အခန်း (၅၉) ပုံပြင်တစ်ပုဒ်လို နားထောင်လိုက်ပါ
လင်ရှောင်စုက ပြောလိုက်သည်။
"ဘာလို့ ခင်ဗျားရဲ့ ကားသမားကို ခေါ်ပြီး တိုက်ရိုက် မမေးကြည့်တာလဲ သူက ခင်ဗျား ကျောခိုင်း ထားတုန်းမှာ တစ်ခုခုများ ကြိတ်လုပ်နေသလား ဆိုတာ ဘယ်သူသိမလဲ"
ဒူလီဖန်း မျက်ခုံးနှစ်ခု အနည်းငယ် တွန့်ကွေးသွားပြီး
"ရှောင်ကျွမ်... ဒေါင်ဇီကို ဖုန်းဆက်ပြီး အခုချက်ချင်း လာခဲ့ခိုင်းလိုက်"
အတွင်းရေးမှူးဖြစ်သူ ရှောင်ကျွမ်က ချက်ချင်းပင် ဖုန်းခေါ်လိုက်သည်။
ခဏအကြာတွင် ရုံးခန်းတံခါးပွင့်လာပြီး လင်ရှောင်စု "အချိန်နောက်ကြောင်း ပြန်ကြည့်ခြင်း"ဖြင့် အကဲခတ်ခဲ့သည့် လူတစ်ယောက် အထဲသို့ ဝင်လာ၏။
ထိုသူမှာ အသက် ၃၀ ဝန်းကျင်ခန့်၊ ပိန်ပါးပြီး ချောမောသည့်ရုပ်ရည် ရှိ၏။
"သူဌေး... ကျွန်တော့်ကို ခေါ်လိုက်သလားခင်ဗျာ"
သူ၏ အသံက တည်ငြိမ်ပြီး လူကလည်း ယဉ်ကျေးသိမ်မွေ့ပုံ ပေါက်သည်။
"ဒေါင်ဇီ... စုံထောက် လင် မေးသမျှကို အမှန်အတိုင်း အကုန်ဖြေလိုက်"
"ဟုတ်ကဲ့ပါ သူဌေး"
လင်ရှောင်စုက ဒေါင်ဇီဘက်သို့ လှည့်ကာ မေးလိုက်သည်။
"မြို့တော် လုံခြုံရေးဗျူရိုက ဒုတိယညွှန်ကြားရေးမှူး လျူဒေါင်က ပြောတယ် မနေ့ည ၈ နာရီလောက်မှာ ခင်ဗျား သူ့ကို ယွမ်ငါးသောင်း ပေးခဲ့တယ်တဲ့ ကျွန်တော့်ရဲ့ ဖုန်းချန်းစုံထောက် လုပ်ငန်းကို ပိတ်ပစ်ဖို့ နည်းလမ်းရှာပေးပါလို့ ပြောခိုင်းခဲ့တယ်ဆိုတာ ဟုတ်လား"
ဒေါင်ဇီမျက်နှာတွင် အံ့အားသင့်ရိပ်များ ထင်ဟပ်လာလေသည်။
"မြို့တော် လုံခြုံရေးဗျူရိုလား လျူဒေါင် ဆိုတာ ဘယ်သူလဲ ကျွန်တော် လုံးဝ မမှတ်မိပါဘူး ပိုက်ဆံပေးတယ်ဟုတ်လား... မဖြစ်နိုင်တာ ကျွန်တော် သူ့ကို တစ်ခါမှ မမြင်ဖူးဘူး ပြီးတော့ ဖုန်းချန်စုံထောက်လုပ်ငန်းဆိုတာလည်း ကျွန်တော်နဲ့ ဘာမှမသက်ဆိုင်ဘူး..."
