“လန့်ဖျတ်သွားခဲ့ရသည်။ အလိုအလျောက်ရမှတ် +၁။”
ရွှီရှောင်ရှို့ ရုတ်တရက် ဝုန်းကနဲ ထရပ်လိုက်ပြီး ပတ်ဝန်းကျင်ကို ဝှေ့ကြည့်လိုက်ရာ... သူ စောင့်ဆိုင်းရာနေရာသို့ ရောက်ရှိနေဆဲဖြစ်ကြောင်း သတိပြုမိလိုက်သည်။ သူ သူ့မျက်နှာကို ပြန်ကိုင်ကြည့်လိုက်ပြီး အစေခံကို မကျေမနပ် စိုက်ကြည့်ကာ
“မင်း ဘာလို့ ငါ့ကို လာရိုက်တာလဲ...”
အစေခံက သူ့ကို အပြစ်ကင်းစင်သည့် မျက်နှာပေးဖြင့် ကြည့်လိုက်ပြီးနောက်... တဖြည်းဖြည်းနှင့် ဇဝေဇဝါ ဖြစ်သွားခဲ့ရသည်။
ရွှီရှောင်ရှို့ အစေခံ၏ လက်ကို လှမ်းကြည့်လိုက်သည်
‘အော်... ဆေးပုလင်းတွေ မရှိပါလား’
စိတ်ထဲကနေ တွေးလိုက်မိ၏။
“မင်း တိုက်ခိုက်ရမယ့်အလှည့် ရောက်နေပြီ!”
အစေခံက အေးစက်စွာ ပြောလိုက်တော့သည်။
ထိုအခိုက်အတန့်ကျမှပဲ ရွှီရှောင်ရှို့ သူ အစောပိုင်းက အိပ်မက်မက်နေခဲ့ခြင်းဖြစ်ကြောင်း သတိပြုမိသွားပြီး... ရှက်ကိုးရှက်ကန်းဖြင့် စောင့်ဆိုင်းရာနေရာမှ လျှောက်ထွက်လာခဲ့တော့သည်
“ရွှီရှောင်ရှို့... ဇွဲမလျှော့နဲ့ဦး!”
“ရွှီရှောင်ရှို့... အားတင်းထားစမ်းပါ!”
“ရွှီရှောင်ရှို့... ချန်ပီယံ!”
သူ ပွဲကြည့်ပရိသတ်များ၏ အော်ဟစ်အားပေးသံများကြောင့် လန့်ဖျတ်သွားခဲ့ရသည်။ သူ စောင့်ဆိုင်းရာနေရာမှ ထွက်လာသည့် ခဏတွင်ပဲ ပွဲကြည့်ပရိသတ်အားလုံး မတ်တတ်ရပ်ကာ သူ့ကို အပြင်းအထန် အော်ဟစ်အားပေးနေကြတာကို မြင်တွေ့လိုက်ရခြင်း ဖြစ်သည်
သူ ကြောင်အမ်းသွားခဲ့ရ၏။ ဟုတ်ပါတယ်... ပြီးခဲ့တဲ့ ပြိုင်ပွဲတွေတုန်းကလည်း သူ့ကို အားပေးတဲ့လူအချို့ ရှိခဲ့ဖူးသော်လည်း၊ လူအများစုကတော့ သူ့ကို နှိမ်ချဆက်ဆံခဲ့ကြတာ ဖြစ်သည်
‘ဒီနေ့ကျမှ ဘာလို့ လူတိုင်းက ငါ့ကို ဒီလောက်တောင် အပြင်းအထန် အော်ဟစ်အားပေးနေကြရတာလဲ’
‘သူတို့တွေ တကယ်ပဲ ကောင်းကောင်းမအိပ်ရသေးဘူးလား...’
အဆင့် (၇) ရှိ ဝမ်ချုံနှင့် အဆင့် (၄) ရှိ ကျိုးထျန်းဆန်တို့ကို ဇာတ်တိုက် အနိုင်ရရှိခဲ့မှု၊ ၎င်းအပြင် ‘လောကီအဆင့် ဓားဆန္ဒ’ နှင့် ‘မွေးရာပါအဆင့် ခန္ဓာကိုယ်’ တို့ကို တတ်မြောက်ထားမှုများကြောင့်... သူသည် တစ်ပြိုင်ပွဲလုံးတွင် ချန်ပီယံဖြစ်ဖို့ အလားအလာအရှိဆုံး လူတစ်ယောက် ဖြစ်လာခဲ့ပြီဖြစ်ကြောင်းကိုတော့ သူ မသိရှာပါချေ။
“အားပေးခြင်း ခံခဲ့ရသည်။ အလိုအလျောက်ရမှတ် +၄၄၂။”
“အော်ဟစ်အားပေးခြင်း ခံခဲ့ရသည်။ အလိုအလျောက်ရမှတ် +၆၆၅။”
“...”
