“သူက ရွှီရှောင်ရှို့ပဲ...” ရှောက်ယီ စိတ်ချင်းဆက်သွယ်ကာ ပြောဆိုလိုက်ပြီး သူ၏ လေသံမှာ တကယ့်ကို တည်ငြိမ်လေးနက်နေခဲ့သည်။
“သူက ရွှီရှောင်ရှို့ မဟုတ်ဘူး...” ဖုန်းကုန်းသည် ထိုကျောက်တုံးတောင်တုပေါ်က လူ၏ ခန္ဓာကိုယ်ကို စိုက်ကြည့်လိုက်မိရင်း ပြန်လည်ပြောဆိုလိုက်၏
“ရွှီရှောင်ရှို့က ဝိညာဉ်စွမ်းအင်ကျင့်ကြံခြင်း အဆင့်ရှစ်မှာပဲ ရှိသေးတာဥစ္စာ... ဒါပေမဲ့ ဒီလူက အဆင့်ကိုးကို ရောက်နေပြီ...”
“သူက အဆင့်တက်သွားတာလည်း ဖြစ်နိုင်တာပဲ မဟုတ်လား...”
“ဟီးဟီး... လောကကြီးမှာ အဲဒီလောက်အထိ တိုက်ဆိုင်မှုမျိုး ရှိနိုင်ပါ့မလား...”
“သူ ငါတို့ဘက်ကို လှည့်ကြည့်ဖို့တောင် မဝံ့ရဲဘူး... ပြီးတော့ သူ့ရဲ့ နောက်ကျောပုံစံကလည်း ရွှီရှောင်ရှို့ရဲ့ ပုံစံနဲ့ တကယ့်ကို တူညီလွန်းလှတယ်... သူ့ရဲ့ စွမ်းအားတွေကလည်း မွေးရာပါအဆင့်ကို ရောက်မနေသေးဘူး... ၎င်းအပြင် သူက ဝတ်စုံဖြူ ဝတ်ဆင်ထားတာပဲ၊ ဘယ်လူသတ်သမားကမှ ယခုလိုမျိုး ဝတ်စုံဖြူကို ဝတ်ဆင်ထားလောက်အောင်အထိ မိုက်မဲမှာ မဟုတ်ဘူးဥစ္စာ...”
ရှောက်ယီသည် မိမိ၏ အပေါင်းအဖော်ဖြစ်သူထံသို့ သတင်းအချက်အလက်များကို အဆက်မပြတ် ပို့လွှတ်လိုက်ပြီး ဖုန်းကုန်းအနေဖြင့် ထိုအချက်အလက်များကို ခဏမျှသော အချိန်အတွင်းမှာတင် သေချာစွာ တွေးတောနိုင်လိမ့်မည်ဟု သိရှိထားခဲ့သည်။ ဖုန်းကုန်းသည် သူ ပြောဆိုခဲ့သည်ထက်ပင် ပိုမို၍ ဆန်းပြားလှသော အရာများကို တွေးတောနိုင်စွမ်း ရှိပေသည်။
သို့သော် သူ့အနေဖြင့် မိမိ၏ ထင်မြင်ယူဆချက်များကို ထုတ်ဖော်ပြောဆိုရန် တကယ့်ကို လိုအပ်လှပေသည်။ သူသည် မိမိ၏ အပေါင်းအဖော်ဖြစ်သူထံကနေ တိုက်ခိုက်ခွင့် အချက်ပြမှုကို ရရှိရန်အတွက် လိုအပ်နေခဲ့ခြင်း ဖြစ်၏
ထိုအချက်ပြမှုက ရှောက်ယီအား ချက်ချင်းဆိုသလို ကြီးမားလှသော ဒုက္ခများအတွင်းသို့ တွန်းပို့လိုက်နိုင်စွမ်း ရှိသော်လည်း... တစ်ဖက်တွင်မူ ဖုန်းကုန်းအား ဘေးကင်းစွာဖြင့် ထွက်ပြေးလွတ်မြောက်နိုင်မည့် အခွင့်အရေးကို ပေးစွမ်းနိုင်မှာ ဖြစ်ပေသည်။
‘တကယ်ပဲ... မြင်တွေ့ရတဲ့ အခြေအနေအတိုင်း ရိုးရှင်းနေတာလား...’
