သူ၏ ခန္ဓာကိုယ်အတွင်းရှိ ငရဲမီးမျိုးစေ့မှာ သိသိသာသာ သေးငယ်သွားခဲ့ပြီး... သူ၏ ဝိညာဉ်စွမ်းအင် သိုလှောင်ရာအတွင်းရှိ ဝိညာဉ်စွမ်းအားများမှာလည်း အထင်အရှား တိုးပွားလာခဲ့သည်။
ရွှီရှောင်ရှို့ ပထမအကြိမ် သန့်စင်ခြင်းလုပ်ငန်းစဉ် ပြီးဆုံးသွားပြီးနောက်တွင်မူ ကျင့်ကြံခြင်းကို ခဏတာ ရပ်တန့်လိုက်တော့၏။
ဤလုပ်ငန်းစဉ်က သူ ထင်မှတ်ထားခဲ့သည်ထက် အဆပေါင်းများစွာ ပိုမိုလွယ်ကူနေခဲ့သည်။ သူ အလွန်အမင်း စိုးရိမ်ပူပန်နေခဲ့သည့် အန္တရာယ်ရှိသော အခြေအနေမျိုး တစ်ခုမျှ ဖြစ်ပေါ်လာခြင်း မရှိပါချေ။
သူသည် စိတ်ထဲ၌ တစ်မျိုးကြီး ခံစားလိုက်ရပြီး ထိုမီးမျိုးစေ့က အစွမ်းလျော့နည်းသွားခဲ့ခြင်းလားဟုပင် တွေးတောမိလိုက်သည်။
‘မဟုတ်သေးပါဘူး...’
သူ စိတ်ထဲကနေ တွေးလိုက်မိသည်
‘တစ်စုံတစ်ခု မှားယွင်းနေပြီ...’
သူသည် အခန်းတံခါးအပြင်ဘက်သို့ တည်ငြိမ်စွာ လျှောက်လှမ်းသွားလိုက်ပြီး ညဉ့်ဦးယံ လေပြေအေးများကို ခံယူလိုက်တော့၏။ ထို့နောက် သူ၏ နဖူးထက်သို့ လက်ညှိုးတစ်ချက် တင်လိုက်မိရင်း... ကောင်းကင်ယံကြီးကို တကယ့်ကို အထီးကျန်လှသော မျက်နှာအမူအရာဖြင့် မော့ကြည့်လိုက်တော့သည်။
“ငရဲမီးမျိုးစေ့က အစွမ်းလျော့သွားတာ မဟုတ်ပါဘူး၊ အဲဒါက...”
“ငါကိုယ်တိုင်က ပိုပြီးတော့ အစွမ်းထက်လာခဲ့တာပဲဥစ္စာ...”
ဝူး...
အေးစိမ့်လှသော လေပြေအေးများ တိုးဝှေ့တိုက်ခတ်လာခဲ့ပြီး မိုးရွာတော့မည့်အလား ဖြစ်ပေါ်နေခဲ့သည်။ ထိုအချိန်တွင် သူသည်
“မြင့်မြတ်လှသော်လည်း အထီးကျန်ဆန်ခြင်း”
ဆိုသည့် ခံစားချက်ကို တကယ့်ကို နားလည်သဘောပေါက်သွားခဲ့ရ၏။
အတန်ကြာမှတင် သူ လက်တွေ့ဘဝသို့ ပြန်လည်၍ အာရုံရောက်လာခဲ့တော့သည်။
ငရဲမီးမျိုးစေ့သည် သူ့အတွက် ခြိမ်းခြောက်မှုတစ်ခု မဟုတ်တော့သဖြင့်... သူသည် သန့်စင်ခြင်းနှုန်းကိုသာ ပိုမို၍ အရှိန်မြှင့်တင်လိုက်တော့၏။ ထိုအချိန်တွင် သူ၏ ရည်မှန်းချက်မှာ မီးမျိုးစေ့ကို သန့်စင်ရန်ထက် အလိုအလျောက်ရမှတ်များ ရှာဖွေရန်အတွက် ဖြစ်လာခဲ့သည်။ သို့သော် ၎င်းအပြင် အခြားသော အကြောင်းအရင်းတစ်ခုလည်း ရှိနေသေး၏။
