အခန်း (၁) ကမ္ဘာတစ်ခုကို ကူးပြောင်းပြီးနောက် နတ်သမီးတစ်ပါး၏ အခွင့်အရေးကို ဖမ်းဆုပ်ခြင်း

"သန်းခေါင်ယံဆိုရင် ဒီကျောက်ပြားအောက်ကနေ တစ်ခုခု ထွက်လာလိမ့်မယ်"

တောင်ပေါ်မှ ဆင်းသွားစဉ် လျူလင်းဘုရားကျောင်း၏ "လက်ရှိကျောင်းထိုင် ဆရာတော်" လီလောင်အာပြောခဲ့သော စကားဖြစ်၏။

လင်ရှောင်စုကမူ ထိုစကားတစ်ခွန်းလုံးကို တစ်လုံးမှ မယုံကြည်ပေ။

သူသည် တက္ကသိုလ်ပညာတတ် ကျောင်းသားဟောင်းတစ်ဦးဖြစ်ပြီး လက်ရှိတွင် အစိုးရဝန်ထမ်း စာမေးပွဲကို ဒုတိယအကြိမ်မြောက် ဖြေဆိုရန် ပြင်ဆင်နေသူဖြစ်သည်။ ထိုသို့သောသူက ဧရာမ ကျောက်တုံးကြီးတစ်ခုအောက်မှ တစ်စုံတစ်ရာ ထွက်လာလိမ့်မည်ဟု မည်သို့ ယုံကြည်နိုင်ပါ့မည်နည်း။

သို့သော် သူ ဘာတတ်နိုင်မည်နည်း။

သူသည် လျူလင်းဘုရားကျောင်းတွင် တစ်ညတာ စောင့်ကြပ်ပေးမည်ဟု လီလောင်အာထံတွင် ကတိပေးထားမိ၏။ ဤအကြောင်းမှာ လီလောင်အာ၏ဇနီး မကျန်းမမာဖြစ်တိုင်း လင်ရှောင်စု၏ မိခင်ထံ လာရောက်ငိုယိုတတ်သော အလေ့အကျင့်ကြောင့် ဖြစ်လေသည်။ သူမငိုလျှင် ရပ်မည့်သူမဟုတ်။ လွန်ခဲ့သော နှစ်ပေါင်းနှစ်ဆယ်က လီလောင်အာသည် ရွာထဲမှ မုဆိုးမဖန်း ရေချိုးနေသည်ကို ချောင်းကြည့်ခဲ့ဖူးကြောင်းကိုပင် ယခုမှဖြစ်ပျက်နေသကဲ့သို့ တကဲကဲနှင့် ငိုယိုပြောဆို တတ်၏။

အိမ်နီးချင်းကောင်း ပီသမှုအရ ထို့ပြင် ဒုတိယအဒေါ် ဖြစ်သူကလည်း သူ့ကို အရသာရှိသော အစားအစာများ အမြဲကျွေးတတ်သည်။ ပြီးတော့ သူမ၏သမီး ဟူယားနှင့် ငယ်စဉ်ကတည်းက အတူတူ ဆော့ကစားကြီးပြင်းလာခဲ့သည့် အမှတ်တရများကြောင့် လင်ရှောင်စုတစ်ယောက် တောင်ပေါ်သို့ တက်ကာ သူ့ဦးလေးကို ခေါ်ဆောင်ပေးခဲ့ရ၏။

သို့သော် သူ ရောက်လာသည်နှင့် ပြန်၍ မရတော့ပေ။

ဦးလေးဖြစ်သူက ယနေ့သည် "နေမင်းလမ်းကြောင်း ပြောင်းလဲမည့်နေ့" ဖြစ်ကြောင်း တောင်ပေါ်မှ ထူးဆန်းသော အရာတစ်ခုခု ထွက်မလာစေရန် ကျောင်းတော်၏ "နက်နဲတံခါး"ကို တစ်ယောက် ယောက်က ထိန်းထားပေးရမည်ဖြစ်ကြောင်း ပြောပြခဲ့၏။ လင်ရှောင်က ငြင်းဆန်လိုသော်လည်း အဘိုးအို၏ ခေါင်းမာမှုကို မကျော်လွှားနိုင်ခဲ့ပေ။

