အခန်း (၁၆) - အရိပ်လူမျိုးနွယ်

[ခန္ဓာကိုယ်ဖွဲ့စည်းပုံ - သာမန်ခန္ဓာကိုယ် (B အဆင့်)]

[ပါရမီ - မွေးဖွားခြင်း ပါရမီ]

ကျန်းယဲ့သည် ကျောက်ချင်းလီ၏ ခေါင်းပေါ်ကို ကြည့်ကာ စိတ်ထဲမှ တွေးလိုက်သည်။ "ငါ့လိုပဲ သူမမှာလည်း B အဆင့် ခန္ဓာကိုယ်ဖွဲ့စည်းပုံ ရှိတယ်။ ပြီးတော့ သူကလည်း ဒုတိယနှစ် ကျောင်းသူပဲ။ ဒါပေမဲ့ သူမရဲ့ စုစုပေါင်း ရမှတ်က ၇၀၀ အထိတောင် ရောက်နေပြီ။"

သူမ၏ လက်ရှိရမှတ်က ၇၀၀ ဖြစ်သော်လည်း ကောလိပ်ဝင်ခွင့် စာမေးပွဲတွင်လည်း ဤရမှတ်အတိုင်း ဖြစ်မည်ဟု မဆိုလိုပေ။

ကောလိပ်ဝင်ခွင့် စာမေးပွဲမတိုင်မီ အချိန်တစ်နှစ်အပြည့် ကျန်ရှိနေသေးသည်။

နောက်နှစ်တွင် ကျောက်ချင်းလီသည် ဤရမှတ်ထက် များစွာ သာလွန်သွားမည်မှာ အသေအချာပင်။

"လောလောဆယ်တော့ ငါနဲ့ ဒီမွေးဖွားခြင်း ပါရမီရှင်တွေကြားထဲမှာ ကြီးမားတဲ့ ကွာဟချက်တစ်ခု ရှိနေသေးတယ်။"

ကျန်းယဲ့ သက်ပြင်းချလိုက်သော်လည်း သူ၏ စိတ်ကမူ အလွန် တည်ငြိမ်နေသည်။

ရှေ့ဆက်ရမည့် ခရီးက ရှည်လျားသေးရာ တစ်နေ့ကျလျှင် သူ လိုက်မီသွားရမည်!

သေချာသည်မှာ ထိုမွေးဖွားခြင်း ပါရမီရှင်များကို ကျော်လွန်သွားနိုင်လျှင်တောင်မှ ၎င်းက အစသာရှိသေးကြောင်းကိုလည်း သူ ကောင်းကောင်း သိထားသည်။

ဤခေတ်ကြီးတွင် ပါရမီရှင်များမှာ မြစ်ကိုဖြတ်ကူးနေသော ငါးများကဲ့သို့ ပေါများလှသည်။

စာပေဘာသာရပ် ဆရာမ ပြောခဲ့သလိုပင်။

ပါရမီကို အဆင့်လေးဆင့် ခွဲခြားထားသည်။ မွေးရာပါ၊ မွေးဖွားခြင်း၊ တာအိုအရိုး နှင့် ထူးကဲ ပါရမီ တို့ဖြစ်သည်။

မွေးဖွားခြင်း ပါရမီရှင်များထဲမှ ထူးချွန်သူများသည် တတိယနှစ်တွင် ပထမဆုံးအကြိမ် အတားအဆီးကို ချိုးဖျက်နိုင်ပြီး ကြယ်တာရာ သိုင်းသခင်များ ဖြစ်လာနိုင်ကြသည်။

တာအိုအရိုး ပါရမီရှင်များအတွက်မူ တတိယနှစ်တွင် ကြယ်တာရာ သိုင်းသခင် ဖြစ်လာခြင်းမှာ အခြေခံအဆင့်မျှသာ ဖြစ်ပြီး ကောလိပ်ဝင်ခွင့်စာမေးပွဲ မတိုင်မီ ဒုတိယအကြိမ် အတားအဆီးကို ချိုးဖျက်ခြင်းကလည်း ခက်ခဲသည်ဟု မယူဆကြပေ။

