​အခန်း (၄၁) စက္ကန့်ပိုင်းအလို ကပ်လျက်အောင်ပွဲ

​ချိုးမင်းရွှမ်းသည် ဆုဟွေရှန်၏ မိတ်ကပ်ကို ပြန်လည်ပြင်ဆင်ပေးနေရင်း... 

"ဒီနေ့တော့ ဆုဘင်းတစ်ယောက် ကံဆိုးမိုးမှောင်ကျသွားပြီ ထင်တယ်ဟေ့။ သူမစီးသွားတဲ့ကားက ကွေ့ကောက်လွန်းတဲ့ တောင်ပတ်လမ်းပေါ်မှာ ပျက်သွားလို့... အခု အဲ့ဒီမှာတင် သောင်တင်နေပြီတဲ့" 

ဟု ခပ်ရွှတ်ရွှတ် ဆိုလိုက်၏။

​ဆုဟွေရှန်က စိတ်မကောင်းဖြစ်ရဟန်ဖြင့် ခေါင်းကို ဝေ့ဝဲခါယမ်းလိုက်ရင်း... 

"ဆုဘင်းက အမြဲတမ်း ကံမကောင်းတတ်ပါဘူး။ ဒါပေမဲ့ ဒီနေ့လို နေ့မျိုးမှာတောင် ကံကြမ္မာက သူမဘက်မှာ မရှိဘူး ဖြစ်နေလိမ့်မယ်လို့ ငါလည်း မထင်ထားမိဘူး"

​"ကဲပါအေ... တကယ်လို့ သူမရဲ့ ကားသာ မပျက်ခဲ့ရင်တောင်မှ သေချာပေါက် ပွဲကျမှာပဲ။ ဒုတိယအဆင့် စည်းမျဉ်းအရ ပြိုင်ပွဲဝင်အားလုံးက ဝတ်စုံနက်ကိုပဲ ဝတ်ဆင်ရမယ်လေ။ ပြီးတော့ နောက်ကွယ်က အဝတ်လဲခန်းထဲမှာပဲ လဲလှယ်ခွင့် ရှိတာ။ အခု အဝတ်လဲခန်းကလည်း ပိတ်သွားပြီဆိုတော့... သူမ ဘယ်လိုမှ အမှီလာနိုင်တော့မှာ မဟုတ်ဘူး"

 ချိုးမင်းရွှမ်းက အထာကျကျ ပြုံးရင်း ဆိုလိုက်သည်။

​"ငါ ပွဲထဲဝင်ရမယ့် အချိန်ရောက်ပြီ။ အပြင်မှာပဲ ငါ့ရဲ့ သတင်းကောင်းကို စောင့်နေလိုက်တော့" 

ဆုဟွေရှန်သည် သူမ၏ အဝတ်အစားများကို သပ်သပ်ရပ်ရပ် ဖြစ်အောင် ပြင်ဆင်လိုက်ပြီးနောက်... လူတွေ့စစ်ဆေးမည့် အင်တာဗျူးအခန်းဆီသို့ လျှောက်လှမ်းဝင်ရောက်သွားခဲ့တော့၏။

​ယခုတစ်ကြိမ် အဆင့်မှာမူ ပထမအဆင့် လူရွေးပွဲနှင့် လုံးဝ ကွဲပြားခြားနားလှပေသည်။ ယခုတစ်ခေါက်တွင်... ရွေးချယ်ခံထားရသော မော်ဒယ်လ် (၁၉) ဦးလုံးသည် အင်တာဗျူးအခန်းတွင်းသို့ တစ်ပြိုင်နက်တည်း အတူတူ ဝင်ရောက်ကြရခြင်း ဖြစ်၏။

​ဒိုင်လူကြီးများမှာလည်း ပြီးခဲ့သည့်အကြိမ်ထက် ပိုမို၍ စည်းကမ်းတင်းကျပ်ကာ တရားမျှတမှု ရှိလှပေသည်။ ၎င်းတို့သည် အမှတ်များကိုလည်း ပွဲချင်းပြီး ချက်ချင်း ပေးကြသဖြင့်... ပြိုင်ပွဲဝင်အားလုံးက တစ်ဦးနှင့်တစ်ဦး၏ အမှတ်များကို အထင်အရှား မြင်တွေ့နေရသည်။