ဟူယား၏ တစ်နေ့ထက်တစ်နေ့ လှပလာသော ကိုယ်ခန္ဓာကို မြင်ယောင်ရင်း လင်ရှောင်စုတစ်ယောက် စိတ်လိုက်မာန်ပါဖြင့် ရင်ဘတ်ကိုပုတ်ကာ

"ဦးလေး စိတ်မပူပါနဲ့ ကျွန်တော် ဒီကျောင်းကို စောင့်ပေးရင် အဆင်ပြေသွားမှာ မဟုတ်လား" ဟု ပြောမိလိုက်၏။

ဤကတိကြောင့် ဦးလေးဖြစ်သူသည် ဝမ်းသာအားရနှင့် အိမ်သို့ပြန်ကာ လွန်ခဲ့သော (၂၀)နှစ်က အဖြစ်အပျက်အတွက် ဇနီးသည်ကို ချော့ရန် ထွက်ခွာသွားတော့သည်။ လင်ရှောင်စုမှာမူ တောင်ထိပ်ပေါ်တွင် လေပြင်းများကြား၌ တစ်ယောက်တည်း ကျန်ရစ်ခဲ့ရတော့သည်။

ကံကောင်းသည်မှာ ဦးလေးဖြစ်သူ၌ သမီးတစ်ယောက်ရှိ၏။ လီရှောင်စု တောင်ပေါ်သို့ တက်လာပြီး မကြာခင်မှာပင် ဟူယား တောင်ပေါ်သို့ တက်လာလေသည်။ သူမသည် လင်ရှောင်စုအတွက် ညစာ လာပို့ပေးခြင်းပင် ဖြစ်ပေသည်။

ဟူယားချက်ပြုတ်သော အစားအစာများကို စားရမည်ကို လင်ရှောင်စု အမြဲတမ်း စိတ်ဒဏ်ရာ ရနေကျဖြစ်လေ၏။ အဘယ်ကြောင့်နည်း။

ဤမိန်းကလေးမှာ ထူးဆန်းသည်။ တောင်ပေါ်တွင် ယုန်လိုက်ဖမ်းသည်။ လယ်ကွင်းထဲတွင် ဖားရှာသည်။ ကျောက်တုံးကြားထဲမှ မြွေကြီးများကို အမြီးဆွဲထုတ်သည်။ တောဝက်များ၏ တင်ပါးကို တုတ်ကြီးဖြင့် ထိုးဆွကာ ဝက်မများ ကြောက်လန့်ထွက်ပြေးအောင် လုပ်တတ်၏။ ထိုအရာအားလုံးသည် သူမ၏ ဟင်းအိုးထဲသို့ ရောက်ရှိလာပြီး လင်ရှောင်စုမှာလည်း အကြိမ်ကြိမ် လှည့်စားခံရကာ စားခဲ့ရဖူးသဖြင့် ယခုအခါ စားမည်ကြံလိုက်တိုင်း အရိုးကို သေချာစစ်ဆေးရသည့် အကျင့်ဖြစ်နေ တော့သည်။

ဒီနေ့ချက်ထားသော ကြက်သားကတော့ စစ်မှန်ပုံရ၏။

သို့သော် ယခုအချိန်တွင် ဟူယားမှာ ကျောက်ပြားပေါ်တွင် ခြေကားယား လက်ကားယားနှင့် အဝတ်အစားများ ဖရိုဖရဲဖြင့် လဲလျောင်းနေသည်မှာ သင့်တော်ပါ့မလားဟု မြင်ယောင်၍ တွေးနေမိလေ တော့သည်။

