အခန်း (၁၀) - အပ်

လင်ရှောင်စုသည် အခန်းထဲသို့ အလောတကြီး မဝင်ဘဲ တံခါးဝတွင် ရပ်ကာ "အချိန်နောက်ပြန်ခြင်း" ကို အရင်ဆုံး လုပ်ဆောင်လိုက်၏။ လေးရက်လုံးလုံး ကြာမြင့်ခဲ့ပြီဖြစ်ရာ သူ၏ အချိန်နောက်ကြောင်း ပြန်ခြင်းစွမ်းအားမှာ အကန့်အသတ်သို့ ရောက်နေပြီဖြစ်သည်။ မျက်လုံးထဲတွင် အနည်းငယ် စူးရှသွားသည်ဟု ခံစားရချိန်တွင် သူ လိုချင်သော မြင်ကွင်းကို နောက်ဆုံးတွင် မြင်လိုက်ရလေသည်။ ဖြူဖွေးသော ဆံပင်နှင့် လူကြီးတစ်ယောက်သည် ထိုင်ခုံပေါ်တွင် လဲလျောင်းနေပြီး ခြေထောက်ကို ပေါ့ပါးစွာ ခါယမ်းရင်း မျက်နှာကျက်ကို မော့ကြည့်နေ၏။

ဤမြင်ကွင်းမှာ ရုတ်တရက် သေဆုံးမည့်သူတစ်ဦး၏ ပုံစံမျိုး လုံးဝ မဟုတ်ပေ။ သို့သော် နောက်တစ်စက္ကန့်တွင် ထူးဆန်းသော အရာတစ်ခု ဖြစ်ပေါ်လာ၏။ လင်ရှောင်စု၏ ရင်ထဲတွင် တုန်လှုပ်သွားလေသည်။ သူ့အနောက် သုံးမီတာအကွာတွင် ချန်ယဲ့နှင့် ကျိုးမေတို့က သူ့ကို စိုက်ကြည့် နေကြ၏။

ကျိုးမေက တိုးတိုးလေး ပြောသည်။

"အစ်မချန်၊ သူက အနံ့ခံနိုင်တဲ့ စွမ်းရည်ရှိရင်တောင် ဒါက မဖြစ်နိုင်ဘူးလို့ ကျွန်မ ထင်တယ် လေးရက် ကြာသွားပြီ တောင်လေကလည်း ပြင်းတယ် ပြတင်းပေါက်ကလည်း နေ့တိုင်း ဖွင့်ထားတာ ဘယ်အနံ့မဆို ပြယ်သွားမှာပဲ..."

ချန်ယဲ့၏ မျက်လုံးများ အရောင်လက်သွားပြီး ရှေ့သို့ တိုးလာ၏။ သူမ၏ ခြေလှမ်းမှာ အသံပင် မထွက်ပေ။ လင်ရှောင်စုသည် ရုတ်တရက် ကျောပြင်တွင် အေးစက်သွားသလို ခံစားလိုက်ရပြီး အချိန်နောက်ကြောင်းပြန်ခြင်း အခြေအနေမှ ပြန်ထွက်လိုက်၏။ သူ လှည့်ကြည့်လိုက်သောအခါ အသံမထွက်ဘဲ သူ့အနောက်သို့ ရောက်လာသည့် ချန်ယဲ့ကို မြင်လိုက်ရသဖြင့် လန့်သွားလေသည်။ ဒီမိန်းကလေးက ကြောင်လား ဒါမှမဟုတ် ဘာလဲဟ။

"တစ်ခုခု တွေ့လား"

"အခုတော့ ဘာမှ မမြင်ရသေးဘူး အထဲဝင်ပြီး ကြည့်လိုက်ဦးမယ် အော် ဟုတ်ပြီ အမှုဖြစ်တဲ့နေရာက ဓာတ်ပုံတွေရော ရှိလား"

"ရှင် မေးဖို့ စောင့်နေတာ"

ချန်ယဲ့သည် လက်ကို မြှောက်လိုက်ရာ သူမ၏ မျက်နှာတွင် မျက်မှန်တစ်လက် ပေါ်လာသည်။

"ဓာတ်ပုံ အမှတ်စဉ် ၁၃၅၂ ကို ဖွင့်ပေး"