သူ့စိတ်ထဲက စနစ်သတိပေးချက်ဘောင်က အဆက်မပြတ် ဆန်းသစ်လာခဲ့ပြီး... ရွှီရှောင်ရှို့ ပျော်ပျော်ရွှင်ရွှင်ဖြင့် လက်ဝှေ့ယမ်းပြရင်း စင်မြင့်ထက်သို့ တဖြည်းဖြည်း လျှောက်လှမ်းလာခဲ့သည်။
“အလိုအလျောက်ရမှတ် - ၄၄,၈၂၀။”
“အလိုအလျောက်ရမှတ် - ၄၅,၆၁၁။”
“အလိုအလျောက်ရမှတ် - ၄၆,၀၀၂။”
ရွှီရှောင်ရှို့၏ မျက်နှာပေါ်တွင် ပြုံးပန်းများ ဝေစည်နေခဲ့ပြီး သူ့မျက်လုံးများပင် မှိတ်လုနီးပါး ဖြစ်သွားခဲ့ရသည်။ မနေ့ညက ‘ငရဲမီးလျှံအစေ့’ ကို ချေဖျက် သန့်စင်ရသည့် ဖြစ်စဉ်က အလွန်အမင်း ခက်ခဲခက်ခဲလှသော်လည်း... လွန်ခဲ့သည့် နာရီအနည်းငယ်အတွင်းမှာတင် သူ ကြီးမားလှသော ဆုလာဘ်တွေကို ပြန်လည်ရရှိခဲ့ပြီ ဖြစ်သည်။ ဒါက သူ့ကို အလိုအလျောက်ရမှတ် (၂၀,၀၀၀) နီးပါး ပေးစွမ်းနိုင်ခဲ့ခြင်း ဖြစ်၏
ပြီးတော့ သူ့ရဲ့ အလိုအလျောက်ရမှတ်တွေကလည်း ဆက်လက်ပြီး မြင့်တက်နေဆဲ ဖြစ်သည်။
“ရွှီရှောင်ရှို့... နည်းနည်း မြန်မြန်လျှောက်စမ်းပါ!”
ရှောင်ချီရှို့က မလိုလားအပ်တဲ့လေသံဖြင့် ပြောလိုက်သည်။
ရွှီရှောင်ရှို့ ချက်ချင်းပဲ ခြေလှမ်းတွေကို မြှင့်တင်လိုက်ပြီး... သူ အတားအဆီးထဲသို့ ဝင်ရောက်လိုက်သည့်အချိန်တွင်တော့ ပတ်ဝန်းကျင်တစ်ခုလုံး တိတ်ဆိတ်ငြိမ်သက်သွားခဲ့တော့သည်။
မိုးတိမ်ပြိုင်ပွဲအတွင်းမှာ ဘာကြောင့် ‘အသံလုံအတားအဆီး’ တစ်ခု လိုအပ်လဲဆိုတာကို အခုတော့ သူ ကောင်းကောင်း သဘောပေါက်သွားခဲ့ပြီ ဖြစ်သည်။
စင်မြင့်၏ အခြားတစ်ဖက်တွင်တော့... အဝါနုရောင် ဝတ်စုံကို ဝတ်ဆင်ထားပြီး တော်တော်လေး နုနယ်လှပသည့် မိန်းကလေးတစ်ယောက် ရှိနေခဲ့သည်။ သူမ၏ ဆံပင်များကို တင်းကျပ်စွာ စည်းနှောင်ထားပြီး မျက်လုံးထောင့်လေးများက အပေါ်သို့ ကော့ညွတ်နေခဲ့၏။ သူမသည် လက်ထဲတွင် ပျော့ပျောင်းလှသော အရိုးနှာဗူးကြိုးတစ်ချောင်းကို ကိုင်ထားပြီး... ခြေလှမ်းတိုင်းတွင် ၎င်းကို မြေကြီးပေါ်သို့ ရိုက်ခတ်နေခဲ့သည်။ သူမသည် တကယ့်ကို တက်ကြွလန်းဆန်းနေသည့်ပုံ ပေါက်နေခဲ့၏
လီချန်ကျင့်... ဝိညာဉ်ကျင့်ကြံခြင်း အဆင့် (၁၀)
ပုံမှန်အတိုင်းပင် ရွှီရှောင်ရှို့ တစ်ခုခု ပြောရန် ပြင်လိုက်သော်လည်း... ထိုမိန်းကလေးက သူ့စကားကို ဖြတ်ပြောလိမ့်မည်ဟု သူ လုံးဝ မျှော်လင့်မထားခဲ့ချေ။ သူမက ဆိုးတေတေမျက်နှာပေးဖြင့်
“တိုက်ပွဲမစတင်ခင်ကတည်းက လက်လျှော့တာက ပြိုင်ဘက်ကို လုံးဝ မလေးစားရာ ရောက်ပါတယ်။ မတိုက်ခိုက်ဘဲ ထွက်ပြေးတာကတော့...”
