အခန်း (၁၉) - အရံအဖွဲ့ဝင် ဖြစ်လာခြင်း

လင်ရှောင်စုက ရယ်မောရင်း

"ချန်ယဲ့ မင်းက တကယ်ကို မစဉ်းစားပေးတတ်ဘူး ငါ့ကို ခေါ်လာတာ တစ်လခွဲရှိပြီ ငါ စားဖို့သောက်ဖို့ နွေးထွေးတဲ့ အဝတ်အစားရှိရဲ့လား လက်ထောက်လေးက နာခံရဲ့လားဆိုတာကို တစ်ခါမှ မစစ်ဆေးဘူး..."

သူ့နောက်တွင် ချန်ယဲ့ ရှိနေ၏။

ချန်ယဲ့က နှုတ်ခမ်းကို တွန့်လိုက်ပြီး

"ဒီမှာရှိတဲ့ နေထိုင်မှု အခြေအနေတွေနဲ့ဆိုရင် မင်းရဲ့ အစားအသောက်နဲ့ အဝတ်အစားအတွက် စိတ်ပူစရာ လိုသေးလို့လား လက်ထောက်လေး နာခံရဲ့လားဆိုတဲ့ ကိစ္စကတော့... အစပိုင်းမှာတော့ တကယ် မနာခံတာ ဖြစ်နိုင်တယ် ဒါပေမဲ့ ဒီညပြီးရင်တော့ သူမ နာခံသွားပါလိမ့်မယ်"

"ဘာကို ဆိုလိုတာလဲ ငါ အကဲဖြတ်မှု အောင်သွားတာလား"

လင်ရှောင်စု နည်းနည်း စိတ်လှုပ်ရှားသွား၏။

"အကဲဖြတ်မှုကိစ္စကို ခဏထားပြီး မင်းဖတ်ခဲ့တဲ့ ဒီစာအုပ်တွေအကြောင်း ပြောရအောင် မင်း ဘာတွေ တွေးမိလဲ"

လင်ရှောင်စု သက်ပြင်းချလိုက်သည်။

"ငြိမ်းချမ်းရေးနဲ့ တည်ငြိမ်ရေးဆိုတာ အလကားရတာ မဟုတ်ဘူး ဒီနေ့ ငါတို့ ရရှိထားတဲ့ ငြိမ်းချမ်းရေးက တစ်စုံတစ်ယောက်က ငါတို့ကိုယ်စား ဝန်ထုပ်ဝန်ပိုးတွေကို ထမ်းထားပေးလို့သာ ဖြစ်တယ်"

ချန်ယဲ့က သူ့မျက်လုံးများကို တိတ်ဆိတ်စွာ ကြည့်လိုက်မိသည်။

သူ့မျက်လုံးများသည် ယခုအချိန်တွင် အလွန်ကြည်လင်နေ၏။ လင်ရှောင်စုက သူ့ရှေ့ရှိ စာမျက်နှာကို လှန်လိုက်ပြီး တစ်နေရာကို လက်ညှိုးထိုးပြသည်။

"ဒီမှာ မေးခွန်းထုတ်စရာ တစ်ချက် ရှိတယ်"

"မေးခွန်းထုတ်စရာလား"

"ဟုတ်တယ်"

လင်ရှောင်စုက ပြောလိုက်သည်။

-"စာအုပ်တစ်အုပ်လုံးမှာ အမည်ဝှက်တွေကိုပဲ သုံးထားတာ ဒါပေမဲ့ ဒီဖြစ်ရပ်တစ်ခုမှာတော့ တကယ့် အဖွဲ့အစည်းနာမည်ကို သုံးထားတယ် ဘာကြောင့်လဲ"

"မင်းက တကယ့်ကို ထူးခြားတဲ့ အချက်ကိုပဲ အာရုံစိုက်တာပဲ တခြားလူတွေက ဖြစ်ရပ်ကိုပဲ အာရုံစိုက်ကြတယ် မင်းကတော့ တကယ့်နာမည်နဲ့ အမည်ဝှက်ကိုပဲ အာရုံစိုက်တယ်..."

