ရွှီရှောင်ရှို့သည် တကယ်ပင် ချမ်းသာကြွယ်ဝလှ၏။
သူ့အိမ်ရှေ့ဝင်းထဲတွင် ဝိညာဉ်ငါးလေးများ မွေးမြူထားသည့် ရေကန်ငယ်တစ်ခု၊ ကျောက်တောင်တုတစ်ခုနှင့် မြင့်မားသော ဝိညာဉ်သစ်ပင်ကြီး အနည်းငယ် ရှိနေသည်။
တံခါးပိတ်ပြီးနောက် ရွှီရှောင်ရှို့တစ်ယောက် အခန်းထဲ ပြန်ဝင်ကာ အိပ်စက်ဖို့ ပြင်လိုက်သော်လည်း သူ့စိတ်အာရုံထဲက အနီရောင်မျက်နှာပြင်တွင် ကဏ္ဍသစ်တစ်ခု ထပ်တိုးလာသည်ကို သတိပြုမိသွားသည်။ ထိုကဏ္ဍသစ်မှာ ‘အရောင်းဆိုင်’ ဖြစ်သည်။
သူက ‘အရောင်းဆိုင်’ အောက်ခြေက စာသားကို ငုံ့ကြည့်လိုက်ရာ... [အလိုအလျောက် ရမှတ်: ၆၄] ဟု ပြောင်းလဲနေသည်ကို တွေ့လိုက်ရ၏။
ရွှီရှောင်ရှို့တစ်ယောက် ရင်ထဲတွင် အတိုင်းမသိ ဝမ်းသာသွားမိသည်။ စောစောက လူအုပ်ကြီးကြောင့် အလိုအလျောက် ရမှတ်တွေ အများကြီး ရရှိခဲ့တာ ဖြစ်သည်။ ‘ငါ့ရဲ့ အလိုအလျောက်ရမှတ်တွေ ဂဏန်းနှစ်လုံး ဖြစ်သွားမှ ‘အရောင်းဆိုင်’ က ပွင့်လာတာလား မသိဘူး’ ဟု သူ တွေးလိုက်မိသည်။
သူက ‘အရောင်းဆိုင်’ ကဏ္ဍကို နှိပ်ပြီး ဖွင့်ကြည့်လိုက်ရာ... ထိုနေရာတွင် အနီရောင် လက်ဆောင်ဗူးတစ်ခုကလွဲလို့ တခြားဘာမှ မရှိဘဲ လွတ်လပ်နေသည်။
“အလိုအလျောက် လက်ဆောင်ဗူး (ဝယ်ယူရန် : ၁၀ အလိုအလျောက်ရမှတ်)”
ရွှီရှောင်ရှို့သည် မနေ့ညက သူ့တွင်ရှိသော အလိုအလျောက်ရမှတ်များကို သုံးပြီး စွမ်းရည်တွေကို အဆင့်မြှင့်တင်ဖို့ ကြိုးစားခဲ့သော်လည်း ဘယ်လိုလုပ်ရမှန်း မသိခဲ့ချေ။ အခုမှပဲ အလိုအလျောက်ရမှတ်များကို ပစ္စည်းများ ဝယ်ယူရန် အသုံးပြုရမှန်း သူ သဘောပေါက်သွားတော့သည်။
သူ များများစားစား တွေးမနေတော့ဘဲ ထိုလက်ဆောင်ဗူးကို ဝယ်ယူရန် ချက်ချင်း နှိပ်လိုက်သည်။ သူက လက်ဆောင်ဗူးကို ဆွဲဖွင့်လိုက်သည့်အခါ သတိပေးစာ မျက်နှာပြင်က အသစ်ပြန်လည် လန်းဆန်းသွားခဲ့၏။
[စွမ်းရည်ရမှတ် +၁၀]
[အလိုအလျောက် သော့ +၃]
ထိုအချိန်မှာတင် ‘အရောင်းဆိုင်’ မျက်နှာပြင်က တုန်ခါသွားပြီး အနီရောင် ဒိုင်ခွက်ကြီးတစ်ခု ပေါ်လာခဲ့သည်။ ဒီဒိုင်ခွက်က ပြီးခဲ့တဲ့အကြိမ်က ပေါ်လာသည့် အမည်းရောင် ဒိုင်ခွက်ထက် တစ်ဆခန့် ပိုသေးငယ်လှ၏။ ထို့ပြင် ဒိုင်ခွက်၏ မျက်နှာပြင်တစ်ခုလုံးကို မီးခိုးရောင် မြူခိုးထူထူများက ဖုံးလွှမ်းထားသဖြင့် အတွင်းထဲက အရာတွေကို ဘာမှမမြင်ရချေ။