ဖုန်းကုန်း အနည်းငယ် တုံ့ဆိုင်းသွားခဲ့ရ၏။ သူ့ရှေ့က လူသည် ရွှီရှောင်ရှို့ ဖြစ်နေနိုင်ခြေနှုန်း ၉၉ ရာခိုင်နှုန်းခန့် ရှိနေခဲ့သဖြင့် သူ တကယ့်ကို ဆွံ့အသွားခဲ့ရသည်ကိုမူ ဝန်ခံရမှာ ဖြစ်ပေသည်
သူသည် ထိုနေရာမှာတင် ကျောက်ရုပ်တစ်ရုပ်အလား တောင့်တင်းသွားခဲ့ရတော့၏။
သို့သော် သူ့စိတ်ထဲတွင် ထိုလူက သူတို့၏ ပစ်မှတ်သာ မဟုတ်ခဲ့ဘူးဆိုလျှင်... ဘာဆက်ဖြစ်မလဲဟု တွေးတောလိုက်မိပြန်သည်။
ကြမ်းပြင်ပေါ်က နက်ရှိုင်းလှသော ကျင်းကြီးများ၊ ဘယ်နေရာသို့ ရောက်ရှိသွားမှန်း မသိရတော့သော အဓိက အိမ်မကြီးနှင့် ခြံဝင်းအတွင်း၌ လူတစ်ဦး ရှိနေခဲ့သော်လည်း တံခါးလာရောက်ဖွင့်ပေးခြင်း မရှိခဲ့သည့် အခြေအနေ...
ထိုအရာအားလုံးကို ဖြစ်ပေါ်လာစေခဲ့သည့် အကြောင်းအရင်းက ဘာလဲဆိုတာကို သူ စဉ်းစား၍ မရနိုင် ဖြစ်နေခဲ့ရ၏
ရှောက်ယီအနေဖြင့် ဖုန်းကုန်းက သူ့အား ဘေးအန္တရာယ်များအတွင်းသို့ တွန်းပို့လိုက်သည့်တိုင်အောင်ပင်... ဘာပြဿနာမျှ ရှိမနေခဲ့ပါချေ၊ သို့သော် ဖုန်းကုန်းကိုယ်တိုင်ကမူ ယခုလိုမျိုး ရက်စက်ကြမ်းကြုတ်စွာဖြင့် ဆုံးဖြတ်ချက် ချမှတ်သင့်သလား သို့မဟုတ် မချမှတ်သင့်ဘူးလားဆိုတာကို ဝေခွဲမရ ဖြစ်နေခဲ့ရသည်။
တကယ်လို့ ထိုလူက ရွှီရှောင်ရှို့သာ မဟုတ်ခဲ့ဘူးဆိုပါက... သူသည် မိမိထက်ပင် ပိုမို၍ စွမ်းအားကြီးမားလှပြီး မိမိ၏ အရှိန်အဝါများကို ပိုမို၍ ကောင်းမွန်စွာ ဖုံးကွယ်ထားနိုင်သည့် ကြောက်စရာကောင်းလှသော ပုဂ္ဂိုလ်တစ်ဦး ဖြစ်နေမှာ သေချာလှပေသည်၊ ဖြစ်နိုင်တာက ထိုလူသည် အတွင်းဘက် တပည့်များဇုန်ကနေ အချိန်အတော်ကြာအောင် ပျောက်ကွယ်သွားခဲ့ဖူးသည့် ထူးချွန်လှသော ကျင့်ကြံသူ ၃၃ ဦးထဲက တစ်ဦးလည်း ဖြစ်နေနိုင်ခြေ ရှိပေသည်။
တကယ်လို့ သူ့အနေဖြင့် ယခုလိုမျိုး အခြေအနေတွင် လှုပ်ရှားမှုမပြုဘဲ နေထိုင်လိုက်မည်ဆိုပါက... ထိုလူ၏ နောက်ကျောပုံစံကို မြင်တွေ့လိုက်ရရုံမျှဖြင့်တင် သူတို့နှစ်ဦးစလုံး ဘေးကင်းစွာဖြင့် အသက်ရှင်သန်နိုင်ခွင့် ရှိမှာ ဖြစ်ပေသည်။
သို့သော် တကယ်လို့ သူ့အနေဖြင့် ယခုလိုမျိုး အခြေအနေတွင် သွားရောက်တိုက်ခိုက်မိမည်ဆိုပါက... ၎င်းက ထိုလူအား သူတို့နှစ်ဦးစလုံးကို ယခုနေရာမှာတင် ချက်ချင်း သတ်ဖြတ်ပစ်ရန်အတွက် ခိုင်မာလှသော အကြောင်းပြချက်တစ်ခုကို ပေးအပ်လိုက်သလိုမျိုး ဖြစ်သွားမှာ သေချာလှပေသည်
သူ့အနေဖြင့် ရွှီရှောင်ရှို့ကဲ့သို့သော သာမန်ကောင်လေးတစ်ယောက်ကို သတ်ဖြတ်ရန်အတွက် ယခုလိုမျိုး ကြီးမားလှသော ရလဒ်ကို ပေးဆပ်ရန် လိုအပ်ပါ့မလား။
ရှောက်ယီ မိမိ၏ အပေါင်းအဖော်ဖြစ်သူထံကနေ ဘာတုန့်ပြန်မှုမျှ မကြားရတော့သဖြင့် စတင်၍ စိတ်မရှည် ဖြစ်လာခဲ့ရတော့၏။
‘ဖုန်းကုန်းက... တကယ်ပဲ တုံ့ဆိုင်းနေတာလား...’