သို့သော် ဤသို့ဖြစ်နေလျှင်ပင် သူတို့ကို တကယ့် ပါရမီရှင်များဟု မသတ်မှတ်ကြသေးပေ။

တကယ့် ပါရမီရှင်ဆိုသည်မှာ အဘယ်နည်း။

အသက်ဆယ်နှစ်အရွယ်မှစတင်၍ ကျင့်ကြံကာ ဆယ့်နှစ်နှစ်တွင် ပထမဆုံးအကြိမ် အတားအဆီးကို ချိုးဖျက်ပြီး ဆယ့်ငါးနှစ်တွင် ဒုတိယအကြိမ် ချိုးဖျက်ကာ အသက်ဆယ့်ရှစ်နှစ် ပြည့်ချိန်တွင် တတိယအကြိမ် အတားအဆီးကို ချိုးဖျက်နိုင်သူများပင် ဖြစ်သည်။

ဤသည်မှာ ထူးကဲ ပါရမီပင်!

ကမ္ဘာကြီး၏ အချစ်တော်စစ်စစ်များလည်း ဖြစ်ကြသည်။

သာမန်လူများသည် အသက်ဆယ့်ငါးနှစ်မှသာ စတင်ကျင့်ကြံနိုင်သော်လည်း ဤကဲ့သို့ မွေးရာပါ ထူးကဲစွမ်းရည်ရှိသူများကမူ ငါးနှစ်စော၍ စတင်နိုင်ကြရာ သာမန်လူများနှင့် နှိုင်းယှဉ်၍မရနိုင်လောက်အောင် သာလွန်နေခြင်းမှာ သဘာဝပင် ဖြစ်သည်။

သို့သော် ဤကဲ့သို့သော ပါရမီရှင်များကပင် အစွမ်းအထက်ဆုံး မဟုတ်သေးချေ။ ၎င်းတို့ထက် ပိုမိုစွမ်းအားကြီးသော ပါရမီရှင်များ ရှိသေးသည်ဟု ဆိုကြသော်လည်း ထိုအဆင့်မှာ အန်းမြို့နှင့် အလှမ်းဝေးလွန်းလှသည်။

ကိုယ်ခံပညာ၏ နယ်ပယ်မှာ အဆုံးအစမရှိပေ။

ပါရမီရှင်များသည် ကြယ်တာရာများကဲ့သို့ တောက်ပနေကြသည်။

"တစ်နေ့ကျရင် ငါလည်း အဲဒီအဆင့်ကို ရောက်နိုင်လောက်မှာပါ။"

ဘဝနှစ်ခု ဖြတ်သန်းခဲ့ရသော်လည်း ကျန်းယဲ့၏ သွေးများက ပူနွေးနေဆဲဖြစ်ပြီး မျှော်လင့်ချက်များဖြင့် ပြည့်နှက်နေသည်။

ထိုအချိန်တွင် အတန်း (၉) မှ ကျောင်းသားအုပ်စုသည် စက်လုံးပုံစံ အဆောက်အအုံထဲသို့ ဝင်ရောက်သွားကြပြီဖြစ်သည်။

သူတို့၏ရှေ့မှောက်တွင် ကြီးမားကျယ်ပြန့်သော သတ္တုခန်းမကြီးတစ်ခု ရှိနေသည်။

ခန်းမ၏ အလယ်ဗဟိုတွင် သတ္တုခုံတန်းများ ရှိနေပြီး ခုံတစ်ခုစီတွင် ငွေရောင်သတ္တုခမောက် တစ်လုံးစီ တင်ထားသည်။

ခန်းမ၏ အရှေ့ဘက်တွင်မူ တစ်ကျောင်းလုံး၏ အဆင့်သတ်မှတ်ချက်များကို ပြသထားသော ဧရာမ ဖန်သားပြင်ကြီးတစ်ခု ရှိနေသည်။

[ပထမနေရာ - ကျောက်ချင်းလီ (၇၁၀ မှတ်)]

[ဒုတိယနေရာ - လင်းမြောင်မြောင် (၆၅၂ မှတ်)]

[တတိယနေရာ - ဝမ်ဇီအန်...]

