အခန်း (၁၈) - မင်းက ငါ့အတွက် ဘာအသုံးဝင်လို့လဲ

ချန်ယဲ့၏ အကြည့်များသည် စားပွဲတင် ခွက်ကလေးဆီသို့ ရောက်သွား၏။ သူမ၏ နောက်ဆုံးပေါ် သုတေသနဖန်တီးမှု "S13" ဆေးဘူးကလေးသည် ယခုအခါ ပျောက်ဆုံးနေပြီဖြစ်လေသည်။

စိတ်တိုနေသူ တစ်ယောက်က ယူသွားတာ ဖြစ်ရမည်။

လေ့ကျင့်ရေးကွင်းတွင် လင်ရှောင်စုသည် အလွန်မာန်ပါသော ပုံစံဖြင့် (၁၀) စက္ကန့်ခန့် ဟန်ထုတ်ကာ ရပ်နေ၏။ ဤပုံစံသည် ရှင်းယွဲ့ကို ပေါက်ကွဲထွက်သွားစေပြီး အနိုင်ယူလိုက်သည့် နောက်ဆုံး ပစ်ချက်အပြီး ပုံစံပင် ဖြစ်၏။

သူက ဒီပုံစံကို လန်းတယ်လို့ ထင်နေတာလား။ မဖြစ်နိုင်ချေ။ သူ့ခါးက နာနေတာကြောင့်သာ ဖြစ်၏။ ဤခန္ဓာကိုယ်က သူ့ရဲ့ တုံ့ပြန်မှုအရှိန်နှင့် မျက်လုံး၏ စံနှုန်းများကို လုံးဝ မမီနိုင်အောင် အားနည်းလွန်း နေသည်။

"ကောင်းကင်တာအို ဉာဏ်ပညာမျက်လုံး"သည် အရာရာကို အသေးစိတ်အထိ မြင်နိုင်ပြီး မည်မျှပင် ရှုပ်ထွေးသော ပတ်ဝန်းကျင်ဖြစ်ပါစေ တစ်ချက်ကြည့်ရုံဖြင့် အားလုံးကို ထိုးဖောက် မြင်နိုင်၏။ "လူသားတာအို သစ်ခွနှလုံးသား"သည် ခွဲခြမ်းစိတ်ဖြာ ပေါင်းစပ်ပေးနိုင်စွမ်းအရ အရှုပ်ထွေးဆုံး ကွန်ပျူတာတစ်လုံးနှင့် နှိုင်းယှဉ်နိုင်သည်။ ဤအချက်နှစ်ချက်ကြောင့် သူသည် အရာအားလုံးကို တိုက်ရိုက် ထိုးဖောက်နိုင်ခြင်းပင် ဖြစ်၏။ သို့သော်လည်း ဤခန္ဓာကိုယ်က အလွန်ပင် အားနည်းလွန်း နေသည်။ တုံ့ပြန်မှုအရှိန်ကို လုံးဝ မလိုက်နိုင်ပေ။ မကြာသေးမီက ဖြစ်ပွားခဲ့သော ပြင်းထန်သည့် တိုက်ခိုက်မှု အပြန်အလှန် ဖြစ်စဉ်တွင် ခါးနာသွားခြင်းမှာ အနည်းငယ် အရှက်ရစရာ ကောင်းလှ ပေသည်။ ဘယ်သူမှ မမြင်မိစေရန် ဆုတောင်းရမည်။

လင်ရှောင်စုသည် လက်နက်ပစ်ခတ်သည့်နေရာမှ ထွက်လာပြီး အခန်းသို့ ပြန်လာခဲ့သည်။ လက်ထောက်လေးက ပြေးလာပြီး နွေးထွေးစွာ စိုးရိမ်ကြောင်း ဖော်ပြလိုက်၏။

"ဘာဖြစ်တာလဲ"

"ငါ့ခါးနာနေတယ်... ကုသဖို့ နည်းလမ်းရှိလား"

လင်ရှောင်စုက ဆိုဖာပေါ် လှဲချရင်း မေးလိုက်သည်။

လက်ထောက်လေးက တောက်ပစွာ ပြုံးလိုက်၏။

"ကျွန်မမှာ လျှပ်စစ်ကုထုံးနဲ့ အပ်စိုက်ကုထုံး ရှိပါတယ် ၁၀ စက္ကန့်အတွင်း ပုံမှန်အတိုင်း ဖြစ်သွားပါလိမ့်မယ် ဒါက ကျွန်မတို့ ဒက်ရှာ ဘိုးဘေးတွေရဲ့ ဆေးပညာပါပဲ"

"ကောင်းပြီ ကုပေးစမ်းပါ"

"တောင်းပန်ပါတယ် ဒီခွင့်ပြုချက်ကို မရရှိသေးပါဘူး"

