အခန်း (၄၇)- လင်းယွိရှူး
ကျောင်းကားပေါ်တွင်။
ကျန်းယဲ့က ဘေးဘီဝဲယာသို့ ဝေ့ကြည့်လိုက်ရာ သူတို့အတန်းထဲမှ မဟုတ်သော ရင်းနှီးကျွမ်းဝင်မှုမရှိသည့် မျက်နှာစိမ်းအချို့ကို တွေ့လိုက်ရသည်။
"အဲဒီသုံးယောက်က ဒုတိယနှစ်ကလေ" ဟု ဘေးတွင်ထိုင်နေသော ဝမ်ဇီအန်က ရှင်းပြသည်။
ကျန်းယဲ့၏ မျက်နှာပေါ်တွင် အံ့အားသင့်သွားသော အရိပ်အယောင်များ ပေါ်လာသည်။
အထူးတန်းမှ ကျောင်းသားများသည် ဒုတိယနှစ်တွင် ကျင့်စဉ်အထွတ်အထိပ်အဆင့်သို့ ရောက်ရှိနိုင်ကြောင်းကို သူ သိထားပြီးဖြစ်သည်။
သို့သော် ယခုက ဇန်နဝါရီလပဲ ရှိသေးသည်။ ဒုတိယနှစ်၏ ပထမနှစ်ဝက်ပင် မကုန်သေးဘဲ သူတို့က အထွတ်အထိပ်အဆင့်ကို ရောက်နေကြပြီလား။
အကယ်၍ သူသာဆိုလျှင် ထိုအချိန်၌ အစပျိုးအဆင့်တွင်သာ ရှိနေဦးမည်ဖြစ်သည်။
ဝမ်ဇီအန်က လက်ပိုက်လိုက်ပြီး ပြောသည် - "အဲဒါ ဘာအံ့သြစရာ ရှိလို့လဲ။ ငါတို့နှစ်တုန်းကဆိုရင် မနှစ်က ဒီလိုအချိန်မှာတင် အထွတ်အထိပ်အဆင့်ကို ရောက်တဲ့သူ ငါးယောက်တောင် ရှိတယ်။"
"အစ်ကိုဝမ်က တကယ်မိုက်တာပဲ" ဟု ကျန်းယဲ့က ပြောလိုက်သည်။
ဤရက်ပိုင်းအတွင်း အခြားတစ်ယောက်၏ စကားပြောဟန်ကို သူ ကောင်းကောင်း နားလည်နေပြီဖြစ်သည်။
ဝမ်ဇီအန်က စကားသိပ်မပြောတတ်သော်လည်း သူ စကားပြောလိုက်တိုင်း သွယ်ဝိုက်သော ကြွားလုံးထုတ်မှုတစ်ခုက အမြဲတမ်း ပါဝင်နေတတ်သည်။
ဥပမာအားဖြင့် ယခု ဝမ်ဇီအန် ပြောလိုက်သော စကားကိုကြည့်လျှင် ထိုငါးယောက်ထဲတွင် သူလည်း သေချာပေါက် ပါဝင်နေမည်ဖြစ်သည်။
သို့မဟုတ်ပါက သူ ဤကိစ္စကို အထူးတလည် ထည့်ပြောနေမည် မဟုတ်ပေ။
ကျန်းယဲ့၏ ချီးကျူးစကားကို ကြားသောအခါ ဝမ်ဇီအန်က သက်ပြင်းချရင်း ပြောသည် - "မင်းနဲ့ စကားပြောရတာ အဆင်ပြေတယ်။ လူတွေကို အမြဲငေါက်ငန်းတတ်တဲ့ အတန်းခေါင်းဆောင် ကျောက်နဲ့တော့ တခြားစီပဲ။"
ကျန်းယဲ့က ခေါင်းခါရင်း ပြုံးလိုက်သည်။ ကျောက်ချင်းလီသည် ချမ်းသာကြွယ်ဝသူများထဲမှ တစ်ဦးဖြစ်ရာ လူတွေကို ငေါက်ငန်းရုံသာမက ကောင်းကင်နှင့် မြေကြီးကို ငေါက်လျှင်တောင် သူမအတွက် ပြဿနာရှိမည် မဟုတ်ပေ။
