အခန်း (၂၇) - ဒီလောက်ပဲလား။
"ဒီသိုင်းပညာ စိတ်ဆန္ဒ စစ်ဆေးမှုက သိုင်းပညာ ကောင်းကင်လှေကားရဲ့ ပထမထပ်နဲ့ အတူတူပဲ ထင်တယ်။"
"လူတွေကို စမ်းသပ်ဖို့ ပုံရိပ်ယောင်ကမ္ဘာကို သုံးထားတာပေါ့လေ။"
ကျန်းယဲ့က နှင်းဆီလို ဖြူဖွေးနေသော ခြေဖဝါးလေးများနှင့် ထိတ်ထိတ်ကြဲ လှပနေသည့် ကောင်မလေးကို ထူးဆန်းသော အကြည့်များဖြင့် ကြည့်လိုက်သည်။
သူ့ကို ဒီလိုအရာမျိုးနဲ့ စမ်းသပ်တာလား။
ဘယ်အထက်တန်းကျောင်းသားကများ ဒီလိုစမ်းသပ်မှုမျိုးကို မခံနိုင်ဘဲ နေမှာမို့လို့လဲ။
"ဒါက ပုံရိပ်ယောင်ကမ္ဘာ ဟုတ်မဟုတ် သိရအောင်တော့ စမ်းကြည့်ရဦးမှာပဲ"
ကျန်းယဲ့က ချက်ချင်းပင် ရှေ့သို့ ခြေလှမ်းလိုက်သည်။
...
တစ်ချိန်တည်းမှာပင် အခြားသော စမ်းသပ်ခံသူများကလည်း ပုံရိပ်ယောင်ကမ္ဘာထဲသို့ တဖြည်းဖြည်း ဝင်ရောက်သွားကြသည်။
ဥပမာ လီကျစ်ချောင်ဆိုလျှင်... သူက စာသင်ခန်းတစ်ခုထဲတွင် ထိုင်နေလျက်သား ရောက်နေကြောင်း တွေ့လိုက်ရသည်။
ရှေ့ရှိ ကျောက်သင်ပုန်းပေါ်တွင် ဤလအတွက် စာမေးပွဲ အဆင့်သတ်မှတ်ချက်များကို ပြသထားသည်။
အဆင့် (၁) - ကျန်းယဲ့
အဆင့် (၂) - ရွှီစစ်စစ်
အဆင့် (၃) - လီကျစ်ချောင်
"ဒီစာမေးပွဲမှာ ငါက အဆင့် (၃) အထိတောင် ကျသွားခဲ့တာလား"
လီကျစ်ချောင် တစ်ကိုယ်လုံး တုန်ယင်သွားပြီး ရှေ့ရှိ ကျောက်သင်ပုန်းကို မယုံကြည်နိုင်စွာဖြင့် စိုက်ကြည့်နေမိသည်။
"ကျန်းယဲ့ ကျော်သွားတာတင် မကဘူး။ ရွှီစစ်စစ်ကပါ ငါ့ကို ကျော်တက်သွားတယ်ပေါ့" လီကျစ်ချောင် အံကြိတ်လိုက်မိသည်။
ဆရာမစင်မြင့်ပေါ်မှ ချန်ဇီလုက အေးစက်စွာဖြင့် "လီကျစ်ချောင်က ဒီစာမေးပွဲမှာ သိသိသာသာကို နောက်ကောက်ကျသွားခဲ့ပြီဆိုတာ ရှင်းနေပါတယ်။ အထူးတန်းကို ဝင်ခွင့်ရဖို့ အခွင့်အရေး မရှိတော့ပါဘူး။ ဒီအခြေအနေကို မင်းရဲ့ မိဘတွေဆီ အကြောင်းကြားလိုက်ပါ့မယ်။ ကိုယ့်ကိုယ်ကိုယ်သာ ဂရုစိုက်ပေတော့" ဟု ပြောလိုက်သည်။
ဤစကားကို ကြားသောအခါ လီကျစ်ချောင် တစ်ကိုယ်လုံး ချမ်းစိမ့်သွားသည်။
သူက အဆင့် (၃) အထိ ကျသွားခဲ့ပြီ။
အထူးတန်းကို ဝင်ဖို့ အခွင့်အရေး မရှိတော့ဘူးတဲ့လား။
အနာဂတ်၏ မြင်ကွင်းများက လီကျစ်ချောင်၏ မျက်လုံးထဲတွင် ပေါ်လာသကဲ့သို့ ရှိသည်။
သူ၏ မိဘများ၏ မျက်လုံးထဲမှ စိတ်ပျက်မှုများ၊ လင်းရွှမ်၏ ရက်စက်သော လှောင်ပြောင်မှုများ၊ ရွယ်တူများကြားတွင် ကောင်းကင်နဂါးရပ်ကွက်၏ အရှက်ရစရာအဖြစ် သတ်မှတ်ခံရမှုများ...