လင်ရှောင်စု သူမကို စိုက်ကြည့်လိုက်သည်။

"အဲ့ဒါဆို အခု မင်း လက်ထောက်တစ်ယောက်အနေနဲ့ လုပ်ပေးနိုင်တာက ဒဏ်ရာရနေတဲ့ မင်းရဲ့ သူဌေးဘေးမှာ ထိုင်ပြီး စကားပြောပေးဖို့နဲ့ ဘာမှမလုပ်ဖို့ပဲလား"

"ကျွန်မ သီချင်းတစ်ပုဒ် ဆိုပေးလို့ ရပါတယ် အကိုက်အခဲ သက်သာစေဖို့ပေါ့"

"သွားလိုက်စမ်းပါ 'မင်းက ငါ့အတွက် ဘာအသုံးဝင်လို့လဲ' ဆိုတဲ့ သီချင်းကို ဆိုပြလိုက်..."

နေဝင်သွားသောအခါ လင်ရှောင်စုသည် ၁၀၁ သို့ ရောက်ပြီးနောက် ပထမဆုံးညကို ဖြတ်သန်းရ၏။ ညစာ စားပြီးနောက် သူသည် ခါးကို ကိုင်ကာ ရေကန်ငယ်လေးဘေးတွင် လမ်းလျှောက်နေစဉ် ကျိုးကျန်းနှင့် တွေ့ဆုံသွားလေသည်။ ကျိုးကျန်းက သူ့ကို အံ့ဩစွာ ကြည့်လိုက်သည်။

" မင်း မင်းရဲ့ လက်ထောက်ရဲ့ အဆုံးစွန် လုပ်ဆောင်ချက်ကို ဖွင့်လိုက်ပြီလား"

"ဘာအဆုံးစွန် လုပ်ဆောင်ချက်လဲ"

ကျိုးကျန်းက မျက်တောင်ခတ်ကာ ပြောလိုက်သည်။

"သူမက စက်ရုပ်လေ အဆုံးစွန် လုပ်ဆောင်ချက်ဆိုတာ ဘာလဲ မင်းသိမှာပါ..."

‘ငလူးပဲ’

လင်ရှောင်စု နားလည်သွား၏။

‘ဒါပေမဲ့ ငါက အပြစ်ကင်းပါတယ် ငါ့လက်ထောက်က စည်းမျဉ်းကို အလွန်တင်းကျပ်စွာ လိုက်နာတယ် သူမ ကုပေးနိုင်ပါလျက်နှင့် ဘာမှမလုပ်ပေးခဲ့ဘဲ ငါ့ကို ဒီအတိုင်း ထားလိုက်တာပါ မင်းက ငါ သူမရဲ့ အဆုံးစွန် လုပ်ဆောင်ချက်ကို ဖွင့်လိုက်တယ်လို့ ထင်နေတာလား ငါ ခါးကို ကိုင်ထားတာက အားနည်းလို့ ခံစားနေရလို့ပါ မင်းက 'အနီရောင်ဟက်ကာ' မဟုတ်လား ဒီလိုမျိုး တိရစ္ဆာန်ဆန်တဲ့ အတွေးတွေနဲ့ မင်းကိုယ်မင်း 'အဝါရောင်ဟက်ကာ' ဖြစ်သွားမှာ မကြောက်ဘူးလား’ဟု သူ တွေးမိပြန်၏။

လေ့ကျင့်ရေး ကာလမှာ ဒဏ်ရာရတာက ဂုဏ်ယူစရာ မဟုတ်တာကို ထည့်တွေးပြီး လင်ရှောင်စုက ဒီအကြောင်းကို ဆက်မပြောတော့ဘဲ သူတို့နှစ်ယောက် ခဏစကားပြောပြီးနောက် အနားယူရန် ပြန်သွားလိုက် ကြသည်။ ကံကောင်းစွာပင် နောက်တစ်နေ့မနက်တွင် သူ့ခါးနာမှုမှာ တဖြည်းဖြည်း သက်သာသွား၏။

လင်ရှောင်စုသည် အကြောလျှော့ လေ့ကျင့်ခန်း တစ်စုံလုပ်ပြီးနောက် လက်နက်နယ်ပယ်သို့ နောက်တစ်ကြိမ် ပြန်သွားလိုက်သည်။ ဒီတစ်ခါ သူသည် ယာဉ်အမျိုးမျိုးကို ပစ်မှတ်ထားလေသည်။ ယာဉ်များမှာလည်း ကိရိယာများပင်ဖြစ်ပြီး ၎င်းတို့သည် အနက်ရှိုင်းဆုံး အမျိုးအစားများပင် ဖြစ်၏။ ရှန်လုံသည် မစ်ရှင်များ မကြာခဏ ထွက်ရသဖြင့် ယာဉ်မောင်းခြင်းသည် မရှိမဖြစ် ကျွမ်းကျင်မှုတစ်ခု ဖြစ်ပေသည်။

