“ဂိုဏ်းတူအစ်ကိုကြီးကိုယ်တိုင် လက်မတင်ချင်ဘူးဆိုရင်တော့ ကျွန်မပဲ ရွှီရှောင်ရှို့ကို သတ်ပေးလိုက်ပါ့မယ်”
လန်ရှင်းဇီက ပုခုံးတွန့်ပြလိုက်ရာ သူမ၏ ဝတ်စုံမှာ ပုခုံးထက်ကနေ အောက်သို့ ပိုမို၍ လျှောကျသွားခဲ့ရသည်။
“အတွင်းစည်းဂိုဏ်းရဲ့ အယောက်သုံးဆယ့်သုံးယောက်ထဲက တစ်ယောက်က... လေနှင့်တိမ်တိုက်သိုင်းပြိုင်ပွဲမှာ အခုတင်ပဲ ချန်ပီယံဖြစ်လာတဲ့ အပြင်စည်းဂိုဏ်းသားတစ်ယောက်ကို သတ်မယ်ဟုတ်လား”
ကျန်းရှင်းရှုံက သူမကို စိုက်ကြည့်လိုက်ရင်း မေးမြန်းလိုက်၏
“မင်း ဒါကို ဘယ်လိုမျိုး လုပ်မှာလဲ”
“လုပ်ကြံသတ်ဖြတ်မှာပေါ့”
လန်ရှင်းဇီ သူမ၏ မေးစေ့ကို အနည်းငယ် ပင့်တင်လိုက်မိရင်း သူမ၏ မျက်လုံးများအတွင်း၌ လှောင်ပြောင်လိုသည့် အကြည့်များ ဖြစ်ပေါ်လာခဲ့တော့၏
“ဂိုဏ်းတူနောင်ကြီးကိုယ်တိုင်ပဲ ပြောခဲ့တာပဲဥစ္စာ၊ သူက အပြင်စည်းဂိုဏ်းသား သက်သက်ပဲလေလို့...”
“ဟဲဟဲ... သူက အပြင်စည်းဂိုဏ်းသား သက်သက်ပဲ ဟုတ်လား”
“ရွှီရှောင်ရှို့ကို သတ်ဖြတ်ဖို့က တကယ့်ကို လွယ်ကူလှပါတယ်၊ ဒါပေမဲ့ မင်းအနေနဲ့ ဝိညာဉ်ဥပဒေထိန်းသိမ်းရေးဌာနရဲ့ အမှုဆောင်အကြီးအကဲကို အဲဒီလောက်အထိ အလွယ်တကူ လှည့်စားနိုင်လိမ့်မယ်လို့ တကယ်ပဲ ထင်နေတာလား”
“မင်း သူ့ကို ဒီနေ့ သတ်လိုက်ရင် မင်းကို မနက်ဖြန်ကျရင် ကွပ်မျက်လိမ့်မယ်”
ကျန်းရှင်းရှုံ ခပ်ဖွဖွလေး ရယ်မောလိုက်တော့၏။
“ဒါဆိုရင် ဂိုဏ်းတူအစ်ကိုကြီးက ကျွန်မအတွက် စိတ်ပူနေတာပေါ့လေ...”
