အခန်း (၆၀) တူးဆွထားသော ထောင်ချောက်

ဒူလီဖန်း သက်ပြင်းအသာ ချလိုက်သည်။

 "ခင်ဗျားရဲ့ ပုံပြင်က နားထောင်လို့ မကောင်းဘူး ကျွန်တော့်မှာ လုပ်စရာတွေ ရှိသေးတယ် ထွက်သွား ပေးပါ"

ဒါကတော့ ထွက်သွားဖို့ တိုက်ရိုက် အမိန့်ပေးလိုက်ခြင်းပင် ဖြစ်သည်။ 

လင်ရှောင်စုနှင့် ကျိုးမေတို့ နှစ်ဦးစလုံးမှာ ယဉ်ကျေးစွာ ကြိုဆိုမှုမှတစ်ဆင့် တံခါးအပြင်ဘက်သို့ နှင်ထုတ်ခံလိုက်ရသည့် အခြေအနေသို့ ရောက်ရှိသွားလေသည်။

 သို့သော် လင်ရှောင်စု၏ မျက်နှာပေါ်တွင် စိတ်ညိုးနွမ်းရိပ်များ ရှိနေသလော။ 

သူသည် ပြုံးရွှင်စွာဖြင့် ထရပ်လိုက်ပြီး ဒူလီဖန်းအား နှုတ်ဆက်ရန် လက်ကို ဆန့်ထုတ်လိုက်၏။

 ကံမကောင်းစွာဖြင့် ဒူလီဖန်းက သူ့ကို လျစ်လျူရှုလိုက်သည့်အတွက် လက်ဆွဲနှုတ်ဆက်ခြင်းမှာ မဖြစ်မြောက်ခဲ့ပေ။ 

သူတို့ ထွက်ခွာသွားပြီးနောက် ဒူလီဖန်းက ပြတင်းပေါက်မှနေ၍ စောင့်ကြည့်နေလေသည်။

 ကားမှာ စက်ရုံဝင်းထဲမှ အရှိန်ဖြင့် ထွက်ခွာသွားပြီးနောက် ဒူလီဖန်း၏ မျက်နှာမှာ မှောင်မိုက်သွား၏။

 လေပြေက တိုက်ခတ်သွားပြီး ဒူလီဖန်း၏ ဆံပင်များ အနည်းငယ် လွင့်ဝဲသွားကာ ခေါင်းကို ဖြည်းညင်းစွာ လှည့်လိုက်သည်။ 

"ဒီလူက နည်းနည်း ကြောက်ဖို့ကောင်းတယ်"

သူ့နောက်တွင် ရှိနေသော အတွင်းရေးမှူးက တည်ငြိမ်စွာ ပြောလိုက်၏။

 "ရှင် အာရုံစိုက်ရမှာက သူ ကြောက်ဖို့ကောင်း၊ မကောင်း ဆိုတာ မဟုတ်ဘူး... သူက ဘာလို့ သူ့ကိုယ်သူ ကြောက်ဖို့ကောင်းအောင် ပြသချင်နေတာလဲ ဆိုတာပဲ"

ဒူလီဖန်းက ဆိုလိုက်၏။ 

"သတိပေးချက်တစ်ခုလား" 

"ဒါမှမဟုတ် သူက ကျွန်မနဲ့ ရည်ရွယ်ချက်ချင်း တူနေတာလည်း ဖြစ်နိုင်တယ်"

"ဆက်ပြော" 

ဒူလီဖန်းက ပြောလိုက်သည်။

 စကားအနည်းငယ်နှင့်ပင် အခြားသူများ မတွေးမိနိုင်သည့် အချက်တစ်ချက် ပေါ်ထွက်လာ၏။ 

ဤအတွင်းရေးမှူးမှာ သာမန် အတွင်းရေးမှူး တစ်ယောက် လုံးဝ မဟုတ်ပေ။

 ဘာကြောင့်လဲဆိုတော့ ဤအချိန်တွင် သူမက ဆိုဖာပေါ်တွင် ထိုင်နေပြီး သူဌေးဖြစ်သူ ဒူလီဖန်းက သူမ၏ ဘေးတွင် ရပ်နေရသောကြောင့် ဖြစ်၏။