ထိပ်ဆုံးအဆင့် တစ်ရာနီးပါးလုံးမှာ အထူးတန်းမှ ကျောင်းသားများဖြင့်သာ ပြည့်နှက်နေသည်။

တစ်ခါတစ်ရံမှသာ ရိုးရိုးတန်းမှ ကျောင်းသားအနည်းငယ် ဝင်ရောက်လာနိုင်ပြီး များသောအားဖြင့် အောက်ခြေအဆင့်များတွင်သာ ဖြစ်သည်။

"ထူးဆန်းတယ်။ အထူးတန်းမှာ A အဆင့်အနိမ့်ပိုင်း ခန္ဓာကိုယ်ဖွဲ့စည်းပုံရှိတဲ့ ကျောင်းသားတွေ ပါနေတာကို ပထမနေရာက ဘာလို့ ကျောက်ချင်းလီလို B အဆင့် ခန္ဓာကိုယ်ဖွဲ့စည်းပုံရှိတဲ့သူ ဖြစ်နေရတာလဲ။"

ကျန်းယဲ့သည် သူ့ပတ်ဝန်းကျင်ရှိ အထူးတန်းမှ ကျောင်းသားများကို ကြည့်ရင်း နားမလည်နိုင်အောင် ဖြစ်သွားမိသည်။

ယုတ္တိတန်တန် တွေးကြည့်ရလျှင် A အဆင့် ခန္ဓာကိုယ်ဖွဲ့စည်းပုံသည် B အဆင့်ထက် များစွာ သာလွန်သည်။

သို့သော် သူ သိထားသလောက် ကျောက်ချင်းလီ၏ နာမည်သည် ပထမနှစ်ကတည်းက ပထမနေရာတွင် ခိုင်ခိုင်မာမာ ရပ်တည်နေခဲ့ခြင်း ဖြစ်သည်။

"သူမရဲ့ ပါရမီကြောင့်လား၊ ဒါမှမဟုတ် တခြား အကြောင်းရင်းတွေ ရှိနေလို့လား။" ကျန်းယဲ့ စဉ်းစားခန်း ဝင်နေမိသည်။

သူ တွေးတောနေစဉ်မှာပင် အတန်း (၉) စစ်ဆေးမှု စတင်ရန် အချိန်ကျရောက်လာပြီ ဖြစ်သည်။

...

"အခု နံပါတ်စစဉ်ကြမယ်!"

ဆရာကျန်းကျန်းဝူသည် အတန်း (၉) ၏ အရှေ့ဆုံးတွင် ရပ်ကာ အကျယ်ကြီး ပြောလိုက်သည်။

လူတိုင်း ချက်ချင်းပင် စိတ်လှုပ်ရှား တက်ကြွသွားကြသည်။

သူတို့ ဤနေရာသို့ ရောက်လာခြင်းမှာ ပထမဆုံးအကြိမ် မဟုတ်ပေ။ တစ်ခါတစ်ရံ ပုံမှန်စာသင်ချိန်များတွင်လည်း ဤကဲ့သို့ ကြုံတွေ့ရလေ့ရှိသည်။

ပုံရိပ်ယောင် ကြယ်တာရာကောင်းကင် လက်တွေ့အကဲဖြတ်စစ်ဆေးမှုတွင် တစ်အုပ်စုလျှင် ငါးယောက် ပါဝင်ဖွဲ့စည်းရသည်။