ဆင်းရဲသားများကသာ လူမှုဆက်ဆံရေး၏ အနုစိတ် ရှုပ်ထွေးမှုများကို ဂရုတစိုက် လေ့လာနေရခြင်းဖြစ်သည်။
သူက အဆင်သင့်ဖြစ်နေသည်နှင့် မေးလိုက်သည် - "အတန်းခေါင်းဆောင် ကျောက်က ဘယ်တုန်းကများ အထွတ်အထိပ်အဆင့်ကို ချိုးဖျက်နိုင်ခဲ့တာလဲ။"
ဝမ်ဇီအန်က ပြောသည် - "သူက ဒုတိယနှစ် ပထမနှစ်ဝက် စပြီး သိပ်မကြာခင်မှာတင် အထွတ်အထိပ်ကို ရောက်သွားတာ။"
"အဲဒီလောက်စောတာလား" ကျန်းယဲ့က အံ့သြတကြီးဖြင့် "ဒါဆို တစ်နှစ်ခွဲလောက်တောင် ရှိနေပြီကို အတန်းခေါင်းဆောင်က ပထမဆုံးအကြိမ် အတားအဆီးကို မချိုးဖျက်ရသေးဘူးလား။"
ဝမ်ဇီအန်က ရှင်းပြသည် - "သူက ကြယ်စင်ကိုယ်ခံပညာ အခြေခံတည်ဆောက်ခြင်း ကျင့်စဉ်ကို ကျင့်ကြံတာလေ။ အဲဒါကြောင့် ပထမဆုံးအကြိမ် အတားအဆီးကို ချိုးဖျက်ဖို့အတွက် ကြယ်တာရာ စင်ကြယ်ခြင်း အကြိမ်ရေ ဆယ်ကြိမ်ထက်မက လိုအပ်တယ်။"
"ဒါပေမဲ့ အခုတော့ နီးစပ်နေပါပြီ။ နောက်နှစ်ဝက်လောက်ဆိုရင် ချိုးဖျက်နိုင်လောက်မှာပါ။"
ကျန်းယဲ့ ခေါင်းညိတ်လိုက်သည်။
ကျောက်ချင်းလီက ပုံမှန်အားဖြင့် အတွင်းအားကိုသာ လေ့ကျင့်လေ့ရှိသဖြင့် သူမ မည်သည့် သန့်စင်ခြင်း ကျင့်စဉ်ကို အသုံးပြုနေသည်ကို သူ မခန့်မှန်းနိုင်ခဲ့ပေ။
"အတန်းခေါင်းဆောင်တောင်မှ အခြေခံတည်ဆောက်ခြင်း ကျင့်စဉ်ကို ရွေးချယ်ခဲ့မယ်လို့ မထင်ထားဘူး။"
ကျန်းယဲ့ သက်ပြင်းချရင်း ပြောသည် - "အဆင့်တက်ကျင့်စဉ်ကို တိုက်ရိုက်ရွေးချယ်တဲ့ ငါ့လိုလူမျိုးက တော်တော်လေး ရှားပါးမယ့်ပုံပဲ။"
ဝမ်ဇီအန်က ရယ်မောကာ ပြောသည် - "ပါရမီရှင်တွေကသာ ကြယ်စင်ကိုယ်ခံပညာ အဆင့်တက်ကျင့်စဉ်ကို ကျင့်ကြံကြတာကွ။"
"ငါ ဒီကျင့်စဉ်ကို ရွေးခဲ့တုန်းက အစပျိုးအဆင့်ရောက်ဖို့ သုံးလတောင် အချိန်ယူခဲ့ရတာ။"
သူက ကျန်းယဲ့ကို ကြည့်ကာ ဆက်ပြောသည် - "ငါထင်တာတော့ မင်း အဆင့်တက်ကျင့်စဉ် အစပျိုးအဆင့်ရောက်ဖို့ နောက်ထပ် လအနည်းငယ်လောက် စောင့်သင့်တယ်။ အခု ကြယ်တာရာ စင်ကြယ်ခြင်းမှာ ပါဝင်တာက အရမ်း နှမြောစရာကောင်းတယ်။"
ကျန်းယဲ့က ဘာမှပြန်မပြောဘဲ ပြုံးသာနေလိုက်သည်။
...