"သူ ပြောသွားတဲ့ အကြောင်းပြချက်တွေက တစ်ထပ်တည်း ကျနေပေမဲ့ သူမှာ အထောက်အထား မရှိဘူး" 

အတွင်းရေးမှူးဖြစ်သူ ရှောင်ကျွမ်က ဆက်ပြောလိုက်လေသည်။

 "သာမန် အခြေအနေမှာ ဆိုရင် ကျွန်မတို့ ဘာလုပ်သင့်သလဲ"

"အထောက်အထားကွင်းဆက်ကို ဖြတ်တောက်လိုက်" 

လီယွီဖန်းကို ဖမ်းဆီးထားပြီး ဖြစ်သည်၊၊

 အမှုကိစ္စ၏ ရှုပ်ထွေးမှုကြောင့် ရဲဌာနက သူမကို ၁၅ ရက်ကြာ ထိန်းသိမ်းထားလေသည်။

 လင်ရှောင်စု ၏ ပြောပြချက်ကို ရဲက လက်ခံယုံကြည်လိုက်သည်နှင့် သူတို့သည် လီယွီဖန်းကို စစ်ဆေးမေးမြန်းရန် နည်းလမ်းမျိုးစုံ သုံးလာပေလိမ့်မည်။

 လီယွီဖန်း ပါးစပ်ဟလိုက်သည်နှင့် ရဲဌာနတွင် ဒဲလ်ကုမ္ပဏီကို စေ့စေ့စပ်စပ် စုံစမ်းရန် အကြောင်းပြချက် ရှိသွားပေလိမ့်မည်။

 ထို့ကြောင့် အကောင်းဆုံး နည်းလမ်းမှာ ထူးခြားသော အစီအမံများကို သုံးပြီး သူမကို သတ်ပစ်ရန်သာ ဖြစ်၏။ 

ဒါက အထောက်အထား ကွင်းဆက်ကို ဖြတ်တောက်ရန် ဒူလီဖန်း၏ ရှင်းပြချက်ပင် ဖြစ်ပေ၏။

ရှောင်ကျွမ်က  "ဒါက သူ ကျွန်မတို့အတွက် တူးထားတဲ့ ထောင်ချောက်ပဲ"

ဒူလီဖန်း မျက်ခုံးအနည်းငယ် တွန့်ကွေးသွားသည်။

 "သူ ဒီနေ့ ဒီပုံပြင်ကို ထုတ်ပြောတာက ကျွန်တော်တို့ကို လီယွီဖန်းကို သတ်ခိုင်းဖို့ ရည်ရွယ်ချက်နဲ့လား"

"ဒါကလွဲရင် ဘာဖြစ်ရမလဲ သူ ငြီးငွေ့နေလို့လား သူ့လက်ထဲမှာ ဘာအထောက်အထားမှ မရှိဘူး သူ ကျွန်မတို့ကို သံသယ ရှိနေရင်တောင် တရားဝင် စုံစမ်းခွင့် မရှိဘူး ဒါပေမဲ့ ကျွန်မတို့က ထိန်းသိမ်းရေးစခန်းထဲကို ရဲဝံ့စွာ ဝင်ပြီး လီယွီဖန်းကို သတ်လိုက်တာနဲ့ သူ့ရဲ့ အတော်ဆုံး အရည်အချင်းဖြစ်တဲ့ စုံစမ်းထောက်လှမ်းမှုနဲ့ တည့်တည့် တိုးသွားလိမ့်မယ် အဲဒီအခါကျရင်တော့ သူက လုပ်ကြံမှု နောက်ကွယ်က အထောက်အထားတွေကို ဖော်ထုတ်နိုင်ဖို့ နည်းလမ်းရှာလိမ့်မယ် ဆိုတာ ယုံကြည်လိုက်ပါ"

ဒူလီဖန်း၏ နဖူးပေါ်တွင် ချွေးစက်များ ထွက်ပေါ်လာ၏။

 ခဏလေးကပင် သူ့စိတ်ထဲတွင် ရှုပ်ထွေးနေပြီး လီယွီဖန်းကို လုပ်ကြံကာ အထောက်အထား ကွင်းဆက်ကို ဖြတ်တောက်ရန် အလုပ်ထဲသို့ နစ်မွန်းသွားနှင့်ပြီဖြစ်သည်။ 