သူသည် "ငရဲဘုံကောင်းကင်ယံကျင့်စဉ်" ကို အပြီးသတ် တတ်မြောက်ချင်နေခြင်း ဖြစ်ပေသည်။
၎င်းက သံသယဖြစ်ဖွယ်မရှိလောက်အောင် အလွန်အမင်း အစွမ်းထက်လှသော ဝိညာဉ်ကျင့်စဉ်တစ်ခု ဖြစ်ပြီး... ယခုကဲ့သို့ စဉ်းစားတွေးတောစရာမလိုဘဲ အားစိုက်ထုတ်ရုံမျှဖြင့် လေ့ကျင့်နိုင်သည့် နည်းလမ်းက သူ အလိုချင်ဆုံး အရာတစ်ခု မဟုတ်လား။
သူ၏ မျက်လုံးများအတွင်း၌ ပြတ်သားလှသော အရိပ်အယောင်များ ထပ်မံ၍ ဖြစ်ပေါ်လာခဲ့ပြီး တင်ပလ္လင်ခွေ ပြန်လည်ထိုင်လိုက်တော့၏။ သူသည် ပြင်းထန်လှသော နာကျင်မှုများကို အံတုလိုက်မိရင်း ခန္ဓာကိုယ်အနှံ့ရှိ ချွေးပေါက်များကနေ နီရဲသော မြူခိုးများကို ဘေးပတ်ဝန်းကျင်သို့ ထပ်မံ၍ ထုတ်လွှတ်လိုက်တော့သည်။
စုပ်ယူစမ်း...
ထပ်ပြီးတော့ ထုတ်လွှတ်စမ်း...
ပြန်ပြီးတော့ စုပ်ယူစမ်း...
ထုတ်လွှတ်စမ်း...
......
ယခုကဲ့သို့သော အချိန်မျိုးတွင် သူ၏ အတိတ်ဘဝတုန်းက ရောဂါဝေဒနာများကြောင့် ရရှိခဲ့သည့် ခံနိုင်ရည်စွမ်းအားများက တကယ့်ကို အသုံးဝင်လှပေသည်။
မိမိအနေဖြင့် တစ်စုံတစ်ခုသော ရည်မှန်းချက်နှင့် မျှော်လင့်ချက် ရှိနေသရွေ့... ထိုလုပ်ငန်းစဉ်က မည်မျှပင် နာကျင်စရာကောင်းနေပါစေ... သူ ဘယ်လိုနည်းနဲ့ဖြစ်ဖြစ် အောင်မြင်အောင် ပြုလုပ်မည့်လူစားမျိုး မဟုတ်လား။
အချိန်များ ကုန်ဆုံးသွားခဲ့သည်နှင့်အမျှ သူ၏ ခန္ဓာကိုယ်အတွင်းရှိ မီးမျိုးစေ့မှာ တဖြည်းဖြည်းနှင့် သေးငယ်သွားခဲ့ရပြီး စိတ်ထဲက အလိုအလျောက်ရမှတ်များမှာလည်း အဆက်မပြတ် မြင့်တက်လာခဲ့ရတော့၏။
“အလိုအလျောက်ရမှတ် - ၄၃၂၂၀ မှတ်။”
“အလိုအလျောက်ရမှတ် - ၅၃၄၄၉ မှတ်။”
“အလိုအလျောက်ရမှတ် - ၆၄၁၂၂ မှတ်။”
ညဉ့်နက်သန်းခေါင်ယံသို့ ရောက်ရှိသွားခဲ့သည့် အချိန်တွင်မူ... နောက်ဆုံးကျန်ရှိနေခဲ့သည့် ပြင်းထန်လှသော အပူရှိန်များအားလုံး သူ၏ ဝိညာဉ်စွမ်းအင် သိုဆောင်ရာအတွင်းသို့ လုံးဝ စုပ်ယူခြင်း ခံလိုက်ရပြီ ဖြစ်သည်။ သူ၏ ခန္ဓာကိုယ်အတွင်းရှိ ဝိညာဉ်စွမ်းအားများမှာ တကယ့်ကို ပြင်းထန်လှပြီး ခန္ဓာကိုယ်တစ်ခုလုံး ပြည့်နှက်သွားခဲ့ရတော့၏။
“ငါ အောင်မြင်သွားပြီ...”