ချန်ယဲ့က ထပ်ပြောလိုက်လေသည်။

"မင်း ဒါကို မေးလာတဲ့အတွက် ငါ အဖြေပေးမယ် ဒါက ရှန်လုံရဲ့ ပင်ပန်းကြီးစွာ ကြိုးပမ်းထားတဲ့ ရည်ရွယ်ချက်ပဲ"

"ပင်ပန်းကြီးစွာ ကြိုးပမ်းထားတဲ့ ရည်ရွယ်ချက် ဘာကို ဆိုလိုတာလဲ"

ချန်ယဲ့က သူ့လက်ထဲမှ စာအုပ်ကို ယူပြီး ထိုစာမျက်နှာကို ဖွင့်ကြည့်လိုက်သည်။

"ခေါင်းကိုးလုံးမြွေ ဟာ ရှန်လုံရဲ့ အကြီးမားဆုံး ရန်သူ ကမ္ဘာပေါ်မှာ အပြစ်အများဆုံး အဖွဲ့အစည်းပဲ သူနဲ့ ယှဉ်ပြိုင်ဖို့ဆိုတာ ရှန်လုံ အဖွဲ့ဝင်တိုင်းရဲ့ အဓိကပန်းတိုင်ပဲ ပြီးတော့ ဒဏ္ဍာရီဆန်သော ထိပ်တန်း အဖွဲ့ဝင်တစ်ဦး ဟာ ဘိုင်ဂူဘုရင်ကို သတ်ပြီး နတ်ဘုရားအဆင့် ဖြစ်လာခဲ့တယ် သူ့ရဲ့ တကယ့်နာမည်နဲ့ ဖြစ်ရပ်မှန်တွေကို ဒီဖတ်စာအုပ်ထဲမှာ ထည့်သွင်းရတဲ့ ရည်ရွယ်ချက် သုံးချက် ရှိတယ် ပထမအချက် ဒဏ္ဍာရီဆိုတာ ကိုယ်တိုင် ဖန်တီးရတာဖြစ်ပြီး သွေးမြေကျမှ ရရှိလာတာကို ရှန်လုံ အဖွဲ့ဝင်တိုင်းကို သိစေချင်လို့ ဒုတိယအချက် ခေါင်းကိုးလုံးမြွေကို သူတို့ကိုယ်သူတို့ ရှုံးနိမ့်ခြင်းမရှိဘူးလို့ ကြွေးကြော် နေပေမဲ့ ဒက်ရှာရဲ့ ရှန်လုံက ညှိနှိုင်းမှုမလိုဘဲ သူတို့ကို ဖြိုခွဲနိုင်တယ်ဆိုတာကို သိစေချင်လို့ တတိယ အချက်ကတော့ ဂျင်းလေး ကိုယ်တိုင်အတွက်ပါ သူ့ရဲ့ ကြီးမားတဲ့ အောင်မြင်မှုတွေက စာအုပ်ထဲမှာ ဖော်ပြဖို့ တကယ် ထိုက်တန်ပါတယ်"

"ဂျင်းလေး ရှန်လုံရဲ့ အမှတ်တရ ကျောက်တိုင်ပဲလား" လင်ရှောင်စုက မေးလိုက်၏။

"ဟုတ်တယ် သူက စံနှုန်းထက်ကျော်လွန်ပြီး 'နိုးကြားသူ'အဆင့်ကို ရောက်သွားပြီ လျှို့ဝှက် ဆန်းကြယ်တဲ့ နိုးကြားခြင်း နယ်ပယ်မှာတောင် သူက ထိပ်ဆုံးမှာ ရှိတယ် ပိုအရေးကြီးတာက ရှန်လုံမှာ စကားပုံတစ်ခု ရှိတယ် ဂျင်းလေး တိုက်ခိုက်ရင် အရာအားလုံး ပြီးဆုံးသွားပြီ မစ်ရှင်တစ်ခုခု ရှိရင် အဲ့ဒီလုပ်ရပ်ကပဲ အတည်ပြုပေးလိမ့်မယ်..."

