အခန်း (၅၅) ကျိုးလူပင်အား ဖယ်ရှားခြင်း

"ဒါရိုက်တာ ရန်၊ စိတ်မပူပါနဲ့" 

လင်ရှောင်စုက ပြောလိုက်သည်။

 "ကျွန်တော် ခင်ဗျားအတွက် ရောက်လာတာ မဟုတ်ပါဘူး"

"ဒါဆို ဘာကို ဆိုလိုတာလဲ"

 ဒါရိုက်တာ ရန်၏ မျက်နှာမှာ အနည်းငယ် ပျက်ယွင်းသွား၏။

"ဒါရိုက်တာ ရန် ခင်ဗျား စိတ်မပူပါဘူးလို့ ပြောချင်တာလား တကယ်လို့ စိတ်မပူဘူးဆိုရင် ကျွန်တော် မဝင်လာခင် စားပွဲပေါ်က ဆေးလိပ်တွေကို သိမ်းစရာ လိုလို့လား ပြာခွက်ကိုတောင် အမှိုက်ပုံးထဲ ပစ်ထည့်လိုက်တာကတော့ နည်းနည်းတော့ လွန်လွန်းနေပြီ တကယ်တော့ ခင်ဗျား စိတ်ပူစရာ မလိုပါဘူး ကျုံးရှား ပျော့တဲ့ ဆေးလိပ်တွေက တစ်ဘူးကို ၆၅ ယွမ်ပဲ ရှိတာပါ အဲ့ဒီလောက် ဈေးမကြီးပါဘူး"

ဒါရိုက်တာ ရန်၏ နှလုံးသားမှာ တစ်ချက် ရပ်တန့်သွားပြီး သူ့ခြေထောက်နားက အမှိုက်ပုံးကို အရင်ဆုံး ကြည့်မိလိုက်သည်။

 ‘သူ့ရှေ့က လူမှာ ဓာတ်မှန်ရိုက်နိုင်တဲ့ မျက်လုံးတွေ ရှိနေတာလား’

လင်ရှောင်စုက သက်ပြင်းအနည်းငယ် ချလိုက်လေသည်။

 "ဒါပေမဲ့ တစ်ဖက်မှာလည်း ဒါရိုက်တာ ရန် ခင်ဗျားက ဆေးလိပ်အလွန် သောက်တတ်တဲ့သူ ဖြစ်ပုံရတယ် မနေ့က အလုပ်ဆင်းချိန်မှာ လူတစ်ယောက်က ခင်ဗျားကို ဆေးလိပ်တစ်ကတ် ပေးလိုက်တာ တစ်ရက်တောင် မပြည့်သေးဘူး ခုနစ်ဘူးပဲ ကျန်တော့တယ် အဲ့ဒီလောက် သောက်တာက လက်ဆောင်ပေးတဲ့သူတွေကို ဖိအားပေးရာ ရောက်တယ်လေ"

ဒါရိုက်တာ ရန်၏ ခန္ဓာကိုယ်မှာ ချွေးစေးများ ပြန်လာ၏။ 

အမှန်ပင် ဗီရိုထဲတွင် ဆေးလိပ်တစ်ကတ် ရှိနေသည်။

 မနေ့က ကိစ္စတစ်ခု ဆွေးနွေးပြီးနောက် စီးပွားရေးလုပ်ငန်းရှင် တစ်ဦးက သူ့ကို ပေးခဲ့ခြင်း ဖြစ်ပြီး အမှန်ပင် ခုနစ်ဘူးသာ ကျန်ရှိနေတော့သည်။

ဒါက ဘယ်သူမှ မသိတဲ့ လျှို့ဝှက်ချက်ပင် ဖြစ်ချေသည်။

 ဒါပေမဲ့ သူ့ရှေ့က လူကတော့ ဝင်လာတာနဲ့ အကုန် ဖော်ထုတ်ပြလိုက်သည်။

 တစ်ခဏချင်းမှာပဲ သူ့ခန္ဓာကိုယ်တစ်ခုလုံး အေးစက်သွား၏။

 လင်ရှောင်စု၏ အမှန်တကယ် ရည်ရွယ်ချက်ကို သူ မခန့်မှန်းနိုင်ချေ။

 သူက ဒါရိုက်တာကို အရေးယူဖို့ ရောက်လာတာပင် ဖြစ်ရမည်။

စုံထောက်တစ်ယောက်က တရားဝင် ဒါရိုက်တာ တစ်ယောက်ကို ရင်ဆိုင်ဖို့ဆိုတာ လွယ်ကူတဲ့ ကိစ္စ မဟုတ်ပေ။