"မဟုတ်ဘူး... မဟုတ်ဘူး"
လီကျစ်ချောင်က သူ၏ မျက်လုံးများထဲတွင် ကြောက်ရွံ့မှုများ ပြည့်နှက်လျက် ခေါင်းကို ရူးသွပ်စွာ ခါယမ်းနေမိသည်။
...
လင်းရွှမ်က အန်းမြို့ အမှတ် (၁) အထက်တန်းကျောင်း၏ စာသင်ခန်းထဲတွင် ထိုင်နေသည်။
ဒီနှစ်အတွက် အဆင့်သတ်မှတ်ချက်ကို သူ မယုံကြည်နိုင်စွာ ကြည့်နေမိသည်။
"ငါ့ရဲ့ အမှတ်တွေက ဒီနှစ်အတွက် ထိပ်သီး တစ်ရာစာရင်းထဲကနေတောင် ထွက်ကျသွားတာလား"
"တကယ်လို့ ငါ့ရမှတ်တွေက ဒီလိုဆက်ကျနေမယ်ဆိုရင် ငါက အထူးတန်းကနေ ကန်ထုတ်ခံရပြီး အသုံးမကျတဲ့ကောင်တွေ စုနေတဲ့ ရိုးရိုးတန်းကို ရောက်သွားနိုင်တယ်ပေါ့"
လင်းရွှမ်က အမှတ်စာရင်းကို ဒေါသတကြီး စိုက်ကြည့်နေမိသည်။ အနာဂတ်၏ မြင်ကွင်းများက သူ၏ ရှေ့မှောက်တွင် ပေါ်လာသကဲ့သို့ပင်။
လီကျစ်ချောင်၏ ရက်စက်သော ရယ်မောသံများ၊ မိဘများ၏ မျက်လုံးထဲမှ မျှော်လင့်ချက်မဲ့နေသော အကြည့်များ၊ ကောင်းကင်နဂါးရပ်ကွက်၏ အရှက်ရစရာ ကျောက်တိုင်တွင် ချိတ်ဆွဲခံရမှုများ...
"မွေးဖွားခြင်း ပါရမီ ဆိုတာကရော ဘာလုပ်လို့ရမှာလဲ။ နောက်ဆုံးတော့ ငါ့ရဲ့ အဆင့်နိမ့် ပါရမီနဲ့ ဘာမှမကွာပါဘူးလေ" လီကျစ်ချောင်က အညှာအတာကင်းမဲ့စွာ လှောင်ပြောင်နေသည်။
"မဟုတ်ဘူး... ရိုးရိုးတန်းက အသုံးမကျတဲ့ကောင်တွေနဲ့ ငါ အတူမနေချင်ဘူး" လင်းရွှမ်က သူ၏ ခေါင်းကြီးကို ဆုပ်ကိုင်ကာ နာကျင်စွာ အော်ဟစ်လိုက်သည်။
...