သူက သူမကို ဘယ်လို အစအနမကျန် သတ်မလဲ ဆိုတာကိုပဲ စဉ်းစားခဲ့မိ၏။ 

သို့သော် ဒါက လင်ရှောင်စု တမင်ချန်ထားခဲ့သည့် နောက်တံခါးပေါက် ဖြစ်သည်ကို သူ မတွေးမိခဲ့ပေ... အဲဒီလောက်ထိ လိမ္မာပါးနပ်တာလား။

 တံခါးကို ညင်သာစွာ ခေါက်လိုက်၏.။

အခန်းထဲက လူနှစ်ယောက်စလုံး တုန်လှုပ်သွားပြီး

 ဒူလီဖန်းက ပြန်လည်ထိုင်လိုက်ကာ အတွင်းရေးမှူး ရှောင်ကျွမ်က ထရပ်ပြီး တံခါးဆီသို့ သွားကာ ဖွင့်လိုက်၏။

 ရုံးခန်း အပြင်ဘက်တွင် ပြင်ပလူ မရှိချေ။

 ကားသမား ဒေါင်ဇီသာ ရှိ၏။

"အစ်မကျွမ်... ကျွန်တော် အကြာကြီး စဉ်းစားနေမိတဲ့ အရာတစ်ခု ရှိတယ် တကယ်ကို တစ်ခုခု မှားနေသလိုပဲ" 

ဒေါင်ဇီက ပြောလိုက်သည်။

"ဘာလဲ"

"လင်ရှောင်စု ကျွန်တော့်ကို လက်ဆွဲနှုတ်ဆက်တဲ့ အချိန်မှာ သူ့ရဲ့ အားက သာမန်ထက် ထူးခြား လွန်းနေတယ်" 

ရှောင်ကျွမ်၏ မျက်လုံးများမှာ ထိုအချိန်တွင် ရုတ်တရက် နက်ရှိုင်းပြီး တည်ငြိမ်သွားလေ၏။

"ပြီးတော့ လက်ဆွဲနှုတ်ဆက်ပြီးတဲ့နောက်မှာ သူ ကျွန်တော့်ရဲ့ ဆံပင်တစ်ပင်ကို ဆွဲနုတ်သွားတယ်"

ရှောင်ကျွမ်၏ ခန္ဓာကိုယ် တုန်လှုပ်သွားလေသည်။ 

"သူ မင်းရဲ့ ဆံပင်ကို ဆွဲနုတ်သွားတာလား မင်း သေချာရဲ့လား"

"၁၀၀ရာခိုင်နှုန်း သေချာတယ် လက်ဆွဲနှုတ်ဆက်တာက အကာအကွယ်ပဲ ဆံပင်ကို ဆွဲနုတ်တာကပဲ သူ့ရဲ့ တကယ့် ရည်ရွယ်ချက်ပဲ ဒီလုပ်ရပ်ကြောင့်ပဲ သူ့ရဲ့ တကယ့် တိုက်ခိုက်နိုင်စွမ်းက ကျွန်တော့်ထက် မလျော့ဘူးလို့ ကျွန်တော် ဆုံးဖြတ်လိုက်တာ"

"ဒါ... ကိစ္စက ကြီးကျယ်လာပြီ" 

ရှောင်ကျွမ်က သက်ပြင်းအသာ ချလိုက်ပြီး သူမ၏ မျက်လုံးများမှာ အလွန်ပင် နက်ရှိုင်းနေ၏။

ဖုန်းချန်လမ်းမကြီး

 တောင်ဘက်တံခါးတံတား အနီး

 မေလ၏ လေပြေသည် ယီရွှေမြစ်ကို ဖြတ်သန်းတိုက်ခတ်ပြီး မြစ်ကမ်းပါးရှိ မိုးမခပင်များကို လှုပ်ခါနေ၏။ 

အရာအားလုံးမှာ အလွန်ပင် လှပပြီး အေးချမ်းနေပေသည်။ 

ကားက မြစ်ကမ်းနား တစ်လျှောက် ဖြည်းညင်းစွာ မောင်းနှင်သွားသည် ကားအတွင်းတွင် ကျိုးမေ၏ အမူအရာမှာ အလွန်ပင် တည်ကြည်နေပြီး နောက်ဆုံးတွင် သူမ သက်ပြင်းအသာ ချလိုက်သည်။