စစ်ဆေးမှု၏ အကြောင်းအရာမှာ ပုံရိပ်ယောင်ကမ္ဘာအတွင်း 'အရိပ်လူမျိုးနွယ်' ကို အဖွဲ့လိုက် တိုက်ခိုက်ရခြင်း ဖြစ်သည်။

ဤစစ်ဆေးမှု၏ အမှတ်ပေးစနစ်မှာ သတ်ဖြတ်နိုင်ခဲ့သော 'အရိပ်လူမျိုးနွယ်' အရေအတွက်နှင့် အဖွဲ့၏ ထိခိုက်ကျဆုံးမှုအပေါ် အခြေခံထားသည်။

အဖွဲ့ဖွဲ့စည်းခြင်းကို ကျပန်းလုပ်ဆောင်ခြင်း မဟုတ်ဘဲ အဖွဲ့တိုင်း၏ စွမ်းဆောင်ရည် တူညီမျှတမှုရှိစေရန် ကျောင်း၏ စနစ်က နံပါတ်စဉ်ပေးမည် ဖြစ်သည်။

သေချာသည်မှာ ဤနံပါတ်စဉ်ပေးခြင်းကို အတန်းတစ်တန်းချင်းစီအလိုက် လုပ်ဆောင်ခြင်း ဖြစ်သည်။

ထို့ကြောင့် အထူးတန်းမှ ကျောင်းသားများ၏ ပျမ်းမျှအရည်အသွေးက ပိုမိုကောင်းမွန်သဖြင့် ဤစစ်ဆေးမှုတွင် သူတို့က ရမှတ်ပိုရကြမည်မှာ သေချာလှသည်။

"ကျန်းယဲ့၊ ရှာချင်း၊ ထောင်ရှောင်ကန်း၊ ဟယ်ဟွား၊ လီရွှမ်။"

သူ၏ အဖွဲ့ကို ကြားလိုက်ရသောအခါ ကျန်းယဲ့ အနည်းငယ် အံ့အားသင့်သွားသည်။

ရှာချင်း၊ သူ့ကို မကြာခဏ ရေသန့်ဗူး လာပေးတတ်သော ကောင်မလေး။

ကျန်သုံးယောက်ကမူ သူ့ထက် အဆင့်နိမ့်သော ကျောင်းသားများဖြစ်ပြီး သူနှင့် သိပ်မရင်းနှီးကြပေ။

သို့သော် ယခုအချိန်တွင် ထိုသုံးယောက်မှာ ကျန်းယဲ့အနီးသို့ အမြန်လာစုကြသည်။

"အစ်ကိုကျန်း.. ကျုပ်တို့ကို ကယ်တင်ပါဦးဗျာ!"

"ဟုတ်တယ် အစ်ကိုကျန်း၊ ကျုပ်တို့ထဲမှာ အစ်ကိုက အစွမ်းအထက်ဆုံးပဲဆိုတော့ အစ်ကို ဦးဆောင်တာကိုပဲ မှီခိုရတော့မှာပါ။"

ကျန်းယဲ့ အနည်းငယ် ပြုံးလိုက်ပြီး "ဒါက အဖွဲ့လိုက် လုပ်ဆောင်ရတာလေ။ လူတိုင်းက အရေးကြီးပါတယ်။ အားလုံး အတူတူ ကြိုးစားကြတာပေါ့။"

"ဟုတ်ကဲ့.. အားလုံး အတူတူ ကြိုးစားကြတာပေါ့။"

အဖွဲ့သားများက ပြိုင်တူ ဖြေလိုက်ကြသည်။ အတန်းထဲတွင် အဆင့် (၂) ရထားသော ကျန်းယဲ့ကို သူတို့က အလိုအလျောက် နာခံနေကြခြင်း ဖြစ်သည်။

ကျန်းယဲ့သည် သူ့ကို ခိုးကြည့်နေသော ရှာချင်းကို တစ်ချက်ကြည့်လိုက်ပြီး ရုတ်တရက် "ရှာချင်း.. ဝင်ဝင်ချင်း မိစ္ဆာတွေ အသတ်ခံရတာမျိုး မဖြစ်အောင် သတိထားနော်။" ဟု ပြောလိုက်သည်။