သူသည် မိမိ၏ အပေါင်းအဖော်ဖြစ်သူက ယခုလိုမျိုး အခြေအနေတွင် တုံ့ဆိုင်းနေခဲ့ရသဖြင့် တကယ့်ကို အံ့အားသင့်သွားခဲ့ရတော့သည်။
လုပ်ငန်းဆောင်တာများကို လုပ်ဆောင်နေစဉ်အတွင်း ယခုလိုမျိုး တုံ့ဆိုင်းနေခဲ့ခြင်းက... ပရော်ဖက်ရှင်နယ် လူသတ်သမားတစ်ဦးအတွက် တကယ့်ကို ကြောက်စရာကောင်းလှသော အရာတစ်ခု ဖြစ်ကြောင်းကိုမူ သတိပြုရမှာ ဖြစ်ပေသည်။
ဝုန်း...
ကောင်းကင်ယံထံတွင် လျှပ်စီးကြောင်းများစွာ လက်ခနဲ ဖြတ်သန်းသွားခဲ့ရပြီး မိုးရေများမှာလည်း သိသိသာသာကို ပိုမို၍ ပြင်းထန်လာခဲ့ရတော့၏။
တစ်ခြံဝင်းလုံးမှာ တကယ့်ကို တိတ်ဆိတ်နေခဲ့ရပြီး လေပြင်းများ တိုက်ခတ်သံကိုသာ ကြားရပေသည်။
ထိုကျောက်တုံးတောင်တုပေါ်က လူသည် ဆက်လက်၍ တိတ်ဆိတ်နေခဲ့သလို... မိမိတို့ကိုယ်မိမိ ဘာဘေးအန္တရာယ်များအတွင်းသို့ တွန်းပို့လိုက်မိပြီလဲဆိုတာကို ဝေခွဲမရ ဖြစ်နေခဲ့ကြသော လူသတ်သမား နှစ်ဦးစလုံးမှာလည်း တိတ်ဆိတ်နေခဲ့ကြ၏။ နှစ်ဦးစလုံး၏ စိတ်ထဲတွင် မေးခွန်းပေါင်းများစွာ ရှိနေကြမှာ သေချာလှသော်လည်း... အားလုံးက အချက်တစ်ခုကိုမူ သေချာစွာ သိရှိနေခဲ့ကြသည်။
ပထမဆုံး စတင်၍ စကားပြောဆိုမိသောသူက... သေချာပေါက် ရှုံးနိမ့်ရမှာ ဖြစ်ပေသည်
......
“သံသယဖြစ်ပွားခြင်း၊ အလိုအလျောက်ရမှတ် +၁။”
“သံသယဖြစ်ပွားခြင်း၊ အလိုအလျောက်ရမှတ် +၁။”
“သံသယဖြစ်ပွားခြင်း၊ အလိုအလျောက်ရမှတ် +၁။”
“...”
အချက်အလက် ဘားတန်းထက်တွင် စာတန်းများစွာမှာ အဆက်မပြတ် ထွက်ပေါ်နေခဲ့သည်။ နောက်ထပ် တစ်မိနစ်ပင် မပြည့်သေးသော အချိန်အတွင်းမှာတင် အချက်အလက် စာတန်းပေါင်း ရာနှင့်ချီ၍ ထွက်ပေါ်လာခဲ့ခြင်း ဖြစ်ပေသည်။
ထိုကျောက်တုံးတောင်တုပေါ်တွင် မတ်တတ်ရပ်နေခဲ့သော လျှို့ဝှက်ဆန်းကြယ်လှသော လူက ဘယ်သူလဲ...
မင်းတို့အနေနဲ့ ယခုလိုမျိုး မေးခွန်းကို မေးမြန်းနေဖို့ လိုအပ်ပါဦးမလား။
သူက... ရွှီရှောင်ရှို့ ဟုတ်တာပေါ့
သူ ဘာဖြစ်လို့ ဝတ်စုံဖြူကို ဝတ်ဆင်ထားရတာလဲ... အကြောင်းရင်းကတော့ သူ အဝတ်အစား လဲလှယ်ဖို့အတွက် အချိန်မရရှိခဲ့လို့ပဲ ဖြစ်ပေသည်။
သူ ဘာဖြစ်လို့ အနောက်ဘက်ကို လှည့်မကြည့်ရဲတာလဲ... အကြောင်းရင်းကတော့ သူက ရွှီရှောင်ရှို့ ဖြစ်နေလို့ပဲလေ
သို့သော်... သူက ဘာဖြစ်လို့ ရန်သူနှစ်ယောက်စလုံး၏ အရှေ့တွင် ရဲရဲဝံ့ဝံ့ မတ်တတ်ရပ်နေရဲတာလဲ။
ကောင်းပါပြီ... အကြောင်းရင်းကတော့ သူ့အနေဖြင့် ယခုလိုမျိုး ပြုလုပ်ခြင်းကလွဲပြီး အခြားသော နည်းလမ်း မရှိတော့လို့ပဲ ဖြစ်ပေသည်။
ရွှီရှောင်ရှို့၏ ခြေထောက်နှစ်ဖက်စလုံးမှာ လက်ရှိအချိန်တွင် တကယ့်ကို တုန်ရီနေခဲ့ပြီ ဖြစ်သည်။ တကယ်လို့ ထိုလူနှစ်ဦးသာ သူ့အား ချက်ချင်း လာရောက်တိုက်ခိုက်မည်ဆိုပါက... သူသည် သေချာပေါက် အချိန်မီ ရှောင်တိမ်းနိုင်စွမ်း ရှိမှာ မဟုတ်ပါချေ။
သို့သော် သူ၏ ကနဦး စစ်ဆေးကြည့်ရှုမှုများအရမူ... ထိုလူနှစ်ဦးစလုံးမှာ...
