အပိုင်း - (၃၉):  လေကျင့်ရေးဆရာတစ်ဦး၏ အဆင့်ငါးဆင့်

နောက်တစ်နေ့နံနက်ခင်းတွင် ဖန်ယွမ်သည် ဦးလေးရှန်ကို ရှာဖွေကာ အီဗီလေး၏ အမြန်နှုန်းလေ့ကျင့်ရေးမှ ရရှိလာသော တိုးတက်မှုအသစ်ဖြစ်သည့် 'အရိပ်ကိုယ်ပွား' စွမ်းရည်ကို ဂုဏ်ယူဝင့်ကြွားစွာ ထုတ်ပြလိုက်သည်။ မနေ့က ဦးလေးရှန်တစ်ယောက် ကလပ်တွင်မရှိသဖြင့် ဖန်ယွမ်နှင့် အီဗီလေးတို့မှာ ကြွားဝါချင်သော်လည်း ကြွားစရာလူမရှိဘဲ အောင့်အီးထားခဲ့ရသော်လည်း ယနေ့တွင်မူ ထိုသို့မဟုတ်တော့ပေ။

"မင်းတို့ အရိပ်ကိုယ်ပွားကိုပါ တတ်မြောက်သွားပြီ ဟုတ်လား..."

ဦးလေးရှန်က အံ့ဩတကြီး ရေရွတ်လိုက်ပြီးမှ "သဲပက်ခြင်း၊ အလျင်စလိုတိုက်ခိုက်ခြင်း၊ အရိပ်ကိုယ်ပွားနဲ့ ကိုက်ခဲခြင်း... ဒါဆိုရင်တော့ မင်းတို့ သုံးနိုင်တဲ့ နည်းဗျူဟာတွေ တော်တော်လေး စုံလင်သွားပြီပဲ" ဟု ချီးကျူးလိုက်သည်။

"ဟုတ်ပဗျာ... ဒီလိုဆိုရင်တော့ 'ဖီးနစ်ဘုရင်လေးဖလား' မှာ ရလဒ်ကောင်းဖို့ သေချာသလောက် ရှိသွားပြီ" ဟု ဖန်ယွမ်က ကျေနပ်အားရစွာ ဆိုသည်။

သို့သော်လည်း... အီဗီလေးကမူ ထိုသို့မတွေးမိပေ။

ပြီးခဲ့သည့်အကြိမ်က ဖန်ယွမ်တစ်ယောက် "သေချာပြီ" ဟု ပြောပြီးနောက် ဘာဖြစ်ခဲ့သနည်း။ သူတို့နှစ်ယောက်စလုံး 'ဘစ်ဂျောက်' ကြီး၏ အတင်းလိုက်လံတိုက်ခိုက်ခြင်းကို ခံခဲ့ရသည်မဟုတ်ပါလား။ ဖန်ယွမ်တစ်ယောက် ပါးစပ်သရမ်းကာ နိမိတ်မကောင်းသည်များကို ထပ်မံပြောဆိုနေပြန်ပြီဖြစ်ကြောင်း ရိပ်မိသွားသော အီဗီလေးမှာ ဖန်ယွမ်၏ပခုံးပေါ်တွင် ဝပ်နေရင်းမှ ရင်တထိတ်ထိတ် ဖြစ်လာတော့သည်။

"သိပ်ပြီးတော့လည်း ဘဝင်မမြင့်သွားနဲ့ဦးကွ။ မင်းနဲ့ အီဗီလေး ကောင်းကောင်းကြိုးစားနေကြတယ်ဆိုတာ မှန်ပေမဲ့ လေ့ကျင့်ရေးဆရာတစ်ယောက်ရဲ့ လမ်းစဉ်မှာ ဒီထက်မြင့်မားတဲ့ အထွတ်အထိပ်ကို တက်လှမ်းချင်တယ်ဆိုရင် ကြိုးစားအားထုတ်မှုဆိုတာ အခြေခံအကျဆုံး လိုအပ်ချက်ပဲ ရှိသေးတယ်။ မော်ဒန်မြို့တော်လို နေရာမျိုးမှာ ကြယ်ရောင်စင် တိုက်ပွဲကလပ်လို နေရာတွေ ဘယ်လောက်တောင် များလဲဆိုတာ မင်းသိလား။ တခြားသူတွေက မင်းထက်ပိုပြီး ပရော်ဖက်ရှင်နယ်ကျတဲ့ ကိုယ်ပိုင်သင်တန်းဆရာတွေကို ငှားရမ်းပြီး မလေ့ကျင့်ထားဘူးလို့ မင်း အာမခံနိုင်မလား..."