 "ရှင် ပြောသွားတဲ့ ပုံပြင်က ဖြစ်နိုင်ခြေ ဘယ်လောက် ရှိသလဲ"

"ကျွန်တော် ဒဲလ်ကုမ္ပဏီထဲကို ပထမဆုံး ဝင်တုန်းကတော့ ၅၀ ရာခိုင်နှုန်းပဲ ယုံကြည်ခဲ့တာ ဒါပေမဲ့ အခုတော့ ၈၀ ရာခိုင်နှုန်း ဖြစ်သွားပြီ"

"တကယ်လို့ ရှင် ပြောသလိုသာဆိုရင် ဒီနေ့ ကျွန်မတို့ အရမ်းကို အပြစ်ကင်းစင်တဲ့ အမှားတစ်ခု လုပ်မိလိုက်တာ မဟုတ်ဘူးလား မြက်ကိုရိုက်ပြီး မြွေကို လန့်အောင် လုပ်လိုက်သလို ဖြစ်မသွား ဘူးလား"

လင်ရှောင်စုက အနည်းငယ် ပြုံးလိုက်၏။

 "မြက်ကို ရိုက်ပြီး မြွေကိုလန့်အောင် လုပ်တာက ရဲဘာသာစကားမှာတော့ လူသစ်တွေလုပ်မိတဲ့ အမှားတစ်ခုပါ ဒါပေမဲ့ ကျွန်တော့်ရဲ့ အဘိဓာန်မှာတော့ တစ်ခါတစ်လေမှာ ဒါက တကယ့်ကို လိမ္မာတဲ့ အကွက်တစ်ခုပဲ"

"ရှင် ဘာကို ဆိုလိုတာလဲ"

"စဉ်းစားကြည့်ပါ တကယ်လို့ သူတို့သာ ဖြစ်ခဲ့မယ်ဆိုရင် ဒီပုံပြင်ကို ရုတ်တရက် ကြားလိုက်ရတဲ့အခါ သူတို့ ဘာလုပ်ကြမလဲ"

အတိတ်က အမှုအခင်းများ၏ ပုံရိပ်များက ကျိုးမေ၏ စိတ်ထဲတွင် လျှပ်တစ်ပြက် ပေါ်လာ၏။

 "ဖြစ်နိုင်ခြေ နှစ်ခု ရှိတယ် တစ်ခုက လီယွီဖန်းကို သတ်တာ နောက်တစ်ခုက ကျွန်မတို့ကို သတ်တာ"

"ပြီးတော့ရော သူတို့က အစအန မကျန်အောင် လွတ်သွားမှာလား"

ကျိုးမေ၏ မျက်လုံးများ ရုတ်တရက် လင်းလက်သွား၏။

 "ဒါ ရှင် သူတို့အတွက် တူးထားတဲ့ ထောင်ချောက်လား"

"ဟုတ်တယ် လီယွီဖန်းရဲ့ အသက်က တန်ဖိုး မကြီးလှပါဘူး...’’

“တောင်းပန်ပါတယ်၊ ရှင် ဒီလို မပြောသင့်ဘူး’’ 

“ဒါပေမဲ့ ကျွန်တော်ကတော့ ပြောမယ် တကယ်လို့ သူမရဲ့ အသက်နဲ့ ငါးကြီးမိဖို့ သံမဏိ အထောက် အထားကို လဲလှယ်နိုင်မယ်ဆိုရင် ကျွန်တော်ကတော့ တန်တယ်လို့ ထင်တယ်"

"ရှင် ရန်သူကို လျှော့တွက်နေတာ တကယ်လို့ သူသာ မျိုးရိုးဗီဇဆိုင်ရာ အဆိပ်တွေ ဆန့်ကျင်ဘက် ဆေးတွေတောင် ထုတ်လုပ်နိုင်တဲ့ အရည်အချင်း ရှိမယ်ဆိုရင် သူ့နောက်ကွယ်က အင်အားက ခန့်မှန်းရခက်တယ် သူ လီယွီဖန်းကို ထိန်းသိမ်းရေးစခန်းထဲမှာ သတ်လိုက်ရင်တောင် ကျွန်မတို့က ဒီကွင်းဆက်ကို လိုက်နိုင်မှာ မဟုတ်ဘူး"