“အော်... အဲဒီအနောက်က ဘာလာတာလဲ...”
“မေ့လိုက်ပါတော့။”
လီချန်ကျင့် သူမ၏ အရိုးကြိုးကို လိပ်လိုက်ပြီး သူမ၏ ခေါင်းကို ပုတ်ရင်း ဆက်ပြောလိုက်သည်
“ရွှီရှောင်ရှို့... ငါ မင်းရဲ့ တိုက်ပွဲတွေကို ကြည့်ဖူးတယ်။ မင်းက တကယ့်ကို အထင်ကြီးဖို့ကောင်းတာပဲ!”
“နောက်ကျရင် ငါ့ကို လက်မှတ်တစ်ခုလောက် ပေးလို့ရမလား...”
“အထင်ကြီးလေးစားခြင်း ခံခဲ့ရသည်။ အလိုအလျောက်ရမှတ် +၁”
ရွှီရှောင်ရှို့ ရှက်ကိုးရှက်ကန်းဖြင့် ခေါင်းကို ပွတ်လိုက်မိသည်။ သူ့ရဲ့ ပြိုင်ဘက်တွေထဲမှာ သူ့ကို အားပေးတဲ့ ‘ဖန်’ တစ်ယောက် ရှိနေလိမ့်မည်ဟု သူ လုံးဝ မျှော်လင့်မထားခဲ့မိချေ။ သူ ပြောရန် ပြင်ထားသည့် ရွဲ့စောင်းစကားလုံးတွေကို ချက်ချင်း ပြန်မျိုချလိုက်ပြီး ခေါင်းညိတ်ကာ သဘောတူလိုက်တော့သည်။
လီချန်ကျင့်၏ မျက်နှာ ချက်ချင်းပင် လန်းဆန်းသွားခဲ့ပြီး တဟားဟား ရယ်မောလိုက်၏။
ရှောင်ချီရှို့ အမူအရာမပျက်ဘဲ လက်ကို ဝှေ့ယမ်းလိုက်သည်
“တိုက်ပွဲ... စတင်စေ!”
ရွှီရှောင်ရှို့ လူကြီးလူကောင်းဆန်စွာဖြင့် သူ့ရဲ့ ပြိုင်ဘက်ကို အရင်ဆုံး တိုက်ခိုက်ရန် အရိပ်အယောင် ပြလိုက်သည်။ သို့သော်လည်း... လီချန်ကျင့် သူမ၏ လက်ကို မြှောက်လိုက်ပြီး မျက်လုံးအစုံကို ပုတ်ခတ်ပုတ်ခတ် လုပ်လိမ့်မည်ဟု သူ မထင်မှတ်ထားခဲ့မိချေ။
“ကျွန်မ အရှုံးပေးပါတယ်!”
ရွှီရှောင်ရှို့၏ မျက်နှာ ပျက်သွားခဲ့ရသည်
‘မင်း အစောပိုင်းတုန်းက ငါ့ရဲ့ စကားလုံးတွေကို ခိုးယူခဲ့ပြီးတော့... အခုကျတော့ အရှုံးပေးတယ် ဟုတ်လား’ ဟု သူ စိတ်ထဲကနေ တွေးလိုက်မိ၏။ ‘မင်းက ဘာလို ဖန်မျိုးလဲ။ ငါ တကယ်လိုအပ်နေတာက အလိုအလျောက်ရမှတ်ဆိုတာကို မင်း မသိဘူးလား...’