"ဒါတင်မကသေးဘူး... မော်ဒန်မြို့တော်မှာ သမိုင်းကြောင်းရင့်ကျက်တဲ့ လေ့ကျင့်ရေးဆရာ သိုင်းဝိုင်းကြီးတွေရှိသေးတယ်။ အကယ်၍ မင်းသာ ကံမကောင်းလို့ အဲဒီက ပညာသင်တပည့်တစ်ယောက်ယောက်နဲ့ ဆုံတွေ့ခဲ့ရင်တော့ အေးဆေးသက်သာပြီး အနိုင်ရဖို့ လုံးဝမလွယ်ကူဘူး"

ထိုစကားကြောင့် ဖန်ယွမ်၏မျက်နှာလေးမှာ ချက်ချင်းပင် ညှိုးငယ်သွားတော့သည်။ ဦးလေးရှန်သည် အဘယ်ကြောင့် သူ့ကို အမြဲတမ်း စိတ်ဓာတ်ကျအောင် ပြောနေရပါသနည်း။ သူနားဝင်ချိုမည့် စကားမျိုးကို တစ်ခွန်းတစ်လေမျှ ပြောပေး၍မရဘူးလား။

"ဘွီး!"

အီဗီ လေးကမူ ဦးလေးရှန်၏စကားကို ထောက်ခံသည့်အနေဖြင့် ခေါင်းတညိတ်ညိတ် လုပ်နေလေသည်။

ဦးလေးရှန်က "ဟားဟား... မင်းကို နည်းနည်း ခြောက်လှန့်ကြည့်တာပါကွာ။ ဘာပဲဖြစ်ဖြစ် ဖီးနစ်ဘုရင်လေးဖလားရဲ့ ပြိုင်ပွဲဝင်တွေကလည်း မင်းလိုပဲ အခုမှစလုပ်တဲ့ လေ့ကျင့်ရေးဆရာအသစ်တွေချည်းပဲမို့လို့ သိပ်ပြီးတော့ စိုးရိမ်ပူပန်မနေပါနဲ့... အစိုးရိမ်လွန်ပြီး ဖျားနာနေဦးမယ်" ဟု ရယ်မောကာ ဆိုလိုက်သည်။ "စိတ်အေးအေးထားပြီး ဆက်လက်ကြိုးစားပါ၊ မင်းတို့ တခြားသူတွေထက် နိမ့်ကျမသွားစေရပါဘူး"

ဖန်ယွမ်နှင့် အီဗီ လေးတို့သည် သက်ပြင်းတစ်ချက်ကို ပြိုင်တူချလိုက်ကြသည်။ စကားလုံးများသာ လှပသွားသော်လည်း နောက်ဆုံးတွင်တော့ နေ့စဉ်ကြားနေကျ စိတ်ဓာတ်မြှင့်တင်ရေး စကားဝိုင်းတစ်ခုသာ ဖြစ်နေပြန်သည်။

သို့သော် ဦးလေးရှန် မသိရှိသည့်အချက်မှာ... သူ စီစဉ်ပေးထားသော လေ့ကျင့်ရေးတာဝန်များအပြင် ဖန်ယွမ်နှင့် အီဗီ လေးတို့ထံတွင် လျှို့ဝှက်ပြင်ဆင်ထားသော ဖဲချပ်တစ်ချပ် ရှိနေသေးခြင်းပင် ဖြစ်သည်။

၎င်းမှာ... 'အန္တရာယ်ကြိုတင်ရိပ်မိခြင်း' အထူးစွမ်းရည်နှင့် 'တန်ပြန်ဒိုင်းလွှား' နည်းဗျူဟာပိုင်းဆိုင်ရာ စွမ်းရည်တို့ ဖြစ်ကြသည်။ နောက်ထပ် ရက်ဝက်ခန့်အတွင်း အီဗီ လေးအနေဖြင့် ထိုနှစ်ခုထဲမှ တစ်ခုခုကိုသာ ပိုင်ပိုင်နိုင်နိုင် တတ်မြောက်သွားပါက ၎င်း၏တိုက်ခိုက်ရေးစွမ်းရည်မှာ အဆမတန် မြင့်မားလာမည်ဖြစ်သည်။