လင်ရှောင်စုတွင် ယာဉ်မောင်းလိုင်စင် မရှိသလို ကားမောင်းတတ်ခြင်းလည်း မရှိခဲ့ပါ။ တက္ကသိုလ် ဘွဲ့ရအများစုသည် ကားမောင်းတတ်ကြသော်လည်း ကံမကောင်းစွာပင် သူက ထိုအထဲတွင် မပါဝင်ခဲ့ပါ။ ဘာကြောင့်လဲ လင်ရှောင်စုသည် မိသားစု၏ အုတ်နီခဲ အိမ်လေးကို ကြည့်လိုက်ပြီး မိခင်စိုက်ထားသည့် ဟင်းသီးဟင်းရွက်များကို မြင်ယောင်ရင်း ကားတစ်စီး ဝယ်နိုင်ဖို့ အလှမ်းဝေးလွန်းသည်ဟု တွက်ဆကာ ကားမောင်းသင်ခြင်းကို စွန့်လွှတ်လိုက်သည်။

‘ဒါပေမဲ့ အခုတော့ ဒါက အခွင့်အရေး မဟုတ်ဘူးလား’

တကယ့်လောကမှာ မမောင်းတတ်ပေမဲ့ ဂိမ်းထဲမှာတော့ မောင်းတတ်ရမယ်။ မောင်းရုံတင်မကဘူး၊ လေယာဉ်ပါ ပျံသန်းနိုင်ရမယ်။ ရှန်လုံ၏ လေ့ကျင့်ရေးစနစ်က အလွန်အစွမ်းထက်လွန်း၏။ မည်သည့် ကားပေါ်မဆို တက်လိုက်သည်နှင့် အပြင်ဘက်အရာအားလုံး လုံးဝ ပြောင်းလဲသွားလေသည်။ ကားက တကယ်မရွေ့လျားသော်လည်း တက်လိုက်တာနှင့် အပြင်ဘက်တွင် အမျိုးမျိုးသော မြင်ကွင်းများကို သရုပ်ဖော်ပြသနေ၏။

‘အမိုက်ဆုံး အစိတ်အပိုင်းက ဘာလဲသိလား’

လုပ်ဆောင်သမျှ ထိန်းချုပ်မှုတိုင်းအတွက် အစစ်အမှန် မြင်ကွင်း၊ အထိအတွေ့၊ အာရုံခံစားမှု အတွေ့အကြုံကို ရရှိမှာ ဖြစ်ပေ၏။ လမ်းမညီတာကို ဖြတ်ကျော်တဲ့အခါ ကားက တုန်ခါနေသည်။ စောင်းတဲ့ နေရာမှာ အရှိန်တင်တဲ့အခါ ကိုယ်အလေးချိန် မဲ့နေသလို ခံစားရလေသည်။ ကားက တိမ်းမှောက်သွားရင်တောင် လေထဲမှာ ၃၆၀ ဒီဂရီ အကြိမ်ကြိမ် လည်ပတ်နေပြီး တင်ပါးအောက်က ကားကလည်း တကယ်ကို မှောက်သွား၏။ ဆိုလိုသည်မှာ ကားမောင်းခန်းထဲမှာ ထိုင်နေခြင်းသည် ရှုပ်ထွေးလှသော လမ်းများပေါ်တွင် မောင်းနှင်နေခြင်းနှင့် ဘာမှ ကွာခြားမှုမရှိခြင်းပင်ဖြစ်၏။

လင်ရှောင်စု၏ သင်ယူနိုင်စွမ်းမှာ အံ့ဩစရာကောင်းအောင် မြန်ဆန်လှ၏။ မိနစ် ၃၀ အတွင်းမှာတင် သူသည် ကျွမ်းကျင်သော ယာဉ်မောင်းတစ်ဦးကဲ့သို့ ဖြစ်သွားလေသည်။ တစ်နာရီအကြာတွင် ကားအစီးရေ များစွာရှိသော အဝေးပြေးလမ်းမပေါ်သို့ ဝင်ရောက်သွားပြန်သည်။

ရုတ်တရက်

ကားတစ်စီး၏ ပြတင်းပေါက် ပွင့်သွားပြီး သူ့ကို ချိန်ထားသော အမည်းရောင် သေနတ်ပြောင်းကို မြင်လိုက်ရ၏။ လင်ရှောင်စု အနည်းငယ် အံ့အားသင့်သွားပြီး ဘရိတ်ကို နင်းလိုက်ရာ ရှေ့ကကားက အရှိန်နဲ့ ကျော်သွားပြီး သေနတ်ပြောင်းကလည်း လျင်မြန်စွာ လှည့်လာသည်။