 ဒါပေမဲ့ မမေ့ပါနှင့် ခဏလေးကမှ သူ့လက်အောက်က ဒုတိယညွှန်ကြားရေးမှူးကို အကျင့်ပျက်ခြစားမှု တိုက်ဖျက်ရေးက ဖမ်းခေါ်သွားခြင်းပင် ဖြစ်၏။

"ခင်ဗျား ခင်ဗျားသာ အဓိပ္ပာယ်မရှိတာတွေ ဆက်ပြောနေရင် ကျွန်တော်တို့ ကိစ္စတွေကို သေချာ ဆွေးနွေးလို့ ရမှာ မဟုတ်ဘူး"

 ဒါရိုက်တာ ရန်က လေးနက်သော အသံဖြင့် ပြောလိုက်၏။

ထိုစကားမှာ တရားဝင်ပြီး လေးနက်သော်လည်း စကားလုံးကြားထဲတွင်တော့ အလျှော့ပေးလိုသည့် အရိပ်အယောင် ပါဝင်နေလေသည်။

 ဘာကြောင့်လဲဆိုတော့ သူ့ရည်ရွယ်ချက်က ကိစ္စကို ဆွေးနွေးလို၍ပင် ဖြစ်၏။

လင်ရှောင်စုက အနည်းငယ် ပြုံးလိုက်သည်။

 "ဟုတ်တယ် ကျွန်တော် တရားဝင် ကိစ္စကို မေ့နေတာ"

သူက ဒါရိုက်တာ ရန်ဆီသို့ ဒဏ်ရိုက်ခြင်းဆိုင်ရာ အကြောင်းကြားစာ တစ်စောင်ကို ပေးလိုက်၏။ 

"ဒါကို ကျွန်တော်တို့ စုံထောက်ရုံးကို ဒီမနက် ခင်ဗျားတို့ ဗျူရိုက ပို့လိုက်တာပါ ဒါရိုက်တာ ရန် တစ်ချက်ကြည့်ပေးပါ ပြဿနာ တစ်စုံတစ်ရာ ရှိနေလား"

ဒါရိုက်တာ ရန်က ယူ၍ သေချာ ကြည့်ပြီးနောက် ဖြည်းဖြည်းချင်း ခေါင်းမော့လိုက်သည်။ 

"သူတို့က ပုံမှန်အတိုင်း စည်းကမ်းအတိုင်း ဆောင်ရွက်တာပါ ဒဏ်ရိုက်ခြင်း အကြောင်းကြားစာ ထုတ်ပြန်တိုင်း ဒီလောက် ပမာဏ ဖြစ်လာမယ်လို့ မဆိုလိုပါဘူး လူငယ်တွေ စီးပွားရေး လုပ်ရတာ မလွယ်ဘူးဆိုတာ ကျွန်တော်တို့ သိပါတယ် ဒဏ်ငွေနဲ့ ပတ်သက်ပြီး ကျွန်တော်တို့ ခေါင်းဆောင်တွေက ဆွေးနွေးပြီး အနည်းငယ် လျှော့ပေါ့ပေးနိုင်ပါတယ်"

လင်ရှောင်စုက ခေါင်းကို ဖြည်းဖြည်းချင်း ခါလိုက်သည်။ 

"ပုံမှန်အတိုင်း ဆောင်ရွက်တာ အနည်းငယ် လျှော့ပေါ့ပေးတာ ဒါရိုက်တာ ရန် ခင်ဗျားတို့ ဗျူရိုမှာ ဥပဒေကို မလေ့လာဘဲနဲ့ အရေးယူတာလား ရှေ့ဆက်လိုက်ရအောင်ပါ ခင်ဗျား ရှေ့က ကွန်ပျူတာမှာ ရှာကြည့်ပါ ဒက်ရှာနိုင်ငံ အထူးဝန်ဆောင်မှု စီမံခန့်ခွဲမှု စည်းမျဉ်းများရဲ့ ပုဒ်မ ၇၈ မှာ ဘာပြောထားလဲ"