သူ မျက်လုံးများကို ဖွင့်လိုက်သည့် အခါတွင်မူ မျက်ဝန်းများအတွင်း၌ တောက်လောင်နေသည့် မီးတောက်များအလား ဖြစ်ပေါ်နေခဲ့သည်။
သူသည် မိမိ၏ ခန္ဓာကိုယ်အတွင်းရှိ ပြင်းထန်လှသော စွမ်းအင်များကို အာရုံခံမိနေခဲ့ပြီး... မိမိကိုယ်မိမိ ပိုမို၍ အစွမ်းထက်လာခဲ့သည်ဟူသော ခံစားချက်မှာ ကျွမ်းကျင်မှုစွမ်းရည်များထဲသို့ စွမ်းရည်မြှင့်မှတ်များ ပုံအောထည့်လိုက်ရသလိုမျိုး တကယ့်ကို အားရကျေနပ်စရာကောင်းလှပေသည်။
သူ၏ ဝိညာဉ်စွမ်းအင် သိုလှောင်ရာ အထက်နားရှိ ငရဲမီးမျိုးစေ့မှာ လုံးဝ ပျောက်ကွယ်သွားခဲ့ပြီ ဖြစ်သော်လည်း... ငရဲဘုံဝိညာဉ်အရင်းအမြစ်စွမ်းအင်ကို လေ့ကျင့်နိုင်မှုနှုန်းမှာမူ ၈၀ ရာခိုင်နှုန်းကနေ ၉၀ ရာခိုင်နှုန်းခန့်အထိသာ ရှိနေသေး၏။
‘ဒီအဘိုးကြီးစုတ်... သူက ငါ့ရဲ့ အခြေအနေကိုပါ ကြိုတင်ပြီးတော့ တွက်ချက်ထားခဲ့တာ မဟုတ်လား’
ထို့နောက် သူသည် နောက်ထပ် မီးမျိုးစေ့တစ်ခု ပါဝင်သည့် ဆေးပုလင်းကို ထုတ်ယူလိုက်တော့၏။
သူ၏ မျက်နှာမှာ အနည်းငယ် တွန့်ရှုံ့သွားခဲ့ရပြီး... အိမ်စာများစွာ ကျန်ရှိနေသေးသည့် ကလေးငယ်တစ်ယောက်ကဲ့သို့ ခံစားလိုက်ရသည်။
“တောက်... သွားစမ်းပါ...”
သူ ပြန်လည်၍ ထိုင်လိုက်မိရင်း အနားယူရန် အတွေးများကို လုံးဝ ဖျောက်ဖျက်ပစ်လိုက်တော့၏။ သူ ကောင်းကင်ယံကြီးကို မော့ကြည့်လိုက်မိရင်း... နေမထွက်ခင်မှာတင် ထိုငရဲဘုံဝိညာဉ်အရင်းအမြစ်စွမ်းအင်ကို ရအောင် ရယူမည်ဟု စိတ်ပိုင်းဖြတ်လိုက်တော့သည်။
သူ တတိယမြောက် မီးမျိုးစေ့ကို မြိုချလိုက်မိရင်း သန့်စင်ခြင်းလုပ်ငန်းစဉ်ကို စတင်လိုက်တော့၏။
ညဉ့်ဦးယံအချိန်မှာ တကယ့်ကို တိတ်ဆိတ်ငြိမ်သက်နေခဲ့ပြီး လေပြေအေးများ ဖြူးဖြူး သွေးနေခဲ့ကာ အပြင်ဘက်တွင်မူ မိုးဖွဲဖွဲ ရွာသွန်းနေခဲ့သည်။
တကယ်လို့ အကြီးအကဲ စန်းသာ ဤနေရာတွင် ရှိနေခဲ့မည်ဆိုပါက... ရွှီရှောင်ရှို့ ပြသနေခဲ့သည့် ကြောက်မက်ဖွယ်ကောင်းလှသော ခံနိုင်ရည်စွမ်းအားများကြောင့် သေချာပေါက် အံ့အားသင့်သွားခဲ့ရမှာ ဖြစ်ပေသည်
သူ့အနေဖြင့် ထိုလုလင်ပျိုလေးကို တတိယမြောက် ငရဲမီးမျိုးစေ့အား ပေးအပ်ခဲ့သည်မှာ အမှန်ပင် ဖြစ်သော်လည်း... ထိုကောင်လေးက တစ်ရက်တည်းဖြင့်တင် မီးမျိုးစေ့ နှစ်ခုအထိ သန့်စင်နိုင်လိမ့်မည်ဟု မည်သည့်အခါမျှ ထင်မှတ်ထားခဲ့ခြင်း မရှိပါချေ။
၎င်းက ခံနိုင်ရည်ရှိမှုထက် ပိုမိုလွန်ကဲနေခဲ့ပြီ ဖြစ်ရာ... တကယ့်ကို အရူးတစ်ယောက်ကဲ့သို့ မိမိကိုယ်မိမိ နာကျင်အောင် ပြုလုပ်နိုင်စွမ်းရှိသည့် လူစားမျိုးသာ ယခုကဲ့သို့သော အရာကို လုပ်ဆောင်နိုင်စွမ်း ရှိမှာ ဖြစ်သည်။
ဝူး...