လင်ရှောင်စု လက်ကို ထုတ်လိုက်ရာ ပစ္စတိုသေနတ်က သူ့လက်ဖဝါးထဲ ကျရောက်လာပြီး ပြတင်းပေါက်ကို လျှောချလိုက်ကာ ပြင်းထန်သော လေတိုက်ခတ်မှုက သူ့မျက်နှာကို ရိုက်ခတ်လျှက် ရှိနေသည်။

ဖျပ်

တစ်ချက် ပစ်လိုက်ရာ ပြိုင်ဘက်၏ ဦးခေါင်းကို တိတိကျကျ ထိမှန်သွား၏။ သူတို့ကားက ထိန်းချုပ်မှု လွတ်သွားပြီး ကားများပုံထားသည့် နေရာသို့ ဝင်တိုက်သွားလေသည်။ သူ့ရှေ့တွင် ကားအစီးရေ မြောက်မြားစွာသည် တကယ့် အဝေးပြေးလမ်းမကဲ့သို့ပင် ဆက်တိုက်ပင် တိုက်မိနေ၏။ လင်ရှောင်စု ထိုအခိုက်အတန့်ကို အမိအရ ဖမ်းဆုပ်လိုက်ပြီး ကားများကြားရှိ လွတ်နေသော နေရာကို တွက်ချက်ကာ ပျံသန်းလာသော ကားများအောက်တွင် အရှိန်တင်လိုက်လေသည်။ မဖြစ်နိုင်လောက်သော အခြေအနေ မျိုးမှာတင် ကား ခုနစ်စီး၊ ရှစ်စီး၏ တိုက်ခိုက်မှုမှ ရှောင်တိမ်းနိုင်ခဲ့ပြီး အဝေးပြေးလမ်းမပေါ်မှ အရှိန်ဖြင့် မောင်းကာ ထွက်ပြေးသွားလေ၏။

"ထူးချွန်လိုက်တာ"

အိမ်ဝင်းငယ်ထဲတွင် ချန်ယဲ့က နှစ်သက်အားရစွာ လက်ခုပ်တီးလိုက်သည်။

တစ်ဖန် ထိုမြင်ကွင်းက သူမ၏ မျက်လုံးထဲသို့ ရောက်သွားသည်။ အမှန်တကယ်တွင် လင်ရှောင်စု၏ လေ့ကျင့်မှုအားလုံးသည် သူမ၏ ထိန်းချုပ်မှုအောက်တွင် ရှိသည်။ သူ့ဒဏ်ရာများ အပါအဝင်ပေါ့။ သူမက ဒဏ်ရာကို မကုပေးခဲ့ပါ အဘယ်ကြောင့်ဆိုသော် ဒဏ်ရာသည်လည်း လေ့ကျင့်မှု၏ အစိတ်အပိုင်း ဖြစ်သောကြောင့်တည်း။

လူတိုင်းသည် တကယ့် တိုးတက်မှုကို ရရှိရန် ကိုယ်ပိုင် အတွေ့အကြုံများ ရှိရမည်။

ပထမနေ့

ဒုတိယနေ့

တတိယနေ့..

ခုနစ်ရက်ဆက်တိုက် ကြာမြင့်ပြီးနောက် လင်ရှောင်စုသည် ကားများ၊ စူပါကားများ၊ လေယာဉ်များ၊ နောက်ဆုံးပေါ် သယ်ယူပို့ဆောင်ရေး ယာဉ်ပုံစံမျိုးစုံတို့နှင့် လိုက်လျောညီထွေ ဖြစ်သွားခဲ့၏။ သူသည် မြို့ပြရှုပ်ထွေးမှုများနှင့် တောရိုင်းဒေသများအတွင်း မောင်းနှင်ခဲ့သည်။ ပင်လယ်ပြင်တွင် သင်္ဘောများဖြင့် အရှိန်တင်ခဲ့ပြီး ကောင်းကင်ပြာကြီးထဲတွင် လေယာဉ်များ ပျံသန်းခဲ့ကာ တစ်ဦးချင်း စစ်သားများမှအစ၊ တပ်ခွဲများ၊ ရန်သူ့တင့်ကားများ၊ သင်္ဘောများအထိ ရန်သူအမျိုးမျိုးနှင့် ရင်ဆိုင်ခဲ့ရလေသည်။ သူ အသုံးပြုသည့် လက်နက်စနစ်များမှာ ဒုံးကျည်အဆင့်အထိ ရောက်ရှိသွားပြီဖြစ်၏။ လင်ရှောင်စု ကိုယ်တိုင်ကတော့ ဘာမှ သိပ်မခံစားရပါ၊ ဂိမ်းတစ်ခု ဆော့နေသလိုပါပဲ...