ဒါရိုက်တာ ရန်က ကွန်ပျူတာကို ဖွင့်၍ ရှာဖွေလိုက်၏။

 ၂၁၂၉ ခုနှစ် ဧပြီ ၁၃ ရက်တွင် ထုတ်ပြန်ပြီး မေ ၁ ရက်မှ စတင် အသက်ဝင်သော စည်းမျဉ်းများ ဖြစ်၏။

 အထူးဝန်ဆောင်မှုတွင် စုံထောက် အကြံပေး စသည်တို့ ပါဝင်သည်။ 

ပုဒ်မ ၇၈ တွင် အထူးဝန်ဆောင်မှုအတွက် ကောက်ခံခမှာ နှစ်ဦးနှစ်ဖက် ချုပ်ဆိုထားသော စာချုပ်အပေါ် မူတည်သည်ဟု ဖော်ပြထားလေသည်။

"ဒါရိုက်တာ ရန် သေချာ မြင်ရလား စုံထောက်လုပ်ငန်းက အထူးဝန်ဆောင်မှု လုပ်ငန်းပါ ပုံသေ ဈေးနှုန်းစာရင်း မရှိပါဘူး စာချုပ်အရသာ ကောက်ခံတာပါ နှစ်ဦးနှစ်ဖက် စိတ်ရင်းအမှန်နဲ့ လုပ်ဆောင်တာဆိုရင် ပုံမှန် လုပ်ငန်းစဉ်ပါပဲ ဆိုလိုတာက ကျွန်တော် လင်ရှောင်စုက တစ်သောင်း တစ်သန်းပဲ ကောက်ကောက် ဥပဒေအတိုင်း အခွန်ဆောင်ဖို့ပဲ လိုပါတယ် မြို့တော် လုံခြုံရေး ဗျူရိုက ဒဏ်ရိုက်ဖို့ မလိုပါဘူး"

ဒါရိုက်တာ ရန်က အသက်ကို ဝအောင် ရှူလိုက်မိသည်။

 "ကျွန်တော့်ရဲ့ လက်အောက်ငယ်သားတွေက သင်ယူမှု ပိုအားကောင်းဖို့ လိုနေပုံရပါတယ် သူတို့က ဒီလို နောက်ဆုံးပေါ် ဥပဒေတွေကို မသိတာ ဖြစ်မယ်"

"နောက်ဆုံးပေါ်လား မဟုတ်ပါဘူး ဒါရိုက်တာ ရန် ဒါက အသက်ဝင်လာတာ တစ်နှစ်တောင် ရှိပြီလေ ဥပဒေ စိုးမိုးရေး လုပ်နေတဲ့သူတွေက ဥပဒေ မလေ့လာတာက အန္တရာယ် ရှိပါတယ်"

"ဟုတ်ပါတယ် ဥပဒေ စိုးမိုးရေးက ဥပဒေ မလေ့လာတာက ဟာသတစ်ခုပါပဲ စုံထောက် လင် စိတ်မပူပါနဲ့ ကျွန်တော် ဒါကို ကိုင်တွယ်ပေးပါ့မယ်"

လင်ရှောင်စုက ညင်သာစွာ ပြုံးလိုက်မိလေသည်။ 

"ဘယ်လို ကိုင်တွယ်မလဲ ကပ္ပတိန် ကျိုးလူပင်ကို ခေါ်ပြီး ဒဏ်အဖြစ် အရက် သုံးခွက် သောက်ခိုင်း မလို့လား"

ဒါရိုက်တာ ရန်၏ မျက်နှာမှာ လျင်မြန်စွာ ပြောင်းလဲသွားပြီး ဖုန်းကို ကောက်ကိုင်ကာ ဖုန်းဆက်လိုက် လေသည်။ 

"ခင်ဗျားနဲ့ ဆောင်လေး ချက်ချင်း လာခဲ့ပါ"

မကြာမီ ရုံးခန်းတံခါး ခေါက်သံ ကြားရပြီး ကပ္ပတိန် ကျိုးလူပင်နှင့် ဆောင်လေးတို့ ဒါရိုက်တာရှေ့ ရောက်လာကြ၏။

 သူတို့ လင်ရှောင်စုကို မြင်တော့ အံ့အားသင့်သွားသည်။

 ‘သူက ဒါရိုက်တာဆီ တည့်တည့် ရောက်နေတာလား ဒီကောင်လေးကတော့ မာတာပဲ’