​အင်တာဗျူး ပြီးဆုံးသွားသည့် အခါတွင်မူ... ဆုဟွေရှန်သည် မော်ဒယ်လ် (၁၉) ဦးအနက် ပဉ္စမမြောက် နေရာတွင် ကပ်လျက် ရပ်တည်နိုင်ခဲ့၏

​ဤပြိုင်ပွဲကြီးတွင် S နိုင်ငံမှ မော်ဒယ်လ် (၅) ဦးကိုသာ အပြီးသတ် ရွေးချယ်သွားမည် ဖြစ်သည်။

​ထို့ကြောင့် မည်သည့် မတော်တဆမှုမျှ ထပ်မံမရှိတော့လျှင်... ဆုဟွေရှန်သည် ဤပွဲကို ကပ်သီးကပ်သတ်ဖြင့် အောင်မြင်သွားတော့မည် ဖြစ်ပေသည်။

​သူမ၏ နှုတ်ခမ်းအစုံထက်တွင် အောင်နိုင်သူတစ်ဦး၏ အပြုံးကြီးက ပေါ်ထွက်လာခဲ့၏။ သူမအနေဖြင့် မိမိကိုယ်ကိုယ် သေချာပေါက် အောင်မြင်တော့မည်ဟု ယုံကြည်မှု အပြည့်ရှိနေခဲ့ပြီ ဖြစ်သည်။

​တကယ်လို့ ဆုဘင်းတစ်ယောက် ဤပွဲသို့ ရောက်ရှိလာခဲ့လျှင်ပင်... သူမကို သေချာပေါက် အနိုင်ယူနိုင်လိမ့်မည် မဟုတ်ပါချေ။

​ဒါပေမဲ့... အခုတော့ ဆုဘင်းက ပွဲကိုပင် ရောက်မလာနိုင်တော့ပါဘူး။

​"ဂုဏ်ယူပါတယ် ဟွေရှန်ရေ။" ချိုးမင်းရွှမ်းက မျက်နှာထက်တွင် တောက်ပလှသော အပြုံးကြီးဖြင့် အော်ဟစ်ကာ ကြိုဆိုလိုက်သည်... "နင် နောက်ဆုံးတော့ လိုချင်တဲ့အရာကို ရရှိသွားခဲ့ပြီနော်။"

​"လာမယ့် ရက်တွေမှာ... ငါ့ရဲ့ အလုပ်အချိန်ဇယား တွေကို သေသေချာချာလေး စီစဉ်ပေးဖို့ နင့်ကို လိုအပ်လိမ့်မယ်။"

​"သေချာပေါက်ပေါ့အေ။ အိုရီဆာ  ရဲ့ ဖက်ရှင်ရှိုးကြီးမှာ ပါဝင်ခွင့်ရပြီးတာနဲ့... နင့်ဆီကို လာမယ့် အနုပညာလှုပ်ရှားမှုတွေက ရေတွက်လို့တောင် ကုန်မှာ မဟုတ်ဘူး။ အချိန်ဇယားတွေလည်း အပြည့် ဖြစ်နေတော့မှာ။ နင်ကတော့ S နိုင်ငံရဲ့ အသစ်စက်စက် စူပါမော်ဒယ်လ်ကြီး ဖြစ်လာတော့မှာပဲ။" ချိုးမင်းရွှမ်း၏ မျက်ဝန်းများမှာ စိတ်လှုပ်ရှားမှုကြောင့် အရောင်တောက်နေခဲ့ရသည်

​အဘယ်ကြောင့်ဆိုသော် ဆုဟွေရှန်၏ အောင်မြင်မှု တိုင်းက... သူမအတွက်လည်း လစာငွေ အမြောက်အမြား တိုးပွားလာခြင်းကို ဆိုလိုသောကြောင့် ဖြစ်၏။

​ထိုအချိန်တွင်... ရွှေဝါရောင်ဆံပင်နှင့် ပြာလွင်သော မျက်ဝန်းများ ရှိကြသည့် နိုင်ငံခြားသား ဒိုင်လူကြီးအချို့က... စာရင်းထဲက နောက်ဆုံးအမည်ကို စိုက်ကြည့်လိုက်ရင်း... 