သူမ၏ စကားသံဆုံးသည်နှင့် မျက်မှန်ထဲမှ အလင်းနှင့် အရိပ်များ ထွက်ပေါ်လာသည်။ အရာရာတိုင်းကို ရှင်းလင်းစွာ မြင်နိုင်သော သုံးဖက်မြင် ဟိုလိုဂရမ်ရုပ်ပုံကြီး ပေါ်လာသည်။ လင်ရှောင်စု အချိန် နောက်ကြောင်းပြန်ခြင်းဖြင့် မြင်ခဲ့ရသည့်အတိုင်း လူကြီးမှာ ထိုင်ခုံတွင် ထိုင်နေပြီး ခေါင်းကို နောက်သို့ လှန်ကာ ပါးစပ်ကို အနည်းငယ် ဟထားသည်ကို တွေ့ရလေသည်။

"ရဲတပ်ဖွဲ့ရဲ့မှုခင်းဆေးပညာ နည်းပညာက တကယ်ကို အံ့ဩဖို့ကောင်းတာပဲ ဒါက အရမ်း ကြည်လင်နေတာပဲ" ဟု လင်ရှောင်စု မှတ်ချက်ပြုလိုက်၏။

"ပြောပါ ဘယ်နေရာကို ချဲ့ပေးရမလဲ"

"ကျွန်တော် အရင် အထဲဝင်ပြီး ကြည့်လိုက်ဦးမယ် မလောပါဘူး"

သူ တရားထိုင်ခန်းထဲသို့ ဝင်ကာ သေချာစွာ လေ့လာလိုက်၏။ အနည်းဆုံးတော့ ရဲအရာရှိ အမျိုးသမီး နှစ်ဦး၏ အမြင်တွင် သူ သေချာ လေ့လာနေပုံ ပေါက်နေလေသည်။ ဆယ်မိနစ်၊ မိနစ်နှစ်ဆယ်... လင်ရှောင်စု အခန်းထဲမှ ပြန်ထွက်လာပြီး ခေါင်းကို ဖြည်းညှင်းစွာ ခါလိုက်၏။

"သူ သေဆုံးတဲ့အချိန်မှာ အခန်းထဲမှာ ဒုတိယလူ မရှိဘူး"

'ချီးပဲ' ကျိုးမေ စိတ်ထဲတွင် မနှစ်မြို့စွာ တွေးလိုက်သည်။

‘မိနစ်နှစ်ဆယ်ကြာအောင် သေချာ ကြည့်ရှုပြီးမှ ဤမျှ သာမန်ကျသော ကောက်ချက်ကို ချတာလား အခု ပြဿနာတစ်ခု ရှိလာပြီ ဒါကို လိမ်ညာမှုလို့ သတ်မှတ်လို့ ရမလား ယွမ်တစ်သောင်း ယူထားပြီး မိနစ်နှစ်ဆယ်ပဲ အလုပ်လုပ်တာ ပိုက်ဆံရှာရတာ အရမ်း လွယ်လွန်းမနေဘူးလား’

"ဒါက သဘာဝအတိုင်း သေဆုံးတာလို့ သေချာလား" ချန်ယဲ့က မေးသည်။

"နောက်ထပ် တစ်ချက်တော့ စစ်ဆေးဖို့ လိုသေးတယ်"

"ဘယ်အချက်လဲ"

လင်ရှောင်စုသည် လက်ကို ဖြည်းညှင်းစွာ မြှောက်လိုက်ပြီး အပြင်ဘက် ပြတင်းပေါက်ဆီသို့ ညွှန်ပြလိုက်၏။ အပြင်တွင် ၁၀ မီတာလောက် ဝေးသော မြင့်မားသည့် ကမ်းပါးတစ်ခု ရှိပြီး ထိုနေရာတွင် အပင်များ ထူထပ်စွာ ပေါက်နေသည်။

ချန်ယဲ့ မျက်မှောင် အနည်းငယ် ကြုတ်သွား၏။

"ဝေးကွာတဲ့နေရာကနေ တိုက်ခိုက်တာလို့ သံသယရှိတာလား"