‘တကယ်ပဲ ရာဇဝတ်မှု စုံစမ်းရေးအဖွဲ့က ရဲမှူးကြီး ကျန်းဟောက်ကုန်းက စီစဉ်ပေးလိုက်တာလား’

 သူတို့ အထက်လူကြီးကို အကျင့်ပျက်ခြစားမှု တိုက်ဖျက်ရေးက ဖမ်းခေါ်သွားတာကို သူတို့ ဘာမှ မသိကြပေ။

"ဘာတွေ ဖြစ်နေတာလဲ" 

ဒါရိုက်တာ ရန်က စားပွဲပေါ်က ဒဏ်ရိုက်ခြင်းဆိုင်ရာ အကြောင်းကြားစာကို လက်ညှိုးထိုးကာ မျက်နှာထား တင်းတင်းဖြင့် ပြောလိုက်၏။

ကပ္ပတိန် ကျိုးလူပင်က အလျင်အမြန် ရှင်းပြလိုက်လေသည်။ 

"ဒါရိုက်တာ ရန် ကျွန်တော်တို့က ပုံမှန်အတိုင်း ဆောင်ရွက်တာပါ ဒီစုံထောက်ရုံးက ကောက်ခံခက အဆမတန် များလွန်းလို့ပါ"

"ကြည့်လိုက် ကြည့်လိုက်"

 ဒါရိုက်တာ ရန်က သူ့စကားကို ဖြတ်ပြောကာ ကွန်ပျူတာ မျက်နှာပြင်ကို သူ့ဘက် လှည့်ပေးလိုက်၏။ 

မျက်နှာပြင်ပေါ်က စာကြောင်းတစ်ကြောင်းကို လက်ညှိုးထိုးပြလိုက်သည်။ 

"စုံထောက်လုပ်ငန်းက အထူးဝန်ဆောင်မှု လုပ်ငန်းဖြစ်ပြီး နှစ်ဦးနှစ်ဖက် သဘောတူညီချက်အရ ကောက်ခံရတာပါ ခင်ဗျားတို့ ဘယ်ဥပဒေကို သုံးနေတာလဲ ဈေးကွက် စီမံခန့်ခွဲမှု ဥပဒေ မဟုတ်လား ဈေးကွက် စီမံခန့်ခွဲမှု ဥပဒေရဲ့ နောက်ဆုံးပုဒ်မမှာ ဒီဥပဒေက အထူးဝန်ဆောင်မှုတွေကို မပါဝင်ဘူး သီးခြား ဥပဒေ ရှိတယ်လို့ ရှင်းရှင်းလင်းလင်း ဖော်ပြထားတယ်လေ"

ကျိုးလူပင်၏ မျက်နှာ အမူအရာ ပြောင်းသွား၏။

 ဆောင်လေး၏ မျက်နှာသည်လည်း ပြောင်းသွားလေသည်။

"ကျွန်တော် ကျွန်တော်တို့က ဈေးကွက် စီမံခန့်ခွဲမှု ဥပဒေအတိုင်းပဲ အမြဲ ဆောင်ရွက်နေတာပါ ဒီပုဒ်မကို အာရုံမစိုက်မိခဲ့ဘူး" 

ကျိုးလူပင်၏ နဖူးမှာ ချွေးများ ပြည့်နေလေသည်။

"ခင်ဗျား ခင်ဗျား ဝါရင့် အရာရှိတစ်ယောက်အနေနဲ့ ဒီလို အခြေခံ အမှားမျိုးကို ဘယ်လို လုပ်ပြီး ကျူးလွန်နိုင်တာလဲ ထုချေလွှာ အစီရင်ခံစာ တစ်စောင် ရေးပါ နှစ်စောင် မိတ္တူကူးပြီး တစ်စောင်ကို ဗျူရိုမှာ သိမ်း နောက်တစ်စောင်ကို စုံထောက် လင်ကို ကိုယ်တိုင် ပေးလိုက်ပါ"