"သတ်ဖို့ နည်းလမ်းပေါင်း ထောင်သောင်းရှိတယ် ဒါပေမဲ့ အမှားအယွင်း လုံးဝ မရှိဘူး ဆိုတာတော့ သီအိုရီအရ မရှိဘူး"

"ဒါဆို ရှင် ရန်သူကို လျှော့တွက်တာ မဟုတ်ဘူး ရှင် အလွန်အမင်း ယုံကြည်မှု လွန်ကဲနေတာပဲ"

 ကျိုးမေက ဆက်ပြောလိုက်သည်။

 "ရှင် တခြား ရလိုက်တဲ့ အမြတ် ရှိသေးလား"

"ရှိတယ် ဒါက ဒီခရီးရဲ့ အကြီးမားဆုံး အမြတ်ပဲ" 

လင်ရှောင်စုက လက်ကို ဖြည်းညင်းစွာ မြှောက်လိုက်ပြီး သူ၏ လက်ချောင်းထိပ်တွင် ဆံပင်တစ်ပင် ရှိနေ၏။ 

ကားက ၁၀ မီတာလောက် ရှေ့ကို အရှိန်တင်ပြီးမှ ရပ်လိုက်သည်။

ကျိုးမေ၏ အကြည့်က ဆံပင်တစ်ပင်ပေါ်တွင် ခိုင်မြဲစွာ ရှိနေ၏။

 "ဒါ ဘယ်သူ့ ဆံပင်လဲ"

"ဒါ လက်ဆောင်ပေးသူရဲ့ ဆံပင်ပဲ ဒေါင်ဇီရဲ့ ဆံပင်"

ကျိုးမေ၏ မျက်ခုံးများ တင်းကျပ်စွာ တွန့်ကွေးသွားသည်။

 "ဒေါင်ဇီ ကားသမားနဲ့ ကိုယ်ရံတော် သူ့... သူ့ဆံပင်..."

"ဒါက သာမန် ဆံပင် မဟုတ်ဘူး ဒါက အလွန် ထူးခြားတဲ့ အနှစ်သာရချီတွေ ပါဝင်နေတယ်’’

“ကားထဲမှာ မျိုးရိုးဗီဇ စမ်းသပ်တဲ့ ပစ္စည်း ရှိရင် စမ်းကြည့်လို့ ရတယ်"

ကျိုးမေက ထပ်ပြောလိုက်လေသည်။

"ရှင်က သူက မျိုးရိုးဗီဇပြောင်း လူသားတစ်ယောက်လို့ သံသယ ရှိနေတာလား"

"ကျွန်တော် သူက မျိုးရိုးဗီဇပြောင်း လူသား တစ်ယောက်လို့ ရာနှုန်းပြည့် သေချာနေပြီ"

ကျိုးမေ၏ လက်က လှုပ်ရှားလိုက်ပြီး ကားရှေ့က အကန့်တစ်ခုကို ဖွင့်လိုက်ရာ အတွင်းတွင် စမ်းသပ်ပြွန် သုံးခုပါသည့် အိတ်ကလေး တစ်ခု ရှိနေ၏။ 

မျိုးရိုးဗီဇပြောင်း လူသားများ ကမ္ဘာပေါ်တွင် စတင်ပေါ်ပေါက်လာသည့် အချိန်မှစ၍ ရဲအရာရှိများက ဤဓာတ်ပြုပစ္စည်းများကို သူတို့နှင့်အတူ အမြဲ ဆောင်ထားကြလေသည်။ 

ဘာကြောင့်လဲ။ 

မျိုးရိုးဗီဇပြောင်း လူသားများသည် အလွန် အာရုံခံနိုင်စွမ်း မြင့်မားသော လူအုပ်စုပင် ဖြစ်၏။

 ဤသူများသည် သာမန် လူသားများ၏ ကန့်သတ်ချက်ကို ကျော်လွန်နေပြီး ရဲတပ်ဖွဲ့၏ လုပ်ဆောင်ချက်များတွင် အထိန်းအကွပ် မရှိသော အစိတ်အပိုင်းများ ဖြစ်သည်။