"ရှင်?" ရှာချင်း ခဏတာ မှင်သက်သွားပြီးနောက် သူမ၏ မျက်နှာလေး အနည်းငယ် နီရဲသွားကာ အလျင်အမြန် ခေါင်းညိတ်လိုက်သည်။ "ကျွန်မ သတိထားပါ့မယ်။"

ထိုမြင်ကွင်းကို မြင်လိုက်သော ထောင်ရှောင်ကန်းက ချက်ချင်းပင် "အစ်ကိုကျန်း.. စိတ်မပူပါနဲ့။ ရှာချင်းက ကျုပ်တို့အဖွဲ့ထဲမှာ တစ်ယောက်တည်းသော မိန်းကလေးဆိုတော့ သူ့ကို ကျုပ်တို့ သေချာပေါက် ကာကွယ်ပေးမှာပါ။" ဟု ပြောလိုက်သည်။

ကျန်းယဲ့ ခေါင်းညိတ်လိုက်ပြီး ဘာမှ ထပ်မပြောတော့ချေ။

အဖွဲ့ထဲတွင် မိန်းကလေးတစ်ယောက် ပါဝင်နေခြင်းက သူ့ကို တိုက်ခိုက်မှုအမြန်နှုန်း ၃၅ ရာခိုင်နှုန်း တိုးလာစေမည့်အပြင် ၅၀ ရာခိုင်နှုန်း ပိုမိုထိခိုက်ဒဏ်ရာရစေနိုင်သည့် အခွင့်အရေးကိုပါ ရရှိစေမည်ဖြစ်ရာ သူ သေချာပေါက် ရှာချင်းကို ကာကွယ်ပေးရမည် ဖြစ်သည်။

"ဒီစွမ်းရည်ကို အားကိုးပြီး ပထမနေရာကိုများ ရနိုင်မလား မသိဘူး။"

ကျန်းယဲ့သည် အဝေးတွင်ရှိသော လီကျစ်ချောင်ကို တိတ်တဆိတ် လှမ်းကြည့်လိုက်သည်။

ပထမနေရာအတွက် ယွမ် သုံးသောင်းတန် ဆင်းရဲနွမ်းပါး ပညာသင်ဆု ပါဝင်လာမည်ဖြစ်ရာ သူ အလွန် မက်မောနေမိသည်။

...

အဖွဲ့ခွဲဝေခြင်းများ ပြီးဆုံးသွားသည်။

လီကျစ်ချောင်သည် တည်ငြိမ်နေဆဲဖြစ်ပြီး သူ၏ ပထမနေရာကို ထိန်းထားနိုင်မည်ဟု ယုံကြည်မှု ရှိနေဆဲဖြစ်သည်။

အခြားတစ်ဖက်တွင် ရွှီစစ်စစ်သည် သူမ၏ လက်သီးများကို ဆုပ်ထားပြီး သူမ၏ ဗာဒံစေ့ပုံစံ မျက်ဝန်းများထဲတွင် ခိုင်မာသော စိတ်ပိုင်းဖြတ်မှုများ လက်ကနဲ ပေါ်လာသည်။

"ဒီစစ်ဆေးမှုမှာ အမြန်နှုန်းက ငါ့ရဲ့ အားသာချက်ပဲ။ ဒုတိယနေရာကို ပြန်လုယူနိုင်မလား ဆိုတာက ဒီတစ်ကြိမ်အပေါ်မှာပဲ မူတည်တော့တယ်။" ရွှီစစ်စစ် စိတ်ထဲမှ တွေးလိုက်သည်။

ထိုစဉ် ဆရာကျန်းကျန်းဝူက "အဖွဲ့တိုင်း ကိုယ့်ခုံနေရာကို အစဉ်လိုက် သွားကြပါ။ ပြီးရင် ပုံရိပ်ယောင် ကြယ်တာရာကောင်းကင် စစ်ဆေးမှုကို စတင်ကြမယ်!" ဟု ပြောလိုက်သည်။