လင်ရှောင်စုသည် အလွန်အစွမ်းထက်သော ပုံရိပ်ဖြစ်သည့် ဂျင်းလေးကို သူ့စိတ်ထဲတွင် စွဲမြဲမှတ်ထား လိုက်လေသည်။ သူ့အောင်မြင်မှုများမှာ အံ့ဩစရာကောင်းပြီး ထူးချွန်လွန်း၏။ ရှန်လုံ ၁၀၁ ထဲသို့ ခြေချလိုက်ခြင်းဖြင့် သူသည် လျှို့ဝှက်ဆန်းကြယ်သော မျိုးရိုးဗီဇလောကကို နားလည်သွားခဲ့လေသည်။ မျိုးရိုးဗီဇ ပြောင်းလဲခြင်းသည် လူသားများကို စွမ်းအားလွန် လက္ခဏာများ ပေးစွမ်းသည်။

သို့သော် ဤကြီးမားသော လုပ်ငန်းစဉ်သည် အခုမှ စတင်ခြင်း ဖြစ်၏။ လက်ရှိတွင် မျိုးရိုးဗီဇ ပြောင်းလဲခြင်းဖြင့် ဖြစ်ပေါ်လာသော မျိုးရိုးဗီဇလူသား အများစုသည် အချို့သော ကဏ္ဍများတွင်သာ စွမ်းအားလွန် လက္ခဏာများ ပိုင်ဆိုင်ကြပြီး ၎င်းတို့ကို 'အညွန့်များ' ဟု ခေါ်ဆိုကာ လူသားမျိုးပွားခြင်း၏ အစပျိုးမှုကို ကိုယ်စားပြုလေသည်။ ဒါက မျိုးရိုးဗီဇလူသားတို့၏ ပထမအဆင့် ဖြစ်သည်။ မျိုးရိုးဗီဇလူသားများအကြား 'နိုးကြားသူများ' ဟု ခေါ်သော နောက်ထပ် လျှို့ဝှက်ဆန်းကြယ်သည့် အဆင့်တစ်ခု ရှိနေသေး၏။

နိုးကြားခြင်းဆိုတာ ဘာလဲ၊ ဒါဟာ သာလွန်တဲ့ စွမ်းအားပင်ဖြစ်ချေသည်။

စွမ်းအားလွန်သူနှင့် သာလွန်သူဟူသော အသုံးအနှုန်း နှစ်ခုကြားတွင် ကမ္ဘာနှင့်မြေကြီးပမာ ကွာခြားသည်။ ပထမတစ်မျိုးမှာ သာမန်လူသားထက် သာလွန်ခြင်းဖြစ်ပြီး နောက်တစ်မျိုးမှာ သာလွန်ကျော်လွန်၍ 'လူမဟုတ်တော့သော' အဆင့်သို့ ရောက်သွားခြင်းပင် ဖြစ်လေသည်။ 'နိုးကြားသူ' တိုင်းသည် သမိုင်းတွင် မှတ်တမ်းတင်ရန် ထိုက်တန်သော ဒဏ္ဍာရီများ ဖြစ်ကြ၏။

ရုတ်တရက် သူ့အကြည့်က ဘယ်ဘက်သို့ ရွေ့သွားမိလိုက်၏။ ဘယ်ဘက်တွင် နူးညံ့စွာ လမ်းလျှောက်လာသော အမျိုးသမီးတစ်ဦး ရှိနေသည်။

လက်ထောက်လေး မဟုတ်ပါ သူမက တကယ့် လူသားပင် ဖြစ်၏။ သူမ၏ မျက်နှာသည် ဝိုင်းစက်နေပြီး မျက်လုံးများတွင် ဖော်ရွေသော အပြုံးတစ်ခုကို ဆောင်ထားသည်။ လက်ဖက်ရည် နှစ်ခွက်ပါသော ဗန်းကို အလွန်ယဉ်ကျေးစွာ ကိုင်ဆောင်ထားပြီး ခွက်တစ်ခုကို ချန်ယဲ့ကို ပေးလိုက်ရာ သူမ ယူ၍ သောက်လိုက်၏။

နောက်တစ်ခွက်ကို လင်ရှောင်စုကို ပေးသည်။ လင်ရှောင်စုက လက်တွင် ကိုင်ကာ လက်ဖက်ရည်ကို စစ်ဆေးကြည့်လိုက်သည်။ ချင်မင်းလက်ဖက်ရည်ဖြစ်ပြီး ဤစာကြည့်တိုက်တွင် သောက်လေ့ရှိသော ရှန်လုံအဖွဲ့၏ လက်ဖက်ရည်ထက် အများကြီး ပိုကောင်းမွန်လေသည်။ လက်ဖက်ရည်သည် သန့်ရှင်းပြီး ကြည့်ရတာ နှစ်သက်ဖွယ် ကောင်းသော်လည်း "ကောင်းကင်တာအို ဉာဏ်ပညာမျက်လုံး" ဖြင့် စစ်ဆေး ကြည့်လိုက်သောအခါ လက်ဖက်ရည်ထဲတွင် တစ်စုံတစ်ခု လှည့်ကွက်ရှိနေသည်ကို တွေ့လိုက်ရ၏။