ရွှီရှောင်ရှို့ ထိုဒိုင်ခွက်ကြီးကို မြင်လိုက်ရသောအခါ မျက်ခုံးပင့်သွားပြီး မျက်လုံးများ အားနည်းသွားတော့သည်။ သူက ပြီးခဲ့တဲ့အကြိမ်က ဒိုင်ခွက်ကို လှည့်ရင်း သော့တံ ကျိုးသွားခဲ့သည့် အဖြစ်အပျက်ကို ချက်ချင်း ပြန်တွေးမိသွားသောကြောင့် ဖြစ်သည်။
‘အရောင်းဆိုင်’ ကဏ္ဍထဲတွင် မီးခိုးရောင် သန်းနေသည့် ပစ္စည်းအသစ် နှစ်ခုလည်း ထပ်မံ ပေါ်ပေါက်လာခဲ့သေးသည်။
“စွမ်းရည်ရမှတ် (ဝယ်ယူရန် : ၁၀၀၀ အလိုအလျောက်ရမှတ်)”
“အလိုအလျောက် သော့ (ဝယ်ယူရန် : ၁၀၀၀ အလိုအလျောက်ရမှတ်)”
ရွှီရှောင်ရှို့ ထိုသတိပေးချက် နှစ်ခုကို မြင်လိုက်ရသောအခါ လန့်ဖျတ်သွားမိသည်။ ‘အမလေး... တန်ဖိုးက အဲဒီလောက်တောင် ကြီးတာလား’
ဒါဆို သူ အခုတင် အလိုအလျောက်ရမှတ် ၁၀ မှတ်တည်းနဲ့ ဝယ်လိုက်တဲ့ လက်ဆောင်ဗူးထဲက ပစ္စည်းတွေရဲ့ စုစုပေါင်း တန်ဖိုးက အလိုအလျောက်ရမှတ် ၁၀,၀၀၀ တောင် တန်တာပေါ့။
“ဝါး...” ရွှီရှောင်ရှို့ မျက်လုံးအစုံ ပြူးကျယ်သွားတော့သည်။ ဒီလက်ဆောင်ဗူးက ကစားသမားအသစ်တွေအတွက် စနစ်က ပေးတဲ့ ‘မျက်နှာသာပေးမှု’ တစ်ခု ဖြစ်ရမည်။ ဒါက အလကားပေးတာနဲ့တင် တူလှ၏။
တကယ့်ကို ခံစားလို့ ကောင်းလှပေသည်။
“အလိုအလျောက် သော့... ဒါက ဒီဒိုင်ခွက်ကို လှည့်ဖို့အတွက် သုံးရတာ ဖြစ်ရမယ်” ရွှီရှောင်ရှို့ ဝေခွဲမရ ဖြစ်နေမိသည်။ ဒိုင်ခွက်က ပြီးခဲ့တဲ့အကြိမ်က ဖျက်ဆီးခံလိုက်ရပြီးနောက် သူ့ဘာသာသူ အဆင့်မြှင့်တင်လိုက်တာလား။ အခုက လက်နဲ့ လှည့်စရာ မလိုတော့ဘူးပေါ့။
သူ ‘စွမ်းရည်ရမှတ်’ အကြောင်းကိုတော့ အများကြီး တွေးနေစရာ မလိုချေ။ ဒါက သူ့ရဲ့ အလိုအလျောက် စွမ်းရည်တွေကို အဆင့်မြှင့်တင်ဖို့အတွက် သုံးရတာ သေချာလှသည်။
‘ဒါဆို ငါ အသက်ရှူခြင်းအတတ် ကို အဆင့်မြှင့်ရမလား’ ဟု သူ စိတ်ထဲက တွေးလိုက်သော်လည်း ထိုအတွေးကို ချက်ချင်း ပြန်ဖျောက်ဖျက်လိုက်သည်။ “အလိုအလျောက် သော့ကို အရင် စမ်းကြည့်တာပေါ့။ တခြား ကောင်းမွန်တဲ့ အလိုအလျောက် စွမ်းရည်အသစ်တွေ ရလာနိုင်တာပဲ။”