တကယ့်ကို စိတ်ရှည်သည်းခံတတ်ကြပြီး အရာအားလုံးကို သေချာစွာ မစစ်ဆေးရသေးမီအထိ ချက်ချင်း လှုပ်ရှားခြင်း မရှိတတ်ကြပါချေ။
ထိုအချက်များအားလုံးက ၎င်းတို့သည် သေချာစွာ လေ့ကျင့်ထားခဲ့ကြသော ပရော်ဖက်ရှင်နယ် လူသတ်သမားများ ဖြစ်ကြကြောင်း ဖော်ပြနေခဲ့ခြင်း ဖြစ်ပေသည်။
တစ်ပြိုင်နက်တည်းမှာပင်... ၎င်းတို့နှစ်ဦးစလုံးမှာ ဆန်းပြားလှသော အတွေးအခေါ်များကို တွေးတောနိုင်စွမ်း ရှိကြပေသည်။ အနည်းဆုံးတော့ အနောက်ဘက်က လူ၏ အရှိန်အဝါကြောင့်... ၎င်းတို့နှစ်ဦးစလုံးအား ပိုမို၍ ဆန်းပြားလှသော အရာများကို တွေးတောသွားစေရန်အတွက် အတင်းအကျပ် တွန်းအားပေးနိုင်ခဲ့ခြင်း ဖြစ်ပေသည်
၎င်းတို့ သေချာပေါက် ပိုမို၍ တွေးတောကြမှာ ဖြစ်ပေသည်၊ ဒါက သဘာဝကျလှသည် မဟုတ်လား။
သူ အစောပိုင်းတုန်းက မိမိ၏ တိုက်ခိုက်မှုများကို စမ်းသပ်စဉ်တုန်းက မဆင်မခြင် ပြုလုပ်ခဲ့မှုများကြောင့် သူ၏ ခြံဝင်းကြီးမှာ ယခုကဲ့သို့ ပျက်စီးယိုယွင်းနေခဲ့ရခြင်း ဖြစ်ပေသည်၊ သို့သော် ယခုလိုမျိုး ပျက်စီးနေခဲ့သော အခြေအနေကြီးကပင် လက်ရှိအချိန်တွင် သူ့အား ပြန်လည်၍ ကယ်တင်ပေးနိုင်ခဲ့ခြင်း ဖြစ်သဖြင့် တကယ့်ကို ရယ်စရာကောင်းလှပေသည်။
သူ့အနေဖြင့် ထိုလူများအား မိမိ တွေးတောစေချင်သည့် အရာများကို တွေးတောသွားစေရန်အတွက် ပြုလုပ်နိုင်မလား၊ ၎င်းတို့အား မိမိ ပေးစွမ်းလိုက်သည့် အချက်အလက်များအတိုင်း လိုက်ပါ၍ တွေးတောသွားစေရန် ပြုလုပ်ပြီး... ၎င်းတို့၏ အတွေးအခေါ်များကို ပိုမို၍ ဝေဝါးသွားအောင် ဖန်တီးနိုင်မလားဟု စဉ်းစားလိုက်မိပြန်သည်
ရွှီရှောင်ရှို့ တကယ့်ကို ခေါင်းမူးသွားခဲ့ရ၏။
သူ့အနေဖြင့် လက်ရှိအချိန်တွင် မိမိ၏ ဉာဏ်ပညာကို အစွမ်းကုန် အသုံးပြုရမှာ ဖြစ်ပြီး... ၎င်းက ယခုဘေးအန္တရာယ်ကနေ လွတ်မြောက်နိုင်မည့် တစ်ခုတည်းသော နည်းလမ်း ဖြစ်ကြောင်းကိုမူ သေချာစွာ သိရှိနေခဲ့သည်။