ကျိုးလူပင်၏ မျက်နှာမှာ အကြိမ်ကြိမ် ပြောင်းလဲသွားပြီး လက်မခံနိုင် ဖြစ်နေမိသည်။

 ထုချေလွှာ အစီရင်ခံစာ ရေးရုံတင် မဟုတ်ဘဲ လင်ရှောင်စုကို ကိုယ်တိုင် ပေးအပ်ရမည်မှာ သူ့အတွက် တော့ ဂုဏ်သိက္ခာ အရမ်းကျစရာပင် ဖြစ်နေလေတော့သည်။

လင်ရှောင်စုက ညင်သာစွာ ပြုံးလိုက်သည်။

 "ထုချေလွှာ အစီရင်ခံစာ မလိုပါဘူး"

ဒါက လမ်းကြောင်းတစ်ခု ဖြစ်ပြီး လင်ရှောင်စုက အလျှော့ပေးလိုက်တာကြောင့် ဒါရိုက်တာ ရန်မှာ စိတ်သက်သာရာ ရသွားပြီး ပြုံးလိုက်သည်။

 ဒါပေမဲ့ လင်ရှောင်စုက ထပ်ပြောလိုက်၏။

 "ဒါရိုက်တာ ရန်က သူ အခြေခံ အမှား လုပ်မိတယ်လို့ ပြောပေမဲ့ အဲ့ဒါလည်း မမှန်ပါဘူး သူ ဥပဒေကို မသိတာ မဟုတ်ဘဲ ကျွန်တော် မသိဘူးလို့ ထင်ပြီး လောင်းကြေးထပ်တာ ဖြစ်နိုင်ပါတယ် သူက တရားရေး စနစ်ထဲမှာ သူ့လူတွေ ရှိတယ်လို့ထင်ပြီး မိုးကို လက်တစ်ဖဝါးနဲ့ ဖုံးနိုင်မယ်လို့ ထင်နေတာလည်း ဖြစ်နိုင်ပါတယ်"

"ခင်ဗျား ဘာကို ဆိုလိုတာလဲ ကျွန်တော် ဥပဒေကို သိလျက်နဲ့ ချိုးဖောက်တယ်လို့ ပြောချင်တာလား"

 ကျိုးလူပင်က ဒေါသတကြီး လှည့်ကြည့်သည်။

"ဥပဒေကို သိသည်ဖြစ်စေ မသိသည်ဖြစ်စေ တခြားသူတွေက သံသယ ရှိနေရင်တောင် သက်သေပြစရာ မရှိရင် ကျွန်တော် ဂရုမစိုက်ပါဘူး တခြား ကိစ္စတစ်ခု မေးကြည့်ရအောင်" 

လင်ရှောင်စုက ထပ်မံ၍ ပြောလိုက်လေသည်။

 "ကပ္ပတိန် ကျိုးလူပင် ဒီမနက် ဒုတိယညွှန်ကြားရေးမှူး လျူဒေါင်က ခင်ဗျားကို ကျွန်တော့် စုံထောက်ရုံးကို စစ်ဆေးဖို့ အမိန့်ပေးပြီး ဆေးလိပ် နှစ်ဘူး ပေးလိုက်တဲ့အချိန်မှာ ပြဿနာ ရှိတယ်လို့ မတွေးမိဘူးလား"

ကျိုးလူပင်၏ နှလုံးသားမှာ တစ်ချက် ရပ်တန့်သွားလေသည်။

 ‘ဆေးလိပ် နှစ်ဘူး ပေးတာကိုတောင် ခင်ဗျား သိသွားတာလား ဘယ်လောက်တောင် အားထုတ်လိုက် တာလဲ’

ဒါရိုက်တာ ရန်၏ မျက်နှာလည်း မည်းမှောင်သွား၏။

 ဆေးလိပ်အကြောင်း ပြောလိုက်တာနဲ့ သူ့နှလုံးသားမှာ တင်းကျပ်သွားလေသည်။

 ဆေးလိပ်က သူ့အတွက် အထိခိုက်မခံတဲ့ စကားလုံးပင် ဖြစ်နေတော့သည်။

လင်ရှောင်စုက ပြောလိုက်၏။

 "ခင်ဗျားတို့ နှစ်ယောက်က နှစ်ပေါင်းများစွာ အတူ အလုပ်လုပ်လာတာဆိုတော့ နားလည်မှု ရှိပြီးသားပါ သာမန် အမှု စစ်ဆေးတာဆိုရင် အထက်လူကြီးက ဆေးလိပ် ပေးစရာ လိုလို့လား ဆေးလိပ် ပေးတယ်ဆိုတာ တကယ်တော့ အချက်ပြတာပါ ဒါက ရုံးကိစ္စရော ပုဂ္ဂိုလ်ရေး ကိစ္စပါ ရောထွေးနေတယ်၊ မြန်မြန် လုပ်ရမယ် ပြတ်ပြတ်သားသား လုပ်ရမယ်လို့ ပြောတာပါ"