ခဏတာ သေချာ စစ်ဆေးပြီးနောက် လင်ရှောင်စုသည် လက်ဖက်ရည်ခွက်ကို ဘေးစားပွဲပေါ်တွင် ညင်သာစွာ ချလိုက်ပြီး သူ၏ မူလ အေးစက်နေသော လက်ဖက်ရည်ကို ပြန်ယူလိုက်လေသည်။

ဝိုင်းစက်သော မျက်နှာပိုင်ရှင် လှပသူ၏ မျက်လုံးများ ပြူးကျယ်သွားပြီး

" အေးစက်နေတဲ့ လက်ဖက်ရည်ကို ပိုကြိုက်တာလား"

"မင်း ပြောတာ ကြားရတာ ဘယ်သူက အေးစက်နေတဲ့ လက်ဖက်ရည်ကို သောက်ချင်မှာလဲ"

လင်ရှောင်စု ပြုံးလိုက်သည်။

"ငါက မင်း ဒီခွက်ထဲမှာ ဘာအဆိပ်တွေ ထည့်ထားလဲဆိုတာ ခဏတာ မသေချာသေးလို့ ငါ့ခန္ဓာကိုယ်နဲ့ စမ်းသပ်ဖို့ မရည်ရွယ်တာပါ"

ငယ်ရွယ်သော လှပသူ၏ မျက်နှာသွင်ပြင် ပြောင်းလဲသွားလေသည်။

"ဘာကို ဆိုလိုတာလဲ"

"မင်းကိုလည်း ဒီအတိုင်းပဲ မေးချင်တယ်... ဒီနေ့က ငါတို့ ပထမဆုံးတွေ့တာ ပြီးတော့ ဒီမြင့်မြတ်တဲ့ ရှန်လုံစခန်းမှာ ဘာကြောင့် ငါ့ကို အဆိပ်ခတ်တာလဲ"

"ရှင် အလကား စကားတွေ ပြောနေတာ"

ထိုမိန်းကလေးက ရုတ်တရက် ကန်ကျောက်လိုက်၏။

သူမ၏ ကန်ချက်မှာ လျင်မြန်ပြီး ပြိုင်ဘက်ကင်းလေသည်။

လင်ရှောင်စုက သူမ၏ ခြေဖျားကို စိုက်ကြည့်နေပြီး ရှင်းရှင်းလင်းလင်း မြင်နေရသော်လည်း ရှောင်တိမ်းရန် မဖြစ်နိုင်ပေ။ သူ့လက်ထဲမှာ သေနတ်သာ ရှိရင် ပစ်လို့ ရပေမဲ့ သူ့လက်ထဲမှာ ဘာမှ မရှိပါ။ သို့သော် သူ့၏ တုံ့ပြန်မှုမှာ မှတ်သားလောက်ပေ၏။

သူ၏ ခါးကို ပြင်းထန်စွာ လိမ်လိုက်ပြီး တစ်ကိုယ်လုံး အပေါ်သို့ ခုန်တက်လိုက်သည်။ ငယ်ရွယ်သော လှပသူ၏ ကန်ချက်မှာ သူ့ကို မထိဘဲ ကုလားထိုင်ကိုသာ ထိမှန်သွား၏။ သို့သော် သူမ၏ ခြေထောက်က ကုလားထိုင်ကို မထိခင် လက်မဝက်အလိုတွင် တိကနဲ ရပ်တန့်သွားသည်။