"မနေ့ည ၈ နာရီလောက်က ခင်ဗျား ဘယ်မှာရှိနေတာလဲ"
လင်ရှောင်စုက မေးလိုက်သည်။
"မနေ့ည ၈ နာရီလား... ည ၇ နာရီနောက်ပိုင်းအထိ ကျွန်တော် သူဌေးနဲ့အတူ ရှိနေတာပါ ၈ နာရီလောက်မှာတော့ ကျွန်တော့်အခန်းထဲ ပြန်ရောက်ပြီး ရေချိုးနေလောက်ပြီ အတိအကျတော့ မမှတ်မိတော့ဘူး ဒါပေမဲ့ ဒီကထွက်သွားပြီးရင် အခန်းထဲပဲ ပြန်သွားတာ အပြင်ကို လုံးဝ မထွက်ခဲ့ဘူး"
လက်ဖက်ရည်ခွက်ကို ကိုင်ထားရင်း အဖြစ်အပျက်တိုင်းကို စောင့်ကြည့်နေသည့် ကျိုးမေသည် ဒေါင်ဇီ၏ အမူအရာ၊ အကြည့်အနည်းငယ် ပျက်ယွင်းသွားသည်အထိ အသေးစိတ် မကျန် အကဲခတ်နေ၏။
သူမကိုယ်တိုင်ပင် အနည်းငယ် သံသယဖြစ်မိသည်။
လင်ရှောင်စု မှားနေပြီလားဟု တွေးလိုက်မိလေသည်။
လင်ရှောင်စု တိတ်ဆိတ်သွားသည်။
"စုံထောက် လင်... တခြား မေးစရာ ရှိသေးလား"
ဒေါင်ဇီက ပြောလိုက်သည်။
"မရှိတော့ပါဘူး၊ ကျေးဇူးတင်ပါတယ်"
"ဒါဆို သူဌေး... ကျွန်တော် သွားတော့မယ်နော်"
ဒူလီဖန်း ခေါင်းအသာ ညိတ်ပြလိုက်၏။
လင်ရှောင်စု ထရပ်လိုက်ပြီး မျက်နှာတွင် အပြုံးတစ်ခု ပေါ်လာကာ လက်ကို ဆန့်ထုတ်လိုက်သည်။
"လာခဲ့ရတာ အနှောင့်အယှက် ဖြစ်သွားတဲ့အတွက် တောင်းပန်ပါတယ်"
"ဘာမှမဖြစ်ပါဘူး"
ဒေါင်ဇီကလည်း ပြုံး၍ လက်ဆွဲနှုတ်ဆက်လိုက်သည်။
ညင်သာသော လက်ဆွဲနှုတ်ဆက်ခြင်း
ပုံမှန် အပြုအမူတစ်ခုသာ ဖြစ်သည်။
သို့သော် ဒေါင်ဇီ၏ မျက်ခွံများ ရုတ်တရက် အနည်းငယ် တုန်ခါသွား၏။
သူသည် လင်ရှောင်စု၏ လက်ဆွဲနှုတ်ဆက်ခြင်းမှ ထူးခြားသည့် အားတစ်ခုကို ခံစားလိုက်ရသည်။ လက်ကို ပြန်လွှတ်လိုက်ပြီးနောက် လင်ရှောင်စု လှည့်ထွက်သွားကာ ခေါင်းကို အသာပုတ်ပြီး ဆိုဖာပေါ်သို့ ပြန်ထိုင်လိုက်၏။ ခဏတာ တွန့်ဆုတ်နေပြီးနောက် ဒေါင်ဇီ ရုံးခန်းထဲမှ ထွက်သွား လေသည်။
ရုံးခန်းထဲတွင် ခဏတာ တိတ်ဆိတ်သွား၏။
ဒူလီဖန်း အနည်းငယ် ပြုံးလိုက်သည်။
"စုံထောက် လင်... ဒါက နားလည်မှု လွဲတာပဲ ဖြစ်ရမယ်"