တစ်ချိန်တည်းမှာပင် အပြင်ဘက် ခန်းမဆောင်ထဲ၌။
ကျောင်းသားများ အားလုံး စမ်းသပ်မှုထဲသို့ ဝင်ရောက်သွားခဲ့ကြပြီ ဖြစ်သည်။
အများစုမှာ ပြင်းထန်သော ဒုက္ခကို ခံစားနေရသကဲ့သို့ နာကျင်သော အမူအရာများကို ပြသနေကြသည်။
ကြည့်ရှုရေးစင်မြင့်ပေါ်မှ ကျန်းကျန်းဝူက တိုးတိုးလေး ရယ်မောလျက် "ကျောင်းသားတွေ အားလုံး အထာကျသွားပြီ ထင်တယ်" ဟု ပြောလိုက်သည်။
"ဒီသိုင်းပညာ စိတ်ဆန္ဒ စစ်ဆေးမှုဆိုတာ အတွင်းစိတ်ထဲက အနက်ရှိုင်းဆုံး ခံစားချက်တွေကို ဆွဲထုတ်ပြီး ပုံရိပ်ယောင်အဖြစ် ပြသပေးတာပဲ။"
ထိုသို့ပြောရင်း သူက လင်းရွှမ်ရှိရာဘက်သို့ လှမ်းကြည့်လိုက်သည်။
"မထင်မှတ်ဘဲ အန်းမြို့ အမှတ် (၁) အထက်တန်းကျောင်းရဲ့ ထိပ်သီးဆယ်ယောက်စာရင်းဝင်တဲ့ ကောင်လေးမှာတောင် သူ့ကို ကြောက်ရွံ့စေတဲ့ အရာမျိုး ရှိနေတာလား"
"တကယ်ကို စိတ်ဝင်စားစရာပဲ"
အခြားဆရာများကလည်း လင်းရွှမ်ဘက်သို့ ကြည့်လိုက်ကြသည်။
လင်းရွှမ်မှာ ချွေးများ သံယိုကျနေပြီး သူ၏ မျက်နှာတွင် ကြောက်ရွံ့မှုများ အပြည့်ဖြစ်နေကာ အလွန်ကြောက်မက်ဖွယ်ကောင်းသော အရာတစ်ခုကို ဖြတ်သန်းနေရပုံပေါ်သည်။
ချန်ဇီလုကမူ အံ့ဩမသွားပေ။ "လူတိုင်းမှာ စိတ်ခံစားမှု ခုနစ်ပါးနဲ့ တပ်မက်မှုတွေ ရှိကြတာပဲလေ။ ကြောက်ရွံ့မှုဆိုတာက လူတစ်ယောက်ကို အသိဉာဏ်ကင်းမဲ့သွားစေဖို့ အလွယ်ကူဆုံးအရာပဲ"
"ဒါကြောင့် သိုင်းပညာ စိတ်ဆန္ဒ စစ်ဆေးမှုမှာ လူတိုင်းက သူတို့ရဲ့ အတွင်းစိတ်ထဲက ကြောက်ရွံ့မှုတွေကို ရင်ဆိုင်ရတာပေါ့"
ဤစကားကို ကြားသောအခါ။
ကျန်းကျန်းဝူက ခေါင်းခါရင်း ပြုံးကာ "အဲဒီလိုလည်း မဟုတ်သေးဘူး။ ဟိုဘက်ကို ကြည့်လိုက်ပါဦး" ဟု ပြောလိုက်သည်။
သူက ကျန်းယဲ့ ရှိရာဘက်သို့ လက်ညှိုးထိုးပြလိုက်သည်။
ချန်ဇီလုသည်လည်း ကျန်းယဲ့ ရှိရာဘက်သို့ ကြည့်လိုက်သည်။
သူမသည် အံ့ဩမှုဖြင့် ခဏမျှ ငြိမ်သက်သွားသည်။
ကျန်းယဲ့က ပုံရိပ်ယောင် ထိုင်ခုံပေါ်တွင် အေးအေးလူလူ အပြုံးတစ်ခုဖြင့် ထိုင်နေပြီး နာကျင်စွာ မျက်နှာရှုံ့မဲ့နေကြသော ကျောင်းသားအုပ်ကြီးကြားတွင် ထင်းထွက်နေသည်။
"ဒီကောင်လေးကတော့ အိပ်မက်လှလှလေး မက်နေတာပဲ"
ချန်ဇီလုက ပါးစပ်ကို အုပ်ကာ တိုးတိုးလေး ရယ်မောလိုက်သည်။