ဘယ်လိုပဲဖြစ်ဖြစ်... ထိုလူနှစ်ဦးစလုံးမှာ တကယ့်ကို ထက်မြက်ကြပြီး အစွမ်းထက်လှသော တိုက်ခိုက်ရေးသမားများ ဖြစ်ကြပေသည်။ ထိုကဲ့သို့သော လူများကို ထိပ်တိုက်ရင်ဆိုင် တိုက်ခိုက်ခြင်းက ကျောက်တုံးကြီးကို ကြက်ဥဖြင့် ပစ်ပေါက်သလိုမျိုး အချည်းနှီးသာ ဖြစ်သွားမှာ ဖြစ်ပေသည်။ ထို့ကြောင့် သူ့အနေဖြင့် မိမိ၏ ဉာဏ်ပညာကိုသာ အားကိုးရမှာ ဖြစ်ပေသည်။
သူ့အနေဖြင့် အသက်ရှင်သန်နိုင်ခွင့် ရှိမရှိ ဆိုသည့်အရာက မိမိ၏ ဉာဏ်ပညာကို မည်မျှအထိ အသုံးချနိုင်မလဲဆိုသည့် အချက်အပေါ်တွင်သာ မူတည်နေခဲ့ခြင်း ဖြစ်ပေသည်။
သူ၏ မဟာဗျူဟာကမူ ၎င်းတို့အား ခြိမ်းခြောက်အကျပ်ကိုင်လိုက်မိရင်း တိုက်ခိုက်မှုအပိုင်းတွင် မိမိကသာ အသာစီး ရရှိထားသလိုမျိုး ဟန်ဆောင်ရန် ဖြစ်ပေသည်၊ ၎င်းတို့အား မိမိ ပေးစွမ်းလိုက်သည့် အချက်အလက်များအရ... မိမိကိုယ်မိမိ အခြားသော စွမ်းအားကြီးမားလှသည့် ပုဂ္ဂိုလ်တစ်ဦးအလား ထင်မှတ်သွားစေရန်အတွက် ဖြစ်ပေသည်။
သူသည် ၎င်းတို့အား မိမိကိုယ်မိမိ ပြန်လည်၍ မေးခွန်းထုတ်သွားစေရန်အတွက် ပြုလုပ်နေခဲ့ခြင်း ဖြစ်၏။
‘သူက တကယ်ပဲ ဘယ်သူလဲ... တကယ်လို့ သူက ရွှီရှောင်ရှို့သာ ဖြစ်မယ်ဆိုရင်... ဘာဖြစ်လို့ ငါတို့နှစ်ယောက်ရဲ့ အရှေ့မှာ ယခုလိုမျိုး ရဲရဲဝံ့ဝံ့ မတ်တတ်ရပ်နေရဲတာလဲ... ပြီးတော့ ဒီခြံဝင်းကြီးတစ်ခုလုံးကရော ဘာဖြစ်လို့ ယခုလိုမျိုး ပျက်စီးနေရတာလဲ...’
ဝ
‘တကယ်လို့ သူက ရွှီရှောင်ရှို့သာ မဟုတ်ခဲ့ဘူးဆိုရင်... သူက ရွှီရှောင်ရှို့ကို လာပြီးတော့ သတ်ဖြတ်ခဲ့တဲ့ အခြားတစ်ယောက် ဖြစ်ရမယ်၊ အဲဒါကြောင့်ပဲ ဒီခြံဝင်းကြီးက ယခုလိုမျိုး ပျက်စီးနေခဲ့တာပေါ့... ဒါပေမဲ့ ငါတို့က သူ့ကို ဘာဖြစ်လို့ ယခုလိုမျိုး တွေ့ဆုံခဲ့ရတာလဲ... သူ့ရဲ့ စွမ်းအားတွေက ငါတို့ထက် သိသိသာသာကို ပိုပြီးတော့ မြင့်မားနေတာတောင်မှ... ဘာဖြစ်လို့ ငါတို့ရဲ့ ပါးစပ်ကို ပိတ်ပစ်ဖို့အတွက် ချက်ချင်း လာရောက်မသတ်ဖြတ်ရသေးတာလဲ...’