လင်ရှောင်စုက အကြည့်ကို ဖြည်းဖြည်းချင်း မော့လိုက်ပြီး သူ့ကို တိတ်ဆိတ်စွာ စိုက်ကြည့်နေသည်။
ဒူလီဖန်းက "စီးပွားရေးလုပ်ငန်းရှင်တွေအနေနဲ့ ငြိမ်းချမ်းရေးနဲ့ ချမ်းသာကြွယ်ဝမှုကို တန်ဖိုးထားတယ် အကြောင်းမဲ့ ရန်သူမျိုး မိတ်ဖက် မဖွဲ့ချင်ကြဘူး ခင်ဗျားနဲ့ ကျွန်တော်နဲ့က အခုမှ ပထမဆုံးအကြိမ် တွေ့ဖူးတာ ဒါကြောင့် ခင်ဗျား ကျွန်တော့်ကို ပစ်မှတ်ထားစရာ အကြောင်းမရှိဘူးလို့ တွေးမိမှာပဲ ဟုတ်တယ်မလား"
ဤစကားက ယုတ္တိရှိလှသည်။
အခြားသူတွေ ဘယ်လိုမြင်သည်ကို ကျိုးမေ မသိသော်လည်း သူမကိုယ်တိုင်ပင် ယုံကြည်လုနီးပါး ဖြစ်သွား၏။
‘တကယ်ပဲ ဒူလီဖန်းက သူ့ကို ပစ်မှတ်ထားရမယ့် အကြောင်းရင်းက ဘာလဲ လုံးဝမရှိဘူး’
"သူဌေး ဒူ... ကျွန်တော်က စုံထောက်တစ်ယောက်ပါ ကျွန်တော်တို့က အကြောင်းအကျိုးကို ဆက်စပ်ပြီး တွေးရတာကို ကျင့်သားရနေပြီ ခင်ဗျားနဲ့ ဆွေးနွေးစရာ သီအိုရီတစ်ခု ရှိတယ် အဓိပ္ပာယ်ရှိတယ်လို့ ထင်ရင် လက်ခံပါ မရှိဘူးဆိုရင်တော့ ပုံပြင်တစ်ပုဒ်လိုပဲ သဘောထားပြီး ရယ်မောလိုက်ပါ ဘယ်လိုလဲ"
"စုံထောက် လင်က တကယ်ပဲ စိတ်ဝင်စားဖို့ကောင်းသားပဲ ပြောကြည့်ပါဦး"
ဒူလီဖန်း ရယ်မော လိုက်သည်။
"ခင်ဗျားနဲ့ ကျွန်တော်နဲ့က တိုက်ရိုက် မပတ်သက်ဘူးဆိုတာ မှန်ပေမဲ့ အတိတ်က အဖြစ်အပျက်အချို့မှာ ခင်ဗျားက ကျွန်တော့်ရဲ့ စောင့်ကြည့်မှုအောက်ကို ရောက်လာခဲ့ဖူးတယ်"
လင်ရှောင်စုက ပြောလိုက်သည်။
ကျိုးမေ၏ ရင်ထဲတွင် ရုတ်ချည်း တုန်ခါသွား၏။
ဤသည်မှာ အချက်အချာပင်
ဒူလီဖန်း မျက်ခုံးတွန့်သွားသည်။
"အို... ပြောပါဦး"
"လွန်ခဲ့တဲ့ ၇ ရက်က ဟုန်ရှင်းဆေးဝါးကုမ္ပဏီရဲ့ လူသိများတဲ့ အမှုကိစ္စ ရှိခဲ့တယ် သူဌေးဒူ ခင်ဗျား ကြားဖူးမှာပါ"
ဒူလီဖန်း ခေါင်းအနည်းငယ် ညိတ်လိုက်၏။