လီချန်ကျင့် သူ့ရဲ့ အမူအရာ အပြောင်းအလဲကို မြင်သောအခါ လျင်မြန်စွာ ပြန်လည်ရှင်းပြလိုက်သည်
“ကျန်းဖေးက အခုထိ ‘ဝိညာဉ်ဆေးဝါးဌာန’ မှာ လဲလျောင်းနေတုန်းပဲ၊ ပြီးတော့ သူက အဆင့်သတ်မှတ်ချက်ပြိုင်ပွဲတွေမှာတောင် မတိုက်ခိုက်နိုင်တော့ဘူး။ ငါ မင်းနဲ့ မတိုက်ခိုက်ချင်ဘူး။ ငါက အဆင့်သတ်မှတ်ချက်ပြိုင်ပွဲတွေမှာပဲ တိုက်ခိုက်ချင်တာ!”
ရှောင်ချီရှို့ ပါးစပ်ထဲက ရေကိုပင် ကောင်းကောင်း မျိုချဖို့ အချိန်မရလိုက်ပါချေ။ သူ လျင်မြန်စွာ လက်ကို မြှောက်လိုက်ပြီး
“တိုက်ပွဲ ပြီးဆုံးသွားပါပြီ။ ရွှီရှောင်ရှို့ အနိုင်ရရှိပါတယ်!”
ဟု ကြေညာလိုက်တော့သည်
ပွဲကြည့်ပရိသတ်များ ချက်ချင်းပင် တီးတိုးပြောဆိုလာခဲ့ကြသည်။ ထိပ်သီး (၁၆) ဦး ပြိုင်ပွဲအတွင်းမှာ တစ်ယောက်ယောက်က ဒီအတိုင်း အရှုံးပေးလိမ့်မည်ဟု သူတို့ လုံးဝ မျှော်လင့်မထားခဲ့ကြချေ။ ဒါက နောက်ပိုင်းမှာ ရရှိမယ့် ဆုလာဘ်တွေကို လက်လွတ်ခံလိုက်တာနဲ့ အတူတူပဲ မဟုတ်ဘူးလား။
“ပျင်းစရာကောင်းလိုက်တာ။ သူမ ဘာလို့ သေသေချာချာ မတိုက်ခိုက်တာလဲ။ ငါ ရွှီရှောင်ရှို့ရဲ့ စွမ်းဆောင်ရည်ကို ကြည့်ချင်တာလေ!”
“ငါထင်တာတော့ လီချန်ကျင့်က တော်တော်လေး ပညာရှိတာပဲ။ သူမက အဆင့် (၁၀) ပဲ ရှိသေးတာ။ သူမက အဆင့် (၇) ရှိတဲ့ ရွှီရှောင်ရှို့ကို ဘယ်လိုလုပ် အနိုင်ယူနိုင်မှာလဲ။ အခုကတည်းက စွမ်းအင်တွေကို ချွေတာပြီး နောက်ပိုင်း အဆင့်သတ်မှတ်ချက်ပြိုင်ပွဲတွေအတွက် ပြင်ဆင်တာက တော်တော်လေး စမတ်ကျပါတယ်”
“ဖူးးး... မင်းပြောတဲ့ ပေါက်ကရတွေကို ထားလိုက်စမ်းပါဦး...”
အရှုံးပေးလိုက်သည့် လီချန်ကျင့် ရွှီရှောင်ရှို့ထံသို့ လျင်မြန်စွာ ပြေးဝင်လာခဲ့ပြီး... ဝိညာဉ်ကလောင်တစ်ချောင်းကို ကမ်းပေးလိုက်ကာ - “လက်မှတ်!” ဟု စိတ်လှုပ်ရှားစွာ ပြောလိုက်တော့သည်
ရွှီရှောင်ရှို့ စကားမဆိုနိုင်တော့ချေ။
‘ဟူးးး...’
‘စိတ်အေးအေးထားစမ်းပါ၊ သူက ဖန်တစ်ယောက်လေ!’
သူကိုယ်သူ သတိပေးလိုက်မိသည်။
“ငါ ဘယ်မှာ လက်မှတ်ထိုးပေးရမလဲ...”
ရွှီရှောင်ရှို့ နူးညံ့စွာ မေးလိုက်၏။
လီချန်ကျင့် သဘောထားကြီးစွာဖြင့် သူမ၏ လက်ဖဝါးကို အပေါ်သို့ လှန်ကာ ကမ်းပေးလိုက်သည်။ သူမ၏ လက်ချောင်းလေးများက သွယ်လျနေခဲ့၏။ သူမက
“... ဒီမှာလေ!”