သို့သော် အပြင်ဘက်တွင် ချန်ယဲ့နှင့် အမှတ် (၈၈) တို့မှာ ချွေးပြန်နေကြပြီ...

"၈၈ မင်း သူ့အဆင့်ကို ရောက်ဖို့ ဘယ်လောက် ကြာခဲ့လဲ"

ချန်ယဲ့က စမ်းသပ်မေးခွန်းတစ်ခု မေးလိုက်သည်။

"စိတ်ပျက်စရာကောင်းတဲ့ အရာတစ်ခု ရှိတယ် ပြောရတာ ရှက်စရာကောင်းလားတော့ မသိဘူး..."

"တကယ်တော့ ကျွန်တော့်ရဲ့ လက်ရှိအဆင့်က သူ့အဆင့်ကို မရောက်သေးဘူး ဒါကြောင့် ကျွန်တော် ဘယ်လောက်ကြာကြာ လေ့ကျင့်ခဲ့လဲဆိုတာ ပြောနေဖို့ မလိုတော့ဘူး"

"ခုနစ်ရက်အတွင်းမှာပဲ သူများတွေ ခုနစ်လနဲ့တောင် မရောက်နိုင်တဲ့ အမြင့်ကို သူ ရောက်သွားတယ်"

ချန်ယဲ့ သက်ပြင်းချလိုက်မိသည်။

"သူ့ရဲ့ နားလည်နိုင်စွမ်း ဒီလို သင်ယူနိုင်စွမ်းမျိုးနဲ့ သူ ဘာကြောင့် ပထမဆုံး အစိုးရဝန်ထမ်း စာမေးပွဲမှာ ကျရှုံးခဲ့တာလဲဆိုတာ ကျွန်မ တကယ်ကို နားမလည်နိုင်ဘူး"

"တကယ်ပါပဲ သူ့ရဲ့ သင်ယူနိုင်စွမ်းနဲ့ဆိုရင် အစိုးရဝန်ထမ်း စာရေးစာမေးပွဲမှာ အမှတ်ပြည့်ရနိုင်ဖို့ ဖြစ်နိုင်ချေ ရှိပါတယ် ဖြစ်နိုင်တာက ဒါဟာ ဝါသနာနဲ့ပဲ ဆိုင်နေတာပါ သူက သဘာဝအတိုင်း ပြင်းထန်သော ရုပ်ပိုင်းဆိုင်ရာ အားကစားတွေကို နှစ်သက်ပြီး ခြောက်သွေ့တဲ့ စာအုပ်အသိပညာတွေကို စိတ်မဝင်စားတာ ဖြစ်နိုင်ပါတယ်"

သို့သော်လည်း နောက်ရက်များတွင် လင်ရှောင်စုသည် အမှတ် (၈၈) ၏ ခန့်မှန်းချက်ကို နောက်တစ်ကြိမ် ထပ်မံ ချေဖျက်ပစ်လိုက်၏။ သူသည် စာကြည့်တိုက်သို့ ဝင်သွားသည်။ သူသည် စာအုပ်အသိပညာများအပေါ် အလွန်ပြင်းထန်သော စိတ်ဝင်စားမှုနှင့် နှစ်သက်မှုကို စတင် ပြသလာ၏။ စာကြည့်တိုက်ကိုလည်း အမျိုးအစားခွဲခြားထားပြီး လက်ထောက်များပင် ရှိလေသည်။ (စက်ရုပ်) တွေ ဖြစ်သော်လည်းပေါ့။ ခလုတ်တစ်ခု နှိပ်လိုက်သည်နှင့် လက်ထောက်၏ ဟိုလိုဂရမ် ပုံရိပ်သည် လေထဲတွင် ပေါ်လာ၏။ သင် လိုအပ်သည့် မည်သည့် စာအုပ်အမျိုးအစားကိုမဆို သူမက ဆွဲထုတ် ပေးနိုင်ပြီး အီလက်ထရောနစ်နှင့် ရုပ်ပိုင်းဆိုင်ရာ ပုံစံ နှစ်မျိုးစလုံး ရနိုင်သည်။

ရုပ်ပိုင်းဆိုင်ရာ စာအုပ်များအတွက် လင်ရှောင်စု၏ လက်ချောင်းများမှာ လျှပ်စီးကြောင်းကဲ့သို့ လျင်မြန်လှသည်။ စာမျက်နှာများကို လှန်လှောရင်း စာမျက်နှာ ၃၀၀ ရှိပြီး အလွန်ခြောက်သွေ့သော "မျိုးရိုးဗီဇဆိုင်ရာ အခြေခံများ" ကို နာရီဝက်အတွင်း ဖတ်ရှုလိုက်၏။ ထို့နောက် သူသည် ပို၍ပင် ခြောက်သွေ့သော "ဆေးပညာ စွယ်စုံကျမ်း" သို့ ပြောင်းလဲ ဖတ်ရှုပြန်သည်။

