အပိုင်း ( ၄၁ ) - ကလန်အသစ်စည်းကမ်း

အူချီဟာမျိုးနွယ်စုဝင်း။

အသစ်ပြန်လည်တည်ဆောက်ထားသော နာခါဘုရားကျောင်းအတွင်း၌ အူချီဟာ ယူဇူရုသည် မျိုးနွယ်စုခေါင်းဆောင်အဖြစ် ပထမဆုံးအကြိမ် အထက်ဆီနေရာတွင် ခန့်ညားစွာ နေရာယူထားသည်။ သူ၏အောက်တွင် စိတ်ဓာတ်ပိုင်းဆိုင်ရာ အသစ်တဖန် မွေးဖွားလာကြသည့် အူချီဟာအထက်တန်းစားနင်ဂျာများက ခိုင်မာထက်သန်သော မျက်ဝန်းများဖြင့် စီတန်းထိုင်နေကြသည်။ ၎င်းတို့ ကိုနိုဟာရွာမှ ထွက်ခွာလာခဲ့သည်မှာ လအနည်းငယ်သာ ရှိသေးသော်လည်း လူတိုင်း၏ အရှိန်အဝါက သိသိသာသာ ပြောင်းလဲနေခဲ့ပြီ ဖြစ်သည်။

"ဒီနေ့ မျိုးနွယ်စုအစည်းအဝေး ခေါ်ရတာကတော့ အားလုံးအတွက် သတင်းကောင်းတစ်ခု ပါလာလို့ပဲ"

"မကြာသေးမီက တို့မျိုးနွယ်စုရဲ့အရင်းအမြစ်အချို့ကို လဲလှယ်ပြီး လျှပ်စစ်ပုန်းရွာရဲ့ ခန္ဓာကိုယ်ကြံ့ခိုင်မှု လျှို့ဝှက်ချက်တွေနဲ့ လျှပ်စစ်စွမ်းအားအတတ်တွေကို တို့တွေ အကုန်ရရှိခဲ့တယ်"

"ဒီအတတ်ပညာတွေက တို့အူချီဟာတွေနဲ့ အလွန်တရာ ကိုက်ညီမှုရှိတာမို့ ရှေ့လျှောက် အားလုံးရဲ့ စွမ်းရည်တွေ ဒီထက်မက မြင့်မားလာလိမ့်မယ်လို့ ငါ အကြွင်းမဲ့ ယုံကြည်တယ်"

ထိုစကားကို ကြားလိုက်ရသောအခါ အူချီဟာနင်ဂျာများ၏ မျက်နှာထက်တွင် စိတ်လှုပ်ရှားမှု အရိပ်အယောင်များ အတိုင်းသား ပေါ်ထွက်လာခဲ့သည်။ လျှပ်စစ်ပုန်းရွာသို့ ရောက်ရှိလာကတည်းက ၎င်းတို့ထဲမှ အများစုသည် လျှပ်စစ်ပုန်းနင်ဂျာများနှင့် လက်ရည်စမ်း တိုက်ခိုက်ဖူးကြရာ ၎င်းတို့အား အထင်ကြီးလေးစားမိစေသည့် အရာမှာ လျှပ်စစ်ပုန်း၏ ထူးခြားလှသော ကိုယ်ခံပညာရပ်များ ဖြစ်သည်။ အကယ်၍ ထိုကိုယ်ခံပညာများကို ရှာရင်ဂန်မျက်လုံးများနှင့်သာ ပေါင်းစပ်လိုက်မည်ဆိုပါက ထွက်ပေါ်လာမည့် စွမ်းပကားသည် စိတ်ကူးကြည့်ရုံဖြင့်ပင် ရင်ခုန်စရာကောင်းလှသည်။

ထိုအချက်ကို တွေးတောမိရင်း အူချီဟာ ယာကူမီက လက်မြှောက်ကာ မေးမြန်းလိုက်သည်။ "မျိုးနွယ်စုခေါင်းဆောင် ယူဇူရု… ဒီကိုယ်ခံပညာရပ်တွေကို တို့မျိုးနွယ်စုဝင် အားလုံး လေ့ကျင့်လို့ရပါသလား"