ရွှီရှောင်ရှို့ မိမိ၏ ခန္ဓာကိုယ်အတွင်း၌ တုန်ရီနေခဲ့ရသည်ကို ခံစားလိုက်ရတော့သည်။
သူ့အနေဖြင့် မိမိ၏ မည်သူမည်ဝါဖြစ်ကြောင်း အထောက်အထားကို ထိုလူနှစ်ဦးစလုံးအကြားတွင် အမြဲတမ်း ဝေဝါးနေအောင် ပြုလုပ်ထားရမှာ ဖြစ်ပြီး... ၎င်းတို့အား တိကျပြတ်သားလှသော အဖြေတစ်ခုကို လုံးဝ မသိရှိသွားစေရန်အတွက် ကာကွယ်ရမှာ ဖြစ်ပေသည်။ ၎င်းကသာ ထိုလူများအား ဆက်လက်၍ သံသယဖြစ်ပွားစေနိုင်မည့် တစ်ခုတည်းသော နည်းလမ်း ဖြစ်ပြီး ၎င်းတို့၏ အတွေးအခေါ်များကို ဆက်လက်၍ ဝေဝါးနေစေမှာ ဖြစ်ပေသည်။
သူ့အနေဖြင့် ထိုလူနှစ်ဦးစလုံး ဘာတွေးတောနေလဲဆိုတာကို အမှားအယွင်းမရှိဘဲ ကြိုတင်၍ ခန့်မှန်းနိုင်ပါ့မလား။
၎င်းက တကယ့်ကို မဖြစ်နိုင်ပါချေ။
ထို့ကြောင့် သူသည် မိမိ၏ မည်သူမည်ဝါဖြစ်ကြောင်း အထောက်အထားအမှန်ကို ရိပ်မိမသွားစေရန်အတွက်... ဆက်လက်၍ တိတ်ဆိတ်နေခဲ့ခြင်း ဖြစ်ပေသည်။
သူသည် ထက်မြက်လှသော လူများနှင့် ဆက်ဆံရသည့် အခါမျိုးတွင်... တစ်ခါတစ်ရံ၌ ဖြစ်နိုင်ခြေရှိသော အခြေအနေများကို ပေးစွမ်းလိုက်ခြင်းက ထင်မှတ်မထားလောက်သော ရလဒ်ကောင်းများကို ရရှိစေနိုင်ကြောင်း သိရှိထားခဲ့ခြင်း ဖြစ်ပေသည်။
ထို့ကြောင့် သူသည် အဓိပ္ပာယ် နက်ရှိုင်းလှသော စကားအချို့ကိုသာ ထုတ်ဖော်ပြောဆိုလိုက်ခြင်း ဖြစ်ပေသည်၊ ထိုအချက်ကတင် သူ၏ စိတ်ထဲတွင် အချက်အလက် စာတန်းများကို အရူးအမူး ထွက်ပေါ်လာစေရန်အတွက် လုံလောက်လှပေသည်။ သူ၏ စိတ်ကူးယဉ် အစီအစဉ်က တဖြည်းဖြည်းနှင့် အောင်မြင်မှု လမ်းကြောင်းပေါ်သို့ ရောက်ရှိနေပြီ ဖြစ်ကြောင်း သူ သိရှိလိုက်ရတော့၏
သူ့အနေဖြင့် ၎င်းတို့အား ခြိမ်းခြောက်လိုက်ခြင်းအားဖြင့် ချက်ချင်း လှုပ်ရှားမှု မပြုလုပ်နိုင်အောင် တားဆီးနိုင်မည့် အခွင့်အလမ်း ၉၉ ရာခိုင်နှုန်းခန့် ရှိနေခဲ့သော်လည်း... တကယ်လို့ ၎င်းတို့က စွန့်စားပြီး သူ့အား လာရောက်တိုက်ခိုက်မည်ဆိုပါက... သူ သေချာပေါက် ပျက်စီးသွားရမှာ ဖြစ်ပေသည်။
ထို့ကြောင့် သူ့အနေဖြင့် အနောက်ကနေ ဘာဆက်လုပ်ရမလဲဆိုတာကို သေချာစွာ တွေးတောထားရမှာ ဖြစ်ပေသည်။
အမှန်အတိုင်း ပြောရမည်ဆိုပါက...
သူ ဘာဆက်လုပ်ရမလဲဆိုတာကို မသိရှိသေးပါချေ။
သူ့အနေဖြင့် ၎င်းတို့အား မိမိ၏ နောက်ကျောကိုသာ ပေးထားခဲ့သော်လည်း... သူ၏ "အာရုံခံစွမ်းရည်" က ရန်သူနှစ်ဦးစလုံး၏ မျက်နှာအမူအရာများကို ရှင်းလင်းပြတ်သားစွာ မြင်တွေ့နိုင်စွမ်း ရှိပေသည်၊ ၎င်းက လက်ရှိအချိန်တွင် သူ၏ အကြီးမားဆုံးသော လက်နက် ဖြစ်ပေသည်
နှစ်ဖက်စလုံးအကြားက တိတ်ဆိတ်မှုက ဆက်လက်၍ ဖြစ်ပေါ်နေဆဲပင်။ လူသုံးဦးစလုံးတွင် မိမိတို့၏ ကိုယ်ပိုင် အစီအစဉ်များ ရှိနေကြမှာ သေချာလှပေသည်။ နှစ်ဖက်စလုံးက အခြားတစ်ယောက်က ပထမဆုံး စတင်၍ စကားပြောဆိုလာမည့် အချိန်ကိုသာ စောင့်ဆိုင်းနေခဲ့ကြခြင်း ဖြစ်၏။
သူ၏ စိတ်ထဲတွင် ‘သံသယဖြစ်ပွားခြင်း’ စာတန်းများ ထွက်ပေါ်လာမှုနှုန်းမှာ သိသိသာသာကို လျော့နည်းသွားခဲ့ရပြီ ဖြစ်သဖြင့် သူ တကယ့်ကို စိုးရိမ်ပူပန်လာခဲ့ရတော့သည်။
ထိုလူသတ်သမား နှစ်ဦးစလုံးမှာ သူ ထင်မှတ်ထားခဲ့သည်ထက် သိသိသာသာကို ပိုမို၍ စိတ်ရှည်သည်းခံနိုင်ကြပေသည်၊ ထို့ကြောင့် သူ့အနေဖြင့် ၎င်းတို့၏ အတွေးအခေါ်များကို ပိုမို၍ လမ်းလွဲသွားအောင် ပြုလုပ်နိုင်မည့် နည်းလမ်းကို ရှာဖွေ၍ မရနိုင် ဖြစ်နေခဲ့ရ၏
‘ဒီအတိုင်း ဆက်သွားလို့ မဖြစ်တော့ဘူး၊ ငါ တစ်ခုခုကို စတင်ပြီးတော့ ပြောဆိုရမယ်... တကယ်လို့ ငါက ဒီထက်မက ထပ်ပြီးတော့ စောင့်ဆိုင်းနေဦးမယ်ဆိုရင်... သူတို့က ငါ ဘယ်သူလဲဆိုတာကို အတည်ပြုဖို့အတွက် ဒုတိယအကြိမ် စတင်ပြီးတော့ စမ်းသပ်ကြတော့မှာ သေချာတယ်...’