နီရဲသော မြူခိုးများ ထွက်ပေါ်လာခဲ့ရပြီး သူ နောက်တစ်ကြိမ် နာကျင်မှုများကို အံတုလိုက်ရပြန်သည်။
“တိုက်ခိုက်ခံရမှု၊ အလိုအလျောက်ရမှတ် +၁”
“တိုက်ခိုက်ခံရမှု၊ အလိုအလျောက်ရမှတ် +၁”
“......”
သူ၏ ခန္ဓာကိုယ်မှာ အကြိမ်ကြိမ် အဖန်ဖန် လောင်ကျွမ်းခြင်း ခံနေရသော်လည်း နာကျင်မှုများနှင့်အတူ အလိုအလျောက်ရမှတ်များလည်း တိုးပွားလာခဲ့ရ၏။
“အလိုအလျောက်ရမှတ် - ၇၃၃၂၂ မှတ်။”
“အလိုအလျောက်ရမှတ် - ၈၁၀၀၈ မှတ်။”
“......”
အချိန်များ တရွေ့ရွေ့ ကုန်ဆုံးသွားခဲ့သည်။ သူ၏ ဝိညာဉ်စွမ်းအင် သိုလှောင်ရာအတွင်းရှိ မြူခိုးများအလား ဖြစ်ပေါ်နေခဲ့သော ဝိညာဉ်စွမ်းအားများမှာ တဖြည်းဖြည်းနှင့် ပျစ်ခဲလာခဲ့ရပြီး... နီရဲသော အရောင်အသွေးများမှာလည်း တဖြည်းဖြည်းနှင့် လျော့ပါးကာ ကြည်လင်တောက်ပသော အသွင်သို့ ပြောင်းလဲလာခဲ့ရတော့၏။
သူ၏ ခန္ဓာကိုယ်အတွင်းရှိ မြူခိုးများအလား ဖြစ်ပေါ်နေသော ဝိညာဉ်စွမ်းအားများမှာ နောက်ဆုံးတွင် ဂျယ်လ် ကဲ့သို့ ပျစ်ခဲသွားခဲ့သည့် အခါတွင်မူ... ၎င်းက မိမိအနေဖြင့် ငရဲဘုံဝိညာဉ်အရင်းအမြစ်စွမ်းအင်ကို အောင်မြင်စွာ ရရှိသွားခဲ့ပြီ ဖြစ်ကြောင်း သက်သေပြလိုက်ခြင်းပင်။
သူ၏ ခန္ဓာကိုယ်အတွင်း၌ မီးမျိုးစေ့ အနည်းငယ်သာ ကျန်ရှိတော့သည့် အချိန်တွင်မူ သူ လေကို ခပ်ပြင်းပြင်း ရှူထုတ်လိုက်မိရင်း ပြင်းထန်လှသော နာကျင်မှုများကို လုံးဝ လျစ်လျူရှုကာ... ၎င်းတို့ကို မိမိ၏ ဝိညာဉ်စွမ်းအင် သိုလှောင်ရာအတွင်းသို့ ပေါင်းစပ်ပစ်လိုက်တော့၏။
ဝုန်း...