ဒုန်း

လင်ရှောင်စု၏ ခန္ဓာကိုယ်သည် စားပွဲပေါ်သို့ ကျရောက်သွားပြီး စားပွဲပေါ်ရှိပစ္စည်းအားလုံးကို ကြမ်းပြင်ပေါ်သို့ ပြုတ်ကျစေမည့် အနေအထားပင် ဖြစ်နေသည်။ ချန်ယဲ့က လက်ချောင်းဖြင့် ညင်သာစွာ ခေါက်လိုက်ရာ လက်ဖက်ရည်အိုးနှင့် ခွက်များ လေထဲသို့ ပျံတက်သွား၏။ သူမ၏ လက်ဖြင့် ညင်သာစွာ လမ်းညွှန်လိုက်ရာ လင်ရှောင်စုသည် အံ့ဩတကြီးဖြင့် နေရာတွင် ပြန်ထိုင်လိုက်ရပြီး လေထဲရှိ လက်ဖက်ရည်အိုး၊ ခွက်နှင့် ဗန်းတို့သည် တစ်စက်မျှ မဖိတ်စင်ဘဲ မူလနေရာသို့ ပြန်ရောက်သွား လေသည်။ ဤလှုပ်ရှားမှုမှာ တကယ့်ကို အံ့ဩစရာကောင်းလှပေသည်။

"ငါ နားလည်ပြီ"

လင်ရှောင်စုက အော်ပြောလိုက်၏။

"မင်း စနစ်ထဲမှာ ငါ့ကို ရှုံးနိမ့်ခဲ့လို့ စိတ်တိုနေတာပဲ မင်းက ရှန်လုံမှာ စည်းမျဉ်းတွေအကြောင်း ပြောနေတာလား လေ့ကျင့်ရေးကွင်းမှာ ရှုံးနိမ့်ပြီး အပြင်မှာ အဆိပ်ခတ်တဲ့နည်းနဲ့ လက်စားချေတာပေါ့... မင်း 'ကိုယ်ကျင့်တရား' ဆိုတဲ့ သဘောတရားကိုရော နားလည်ရဲ့လား"

ငယ်ရွယ်သော လှပသူမှာ အံ့ဩသွားသည်။

"စနစ်ထဲမှာ ရှင်နဲ့ တိုက်ခိုက်ခဲ့တာ ကျွန်မမှန်း ရှင် ဘယ်လိုလုပ် သိတာလဲ"

"စနစ်နဲ့ တကယ့်လူက မတူဘူး ခန္ဓာဗေဒပိုင်းဆိုင်ရာက လုံးဝ ကွဲပြားပေမဲ့ မင်းရဲ့ ကန်ကျောက်တဲ့ လှုပ်ရှားမှုက စနစ်ထဲက လုပ်ကြံသတ်ဖြတ်သူနဲ့ အတိအကျ တူနေတာပဲ ငါ ဘယ်လိုလုပ် မသိဘဲ နေမှာလဲ"

ဟုတ်ပါတယ် သူမက ရှင်းယွဲ့ပဲဖြစ်လေ၏။

သူမ အံ့အားသင့်သွားသည်။

သို့သော် ချန်ယဲ့၏ မျက်လုံးများက တောက်ပနေပြီး

"ကျွန်မမှာလည်း မေးခွန်းတစ်ခု ရှိတယ် ရှင်းယွဲ့ လက်ဖက်ရည်ထဲမှာ အဆိပ်ခတ်ထားမှန်း ရှင် ဘယ်လိုလုပ် သိတာလဲ"

"ဘာကြောင့်လဲဆိုတော့ သူမရဲ့ အကြည့်တွေက မကောင်းတဲ့ ရည်ရွယ်ချက်တွေနဲ့ ပြည့်နေလို့ပဲ"

လင်ရှောင်စုက ထပ်ပြောလိုက်သည်။

"သူမက ပြုံးနေတဲ့အချိန်မှာ အပြစ်ကင်းပြီး ကြင်နာသယောင် ရှိပေမဲ့ လက်ဖက်ရည်ခွက်ကို ငါ ကိုင်လိုက်တဲ့အချိန်မှာ သူမမျက်လုံးထဲက လှည့်ကွက် အောင်မြင်သွားတဲ့ ပရိယာယ်ကို ငါ မြင်လိုက်ရတယ်..."

"မင်းရဲ့ ဘိုးဘေးတွေကို ငါ ကျိန်ဆဲလိုက်မယ် ငါ့ရှေ့မှာ ဘာလို့ ဒီလောက် မာန်ပါနေရတာလဲ..."