ဟု ပြောလိုက်သည်။
သူမ ပွဲကြည့်စင်မြင့်များဆီသို့ တိတ်တဆိတ် လှမ်းကြည့်လိုက်သည်။ ပွဲကြည့်ပရိသတ်များ ဆူညံနေကြသော်လည်း... သူတို့နှစ်ဦးကတော့ အတားအဆီးထဲတွင် ရှိနေသဖြင့် ဘာအသံမျှ မကြားရပါချေ
အပြင်ဘက်တွင်တော့... အရှေ့ဆုံးတန်းတွင် ထိုင်နေသည့် မိန်းကလေးတစ်ယောက် ဒေါသတကြီးဖြင့် အော်ဟစ်နေခဲ့သည်
“အခုချက်ချင်း ရပ်လိုက်စမ်း၊ လီချန်ကျင့်! ရွှီရှောင်ရှို့က ငါ့အပိုင်ပဲ!”
“ဟမ်း”
လီချန်ကျင့် သူမ၏ သူငယ်ချင်းကို မလိုလားအပ်တဲ့ မျက်နှာပေးမျိုး ပြလိုက်ပြီး... သူမ၏ မျက်နှာပေါ်တွင်တော့ မောက်မာလှသော အမူအရာများဖြင့် ပြည့်နှက်နေခဲ့သည်
‘ဟင်း... မင်း သေသေချာချာ မကျင့်ကြံတဲ့အခါ ဘာဖြစ်မလဲဆိုတာ မြင်ပြီမလား’
သူမ စိတ်ထဲကနေ တွေးလိုက်မိ၏
‘မင်း လုပ်နိုင်တာကတော့ အပြင်မှာပဲ နေပြီး ငါ့ကို မနာလိုဖြစ်နေဖို့ပဲ ရှိတာပေါ့’
ရွှီရှောင်ရှို့ ရှက်ရွံ့မနေတော့ပါချေ။ သူ သူမ၏ လက်ကို လှမ်းကိုင်လိုက်သည်။ ၎င်းက နူးညံ့ပြီး နွေးထွေးနေခဲ့၏။
သူ အလောတကြီးဖြင့် လက်မှတ်ထိုးပေးလိုက်ပြီးနောက်
“နောင်ကျရင် အခြားဘယ်သူနဲ့ပဲ ဆုံဆုံ အလွယ်တကူ အရှုံးမပေးပါနဲ့။ ဒါက မင်းအတွက် တော်တော်လေး နစ်နာစေတယ်...”
“ဟုတ်ကဲ့... ဟုတ်ကဲ့... မနစ်နာပါဘူး”
လီချန်ကျင့်က ပုံမှန်အားဖြင့် တော်တော်လေး ရဲတင်းတတ်သော်လည်း... ရွှီရှောင်ရှို့က ပွဲကြည့်ပရိသတ်အားလုံးရဲ့ အရှေ့မှာ သူမရဲ့ လက်ကို လှမ်းကိုင်လိုက်သည့်အခါတွင်တော့ သူမ မရှက်ဘဲ မနေနိုင်တော့ပါချေ။ ဘာပဲဖြစ်ဖြစ်... သူမက အသက် (၁၆) နှစ် သို့မဟုတ် (၁၇) နှစ်အရွယ် ဆယ်ကျော်သက် မိန်းကလေးတစ်ယောက်သာ ရှိသေးတာလေ။
သူမ၏ အရေပြားပေါ်တွင် ထုံကျင်ပြီး ယားယံလှသော ခံစားချက်ကြောင့် သူမ လက်ကို ပြန်ဆွဲထုတ်ချင်စိတ် ပေါက်သွားခဲ့သော်လည်း... ထိုစိတ်ကို အတင်းအောင့်ထားရင်း တိုးညှင်းစွာ
“ကျေးဇူးတင်ပါတယ်!”
ထိုမိန်းကလေး လက်မှတ်ရရှိပြီးတဲ့နောက်မှာတော့... တစ်ယောက်ယောက်က လိုက်ဖမ်းနေသည့်အလား လျင်မြန်စွာ လှည့်ထွက်ပြေးသွားခဲ့တော့သည်။
“ဟေ့... မင်းရဲ့ ဝိညာဉ်ကလောင်ကြီး...”