ယူဇူရုက ပြုံးလိုက်သည်။ "ဒါပေါ့။ အခြေခံလျှို့ဝှက်ချက်တွေနဲ့ နည်းစနစ်တွေကိုတော့ ဘယ်သူမဆို လွတ်လပ်စွာ သင်ယူခွင့်ရှိတယ်။ ဒါပေမဲ့ ပိုပြီးမြင့်မားတဲ့ အဆင့်မြင့်အတတ်ပညာတွေအတွက်တော့ စည်းကမ်းချက်အနည်းငယ် ရှိလိမ့်မယ်"

"ဘယ်လို စည်းကမ်းချက်မျိုးလဲ ခင်ဗျာ"

"တို့မျိုးနွယ်စုရဲ့ လူဦးရေတိုးပွားမှုအတွက် လုံလောက်တဲ့ ပံ့ပိုးကူညီမှု ပြုလုပ်ရမယ်" ယူဇူရုက တည်ငြိမ်စွာ ဆိုလိုက်သည်။ "မင်းတို့မှာ ကလေးတစ်ယောက် ရလာတိုင်း မျိုးနွယ်စုရဲ့ အဆင့်မြင့်လျှို့ဝှက်အတတ်ပညာ တစ်ခုကို ရွေးချယ်ခွင့်ရမယ်"

"ကလေး ငါးယောက်နဲ့အထက် ရှိတဲ့ မိသားစုတွေကတော့ မျိုးနွယ်စုထဲမှာရှိတဲ့ ဘယ်လိုအတတ်ပညာကိုမဆို မိမိတို့အလိုရှိသလို လွတ်လပ်စွာ လေ့ကျင့်ခွင့်ရလိမ့်မယ်"

"ဒါ့အပြင် မျိုးနွယ်စုအနေနဲ့ မွေးဖွားလာတဲ့ ကလေးတိုင်းအတွက် ကလေးပြုစုစောင့်ရှောက်ရေး ရန်ပုံငွေတွေ ထုတ်ပေးသွားမှာဖြစ်သလို နင်ဂျာအကယ်ဒမီကနေ ဘွဲ့ရတဲ့အထိ ဆေးဝါးကုသစရိတ်နဲ့ ပညာသင်စရိတ်အားလုံးကို အခမဲ့ တာဝန်ယူပေးသွားမယ်"

"နင်ဂျာဖြစ်လာဖို့ ပါရမီမပါတဲ့ ကလေးတွေကိုတောင်မှ မိသားစုကို ကောင်းကောင်းထောက်ပံ့နိုင်မယ့် အလုပ်အကိုင်တွေ စီစဉ်ပေးသွားမှာမို့လို့ အိမ်ထောင်ရေးဝန်ထုပ်ဝန်ပိုးတွေအတွက် လုံးဝ စိုးရိမ်နေစရာမလိုဘူး"

"ပြီးတော့… အသက်နှစ်ဆယ်ပြည့်တဲ့အထိ အိမ်ထောင်မပြုဘဲ ကလေးမယူသေးတဲ့သူတွေကတော့ မျိုးနွယ်စုက ထောက်ပံ့တဲ့ ခံစားခွင့်တွေအားလုံးကို ရရှိတော့မှာ မဟုတ်ဘူး"

ရွာတွင် အခြေအနေများ တည်ငြိမ်သွားပြီဖြစ်ရာ ယခုအချိန်သည် မျိုးနွယ်စု အင်အားတောင့်တင်းစေရန်အတွက် လူဦးရေတိုးပွားရေးကို အဓိကထားရမည့် အချိန် ဖြစ်သည်။ ထိုမူဝါဒများကြောင့် အစပိုင်းတွင် လူအများက အံ့ဩသွားကြသော်လည်း သေချာတွေးတောကြည့်လေလေ ပိုမိုအကျိုးကြောင်းရှိလှသည်ဟု ခံစားလာကြရလေ ဖြစ်သည်။ ယခင်ကိုနိုဟာရွာတွင် ရှိစဉ်ကတည်းက ယူဇူရုသည် လူဦးရေတိုးပွားခြင်းဖြင့် မျိုးနွယ်စုကို အားကောင်းအောင် လုပ်ဆောင်မည်ဟု ပြောဆိုခဲ့ဖူးသည်။