"အဲဒီအမှုရဲ့ အဓိကတရားခံ လီယွီဖန်းက P39 လို့ခေါ်တဲ့ အဆိပ်တစ်မျိုးကို သုံးခဲ့တယ် အဲဒီအဆိပ်က လိင်ဆက်ဆံမှုကနေတစ်ဆင့် ကူးစက်တာ ဝမ်ချန်းဖကို အဆိပ်မိအောင်လုပ်ပြီး သူ့ရဲ့ ဘီလီယံချီတဲ့ ပိုင်ဆိုင်မှုတွေကို သိမ်းပိုက်ဖို့ ကြိုးစားခဲ့တာလေ အစတုန်းကတော့ ဒါကို မယားငယ်က အာဏာလု တဲ့ကိစ္စလို့ပဲ ထင်ခဲ့ကြပေမဲ့ နောက်ပိုင်းမှာတော့ ဒါက မယားငယ်က အာဏာလုရုံတင် မဟုတ်ဘဲ ဝမ်ချန်းဖကို ဆေးစွဲအောင်လုပ်ပြီး သူ့ပိုင်ဆိုင်မှုတွေကို သိမ်းပိုက်ဖို့ ကြိုးစားခဲ့တာ ဖြစ်တယ်ဆိုတာ သိလိုက်ရတယ်"
ကျိုးမေ၏ ရင်ထဲတွင် တုန်လှုပ်သွား၏။
‘ဘာလို့ ဒီအမှုအကြောင်း အခု ရုတ်တရက် ပြောလာရတာလဲ ဘာကြောင့်လဲ ဒါက ဒူလီဖန်းနဲ့ ဘာများ ပတ်သက်နေလို့လဲ’
ဒူလီဖန်း သက်ပြင်းအသာ ချလိုက်၏။
"ကျွန်တော် ဒီအမှုအကြောင်း ကြားဖူးပါတယ် ဒါပေမဲ့ လူအများစုလိုပဲ ဒါက မယားငယ်က အာဏာလုတဲ့ကိစ္စလို့ပဲ ထင်ခဲ့တာပါ ဒီလောက် ရှုပ်ထွေးတဲ့ နောက်ကြောင်းတွေ ရှိနေမယ်လို့ မထင် ထားမိဘူး အင်း... ရှုပ်ထွေးပေမဲ့ ဒီရှင်းပြချက်က ပိုပြီး အဓိပ္ပာယ် ရှိနေတာပဲ"
"အဓိပ္ပာယ်ရှိပေမဲ့ ကျွန်တော့်အနေနဲ့ မဆက်စပ်နိုင်သေးတဲ့ အချက်အချို့ ရှိနေသေးတယ်"
လင်ရှောင်စုက ထပ်ပြောလိုက်သည်။
"ပထမအချက်၊ P39 က ဒီနှစ် မတ်လမှ ရဲဌာနရဲ့ ဒေတာဘေ့စ်ထဲ ရောက်လာတာ သီအိုရီအရ ဒီဆေးက ဈေးကွက်ထဲ မရှိသင့်ဘူး ဒါဆို လီယွီဖန်းက ဒီဆေးကို ဘယ်ကရတာလဲ ဒုတိယအချက် လီယွီဖန်းက အဆိပ်မမိဘူး မဖြစ်နိုင်တဲ့ အခြေအနေကို ဖယ်လိုက်ရင် တစ်ခုတည်းသော အချက်ပဲ ရှိတယ် သူမက ကြိုပြီး ဖြေဆေးကို သောက်ထားတာ ဒါက ပိုတောင် ဆန်းကြယ်သေးတယ် ရဲတောင် အခုထိ အဆိပ်ရဲ့ ဖွဲ့စည်းပုံကို ခွဲခြမ်းစိတ်ဖြာလို့ မပြီးသေးဘူး သူမက ဖြေဆေးကို ဘယ်ကရတာလဲ"
ဒူလီဖန်းက ခေါင်းကုတ်လိုက်သည်။
"စုံထောက်တွေရဲ့ တွေးခေါ်ပုံကတော့ တကယ်ပဲ ခေါင်းမူးစရာပဲ"
"တတိယအချက် သံသယ ရှိသေးတယ်"
လင်ရှောင်စုက အနည်းငယ် ပြုံးပြီး ပြောလိုက်၏။