ရှင်းယွဲ့က အော်ဟစ်လိုက်ပြီး လုံးဝ စိတ်လွတ်ကိုယ်လွတ် ဖြစ်သွား၏။

"မင်း ဒါကို ကျိန်ဆဲတယ်လို့ ထင်နေတာလား ငါ့ရဲ့ ဘိုးဘေးတွေကတော့ သင်္ချိုင်းထဲမှာ တော်တော် ပျော်နေကြမှာ..."

"ငလူးပဲ ထားလိုက်စမ်း တိုက်ကြမယ်"

ရှင်းယွဲ့ ခုန်တက်ပြီး ဘေးတိုက် ကန်ကျောက်လိုက်ရာ ချန်ယဲ့က လက်ကို ဆန့်ထုတ်ပြီး သူမ၏ ခြေသလုံးကို ချက်ချင်း ဖမ်းဆွဲလိုက်သည်။

"ရှင်းယွဲ့ အမှတ်တွေ ထပ်နှုတ်ခံချင်ပြန်ပြီလား"

ရှင်းယွဲ့၏ လှုပ်ရှားမှုအားလုံး ချက်ချင်း ရပ်တန့်သွားလေသည်။ အမှတ်တွေ နှုတ်ခံရခြင်းက သူမ၏ အသက်သွေးကြောပင် ဖြစ်၏။ အရံအဖွဲ့ဝင်မှ အဖွဲ့ဝင်အစစ် ဖြစ်လာဖို့ဆိုရင် အမှတ် ၁၀၀၀ လိုအပ် ပေသည်။ သူမသည် သူမ၏ အောင်မြင်မှုများဖြင့် အမှတ် ၂၀၀၀ ကျော် စုဆောင်းထားနိုင်ခဲ့သော်လည်း မကြာခဏ အမှတ်နှုတ်ခံရသည့်အတွက် ယခု ၈၅၃ မှတ်သာ ကျန်ရှိတော့သည်။ သူက ဒီ လူယုတ်မာကို စာကြည့်တိုက်မှာ ဝက်ခေါင်းကြီးဖြစ်အောင် ရိုက်နှက်လိုက်ရင် အမှတ် ၂၀၀ ဆုံးရှုံးနိုင်ဖွယ် ရှိနေလေ သည်။

ချန်ယဲ့၏ အကြည့်က လင်ရှောင်စုဆီ ရွေ့သွားသည်။

"ပြန်ကြစို့ မင်းရဲ့ လက်ထောက်လေးလည်း စိတ်ငြိမ်သွားပြီ"

"တရားမျှတမှု မရှိဘူးလား ငါက အငြင်းပွားမှု ဖြစ်ပြီး အမှတ်တွေ ဆုံးရှုံးဖို့ ဖြစ်လာတယ် သူကတော့ အကဲဖြတ်မှုတွေကို အလွယ်တကူ ကျော်ဖြတ်သွားတယ်..."

ရှင်းယွဲ့၏ စွပ်စွဲချက်များကြားတွင် လင်ရှောင်စုသည် စာကြည့်တိုက်မှ ထွက်ခွာခဲ့၏။

ရှင်းယွဲ့ မသိနိုင်ပေမဲ့ သူကတော့ သိလေသည်။

ဒီနေ့ကလည်း အကဲဖြတ်မှု တစ်ခုဖြစ်ပြီး အကဲဖြတ်မှုတွင် အချက်နှစ်ချက် ရှိသည်။ ပထမအချက် "စစ်ထောက်လှမ်းရေး" အပေါ် အတွေးအခေါ်များ၊ "စစ်ထောက်လှမ်းရေး" အပေါ် အမြင်များသည် တစ်ယောက်ရဲ့ အတွင်းစိတ်ကို ဖော်ပြနိုင်၏။

ရှန်လုံက ကျွမ်းကျင်မှုကိုပဲ စစ်ဆေးတာ မဟုတ်ဘူး စိတ်ဓာတ်ကိုပါ စစ်ဆေးခြင်းပင်ဖြစ်၏။ မှန်ကန်တဲ့ ကမ္ဘာ့အမြင်နှင့် စစ်မှန်တဲ့ နှလုံးသားက အရေးကြီးတဲ့ တာဝန်တွေအတွက် ကြိုတင် လိုအပ်ချက်တွေကို စစ်ဆေးခြင်းက ပထမဆုံးစမ်းသပ်မှုပင် ဖြစ်လေသည်။