နောက်ထပ် သုံးရက်နေရင် အပြင်စည်းရဲ့ ‘ဖုန်းယွင်သိုင်းပြိုင်ပွဲ’ စတင်တော့မည် ဖြစ်သည်။ ဒါက ဖုန်းယွင်အဆင့်သတ်မှတ်ချက်ရဲ့ ထိပ်တန်း အဆင့် ၁၀၀ ထဲ ဝင်ချင်ကြတဲ့ ဘော့စ်ကြီးတွေအတွက် ပြိုင်ပွဲဖြစ်သော်လည်း... ရွှီရှောင်ရှို့အတွက်ကတော့ ‘လူရွေးချယ်စိစစ်ရေး’ စာမေးပွဲတစ်ခုသာ ဖြစ်သည်။
တကယ်လို့ သူသာ ဒီအနီရောင် ဒိုင်ခွက်ထဲကနေ အသုံးဝင်မယ့် အလိုအလျောက် စွမ်းရည်တစ်ခုခု ရရှိခဲ့ရင်... ‘ထျန်းဆန်း ဝိညာဉ်နန်းတော်’ မှာ ဆက်ပြီး ကျင့်ကြံခွင့် ရရှိလိမ့်မည် ဖြစ်သည်။ တကယ်လို့ ပြိုင်ပွဲကနေ ထုတ်ပယ်ခံလိုက်ရရင်တော့ သူ ဝိညာဉ်နန်းတော်ကနေ ထွက်ခွာသွားရတော့မည် မဟုတ်ပါလား။
ရွှီရှောင်ရှို့သည် အနီရောင်ဒိုင်ခွက်၏ အောက်ခြေက အပေါက်လေးထဲသို့ သော့တစ်ချောင်းကို ထိုးထည့်လိုက်သည်။ သူ့ခေါင်းပေါ်က မြူခိုးများက ပိုမို ထူထပ်လာပြီး ဘာကိုမှ မမြင်ရတော့ချေ။
“ငါ့ကို အခွင့်အရေးတစ်ခုလောက် ပေးစမ်းပါ။ ငါ့ကို ချက်ချင်း သန်မာလာစေမယ့် အရာတစ်ခုခု ပေးပါဦး...”
သော့ကို လှည့်ပြီးနောက် ရွှီရှောင်ရှို့ လက်နှစ်ဖက်ကို ပူးကပ်လိုက်ပြီး ဆုတောင်းလိုက်မိသည်။ “ကျင့်စဉ်တွေတော့ မပေးပါနဲ့ဦး။ ကျင့်စဉ်တွေ မပေးပါနဲ့ဦး။ အဲဒါတွေက အခုလောလောဆယ် ငါ့ကို မကူညီနိုင်ဘူး...”
မီးခိုးရောင် မြူခိုးများက လှိုင်းထလာခဲ့သည်။ ရွှီရှောင်ရှို့တစ်ယောက် မြူခိုးတွေထဲမှာ ဘာတွေဖြစ်ပျက်နေလဲ မသိရသော်လည်း မကြာခင်မှာတင် သတိပေး မျက်နှာပြင်က ပြောင်းလဲသွားတော့သည်။
[နောက်တစ်ကြိမ်ကျရင် ကံကောင်းပါစေ!]
ရွှီရှောင်ရှို့၏ မျက်နှာကြီး တစ်ခုလုံး မည်းမှောင်သွားတော့သည်။ ‘ဒါက ဘာအဓိပ္ပာယ်လဲ’ သူ တွေးလိုက်မိသည်။ ‘တကယ်ပဲ နောက်တစ်ကြိမ်ကျမှ ကံကောင်းမှာလား’
သူတို့က သာမန်လူတွေ သုံးလို့ရမယ့် အရာတစ်ခုခုကို မပေးနိုင်ကြဘူးလား။ ဘာလို့ စနစ်က ဒီလောက်တောင် ဗြူးဆန်နေရတာလဲ။ ပြီးခဲ့တဲ့အကြိမ်က အပ်တိုကြီးအတိုင်းပဲ။
ရွှီရှောင်ရှို့တစ်ယောက် စိတ်ထဲကနေ ဒေါသတကြီး ရေရွတ်လိုက်မိသော်လည်း သူ့မှာ သော့နှစ်ချောင်း ကျန်သေးသည်။ သူက နောက်ထပ် သော့တစ်ချောင်းကို ထပ်မံ ထိုးထည့်လိုက်ပြီး လူရူးတစ်ယောက်လို အော်ဟစ်လိုက်တော့သည်။ “သွားစမ်း... ကံတရားနတ်ဘုရား ရေ...”