"ခင်ဗျားက မဟုတ်မမှန်တွေ စွပ်စွဲနေတာပါ အသေးစိတ်တော့ ဒါရိုက်တာ ရန်က ဒုညွှန်လျူကို တိုက်ရိုက် မေးနိုင်ပါတယ်"

 ကျိုးလူပင်က အကြောင်းအရာကို အလျင်အမြန် ပြောင်းလိုက်ပြီး ဒီအရေးကြီးတဲ့ ကိစ္စကို သူ့အထက်လူကြီးဆီ တွန်းပို့လိုက်လေသည်။

လင်ရှောင်စုက ပြုံးလိုက်ပြီး

 "ကပ္ပတိန် ကျိုးလူပင် ခင်ဗျား ဒါရိုက်တာ ရန်ကို အခက်တွေ့အောင် လုပ်နေတာပါ လျူဒေါင်က အကျင့်ပျက်ခြစားမှု တိုက်ဖျက်ရေးဆီ လက်ဖက်ရည် သောက်ဖို့ ရောက်နေပြီ ဒါရိုက်တာ ရန်က သူ့ကို ဘယ်လို လုပ်ပြီး မျက်နှာချင်းဆိုင် မေးနိုင်မှာလဲ"

ကျိုးလူပင် တုန်လှုပ်သွားပြီး ဆောင်လေး၏ မျက်လုံးများ ပြူးကျယ်သွားလေသည်။

‘သေပါပြီ ဒါရိုက်တာ လျူ အဖမ်းခံလိုက်ရပြီ’

 ‘သူ့ရှေ့က လူက သူ့အနောက်က လူတွေ ပြဿနာ တက်တော့မယ်လို့ ပြောခဲ့တာ လူတော်တော် များများက ဒီကောင်လေး ရူးနေတယ်လို့ ထင်ခဲ့ပေမဲ့ သုံးနာရီတောင် မပြည့်ခင်မှာ လျူဒေါင် အဖမ်းခံလိုက်ရသည် ကျွန်တော်တို့ ဘာတွေ လုပ်မိလိုက်တာလဲ’

ကျိုးလူပင်က စားပွဲကို လက်နဲ့ ထောက်ကာ အသက်ကို ပြင်းပြင်း ရှူလိုက်၏။ 

"ဒါရိုက်တာ ရန် ကျွန်တော် ကျွန်တော် ဥပဒေကို မသိနားမလည်တာ ဝန်ခံပါတယ် ကျွန်တော် အမှား လုပ်မိပေမဲ့ ဥပဒေကို ရည်ရွယ်ချက်ရှိရှိ ချိုးဖောက်တာ မဟုတ်ပါဘူး"

"လျူဒေါင်က ပုဂ္ဂိုလ်ရေး ကိစ္စအတွက် ဆေးလိပ် ပေးခဲ့တာကို ခင်ဗျားမှာ ဘာသတိပေးချက်မှ မရှိဘူးလား" 

လင်ရှောင်စုက အေးဆေး ပြောလိုက်သည်။

"ဘယ်သူက ဆေးလိပ် ပေးတာလဲ သက်သေပြပါ"

 ကျိုးလူပင်က လင်ရှောင်စုကို လက်ညှိုးထိုးကာ ဒေါသတကြီး ပြောလိုက်၏။

လင်ရှောင်စုက "သက်သေ ရှာဖို့ မခက်ပါဘူး ဒါပေမဲ့ ကျွန်တော် ပျင်းနေလို့ပါ ဘာကြောင့်လဲ သိလား"

ကျိုးလူပင်၏ ရင်ဘတ်မှာ ပြင်းပြင်းထန်ထန် လှုပ်ရှားနေပြီး ဘာကြောင့်လဲလို့ မေးမနေတော့ချေ။