ချန်ယဲ့နှင့် အမှတ် (၈၈) တို့ အချင်းချင်း ကြည့်လိုက်ကြသည်။

"ဒါက ဘာကို ဆိုလိုတာလဲ မင်းက သူ စိတ်ဝင်စားတယ်လို့ ပြောတယ် ဒါပေမဲ့ သူက သေချာ ဖတ်နေတာ မဟုတ်ဘူး မင်းက သူ စိတ်မဝင်စားဘူးလို့ ပြောပြန်တယ် ဒါဆို သူက ဘာလို့ စာအုပ် တစ်အုပ်ပြီး တစ်အုပ် လှန်ဖတ်နေတာလဲ"

"သူ အကုန် အလွတ်ကျက်သွားတာ ဖြစ်မယ်လို့ ကျွန်မ သံသယရှိတယ်"

"မျိုးရိုးဗီဇဆိုင်ရာ အခြေခံတွေကို နာရီဝက်အတွင်း လေ့လာလိုက်တာ ဒဏ္ဍာရီဆန်လွန်းတယ်"

အမှတ် (၈၈) က မှတ်ချက်ပေး၏။

"ငြင်းလို့မရပါဘူး ဦးနှောက်ရဲ့ လျှို့ဝှက်တံခါးတွေကို ဖွင့်ပေးနိုင်တဲ့ လျှို့ဝှက်ဆန်းကြယ်တဲ့ မျိုးရိုး ဗီဇတစ်ခုခု ရှိကောင်းရှိနိုင်တယ် ဦးနှောက်ဆိုတာ လူ့ခန္ဓာကိုယ်ရဲ့ အလျှို့ဝှက်ဆုံး နေရာပါ ကျွန်တော်တို့ခေတ်ရဲ့ အဆင့်မြင့်ဆုံး လူ့ဦးနှောက်ဖြစ်တဲ့ ကယ်လ်ဆန်တောင်မှ သူ့ရဲ့ စွမ်းဆောင်ရည် ၁၈ ရာခိုင်နှုန်းပဲ ဖွံ့ဖြိုးသေးတယ် သူက လူ့ဦးနှောက် ဖွံ့ဖြိုးမှု ၂၀ ရာခိုင်နှုန်းကို ရောက်ရှိသွားရင် အံ့ဩစရာကောင်းတဲ့ ဖြစ်စဉ်တွေ ပေါ်လာလိမ့်မယ်လို့ အခိုင်အမာ ပြောခဲ့ဖူးတယ်"

အမှတ် (၈၈) က ကောင်းကင်ကို ၄၅ ဒီဂရီ စောင်းကြည့်လိုက်၏။

"သူ့ဦးနှောက်သာ တကယ်ပဲ ၂၀ ရာခိုင်နှုန်းအထိ ဖွံ့ဖြိုးလာမယ်ဆိုရင် သူ တကယ်ပဲ သူ့ရဲ့ လမ်းကြောင်း ကို ပြောင်းဖို့ လိုလိမ့်မယ်"

"ဟုတ်ပါတယ် ရှန်လုံမှာ ကျွန်မတို့မှာ အထူးတပ်ဖွဲ့ စစ်သားတွေ မရှားပါးပါဘူး အထူးတပ်ဖွဲ့ စစ်သား အမျိုးအစား ဘယ်အမျိုးအစားပဲ ဖြစ်ဖြစ် မရှားပါးပါဘူး ဒါပေမဲ့ ကျွန်မတို့မှာ တကယ့် ထူးချွန်တဲ့ ပါရမီရှင်အဆင့် (သုတေသနနှင့် ဖွံ့ဖြိုးရေး) ဝန်ထမ်းတွေ လိုအပ်နေတာပါ အဲ့ဒီ သုတေသီများနှင့် တီထွင်သူတွေဟာ လူသားမျိုးနွယ် တိုးတက်မှုကို သူတို့ကိုယ်ပိုင် စွမ်းအားဖြင့် မောင်းနှင်နိုင်တဲ့ အဓိက အင်အားစုတွေ ဖြစ်ပါတယ်"

လင်ရှောင်စု၏ ရုပ်ပိုင်းဆိုင်ရာ စာအုပ်ဖတ်သည့်အရှိန်မှာ သူ့လက်ချောင်းများ၏ အကန့်အသတ်သာ ဖြစ်ပြီး သူ့၏ ဖတ်ရှုနားလည်နိုင်စွမ်း မဟုတ်ကြောင်း မည်သူမျှ မသိကြပေ။