ဆရာတစ်ယောက်က "သိုင်းပညာ စိတ်ဆန္ဒ စစ်ဆေးမှုမှာ လူအများစုက ကြောက်စရာကောင်းတဲ့ အရာတွေကို မြင်ရတာကို သူက အိပ်မက်လှလှလေး မက်နေတယ်ပေါ့။ တော်တော် ရှားပါးတာပဲ" ဟု အာမေဍိတ်သံဖြင့် ပြောလိုက်သည်။
ကျန်းကျန်းဝူ ခေါင်းညိတ်လိုက်ပြီး "ဒါက သူ့ရင်ထဲမှာ သူ့ကို ကြောက်ရွံ့စေမယ့်အရာ ဘာမှမရှိဘူးဆိုတာကို ပြသနေတာပဲ... တကယ်ကို အဖြစ်နည်းတဲ့ ကိစ္စပဲ"
"သူ့တစ်ဘဝလုံး ကြောက်ရွံ့မှုဆိုတာကို မကြုံဖူးလို့လည်း ဖြစ်နိုင်တယ်။"
"ဒါမှမဟုတ်... သူ့ရဲ့ စရိုက်လက္ခဏာက ထူးခြားနေပြီး ဘယ်လောက်ပဲ ကြီးမားတဲ့ မုန်တိုင်းလာလာ သူ့ကို ကြောက်ရွံ့သွားအောင် လုပ်ဖို့ ခက်ခဲတယ်ဆိုတဲ့ သဘောလည်း ဖြစ်နိုင်တယ်"
အားလုံး၏ မျက်နှာအမူအရာများမှာ လေးနက်သွားကြသည်။
ပထမအချက်ကတော့ လုံးဝနီးပါး မဖြစ်နိုင်ပေ။
သို့သော် ဒုတိယအချက်ကမူ များသောအားဖြင့် ခိုင်မာအားကောင်းသော သိုင်းပညာ စိတ်ဆန္ဒ ရှိနေခြင်းကို ညွှန်ပြလေ့ရှိသည်။
သို့တိုင် ကျန်းကျန်းဝူက ခေါင်းခါလိုက်ပြီး "သာယာတဲ့ ပုံရိပ်ယောင်တွေက လူတွေကို ပိုပြီး သာယာယစ်မူးသွားစေတတ်တယ်။ ပြီးတော့ ကြောက်စရာကောင်းတဲ့ ပုံရိပ်ယောင်တွေထက်စာရင် အဲဒီထဲကနေ နိုးထလာဖို့က ပိုပြီး ခက်ခဲတယ်"
ချန်ဇီလုက ခေါင်းအနည်းငယ် ညိတ်လိုက်ပြီး သူမ၏ လှပသော မျက်လုံးများက ကျန်းယဲ့ထံသို့ အကြည့်ရောက်သွားသည်။
ကျန်းယဲ့၏ သိုင်းပညာ စိတ်ဆန္ဒကို သူမ ကောင်းကောင်း သိထားသည်။
မည်သို့ပင်ဖြစ်စေ နေ့ရက်များစွာ ကုန်လွန်သွားခဲ့ပြီဖြစ်ရာ သိုင်းပညာနှင့် ပတ်သက်၍ ကျန်းယဲ့၏ ခိုင်မာသော စိတ်ပိုင်းဖြတ်မှုနှင့် တုန်လှုပ်ချောက်ချားမှုကင်းသော စိတ်ဆန္ဒကို သူမ သတိပြုမိခဲ့ပြီး ဖြစ်သည်။
ထိုကဲ့သို့သော လူများသည် များသောအားဖြင့် ခိုင်မာအားကောင်းသော သိုင်းပညာ စိတ်ဆန္ဒ ရှိတတ်ကြသည်။
"သူက အိပ်မက်လှလှလေး မက်နေတယ်ပေါ့လေ။ သူ နိုးထလာနိုင်ပါ့မလား" ချန်ဇီလုက ကျန်းယဲ့ကို တောက်ပသော မျက်လုံးများဖြင့် စိုက်ကြည့်နေမိသည်။
သူမ ထိုသို့ တွေးလိုက်ချိန်မှာပင်။
"ဒင်"
ရုတ်တရက် ခန်းမဆောင်ထဲတွင် အချက်ပေးသံတစ်ခု ထွက်ပေါ်လာသည်။
"တစ်ယောက်ယောက်က ပထမစမ်းသပ်မှုကို ပြီးမြောက်သွားပြီဟေ့"
"ဘာ။ ဘယ်လိုလုပ် ဖြစ်နိုင်မှာလဲ။ တစ်မိနစ်တောင် မပြည့်သေးဘူးလေ"
"ဘယ်သူလဲ"