"ကျွန်တော်တို့ အရင်က လီယွီဖန်းက ဝမ်ချန်းဖကို ဆေးစွဲအောင်လုပ်ပြီး ပိုင်ဆိုင်မှုတွေကို သိမ်းပိုက်ဖို့ လုပ်တာလို့ ကောက်ချက်ချခဲ့ပေမဲ့ ဒါက မဖြစ်နိုင်ဘူး ရာထောင်ချီ ပိုင်ဆိုင်တဲ့ ကုမ္ပဏီပိုင်ရှင် တစ်ယောက်က ဒီလောက်နဲ့ လွယ်လွယ်နဲ့တော့ ပိုင်ဆိုင်မှု အသိမ်းခံရမှာ မဟုတ်ဘူး"
ကျိုးမေ၏ ရင်ထဲတွင် တုန်လှုပ်သွားသည်။
လင်ရှောင်စု ပြောတဲ့အချက်တွေက ရဲဌာနကလည်း သံသယ ရှိနေတဲ့အချက်တွေပင် ဖြစ်၏။
‘တကယ့် သံသယတွေ သူ့မှာ အဖြေရှိနေလို့လား’
ဒူလီဖန်းက "စုံထောက် လင်ရဲ့ တွေးခေါ်ပုံက တကယ်ပဲ ထက်မြက်ပါတယ် ကျွန်တော်ကတော့ နည်းနည်း နှေးတယ် ထင်ပါရဲ့ ဒီလောက်ထိ စဉ်းစားဖို့ အချိန်ယူလိုက်ရတယ်"
"ဒီ သံသယသုံးချက်လုံးက ကျွန်တော့်ကို ဇဝေဇဝါ ဖြစ်စေခဲ့တယ် သတင်းတစ်ခုကို မမြင်ခင်အထိပေါ့ အဲဒီသတင်းကို မြင်လိုက်တဲ့အချိန်မှာ ပုံရိပ်တစ်ခု ပေါ်လာတယ် အဲဒီပုဂ္ဂိုလ်က ခင်ဗျားပဲ သူဌေး ဒူ"
အခန်းထဲမှာရှိတဲ့သူတွေ အကုန်လုံး ထိတ်လန့်သွားကြ၏။
ဒူလီဖန်း မျက်လုံး ပြူးသွားလေသည်။
"သတင်းတစ်ခုက ခင်ဗျားကို ကျွန်တော့်ဆီ အရောက်ပို့ပေးတာလား"
ဒူလီဖန်း သူ့ကိုယ်သူ လက်ညှိုးထိုးပြီး အံ့အားသင့်စွာ မေးလိုက်သည်။
"အစိုးရ ဝဘ်ဆိုက်မှာ မတ်လ ၁၇ ရက်နေ့က သတင်းတစ်ခု ထုတ်ပြန်ခဲ့တယ် ဒဲလ် ကုမ္ပဏီက ဟုန်ရှင်း ဆေးဝါးနဲ့ ညှိနှိုင်းမှုတစ်ခု လုပ်ခဲ့တယ် ဒီညှိနှိုင်းမှုက ပြည်နယ်အစိုးရဌာနတွေရဲ့ လမ်းညွှန်မှုနဲ့ လုပ်ဆောင်တာ ဖြစ်ပေမဲ့ ဘယ်လို သဘောတူညီချက်မှ မရခဲ့ဘူး ဒါကြောင့် ကျွန်တော် သေချာ စုံစမ်း ကြည့်တော့ ခင်ဗျားတို့ ဆွေးနွေးတဲ့ ပရောဂျက်က အခြေစိုက်စခန်းတွေ စီမံခန့်ခွဲရေးနဲ့ ပတ်သက်နေ တာကို တွေ့လိုက်ရတယ်..."
ဟုန်ရှင်းဆေးဝါးက ဒေသတွင်း ဆေးဝါးကုမ္ပဏီတစ်ခုဖြစ်ပြီး သူတို့ရဲ့ အကြီးမားဆုံး အားသာချက်က ဆေးဖက်ဝင်ပစ္စည်း ထုတ်လုပ်ရေး အခြေစိုက်စခန်း ၉ ခု ရှိခြင်းပင် ဖြစ်လေသည်။