စကားစမြည်ပြောဆိုနေကြရင်းဖြင့် ကျောင်းကားသည် ခရီးဆုံးသို့ ရောက်ရှိလာခဲ့သည်။
တုံးပုံစံ အပြာရောင် အဆောက်အအုံကြီးတစ်ခု၏ အပြင်ဘက်။
ကျန်းယဲ့ ကျောင်းကားပေါ်မှ ဆင်းလိုက်သောအခါ ထိုနေရာတွင် ကျောင်းသားများစွာ စုဝေးနေကြသည်ကို တွေ့လိုက်ရသည်။
"အန်းမြို့ အမှတ် (၁) အထက်တန်းကျောင်းနဲ့ အမှတ် (၂) အထက်တန်းကျောင်း။" ကျန်းယဲ့က ရှေ့သို့ လှမ်းကြည့်လိုက်သည်။
ဤကြယ်တာရာ စင်ကြယ်ခြင်းတွင် အဓိက အထက်တန်းကျောင်းကြီး သုံးကျောင်းသာ ပါဝင်ခြင်းဖြစ်သည်။
အမှတ် (၂) အထက်တန်းကျောင်း၏ အခြေအနေမှာလည်း အမှတ် (၃) အထက်တန်းကျောင်းနည်းတူ ကျောင်းသား တစ်ရာကျော်ခန့် ရှိသည်။
သို့သော် အန်းမြို့ အမှတ် (၁) အထက်တန်းကျောင်းကမူ...
ကျောင်းသား အရေအတွက် သုံးရာကျော်ပင် ရှိနေသည်။
"အန်းမြို့ အမှတ် (၁) အထက်တန်းကျောင်းက တကယ်ကို စွမ်းအားရှင်တွေနဲ့ ပြည့်နှက်နေတာပဲ။" ကျန်းယဲ့၏ အကြည့်က ထိုကျောင်းသား သုံးရာကျော်အပေါ် ဖြတ်ပြေးသွားပြီး စိတ်ထဲမှ သက်ပြင်းချလိုက်မိသည်။
အန်းမြို့၏ အကောင်းဆုံးကျောင်းဖြစ်သော အမှတ် (၁) အထက်တန်းကျောင်း၏ ကျောင်းသားအရည်အသွေးသည် အခြားကျောင်းများထက် များစွာ သာလွန်နေသည်။
မွေးဖွားခြင်း ပါရမီရှင်များအကြားတွင်ပင် ကွာဟချက်များ ရှိနေသည်။
ဥပမာအားဖြင့် သာမန်ခန္ဓာကိုယ် A အဆင့်အလယ်အလတ် ရှိသူဆိုလျှင် အမှတ် (၃) အထက်တန်းကျောင်း တစ်ကျောင်းလုံးတွင် တစ်ယောက်မှ မရှိပေ။
သို့သော် အမှတ် (၁) အထက်တန်းကျောင်းတွင်မူ ထိုအဆင့်ရှိသူ ငါးယောက်တောင် ရှိနေသည်။
သို့သော် ကျန်းယဲ့ ပတ်ဝန်းကျင်ကို ဝေ့ကြည့်လိုက်သော်လည်း A အဆင့်အမြင့်ပိုင်း ခန္ဓာကိုယ်ရှိသည့် ကျောင်းသားတစ်ဦးတစ်ယောက်ကိုမျှ မတွေ့ရပေ။
"ငါ့ရဲ့ သာမန်ခန္ဓာကိုယ် A အဆင့်အမြင့်ပိုင်းက မွေးဖွားခြင်း ပါရမီရှင်တွေကြားမှာ အသန်မာဆုံး ခန္ဓာကိုယ်ဖွဲ့စည်းပုံများ ဖြစ်နေမလား။"
ရုတ်တရက် ထင်ကြေးပေးမှုတစ်ခု ကျန်းယဲ့၏ စိတ်ထဲတွင် ပေါ်ထွက်လာသည်။
ထိုအခိုက်အတန့်တွင် ခေါင်းကြီးကြီးနှင့် ရင်းနှီးနေသော ပုံရိပ်တစ်ခုကို သူ မြင်လိုက်ရသည်။ တစ်ချိန်က သူနှင့်အတူ လေ့ကျင့်ခဲ့ဖူးသော လင်းရွှမ်ပင် ဖြစ်သည်။
လင်းရွှမ်၏ ဘေးတွင်တော့ ခေါင်းပိုကြီးသော လူရွယ်တစ်ယောက် ရှိနေသည်။
ထိုလူတွင် ကောက်ကွေးနေသော ဆံပင်များရှိပြီး မျက်နှာတစ်ခုလုံး ဝက်ခြံများဖြင့် ပြည့်နှက်နေသည်။
ကြည့်ရတာ အလွန်အရုပ်ဆိုးလှသည်။
သူ၏ ရုပ်ရည်ကိုကြည့်ပြီး အထင်မသေးသင့်ပေ။ ပတ်ဝန်းကျင်ရှိ ကျောင်းသားများကမူ သူ့ကို ကြောက်ရွံ့လေးစားသော အကြည့်များဖြင့် ကြည့်နေကြသည်။
"အန်းမြို့ အမှတ် (၁) အထက်တန်းကျောင်းရဲ့ တစ်ကျောင်းလုံး အဆင့် ၁... လင်းယွိရှူး!"