‘ဒါပေမဲ့... ငါက ဘာကို ပြောရမှာလဲ...’
သူသည် မိမိ နောက်ထပ် ပြောဆိုမည့် စကားလုံးက မိမိ၏ အသက်ရှင်သန်ခြင်း သို့မဟုတ် သေဆုံးခြင်းကို ဆုံးဖြတ်ပေးသွားမှာ ဖြစ်ကြောင်း သိရှိထားခဲ့သဖြင့် အနည်းငယ် တုံ့ဆိုင်းနေခဲ့ရတော့၏။
“ဟဲ... ဒါဆိုရင် မင်းတို့နှစ်ယောက်ကလည်း ရွှီရှောင်ရှို့ကို လာပြီးတော့ သတ်ဖြတ်ဖို့အတွက် ရောက်ရှိလာခဲ့ကြတာပေါ့... ဟုတ်လား...”
မိမိ၏ အသံကို ချက်ချင်းပင် နှိမ့်ချလိုက်တော့သည်။
“ဒါပေမဲ့... မင်းတို့ တကယ့်ကို နောက်ကျသွားခဲ့တာကတော့ နှမြောတသ ဖြစ်စရာပဲဥစ္စာ...” သူ၏ စကားလုံးများမှာ တကယ့်ကို အဓိပ္ပာယ် နက်ရှိုင်းလှပေသည်။
လက်တွေ့တွင် ဘာတွေ ဖြစ်ပျက်နေတာလဲ။
သူ့အနေဖြင့် ထိုလူများကို မိမိကိုယ်တိုင်က ထိုကောင်လေးကို သတ်ဖြတ်ပစ်လိုက်ပြီ ဖြစ်ကြောင်း အရိပ်အမြွက် ပြောဆိုလိုက်ခြင်း ဖြစ်ပေသည်၊ ဘုရားရေ... အရူးတွေကမှ ယခုလိုမျိုး အခြေအနေကို ယုံကြည်ကြမှာ ဖြစ်ပေသည်။
......
ဖုန်းကုန်းသည် ထိုကျောက်တုံးတောင်တုပေါ်က လူ၏ ခန္ဓာကိုယ်ကို စိုက်ကြည့်လိုက်မိရင်း မည်သည့် အချက်အလက်လေးကိုမျှ လွတ်ထွက်မသွားစေရန်အတွက် အာရုံစိုက်ထားခဲ့သည်။
ချွေးစေးများနှင့် မိုးရေများက သူ၏ ဦးခေါင်းအနောက်ဘက်သို့ စီးဆင်းနေခဲ့ပြီ ဖြစ်သည်။ သူ တစ်ကိုယ်လုံး အတွင်းထဲကနေ တုန်ရီနေခဲ့ရ၏
သူသည် မိမိ၏ စိတ်ထဲတွင် ထိုလူက ရွှီရှောင်ရှို့ ဖြစ်နေဆဲ ဖြစ်လိမ့်မည်ဟု ယုံကြည်ထားခဲ့သော်လည်း... ထိုလူ၏ တည်ငြိမ်လှသော ဟန်ဆောင်မှုများကြောင့် ဘာဖြစ်လို့လဲဟု သံသယ ဝင်နေခဲ့ရဆဲပင် ဖြစ်ပေသည်။
‘ဘာဖြစ်လို့ အဲဒီကောင်က... ယခုအချိန်အထိ ယခုလိုမျိုး အနေအထားကို တည်ငြိမ်စွာနဲ့ ထိန်းသိမ်းထားနိုင်ရတာလဲ...’