"ခင်ဗျား သူ့ဆီက ဆေးလိပ်ယူတာက ဒီလောက် ကြီးမားတဲ့ ကိစ္စ မဟုတ်လို့ပါ အဲ့ဒီအတွက် အချိန်ကုန် ခံနေရင် ကျွန်တော်က အသေးအဖွဲ ကိစ္စတွေကိုပဲ စိတ်ဝင်စားတဲ့သူ ဖြစ်သွားမှာပေါ့ ကျွန်တော် ခင်ဗျားကို မျက်နှာချင်းဆိုင် ပြောခဲ့ပြီးပြီ ခင်ဗျားကို အရေးယူမှာပါ ကျွန်တော့်ရဲ့ အရေးယူပုံက ဒီလို အဆင့်နိမ့်တဲ့ နည်းလမ်း မဟုတ်ပါဘူး"

"ခင်ဗျား"

လင်ရှောင်စုက လက်ကို ညင်သာစွာ မြှောက်ကာ သူ့ကို တားလိုက်၏။ 

"လွန်ခဲ့တဲ့ နှစ်ညလောက်က ညကိုးနာရီမှာ ဘိုင်လူ စားသောက်ဆိုင် အခန်း ၈၀၁၈ မှာ ဟူအစ်ကိုရဲ့ လူတွေထဲက လီခိုင်ယွမ်နဲ့ တွေ့ပြီး ချင်းဟဲကုမ္ပဏီရဲ့ ရှယ်ယာ ပြဿနာတွေအကြောင်း ပြောခဲ့တာလေ ခင်ဗျား ၁၀ ရာခိုင်နှုန်း ပိုင်ဆိုင်တယ် မဟုတ်လား"

ကျိုးလူပင်၏ ဦးနှောက်မှာ ခဏတာ ဗလာဖြစ်သွားရ၏။

 ဒါက သူ့ရဲ့ အကြီးမားဆုံး လျှို့ဝှက်ချက်ပါ။ 

ဘာသတိပေးချက်မှ မပါဘဲ ပေါ်လာခြင်းပင် ဖြစ်ပေသည်။ 

‘ဘာကြောင့်လဲ ဘယ်လိုလုပ်ပြီး သိသွားတာလဲ အဲ့ဒီမှာ စောင့်ကြည့် ကင်မရာလည်း မရှိဘူး ၅.၁၆ အမှုရဲ့ ဖိအားပေးမှုတွေကြားထဲမှာ သူတို့ ပြောတဲ့ စကားကို တတိယလူ ကြားနိုင်စရာ မရှိဘူး လီခိုင်ယွမ် အဖမ်းခံလိုက်ရတာလား ဝန်ခံလိုက်တာလား ဒါပေမဲ့ သူက ထွက်ပြေးနေတာ မဟုတ်လား’

ဒါရိုက်တာ ရန်၏ နှလုံးသားလည်း တုန်လှုပ်သွား၏။

လင်ရှောင်စုက ပြောလိုက်ပြန်သည်။

"ချင်းဟဲကုမ္ပဏီက ၅.၁၆ အမှုရဲ့ အဓိက အချက်အချာပါ ရှယ်ယာရှင်တွေ အကုန်လုံးက အလိုရှိနေတဲ့ ရာဇဝတ်သားတွေပါ ဒါရိုက်တာ ရန် ကျွန်တော် အထူးစုံစမ်းရေးအဖွဲ့ကို ဖုန်းဆက်ရမလား ခင်ဗျား ဆက်မလား"

"ခင်ဗျား ကျွန်တော့်ကို မဟုတ်မမှန် စွပ်စွဲနေတာပါ ကျွန်တော် ကျွန်တော် ချင်းဟဲကုမ္ပဏီမှာ ရှယ်ယာ မပိုင်ပါဘူး လုံးဝ မပိုင်ပါဘူး" 

ကျိုးလူပင်၏ နဖူးမှာ သွေးကြောများ ထောင်လာပြီး အလွန်ပင် စိတ်လှုပ်ရှားနေ၏။

"စိတ်လျှော့ပါ" 

လင်ရှောင်စုက ပြောသည်။ 

"ခင်ဗျား ကျွန်တော့်ကို သတ်ပြီး ပါးစပ်ပိတ်မယ်လို့ ထင်အောင် လုပ်လိုက်ရင်၊ ကျွန်တော်က ခင်ဗျားရဲ့ အရိုးအဆစ်တွေကို ချက်ချင်း ချွတ်ပစ်လိုက်မှာ စိုးရိမ်ရတယ်"