သူ၏ ဝိညာဉ်စွမ်းအင် သိုလှောင်ရာအတွင်း၌ ပြင်းထန်လှသော မြည်ဟီးသံတစ်ခု ထွက်ပေါ်လာခဲ့ရပြီး... သူ၏ ဝိညာဉ်စွမ်းအားများမှာ လုံးဝ ပျစ်ခဲသွားခဲ့ကာ နီရဲသော ဝိညာဉ်အရင်းအမြစ်စွမ်းအင်အဖြစ် ပြောင်းလဲသွားခဲ့ရတော့သည်
ထွက်ပေါ်လာသည့် ပြင်းထန်လှသော စွမ်းအင်လှိုင်းလုံးများကြောင့် သူ အဆင့်တက်လှမ်းနိုင်ခဲ့ပြီ ဖြစ်၏။
သူသည် ဝိညာဉ်ကျင့်ကြံခြင်းအဆင့် (၉) သို့ ရောက်ရှိသွားခဲ့ပြီ ဖြစ်ပေသည်။
ထိုဝိညာဉ်အရင်းအမြစ်စွမ်းအင်များ ငြိမ်သက်သွားခဲ့သည့် အခါတွင်မူ နီရဲသော အရောင်အသွေးများမှာ ကွယ်ပျောက်သွားခဲ့ရပြီး ဖြူစင်ဝင်းပသော အသွင်သို့ ပြောင်းလဲသွားခဲ့ကာ အရာအားလုံး ပြန်လည်၍ တိတ်ဆိတ်ငြိမ်သက်သွားခဲ့တော့၏။
ဟူး...
သူ လေကို ခပ်ပြင်းပြင်း တစ်ချက် မှုတ်ထုတ်လိုက်မိရင်း သူ၏ မျက်နှာထက်တွင် စိတ်လှုပ်ရှားလှသော အမူအရာများ ဖြစ်ပေါ်လာခဲ့တော့သည်။
သူ အောင်မြင်သွားခဲ့ပြီ။
ထိုငရဲဘုံဝိညာဉ်အရင်းအမြစ်စွမ်းအင်မှာ ဖြူစင်ဝင်းပသော အသွင်ရှိပြီး အလွန်အမင်း ပြင်းထန်လှသော စွမ်းအင်များနှင့် အမြင့်မားဆုံးသော အပူရှိန်များကို သိုလှောင်ထားခဲ့ခြင်း ဖြစ်ပေသည်။ ၎င်းက တောင်တန်းကြီးတစ်ခုကဲ့သို့ ငြိမ်သက်နေနိုင်သလို... မိုးကြိုးမုန်တိုင်းတစ်ခုကဲ့သို့လည်း ပြင်းထန်စွာ မြည်ဟီးနိုင်စွမ်း ရှိပေသည်။
ထို့နောက် သူသည် မိမိ၏ ခန္ဓာကိုယ်အတွင်းရှိ ဝိညာဉ်အရင်းအမြစ်စွမ်းအင်ကို ထုတ်ယူရန်အတွက် ကြိုးစားလိုက်တော့၏။ ထိုစွမ်းအင် အနည်းငယ်မျှသည်ပင်လျှင် ယခင်က ဝိညာဉ်စွမ်းအား သက်သက်ဖြင့် ထုတ်လွှတ်ခဲ့စဉ်ကထက် အဆပေါင်းများစွာ ပိုမိုပြင်းထန်လှသော အပူရှိန်များကို သိုလှောင်ထားခဲ့ခြင်း ဖြစ်ပေသည်
သူ ၎င်းကို မိမိ၏ လက်ညှိုးထိပ်ဖျားထံသို့ ပို့ဆောင်လိုက်မိရင်း ကြမ်းပြင်ပေါ်သို့ ထိုးချရန် ပြုလုပ်လိုက်တော့၏။ သို့သော် အံ့ဩစရာကောင်းလှသည်မှာ သူ၏ လက်ညှိုး ကြမ်းပြင်နှင့် မထိတွေ့ရသေးခင်မှာတင် ကြမ်းပြင်ပေါ်က ကျောက်တုံးများမှာ အရည်ပျော်ကျသွားခဲ့ခြင်း ဖြစ်ပေသည်။
“ဝါး... ဒါက တကယ့်ကို အလန်းစားပဲဥစ္စာ...”