"ဦးနှောက်သွေးကြောပြတ်တဲ့ လက္ခဏာမျိုး ဖြစ်စေနိုင်တဲ့ တိုက်ခိုက်နည်းမျိုး ရှိလို့လား"

"မရှိဘူး"

ကျိုးမေက ပြောသည်။

"ဝေးကွာရာကနေ တိုက်ခိုက်တယ်ဆိုတာ ပြင်ပဒဏ်ရာတွေပဲ ဖြစ်စေတာ ဦးနှောက်သွေးကြော ပြတ်တာနဲ့ ပြင်ပဒဏ်ရာ ဘာမှ မသက်ဆိုင်ဘူး... ဟုတ်တယ်မလား အစ်မချန်"

ချန်ယဲ့ စကားမပြောဘဲ နက်နဲစွာ တွေးတောနေပုံရလေသည်။

"အဲဒီနေရာကို အရင်သွားကြည့်ကြမယ်"

"အိုကေ"

လင်ရှောင်စုသည် ကမ်းပါးမြင့်အောက်သို့ ရောက်သွားပြီး ပတ်ပတ်လည်ကို သေချာ ကြည့်ရှုနေသည်။ သူသည် ဘေးဘက်မှ ကမ်းပါးကို တက်သွားပြီး အတော်လေး အားထုတ်ပြီးနောက် ကမ်းပါးထိပ်သို့ ရောက်သွား၏။

ရုတ်တရက် သူ အသက်ရှူသံလေး ထွက်ပေါ်လာပြီး... သူ့နောက်တွင် ရောက်နေသည့် ချန်ယဲ့က "ဘာတွေ့လို့လဲ" ဟု မေးလိုက်၏။

"ကြည့်"

လင်ရှောင်စုက မြေပြင်ကို ညွှန်ပြလိုက်သည်။ ချန်ယဲ့က ခြေရင်းရှိ မြက်ပင်များကို အာရုံစိုက်ကြည့်သော်လည်း ထူးခြားသည်ဟု မထင်ပေ။

"ဘာလဲ"

"ဒီမြက်ပင်တွေက လွန်ခဲ့တဲ့ လေးရက်ကပဲ အနင်းခံရပြီး ကျိုးသွားတာ" လင်ရှောင်စုက ပြောလိုက်၏။

ချန်ယဲ့၏ မျက်လုံးများ အရောင်လက်သွားသည်။ လေးရက်ခန့်က မြက်ပင် အနင်းခံထားရပြီး ဒီနေရာက လူသူအရောက်အပေါက် နည်းလှပေသည်။

"လူတစ်ယောက်လို့ သေချာလား"

"မြက်ပင်ပေါ်မှာ တိုက်ရိုက် ခြေရာမကျန်ခဲ့ပေမဲ့ သေချာကြည့်ရင် မြက်ပင်တွေ ပြားသွားပုံကို ကြည့်ပြီး လူတစ်ယောက်ရဲ့ ခြေရာကို ခန့်မှန်းလို့ ရတယ် မြက်ပင်ရိုးတံတွေ ခြောက်သွေ့နေပုံကို ကြည့်ပြီး အနင်းခံရတဲ့ အချိန်ကိုလည်း ခန့်မှန်းလို့ ရတယ်"

လင်ရှောင်စုက လက်ဖြင့် ခြေရာပုံစံကို လေထဲတွင် ဆွဲပြလိုက်လေရာ ချန်ယဲ့ ပို၍ စေ့စေ့ကြည့်လေ ခြေရာပုံစံနှင့် ပိုတူလာလေ ဖြစ်နေပေသည်။

"ဒါကို ရှင်းရှင်းလင်းလင်း မမြင်ရရင် ဒီမှာ ကြည့်ပါ ပိုစိတ်ဝင်စားဖို့ကောင်းတာ ရှိတယ်" လင်ရှောင်စု လက်ကို မြှောက်ကာ အရွက်တစ်ခုကို ညွှန်ပြလိုက်၏။ အရွက်၏ အလယ်တွင် အပေါက်ငယ်လေး တစ်ခုရှိနေပြီး အပ်နှင့် ထိုးထားသည့် အမှတ်အသား ဖြစ်ပေသည်။