"နံပါတ် (၂၀) ဆုဘင်း... မင်းရဲ့ အလှည့် ရောက်ပါပြီ။" 

ဟု လှမ်း၍ အော်ဟစ်လိုက်ကြသည်။

​သို့သော်ငြားလည်း... မည်သူတစ်ဦးတစ်ယောက်မျှ ရှေ့သို့ တိုးထွက်လာခြင်း မရှိသကဲ့သို့၊ ပြန်လည် ထူးခြင်းလည်း မရှိပါချေ။

​ကျန်ရှိနေသော မော်ဒယ်လ်များသည် တစ်ဦးကိုတစ်ဦး အကြည့်ချင်း ဖလှယ်လိုက်ကြရင်း... ဆုဘင်းတစ်ယောက် ဘယ်နေရာမှာ သောင်တင်နေပါလိမ့်ဟု ပတ်ဝန်းကျင်ကို ဝေ့ဝဲရှာဖွေကြည့်မိကြသည်။ ခုနက ပွဲအတွက် ပြင်ဆင်နေကြစဉ်တုန်းကပင် သူမ၏ အရိပ်အယောင်ကို မည်သူမျှ သတိမထားမိခဲ့ကြသည် မဟုတ်ပါလား။

​‘မဖြစ်နိုင်တာ။ ဘယ်သူကများ ဒီလိုမျိုး အခွင့်အရေးကောင်းကြီးကို ဒီအတိုင်း အလဟဿ အဆုံးရှုံးခံလိုက်မှာလဲ’

​ဒုတိယအဆင့် ပြိုင်ပွဲအထိ တက်လှမ်းခွင့်ရရှိခြင်းက မော်ဒယ်လ်တိုင်း၏ အိမ်မက် ဖြစ်ပေသည်။ အဘယ်ကြောင့်ဆိုသော် ဤအခွင့်အရေးကြီးကို မိမိရရ ဆုပ်ကိုင်နိုင်မည့် မော်ဒယ်လ်သည်... သူမ၏ လူမှုပတ်ဝန်းကျင် အဆင့်အတန်းကို မြှင့်တင်နိုင်မည့်အပြင် မိမိ၏ ကံကြမ္မာကိုပါ တစ်ဆတ်တည်း ပြောင်းလဲပစ်နိုင်သောကြောင့် ဖြစ်၏

​"ဆုဘင်း... ရှိနေလားဗျာ။ ဒီပြိုင်ပွဲရဲ့ စည်းမျဉ်းအရ... ခင်ဗျားအနေနဲ့ ဒီနေရာကို ရောက်လာဖို့အတွက် အချိန် (၁) မိနစ်ပဲ ကျန်ပါတော့တယ်။ အကယ်၍ အချိန်မီ ရောက်မလာဘူးဆိုရင်တော့... ကျွန်တော်တို့အနေဖြင့် ခင်ဗျားရဲ့ ပြိုင်ပွဲဝင်ခွင့်ကို ပယ်ဖျက်ရပါလိမ့်မယ်" 

ဒိုင်လူကြီးတစ်ဦးက လုပ်ထုံးလုပ်နည်းများအရ သတိပေး စကားဆိုလိုက်သည်။

​သို့သော်လည်း... မည်သည့် တုံ့ပြန်မှုမျှ ရှိမနေခဲ့ဆဲ ဖြစ်၏။

​ဒိုင်လူကြီးများသည်လည်း ၎င်းတို့၏ ပစ္စည်းများကို စတင်သိမ်းဆည်းလိုက်ကြပြီ ဖြစ်သည်။ ၎င်းတို့အနေဖြင့် ပြိုင်ပွဲဝင် (၁၉) ဦးလုံးကို အသည်းအသန် အင်တာဗူး စစ်ဆေးခဲ့ရသဖြင့် လွန်စွာမှပင် ပင်ပန်းနေခဲ့ကြပြီ ဖြစ်၏။