လန်ရှင်းဇီ သူမ၏ မျက်နှာပေါ်တွင် တောက်ပလှသော အပြုံးတစ်ခုကို ချက်ချင်းပင် ဖန်တီးလိုက်တော့၏။
“ငါက ဒီကောင့် ကြောင့် ငါ့ကိုယ်ငါ အကျပ်အတည်းဖြစ်အောင် မလုပ်ချင်ရုံ သက်သက်ပါ”
ကျန်းရှင်းရှုံ အဝေးတစ်နေရာသို့ လှမ်း၍ ကြည့်ရှုလိုက်မိရင်း သူ၏ မျက်နှာထက်တွင် ရည်မှန်းချက်ကြီးမားလှသော အမူအရာများ ဖြစ်ပေါ်လာခဲ့တော့၏
“ထျန်းစန်းနယ်မြေဆိုတာ ငါ့အတွက် ဘာမှမဟုတ်ပါဘူး၊ နောက်ထပ် လဝက်လောက်ကြာရင် ဒုံးထျန်းဝမ်မြို့တော် မှာ ဖြစ်ပေါ်လာမယ့် တကယ့်အစွမ်းထက်တဲ့ ပါရမီရှင်တွေရဲ့ တိုက်ပွဲကမှ ငါ့အတွက် အဓိကပဲ”
လန်ရှင်းဇီ ထိုလူ၏ ပြတ်သားလှသော မျက်နှာသွင်ပြင်ကို တကယ့်ကို တောင့်တလှသော အကြည့်များဖြင့် စိုက်ကြည့်နေမိတော့၏။ ကျန်းရှင်းရှုံ၏ ခေါင်းဆောင်ကောင်းတစ်ဦးကဲ့သို့သော မြင့်မြတ်လှသည့် အရှိန်အဝါများက သူမကို အမြဲတမ်း စိတ်လှုပ်ရှားစေခဲ့သည် မဟုတ်လား။
ထိုလူက သူမကို လုံးဝ စိတ်မဝင်စားခြင်းအပေါ် သူမ တကယ့်ကို နှမြောစရာကောင်းလှသည်ဟု တွေးတောလိုက်မိသည်။
ကျန်းရှင်းရှုံ အနောက်သို့ ပြန်လည်၍ လှည့်ကြည့်လိုက်သည့် အခါတွင်မူ သူမ အနည်းငယ် ပျာယာခတ်သွားခဲ့ရတော့၏။ ထို့နောက် သူက တည်ငြိမ်လှသောအသံဖြင့် ပြောဆိုလိုက်သည်
“ရွှီရှောင်ရှို့ကို သေချာစောင့်ကြည့်ဖို့အတွက် လူအချို့ကို စီမံလိုက်ပါ၊ မှတ်ထားစမ်း... ဘာတစ်ခုမှ စိတ်လိုက်မာန်ပါ မပြုလုပ်ပါနဲ့”
“ကောင်းပါပြီရှင့်... ကျွန်မရဲ့ သခင်ကြီး ကျန်း...”
လန်ရှင်းဇီ ခပ်ဖွဖွလေး ရယ်မောလိုက်မိရင်း မေးမြန်းလိုက်ပြန်သည်
“အရက် ထပ်သောက်ဦးမလားရှင့်”
“တော်ပြီ... ငါ အပြင်သွားစရာ ရှိတယ်”
“ဘယ်ကို သွားမလို့လဲရှင့်”
“မင်းနဲ့ မဆိုင်ဘူး”
လန်ရှင်းဇီ၏ မျက်နှာအမူအရာမှာ ချက်ချင်းပင် ပျက်ယွင်းသွားခဲ့ရပြီး စားပွဲပေါ်က အရက်ကရားကို ပြင်းထန်စွာ ရိုက်ချလိုက်မိရင်း အော်ဟစ်လိုက်တော့၏
“ဂိုဏ်းတူအစ်ကိုကြီးအနေနဲ့ ရောင်းရင်ရင် ဆိုတဲ့ကောင်မ ဆီကို သွားရှာမလို့ မဟုတ်လား”
ကျန်းရှင်းရှုံ ခြေလှမ်းများကို ရပ်တန့်လိုက်မိရင်း အနောက်သို့ ဖြည်းညှင်းစွာ ပြန်လည်၍ လှည့်ကြည့်လိုက်တော့၏။ သူ၏ မျက်လုံးများအတွင်းရှိ အကြည့်များမှာ လူတစ်ယောက်ကို အရှင်လတ်လတ် ဝါးမြိုပစ်တော့မည့်အလား တကယ့်ကို ကြောက်မက်ဖွယ်ကောင်းလှပေသည်။ “ထိုစကားကို နောက်တစ်ကြိမ် ထပ်ပြီး ပြောစမ်းပါဦး”
လန်ရှင်းဇီ အနောက်သို့ အနည်းငယ် ဆုတ်လိုက်မိရင်း ကုလားထိုင်ပေါ်သို့ လဲကျသွားခဲ့ရတော့၏။