ရွှီရှောင်ရှို့ တကယ့်ကို စိတ်လှုပ်ရှားသွားခဲ့ရသည်။ သူ၏ တိုက်ခိုက်နိုင်စွမ်း စွမ်းပကားမှာ သိသိသာသာကို မြင့်တက်သွားခဲ့ပြီ မဟုတ်လား။
တကယ်လို့ သူ့အနေဖြင့် ယခုစွမ်းအင်အပေါ်တွင် "ခွန်အားမြင့်တင်ခြင်း" စွမ်းရည်နှင့် "ထက်မြက်ခြင်း" စွမ်းရည်တို့ကိုပါ ပေါင်းစပ်လိုက်မည်ဆိုပါက ဘာတွေ ဖြစ်ပျက်လာမလဲဆိုတာကို သူ စဉ်းစားတွေးတောလိုက်မိသည်။
သောက်ကျိုးနည်း...
သူ တံတွေးတစ်ချက် မျိုချလိုက်မိ၏။ မိမိအနေဖြင့် လူသားအဆင့်တွင် ရှိနေသေးသည့်တိုင်အောင်ပင်... မွေးရာပါအဆင့် မီးဓာတ်သဘာဝ စွမ်းအင်များကို ကျွမ်းကျင်အောင် လေ့ကျင့်နိုင်ခဲ့ပြီး ယခုကဲ့သို့ ကြောက်မက်ဖွယ်ကောင်းလှသော ငရဲဘုံဝိညာဉ်အရင်းအမြစ်စွမ်းအင်ကို ပိုင်ဆိုင်နိုင်ခဲ့သဖြင့် မိမိကိုယ်မိမိ တကယ့်ကို ပါရမီရှင်တစ်ဦးအဖြစ် သတ်မှတ်နိုင်မလားဟု သူ တွေးတောလိုက်မိသည်။
“ကောင်းပါပြီ... အခုကစပြီးတော့ ငရဲဘုံကောင်းကင်ယံမီးတောက်ကို လေ့ကျင့်ရမယ့် အချိန်ပဲ”
ကျောက်စိမ်းပေလွှာ၏ ဖော်ပြချက်အရမူ... ငရဲဘုံကောင်းကင်ယံကျင့်စဉ်၏ နောက်ထပ် အဆင့်တစ်ခုမှာ ထိုငရဲဘုံကောင်းကင်ယံမီးတောက် ကို ရရှိအောင် ပြုလုပ်ရန် ဖြစ်ပေသည်။
ဖြူစင်ဝင်းပလှသော ဝိညာဉ်အရင်းအမြစ်စွမ်းအင်များ ထွက်ပေါ်လာခဲ့ရပြီး သူ၏ လက်ဝါးအလယ်ဗဟိုထံသို့ စုစည်းသွားခဲ့သဖြင့် အခန်းအတွင်းရှိ အပူချိန်မှာ ရုတ်တရက်ဆိုသလို မြင့်တက်သွားခဲ့ရတော့၏။
သူသည် မိမိ၏ စိတ်အလိုအတိုင်း ထိုဝိညာဉ်အရင်းအမြစ်စွမ်းအင်ကို ထိန်းချုပ်လိုက်မိရင်း ၎င်းကို တတ်နိုင်သမျှ ဖိသိပ်ပစ်ရန် ကြိုးစားလိုက်တော့သည်။ သူ၏ လက်ဝါးထက်က အမှတ်တစ်ခုတည်းတွင် ကြောက်မက်ဖွယ်ကောင်းလှသော စွမ်းအင်များ စုစည်းသွားခဲ့သည်ကို သူ သေချာပေါက် အာရုံခံမိနေခဲ့၏။
သူ့တစ်ကိုယ်လုံး ချွေးများ ရွှဲနစ်နေခဲ့ရသည်။ သူ လုံးဝ သတိမပေါ့ရဲပါချေ သူ၏ အာရုံခံစွမ်းရည် ကို အမြင့်မားဆုံးအထိ ဖွင့်လှစ်လိုက်မိရင်း မိမိ၏ လက်ဝါးထက်က စွမ်းအင်များကို အနုစိတ်ဆုံး အခြေအနေအထိ ထိန်းချုပ်လိုက်တော့၏။
မိမိအနေဖြင့် အနည်းငယ်မျှ ဂရုမစိုက်ဘဲ ဖြစ်သွားခဲ့မည်ဆိုပါက ယခုစွမ်းအင်များမှာ ပြင်းထန်စွာ ပေါက်ကွဲသွားနိုင်ပြီး သူကိုယ်တိုင်လည်း သေဆုံးသွားနိုင်ကြောင်း သူ ကောင်းစွာ သိရှိထားသည် မဟုတ်လား
သူ အလွန်အမင်း ဂရုတစိုက်ဖြင့် ထိန်းချုပ်လိုက်မိရင်း အဆက်မပြတ် ညှိနှိုင်းမှုများကို ပြုလုပ်လိုက်တော့၏။
သူ၏ လက်ဝါးထက်က ဖြူစင်ဝင်းပလှသော အစက်အပြောက်လေးမှာ အလွန်အမင်း ဖိသိပ်ခြင်း ခံလိုက်ရသဖြင့် မကြာခင်မှာတင် လုံးဝ ပျောက်ကွယ်သွားခဲ့ရတော့သည်။
ဖောက်... ဖောက်...