မီးခိုးရောင် မြူခိုးများ ထပ်မံ လှိုင်းထလာပြန်သည်။ ရွှီရှောင်ရှို့ မျှော်လင့်ချက်ကြီးစွာဖြင့် သတိပေး မျက်နှာပြင်ကို စိုက်ကြည့်နေမိ၏။
[သော့အပို တစ်ချောင်း!] ရွှီရှောင်ရှို့ စကားပင် မထွက်နိုင်တော့ချေ။
‘ဟေး... ဒါက ဘာအဓိပ္ပာယ်လဲ’ သူ တွေးလိုက်မိသည်။ ‘ငါက သော့တစ်ချောင်း သုံးလိုက်လို့ သော့တစ်ချောင်း ပြန်ရတယ်၊ ဒါပဲလား။ ငါ့ကို ကစားနေတာလား’
ရွှီရှောင်ရှို့ မျက်လုံးအစုံကို လှန်ပစ်လိုက်ချင်စိတ် ပေါက်သွားသည်။ ‘မင်းကိုယ်မင်း လူကြီးလူကောင်းကြီး ထင်နေတာလား။ သော့အပို တစ်ချောင်းတဲ့...’
‘ငါ နည်းနည်းမှ မရယ်ချင်ဘူးနော်!’
သူ သော့နှစ်ချောင်း သုံးပြီးသွားပြီဖြစ်လို့ သူ့မှာ သော့နှစ်ချောင်းပဲ ကျန်တော့သည်။
ရွှီရှောင်ရှို့တစ်ယောက် ဒီလို နှိပ်စက်မှုကို ဆက်ပြီး မခံစားချင်တော့ချေ။ သူ သော့တစ်ချောင်းကို ထိုးထည့်လိုက်ပြီး သတိပေး မျက်နှာပြင်ကို လှည့်မကြည့်တော့ဘဲ နေလိုက်သည်။ အချိန်အတန်ကြာသွားပြီး သော့ပျောက်ကွယ်သွားပြီမှန်း ခန့်မှန်းမိလိုက်ရမှ... သူ့ရဲ့ နောက်ဆုံးသော့ကို အပေါက်ထဲသို့ အတင်း ဖိနှိပ်ထည့်လိုက်တော့သည်။
“ဘာမှမရလည်း နေပါစေ... ဘာမှမရလည်း နေပါစေ...” သူက ကံကောင်းခြင်းကို ပြောင်းပြန်ဖြစ်အောင် စိတ်ထဲကနေ ကျိန်ဆဲရင်း သတိပေး မျက်နှာပြင်ကို ခိုးကြည့်လိုက်မိသည်။
[အလိုအလျောက်တိုးချဲ့ စွမ်းရည်ကို ရရှိခဲ့သည် : ‘ခွန်အားတိုးမြှင့်ခြင်း’]
[နောက်တစ်ကြိမ်ကျရင် ကံကောင်းပါစေ!]
ပြောင်းပြန် ကျိန်ဆဲတာက တကယ်ပဲ အလုပ်ဖြစ်သွားခဲ့တယ်ပေါ့။
ရွှီရှောင်ရှို့ စာတန်းလေးကို ဖတ်လိုက်ရသောအခါ ဝမ်းသာအားရဖြင့် သူ့ပေါင်ကို သူ ပြန်ရိုက်မိတော့သည်။ နောက်ဆုံးတော့ သူ အသုံးဝင်မယ့် အရာတစ်ခုခု ရခဲ့ပြီ မဟုတ်ပါလား။
သို့သော်လည်း စာသားကို သေချာ ထပ်ဖတ်ကြည့်လိုက်သည့် အခါမှာတော့…
“ခွန်အားတိုးမြှင့်ခြင်း?”
ရွှီရှောင်ရှို့ ရင်ဘတ်ကြီး တစ်ခုလုံး အောင့်တက်သွားပြီး သွေးအန်မတတ် ခံစားလိုက်ရသည်။
‘ငါ့ကို ပိန်ပိန်ညှောင်ညှောင်မို့လို့ လာပြီး လှောင်ပြောင်နေတာလား...’
“အာ... ဒါမှမဟုတ် ငါထင်သလို မဟုတ်တာမျိုး ဖြစ်နိုင်မလား...”