လူတိုင်း စတင်ရွေ့လျားသွားကြသည်။

ကျန်းယဲ့ သူ၏ ခုံနေရာသို့ လျှောက်သွားလိုက်ပြီး ငွေရောင်သတ္တုခမောက်ကို ဆောင်းလိုက်သည်။

"ဦးနှောက်အာရုံကြော ချိတ်ဆက်ကိရိယာ" ဟုလည်း ခေါ်သော ပုံရိပ်ယောင်ခမောက်သည် နျူထရီနိုများမှတစ်ဆင့် ဦးနှောက်လှိုင်းများနှင့် ဆက်သွယ်ကာ လူများကို ချက်ချင်းပင် အိပ်ပျော်သွားသကဲ့သို့သော အခြေအနေသို့ ရောက်ရှိသွားစေနိုင်သည်။

ခမောက်ကို ဆောင်းလိုက်သည်နှင့် တစ်ပြိုင်နက်..

ကျန်းယဲ့၏ အသိစိတ်မှာ နစ်မြုပ်သွားလေသည်။

နောက်တစ်ခဏတွင် သူသည် ပုံရိပ်ယောင်မြို့တော်တစ်ခု၏ ထောင့်တစ်နေရာသို့ ရောက်ရှိနေကြောင်း တွေ့လိုက်ရသည်။

ကျန်းယဲ့နှင့်အတူ ရှာချင်း၊ ထောင်ရှောင်ကန်းနှင့် အခြားနှစ်ယောက်လည်း ရှိနေသည်။

လမင်းက မြင့်မားစွာ သာယာနေပြီး လေပြင်းများ တိုက်ခတ်နေသည်။

လမ်းမီးတိုင်များက ဝါကြန့်ကြန့် လင်းလက်နေသည်။

"အရမ်း အစစ်နဲ့ တူတာပဲ..."

ကျန်းယဲ့ ပတ်ဝန်းကျင်ကို ဝေ့ဝဲကြည့်လိုက်ပြီး အရင်က ရောက်ဖူးခဲ့သော်လည်း အံ့သြချီးကျူးစိတ်ကို မထိန်းနိုင်သေးချေ။

ပုံရိပ်ယောင် ကြယ်တာရာကောင်းကင်သည် အပြင်လက်တွေ့ကမ္ဘာနှင့် တစ်ပုံစံတည်း ဖန်တီးထားနိုင်ပြီး နာကျင်မှု ခံစားချက်များကိုပင် အပြည့်အဝ ပြန်လည် ဖန်တီးပေးနိုင်သည်။

တစ်နည်းအားဖြင့် ပြောရလျှင် ဤနေရာတွင် ရရှိသော မည်သည့် ထိခိုက်ဒဏ်ရာမဆို တိုက်ခိုက်ရေးစွမ်းရည်ကို ချက်ချင်း ထိခိုက်စေမည် ဖြစ်သည်။

"ဝှစ်!"

ထိုအချိန်မှာပင် သူတို့ရှေ့ရှိ အရိပ်ကျနေသော နေရာတစ်ခုအတွင်းမှ..

အရည်နှင့်တူသော မည်းမှောင်နေသည့် ပုံရိပ်တစ်ခုသည် အရိပ်များထဲမှနေ၍ တဖြည်းဖြည်း ရုပ်လုံးပေါ်လာလေသည်။

အရိပ် ရုပ်လုံးပေါ်လာသည်နှင့် တစ်ပြိုင်နက် အရိုးကွဲမတတ် အေးစက်လှသော လေပြင်းတစ်ခု ရုတ်တရက် တိုက်ခတ်လာသည်။

"အရိပ်လူမျိုးနွယ် - မွေးကင်းစခန္ဓာကိုယ်!"