သူ၏ဘေးမှ ဝမ်ဇီအန်ကလည်း ထိုလူကို အတော်လေး သတိထားနေဟန်ဖြင့် လှမ်းကြည့်နေသည်။
"လင်းယွိရှူး?"
ကျန်းယဲ့က ထိုအမည်ကို ကြားသောအခါ စိတ်ထဲမှ တွေးလိုက်သည် - "သူက လင်းရွှမ်ရဲ့ အစ်ကိုလား။ သူတို့တွေ ငယ်ငယ်က ဆန်းလု(Sanlu) နို့မှုန့်တွေချည်းပဲ စားပြီး ကြီးပြင်းလာခဲ့တာလားမသိဘူး။ ခေါင်းတွေက ဒီလောက်တောင် ကြီးနေရတာ။"
တစ်ချိန်တည်းမှာပင်။
လင်းရွှမ်ကလည်း သူ့ကို မြင်သွားသည်။
"ကျန်းယဲ့?"
လင်းရွှမ်က ကျန်းယဲ့ကို အံ့အားသင့်စွာ ကြည့်ရင်း စိတ်ထဲမှ ရေရွတ်လိုက်သည် - "သူက အထူးတန်းထဲ ဝင်သွားပြီလား။ တစ်ချိန်က ငါ့ကို အနိုင်ယူခဲ့တဲ့ ပြိုင်ဘက်ဆိုတော့လည်း မဆန်းပါဘူးလေ။"
"ဒါပေမဲ့ သူက မွေးရာပါ ပါရမီလေးနဲ့များ ဒီလောက်မြန်မြန် ကြယ်တာရာ စင်ကြယ်ခြင်းကို လာပါဝင်တာလား။ ဒီတစ်ခါတော့ ငါ့ရဲ့ အပြတ်အသတ် ချေမှုန်းတာကို ခံရတော့မှာပဲ။" လင်းရွှမ်က ပြုံးလိုက်သည်။
အခြားတစ်နေရာတွင်။
ခန္ဓာကိုယ်အချိုးအစား ပြေပြစ်လှသော ကျောက်ချင်းလီသည်လည်း အမှတ် (၁) အထက်တန်းကျောင်းမှ အဖွဲ့ကို အာရုံစိုက်နေသည်။
အန်းမြို့ အမှတ် (၁) အထက်တန်းကျောင်းမှ ကျောင်းသားများကသာ သူမ၏ ယှဉ်ပြိုင်လိုစိတ်ကို နှိုးဆွပေးနိုင်သည်။
သူမ၏ အတန်းဖော်များဆိုလျှင်တော့ သူမသည် သူတို့ကို ယှဉ်ပြိုင်ဖက်အဖြစ် မသတ်မှတ်တော့သည်မှာ ကြာပြီဖြစ်သည်။
"ငါ့ရဲ့ ပစ်မှတ်။" ကျောက်ချင်းလီက လင်းယွိရှူးကို ကြည့်လိုက်သည်။
သူသည် အန်းမြို့ အမှတ် (၁) အထက်တန်းကျောင်း၏ ထိပ်တန်းကျောင်းသားဖြစ်ပြီး အန်းမြို့တစ်မြို့လုံးရှိ အထက်တန်းကျောင်းသားများထဲတွင် အသန်မာဆုံးသူလည်း ဖြစ်သည်။
သူသည် သူမ အမြဲတမ်း ကျော်ဖြတ်လိုသော ပစ်မှတ်တစ်ခု ဖြစ်ခဲ့သည်။
လင်းယွိရှူးက ကျောက်ချင်းလီ၏ အကြည့်ကို သတိထားမိပုံရပြီး ဝါကြန့်နေသော သွားများကို ပေါ်အောင် ဖြီးပြုံးလိုက်သည်။
ထို့နောက်။
သူက ကျောက်ချင်းလီ၏ ဖြူဝင်းနေသော ခြေတံရှည်များကို ပေါ်တင်ကြီး စိုက်ကြည့်ကာ အရှက်အကြောက်မရှိ အကဲခတ်နေလေသည်။
"အရမ်း ရွံစရာကောင်းတာပဲ..." ကျောက်ချင်းလီက သူမ၏ လှပသော မျက်ခုံးလေးများကို တွန့်ချိုးလိုက်သည်။
လင်းယွိရှူးက အလွန်အရုပ်ဆိုးသည်။ ခေါင်းကြီးကြီး၊ ဝက်ခြံပြည့်နေသော မျက်နှာ၊ ဝါကြန့်နေသော သွားများနှင့် ကိလေသာရမ္မက်ပြည့်နှက်နေသော မျက်လုံးများကြောင့် သူ့ကို ကြည့်ရုံဖြင့် သူမကို သက်တောင့်သက်သာ မဖြစ်စေပေ။