ဒဲလ် ကုမ္ပဏီက နောက်ဆုံးပေါ် နည်းပညာတွေ ပိုင်ဆိုင်ထားတဲ့ နိုင်ငံခြား ဆေးဝါးကုမ္ပဏီတစ်ခု ဖြစ်၏။ သည်ကုမ္ပဏီကြီး နှစ်ခု ပူးပေါင်းလိုက်ရင် အခွင့်အရေးသစ်တွေ ပေါ်လာမှာ ဖြစ်ပေ၏။ ဒါကြောင့်လည်း ပြည်နယ်အစိုးရက ဒီညှိနှိုင်းမှုကို ဦးဆောင်ခဲ့တာ ဖြစ်သည်။ ဒါပေမဲ့ ဟုန်ရှင်းဆေးဝါးက လက်မခံခဲ့ဘူး ဘာကြောင့်လဲ ဘာကြောင့်လဲဆိုတော့ ဒဲလ် အုပ်စုက ဒီ အခြေစိုက်စခန်းတွေကို စီမံခန့်ခွဲခွင့် ရသွားရင် ဆေးဖက်ဝင် အပင်တွေကို မျိုးရိုးဗီဇ ပြုပြင်ပြောင်းလဲမှု လုပ်မှာ ဖြစ်ပြီး ဆေးဖက်ဝင်ပစ္စည်း အဆင့်မှာ မျိုးရိုးဗီဇ ပြောင်းလဲမှု လုပ်တာက အလွန် အန္တရာယ်ကြီးလေသည်။၊ အနည်းငယ် မှားယွင်းသွား ရင်တောင် ဆေးရဲ့ အာနိသင်တွေက ခန့်မှန်းရ ခက်ခဲသွားနိုင်လေသည်။
ဟုန်ရှင်းဆေးဝါးမှာ အကြီးမားဆုံး ကန့်ကွက်သူက ဝမ်ချန်းဖ ဖြစ်နေ၏။
ဝမ်ချန်းဖာက လူမိုက်ဆန်ပြီး ဥပဒေမဲ့ လုပ်လေ့ရှိပေမဲ့ ဆေးဝါးစက်ရုံပိုင်ရှင် တစ်ယောက်အနေနဲ့ အခြေခံ ကျင့်ဝတ်ကိုတော့ ထိန်းသိမ်းထားသေးသည်၊၊
တကယ်တော့ ဟုန်ရှင်းဆေးဝါးက တခြား ရှယ်ယာရှင်တွေက ဒီအစီအစဉ်ကို သဘောတူပေမဲ့ ဝမ်ချန်းဖကပဲ အတွင်းပိုင်း ရှယ်ယာရှင်များ အစည်းအဝေးမှာ သူ့ရဲ့ ဗီတိုအာဏာကို သုံးပြီး ဒီပရောဂျက်ကို ရပ်တန့်ခဲ့တာ ဖြစ်ပေသည်။
ဒါကြောင့် ဝမ်ချန်းဖာက ဒီပရောဂျက်ရဲ့ နောက်ဆုံး တစ်ဦးတည်းသော အတိုက်အခံ ဖြစ်လာခဲ့သည်။
ကျိုးမေသည် လုံးဝ တောင့်တင်းသွားပြီး ဘာမှ မလှုပ်ရှားနိုင်တော့သလို ဖြစ်သွားလေသည်။
‘သူက ဒီအမှုအပြီးမှာ ဆက်လက် စုံစမ်းမှုတွေ လုပ်ပြီးတော့ နောက်ကြောင်းတွေကို ပိုပြီး တူးဆွခဲ့ပြီး ရဲဌာနထက်တောင် ပိုပြီး နက်နက်ရှိုင်းရှိုင်း သိနေတာပဲ...’
ဒူလီဖန်း၏ မျက်နှာပေါ်တွင် ပူပင်မှုများ ထင်ဟပ်လာ၏။
"အဲဒီ ပရောဂျက်က လျှို့ဝှက်ချက် မဟုတ်ဘူး ကျွန်တော်တို့လည်း အကြိမ်ကြိမ် အတည်ပြုချက် ရယူခဲ့ပြီးပြီ ပရောဂျက်ရဲ့ ဘေးကင်းလုံခြုံမှုကို ကျွမ်းကျင်သူ အဖွဲ့က အတည်ပြုပေးထားတယ် အစိုးရဌာနတွေကလည်း အတည်ပြုပေးထားလို့..."