"ငါ ပြောစရာရှိတာတွေကတော့ ဒါပါပဲ… အားလုံး မဲခွဲဆုံးဖြတ်ဖို့ လက်မြှောက်ပေးကြပါ"

လူတိုင်း၏ လက်မောင်းများသည် တပြိုင်နက်တည်း ရဲရဲဝံ့ဝံ့ မြင့်မားစွာ ထိုးတက်သွားခဲ့ကြသည်။ ယူဇူရုသာ မရှိခဲ့ပါက ၎င်းတို့အူချီဟာမျိုးနွယ်စုအနေဖြင့် ယခုကဲ့သို့သော သာယာဝပြောသည့် ဘဝမျိုးကို မည်သို့မျှ ပိုင်ဆိုင်နိုင်လိမ့်မည်မဟုတ်ကြောင်း အားလုံးက ကောင်းစွာ သိရှိထားကြသည်။ မျိုးနွယ်စုခေါင်းဆောင် ယူဇူရု လုပ်ဆောင်လိုသည့် အရာမှန်သမျှကို ၎င်းတို့အနေဖြင့် အကြွင်းမဲ့ ထောက်ခံကြမည်သာ ဖြစ်သည်။

ထို့ပြင် အဆင့်မြင့်နင်ဂျူဆုများနှင့် လျှို့ဝှက်အတတ်ပညာရပ်များသည် ဖြတ်တောက်၍မရနိုင်လောက်အောင် တန်ဖိုးကြီးမားလှသည်။ သာမန်နင်ဂျာတစ်ဦးအနေဖြင့် မိမိ၏ တစ်သက်တာတွင် B အဆင့်ရှိသော အတတ်ပညာတစ်ခုကို ရရှိရန် ခဲယဉ်းလှသည် မဟုတ်လား။

(နင်ဂျူဆုများ၏ အဆင့်သတ်မှတ်ချက်သည် အခြေခံအားဖြင့် လေ့ကျင့်ရန် ခက်ခဲမှုအပေါ် မူတည်သော်လည်း ဤဇာတ်လမ်းအတွင်း၌ ရှင်းလင်းလွယ်ကူစေရန်အတွက် ထိုအဆင့်များသည် အတတ်ပညာ၏ စွမ်းအားနှင့် တန်ဖိုးကိုပါ ထင်ဟပ်စေသည်။)

(ထို့ပြင် ‘စွမ်းအား’ ဟူသည်မှာ တူညီသော ထုတ်လွှတ်မှုအခြေအနေအောက်တွင် နှိုင်းယှဉ်ခြင်းသာ ဖြစ်သည်။ အစွမ်းထက်သော နင်ဂျာတစ်ဦးက ချာကရာများကို အင်တိုက်အားတိုက် ထည့်သွင်းအသုံးပြုလိုက်ပါက C အဆင့်ရှိသော အတတ်ပညာသည်ပင် လေ့ကျင့်မှုအားနည်းသောသူ၏ A အဆင့်အတတ်ပညာထက် သာလွန်သွားနိုင်သည်။)

ယခု ၎င်းတို့အနေဖြင့် ကလေးအချို့ မွေးဖွားပေးရုံမျှဖြင့် လူအများအပြား အိပ်မက်မက်နေကြရသော အရာများကို လွယ်ကူစွာ ပိုင်ဆိုင်နိုင်တော့မည် ဖြစ်သည်။ ဤကဲ့သို့သော ကမ်းလှမ်းမှုကိုသာ ပြင်ပလောကသို့ ချပြလိုက်ပါက ကမ္ဘာတစ်ခုလုံး ရူးသွပ်သွားကြလိမ့်မည်။