သို့သော် လင်းယွိရှူးက ရွံစရာကောင်းနေသော်လည်း သူမ နားလည်ထားသည်မှာ။
သူ၏ ရမှတ်က ၈၄၉ မှတ်အထိ ရှိနေခြင်းဖြစ်သည်။
သူမ၏ လက်ရှိရမှတ်ထက် များစွာ မြင့်မားနေသည်။
"တစ်နေ့ကျရင် ဒီကောင်ကို ငါ့ခြေဖဝါးအောက်မှာ ပြားပြားဝပ်သွားအောင် လုပ်ပစ်မယ်။" ကျောက်ချင်းလီက စိတ်ထဲမှ သွားကြိတ်လိုက်သည်။
ဒီလောကကြီးမှာ ငွေနဲ့ဝယ်လို့မရတဲ့အရာ ဘာမှမရှိဘူးလို့ သူမ ယုံကြည်ထားသည်။
အကယ်၍ ရှိခဲ့ရင်တောင် အဲဒါက ငွေမလုံလောက်သေးလို့ပဲ ဖြစ်မည်။
...
"အစ်ကို... ဆက်မကြည့်နဲ့တော့။"
လင်းရွှမ်က သူ၏ရှေ့ရှိ ဝက်ခြံမျက်နှာနှင့် လူငယ်ကို ကြည့်ကာ သက်ပြင်းချရင်း "သူ့အဖေက စီးပွားရေးလောကက သူဌေးကြီး၊ သူ့အမေကလည်း ကြယ်တာရာ သိုင်းပညာရှင်အဆင့်ပဲ။ သူတို့က ငါတို့ လှမ်းမီနိုင်မယ့် လူတန်းစားတွေ မဟုတ်ဘူး" ဟု ပြောလိုက်သည်။
လင်းယွိရှူးက ခပ်အေးအေးပင် ပြန်ပြောသည် "ငါက မင်းလိုကောင်မျိုးလို့ ထင်နေတာလား။ ငါက အလှတရားကို သက်သက် သာယာခံစားနေရုံတင်ပါ။"
ဤရမှတ်မျိုး ရရှိရန်အတွက် သူတို့အထဲမှ မည်သူက ခိုင်မာသော သိုင်းပညာ စိတ်ဆန္ဒ မရှိဘဲ နေမည်နည်း။
အကယ်၍ အလှတရားသက်သက်က သူတို့ကို လှုပ်ခတ်သွားစေနိုင်မည်ဆိုလျှင် သူတို့အနေဖြင့် အမှတ် ၈၀၀ ကျော်အထိ ရနိုင်မည် မဟုတ်ချေ။
အဘယ်ကြောင့်ဆိုသော် ပုံရိပ်ယောင် ကြယ်တာရာကောင်းကင် စစ်ဆေးမှုသည် သိုင်းပညာ စိတ်ဆန္ဒကို အလွန်အလေးထားသောကြောင့် ဖြစ်သည်။
လင်းယွိရှူးအတွက်မူ သူက ပုံမှန်အားဖြင့် အလှတရားများကို ပို၍ကြည့်ရှုလေ့လာရုံသာဖြစ်ပြီး ၎င်းသည် သူ၏ သိုင်းပညာ စိတ်ဆန္ဒ လေ့ကျင့်မှု တစ်မျိုးပင်ဖြစ်သည်။
ယခုကဲ့သို့ ကျောက်ချင်းလီကဲ့သို့သော ထိပ်တန်းအလှပိုင်ရှင်မျိုးနှင့် ရင်ဆိုင်ရပြီး သူမ၏ အကြည့်ထဲမှ ရွံရှာမုန်းတီးမှုကို ခံစားလိုက်ရချိန်တွင်။
လင်းယွိရှူး၏ ရင်ထဲတွင် ထူးဆန်းသော သာယာမှုတစ်ခု ပေါ်ထွက်လာသည်။
သူ၏ သိုင်းပညာ စိတ်ဆန္ဒက ပိုမိုအားကောင်းလာသည်ဟု ချက်ချင်း ခံစားလိုက်ရသည်။
"ဟင်း... ဒီနေ့ အခြေအနေ အရမ်းကောင်းနေတယ်။"
လင်းယွိရှူး၏ မျက်လုံးများက စူးရှစွာ တောက်ပသွားသည် - "ဒီတစ်ကြိမ် ကြယ်တာရာ စင်ကြယ်ခြင်း အတွက်တော့ ငါ သေချာပေါက် ယုံကြည်ချက်ရှိတယ်။"
...