ရွှီရှောင်ရှို့ ချက်ချင်း လှမ်းခေါ်လိုက်မိ၏။
ထိုမိန်းကလေး အနောက်သို့ လှည့်ပင်မကြည့်တော့ပါချေ
“နင်ပဲ ယူထားလိုက်တော့!”
ရွှီရှောင်ရှို့ ရှောင်ချီရှို့ကို လှမ်းကြည့်လိုက်သည်။ ထိုအလယ်အလတ်အရွယ် လူကြီးက အတိတ်က အမှတ်တရတွေကို ပြန်လည်တွေးတောမိနေသည့်အလား... စိတ်လှုပ်ရှားလှသော မျက်လုံးများဖြင့် ခေါင်းကို ထပ်တလဲလဲ ခါယမ်းနေခဲ့သည်။ သူ ရွှီရှောင်ရှို့ကို စင်မြင့်ထက်မှ ထွက်ခွာသွားရန်ပင် လှမ်းပြီး မတိုက်တွန်းခဲ့ပါချေ
ရွှီရှောင်ရှို့ လုပ်နိုင်တာကတော့... ထိုဝိညာဉ်ကလောင်ကို သူ့လည်ပင်းတွင် ဆွဲထားသည့် လက်စွပ်ထဲသို့ ထည့်သွင်းလိုက်ခြင်းသာ ဖြစ်သည်။
အပြင်ဘက်တွင်တော့... အရှေ့ဆုံးတန်းတွင် ထိုင်နေသည့် မိန်းကလေး ဒါကို မြင်တွေ့လိုက်ရသည့်အခါ ရူးသွပ်မတတ် ဖြစ်သွားခဲ့ရသည်။ သူမ မျက်လုံးများ နီမြန်းလျက်... စင်မြင့်ထက်မှ လျင်မြန်စွာ ထွက်ခွာလာသည့် လီချန်ကျင့်ဆီသို့ ပြေးဝင်သွားခဲ့တော့သည်။ အစေခံများပင်လျှင် သူမကို အချိန်မီ မတားဆီးနိုင်ခဲ့ကြပါချေ
“လီချန်ကျင့်... ဒီနေ့က မင်း သေရမယ့်နေ့ပဲ!”
“ငါ့ရဲ့ ထူးခြားလှတဲ့ ပျံသန်းကန်ချက်ကို မြည်းစမ်းကြည့်စမ်း!”
“မလုပ်ပါနဲ့။ ကြည့်စမ်း... မင်း ငါ့ကို တကယ်ပဲ ကန်တော့မှာလား...”
“ဟင်း ဟင်း ဟင်း... ငါ တကယ့်ကို မနာလိုဖြစ်မိတယ်။ မင်းရဲ့ လက်ကို ဖြတ်ပြီး ငါ့ကို ပေးစမ်းပါ!”
“...” ရွှီရှောင်ရှို့ အတားအဆီးထဲမှ ထွက်လာပြီး စနစ်သတိပေးချက်ဘောင်ကို လှမ်းကြည့်လိုက်ရာ... မူးဝေသွားသလိုမျိုး မခံစားဘဲ မနေနိုင်တော့ချေ။
“မုန်းတီးခြင်း ခံခဲ့ရသည်။ အလိုအလျောက်ရမှတ် +၃၃၃။”
“မုန်းတီးခြင်း ခံခဲ့ရသည်။ အလိုအလျောက်ရမှတ် +၃၃၃။”
‘ဒါက ဘာဖြစ်တာလဲ’
‘ငါ တိုက်ပွဲမှာ အနိုင်ရခဲ့တာလေ၊ ဘာသွေးမှလည်း မထွက်ခဲ့ဘူး... ဒါဆို သူတို့ ငါ့ကို ချီးကျူးပြီး အားပေးသင့်တာ မဟုတ်ဘူးလား’
‘မင်းတို့အားလုံး ဘာဖြစ်ကုန်ကြတာလဲ။ ငါ စင်မြင့်ထက်ကို မတက်ခင်တုန်းကတော့ အားပေးနေကြပြီး... အခုကျတော့ ချက်ချင်းပဲ ငါ့ကို မုန်းတီးသွားကြတယ် ဟုတ်လား’
‘ဟင်း... လူသားတွေဆိုတာ တကယ်ပဲ!’