"ကောင်းပြီ… ဒီနေ့အတွက် အစည်းအဝေးကို ဒီမှာတင် အဆုံးသတ်မယ်။ ဒီအကြောင်းအရာတွေကို မျိုးနွယ်စုဝင်တွေကြားထဲမှာ သေချာ ပြန့်နှံ့အောင် လုပ်ဆောင်ကြပါ"

ယူဇူရုက စကားကို အဆုံးသတ်လိုက်ပြီးနောက် လှည့်ထွက်ရန် ပြင်ဆင်လိုက်သည်။ အူချီဟာ ဖူဂါကူက သူ၏နောက်သို့ အပြေးအလွှား လိုက်ပါလာခဲ့သည်။

နာခါဘုရားကျောင်းပြင်ပသို့ ရောက်ရှိလာကြပြီးနောက် ဖူဂါကူက စိုးရိမ်ပူပန်သော လေသံဖြင့် မေးမြန်းလိုက်သည်။ "ယူဇူရု… မင်း ကတိပေးခဲ့တဲ့အတိုင်း လူတွေကို ဆုလာဘ်တွေ ပေးမယ်ဆိုရင် တတိယမြောက် ရိုင်ကာဂဲ တို့ကို ပေးထားတဲ့ စီးပွားရေးလုပ်ငန်းတွေရဲ့ ဝင်ငွေနဲ့တင် ဘယ်လိုမှ ကာမိမှာ မဟုတ်ဘူး"

တတိယမြောက် ရိုင်ကာဂဲက မျိုးနွယ်စု ရပ်တည်နိုင်ရန်အတွက် ပိုင်ဆိုင်မှုအချို့ကို လွှဲပြောင်းပေးခဲ့သော်လည်း ယခု ယူဇူရု ချမှတ်လိုက်သော လူမှုထောက်ပံ့ရေးစနစ်မှာ… အလွန်တရာ အသုံးအစွဲကြီးလွန်းနေသည်ဟု သူ ခံစားနေရသည်။

ယူဇူရုက ခြေလှမ်းများကို ရပ်တန့်လိုက်ပြီး ဖူဂါကူကို စိုက်ကြည့်လိုက်သည်။ "တို့တွေ မီးလျှံပြည်နယ်ထဲမှာ ပိုင်ဆိုင်မှု အမြောက်အမြား ကျန်ရှိနေသေးတာကို မင်း မေ့သွားပြီလား။ အဲဒီပိုင်ဆိုင်မှုတွေကိုပါ ထည့်သွင်းတွက်ချက်လိုက်ရင် တို့မျိုးနွယ်စုရဲ့ လူဦးရေက ဆယ်ဆလောက် တိုးပွားလာရင်တောင် ငွေကြေးပြဿနာ ရှိလာစရာ အကြောင်းမရှိဘူး"

"အင်…" ဖူဂါကူက ဘာမျှနားမလည်ဟန်ဖြင့် သူ၏ဦးခေါင်းကို ကုတ်လိုက်မိသည်။ မီးလျှံပြည်နယ်ထဲက ပိုင်ဆိုင်မှုတွေ ဟုတ်လား။ ၎င်းတို့က ရွာကို သစ္စာဖောက်ပြီး ထွက်ခွာလာခဲ့ကြတာ မဟုတ်ဘူးလား။

"လက်ရှိ တို့တွေရဲ့ အခြေအနေအရဆိုရင် ကိုနိုဟာရွာဘက်က တို့ရဲ့ ပိုင်ဆိုင်မှုတွေကို သိမ်းပိုက်သွားလောက်ပြီ ထင်တယ်" သူက ဆိုလိုက်သည်။

"ဒါဆိုရင်လည်း သူတို့ ပြန်အန်ထုတ်လာအောင် လုပ်ရုံပေါ့"