ချန်ယဲ့၏ မျက်နှာအမူအရာ လုံးဝ ပြောင်းလဲသွားလေသည်။ ခြေရာနှင့် ပတ်သက်ပြီး သူမ သိပ်မသေချာသော်လည်း အရွက်ကို ဖောက်ထွက်သွားသည့် အပ်ပေါက်ကို မြင်လိုက်ရသောအခါ သူမသည် ကျွမ်းကျင်သူ ဖြစ်သည့်အတွက် ချက်ချင်း သိလိုက်၏။ သူမကိုယ်တိုင်လည်း အပ်ကို သုံးတတ်သူ ဖြစ်ပြီး သူမ၏ အမြင်တွင် ၎င်းမှာ အပ်ဖောက်ထားသည့် အမှတ်အသား ဖြစ်ကြောင်း ရှင်းလင်းနေပေသည်။ အပ်တစ်ချောင်းသည် ဤနေရာမှ ဖြတ်သွားပြီး အရွက်ကို ဖောက်ကာ ထိုင်ခုံတွင် လဲလျောင်းနေသည့် ခူထိုင်ချင်း၏ ဦးခေါင်းကို တည့်တည့်ချိန်ထားခြင်းသာ ဖြစ်ပေသည်။

"ရှင်းယွဲ့"

ချန်ယဲ့ တိုးတိုးလေး ခေါ်လိုက်သည်။

"အစ်မချန်ယဲ့ ဘာများ အမိန့်ပေးစရာ ရှိပါသလဲ"

မျက်မှန်ထဲမှ မိန်းကလေးတစ်ဦး၏ နူးညံ့သော အသံ ထွက်ပေါ်လာ၏။

"ချက်ချင်း စစ်ဆေးပေးပါ ရောဂါဗေဒဌာန အမှတ် ၃၇ မှာရှိတဲ့ အလောင်းရဲ့ ညာဘက် နဖူး ဦးရေပြားအောက်မှာ 'အပ်' ရှိမရှိ ကြည့်ပေးပါ"

"နားလည်ပါပြီ"

ဖုန်းအခြားတစ်ဖက်တွင် လျင်မြန်စွာ စစ်ဆေးမှု စတင်နေပြီး ချန်ယဲ့သည် တောင်ကုန်းပေါ်တွင် ရပ်ကာ ပြတင်းပေါက်ကို စိုက်ကြည့်နေ၏။ သူမ၏ မျက်ဝန်းများမှာ ဤအချိန်တွင် အလွန် နက်နဲနေသည်။ လင်ရှောင်စု ဤမျှ နက်နဲသော အကြည့်မျိုး တစ်ခါမျှ မတွေ့ဖူးခဲ့ပေ။ မိနစ်များ ကုန်လွန်သွား၏။

ငါးမိနစ်အကြာတွင် ချန်ယဲ့၏ မျက်မှန် အနည်းငယ် တုန်ခါသွားပြီး အသံတစ်ခု ထွက်ပေါ်လာသည်။

"အစ်မချန်ယဲ့၊ အစ်မ တကယ်ကို အံ့ဩဖို့ကောင်းတာပဲ သူ့ဦးနှောက် ညာဘက်မှာ အပ် ရှိနေတယ် အပ်က ဦးနှောက်ထဲကို တစ်လက်မနဲ့ ခုနစ်မှတ်အထိ ထိုးဝင်သွားတာ အပြင်ဘက်မှာ ဘာအမှတ် အသားမှ မကျန်ခဲ့လို့ ပထမအကြိမ် စစ်ဆေးစဉ်က လွတ်သွားတာ ဖြစ်မယ် အပ်မှာ အာရုံကြော အဆိပ်ပါနေတယ် T30 ဖြစ်တယ်"

"T30 သူ့ရဲ့ တစ်ခုတည်းသော လုပ်ဆောင်ချက်က အဲဒီနေရာမှာ သွေးတွေကို ချက်ချင်း ခဲသွားစေပြီး ပိတ်ဆို့မှု ဖြစ်စေတာပဲ" ချန်ယဲ့က ပြောသည်။

"ဟုတ်တယ် အဲဒါက သေဆုံးရတဲ့ အဓိက အကြောင်းရင်းပဲ"