‘တခြား ဘာလုပ်နိုင်ဦးမလဲ’ ထပ်မံစမ်းသပ်လိုက်ပြန်သည်။

အီလက်ထရောနစ် စာအုပ်များ ဖတ်ခြင်းမှာ မတူညီပါ။ သူသည် မျက်မှန်တစ်စုံ တပ်လိုက်ရာ လက်ထောက်က မျက်နှာပြင် စာသား လှိမ့်နှုန်းကို အမြင့်ဆုံးသို့ တင်ပေးလိုက်သည်။ သာမန်လူတွေက စာသားတွေ ရေလို စီးကျနေတာကိုပဲ မြင်ရပြီး စာလုံးတစ်လုံးမှ မခွဲခြားနိုင်ပေ။ ဒါပေမဲ့ လင်ရှောင်စုအတွက်တော့ ဒါတောင်မှ နှေးကွေးနေသေးသည်ဟု ခံစားရနေသည်။

မကြာသေးမီက ပြင်းထန်သော လေ့ကျင့်မှုများနှင့်အတူ သူ့၏ "ကောင်းကင်တာအို ဉာဏ်ပညာ မျက်လုံး"နှင့် "လူသားတာအို သစ်ခွနှလုံးသား" တို့သည် အဆင့်သစ်တစ်ခုသို့ ရောက်ရှိသွားပြီဖြစ်၏။ လက်ထောက်က လူသားမဟုတ်သဖြင့် လူသားတို့၏ အံ့အားသင့်မှုကို မပိုင်ဆိုင်ပေ။ တကယ်တော့ သူမကလည်း သတင်းပေးသူ မဟုတ်ပါ။ နောက်ထပ် ခုနစ်ရက် ထပ်ကုန်ဆုံးသွား၏။

လင်ရှောင်စုသည် အပျင်းဆုံး သင်တန်းသားတစ်ယောက်လို ခုနစ်ရက်လုံးကို စာကြည့်တိုက်မှာပဲ ကုန်ဆုံးခဲ့လေသည်။ ဒါပေမဲ့ သင်သည် ဤခုနစ်ရက်အတွင်း သူ၏ အောင်မြင်မှုများကို ပေါင်းကြည့် လိုက်မည်ဆိုလျှင် သင် အံ့အားသင့်သွားလိမ့်မည်။ သူသည် ဘာသာစကား ခုနစ်မျိုးကို သင်ယူခဲ့ပြီး တစ်မျိုးစီကို ကျွမ်းကျင်ပိုင်နိုင်စွာ ပြောဆိုနိုင်သည်။

ထောက်လှမ်းရေးအတွက် မရှိမဖြစ် ကျွမ်းကျင်မှုများပင်ဖြစ်၏။

သူသည် "မျိုးရိုးဗီဇဆိုင်ရာ အခြေခံများ" "မျိုးရိုးဗီဇဆိုင်ရာ အယူအဆ" "ဆေးပညာ စွယ်စုံကျမ်း" "ဧကရာဇ် နက်နဲသော အတွင်းသဘောတရားများ"... တို့ကို လေ့လာခဲ့၏။ မျိုးရိုးဗီဇသီအိုရီ၏ အခက်ခဲဆုံး နယ်ပယ်တွင် သူသည် သူ့ကိုယ်ပိုင် နားလည်မှုနှင့် အမြင်များ ရှိနေပြီ ဖြစ်လေသည်။ သူ အနက်ရှိုင်းဆုံး ပြန်တွေးမိလိုက်သည်။

အစပိုင်းမှာ သူ "လူသားတာအို သစ်ခွနှလုံးသား" ကို ရရှိခဲ့စဉ်က ဒီကျွမ်းကျင်မှုကို သူ တန်ဖိုး မထားခဲ့ မိချေ။ "ကောင်းကင်တာအို ဉာဏ်ပညာမျက်လုံး" လောက် မလက်တွေ့ကျဘူးလို့ ခံစားခဲ့ရသည်။ ဒါပေမဲ့ အခု ပြန်ကြည့်လိုက်တော့ "လူသားတာအို သစ်ခွနှလုံးသား" က "ကောင်းကင်တာအို ဉာဏ်ပညာမျက်လုံး" နဲ့ ဘယ်လိုလုပ် ယှဉ်နိုင်ပါ့မလဲ။