သူသည် မိမိ၏ အပေါင်းအဖော်ဖြစ်သူထံသို့ သိမ်မွေ့လှသော အကြည့်တစ်ချက် ပေးပို့လိုက်ရာ... ရှောက်ယီ ထိုအချက်ပြမှုကို ချက်ချင်းပင် နားလည်သဘောပေါက်သွားခဲ့ရတော့၏။
လှုပ်ရှားစို့
“ဟား...”
တကယ့်ကို လှောင်ပြောင် သရော်လှသော ရယ်မောသံတစ်ခု ထွက်ပေါ်လာခဲ့ရပြီး... ၎င်းက ရှောက်ယီအား ချက်ချင်း လှုပ်ရှားခြင်းမပြုနိုင်အောင် တားဆီးပစ်လိုက်တော့သည်။ ထိုကျောက်တုံးတောင်တုပေါ်က လူသည် မိမိ၏ ခေါင်းကို အနည်းငယ် ငုံ့ထားလိုက်မိရင်း ရေရွတ်လိုက်တော့၏
“မင်းတို့က... တကယ့်ကို စိတ်မရှည် ဖြစ်နေခဲ့ကြပြီပေါ့... ဟုတ်လား...”
၎င်းတို့နှစ်ဦးစလုံးမှာ ထိုလူ ပြောဆိုလိုက်သည့် စကားလုံးများကို ရှင်းလင်းစွာ ကြားရပေသည်၊ ၎င်းအပြင် ထိုလူ၏ လေသံအတွင်းက လှောင်ပြောင်သရော်မှုများကိုလည်း သေချာစွာ ခံစားလိုက်ရတော့၏။
ထိုလူသည် မိမိတို့နှင့်အတူ ကြောင်နှင့်ကြွက် ကစားပွဲတစ်ခုကို ကစားနေခဲ့သလိုမျိုး ပြုလုပ်နေခဲ့ခြင်း ဖြစ်ပေသည်၊ မိမိတို့၏ ကံကြမ္မာမှာ ထိုလူ၏ လက်ထဲတွင် ရှိနေခဲ့ပြီး ထိုလူသည် မိမိ၏ သားကောင်များ ရုန်းကန်နေခဲ့ကြသည်ကို ကြည့်ရှုရုံမျှဖြင့်တင် ပျော်ရွှင်နေခဲ့သည့်အလား ထင်မှတ်ရပေသည်
ဖုန်းကုန်း၏ မျက်ဝန်းအိမ်များမှာ ချက်ချင်းပင် ကျုံ့ဝင်သွားခဲ့ရပြီး တစ်ကိုယ်လုံးလည်း တုန်ရီသွားခဲ့ရတော့၏။
‘သူက မြင်တွေ့နေရတာလား...’
ထိုလူက ၎င်းတို့ရှိရာဘက်သို့ လှည့်၍ ကြည့်ရှုခြင်းမျိုး လုံးဝ မပြုလုပ်ခဲ့ပါချေ။ သို့သော် သူသည် မိမိနှင့် ရှောက်ယီအကြားက တကယ့်ကို သိမ်မွေ့လှသော စိတ်ချင်းဆက်သွယ်မှု အချက်ပြမှုကို ဘယ်လိုမျိုး နားလည်သဘောပေါက်သွားခဲ့ရတာလဲ
“ငါတို့တွေ သူ့ကို သွားပြီးတော့ သတ်ရမှာလား ဒါမှမဟုတ် ဘာလုပ်ရမှာလဲ...” ရှောက်ယီ တကယ့်ကို ရူးသွပ်လုနီးပါး ဖြစ်သွားခဲ့ရပြီ ဖြစ်သည်။
သူသည် လူအူတူတူတစ်ယောက် ဖြစ်နေခဲ့သည့်တိုင်အောင်ပင်... လက်ရှိအချိန်တွင် မိမိတို့နှစ်ဦးစလုံးမှာ စိတ်ပညာ ကစားပွဲတစ်ခုအတွင်းသို့ ရောက်ရှိနေခဲ့ပြီ ဖြစ်ကြောင်း သေချာစွာ သိရှိနိုင်စွမ်း ရှိပေသည်၊ သို့သော် ၎င်းက သူ ကိုယ်တိုင် ပါဝင်နိုင်စွမ်းမရှိသည့် ကစားပွဲတစ်ခု ဖြစ်သဖြင့် ဖုန်းကုန်းထံကနေ အချက်ပြမှုကိုသာ ဆက်လက်၍ စောင့်ဆိုင်းနေခဲ့ရခြင်း ဖြစ်ပေသည်
လက်ရှိအချိန်တွင်မူ...
ထိုအချက်ပြမှုက ထပ်မံ၍ ပျောက်ကွယ်သွားခဲ့ရပြန်ပြီ ဖြစ်၏။
အို... ဘုရားသခင်ရေ...
ရှောက်ယီ တကယ့်ကို ရူးသွပ်လုနီးပါး ဖြစ်သွားခဲ့ရတော့သည်