 ထို့ကြောင့် မျိုးရိုးဗီဇပြောင်း လူသားများက ကလေးငယ်များကို ပြန်ပေးဆွဲသည့် အမှုက ရှန်လုံအဖွဲ့ကို ပင် တိုက်ရိုက် တုန်လှုပ်စေခဲ့၏။

 ၎င်းမှာ ရဲတပ်ဖွဲ့၏ စုံစမ်းထောက်လှမ်းမှုတွင် သာမန် လုပ်ထုံးလုပ်နည်းတစ်ခု ဖြစ်လာသည်။

 မျိုးရိုးဗီဇပြောင်းလူသားနှင့် ပတ်သက်သည့် အမှုမှန်သမျှကို ပိုမို မြင့်မားသော အဆင့်သို့ တင်ပြပြီး အထက်အရာရှိများက တာဝန်ယူရသည်။

 သာမန် ရဲသားများက မျိုးရိုးဗီဇ လူသားများကို မကိုင်တွယ်နိုင်ပေ။

 အထူးဌာန တစ်ခုကသာ တာဝန်ယူရ၏။

 ဆံပင်ကို နှစ်ပိုင်းပိုင်းပြီး တစ်ဝက်ကို စမ်းသပ်ပြွန်ထဲ ထည့်လိုက်ရာ ပြွန်ထဲက ကြည်လင်သော အရည်၏ အရောင်မှာ ဖြည်းဖြည်းချင်း အပြာရောင်သို့ ပြောင်းသွားလေတော့သည်။ 

ကျိုးမေ၏ နှလုံးသားမှာ ပြင်းထန်စွာ တုန်လှုပ်သွား၏။

 "မျှော်လင့်ထားတဲ့အတိုင်းပဲ၊ သူက မျိုးရိုးဗီဇပြောင်း လူသားတစ်ယောက်ပဲ ရှောင်စု ကျွန်မတို့ ဒါကို ချက်ချင်း အစီရင်ခံရမယ်"

"မလုပ်နဲ့" လင်ရှောင်စုက သူမကို တားလိုက်သည်။

"မလုပ်ရဘူး"

လင်ရှောင်စု၏ မျက်လုံးထဲတွင် လျှို့ဝှက်ဆန်းကြယ်သော အလင်းရောင်တစ်ခု တောက်ပလာ၏။

 "ဒီကားသမားရဲ့ ဆံပင်တစ်ပင်ကို ကျွန်တော် ဆွဲနုတ်သွားတာကို ဒူလီဖန်း သိသွားရင် သူ ဘာလုပ်မလဲ ဆိုတာ ခင်ဗျားလေး ဘာလို့ မစဉ်းစားမိတာလဲ"

"မျိုးရိုးဗီဇပြောင်းလူသားနဲ့ ပတ်သက်တာမှန်သမျှက တခြားအရာထက် ပိုပြီး အာရုံခံလွယ်တယ် သူ ကျွန်မတို့ကို တကယ်ပဲ သတ်ပစ်နိုင်တယ်" 

ကျိုးမေ၏ နှာခေါင်းထဲတွင် ချွေးများ စတင် ပေါ်လာ၏။

"တကယ်လို့ သူသာ သိသွားပြီး ကျွန်တော့်ကို သတ်ဖို့ မလွယ်ဘူးဆိုရင်ကော"

"သူ... သူ ပြေးလိမ့်မယ် ဖုန်းချန်ကနေ ချက်ချင်း ထွက်သွားပြီး ကွင်းဆက်ကို ဖြတ်တောက်လိမ့်မယ် ပြည်နယ် ရုံးချုပ်က လူတွေကို စေလွှတ်ရင်တောင် သူ့ကို ရှာတွေ့မှာ မဟုတ်ဘူး ဒါကြောင့် ရှောင်စု ကျွန်မတို့ ဒါကို ဆွေးနွေးလို့ မရဘူး ချက်ချင်း အထက်ကို တင်ပြရမယ်" 

ကျိုးမေ စိတ်ပူပန်နေ၏။

"တကယ်လို့ ကျွန်တော်က... ဒီနေ့ ဖြစ်ပျက်ခဲ့တဲ့ ဒရမ်မာရဲ့ အဓိက အချက်က သူ့ကို ပြေးအောင် တွန်းအားပေးဖို့ပါလို့ ပြောရင်ကော"