​၎င်းတို့အနေဖြင့် စည်းကမ်းကိုပင် သေသေချာချာ မလိုက်နာနိုင်သော မော်ဒယ်လ်တစ်ယောက်အတွက် အချိန်ကုန်ခံကာ စောင့်ဆိုင်းနေရန် မလိုအပ်ပါချေ။ ဤကဲ့သို့သော မော်ဒယ်လ်မျိုးသည် အခွင့်အရေးအသစ်များနှင့် မထိုက်တန်ဟု ယူဆရပေမည်။ ကြည့်ရသရွေ့တော့... ဆုဘင်းတစ်ယောက် တကယ်ပဲ အမှီမလာနိုင်တော့ပုံ ရပေသည်

​ရရှိထားသော အမှတ်များပေါ် မူတည်၍ မော်ဒယ်လ် (၅) ဦးကို မကြာမီ ရွေးချယ်တော့မည် ဖြစ်ပြီး... ၎င်းတို့သည် အိုရီဆာ နိုင်ငံတကာ ဖက်ရှင်ရှိုး စင်မြင့်ထက်သို့ တက်လှမ်းကြရတော့မည် ဖြစ်၏။

​ကျန်ရှိနေသော မော်ဒယ်လ်များမှာလည်း အခုဆိုလျှင် စိတ်အေးလက်အေး ဖြစ်သွားကြပြီ ဖြစ်သည်။ ရလာဒ်များက ထွက်ပေါ်လုနီးပါး ဖြစ်နေပြီဖြစ်ရာ... ၎င်းတို့အနေဖြင့် ဆက်လက်၍ ရင်ခုန်စိတ်လှုပ်ရှားနေရန် မလိုအပ်တော့ပါချေ။

​ဒီနေ့ပွဲကို ရောက်မလာနိုင်ခဲ့သော ဆုဘင်းကတော့... သူမ၏ ပေါ့ဆမှုအတွက် ရလာဒ်ဆိုးကို ကိုယ်တိုင်ပဲ ခံယူရပေလိမ့်မည်။

​အချိန်များ တရွေ့ရွေ့ ကုန်ဆုံးလာသည်နှင့်အမျှ... ဆုဟွေရှန်၏ မျက်နှာထက်တွင်မူ နှမြောတသဖြစ်ရဟန် အရိပ်အယောင်များက တဖြည်းဖြည်း ပေါ်ထွက်လာခဲ့သည်။ သို့သော်လည်း သူမ၏ ရင်ထဲ၌မူ... ကျန်ရှိနေသော အချိန်များကို တစ်စက္ကန့်ချင်းစီ ပျော်ရွှင်စွာ ရေတွက်နေမိ၏

 ‘တစ်ဆယ်... ကိုး... ရှစ်... ခုနစ်...’

​သူမ နောက်ဆုံး စက္ကန့် (၃) စက္ကန့်အလိုသို့ အရောက်တွင်မူ... အင်တာဗူး အခန်း၏ တံခါးကြီးသည် ဝုန်းခနဲ မြည်သံနှင့်အတူ ရုတ်တရက် ပွင့်အာသွားခဲ့တော့သည်။ ထို့နောက်တွင်မူ... လွန်စွာမှပင် လှပကျော့ရှင်းပြီး စတိုင်ကျလှသော ဆိုင်ကယ်အလန်းစားကြီး တစ်စီးက လူတိုင်း၏ ရှေ့မှောက်သို့ ရုတ်တရက် ဆိုက်ရောက် ပေါ်ထွက်လာခဲ့လေတော့၏။

​၎င်းဆိုင်ကယ်ကြီးပေါ်တွင် စီးနင်းလိုက်ပါလာသူမှာမူ... ကိုယ်ကျပ် ဝတ်စုံနက်ပြိုင်ကွင်းဝတ်စုံ  ကို ဆင်မြန်းထားပြီး... လွန်စွာမှပင် ရဲရင့်ပြတ်သားကာ ကျော့ရှင်းလှပလွန်းလှသော မိန်းမပျိုလေး ဆုဘင်း ဖြစ်နေခဲ့ပေတော့သည်