ချန်ယဲ့၏ မျက်မှန်မှ အလင်းရောင်များ မှေးမှိန်သွားပြီး သူမ ဖြည်းညှင်းစွာ လှည့်လိုက်၏။ ဤအချိန်တွင် သူမသည် ညဘက်တွင် ပျံဝဲနေသော သိမ်းငှက်တစ်ကောင်ကဲ့သို့ ဖြစ်နေပြီး သူမ၏ အရှိန်အဝါမှာ အေးစက်သွားလေသည်။

"အခု ကျန်နေတာ တစ်ခုပဲ ရှိတော့တယ် ဒီသဲလွန်စတွေနဲ့ အဲဒီလူကို ရှာတွေ့နိုင်မလားဆိုတာပဲ"

လင်ရှောင်စု လှည့်ကာ ခြေရင်းရှိ ရှုပ်ပွနေသော ချုံပုတ်များကို စိုက်ကြည့်လိုက်၏။ လမ်းမကြီးကို ဖြတ်ကျော်ပြီးနောက် သူ၏ မျက်နှာတွင် အပြုံးတစ်ခု ပေါ်လာလေသည်။

"ကံကောင်းတာက သူ လမ်းမကြီးက မသွားဘဲ တောလမ်းကနေ သွားခဲ့တာပဲ..."

တောလမ်းမှ ဆင်းလာချိန်တွင် လှုပ်ရှားမှု သဲလွန်စများ ကျန်ခဲ့လေသည်။ ဤသဲလွန်စများမှာ သာမန် လူများအတွက် ဘာမှမဟုတ်သော်လည်း လင်ရှောင်စုအတွက်မူ အရွက်ထဲတွင် အပ်ပေါက်ရှာ သည်ထက် ပို၍ လွယ်ကူ၏။ တောင်ကွေ့တစ်ခုကို လွန်ပြီးနောက် ချန်ယဲ့ပင်လျှင် ရှင်းလင်းသော ခြေရာတစ်ခုကို မြင်လိုက်ရသည်။ ခြေရာမှာ ထင်ရှားနေပြီး လွန်ခဲ့သည့် လေးရက်အတွင်း မိုးမရွာခဲ့၍ ကံကောင်းလှပေသည်။ သူမ၏ မျက်မှန်သည် ထိုခြေရာကို ဖမ်းယူထားလိုက်၏။

သူတို့သည် တောင်များ၊ တောင်ကုန်းများစွာကို ဖြတ်ကျော်ပြီးနောက် ခရိုင်မြို့၏ လမ်းမကြီးပေါ်သို့ ရောက်ရှိသွားသည်။

လင်ရှောင်စု ရပ်လိုက်ပြီး မျက်မှောင်ကြုတ်လိုက်သည်။

"အခုတော့ ကံတရားပေါ်မှာပဲ မူတည်တော့မယ် ဒီနားမှာ စောင့်ကြည့်ကင်မရာတွေ ရှိလား"

သူ့အတွက် အခက်အခဲမှာ လူသတ်သမားကို ရှာဖွေရခြင်း မဟုတ်ပေ။ လူသတ်သမားမှာ အကွက်ပါသော ကုတ်အင်္ကျီကို ဝတ်ထားပြီး သူ့ပုံစံမှာ လင်ရှောင်စု၏ မှတ်ဉာဏ်ထဲတွင် အထင်အရှား ရှိနေ၏။ သို့သော် ဒါကို သိရုံနဲ့ မလုံလောက်ဘဲ ဤရုပ်ပုံကို သူမအား တရားဝင် နည်းလမ်းဖြင့် တင်ပြဖို့ လိုသည်။ ထိုနေရာတွင် စောင့်ကြည့်ကင်မရာများက အရေးပါလာလေတော့သည်။ သူ၏ စူးရှသော မျက်လုံးဖြင့် ကြည့်လိုက်ရာ ကင်မရာတစ်လုံးကို တွေ့လိုက်ရ၏။ အဲဒီကင်မရာ၏ ထောင့်မှနေ၍ အကွက်ပါ အင်္ကျီဝတ်ထားသူ ကားပေါ် တက်သွားသည်ကို မြင်နိုင်လိမ့်မည်။