"ဟင်… ဆာရုတိုဘီ ဟီရူဇန်က ဒါကို တကယ်ပဲ သဘောတူလိမ့်မယ်လို့ မင်း ထင်နေတာလား"

ဖူဂါကူ၏ အလွန်တရာ တည်ကြည်နေသော မျက်နှာထားကို မြင်သောအခါ ယူဇူရုက သူ၏ပခုံးကို အသာပုတ်လိုက်ရင်း စိတ်ရှည်စွာဖြင့် ရှင်းပြလိုက်သည်။ "ဖူဂါကူ… တို့တွေ ကိုနိုဟာကနေ ထွက်လာခဲ့ပေမဲ့ လက်ဗလာနဲ့ ထွက်လာခဲ့တာ မဟုတ်ဘူး။ တို့ပိုင်ဆိုင်တဲ့အရာတွေကို သိမ်းပိုက်ဖို့ ဟီရူဇန်မှာ ဘာအခွင့်အရေး ရှိလို့လဲ"

"အကယ်လို့ သူတို့ဘက်က အေးအေးဆေးဆေး ပြန်မပေးဘူးဆိုရင် တို့တွေက ပေးလာတဲ့အထိ ဆက်ပြီး ဖိအားပေးသွားရုံပဲ။ ငါ့အထင်တော့ တတိယမြောက် ရိုင်ကာဂဲအနေနဲ့ ကိုနိုဟာရွာကို ဒုက္ခပေးဖို့ အခွင့်အရေးရရင် အလွန်တရာ ပျော်ရွှင်နေလိမ့်မယ်"

ဖူဂါကူက ပါးစပ်အဟောင်းသား ဖြစ်သွားရတော့သည်။ "တို့တွေ အဲဒီလိုမျိုး လုပ်လို့ရတာလား"

ယူဇူရုက လက်တစ်ဖက်ကို မြှောက်ပြလိုက်ရင်း ဆိုသည်။ "ငါ့ဆီကနေပဲ သေချာ သင်ယူထားလိုက်စမ်းပါ"

ဗွက်တောထူထပ်လှသော လမ်းမထက်တွင် လှည်းမောင်းသမားတစ်ဦးသည် ကုန်ပစ္စည်းများ အပြည့်တင်ဆောင်ထားသော လှည်းကြီးကို မောင်းနှင်နေခဲ့သည်။ သူ၏ မျက်နှာချင်းဆိုင်တွင် ပိုးထည်ဝတ်စုံကို ဆင်မြန်းထားပြီး အနည်းငယ် ဝဖြိုးလှသော လူကြီးတစ်ဦး ထိုင်နေသည်။ ၎င်းတို့၏ ဘေးတစ်ဖက်တစ်ချက်တွင် သန်မာထွားကျိုင်းလှသော အစောင့်နှစ်ဦး ကာကွယ်လျက် လိုက်ပါလာကြသည်။

အေသည် တည်တင်းသော မျက်နှာထားဖြင့် အရှေ့ဆုံးမှ ခြေလှမ်းကျယ်ကြီးများဖြင့် လျှောက်လှမ်းနေပြီး ကေလာဘီက လက်ထဲတွင် ခဲတံနှင့် မှတ်စုစာအုပ်ငယ်တစ်ခုကို ကိုင်ဆောင်လျက် နောက်ကွယ်မှ လိုက်ပါလာခဲ့သည်။ ဘီ၏ ပခုံးထက်တွင် ဧရာမ ဂယူကီ၏ သေးငယ်လှသော ပုံတူရုပ်သွင်ကလေးက နေရာယူထားပြီး ပတ်ဝန်းကျင်ကို စူးစမ်းလိုစိတ်ဖြင့် ကြည့်ရှုနေခဲ့သည်။