ကျိုးမေက သူ့ကို ကြည့်လိုက်ပြီး စကားမပြောနိုင်တော့ပေ။

 ‘သူ့နဲ့ အလုပ်လုပ်ရင် ဘာလို့ အမြဲတမ်း ရဲတပ်ဖွဲ့ရဲ့ သာမန် လုပ်ထုံးလုပ်နည်းတွေကို ကျော်လွန် နေရတာလဲ’ 

မြက်ကို ရိုက်ပြီး မြွေကို လန့်အောင် လုပ်ခြင်း

 ရဲတပ်ဖွဲ့က အလွန် ရှောင်ရှားတတ်သည့် အရာကို သူက သာမန်အတိုင်း သုံးနေ၏။ 

ရဲက အဓိက သံသယရှိသူတွေ ပြေးသွားမှာကို ကြောက်တတ်ပေမဲ့ သူကတော့ သူတို့ကို ပြေးအောင် လုပ်နေသည်။ 

"ကျိုးမေ ဖုန်းချန်ရဲ့ မြေက သေးငယ်ပေမဲ့ ကမ္ဘာကြီးရဲ့ အဖြစ်အပျက်တွေက ကြီးမားတယ်’’

“ကြီးမားတယ်လို့ ထင်တဲ့ အရာတချို့က ကမ္ဘာ့ စစ်တုရင်ခုံကြီးပေါ်မှာ တင်လိုက်ရင်တော့ အရေးမပါတဲ့ အပေါင်စာလေးတွေပဲ ဖြစ်ပါတယ်"

"ကျွန်မ နိယာမကို နားလည်ပါတယ် ဒါပေမဲ့..."

"ရှုပ်မနေနဲ့၊ ကျွန်တော် ပြောတာကိုပဲ နားထောင်"

 လင်ရှောင်စုက ပြတ်သားစွာ နိဂုံးချုပ်လိုက်သည်။

 ကျိုးမေက ခဏတာ တုံ့ဆိုင်းနေပြီးနောက် အသာအယာ ခေါင်းညိတ်လိုက်၏။

 "ရှင် သူ့ကို ပြေးစေချင်တာက ရှင် သူ့ဆံပင်ကို ဆွဲနုတ်လိုက်လို့လား လူအများစုတောင် သတိ မထားမိတဲ့ ဆံပင်တစ်ပင်ကိုလေ တကယ်တော့ ကျွန်မ အနားမှာ ရှိနေတာတောင် ရှင် လုပ်သွားတာကို မမြင်လိုက်ဘူး... ဒါက သူ လုံးဝ သတိမထားမိတာ ဖြစ်နိုင်မလား ရှင် မျက်မမြင်တွေအတွက် ပြဇာတ်တစ်ခု ကပြနေတာလား"

"သာမန်လူဆိုရင်တော့ သတိမထားမိမှာပါ ဒါပေမဲ့ သူကတော့ သိမှာပဲ"

 လင်ရှောင်စုက ဆက်ပြောလိုက်လေသည်။

 "ဘာကြောင့်လဲဆိုတော့ သူက မျိုးရိုးဗီဇ လူသား ဖြစ်ပြီး ဒီဆံပင်တစ်ပင်က သူ့ခန္ဓာကိုယ် တစ်ခုလုံးရဲ့ အနှစ်သာရ ချီစွမ်းအင်နဲ့ ဆက်သွယ်နေလို့ပဲ ဆံပင်ကို ဆွဲနုတ်ပြီးတဲ့နောက် သူ့ရဲ့ တုံ့ပြန်မှုကို ကျွန်တော် သတိထားမိတယ် သူ သိသွားတယ်"

ကျိုးမေက ခေါင်းကို ဖြည်းညင်းစွာ ခါလိုက်၏။

 "နောင်မှာ ရှင်နဲ့ အလုပ်လုပ်ရပါ့မလား ဆိုတာ ကျွန်မ မသေချာတော့ဘူး ရှင်နဲ့ အလုပ်လုပ်တာက အမြဲတမ်း လန်းဆန်းပေမဲ့ လူမိုက်တစ်ယောက်လို ခံစားရအောင် အမြဲ လုပ်နေတာပဲ..."