ရွှီရှောင်ရှို့ အခြေအနေကို ပြန်လည်ကုစားရန် ကြိုးစားသည့်အနေဖြင့်... သူ့မျက်နှာပေါ်တွင် အပြုံးတစ်ခုကို အတင်းဖန်တီးလိုက်ပြီး ပွဲကြည့်ပရိသတ်များကို လှမ်း၍ လက်ပြလိုက်မိသည်
“မုန်းတီးခြင်း ခံခဲ့ရသည်။ အလိုအလျောက်ရမှတ် +၈၈၆။”
ရွှီရှောင်ရှို့ စကားမဆိုနိုင်တော့ချေ။
စောင့်ဆိုင်းရာနေရာတွင်တော့...
ရွှီရှောင်ရှို့ နားနေကုတင်ပေါ်တွင် ထိုင်နေခဲ့သည်။ အပြင်ဘက်က လေထုက ပြင်းထန်လွန်းလှသဖြင့်... သူ ဆက်ပြီး မအိပ်နိုင်တော့ပါချေ။
ဒီအခြေအနေအထိ ရောက်ရှိလာခဲ့ပြီဖြစ်ရာ... သူသည် ထိပ်သီး (၈) ဦးစာရင်းသို့ အောင်မြင်စွာ ဝင်ရောက်နိုင်ခဲ့ပြီ ဖြစ်သည်
ပြိုင်ပွဲအချိန်ဇယားအရ... သူ ဒီနေ့မှာ နောက်ထပ် တိုက်ပွဲတစ်ခု ထပ်မံတိုက်ခိုက်ရဦးမည်ဖြစ်ပြီး၊ တကယ်လို့ ထပ်ပြီး အနိုင်ရရှိခဲ့မယ်ဆိုရင်တော့ မနက်ဖြန်ကျရင် ချန်ပီယံလုပွဲကို ဆင်နွှဲရမည် ဖြစ်သည်။
‘ငါ တကယ်ပဲ ချန်ပီယံ ဖြစ်လာမှာလား...’
ရွှီရှောင်ရှို့ ထိုမျှလောက်အထိ ယုံကြည်မှု မရှိပါချေ။
တကယ်လို့ သူ မနေ့တုန်းက ကျိုးထျန်းဆန်နဲ့ မဆုံခဲ့ဖူးဘူးဆိုရင်တော့ ချန်ပီယံဖြစ်ဖို့ ပိုပြီး ယုံကြည်မှု ရှိနေမှာ သေချာသည်။ လောကီအဆင့်ရဲ့ အထွတ်အထိပ်မှာ ရှိနေတဲ့ ကျိုးထျန်းဆန်ပင်လျှင် ဒီလောက်တောင် ကြောက်မက်ဖွယ်ကောင်းလှတဲ့ တိုက်ခိုက်ရေးစွမ်းရည်တွေ ရှိနေမှတော့... ‘မွေးရာပါအဆင့်’ ရှိ တိုက်ခိုက်ရေးသမားတွေ ဘယ်လောက်တောင် အစွမ်းထက်မလဲဆိုတာကို သူ ခန့်မှန်းလို့မရနိုင်ပါချေ
ရွှီရှောင်ရှို့ သူ့လက်ထဲက ခွက်ကို လှည့်ပတ်ရင်း အနည်းငယ် ဇဝေဇဝါ ဖြစ်နေခဲ့သည်။
‘မွေးရာပါအဆင့်’ ဆိုတာကတော့ ယေဘုယျ နာမည်တစ်ခုသာ ဖြစ်သည်။
၎င်းတွင် အဆင့်သုံးဆင့် ရှိသည် - ‘မူလနန်းတော်အဆင့်’၊ ‘လေဟာနယ်အဆင့်’ နှင့် ‘အထက်ဝိညာဉ်အဆင့်’ တို့ ဖြစ်ကြသည်။
ဝိညာဉ်ကျင့်ကြံခြင်းရဲ့ ပထမဆုံး ဆယ်ဆင့်ကို ဖြတ်သန်းပြီးတဲ့နောက်မှာတော့... ဝိညာဉ်ကျင့်ကြံသူတစ်ယောက်သည် သဘာဝတရားရဲ့ နိယာမတွေကို နားလည်သဘောပေါက်လာပြီး၊ နတ်ဘုရားများ ကျက်စားရာနေရာအနီးတွင် ‘မူလနန်းတော် တစ်ခုကို ဖွင့်လှစ်နိုင်မှာ ဖြစ်သည်။ တကယ်လို့ အောင်မြင်ခဲ့မယ်ဆိုရင် သူတို့ရဲ့ ‘မွေးရာပါ ဓာတ်စွမ်းအား’ ကို နိုးထစေနိုင်မှာ ဖြစ်၏။ ဒါကတော့ မွေးရာပါအဆင့် ဖြစ်သည်