ဒုတိယတစ်ခုက ရှင်းယွဲ့ရဲ့ အဆိပ်ခတ်မှုပင်။ ရှန်လုံ အဖွဲ့ဝင်တစ်ယောက်အနေနဲ့ အမြဲ သတိရှိရပြီး လင်ရှောင်စုသာ အဲ့ဒီလက်ဖက်ရည်ခွက်ကို သောက်ခဲ့မယ်ဆိုရင် သူ့ရဲ့ အကဲဖြတ်မှုက ကျရှုံးသွားမည် ဖြစ်သည်။ လင်ရှောင်စုက လက်ဖက်ရည်မှာ အဆိပ်ပါမှန်း မှန်ကန်စွာ တွက်ဆနိုင်ရုံတင်မကဘဲ မသောက်ဖို့ ရွေးချယ်ခဲ့လေသည်။ ထို့နောက် လင်ရှောင်စုမှ အရေးကြီးတဲ့ ကျွမ်းကျင်မှု တစ်ခုကိုလည်း ပြသခဲ့ခြင်းပင်ဖြစ်၏။

အဲ့ဒါက ဘာလဲ။ ရှင်းယွဲ့ရဲ့ ကန်ချက်နဲ့ စနစ်ထဲက မျိုးရိုးဗီဇလူသားရဲ့ လှုပ်ရှားမှုချင်း တူညီနေတာကို တိတိကျကျ ဖမ်းဆုပ်နိုင်ခဲ့ပြီး ရှင်းယွဲ့က စနစ်ထဲက လုပ်ကြံသတ်ဖြတ်သူ ဖြစ်ကြောင်း တွက်ဆ နိုင်ခဲ့ပြီး ဒီလောက် ကြောက်စရာကောင်းတဲ့ အကဲခတ်နိုင်စွမ်းနဲ့ ဆုံးဖြတ်နိုင်စွမ်းဖြင့် ရှန်လုံရဲ့ ဝင်ခွင့် စာမေးပွဲကို ချောမွေ့စွာ ဖြတ်ကျော်ခဲ့ပြီး သူ့ရဲ့ လက်ထောက် ခွင့်ပြုချက်များ ဖွင့်ပေးလိုက်တဲ့ အချိန်ကစပြီး သူဟာ ရှန်လုံ အရန်အဖွဲ့ဝင် ဖြစ်လာခဲ့လေသည်။

သူ့အခန်းထဲသို့ ဝင်လိုက်ရာ လင်ရှောင်စုသည် သူ့၏ လက်ထောက်လေးကို နောက်တစ်ကြိမ် ထပ်တွေ့သည်။

"သူဌေး အခု ခွင့်ပြုချက်တွေ ရသွားပြီ သူဌေးအတွက် အရာအားလုံး လုပ်ပေးနိုင်ပါပြီ"

အရာအားလုံး... လင်ရှောင်စု စိတ်လှုပ်ရှားသွား၏။

"ဟားဟား ဇနီးသည်က ယောက္ခမ ဖြစ်သွားပြီ မင်းရဲ့ အချိန်တွေ ရောက်လာပြီပေါ့ မင်း ကျွမ်းကျင်တယ်လို့ ပြောထားတဲ့ တရုတ်ဟင်းလျာကြီး ရှစ်မျိုးလုံးကို စားကြည့်ရအောင်"

"တောင်းပန်ပါတယ် သူဌေးတစ်ယောက်တည်း ဒီလောက်များများ မစားနိုင်ပါဘူး ရှန်လုံရဲ့ စည်းမျဉ်းတွေက အလဟဿ ဖြစ်မှုကို တင်းကျပ်စွာ တားမြစ်ထားပါတယ်"

‘ငရဲပဲ’