ထိုနေရာရှိ ဆရာများအားလုံး ရှေ့ရှိ ဖန်သားပြင်ကြီးဆီသို့ လှမ်းကြည့်လိုက်ကြသည်။
ဖန်သားပြင်ပေါ်တွင် စမ်းသပ်ခံသူ ၁၀၀ ၏ အမှတ်စာရင်းများကို ပြသထားသည်။
ပထမစမ်းသပ်မှုအတွက် စုစုပေါင်းရမှတ်က အမှတ် ၃၀၀၊ ဒုတိယစမ်းသပ်မှုက အမှတ် ၂၀၀ နှင့် တတိယစမ်းသပ်မှုက အမှတ် ၅၀၀ ဖြစ်ပြီး စုစုပေါင်း ရမှတ် ၁၀၀၀ ဖြစ်သည်။
စမ်းသပ်မှုက ယခုမှ စတင်ထားခြင်း ဖြစ်သောကြောင့်။
လူတိုင်းနီးပါး၏ ရမှတ်များမှာ သုညမှတ်သာ ရှိနေသေးသည်။
ချန်ဇီလုက အလျင်အမြန် ဝေ့ကြည့်လိုက်ရာ သူမ၏ တောက်ပသော မျက်လုံးလေးများက ရုတ်တရက် အရောင်လက်သွားသည်။
"ကျန်းယဲ့ ပါ" သူမက ချိုသာသော အသံဖြင့် ပြောလိုက်သည်။
ကျန်းကျန်းဝူလည်း စူးစိုက်ကြည့်လိုက်သည်။
[ကျန်းယဲ့ - အမှတ် ၃၀၀]
ပထမစမ်းသပ်မှုမှာ ကျန်းယဲ့ အမှတ်ပြည့် ရသွားခဲ့တယ်ပေါ့။
သူက ပုံရိပ်ယောင်ကမ္ဘာကို ပထမဆုံး ချိုးဖျက်နိုင်ခဲ့ပြီး သိုင်းပညာ စိတ်ဆန္ဒ စစ်ဆေးမှုကို ပထမဆုံး ပြီးမြောက်ခဲ့သူလည်း ဖြစ်သည်။
"ဒီကောင်လေး... ပထမစမ်းသပ်မှုကို တစ်မိနစ်တောင် မပြည့်ခင်မှာ ပြီးသွားခဲ့တာလား"
ကျန်းကျန်းဝူက အချိန်ကို တစ်ချက် ကြည့်လိုက်ပြီးနောက် သူ၏ မျက်နှာပေါ်တွင် အံ့ဩမှုများ ပေါ်လာသည်။
တကယ်တမ်းတွင် ဤစမ်းသပ်မှုကို သုံးမိနစ်အတွင်း အောင်မြင်ပါက အမှတ်ပြည့် ရရှိမည်ဖြစ်သည်။
တစ်မိနစ်အတွင်း ပြီးသွားခဲ့တယ်ပေါ့။
၎င်းက ကျန်းယဲ့၏ သိုင်းပညာ စိတ်ဆန္ဒမှာ စမ်းသပ်မှု၏ စံသတ်မှတ်ချက်ထက်ပင် ပိုမို အားကောင်းနေပြီ ဖြစ်ကြောင်း ညွှန်ပြနေသည်။
"ဒီကျောင်းသားမှာ တကယ်ကို အားကောင်းလှတဲ့ သိုင်းပညာ စိတ်ဆန္ဒ ရှိတာပဲ"
"အိပ်မက်လှလှလေးထဲကနေတောင် ဒီလောက် မြန်မြန် နိုးထလာနိုင်တာလား"
"ဒီလောက် ခိုင်မာတဲ့ သိုင်းပညာ စိတ်ဆန္ဒမျိုးနဲ့ဆိုရင် သူသာ အဆင့်နိမ့် ပါရမီရှင် မဟုတ်ခဲ့ဘူးဆိုရင် ထိပ်တန်းပါရမီရှင်တစ်ယောက် ဖြစ်လာဖို့ သေချာနေတာပဲ"
ဆရာများစွာက သက်ပြင်းချလိုက်ကြသည်။
အဝေးမှ စင်မြင့်ပေါ်တွင် ဝမ်ဇီအန်၏ မျက်လုံးများထဲ၌ အရောင်တစ်ခု လက်သွားသည်။
"အတန်း (၉) က တကယ့်ကို ထူးခြားတဲ့ လူတစ်ယောက် ထွက်လာခဲ့တာပဲ" ဝမ်ဇီအန်က လက်နောက်ပိုက်ကာ ခေါင်းအနည်းငယ် ညိတ်လိုက်ပြီး "ငါ အရင်တုန်းက ပုံစံမျိုးနဲ့ တော်တော်လေး တူတာပဲ" ဟု ရေရွတ်လိုက်သည်။
.....