ရွှီရှောင်ရှို့သည် ပြီးခဲ့တဲ့အကြိမ်က ရခဲ့တဲ့ ‘အသက်ရှူခြင်းအတတ်’ ကို ချက်ချင်း သတိရသွားသည်။ ထိုအတတ်ကလည်း အမည်နာမက သာမန်အတိုင်း ထင်ရသော်လည်း အကျိုးသက်ရောက်မှုက အံ့မခန်းလှ၏။ ‘ခွန်အားတိုးမြှင့်ခြင်း’ ကလည်း ထင်မှတ်မထားတဲ့ အကျိုးသက်ရောက်မှုမျိုး ရှိနေနိုင်တာပဲ။
“အဲဒီလိုပဲ မျှော်လင့်ရမှာပဲ!” ရွှီရှောင်ရှို့ စိတ်ကို ပြန်စုစည်းလိုက်ပြီး အနီရောင်မျက်နှာပြင်ကို ကြည့်လိုက်ရာ... ထိုမျက်နှာပြင်က ထပ်ပြီး ပြောင်းလဲသွားတာကို တွေ့လိုက်ရသည်။
၁။ အခြေခံ အလိုအလျောက် စွမ်းရည်များ
၂။ တိုးချဲ့ အလိုအလျောက် စွမ်းရည်များ
၃။ သိုလှောင်ခန်း
‘တိုးချဲ့ အလိုအလျောက် စွမ်းရည်များ ဆိုတဲ့ ကဏ္ဍသစ်တစ်ခု ထပ်တိုးလာတာလား’ သူ သတိပေး စာ ကို ထပ်ကြည့်လိုက်သည့်အခါ ‘ခွန်အားတိုးမြှင့်ခြင်း’ က တိုးချဲ့အလိုအလျောက် စွမ်းရည်အမျိုးအစားထဲမှာ ပါဝင်နေမှန်း သိလိုက်ရသည်။ ဒါက အသက်ရှူခြင်းအတတ်နှင့် အမျိုးအစား မတူချေ။
“ခွဲခြားထားတာ တော်တော်လေး စနစ်ကျသားပဲ...”
သူက ထိုကဏ္ဍကို နှိပ်ပြီး ဖွင့်ကြည့်လိုက်ရာ... အောက်ခြေတွင် စာသားအသေးလေးတစ်ခု ရှိနေသည်ကို တွေ့ရသည်။ ‘ခွန်အားတိုးမြှင့်ခြင်း’ (မွေးရာပါအဆင့် မဟုတ်သော အဆင့် - ၁)
‘ဒါက ငါ့ခန္ဓာကိုယ်ကို သန်မာအောင် လုပ်ပေးမယ့် အတတ်လား’ ရွှီရှောင်ရှို့ သူ့လက်မောင်းကို သူ ပြန်ဆွဲဆိတ်ကြည့်လိုက်သည်။ ဒီအလိုအလျောက် စွမ်းရည် ပေါ်လာရုံနဲ့တော့ သူ့လက်မောင်းက ကြွက်သားတွေ ထွက်မလာသေးချေ။
အဆင့်က သိပ်မမြင့်သေးလို့ ဖြစ်ရမည်။
ရွှီရှောင်ရှို့ ဇဝေဇဝါ ဖြစ်နေမိသည်။ သူ့တွင် စွမ်းရည်ရမှတ် ၁၀ မှတ် ရှိနေသေးသည်။ ဒါကို ဘယ်နေရာမှာ သုံးရမလဲ။
အသက်ရှူခြင်းအတတ်က အခြေခံအတတ်ဖြစ်လို့ သေချာပေါက် အဆင့်မြှင့်တင်ဖို့ အဖိုးတန်လှသည်။ သို့သော်လည်း ဒါက အကျိုးသက်ရောက်မှု ရရှိဖို့ အချိန်အတော်ကြာ စုဆောင်းရသည်။ သူ မနေ့က အဆင့်တက်နိုင်ခဲ့တာကလည်း သူ့တွင် ခိုင်မာသော အခြေခံအုတ်မြစ် ရှိနေခဲ့လို့ ဖြစ်သည်။
အခြားတစ်ဖက်တွင်တော့ ‘ခွန်အားတိုးမြှင့်ခြင်း’ က သူထင်သလိုသာ ခန္ဓာကိုယ်ကို သန်မာစေမယ့် အတတ်ဆိုရင်... အခုလောလောဆယ် အဆင့်မြှင့်တင်ဖို့အတွက် အသင့်တော်ဆုံး ရွေးချယ်မှု ဖြစ်ပေလိမ့်မည်။
တကယ်လို့ သူ့ခန္ဓာကိုယ်သာ ပိုမို သန်မာလာခဲ့ရင် ‘ဖုန်းယွင်သိုင်းပြိုင်ပွဲ’ မှာ သူ တိုက်ခိုက်နိုင်မယ့် အခွင့်အရေး ရှိလာလိမ့်မည်။ အနည်းဆုံးတော့ ပြိုင်ပွဲကနေ ထုတ်ပယ်ခံရမယ့် ဘေးကနေ လွတ်မြောက်နိုင်တာပေါ့။
ရွေးချယ်စရာတွေကို ချိန်ဆကြည့်ပြီးနောက် နောက်ဆုံးတွင်တော့ ရွှီရှောင်ရှို့တစ်ယောက် သူ့ရဲ့ စွမ်းရည်ရမှတ်တွေကို ‘ခွန်အားတိုးမြှင့်ခြင်း’ ပေါ်မှာပဲ သုံးဖို့ ဆုံးဖြတ်လိုက်တော့သည်။ ‘အံ့ဖွယ်အမှုတစ်ခုခု ဖြစ်လာရင် ဖြစ်လာနိုင်တာပဲ...’