ကျန်းယဲ့၏ မျက်ဝန်းများ စူးရှသွားပြီး "တိုက်ခိုက်ဖို့ ပြင်ထားကြ!" ဟု အော်လိုက်သည်။

အခြားလေးယောက်၏ မျက်နှာများမှာ တင်းမာသွားကြသည်။

အရိပ်လူမျိုးနွယ်သည် အလွန်အမင်း စွမ်းအားကြီးမားလှသည်။

မွေးကင်းစခန္ဓာကိုယ်တစ်ခုမှာ တစ်မီတာခွဲမှ နှစ်မီတာကြား အရပ်အမောင်းရှိပြီး လူငယ်ခန္ဓာကိုယ်မှာမူ သုံးမီတာကျော်အထိ မြင့်မားနိုင်သည်။

လူငယ်ခန္ဓာကိုယ်နှင့် ရင်ဆိုင်ရလျှင် ကိုင်တွယ်နိုင်ရန် အနည်းဆုံး ပထမဆုံးအကြိမ် အတားအဆီးကို ချိုးဖျက်ထားသော သိုင်းသခင်အဆင့် လိုအပ်ပေသည်။

ယခု သူတို့ရှေ့မှောက်ရှိ မွေးကင်းစခန္ဓာကိုယ်မှာ တစ်မီတာခွဲခန့်သာ ရှိပြီး ၎င်း၏ မျိုးနွယ်ထဲတွင် အားအနည်းဆုံး ဖြစ်သော်လည်း ၎င်းကို ကိုင်တွယ်ရန် လူငါးယောက်၏ ခွန်အားကို လိုအပ်ဆဲဖြစ်သည်။

"ရှီး!"

အနက်ရောင် အရိပ်ကြီးသည် သွေးပျက်ဖွယ် အသံကြီး ပြုလုပ်ကာ သူတို့ဆီသို့ ရုတ်တရက် ခုန်အုပ်လာသည်။

သို့သော် ကျန်းယဲ့တို့ အားကုန်ထုတ်၍ ရင်ဆိုင်ရန် ပြင်လိုက်ချိန်တွင်ပင် အရိပ်ကြီးသည် လျှို့ဝှက်ဆန်းကြယ်စွာ ပျောက်ကွယ်သွားလေသည်။

ထောင်ရှောင်ကန်းတို့တစ်တွေ ခဏတာ မှင်သက်သွားကြသည်။

ကျန်းယဲ့က "ကျောဘက်ကို သတိထား!" ဟု အော်လိုက်သည်။

အရိပ်လူမျိုးနွယ်များသည် အရိပ်များကို ပူးကပ်ဝင်ရောက်ရသည်ကို နှစ်သက်ကြသည်။

တိုက်ခိုက်နေစဉ်အတွင်း မိမိ၏ အရိပ်တည်ရှိရာနေရာကို အမြဲတမ်း သတိထားရန် ဆရာမချန်ဇီလုက ထပ်တလဲလဲ အလေးအနက်ထား သင်ကြားပေးခဲ့သည်ကို ကျန်းယဲ့ သတိရလိုက်သည်။

တိုက်ပွဲစတင်ချိန်တွင် သူ၏ အရိပ်က သူ၏ အနောက်ဘက်၌ ရှိနေကြောင်း ကျန်းယဲ့ သတိပြုမိခဲ့သည်။

သူ ရုတ်တရက် နောက်လှည့်ကြည့်လိုက်သည်။

ထိုနေရာတွင် ပါးစပ်ကြီးဟကာ သူ့ဆီသို့ တည့်တည့် ခုန်အုပ်လာသော အရိပ်ကြီး ရှိနေလေသည်။

တိုက်ခိုက်မှုအမြန်နှုန်း ၃၅ ရာခိုင်နှုန်း တိုးလာခြင်း!

လယ်သမား၏ လက်သီးသုံးချက်!

ဘန်း၊ ဘန်း၊ ဘန်း——