"အစိုးရဌာနတွေမှာ စေတနာကောင်း ရှိပေမဲ့ စေတနာကောင်းတိုင်း အကောင်းမြင်ရတဲ့ ရလဒ် ထွက်လာမှာလား"
ဒူလီဖန်းက လေသံတင်းတင်းနဲ့ ပြောလိုက်သည်။
"ဒါက ကျွန်တော်တို့ ဆွေးနွေးရမယ့် ပြဿနာ မဟုတ်ဘူး"
"မှန်ပါတယ် ဒါကြောင့် ကျွန်တော် ပြောခဲ့တယ်လေ ဒါက ကောက်ချက်သက်သက်ပါ အကယ်၍... အကယ်၍ လီယွီဖန်းက ခင်ဗျားရဲ့ လူဆိုရင်ရော သူဌေး ဒူ ဒါဆိုရင် သူမရဲ့ သံသယ သုံးချက်လုံးက အဖြေထွက်သွားပြီ ဒါ့အပြင် ခင်ဗျားက လျူဒေါင်ကို ပိုက်ဆံပေးပြီး ကျွန်တော့်ကို ဖုန်းချန်ကနေ နှင်ထုတ်ဖို့ လုပ်တာကလည်း ကျွန်တော် ခင်ဗျားရဲ့ အစီအစဉ်ကြီးကို မတော်တဆ ဖျက်ဆီးမိမှာ စိုးရိမ်လို့နဲ့ နောက်ထပ် အစီအစဉ်သစ်တွေကို ကျွန်တော် အနှောင့်အယှက်ပေးမှာ စိုးရိမ်လို့ပဲ ဖြစ်ရမယ်"
“လီယွီဖန်းက အစက P39 အဆိပ်ကို မရနိုင်ပေမဲ့ မျိုးရိုးဗီဇဆိုင်ရာ ဆေးဝါးသုတေသန လုပ်နေတဲ့ ကုမ္ပဏီပိုင်ရှင် ဒူလီဖန်းက မရနိုင်ဘူးလား လီယွီဖန်းက အစက ဖြေဆေးကို မရနိုင်ပေမဲ့ ဒူလီဖန်းရဲ့ သုတေသန အဖွဲ့က ဖွံ့ဖြိုးပြီးသား ဖြစ်နေနိုင်တာပဲ လီယွီဖန်းက ဒီဆေးအသစ်ကို သုံးပြီး ဘီလီယံချီ ပိုင်ဆိုင်တဲ့ ဝမ်ချန်းဖကို သိမ်းပိုက်ဖို့ ကြိုးစားတာက စိတ်ကူးယဉ်ဆန်ပေမဲ့ သူမရဲ့ ရည်ရွယ်ချက်က ပိုင်ဆိုင်မှုတွေကို သိမ်းပိုက်ဖို့ မဟုတ်ဘဲ သူ့ကို နာခံအောင် လုပ်ဖို့ဆိုရင်ကော... ဒါဆိုရင် ရလဒ်က တခြားစီ ဖြစ်သွားလိမ့်မယ်၊ စဉ်းစားကြည့်ပါ ဝမ်ချန်းဖ ကိုယ်တိုင်ကလည်း တခြား အချက် အမျိုးမျိုးကြောင့် ဖိအားတွေ ရနေတာ ဒီအချိန်မှာ ဆေးစွဲပြီး တခြားသူတွေ ဖန်တီးထားတဲ့ စက်ကွင်းထဲကို ပိုပြီး နစ်ဝင်သွားရင် သူ ခုခံနိုင်ပါ့မလား နောက်ဆုံးမှာတော့ လျှောကျသွားဖို့က သေချာသလောက် ရှိနေတာပဲ”
ဒူလီဖန်း၏ မျက်နှာသည် တကယ့်ကို အမှောင်ဖုံးသွားသည်။
"စုံထောက် လင် ခင်ဗျား..."
လင်ရှောင်စုက ကျယ်လောင်စွာ ရယ်မောလိုက်ပြီး ဖြတ်ပြောလိုက်၏။
သူ့လက်ကို ဖြည်းဖြည်းချင်း မြှောက်လိုက်ရင်း -
"သူဌေး ဒူ ကျွန်တော်တို့ အရင်က သဘောတူထားပြီးသားလေ ဒါက ကောက်ချက်သက်သက်ပါ မှန်နေရင် စိတ်မဆိုးပါနဲ့ မှားနေရင်လည်း ပုံပြင်တစ်ပုဒ်လိုပဲ သဘောထားလိုက်ပါ"
အခန်းထဲမှာရှိတဲ့သူတွေ အကုန်လုံး ထိတ်လန့် အံ့အားသင့်သွားကြလေတော့၏။