သူသည် မီးပွားများ ထွက်ပေါ်လာသည့် အသံကို တကယ့်ကို ရှင်းလင်းပြတ်သားစွာ ကြားသိလိုက်ရ၏။
သူ မိမိ၏ လက်ဝါးကို လှမ်းကြည့်လိုက်သည်။ ဘာတစ်ခုမှ မြင်တွေ့ရခြင်း မရှိပါချေ သို့သော် ထိုနေရာတွင် အလွန်အမင်း ဖိသိပ်ထားခဲ့သည့် ပြင်းထန်လှသော စွမ်းအင်စိုင်အခဲကြီးတစ်ခု ရှိနေကြောင်းကိုမူ သူ သေချာပေါက် အာရုံခံမိနေခဲ့သည်
ထိုငရဲဘုံကောင်းကင်ယံမီးတောက်မှာ မည်သည့်အရောင်အသွေးမျှ ရှိမနေပါချေ။ ၎င်းက လုံးဝ ကြည်လင်တောက်ပနေခဲ့ခြင်း ဖြစ်ပြီး ရံဖန်ရံခါတွင်မူ ဖြူစင်လှသော မီးပွားလေးများသာ ထွက်ပေါ်လာတတ်စမြဲ ဖြစ်၏။ ၎င်းက အရာအားလုံးကို ပြာအဖြစ် ပြောင်းလဲပစ်နိုင်စွမ်း ရှိပေသည်။
ကျောက်စိမ်းပေလွှာထဲတွင် ထိုကဲ့သို့ ရေးသားထားခဲ့ခြင်း ဖြစ်ပြီး ၎င်းက အမွှမ်းတင်ထားခြင်းမျိုးလားဆိုတာကို သူ စဉ်းစားတွေးတောလိုက်မိသည်။ ထို့နောက် သူ ခဏမျှ တွေးတောလိုက်မိရင်း ဝိညာဉ်ကျောက်တုံး တစ်တုံးကို ထုတ်ယူလိုက်တော့၏။
ထိုအရာက တကယ့်ကို ခိုင်မာလှပြီး မြင့်မားလှသော စွမ်းအင်များကို သိုလှောင်ထားခဲ့ခြင်း ဖြစ်သဖြင့် စမ်းသပ်မှုပြုလုပ်ရန်အတွက် အကောင်းဆုံးသော အရာတစ်ခု မဟုတ်လား။
သူသည် မိမိ၏ ညာဘက်လက်ဝါးထက်က မြင်တွေ့ရခြင်းမရှိသည့် စွမ်းအင်များရှိရာ နေရာသို့ ထိုဝိညာဉ်ကျောက်တုံးကို အပေါ်ကနေ ကိုင်မြှောက်ထားလိုက်တော့သည်။ သို့သော် အံ့ဩစရာကောင်းလှသည်မှာ သူ လက်ကို မလွှတ်ရသေးခင်မှာတင် ထိုဝိညာဉ်ကျောက်တုံးမှာ အငွေ့ပျံစပြုလာခဲ့ခြင်း ဖြစ်ပေသည်
“သောက်ကျိုးနည်း...”