မွေးရာပါ ဓာတ်စွမ်းအားဆိုတာ ဘာလဲဆိုတာနဲ့ ပတ်သက်ပြီးတော့... ၎င်းတို့က အမျိုးမျိုး ကွဲပြားနိုင်ပြီး လူတစ်ဦးနဲ့တစ်ဦး မတူညီကြပါချေ။
၎င်းက အခြေခံဓာတ်ကြီး ငါးပါးထဲက တစ်ခုခု ဖြစ်နိုင်သလို... စိတ်ကူးစိတ်သန်းတစ်ခုလည်း ဖြစ်နိုင်သည်။ ဥပမာအားဖြင့် - ကျောက်ချင်းထန်က သူ့ရဲ့ ဓားဖြင့် ဖန်တီးလိုက်သည့် ရေခဲလှိုင်း သို့မဟုတ် ကျိုးထျန်းဆန်၏ ဓားဆန္ဒ ကဲ့သို့မျိုး ဖြစ်သည်
ရွှီရှောင်ရှို့ အကြောက်ဆုံးအရာကတော့ ဒါပဲ ဖြစ်သည် -
သူ့ရဲ့ အလိုအလျောက်စွမ်းရည် တွေကို မွေးရာပါအဆင့် ဝိညာဉ်သိုင်းပညာတွေအဖြစ် သုံးစွဲနိုင်တယ်ဆိုပေမဲ့... ၎င်းတို့တွင်လည်း အကန့်အသတ်များ ရှိနေခဲ့သည်။
အနည်းဆုံးတော့... သူ့တွင် ‘မွေးရာပါ ဓာတ်စွမ်းအား’ မရှိသောကြောင့်၊ ပြိုင်ပွဲတွင် ချန်ပီယံဖြစ်ဖို့ အလားအလာအရှိဆုံး လူများနှင့် ယှဉ်ပြိုင်ရသည့်အခါ အနိုင်ရရှိဖို့အတွက် ခိုင်မာလှသော အာမခံချက်မျိုး မရှိပါချေ
ရွှီရှောင်ရှို့ သူ့ရဲ့ ဝိညာဉ်စွမ်းအင်သိုလှောင်ရာကို လှမ်းကြည့်လိုက်ပြီးနောက် ခါးသီးစွာ မပြုံးဘဲ မနေနိုင်တော့ချေ။
သူ့ရဲ့ ဝိညာဉ်စွမ်းအင်သိုလှောင်ရာထဲက ဝိညာဉ်စွမ်းအားများသည် ကတ္တရာစေးလို မည်းမှောင်နေပြီး ပူပြင်းလှသော စွမ်းအားများဖြင့် ပြည့်နှက်နေခဲ့သည်။ ဒါကတော့ သူ မနေ့ညက အသက်နဲ့လဲပြီး တိုက်ခိုက်ခဲ့ရမှုကြောင့် ရရှိခဲ့တဲ့ ဆုလာဘ် ဖြစ်သည်။ သို့သော်လည်း... ဒါက တကယ့် ‘မွေးရာပါ ဓာတ်စွမ်းအား’ နှင့် ယှဉ်လိုက်မည်ဆိုပါက အများကြီး လိုအပ်နေသေးသည်
“ဟူးးး...”
ရွှီရှောင်ရှို့ စိတ်ပျက်လက်ပျက်ဖြင့် သက်ပြင်းတစ်ချက် ချလိုက်မိသည်။ သူက ဒီပြိုင်ပွဲအတွင်းမှာ သူ့ရဲ့ စွမ်းအားတွေကို သုံးပြီး ပထမနေရာကို ရယူချင်ခဲ့တာ ဖြစ်သည်။ အခုကြည့်ရတာတော့... သူ့ရဲ့ အိပ်မက်က တကယ့်ကို လက်တွေ့မကျလွန်းလှပါချေ။
သူ သူ့စိတ်ထဲက စနစ်ကို ထပ်မံ ကြည့်ရှုလိုက်ပြန်သည်။
“အလိုအလျောက်ရမှတ် - ၄၈,၂၂၆။”