ကျန်းရှင်းရှုံ ဒေါသထွက်သွားခဲ့ရသည့် အခါတွင်မူ သူ၏ ခန္ဓာကိုယ်ထံက ထွက်ပေါ်လာသည့် ကြောက်မက်ဖွယ်ကောင်းလှသော အရှိန်အဝါများမှာ ကမ်းခြေသို့ ရိုက်ခတ်လာသည့် ဆူနာမီလှိုင်းလုံးကြီးတစ်ခုကဲ့သို့ သူမထံသို့ တိုးဝှေ့ဝင်ရောက်လာခဲ့ခြင်း ဖြစ်ပေသည်။ သူမကိုယ်တိုင်သည်လည်း ကျန်းရှင်းရှုံကဲ့သို့ပင် အထက်တန်း ဝိညာဉ်အဆင့် တွင် ရှိနေခဲ့သော်လည်း ထိုဖိအားကို လုံးဝ မခုခံနိုင်ဘဲ ဖြစ်နေခဲ့ရ၏
သို့သော်လည်း လန်ရှင်းဇီ ယခုတစ်ကြိမ်တွင်မူ အလျှော့မပေးတော့ပါချေ။ သူမ ချက်ချင်းပင် မတ်တပ်ရပ်လိုက်မိရင်း ဒေါသတကြီးဖြင့် ပြန်လည်၍ အော်ဟစ်လိုက်တော့၏
“ဂိုဏ်းတူအစ်ကို ကြီးအနေနဲ့ သူမရဲ့ နေရာအတွင်းကိုတောင် ဝင်ရောက်ခွင့် ရမှာမဟုတ်ပါဘူး၊ အကြိမ်ကြိမ် ကြိုးစားခဲ့ပြီးပြီပဲဥစ္စာ၊ အခုလိုမျိုး ထပ်ပြီးတော့ ကြိုးစားနေရတာရဲ့ အဓိပ္ပာယ်က ဘာလဲရှင့်”
ကျန်းရှင်းရှုံ ပြင်းထန်လှသော ခြေလှမ်းများဖြင့် သူမထံသို့ လျှောက်လှမ်းသွားလိုက်တော့၏။ သူ၏ မျက်နှာအမူအရာမှာ တကယ့်ကို ပျင်းရိငြီးငွေ့ဖွယ် အသွင်သို့ ပြောင်းလဲသွားခဲ့ရပြီး သူမကို ကုလားထိုင်ပေါ်သို့ အတင်းအဓမ္မ တွန်းချလိုက်မိရင်း ဖြည်းညှင်းစွာ ပြောဆိုလိုက်တော့၏
“အချို့သောအရာတွေက မင်း နားလည်နိုင်တဲ့ အဆင့်ထက် ကျော်လွန်လွန်းလှတယ်...”
“မင်းမှာ တကယ့်ကို ကောင်းမွန်တဲ့ ပါရမီတွေ ရှိတယ်၊ အခုလည်း အတွင်းစည်းဂိုဏ်းရဲ့ အစိတ်အပိုင်းတစ်ခု ဖြစ်နေပြီပဲဥစ္စာ၊ ဒါကြောင့် မင်းရဲ့ ကျင့်ကြံခြင်းအပေါ်မှာပဲ အပြည့်အဝ အာရုံစိုက်လိုက်စမ်းပါ၊ ကျန်တဲ့အရာမှန်သမျှကို မေ့ပစ်လိုက်စမ်း...”
“မင်းရဲ့ တည်ရှိမှုကို မင်းကိုယ်တိုင် သေချာအောင် သိထားစမ်းပါ၊ မင်းက ကျန်းမိသားစုရဲ့ အစေခံ သက်သက်ပဲ၊ သတင်းပို့ပေးရတဲ့လူ တစ်ယောက်ပဲဥစ္စာ...”
“အဲဒီထက် မပိုဘူး...”
လန်ရှင်းဇီ ကျန်းရှင်းရှုံ၏ ပုံရိပ် ပျောက်ကွယ်သွားခဲ့သည့် အချိန်အထိ ဆွံ့အစွာဖြင့် ငေးမောကြည့်ရှုနေမိတော့၏။ ထို့နောက် သူမ၏ တောင့်တင်းနေခဲ့သော ခန္ဓာကိုယ်မှာ ချက်ချင်းပင် ပျော့ခွေသွားခဲ့ရပြီး ကျောပြင်တစ်ခုလုံးလည်း အေးစိမ့်လှသော ချွေးများဖြင့် စိုရွှဲနေခဲ့ပြီ ဖြစ်ကြောင်း သတိပြုမိလိုက်တော့သည်။
သူမ မိမိကိုယ်မိမိ ပြန်လည်၍ လှောင်ပြောင်လိုက်မိ၏။ ထိုလူ၏ မျက်လုံးများထဲတွင် သူတို့နှစ်ယောက်ကြားက အဆင့်အတန်းနှင့် အရည်အချင်း ကွာခြားမှုများမှာ မည်သည့်အခါမျှ ဖြည့်ဆည်းပေးနိုင်လိမ့်မည် မဟုတ်ကြောင်း သူမ နောက်ဆုံးတွင် သတိပြုမိသွားခဲ့ရပြီ ဖြစ်သည်
သူမအနေဖြင့် အတွင်းစည်းဂိုဏ်း၏ အယောက်သုံးဆယ့်သုံးယောက်ထဲက တစ်ယောက် ဖြစ်လာခဲ့သည့်တိုင်အောင်ပင် ထိုအမှန်တရားက ပြောင်းလဲသွားခြင်း မရှိပါချေ။
ခွမ်း...