ကြယ်ရောင်စင် ကလပ်တွင်ရှိသော 'ရတ်တာတာ' လေးကောင်မှာ အီဗီလေးအတွက် အလွန်ကောင်းမွန်သော ဆရာသမားများ ဖြစ်ကြသည်။ ၎င်းတို့သည် အီဗီ လေးအား အမှောင်မျိုးကွဲစွမ်းအင်ကို ထိတွေ့ခွင့်ရစေရုံမျှမက ပြင်းထန်လှသော တိုက်ပွဲများမှတစ်ဆင့် ၎င်း၏အထူးစွမ်းရည်ကို ပိုမိုကျွမ်းကျင်လာစေရန် ကူညီပေးခဲ့သည်။ အီဗီ လေးသည် ထို 'အန္တရာယ်ကြိုတင်ရိပ်မိခြင်း' စွမ်းရည်ကို တတ်မြောက်လုနီးပါး ဖြစ်နေပြီဟု ဆိုနိုင်သည်။ ဗီဇစိတ်အရ အန္တရာယ်ကို အလိုလိုသိနေသည့် အဆင့်မှသည် ရန်သူ၏ တိုက်ခိုက်မှုများကို နတ်ဘုရားအဆင့် တုံ့ပြန်မှုမျိုးဖြင့် တက်ကြွစွာ ကြိုတင်ခန့်မှန်းနိုင်သည့် အဆင့်သို့ ကူးပြောင်းရန် ခြေလှမ်းတစ်လှမ်းမျှသာ လိုတော့သည်။

ဖန်ယွမ်သည် အီဗီလေး၏ အထူးစွမ်းရည်ကို အမြဲတမ်း အားကောင်းလှသည်ဟု တွေးထင်ထားခဲ့သော်လည်း အဘယ်ကြောင့် လူအများစုက ဤစွမ်းရည်ကို အသေးစိတ် မဖော်ထုတ်ကြသနည်းဟူ၍ တွေးတောမိသည်။ ယခုအခါ အီဗီ လေးသည် ဤစွမ်းရည်ကို ပိုင်နိုင်ရန် လက်တစ်ကမ်းအလိုသို့ ရောက်ရှိနေပြီဖြစ်ရာ ၎င်း၏ တုံ့ပြန်နိုင်စွမ်း အမြန်နှုန်းမှာ ပိုမိုထက်မြက်လာတော့မည် ဖြစ်သည်။

ထို့ကြောင့် ဤစွမ်းရည်ကို အရှိန်အဟုန်မြှင့် တတ်မြောက်နိုင်စေရန်အတွက် ဖန်ယွမ်သည် အီဗီ လေးနှင့် ကြိုတင်တိုင်ပင်ထားပြီးဖြစ်သည်။ ပြိုင်ပွဲမစတင်မီ နောက်ဆုံးအပတ်တွင် သူတို့သည် မျက်လုံးများကို အသုံးမပြုဘဲ ထိုအထူးစွမ်းရည်တစ်ခုတည်းကိုသာ အားကိုးလျက် ရတ်တာတာများနှင့် တိုက်ခိုက်ရန် စီစဉ်ထားကြလေသည်။

...

"ခဏနေဦး..."

ဖန်ယွမ်နှင့် အီဗီ လေးတို့ ယနေ့အတွက် အထူးလေ့ကျင့်ရေးကို စတင်ရန် ဟန်ပြင်လိုက်စဉ်မှာပင် ဦးလေးရှန်က လှမ်း၍ခေါ်လိုက်သည်။ ဤကလပ်၏ တာဝန်ခံတစ်ဦးဖြစ်သည့်အားလျော်စွာ သူသည် နေ့စဉ်ရက်ဆက် အလုပ်များပြားလှသူဖြစ်သည်။ ထို့ကြောင့် ဖန်ယွမ်တို့၏ လေ့ကျင့်ရေးကို ကိုယ်တိုင်ကိုယ်ကျ ကြီးကြပ်ပေးနိုင်ခြင်း မရှိဘဲ လိုအပ်သော အရင်းအမြစ်များကိုသာ ပံ့ပိုးပေးနိုင်ခဲ့သည်။