သူ့မျက်လုံးက ဤမျှ ကောင်းမှန်း လူတွေ မသိစေချင်သဖြင့် သူမ၏ အကူအညီကို ယူလိုက်၏။

ချန်ယဲ့၏ မျက်မှန် အရောင်လက်လာပြီး လေထဲတွင် ဂရစ်ကွက်များ ပေါ်လာကာ အလင်းစက် သုံးခု ပေါ်လာသည်။ ၎င်းတို့မှာ ကင်မရာသုံးလုံးဖြစ်သည်။ လင်ရှောင်စု တွေ့ရှိထားသည့် ကင်မရာအပြင် အခြားနှစ်လုံးကိုပါ သူမ၏ ထူးခြားသော နည်းပညာဖြင့် ရှာတွေ့သွားသည်။

"ဗီဒီယိုဖိုင်ကို ပြန်ထုတ်ယူ အချိန်က..." ချန်ယဲ့က အမိန့်ပေးလိုက်သည်။

လေထဲရှိ ရုပ်ပုံများမှာ ချက်ချင်း ပြောင်းလဲသွားပြီး လွန်ခဲ့သော လေးရက်က ညမြင်ကွင်းကို ပြသနေသည်။

လင်ရှောင်စု အံ့ဩသွားသည်။

ဤရဲများမှာ ဗီဒီယို ပြန်ယူရင် ပိုင်ရှင်ကို ခွင့်မတောင်းဘူးလား တိုက်ရိုက် ဝင်ယူတာလား ဒါ ဟက် (Hack) တာ မဟုတ်ဘူးလား ကျိုးမေပင် အံ့ဩသွား၏။ ရဲအရာရှိတစ်ဦးအနေဖြင့် သူမ အကြိမ်ပေါင်းများစွာ ဗီဒီယို ပြန်ယူဖူးသော်လည်း လူထုကို အနှောင့်အယှက် မပေးဘဲ ဘယ်သူ့ကိုမှ မသိစေဘဲ တိတ်တဆိတ် လုပ်ဆောင်သည့် နည်းလမ်းမျိုး တစ်ခါမှ မမြင်ဖူးပေ။

ဗီဒီယိုကို ရသော်လည်း လူကို တိကျစွာ ခွဲခြားရန်မှာ နောက်ဆုံးအဆင့် လိုအပ်နေသေး၏။ ကင်မရာ၏ အကန့်အသတ်ကြောင့် အကွက်ပါ အင်္ကျီသမား တောင်ပေါ်မှ ဆင်းလာသည့်နေရာမှာ ကင်မရာ မမြင်ရသည့် နေရာဖြစ်နေသည်။ ဗီဒီယိုတွင် သူ ကားပေါ် တက်သွားသည်ကို မြင်ရသော်လည်း ဘာဆက်လုပ်မလဲ လမ်းဘေးတွင် ကားပေါ် တက်သူများ အများကြီး ရှိနိုင်သည်။ သူ တောင်ပေါ်မှ ဆင်းလာသည်ကို ကားပေါ် တက်သည်နှင့် မချိတ်ဆက်နိုင်ပါက အားလုံး အလကား ဖြစ်သွားလိမ့်မည်။

ဗီဒီယိုတွင် ထိုသူ ကားပေါ် တက်သည့်မြင်ကွင်းကို ပြသချိန်တွင် လင်ရှောင်စု အော်ပြောလိုက်၏။

"ရပ်လိုက်" ဗီဒီယို ရပ်သွား၏။

"ဒီလူရဲ့ ဖိနပ်ကို ကြည့်"

"ဖိနပ် အောက်ခြေက ပုံစံကို မရှင်းမလင်း မမြင်ရဘူး..." ဟု ချန်ယဲ့က ပြန်ဖြေသည်။

"အောက်ခြေ ပုံစံကို မြင်စရာ မလိုဘူး ဒီ Warrior ဖိနပ်ပေါ်က အမှတ်တံဆိပ်ကို ကြည့်လိုက်ရင်ပဲ ထုတ်ကုန်ရဲ့ အသေးစိတ်ကို ရှာလို့ ရတယ်"

ချန်ယဲ့၏ မျက်လုံးများ အရောင်လက်သွား၏။

"ရှာ"