သူမသည် ဝိညာဉ်ဖန်ကျောက်စိမ်းများဖြင့် ဖန်တီးထားသည့် ထိုအရက်ကရားကို ကြမ်းပြင်ပေါ်သို့ ပြင်းထန်စွာ ရိုက်ခွဲပစ်လိုက်သဖြင့်... မြင့်မြတ်လှသော အရက်၏ မွှေးပျံ့လှသော ရနံ့များမှာ ဘေးပတ်ဝန်းကျင် တစ်ခုလုံးသို့ ချက်ချင်းပင် ပျံ့နှံ့သွားခဲ့ရတော့၏။
သူမ ကြမ်းပြင်ပေါ်က ပျက်စီးနေသည့် အပိုင်းအစများကို မျက်ရည်များဖြင့် ငေးမောကြည့်ရှုနေမိခဲ့သည်။
သို့သော်လည်း နောက်တစ်စက္ကန့်တွင်မူ သူမ၏ ကျင့်ကြံခြင်း စွမ်းအင်များကို အသုံးပြုကာ မျက်ရည်များကို အလျင်အမြန် သုတ်ဖယ်ပစ်လိုက်တော့၏။
“ဟယ်ယုရှင်း”
ထိုအချိန်တွင် ခြံဝင်းအတွင်းသို့ လုလင်ပျိုတစ်ဦး ချက်ချင်းပင် ဝင်ရောက်လာခဲ့သည်။ သူက တကယ့်ကို ခန့်ညားထည်ဝါလှသော ပုံစံမျိုး ရှိပြီး ခါးတွင် ဓားတစ်လက်ကို ဆွဲကိုင်ထားခဲ့၏ သူသည် ဤနေရာတွင် အချိန်အတော်ကြာအောင် စောင့်ဆိုင်းနေခဲ့သည့် ပုံစံမျိုး ရှိပေသည်
“မင်း ဘာဖြစ်လို့ မိမိကိုယ်မိမိ ယခုလိုမျိုး နာကျင်အောင် ပြုလုပ်နေရတာလဲ”
ဟယ်ယုရှင်း၏ မျက်လုံးများအတွင်း၌ တကယ့်ကို နာကျင်မှုများနှင့် သနားစရာကောင်းလှသော အကြည့်များဖြင့် ပြည့်နှက်နေခဲ့သည်။ သူသည် အရက်များကြားထဲသို့ ခြေလှမ်းလှမ်းလိုက်မိရင်း ကြမ်းပြင်ပေါ်က ပျက်စီးနေသည့် အရက်ကရား အပိုင်းအစများကို လိုက်လံ၍ ကောက်ယူရန် ပြုလုပ်လိုက်တော့၏။
“ထားလိုက်စမ်းပါ...”
လန်ရှင်းဇီ လက်ကို ဝှေ့ယမ်းလိုက်မိရာ... ကြမ်းပြင်ပေါ်ကနေ အပြာရောင် မီးတောက်များ ချက်ချင်း ထွက်ပေါ်လာခဲ့သဖြင့် ထိုလုလင်ပျို အနောက်သို့ အလျင်အမြန် ဆုတ်ခွာလိုက်ရတော့သည်။
“ဒီအရက်ကရားက သူ့ရဲ့ အရာပဲဥစ္စာ၊ အခုတော့ ငါက ဒါကို ဖျက်ဆီးပစ်လိုက်ပြီ”
“ငါ သိပါတယ်...”
“ဒါနဲ့ တစ်ထပ်ထဲ တူ ညီလှတဲ့ နောက်ထပ် အရက်ကရားတစ်ခု ငါ့အတွက် သွားပြီးတော့ ရှာပေးစမ်းပါ”
“......”
“ကောင်းပါပြီ...”