သိပ်မကြာမီမှာပင် အပြာရောင် တုံးပုံစံ အဆောက်အအုံကြီး ပွင့်သွားသည်။
နေရာရှိ ကျောင်းသား ငါးရာကျော်သည် အထဲသို့ တဖွဲဖွဲ ဝင်ရောက်သွားကြသည်။
"စင်ကြယ်ခြင်း ကန်?" အဆောက်အအုံထဲသို့ ရောက်သည်နှင့် ၎င်းသည် သိပ္ပံရုပ်ရှင်များထဲမှ စွမ်းအင်ကန်ကြီးတစ်ခုနှင့် တူကြောင်း ကျန်းယဲ့ တွေ့လိုက်ရသည်။
ထိုကန်ကြီးမှာ အလျားနှင့် အနံ မီတာတစ်ရာခန့်ရှိပြီး ကွင်းနှစ်ထပ် ချိတ်ဆက်ထားသော လေပေါ်ပျံဝဲနေသည့် ဖွဲ့စည်းပုံရှိသည်။
၎င်း၏ အပြင်ဘက်အလွှာကို လေခွင်းပုံစံ မူဘောင်အဖြစ် ပေါင်းစပ်ပစ္စည်းများဖြင့် ပြုလုပ်ထားပြီး မျက်နှာပြင်ပေါ်တွင် စွမ်းအင်လမ်းကြောင်း ပုံစံများကို အနုစိတ် ထွင်းထုထားသည်။
အတွင်းကွင်း ဖွဲ့စည်းပုံက စွမ်းအင်အောက်ခံခုံပေါ်တွင် မြေပြင်မှ မီတာဝက်ခန့် အထက်၌ ဆိုင်းငံ့နေပြီး ကန်တစ်ခုလုံး မြေပြင်အထက်တွင် ပျံဝဲနေသကဲ့သို့ ထင်ရသည်။
ကန်၏အထက်တွင် ဖောက်ထွင်းမြင်ရသော ဖန်အမိုးခုံးကြီးဖြင့် ဖုံးအုပ်ထားကာ ပိတ်လှောင်ထားသော နေရာတစ်ခုအဖြစ် ဖန်တီးထားသည်။
"ဝှစ်!"
ငွေရောင်နှင့် အနက်ရောင်စပ် ကိုယ်ရံချပ်ဝတ်စုံကို ဝတ်ဆင်ထားသော လူလတ်ပိုင်းအရွယ် အမျိုးသားတစ်ဦး လေထဲတွင် ရုတ်တရက် ပေါ်လာသည်။
"ကြယ်တာရာ စင်ကြယ်ခြင်းကို မကြာခင် စတင်တော့မယ်။"
"အားလုံးပဲ စင်ကြယ်ခြင်း ကန်ထဲကို ဝင်ကြတော့!"
ထိုချပ်ဝတ်စုံနှင့် အမျိုးသားက သူ၏ ကျားတစ်ကောင်အလား စူးရှသော မျက်လုံးများဖြင့် အားလုံးကို ဝေ့ကြည့်ကာ ဩရှရှအသံဖြင့် အော်ပြောလိုက်သည်။