သို့သော်လည်း ဦးလေးရှန်သည် ဖန်ယွမ်နှင့် အီဗီ လေးတို့၏ စည်းကမ်းသေသပ်မှုနှင့် စိတ်ရှည်သည်းခံမှုတို့ကို မြင်တွေ့ရသောအခါ အံ့အားသင့်ရလေသည်။ ၎င်းမှာ ယနေ့ခေတ် လူငယ်များကြားတွင် တွေ့ရခဲလှသော အရည်အချင်းတစ်ခုဖြစ်ပြီး အီဗီ လေး၏ သိသာထင်ရှားလှသော တိုးတက်မှုများကပင် ထိုအချက်ကို သက်သေထူနေသည်။ သူ သဘောကျမိသော လေ့ကျင့်ရေးဆရာအသစ်ဟူ၍ သိပ်မရှိသော်လည်း ဖန်ယွမ်ကမူ ထိုအထဲမှ တစ်ဦးအပါအဝင် ဖြစ်လာခဲ့သည်။

ထို့ကြောင့် ဦးလေးရှန်သည် ရန်ဟန့်ကိစ္စများနှင့် မပတ်သက်ဘဲ သူ၏နှစ်ပေါင်းများစွာ အတွေ့အကြုံများမှ ရရှိထားသော အတွေးအမြင်များကို ဖန်ယွမ်အား သီးသန့်မျှဝေပေးလိုသောကြောင့် လှမ်းခေါ်ခြင်းဖြစ်သည်။

"ငါ အရင်က မင်းအပေါ် ဘာလို့ အမြဲတမ်း တင်းတင်းကြပ်ကြပ် ရှိနေခဲ့လဲဆိုတာ မင်းသိလား..."

ဖန်ယွမ်က စိတ်ထဲရှိသည့်အတိုင်း "ကျွန်တော်တို့ကို စိတ်ကူးယဉ် မလွန်စေချင်လို့ မဟုတ်လားခင်ဗျာ..." ဟု ပြန်ဖြေလိုက်သည်။

"အတိအကျပဲကွ။ လေ့ကျင့်ရေးဆရာအသစ်ဆိုတာ ခြေလှမ်းမှန်မှန်နဲ့ မြေပြင်ပေါ်မှာ ခိုင်ခိုင်မာမာ ရပ်တည်နိုင်ရမယ်။ မင်းတို့က ဒီလမ်းစဉ်ရဲ့ အစပြုရုံပဲ ရှိသေးတာ။ သေးငယ်တဲ့ အောင်မြင်မှုလေးတွေကြောင့် ဘဝင်မြင့်ပြီး မာနထောင်လွှားသွားမှာကို ငါ မလိုလားဘူး။ ဒါပေမဲ့ အခုကြည့်ရသလောက်တော့ မင်းတို့က အဲဒီလိုလူမျိုးတွေ မဟုတ်ကြပါဘူး"

ဖန်ယွမ်နှင့် အီဗီ လေးတို့ အချင်းချင်း ကြည့်လိုက်ကြသည်။ (တကယ်တော့ သူတို့က အဲဒီလိုလူမျိုးတွေပါပဲ...)

"နှစ်ပေါင်းများစွာ လေ့ကျင့်ရေးဆရာဘဝကို ဖြတ်သန်းလာခဲ့ကြတဲ့ ငါတို့လို လူဟောင်းတွေက လေ့ကျင့်ရေးဆရာတွေကို ဘယ်လိုအဆင့်တွေ ခွဲခြားထားလဲဆိုတာ မင်းသိချင်လား..." ဟု ဦးလေးရှန်က မေးလိုက်သည်။

ပုံပြင်ပြောချိန် ရောက်ပြီဖြစ်ရာ ဖန်ယွမ်နှင့် အီဗီ လေးတို့သည် စိတ်ဝင်တစားဖြင့် ခေါင်းကို အလုအယက် ငြိတ်ပြလိုက်ကြသည်။

"မင်းတို့ သက်တူရွယ်တူ လေ့ကျင့်ရေးဆရာအသစ်တွေထဲမှာ မင်းက တကယ်ကို ထင်ရှားပေါ်လွင်နေတယ်ဆိုတာကိုတော့ ငါ မငြင်းပါဘူး။ ဒါပေမဲ့ လေ့ကျင့်ရေးဆရာအသစ်ဆိုတဲ့ အတိုင်းအတာက အလွန်ကျယ်ပြန့်တယ်။ အလွယ်ပြောရရင် လေ့ကျင့်ရေးဆရာအဖြစ် မှတ်ပုံတင်ထားတာ တစ်နှစ်မပြည့်သေးတဲ့သူမှန်သမျှကို ဒီအဆင့်ထဲ ထည့်သွင်းထားတာ မင်းသိပြီးသားဖြစ်မှာပါ..."