ဟယ်ယုရှင်း ခါးသက်စွာဖြင့် ပြုံးလိုက်မိရင်း သူမကို လှမ်း၍ ကြည့်ရှုလိုက်သော်လည်း သူမကမူ အဝေးတစ်နေရာသို့သာ ငေးမောကြည့်ရှုနေခဲ့မိတော့၏။
ကျန်းရှင်းရှုံက သူမကို အစေခံတစ်ယောက်ထက် မပိုဘဲ ကြည့်ရှုခဲ့သလိုပင်... သူမကိုယ်တိုင်သည်လည်း ဟယ်ယုရှင်းကို မည်သည့်အခါမျှ အရေးတယူ ရှိခဲ့ခြင်း မရှိပါချေ။
သူသည် စိတ်ထဲက ရှုပ်ထွေးလှသော အတွေးများကို ဖျောက်ဖျက်ရန်အတွက် ခေါင်းကို ခါယမ်းလိုက်မိရင်း...
“အရက်ကရား တစ်လုံးတည်းလား... ဒါပဲလား”
“သေချာတာပေါ့... အဲဒီတစ်ခုတည်း မဟုတ်ပါဘူး”
လန်ရှင်းဇီ သူမ၏ ဝတ်စုံကို ပြန်လည်၍ ပြင်ဆင်လိုက်မိရင်း မတ်တပ်ရပ်ကာ တံခါးဝရှိရာ ဘက်သို့ ခြေလှမ်းလှမ်းလိုက်တော့၏။
“ငါ့အတွက် လူတစ်ယောက် သွားပြီးတော့ သတ်ပေးစမ်းပါ”
“သူက ဘယ်သူလဲ...”
“ရွှီရှောင်ရှို့”
......
ဟချီ...
‘ဘယ်သူက ငါ့အကြောင်းကို သွားပြီးတော့ ပြောနေပြန်တာလဲ’
ရွှီရှောင်ရှို့ စိတ်ထဲကနေ တွေးတောလိုက်မိသည်။
သူ သူ၏ နှာခေါင်းကို ပွတ်သပ်လိုက်မိ၏။
တကယ်လို့ သူ့အနေဖြင့် ယခုအချိန်အထိ မြင်တွေ့ခဲ့ရဖူးသမျှသော မိန်းမလှလေးများထဲတွင် အလှပဆုံး တစ်ယောက်ကို အမည်တပ်ရမည်ဆိုပါက... ထိုနေ့တုန်းက စူးချန်ချန်နှင့်အတူ ပြိုင်ပွဲသို့ လာရောက်ခဲ့သည့် ဝတ်စုံနီနှင့် အမျိုးသမီးကို သေချာပေါက် အမည်တပ်မိမှာ ဖြစ်သည်။ ထိုအမျိုးသမီးသည် ထွက်ခွာမသွားခင်မှာတင် သူ့ကို တကယ့်ကို ဆွဲဆောင်မှုရှိလှသော အကြည့်တစ်ချက် ပို့ဆောင်ခဲ့ဖူးသည် မဟုတ်လား။
‘သူမက ငါ့အကြောင်းကို တွေးတောနေတာ ဖြစ်ရမယ်...’
‘သူမရဲ့ နာမည်က ဘာတဲ့လဲမသိဘူး...’