"လူသားတာအို သစ်ခွနှလုံးသား"နှင့်အတူ သူ့၏ သင်ယူနိုင်စွမ်းနှင့် နားလည်နိုင်စွမ်းသည် ထောင်ပေါင်းများစွာ တိုးတက်သွား၏။ သူ၏ အသိပညာ၊ သူ၏ ကမ္ဘာ့အမြင်၊ ကမ္ဘာကြီးအပေါ် သူထားရှိသော ရှုထောင့်များ အားလုံး လုံးဝ ပြောင်းလဲသွားလေသည်။ သူသည် ထောက်လှမ်းရေးဆိုင်ရာ အသိပညာကို အထူးစိတ်ဝင်စားမိသည်။ ထိုအချိန်တွင် သူသည် အခြားလိုအပ်သော အသိပညာအများစုကို လေ့လာပြီးနောက် ထောက်လှမ်းရေးအကြောင်း စာအုပ်တစ်အုပ်ကို အေးအေးဆေးဆေး ဖတ်ရှုနေလိုက်သည်။ လက်ဖက်ရည်က အေးစက်သွားပြီ၊ လွင့်ပျံ့နေသော တေးဂီတကြားတွင် သူသည် ထောက်လှမ်းရေး၏ တက်ကြွလှုပ်ရှားသော ကမ္ဘာတစ်ခုထဲသို့ ရောက်ရှိသွားသလိုပင်... သူ့လက်ထဲက စာအုပ်မှာ အမည်ဝှက်များကို အသုံးပြုထား၏။ နေရာများမှာလည်း အမည်ဝှက်များသာ ဖြစ်သည်။ ဒါပေမဲ့ သူသိသည်။

ဤစာအုပ်တွင် မှတ်တမ်းတင်ထားသမျှ အရာအားလုံးသည် ဖြစ်ရပ်မှန်များသာ ဖြစ်ပေသည်။ သူ့နိုင်ငံ၏ အကျိုးအတွက် သူ့ဇနီးကို ကိုယ်တိုင် သတ်ခဲ့သော ထောက်လှမ်းရေး အဖွဲ့ဝင်တစ်ယောက် ရှိခဲ့သည်။ သူ့သားကို ခေါင်းဖြတ်သတ်တာကို မြင်ပြီး ဝမ်းမြောက်စွာ လက်ခုပ်တီးခဲ့ရသော လျှို့ဝှက်ထောက်လှမ်းရေး အေးဂျင့်တစ်ယောက် ရှိခဲ့၏။ ရန်သူနိုင်ငံကို လှည့်ဖြားရန် "ထရိုဂျင်မြင်း စီမံကိန်း" ကို အကောင်အထည်ဖော်ကာ သူ့အထက်အရာရှိကို သတ်ဖြတ်ပြီး ရန်သူနိုင်ငံသို့ ထွက်ပြေး ကာ လျှို့ဝှက်အချက် အလက်များစွာကို သယ်ဆောင်သွားသည့် သုတေသီတစ်ယောက် ရှိခဲ့ဖူးသည်။ အားလုံးက ဖြစ်ရပ်မှန်များသာ ဖြစ်ပေ၏။

သို့သော် ဤအချက်အလက်များသည် အလွန်ဆိုးရွားသော ရည်ရွယ်ချက်ကို ပိုင်ဆိုင်ထားပြီး ရန်သူနိုင်ငံကို လမ်းကြောင်းလွဲစေကာ ဒက်ရှာနိုင်ငံအတွက် အဖိုးတန်သော အချိန်ကာလကို ရရှိစေခဲ့သည်။ အလားအလာအရှိဆုံး မျိုးရိုးဗီဇ ကျွမ်းကျင်သူတစ်ယောက်သည် သမုဒ္ဒရာကို ဖြတ်ကျော်၍ လိုဘာပြည်နယ်သို့ သွားရောက်ကာ "ခေါင်းကိုးလုံးမြွေ"၏ နာမည်ဆိုးဖြင့် ကျော်ကြားသော လိုဘာဌာနခွဲကို ထိုးဖောက် ဝင်ရောက်ခဲ့ပြီး ခေါင်းကိုးလုံးမြွေ၏ "အရိုးဖြူဘုရင်"ကို သတ်ဖြတ်ခဲ့လေသည်။ ထို့နောက် ခန္ဓာကိုယ် အရိုးများ ကျိုးပဲ့သည်အထိ ပြင်းထန်စွာ ဒဏ်ရာရရှိ ခဲ့ပြီးနောက် သူ့အဖွဲ့သားများက ကယ်ဆယ်ကာ အရည်ပျော် သတ္တုဖြင့် ပြန်လည် တည်ဆောက်ပေး ခဲ့သဖြင့် သူသည် ဒဏ္ဍာရီတစ်ခု ဖြစ်လာခဲ့သည်။

"စဉ်းစားမိတာ တစ်ခုခု ရှိလား"

သူ၏ နောက်ကျောမှ အသံတစ်ခုက မေးလိုက်ပြီး နူးညံ့သော ရနံ့တစ်ခုက လိုက်ပါလာ၏။