သူ အလွန်အမင်း အံ့အားသင့်သွားခဲ့ရသဖြင့် လက်ထဲက ဝိညာဉ်ကျောက်တုံးကို ချက်ချင်းပင် လွှတ်ချလိုက်မိတော့၏။
ရှူး...
ထိုဝိညာဉ်ကျောက်တုံး အောက်သို့ လဲကျသွားခဲ့ရပြီး... သူ၏ လက်ဝါးနှင့် မီတာအနည်းငယ်အကွာ အကွာအဝေးသို့ ရောက်ရှိသွားခဲ့သည့် အချိန်တွင်မူ ၎င်းက လုံးဝ အငွေ့ပျံသွားခဲ့ရပြီး ဘေးပတ်ဝန်းကျင် တစ်ခုလုံးသို့ ထူထပ်လှသော ဝိညာဉ်စွမ်းအားများ ပျံ့နှံ့သွားခဲ့ရတော့သည်။
“ဘုရားသရေ...”
သူ တကယ့်ကို ထိတ်လန့်တုန်လှုပ်သွားခဲ့ရပြီး ယခုကဲ့သို့သော ဖြစ်စဉ်က တကယ့်ကို ကြောက်စရာကောင်းလှသည်ဟု ယူဆလိုက်မိသည်။ သူ၏ လက်ထဲက မီးတောက်လေးမှာ လုံးဝ ကြည်လင်တောက်ပနေခဲ့သော်လည်း ယခုကဲ့သို့ ကြောက်မက်ဖွယ်ကောင်းလှသော အပူရှိန်များကို သိုလှောင်ထားခဲ့ခြင်း ဖြစ်ပေရာ... ၎င်းကို မည်သူက ခုခံနိုင်စွမ်း ရှိမှာလဲဟု သူ တွေးတောလိုက်မိသည်။
သူ သူ၏ စိတ်အလိုအတိုင်း ထိုလက်ဝါးထက်က မီးတောက်လေးကို သူ၏ ဝိညာဉ်စွမ်းအင် သိုလှောင်ရာအတွင်းသို့ ပြန်လည်၍ သိမ်းဆည်းလိုက်မိရင်း... ထိုဝိညာဉ်ကျောက်တုံးကနေ ထွက်ပေါ်လာခဲ့သည့် ဝိညာဉ်စွမ်းအင် မြူခိုးများကိုပါ အတူတကွ စုပ်ယူပစ်လိုက်တော့၏။
၎င်းက သူ၏ အသက်ရှူကျင့်စဉ်ကို အသုံးပြုသည့် နည်းလမ်းတစ်ခု ဖြစ်ပေသည် မည်သည့်အရာကိုမျှ အလဟဿမဖြစ်စေဘဲ အားလုံးကို အပြည့်အဝ စုပ်ယူပစ်ခြင်း ဖြစ်၏
“ဟူး...”
ရွှီရှောင်ရှို့ နေသာထိုင်သာ ရှိစွာဖြင့် ညည်းတွားလိုက်မိတော့သည်။ ထိုပြင်းထန်လှသော စွမ်းအင်များ သူ၏ ခန္ဓာကိုယ်အတွင်းသို့ စိမ့်ဝင်သွားခဲ့ရပြီး တစ်ညလုံး ပင်ပန်းနွမ်းနယ်ခဲ့ရသမျှသော အရာများကို ချက်ချင်းပင် ဖယ်ရှားပေးလိုက်တော့၏။
သူ လက်သီးကို တင်းတင်းဆုပ်လိုက်မိရင်း အရာအားလုံးက တကယ့်ကို အဆင်ပြေချောမွေ့စွာ ပြီးဆုံးသွားခဲ့ပြီ ဖြစ်ကြောင်း သတိပြုမိလိုက်သည်။ ယခုအချိန်တွင်မူ သူသည် ထိုအစွမ်းထက်လှသော ဝိညာဉ်ကျင့်စဉ်ကြီးကို အပြီးသတ်တတ်မြောက်ရန်အတွက် နောက်ထပ် ခြေလှမ်းတစ်လှမ်းသာ လိုအပ်တော့သည် မဟုတ်လား။