"စိတ်မပျက်ပါနဲ့ မင်းက တချို့ အပိုင်းတွေမှာ ကျွန်တော့်ထက် ပိုတော်ပါတယ် ဥပမာ- ညဉ့်နက်တဲ့အထိ အလုပ်လုပ်နိုင်တယ် ရဲတံဆိပ်ကို မြင်တဲ့အခါ မင်းရဲ့မျက်လုံးထဲမှာ ဂုဏ်သိက္ခာတွေ တောက်ပနေတယ် တာဝန်ကို ကျေပွန်တယ် ဟိုပြေးဒီပြေးနဲ့ အရမ်း ပင်ပန်းပေမဲ့ ညည်းညူသံ တစ်ခွန်းမှ မပါဘူး...နောက်ပြီး ဒီနေ့အရမ်းလှနေတယ်"

ကျိုးမေက မျက်နှာကို စူပုပ်လိုက်သည်။

 "ရှင် ကျွန်မကို လူမိုက်လို့ ပြောချင်တာ မဟုတ်လား တိုက်ရိုက်ပဲ ပြောလိုက်ပါတော့"

"ဘယ်သူက လူမိုက်လို့ ပြောလို့လဲ လူအုပ်ကြီးထဲကမှ ကျွန်တော့်ကို ရွေးချယ်လိုက်တာက မင်း အတော်ဆုံးပဲ ကျွန်တော်က ရှုပ်ထွေးတဲ့ အခြေအနေတွေကို ကိုင်တွယ်ရမှာ မင်းက ကျွန်တော့်ကို ကိုင်တွယ်ရမှာ ပြီးတော့ ကျွန်တော် သုံးလိုက်တဲ့ ဦးနှောက်ဆဲလ်တွေ အားလုံးက မင်းရဲ့ ပုခုံးပေါ်က တောက်ပတဲ့ ကြယ်တွေ ဖြစ်သွားတာပဲလေ..."

"ရှင်နဲ့တော့ တော်ပြီ သွားရအောင်..." 

ကျိုးမေက အရှိန်တင်ပြီး စုံထောက်ရုံးဆီသို့ မောင်းနှင်သွား၏။ 

စုံထောက်ရုံး၏ တံခါးများမှာ တင်းကျပ်စွာ ပိတ်ထားလေသည်။

"ရိုလန် ပြန်မရောက်သေးဘူးလား"

"ကျွန်တော် ပြောပြီးပြီလေ သူမ ဒီည ပြန်မလာဘူးလို့"

"သူမ အမှုကိစ္စနဲ့ အပြင်ထွက်သွားတယ်လို့ပဲ ရှင် ပြောခဲ့တာလ‌ေ တစ်ညလုံး ပြန်မလာဘူးလို့ ဘယ်တုန်းက ပြောခဲ့လို့လဲ" 

ကျိုးမေက ပြောဆိုလိုက်၏။

 "ဒီညတော့ ကျွန်မတို့ နှစ်ယောက်တည်း ဖြစ်မယ်နဲ့ တူတယ်"

 ဒီညမှာ သူတို့၏ ပဏာမ ခွဲခြမ်းစိတ်ဖြာမှု အရ ဒူလီဖန်းက သူတို့ကို သတ်ဖို့ လူလွှတ်လာနိုင်လေသည်။

 လီယွီဖန်းကို သတ်တာ 

သူတို့ကို သတ်တာ 

ဒါမှမဟုတ် နှစ်ခုစလုံးကို ပစ်မှတ်ထားတာ.

‘ဒါတွေ အားလုံးက ရန်သူအတွက် ရွေးချယ်စရာတွေပဲ တကယ်လို့ သူတို့သာ လိမ္မာပါးနပ်မယ် ဆိုရင်တော့ ဒီလို ပြင်းထန်တဲ့ အစီအမံတွေကို သုံးမှာ မဟုတ်ပေမဲ့ ဒူလီဖန်းက ဒေါသအလျောက် ရမ်းကား လုပ်ဆောင်လာမှာ မဟုတ်ဘူးလို့ ဘယ်သူက အာမခံနိုင်မလဲ’

ကျိုးမေ ရင်ခုန်စွာနှင့်ပင် တွေးလိုက်မိလေတော့သည်။