သူက မျက်နှာပြင်ပေါ်တွင် စွမ်းရည်ရမှတ်ကို အသုံးပြုလိုက်ရာ သတိပေး မျက်နှာပြင်က ချက်ချင်း ပြောင်းလဲသွားခဲ့၏။
‘ခွန်အားတိုးမြှင့်ခြင်း’ (မွေးရာပါအဆင့် မဟုတ်သော အဆင့် - ၂)
ရွှီရှောင်ရှို့ သူ့ခန္ဓာကိုယ်ရဲ့ အပြောင်းအလဲကို အမြဲမပြတ် စောင့်ကြည့်နေမိသည်။ သူ စိတ်ထင်လို့ပဲလား မသိသော်လည်း... သူ့တွင် ခွန်အားတွေ ပိုမို ပြည့်ဝလာသလို ခံစားရသော်လည်း သိသာထင်ရှားတဲ့ ပြောင်းလဲမှုမျိုးတော့ မရှိသေးချေ။ သူ မျက်နှာပြင်ပေါ်က စွမ်းရည်အဆင့်ကို ဆက်တိုက် နှိပ်လိုက်တော့သည်။
‘ခွန်အားတိုးမြှင့်ခြင်း’ (မွေးရာပါအဆင့် မဟုတ်သော အဆင့် - ၃)
‘ခွန်အားတိုးမြှင့်ခြင်း’ (မွေးရာပါအဆင့် မဟုတ်သော အဆင့် - ၄)
‘ခွန်အားတိုးမြှင့်ခြင်း’ (မွေးရာပါအဆင့် မဟုတ်သော အဆင့် - ၅)
ဒီတစ်ကြိမ်တွင်တော့ အပြောင်းအလဲက တကယ့်ကို သိသာထင်ရှားလွန်းလှ၏။ ရွှီရှောင်ရှို့သည် သူ့ကြွက်သားများ အနည်းငယ် ဖောင်းကြွလာသည်ကို ခံစားလိုက်ရပြီး ပိန်ပိန်ညှောင်ညှောင် ပုံစံမျိုး မဟုတ်တော့ချေ။
“ကောင်းလိုက်တာ!” ရွှီရှောင်ရှို့ ရင်ထဲတွင် အုန်းခနဲ ဝမ်းသာသွားမိသည်။ သူ မြေကြီးကို လက်သီးဖြင့် တစ်ချက် ထိုးချလိုက်ရာ... မြေကြီးပေါ်တွင် အက်ကွဲသံ အနည်းငယ်နှင့်အတူ အချိုင့်ငယ်လေးတစ်ခု ဖြစ်ပေါ်သွားခဲ့သည်။
“မိုက်တယ်... ငါ့ရဲ့ ခွန်အားတွေ တိုးလာတာ တကယ့်ကို ထင်ရှားလွန်းတယ်။ ဒီအလိုအလျောက် စွမ်းရည်ရဲ့ ‘မွေးရာပါအဆင့် မဟုတ်သော အဆင့်’ က ဝိညာဉ်ကျင့်ကြံသူတွေရဲ့ ‘ဝိညာဉ်ကျင့်ကြံခြင်း ဆယ်ဆင့်’ နဲ့ တူတူပဲလား မသိဘူး” ရွှီရှောင်ရှို့ သူ့ဘာသာသူ ရေရွတ်လိုက်မိသည်။
ဝိညာဉ်ကျောက်တုံးတွေကို စတင်ကျင့်ကြံတဲ့ ကျင့်ကြံသူတွေမှာ ပထမဆုံး ‘ဝိညာဉ်ကျခံခြင်း ဆယ်ဆင့်’ ရှိကြသည်။ ထိုဆယ်ဆင့်ကို ကျော်ဖြတ်ပြီးမှသာ ‘မွေးရာပါအဆင့်’ သို့ ရောက်ရှိကြတာ ဖြစ်သည်။
ထို့ကြောင့် ပထမဆုံး ဆယ်ဆင့်ကို ‘မွေးရာပါအဆင့် မဟုတ်သော အဆင့်’ ဟု ခေါ်ဆိုကြခြင်း ဖြစ်သည်။ ပြဿနာ မရှိချေ။ အခု ဒီအတတ်က ‘အဆင့် ၅’ ပဲ ရှိသေးတာတောင် ဒီလောက်တောင် စွမ်းအားကြီးနေပြီ။ တကယ်လို့ လူတစ်ယောက်ကိုသာ ထိုးလိုက်ရင် နံရိုးအနည်းငယ် ကျိုးသွားလောက်သည်။