‘ဟူး... ကြည့်ရတာ ရုပ်ရည်ခန့်ညားထည်ဝါလွန်းတာကလည်း လူတွေရဲ့ စိတ်ထဲမှာ မေ့ပျောက်ရခက်စေတဲ့ အကျိုးကျေးဇူးတစ်ခု ရှိနေတာပဲ’
ရွှီရှောင်ရှို့ သူ၏ အာရုံများကို ပြန်လည်၍ စုစည်းလိုက်တော့၏။ သူ ဝိညာဉ်ကျမ်းစာဂေဟာကနေ ပြန်လည်ရောက်ရှိလာခဲ့ပြီး လက်ရှိအချိန်တွင် သူ၏ ခုတင်ပေါ်တွင် လဲလျောင်းလျက် ငေးငိုင်နေခဲ့မိခြင်း ဖြစ်ပေသည်။
ထိုခရီးစဉ်က တကယ့်ကို ဆန်းကြယ်လွန်းလှပေသည်။ သူ စာရင်းပေးသွင်းခြင်း အလုပ်များကို ပြီးဆုံးသွားခဲ့သည့် အချိန်တုန်းက ရှောင်ချီရှို့၏ မျက်နှာပေါ်တွင် ဖြစ်ပေါ်နေခဲ့သည့် သနားစရာကောင်းလှသော အမူအရာများကို သူ ပြန်လည်၍ အမှတ်ရမိနေသေး၏။ ထိုဝါရင့်ပုဂ္ဂိုလ်ကြီးသည် သူ့ကို တကယ့်ကို သနားစရာကောင်းလှသည့် အကြည့်များဖြင့် ကြည့်ရှုခဲ့ပြီး ထွက်ခွာမသွားခင်မှာတင် တိုက်တွန်းအားပေးစကားများပင် ပြောဆိုခဲ့ဖူးသည် မဟုတ်လား
‘ရှောင်ချီရှို့ရဲ့ အပြုအမူတွေကို ကြည့်ရသလောက်တော့... ဒီအဘိုးကြီးက တကယ့်ကို ပိုမိုပြီးတော့ မြင့်မားလှတဲ့ အဆင့်အတန်းမှာ ရှိနေတာ ဖြစ်ရမယ်၊ ဒါပေမဲ့ ရှောင်ချီရှို့ကိုယ်တိုင်ကလည်း ဂိုဏ်းရဲ့ အမှုဆောင်အကြီးအကဲ တစ်ယောက်ပဲဥစ္စာ... ဒါဆိုရင် ဒီ အရူးအဘိုးကြီးက ဘယ်လိုမျိုး အဆင့်အတန်းမျိုး ဖြစ်နေလို့လဲ’
‘ဂိုဏ်းချုပ်ကြီးလား’
‘မဟုတ်သေးပါဘူး... မဖြစ်နိုင်တာ...’
‘ဂိုဏ်းချုပ်ကြီးရဲ့ နာမည်က ရဲရှောင်ထျန် လို့ ခေါ်တာပဲဥစ္စာ...’
ရွှီရှောင်ရှို့ ကြမ်းပြင်ပေါ်တွင် ခန္ဓာကိုယ်ကို လှန်လှောလိုက်မိသည်။ သူ ခုတင်ပေါ်သို့ မတက်ရဲပါချေ ဘာဖြစ်လို့လဲဆိုတော့ သူ စိတ်ကို လုံးဝ မထိန်းချုပ်နိုင်ဘဲ ဖြစ်သွားခဲ့မည်ဆိုပါက ခုတင်တစ်ခုလုံး ပြာအဖြစ် ပြောင်းလဲသွားနိုင်သဖြင့် ဒါက တကယ့်ကို ကြောက်စရာကောင်းလွန်းလှသောကြောင့် ဖြစ်ပေသည်။
သူ၏ ခန္ဓာကိုယ် မျက်နှာပြင်ထံက ထွက်ပေါ်နေသည့် အပူရှိန်များကြောင့် စောင်နှင့် အခင်းများမှာ ပြာအဖြစ် ပြောင်းလဲသွားခဲ့ရပြီ ဖြစ်သည်။
‘ထားလိုက်ပါတော့လေ... ထိုအဘိုးကြီးအကြောင်းကို ထပ်ပြီးတော့ မစဉ်းစားတော့ပါဘူး၊ စဉ်းစားမိတိုင်း စိတ်တိုဖို့ပဲ ကောင်းတယ်...’
လက်ရှိ ဖြစ်ပျက်ခဲ့သမျှသော အရာများကြောင့် သူသည် စမ်းသပ်ကွက်တစ်ခုကဲ့သို့ ဖြစ်လာခဲ့ရသည့် မိမိ၏ ကံကြမ္မာကိုသာ အလျှော့ပေးလိုက်ရတော့၏။ ထိုအဘိုးအိုသည် သူ့ကို အသုံးပြုကာ တစ်စုံတစ်ခုသော စမ်းသပ်မှုများကို ပြုလုပ်နေသည့် ပုံစံမျိုး ရှိပေသည်
တကယ့် အမှန်တရားအတိုင်း ပြောရမည်ဆိုပါက ယခုကဲ့သို့သော အခြေအနေများတွင် ကောင်းကျိုးနှင့် ဆိုးကျိုး ဒွန်တွဲနေခဲ့ခြင်း ဖြစ်ပေသည်။
ရွှီရှောင်ရှို့ ထိုကျောက်စိမ်းပေလွှာကို ထုတ်ယူလိုက်မိရင်း သူ၏ နဖူးထက်သို့ တင်ကာ ၎င်းအတွင်းရှိ အကြောင်းအရာများကို ထပ်မံ၍ အာရုံခံဖတ်ရှုလိုက်တော့၏။
“ငရဲဘုံကောင်းကင်ယံကျင့်စဉ်...”