ကြည့်ရှုရေး စင်မြင့်ထက်တွင်။
ချန်ဇီလုက ကျန်းကျန်းဝူကို ချိုသာစွာ ပြုံးပြရင်း "ဆရာကျန်း... အခုရော ကျန်းယဲ့ ထိပ်သီးသုံးယောက်ထဲ ဝင်ဖို့ အခွင့်အရေး ဘယ်လောက်ရှိတယ်လို့ ထင်လဲ" ဟု မေးလိုက်သည်။
ကျန်းကျန်းဝူက သူမကို ဘာမှမတတ်နိုင်စွာဖြင့် ကြည့်လိုက်သည်။
ဒီကောင်မလေးက သူ အရှက်ကွဲမယ့်အချိန်ကို စောင့်နေခဲ့တာပဲ။
သို့သော် အတန်းတာဝန်ခံ တစ်ယောက်အနေဖြင့် သူက တည်ငြိမ်နေပြီး သူ၏ အကဲဖြတ်မှုအပေါ် အလွန်ယုံကြည်မှု ရှိနေသည်။
ကျန်းကျန်းဝူက ခေါင်းခါရင်း "စမ်းသပ်မှုက အခုမှ စရုံပဲ ရှိသေးတယ်။ ပြောဖို့ စောပါသေးတယ်" ဟု ပြောလိုက်သည်။
"ဒုတိယ စမ်းသပ်မှုက စပြီးတော့မှ တကယ့် စွမ်းဆောင်ရည် အစစ်အမှန်တွေကို စစ်ဆေးတော့မှာ"
ချန်ဇီလုက ခေါင်းညိတ်လိုက်ပြီး ထပ်မပြောတော့ဘဲ ခန်းမဆောင်ဘက်သို့ လှည့်ကြည့်လိုက်သည်။
ကျန်းကျန်းဝူ ပြောခဲ့သည့်အတိုင်းပင်။
ဒုတိယ စမ်းသပ်မှုမှ စတင်ကာ သိုင်းပညာ ခွန်အားကို စစ်ဆေးမည်ဖြစ်ရာ ယင်းမှာ ကျန်ရွှယ်ချင်းနှင့် ရွှီလဲ့တို့နှင့် ယှဉ်လျှင် ကျန်းယဲ့ အားနည်းသော အချက်ပင် ဖြစ်သည်။
သူမ ကိုယ်တိုင်ပင်လျှင် ရလဒ်ကို အသေအချာ မပြောနိုင်သေးပေ။
...
ပုံရိပ်ယောင်ကမ္ဘာထဲတွင်။
ကျန်းယဲ့က ပတ်ဝန်းကျင်ရှိ မြင်ကွင်းများ တဖြည်းဖြည်း ပျောက်ကွယ်သွားသည်ကို ကြည့်ရင်း ပထမစမ်းသပ်မှုကို သူ အောင်မြင်သွားပြီဖြစ်ကြောင်း သိလိုက်သည်။
"ဒီလောက်ပဲလား"
ကျန်းယဲ့က နှင်းဆီလို ဖြူဖွေးနေသော ခြေဖဝါးများနှင့် ကောင်မလေး၏ ပုံရိပ်ကို အမှတ်ရသွားပြီး ခေါင်းခါယမ်းကာ "သိုင်းပညာ ကောင်းကင်လှေကားထဲက ပုံရိပ်ယောင်လောက်တောင် အသက်မဝင်ပါလား" ဟု ရေရွတ်လိုက်လေသည်။