တကယ်လို့ သူထင်သလိုသာ ဒီအတတ်ရဲ့ အဆင့်တွေက ကျင့်ကြံသူတစ်ယောက်ရဲ့ ကျင့်ကြံခြင်းအဆင့်တွေနဲ့ တူညီနေမယ်ဆိုရင်... သူ စွမ်းရည်ရမှတ်အားလုံးကို ဒီအတတ်ပေါ်မှာပဲ ပုံအော သုံးလိုက်ရင် သူ့ခန္ဓာကိုယ်က ‘မွေးရာပါအဆင့်’ ကို ရောက်သွားနိုင်မလား။
“ဝါး... ဟုတ်သားပဲ!” ရွှီရှောင်ရှို့တစ်ယောက် ရင်ထဲတွင် စိတ်လှုပ်ရှားမှုများ လှိုင်းထသွားတော့သည်။ ခန္ဓာကိုယ်ကို မွေးရာပါအဆင့်ရောက်အောင် လေ့ကျင့်ဖို့က ဝိညာဉ်ကျင့်ကြံခြင်းမှာ မွေးရာပါအဆင့်ရောက်ဖို့ထက် အဆပေါင်းများစွာ ပိုမို ခက်ခဲလှသည် မဟုတ်ပါလား။
သူ ပထမတော့ စွမ်းရည်ရမှတ်တွေကို အတတ်နှစ်ခုလုံးပေါ်မှာ မျှပြီး သုံးဖို့ စဉ်းစားခဲ့တာ ဖြစ်သည်။ သို့သော်လည်း အခုတော့ စွမ်းရည်ရမှတ် အားလုံးကို ‘ခွန်အားတိုးမြှင့်ခြင်း’ ပေါ်မှာပဲ ပုံအော သုံးဖို့ ဆုံးဖြတ်လိုက်တော့သည်။ ဒါက ဘယ်လို အကျိုးသက်ရောက်မှုမျိုး ရှိလာမလဲဆိုတာ သူ မြင်ချင်လှပြီ ဖြစ်သည်။
‘ခွန်အားတိုးမြှင့်ခြင်း’ (မွေးရာပါအဆင့် မဟုတ်သော အဆင့် - ၆)
‘ခွန်အားတိုးမြှင့်ခြင်း’ (မွေးရာပါအဆင့် မဟုတ်သော အဆင့် - ၇)
‘ခွန်အားတိုးမြှင့်ခြင်း’ (မွေးရာပါအဆင့် မဟုတ်သော အဆင့် - ၈)
သူ့ခန္ဓာကိုယ်ရဲ့ ခွန်အားတွေက အဆက်မပြတ် မြင့်တက်လာခဲ့သည်။ ရွှီရှောင်ရှို့တစ်ယောက် ဆေးတစ်မျိုးမျိုး သုံးစွဲထားသလိုမျိုး ခံစားရပြီး ခန္ဓာကိုယ်ထဲတွင် အကန့်အသတ်မရှိသော စွမ်းအင်တွေ ပြည့်လျှံနေခဲ့၏။
သို့သော်လည်း သူ့ကြွက်သားများက သာမန်လူတစ်ယောက်ထက် ပိုမို ကြီးမားလာပြီးနောက်... ဆက်ပြီး ဖောင်းကြွမလာတော့ဘဲ ပိုမို ကျစ်လျစ်သိပ်သည်းလာကာ ပြီးပြည့်စုံသော ကြွက်သားအမြှောင်းမြှောင်း ပုံစံမျိုး ဖြစ်ပေါ်လာခဲ့သည်။
ရွှီရှောင်ရှို့ အင်္ကျီကို ချွတ်လိုက်သည့်အခါ အောက်တွင် လှပပြီး ကျစ်လျစ်လွန်းလှသော ကြွက်သားအလှအပများ ပေါ်ထွက်လာခဲ့၏။
ဒုန်း...