ထိုစကားအမိန့်နှင့်အတူ မျက်မှန်အထက်တွင် ဖိနပ်များစွာနှင့် ချိန်ညှိလိုက်သည်။ ခဏအကြာတွင် ဖိနပ်တစ်ရံ ပေါ်လာသည် - တံဆိပ် ထုတ်လုပ်သည့်နေ့စွဲ... ထုတ်လုပ်သူ... ထုတ်ကုန်လက္ခဏာ... ဖိနပ်၏ အောက်ခြေကို လှန်ကြည့်လိုက်ရာ တောင်လမ်းတွင် သူတို့တွေ့ခဲ့ရသည့် ခြေရာနှင့် အတိအကျ တူနေလေသည်။

ကျိုးမေ အော်လိုက်သည်။

"တွေ့ပြီ"

ချန်ယဲ့၏ မျက်မှန်မှ အလင်းများ လည်ပတ်နေ၏။

"ဒီလူကို ရှာ" ချက်ချင်းပင် လောကကြီးတစ်ခုလုံး သူမရှေ့တွင် ပေါ်လာပြီး လူပုံများစွာ ရွေ့လျား သွားကာ တူညီမှု ရာခိုင်နှုန်းမှာ ၈၀%၊ ၈၅.၂%၊ ၉၆%၊ ၁၀၀% သို့ တက်သွားပြီးနောက်တွင် ၁၀၀% အစိမ်းရောင် စာသား ပေါ်လာသည်နှင့် လူတစ်ယောက် ထွက်ပေါ်လာ၏။

"ဒင်ဟိုင်ချွန်း၊ ကျား၊ ၄၈ နှစ်၊ ဒေါင်ချူပြည်နယ်၊ ဖုန်းချန်းခရိုင်၊ ဟွမ်ဂန်း သိပ္ပံနှင့် ကုန်သွယ်ရေး ကုမ္ပဏီ တည်ထောင်သူ ကုမ္ပဏီ၏ တရားဝင် ကိုယ်စားလှယ်..."

လင်ရှောင်စု ပါးစပ်အဟောင်းသား ဖြစ်သွား၏။

"အစ်မတို့ စနစ်က အရမ်း ကြောက်ဖို့ကောင်းတာပဲ မျက်နှာတစ်ခု ပေးလိုက်ရုံနဲ့ ရှာနိုင်တာလား"

"ဒီလောက်လည်း မှော်ဆန်တာ မဟုတ်ပါဘူး ဒီစနစ်ရဲ့ ထိရောက်မှုက ဒေတာဘေ့စ် ပြည့်စုံမှုအပေါ် မူတည်တယ် အဆင့်မြှင့်တင်မှု ရှစ်ကြိမ်အပြီးမှာတော့ အစိုးရဝန်ထမ်းတွေ မှတ်ပုံတင်ထားတဲ့ စီးပွားရေး လုပ်ငန်းရှင်တွေနဲ့ ရာဇဝင်ရှိသူတွေအားလုံးကို အတိအကျ ဖုံးလွှမ်းနိုင်ပါပြီ လူတိုင်းကိုတော့ အကုန် မဖုံးလွှမ်းနိုင်ပါဘူး ရထားဘူတာရုံ ဒါမှမဟုတ် လေဆိပ်ကို တစ်ခါလောက် ရောက်ဖူးရင်တော့ အချက်အလက် ရှိမှာပါ ဒါပေမဲ့ သူ ဘယ်အချိန်မှာ ဘယ်နေရာ ရောက်တယ်ဆိုတာပဲ သိရပြီး နာမည်နဲ့ နေရပ်လိပ်စာတော့ မသိနိုင်ဘူး..."

ချန်ယဲ့ ရှင်းပြနေစဉ်မှာပင် စနစ်က ဆက်လက် လုပ်ဆောင်နေ၏။ နောက်ဆုံးတွင် ရပ်သွားပြီး အနီစက်တစ်ခုက ပစ်မှတ်ရှိရာနေရာကို ညွှန်ပြလိုက်လေသည်။ သူတို့ရှိရာမှ ၁၀ မိုင်သာ ဝေးကွာသော အရပ်ပင် ဖြစ်လေတော့သည်။