ကျိုးလူပင်က ရူးသွပ်နေသကဲ့သို့ ဖြစ်နေသည်။ ဒါပေမဲ့ သူ မလှုပ်ရဲတော့ပါ။

လင်ရှောင်စုက သူ့ကို မကြည့်တော့ဘဲ ဒါရိုက်တာ ရန်ကို စိုက်ကြည့်လိုက်သည်။

 "ဒါရိုက်တာ ရန်၊ မြို့တော် လုံခြုံရေး ဗျူရိုမှာ ခြစားတဲ့ အရာရှိ တစ်ယောက် ရှိနေတာတင် မကဘဲ အခုလည်း ထွက်ပြေးနေတဲ့ ရာဇဝတ်သား တစ်ယောက် ပါဝင်နေတာမို့ ပြဿနာက ကြီးမားနေပါပြီ ခင်ဗျား ဆက်ပြီး လျစ်လျူရှု နေဦးမှာလား၊ အထူးစုံစမ်းရေးအဖွဲ့က ဘယ်လို ထင်မလဲ"

ဒါရိုက်တာ ရန်၏ မျက်နှာမှာ အလွန် မည်းမှောင်နေပြီး ဖြည်းဖြည်းချင်း ဖုန်းကို ကောက်ကိုင်ကာ နံပါတ်နှိပ်လိုက်သည်။

ကျိုးလူပင်က ရုံးခန်းထဲမှာ ရူးသွပ်သကဲ့သို့ လမ်းလျှောက်နေသည်။

ဒါရိုက်တာ ရန်က အော်ဟစ်လိုက်သည်။ 

"ထိုင်လိုက်စမ်း၊ အထူးစုံစမ်းရေးအဖွဲ့ လာစစ်ဆေးတာ စောင့်နေ၊ အပြစ်မရှိရင် ရှင်းသွားမှာပါ၊ အပြစ်ရှိရင်တော့ ဖော်ထုတ်ခံရမှာပဲ"

ကျိုးလူပင်က ဆိုဖာပေါ်မှာ လေးလံစွာ ထိုင်ချလိုက်သည်။ ဒီအချိန်မှာတော့ သူ ပြိုလဲလုနီးပါး ဖြစ်နေသည်။ အချိန်တွေကို ပြန်လှည့်လို့ ရမယ်ဆိုရင် သူ ဒီလို ပူပြင်းတဲ့ အာလူးကို ဘယ်တော့မှ လက်ခံမှာ မဟုတ်ပါ။ သူက ကောင်းကင်၊ မြေကြီး ဒါမှမဟုတ် ခရိုင်ထဲက လူကြီးတွေကို ရန်စလိုက်ရင်တောင် ဒီလူကိုတော့ ရန်မစရဲတော့ပါ။ သူက လူမဟုတ်ပါဘူး၊ သူက သရဲပါ။ သူ့အထက် လူကြီး ပြီးဆုံးသွားပြီ။ အခု သူလည်း ပြီးဆုံးသွားပြီ။

ဒါက လင်ရှောင်စု၏ လက်စားချေမှုပါ။ ရှင်းလင်းပြတ်သားပြီး ခင်ဗျား ကျွန်တော့်ကို ဒုက္ခပေးချင်ရင် ကျွန်တော်က အရင် ဒုက္ခပေးမှာပါ။ မြို့တော် လုံခြုံရေး ဗျူရိုက သူ့ကို လုပ်ဆောင်တာကို သူက ပုဒ်မတစ်ခုတည်းနဲ့ ရှင်းလင်းသွားပြီး လျူဒေါင်နဲ့ ကျိုးလူပင်ကိုတော့ ဗျူရိုဆီ တန်းပို့လိုက်တာပါ။ ဒီလို ပြတ်သားပြီး ထိတ်လန့်စရာ ကောင်းတဲ့ နည်းလမ်းမျိုးကို ဘယ်သူမှ မကြောက်ဘဲ မနေနိုင်ပါ။

ဆောင်လေး၏ မျက်နှာမှာ သွေးမရှိတော့ဘဲ ထိုနေရာတွင် တုန်ယင်စွာ ရပ်နေသည်။