သူ မြေကြီးကို လက်သီးဖြင့် ထိုးချလိုက်ရာ မြေပြင်ကြီး တစ်ခုလုံး ကွဲအက်သွားတော့သည်။
ဒီခွန်အားက ဝိညာဉ်ကျင့်ကြံခြင်း အဆင့် ၈ ရှိတဲ့ ကျင့်ကြံသူတစ်ယောက်ရဲ့ အစွမ်းနဲ့ ရင်ဘောင်တန်းနိုင်လှ၏။
ရွှီရှောင်ရှို့ အံ့သြမှင်တက်သွားမိသည်။ “အစွမ်းထက်လိုက်တာ... ဒါက တကယ့်ကို အစွမ်းထက်လွန်းလှတယ်!”
ဒီလက်သီးတစ်ချက်တည်းနဲ့တင် သူ ဖုန်းယွင်အဆင့်သတ်မှတ်ချက်ရဲ့ ရှေ့က အဆင့်အနည်းငယ် ရာဂဏန်းထဲ ဝင်နိုင်လောက်သည်။ ဒါက သူ ပြိုင်ပွဲကနေ ထုတ်ပယ်မခံရဖို့အတွက် လုံလောက်လွန်းလှ၏။
ရွှီရှောင်ရှို့ မျက်လုံးထဲတွင် အဝါရောင်အလင်း တစ်ခု ဖြတ်သန်းသွားသည်။ သူ ဒီနေရာတင် ရပ်တန့်မနေတော့ချေ။ သူ့တွင် စွမ်းရည်ရမှတ် ၃ မှတ် ကျန်သေးသည်၊ သွားစို့…
‘ခွန်အားတိုးမြှင့်ခြင်း’ (မွေးရာပါအဆင့် မဟုတ်သော အဆင့် - ၉)
‘ခွန်အားတိုးမြှင့်ခြင်း’ (မွေးရာပါအဆင့် မဟုတ်သော အဆင့် - ၁၀)
‘ခွန်အားတိုးမြှင့်ခြင်း’ (မွေးရာပါအဆင့် - ၁)
ရွှီရှောင်ရှို့ နောက်ဆုံးစာတန်းကို မြင်လိုက်ရသောအခါ ပျော်ရွှင်လွန်းသဖြင့် စိတ်ထဲတွင် ဗလာကျင်းသွားတော့သည်။ “မွေးရာပါအဆင့်... တကယ်ကြီး မွေးရာပါအဆင့်ကို ရောက်သွားတာပဲ!”
သူ့ခန္ဓာကိုယ်ရဲ့ ကြွက်သားအမြှောင်းမြှောင်းက ပြင်းထန်စွာ လှုပ်ခတ်လာခဲ့သည်။ နောက်တစ်စက္ကန့်မှာတော့ သူ့ကြွက်သားတွေထဲကနေ အလွန် ညှော်နံစော်လှသော စေးကပ်ကပ် အမည်းရောင် အညစ်အကြေးများ စီးထွက်လာခဲ့တော့သည်။
ရွှီရှောင်ရှို့ ခေါင်းမော့ပြီး အော်ဟစ်လိုက်ကာ သူ့ပါးကို သူ ပြန်ပြီး ခပ်ပြင်းပြင်း တစ်ချက် ရိုက်လိုက်မိ၏။
ဖြန်း...
သူ အိပ်မက်မက်နေတာ မဟုတ်ချေ။
သူ မြေကြီးကို လက်သီးဖြင့် ထိုးချလိုက်သည်။ ဒုန်းခနဲ အသံနှင့်အတူ လက်ဝါးအရွယ်အစားရှိသော တွင်းနက်ကြီးတစ်ခု ဖြစ်ပေါ်သွားခဲ့ပြီး ထိုတွင်းနက်ကြီးရဲ့ ဗဟိုကနေ ပင့်ကူအိမ်သဏ္ဍာန် အက်ကြောင်းများက ဘေးပတ်ပတ်လည် လက်မအနည်းငယ်အထိ ပျံ့နှံ့သွားခဲ့သည်။
ဒါက သူ့ခွန်အားရဲ့ တစ်ဝက်တင် ရှိသေးတာ ဖြစ်သည်။
ရွှီရှောင်ရှို့ ငေးအမ်းသွားမိသည်။ သူ ခွန်အားတစ်ဝက်တင် သုံးခဲ့တာ ဖြစ်သည်။ တကယ်လို့ သူသာ ခွန်အားအပြည့် သုံးပြီး လူတစ်ယောက်ရဲ့ ခေါင်းကို ထိုးလိုက်ရင်…
ဟီးဟီး...
ရွှီရှောင်ရှို့တစ်ယောက် လာမည့် ‘ဖုန်းယွင်သိုင်းပြိုင်ပွဲ’ က တကယ့်ကို စိတ်ဝင်စားဖို့ ကောင်းတော့မည်ဟု ခံစားလိုက်ရတော့သည်။