၎င်းက မည်သည့်အဆင့်အတန်းမျိုးမျှ ဖော်ပြထားခြင်း မရှိသည့် တကယ့်ကို အထူးဆန်းပြားလှသော ဝိညာဉ်ကျင့်စဉ် အမျိုးအစားတစ်ခု ဖြစ်ပေသည်။
သို့သော်လည်း သူ၏ အမြင်အရမူ ယခုကဲ့သို့သော မည်သည့်အဆင့်အတန်းမျှ ဖော်ပြထားခြင်း မရှိသည့် အရာများမှာ သေချာပေါက် အစွမ်းအထက်ဆုံး အရာများ ဖြစ်လာတတ်သည် မဟုတ်လား
တကယ့် လက်တွေ့တွင်လည်း ထိုအမှန်တရားက ကွာခြားမှု မရှိပါချေ။ ဤကျင့်စဉ်ကို လေ့ကျင့်နိုင်ရန်အတွက် အဓိက လိုအပ်ချက်မှာ မွေးရာပါအဆင့် ခန္ဓာကိုယ် ဖွဲ့စည်းပုံ ရှိရန် လိုအပ်လှပြီး... ထို့အပြင် မီးဓာတ်သဘာဝ ရတနာတစ်ခု ဖြစ်သည့် ထိုငရဲမီးမျိုးစေ့ ရှိရန်လည်း လိုအပ်လှပေသည်
ဤကျင့်စဉ်ကို လေ့ကျင့်ရခြင်းက တကယ့်ကို ရိုးရှင်းပြီး လွယ်ကူလှပေသည်။ မိမိအနေဖြင့် ထိုမီးမျိုးစေ့၏ ပြင်းထန်လှသော လောင်ကျွမ်းခြင်း စွမ်းအင်များကို ခံနိုင်ရည် ရှိနေသရွေ့... "ငရဲဘုံဝိညာဉ်အရင်းအမြစ်စွမ်းအင်" ကို သေချာပေါက် ရရှိနိုင်လိမ့်မည် ဖြစ်၏။
သူသည် ဝိညာဉ်အရင်းအမြစ်စွမ်းအင် နှင့် ပတ်သက်ပြီး တကယ့်ကို ရင်းနှီးကျွမ်းဝင်မှု ရှိလှပေသည်။
လူတစ်ယောက်အနေဖြင့် ဝိညာဉ်ကျင့်ကြံခြင်းအဆင့် (၁၀) သို့ ရောက်ရှိသွားခဲ့သည့် အခါတွင်မူ... ဘေးပတ်ဝန်းကျင်ရှိ ဝိညာဉ်စွမ်းအင်များကို စုပ်ယူကာ မိမိ၏ ခန္ဓာကိုယ်အတွင်း၌ ဝိညာဉ်စွမ်းအားများ အဖြစ် သိုလှောင်ထားနိုင်ခြင်း ဖြစ်ပေသည်။ မွေးရာပါအဆင့် သို့ ရောက်ရှိသွားခဲ့ပြီးနောက်တွင်မူ ထိုဝိညာဉ်စွမ်းအားများမှာ ဝိညာဉ်အရင်းအမြစ်စွမ်းအင် အဖြစ် ပြောင်းလဲသွားခဲ့ရပြီး ၎င်း၏ စွမ်းပကားမှာလည်း ယခင်ထက် အဆပေါင်းများစွာ ပိုမို၍ ပြင်းထန်လာခဲ့ခြင်း ဖြစ်ပေသည်
လက်ရှိအချိန်တွင် သူ လေ့ကျင့်နေသည့် ဤကျင့်စဉ်ကမူ... မိမိအနေဖြင့် ၎င်းကို ကျွမ်းကျင်အောင် လေ့ကျင့်နိုင်ခဲ့မည်ဆိုပါက မိမိ၏ လက်ရှိအဆင့်အတန်း မည်သို့ပင် ရှိနေပါစေ... ထူးခြားဆန်းပြားလှသော ငရဲဘုံဝိညာဉ်အရင်းအမြစ်စွမ်းအင်ကို သေချာပေါက် ရရှိစေနိုင်မှာ ဖြစ်ပေသည်။ ၎င်းက တကယ့်ကို ကြောက်မက်ဖွယ်ကောင်းလှပြီး မြင့်မြတ်လှသော အရာတစ်ခု ဖြစ်သော်လည်း ၎င်းကို ရရှိရန်အတွက် ကြုံတွေ့ရမည့် ဆင်းရဲဒုက္ခများကလည်း အတိုင်းအဆမရှိ ပြင်းထန်လှပေသည်