ပုံစံတူ စီရီထားသော ကုန်ပစ္စည်းများ၏ အပေါ်ထက်တွင် အူချီဟာမျိုးနွယ်စု၏ ယပ်တောင်ပုံ တံဆိပ်ပါသော ဝတ်စုံကို ဆင်မြန်းထားသည့် ချောမောလှသော လူငယ်လေးတစ်ဦးက တင်ပျဉ်ခွေလျက် ထိုင်နေခဲ့သည်။

"ဒါက တကယ်ပဲ အဆင်မပြေနိုင်ဘူးလား…" ယူဇူရုက မျက်ဝန်းများကို ဖြည်းညှင်းစွာ ဖွင့်လိုက်ရင်း မျက်နှာထက်တွင် မကျေမနပ်ဖြစ်မှုများ အရိပ်ထင်ကျန်နေခဲ့သည်။

လျှပ်စစ်ပုန်းရွာနှင့် လဲလှယ်ခဲ့သော အရင်းအမြစ်များထဲတွင် လျှပ်စစ်စွမ်းအား ချာကရာအတတ်ကို လေ့ကျင့်သည့် နည်းလမ်းများလည်း ပါဝင်သည်။ သို့သော်လည်း အကြိမ်ကြိမ် ကြိုးစားခဲ့ပြီးနောက်တွင် သူသည် ၎င်းကို ကောင်းစွာ မတတ်မြောက်နိုင်သေးပေ။ သူ၏ ခန္ဓာကိုယ်သည် လျှပ်စစ်ချာကရာ စွမ်းအားစနစ်၏ ပြင်းထန်လှသော စွမ်းအင်များကို မခံနိုင်လောက်အောင် ဖြစ်နေရသည်။

ယူဇူရု၏ ရေရွတ်သံကို ကြားရသောအခါ အေက မောက်မာစွာဖြင့် နှာခေါင်းရှုံ့လိုက်သည်။ "ကောင်လေး… တို့လျှပ်စစ်ပုန်းရဲ့ လျှပ်စစ်ချာကရာ စွမ်းအားစနစ်ကို ဘယ်သူမဆို လေ့ကျင့်လို့ရတယ်လို့ မင်း ထင်နေတာလား"

"သားရဲတွေနဲ့ယှဉ်နိုင်တဲ့ ခန္ဓာကိုယ်အင်အား မရှိဘဲနဲ့ ဒါကို အတင်းအဓမ္မ လေ့ကျင့်မယ်ဆိုရင် မင်းကိုယ်မင်း အန္တရာယ်တွင်းထဲ တွန်းပို့လိုက်တာနဲ့ အတူတူပဲ"

"ငါ့အနေနဲ့ အကြံပေးရမယ်ဆိုရင်တော့ မင်းကိုယ်မင်း မဖျက်ဆီးမိခင်မှာ အခုကတည်းက လက်လျှော့လိုက်တာက ပိုကောင်းလိမ့်မယ်"

ယူဇူရုက ပြန်လည်ငြင်းခုံခြင်း မပြုခဲ့ပါ။ အေ၏ စကားများသည် နားဝင်ခါးလှသော်လည်း အမှန်တရား ဖြစ်သည်။ လက်ရှိအချိန်တွင် သူသည် ခန္ဓာကိုယ်အတွင်းမှ ဆဲလ်များကို ပိုမိုနူးညံ့သော နည်းလမ်းများဖြင့်သာ လှုံ့ဆော်ပေးနိုင်ပြီး အရှိန်အဟုန်၊ အင်အားနှင့် တုံ့ပြန်မှုစွမ်းရည်တို့ကိုသာ မြှင့်တင်နိုင်မည် ဖြစ်သည်။ လျှပ်စစ်ချာကရာ စွမ်းအားစနစ်အတွက်… သူ ဟာရှီရာမား၏ ဆဲလ်များ သို့မဟုတ် ဇက်ဆုဖြူ၏ ဆဲလ်များကို မိမိကိုယ်ကိုယ် အစားထိုး ထည့်သွင်းနိုင်မည့် အချိန်အထိ စိတ်ရှည်စွာ စောင့်ဆိုင်းရလိမ့်မည်။