မည်သူသိမည်နည်း။

လင်ရှောင်စုသည် ဖုန်းထဲက အချိန်ကို တစ်ချက်ကြည့်လိုက်၏။ သန်းခေါင်ယံမတိုင်မီ တစ်မိနစ်သာ လိုတော့သည်။ သူသည် ဖုန်းကို ပိတ်လိုက်ပြီး ကျောက်ပြားပေါ်တွင် လဲလျောင်းနေသော ဟူယားကို ကြည့်ကာ "သန်းခေါင်ကျော်သွားရင် ဦးလေးကို ပေးထားတဲ့ ကတိပြီးပြီ မြေကြီးက အေးလို့ သူ့ကို နောက်က ကုတင်ပေါ်မှာ သွားအိပ်ခိုင်းလိုက်တော့မယ်..." ဟု တွေးလိုက်၏။

သန်းခေါင်ယံ ရောက်ရှိလာပြီ

တောင်များ တုန်ခါသွားခြင်းမရှိ မြေပြင် လှုပ်ခါသွားခြင်းလည်း မရှိ ဦးလေးဖြစ်သူ ပြောသော စကားမှာ အဓိပ္ပာယ်မရှိသော ပုံပြင်သာ ဖြစ်ချေ၏။

လင်ရှောင်စုတစ်ယောက် ထိုအချက်ကို စိတ်ထဲ၌ အတည်ပြုလိုက်စဉ်မှာပင်...

မှိန်ဖျော့ဖျော့ အလင်းတန်းတစ်ခု ဖြတ်သန်းသွားလေ၏။

အလွန်အားနည်းလွန်းသဖြင့် ကောင်းကင်မှ ကြယ်တာရာတစ်ခု သို့မဟုတ် ကျောင်းထဲသို့ ပျံဝင်လာသော ပိုးစုန်းကြူးတစ်ကောင်နှင့်ပင် တူလေသည်။ ၎င်းသည် သူထိုင်နေသည့် ကျောက်ပြား အောက်မှ ထွက်ပေါ်လာခြင်းဖြစ်၏။

လင်ရှောင်စုသည် ခြေသုံးလှမ်းလှမ်းကာ အလင်းစက်တည်ရှိရာသို့ တည့်တည့်ရပ်လိုက်ပြီး ဒူးထောက် လိုက်ကာ ကျောက်တုံးအတွင်း၌ ဘာရှိသည်ကို မြင်ရစေရန် မျက်လုံးတစ်ဖက်ဖြင့် အနီးကပ် ကြည့်ရှု လိုက်၏။

ထိုအခိုက်တွင် သူသည် ကျောက်ရုပ်ကဲ့သို့ တောင့်တင်းသွားတော့သည်။

နေ့ခင်းဘက်တွင် သာမန်ကျောက်တုံးဟု ထင်ရသော်လည်း ဤအချိန်တွင်မူ ၎င်းမှာ "ကောင်းကင်ပြတင်းပေါက်" တစ်ခုကို ဖွင့်ပေးလိုက်သကဲ့သို့ ဖြစ်နေလေသည်။

"ကောင်းကင်ပြတင်းပေါက်" ထဲမှတစ်ဆင့်...

ကျောက်တုံးအတွင်း၌ အဆုံးမဲ့ ကြယ်စုများကို မြင်နေရ၏။ ထိုကြယ်စုကြားတွင် ရှေးဟောင်း ကျောက်တိုင်တစ်ခု ရှိနေသည်။ ကျောက်တိုင်ထိပ်တွင် အကိုင်းအခက်တစ်ခုသာရှိသော အပင်ခြောက် တစ်ပင်ရှိပြီး အရွက်တစ်ဒါဇင်ကျော် ဖူးပွင့်နေကာ အရွက်တစ်ခုစီတိုင်းသည် ရောင်စဉ်တန်းများ ဖြာထွက်နေပြီး အလွန်ထူးဆန်းလှပြီး စကြာဝဠာငယ်လေးတစ်ခုနှင့်ပင် တူနေလေသည်။

ကျောက်တိုင်အောက်တွင်မူ တိမ်တိုက်များ ရစ်သိုင်းနေသော ကျောက်သလင်းခေါင်းတလား တစ်ခု ရှိနေ၏။