ရွှီရှောင်ရှို့ သူ၏ အပေါ်ပိုင်းအဝတ်အစားများကို ချွတ်ပစ်လိုက်မိရင်း ကြမ်းပြင်ပေါ်တွင် တင်ပလ္လင်ခွေ ထိုင်လိုက်တော့၏။ သူ၏ ခန္ဓာကိုယ်ထံကနေ ရေနွေးငွေ့များ အဆက်မပြတ် ထွက်ပေါ်နေခဲ့သည်။
သူ လက်ရှိအချိန်အထိ တကယ့် ကျင့်ကြံခြင်း အခြေအနေအတွင်းသို့ ဝင်ရောက်နိုင်ခြင်း မရှိသေးပါချေ။
မိတ်ဆက်အကျဉ်းအရ... ထိုငရဲမီးမျိုးစေ့သည် မိမိ၏ ခန္ဓာကိုယ်အတွင်း၌ အချိန်အကြာကြီး ရှိနေလေလေ ပိုမို၍ မတည်မငြိမ် ဖြစ်လာလေလေ ဖြစ်ပြီး ၎င်းက သူ၏ ကြိုတင်တွေးတောချက်များနှင့် ကွက်တိကိုက်ညီနေခဲ့သည်။
ဤအရာက တကယ့်ကို အချိန်ကိုက်ဗုံးတစ်ခု မဟုတ်လား။
သူ သူ၏ စိတ်ထဲက ရဲရဲနီနေသည့် အချက်အလက် ဘားတန်းထံသို့ အကြည့်များကို ပို့ဆောင်လိုက်မိ၏။
“အလိုအလျောက်ရမှတ် - ၄၈၆၆၂ မှတ်။”
သူ၏ အတိတ်က အတွေ့အကြုံများအရမူ... ထိုအရာကို ခန္ဓာကိုယ်အတွင်း၌ သန့်စင်ရန်အတွက် အချိန်လေးနာရီကနေ ခြောက်နာရီခန့်အထိ ကြာမြင့်နိုင်ပြီး ထိုအဆင့်ကို ကျော်ဖြတ်နိုင်ခဲ့မည်ဆိုပါက အလိုအလျောက်ရမှတ် အမြောက်အမြားကို သေချာပေါက် ရရှိနိုင်လိမ့်မည် ဖြစ်၏။
“ကောင်းပြီလေ... ဒါကို မြိုချပြီးတော့ပဲ သန့်စင်ရတာပေါ့”
ရွှီရှောင်ရှို့ စိတ်ကို ပြတ်သားစွာ ဆုံးဖြတ်လိုက်တော့၏။ ပြင်းထန်လှသော နာကျင်မှုများ ရှိနေဦးမည် ဖြစ်သော်လည်း သူ ယခုကဲ့သို့သော အခြေအနေမျိုးကို တစ်ကြိမ် ကြုံတွေ့ဖူးပြီး အောင်မြင်ခဲ့ဖူးသဖြင့်... မိမိအနေဖြင့် ဂရုတစိုက် ရှိနေသရွေ့ မည်သည့် ဆိုးဝါးလှသော အခြေအနေမျိုးမျှ ဖြစ်ပေါ်လာလိမ့်မည် မဟုတ်ကြောင်း ယုံကြည်ထားခဲ့ခြင်း ဖြစ်ပေသည်။
သူသည် ဤအဆင့်ကို အောင်မြင်ပြီးသွားခဲ့ပြီးနောက် မိမိ၏ ခန္ဓာကိုယ် မည်သို့မျိုး ပြောင်းလဲသွားမလဲဆိုတာကိုပင် တကယ့်ကို မျှော်လင့်စောင့်စားနေမိတော့၏။
မီးဓာတ်သဘာဝ ငရဲဘုံဝိညာဉ်အရင်းအမြစ်စွမ်းအင် ဟုတ်လား
၎င်းက မွေးရာပါအဆင့် မီးဓာတ်သဘာဝ စွမ်းအင်များကို ကျွမ်းကျင်အောင် လေ့ကျင့်နိုင်ခဲ့ခြင်းနှင့် တူညီလွန်းလှပေသည် မဟုတ်လား။