျော် မတန်နေဘူးလား ကျွန်မတို့ လက်မခံနိုင်ပါဘူး၊ လက်မခံနိုင်ပါဘူး။”
ပိုင်ရူယွီ အမြန် ခေါင်းခါလိုက်လေသည်။
ချူထျန်ဖုန်း ရဲ့ စကားအနည်းငယ်ကနေ၊ ရိုးတွင်းခြင်ဆီ သန့်စင်ဆေးလုံး ရဲ့ တန်ဖိုးရှိမှုကို သူမ သိခဲ့ရပြီးပြီလေ။
တစ်လုံးတည်းနဲ့တောင် ဒီလောက် ဖြစ်နေရင်၊ ၆ လုံး ဆိုရင် ဘယ်လို ဖြစ်သွားမလဲ။
ချင်းလန် လက်သီးဆုပ်လိုက်ပြီး၊ ရိုးတွင်းခြင်ဆီ သန့်စင်ဆေးလုံး ၆ လုံးကို လွှင့်ပစ်ဖို့ လက်ရွယ်လိုက်လေသည်။
ပိုင်ရှောင်ယွင် သူ့လက်မောင်းကို ချက်ချင်း ဆွဲထားပြီး စိုးရိမ်တကြီး ပြောလိုက်လေသည်။
“အစ်ကိုကြီး၊ ဘာလုပ်တာလဲ”
ချင်းလန် ရဲ့ မျက်နှာက အလွန် ဖြူဖျော့နေလေသည်။
“ဒီ ရိုးတွင်းခြင်ဆီ သန့်စင်ဆေးလုံး က မင်းတို့ ညီအစ်မ နှစ်ယောက် အတွက် ငါ အထူးတလည် ရယူထားခဲ့တာ၊ ကြီးမားတဲ့ ကျေးဇူးကြွေးနဲ့ ဈေးနှုန်းကြီးကြီး ပေးဆပ်ပြီးမှ ရထားတာ။”
“ဒါပေမဲ့ ဘာဖြစ်လဲ။”
“မင်းတို့ ညီအစ်မ နှစ်ယောက် ကျန်းမာဖို့ အတွက် ဆိုရင် ငါ ဘယ်လောက်ပဲ ပေးဆပ်ရ ပေးဆပ်ရ ဆန္ဒရှိပါတယ်။”
“ဒါပေမဲ့ အခု မင်းတို့က မလိုချင်ဘူး ဆိုတော့၊ ငါ သိမ်းထားပြီး ဘာလုပ်ရမှာလဲ ချူထျန်ဖုန်း ရဲ့ ဆေးကုသမှု အတွက် သုံးရမှာလား ငါ ဂရုမစိုက်ဘူး လွှင့်ပစ်လိုက်တာကမှ ပိုကောင်းဦးမယ်။”