လင်ရှောင်စု၏ အကြည့်တို့ ခေါင်းတလားပေါ်သို့ ကျရောက်သွားချိန်တွင် သူ၏ ဝိညာဉ်မှာ တုန်လှုပ်သွားရတော့သည်။ ခေါင်းတလား အတွင်း၌ လူတစ်ယောက် ရှိနေ၏။ အမျိုးသမီး အလောင်းတစ်လောင်းသည် ခေါင်းတလားထဲတွင် တည်ငြိမ်စွာ လဲလျောင်းလျှက်ရှိနေလေသည်။

လည်ပင်းအောက်ပိုင်းကို တိမ်တိုက်များဖြင့် ဖုံးအုပ်ထားသဖြင့် မျက်နှာကိုသာ မြင်ရပြီး ထိုမျက်နှာကို မြင်လိုက်ရရုံမျှဖြင့် လင်ရှောင်စုမှာ အံ့အားသင့်လွန်း၍ စကားပင် မပြောနိုင်တော့လောက်အောင် ဖြစ်သွားခဲ့ရလေသည်။

သူမ၏ အလှအပကို ဖော်ပြရန် "ငါးများရေနစ်၊ ငန်းများ ပြုတ်ကျ" (လွန်စွာလှပသော အလှ)ဟူသော စကားစုနှင့်ပင် မလုံလောက်နိုင်ပေ။

သူမသည် သေဆုံးနေပုံမပေါက်ချေ။ ကြီးမားကျယ်ပြန့်သော ကြယ်တာရာ ကောင်းကင်အောက်တွင် ငြိမ်းချမ်းစွာ အိပ်ပျော်နေသည်နှင့် တူပေသည်။ သူမ၏ အိပ်စက်နေဟန်မှာ ကမ္ဘာပေါ်ရှိ မည်သည့် ပန်းချီဆရာမျှ ပုံဖော်နိုင်စွမ်းမရှိသော အလှတရားတစ်ပါးပင် ဖြစ်လေ၏။

အချိန်မည်မျှ ကုန်လွန်သွားသည်ကို မသိလိုက်ပေ။ လင်ရှောင်စုသည် မိမိ၏ သတိအာရုံတို့ ပြောင်းလဲသွားသလို ခံစားလိုက်ရသည်။ သူသည် ငွေရောင်ငါးကလေးတစ်ကောင် ဖြစ်သွားကာ အိပ်ပျော်နေသော ထိုနတ်သမီးလေး၏ မျက်နှာပြင်ထက်တွင် ကူးခတ်ရင်း ငြိမ်သက်စွာ စောင့်ကြည့်နေမိ၏။

ရုတ်တရက် ကျောက်တိုင်ပေါ်ရှိ အရွက်တစ်ရွက်မှာ လှုပ်ရှားသွားပြီး နှင်းစက်တစ်စက်ကို ကျလာစေ၏။

ထိုနှင်းစက်သည် အရောင်အသွေးမျိုးစုံ ဖြာထွက်နေပြီး အဆုံးမဲ့ အချိန်နှင့် အာကာသကို ဖြတ်သန်း လာကာ အောက်သို့ ကျဆင်းလာ၏။ ၎င်းသည် နတ်သမီး၏ မျက်ခွံပေါ်သို့ ကျတော့မည့် ဆဲဆဲ ပင်ဖြစ်သည်။

လင်ရှောင်စုမှာ လန့်သွားပြီး အလိုအလျောက်ပင် လက်နှင့် ကာလိုက်မိလေသည်။

ထိုသို့ ကာလိုက်သည့်အချိန်တွင် အရိုးထဲထိ စိမ့်ဝင်သွားမည့် အေးစက်စက် ခံစားချက်တစ်ခုကို ရရှိလိုက်ပြီး လျှို့ဝှက်ဆန်းကြယ်သော စကားတစ်ခွန်းသည် သူ၏ "သတိအာရုံဗဟိုချက်" ထဲသို့ ဝင်ရောက်လာသည်။

"ကောင်းကင်တာအို၏ ဉာဏ်ပညာမျက်စိ အသေးငယ်ဆုံးအရာကိုပင် မြင်နိုင်စွမ်း အချိန်ကို ပြောင်းပြန်လှန်ခြင်း..."