နောက်ဆုံးတော့ လင်ရှောင်စုက ဟင်းလျာ သုံးမျိုးနဲ့ ဟင်းရည်တစ်မျိုးကို ရွေးချယ်လိုက်ရလေသည်။ ဒါက ရှန်လုံ စည်းမျဉ်းတွေက သတ်မှတ်ထားတဲ့ အမြင့်ဆုံး ကန့်သတ်ချက်ပင်။ သို့သော် သူ ရွေးချယ်ခွင့်တော့ ရှိလေသည်။ ဟင်းလျာ ရှစ်မျိုးထဲက ကြိုက်တာ ရွေးနိုင်ပြီးတော့် တစ်မျိုးနဲ့ တစ်မျိုး ရောစပ်ပြီး စားနိုင်၏။

ဆိုဖာပေါ်မှာ ထိုင်ရင်း လင်ရှောင်စုက လက်ထောက်လေး သူ့အတွက် ဟင်းချက်ဖို့ လက်က အဝတ်ကို ဆွဲတင်နေတာကို ကြည့်ပြီး ခံစားချက်တွေ ရောထွေးနေ၏။

‘ဒီလောက် စွမ်းဆောင်နိုင်တဲ့ စက်ရုပ်တစ်ရုပ်က ဘယ်လောက်တောင် ဈေးကြီးလိမ့်မလဲ ဖြစ်နိုင်ရင် လစာရပြီးရင် ကစားဖို့ တစ်ရုပ်လောက် ဝယ်ထားလိုက်မယ်...’

လက်ထောက်လေးလျူမှ စားသောက်နေစဉ်အတွင်း ဘေးမှာ ရပ်ပြီး ကူညီဖို့ အသင့်ရှိနေသေးသည်။ အစာက တကယ့်ကို ထိပ်တန်း အရသာဖြစ်ပြီး ငါးကြယ်ပွင့် အဆင့်အတန်းပင် ရှိနေလေသည်။ အစာစားပြီးနောက် လင်ရှောင်စုက သူမပေးသော လက်ဖက်ရည်ကို သောက်ရင်း သူမကို အပေါ်အောက် ကြည့်လိုက်မိသည်။

"လက်ထောက်လေး"

"ရှိပါတယ်"

"မင်းရဲ့ လုပ်ဆောင်ချက်တွေ အကုန် ပွင့်သွားပြီလား"

"ဟုတ်ကဲ့ သူဌေး"

"အဆုံးစွန် လုပ်ဆောင်ချက်ရော ပါသလား"

" သူဌေး ဆိုလိုတာကို နားမလည်ပါဘူး အချက်အလက် ဘဏ်ထဲမှာ အဆုံးစွန် လုပ်ဆောင်ချက်ဆိုတဲ့ သဘောတရား မရှိပါဘူး..."

ဒီအခါမှာတော့ လင်ရှောင်စုက ရှင်းပြဖို့ စတင်လိုက်လေသည်။

သူမရဲ့ လှပတဲ့ မျက်လုံးကြီးတွေကို မှိတ်တုတ်မှိတ်တုတ် လုပ်ပြီး စကားလုံးတစ်လုံးချင်းစီကို သူမရဲ့ ဒေတာဘေ့စ်ထဲသို့ ထည့်သွင်းလိုက်ကာ နောက်ဆုံးတော့ နားလည်သွား၏။

"သူဌေး ဆိုလိုတာက ဇီဝကမ္မ လိုအပ်ချက်တွေကို ဖြေရှင်းဖို့ပေါ့ အဲ့ဒါ ကျွန်မရဲ့ အလုပ် မဟုတ်ပါဘူး ကျွန်မက Class B စက်ရုပ်ပါ အောက်ပိုင်းက အလွိုင်းတွေနဲ့ လုပ်ထားတာပါ အပေါက် ဘာမှ မရှိပါဘူး သူဌေးက ကျွန်မကို ပြုပြင်ချင်တာလား အဲ့လိုဆိုရင် လျှောက်လွှာတင်ပြီး ခေါင်းဆောင်တွေရဲ့ ပြန်လည်သုံးသပ်ချက် လိုအပ်ပါတယ်"

"မလိုပါဘူး မလိုပါဘူး ငါက ဒီအတိုင်း မေးကြည့်တာပါ"

"ကျွန်မ သူဌေးကို ပြည့်စုံတဲ့ အဖြေတစ်ခု ပေးပါရစေ..."

မျက်တောင် ခတ်လိုက်သည်နှင့် စက်ရုပ် ယန္တရားဆိုင်ရာ အသိပညာများက ခန်းမထဲတွင် ပေါ်လာ လေတော့သည်။