"နိုင်ငံတော်ရဲ့ မူဝါဒအသစ်ကြောင့် လေ့ကျင့်ရေးဆရာအသစ် အများစုဟာ အထက်တန်းကျောင်းသားတွေ ဖြစ်ကြပြီး မကြာခင်မှာ အထက်တန်းနောက်ဆုံးနှစ်ကို တက်ကြရတော့မှာ။ မင်းရဲ့ အဓိကပြိုင်ဘက်တွေကလည်း ဒီလူတွေပဲ ဖြစ်ပြီး မင်းတို့အားလုံးရဲ့ စတင်တဲ့ မျဉ်းကြောင်းက သိပ်ပြီးတော့ ကွာခြားမှုမရှိလှဘူး"

"နောက်တစ်ဆင့်ကတော့ ပိုကီမွန်တွေကို နှစ်အတန်ကြာ မွေးမြူလာခဲ့ကြတဲ့ 'သာမန်လေ့ကျင့်ရေးဆရာ' တွေပဲ။ သူတို့ထဲက ဘယ်သူ့ကိုမဆို ဆွဲထုတ်ကြည့်လိုက်ရင် သူတို့ပိုကီမွန်တွေရဲ့ အခြေခံကြံ့ခိုင်မှုက မင်းရဲ့ အီဗီလေးထက် နိမ့်ကျနေမှာ မဟုတ်ဘူး။ တစ်ချိန်တည်းမှာပဲ ဒီအဆင့်မှာရှိတဲ့ လေ့ကျင့်ရေးဆရာ အရေအတွက်က လူ့အဖွဲ့အစည်းမှာ အများဆုံးပဲ ဖြစ်တယ်"

"အဲဒီနောက်မှာတော့ နာမည်ကြီး တက္ကသိုလ်တွေကနေ အထူးလေ့ကျင့်သင်ကြားပေးလိုက်တဲ့ ပါရမီရှင်တွေ ရှိတယ်။ သူတို့ကတော့ လေ့ကျင့်ရေးဆရာလောကရဲ့ အရေးပါတဲ့ 'အထူးချွန်ဆုံးလေ့ကျင့်ရေးဆရာ' အဆင့်တွေပေါ့။ ဥပမာအားဖြင့် ငါတို့ပြည်နယ် တက္ကသိုလ်အသင်းက အဖွဲ့ဝင်တွေဆိုရင် မြို့အသီးသီးက ပြိုင်ပွဲတွေမှာ ကျောင်းကိုယ်စားပြု ဝင်ပြိုင်ကြလေ့ရှိတယ်။ သူတို့ကို လေ့ကျင့်ရေးဆရာတွေထဲက ထိပ်သီးတွေလို့ ခေါ်ရင်လည်း မမှားဘူး"

"ဒါ့အပြင် ပရော်ဖက်ရှင်နယ် လေ့ကျင့်ရေးဆရာ ဖြစ်ခါနီးနေပြီဖြစ်ပေမဲ့ အကြောင်းအမျိုးမျိုးကြောင့် ပရော်ဖက်ရှင်နယ် အရည်အချင်းစစ်စာမေးပွဲမှာ ကျရှုံးခဲ့ကြတဲ့ 'စီနီယာလေ့ကျင့်ရေးဆရာ' ဆိုတဲ့ လူတစ်စုလည်း ရှိသေးတယ်။ အချို့ကတော့ ပရော်ဖက်ရှင်နယ်လိုင်စင်ရဖို့ ဆက်လက်ကြိုးစားနေကြဆဲဖြစ်ပြီး အချို့ကတော့ လုံးဝလက်လျှော့သွားကြပြီ။ ဒါပေမဲ့ သူတို့ထဲက အများစုကတော့ လူ့အဖွဲ့အစည်းရဲ့ ကဏ္ဍအသီးသီးမှာ အခြေချပြီး အသက်မွေးဝမ်းကျောင်း ပြုနေကြတယ်။ ဥပမာအားဖြင့်... တောအုပ်ထိန်းသိမ်းရေးသမားတွေ၊ ရဲတပ်ဖွဲ့ဝင်တွေ၊ သက်တော်စောင့်တွေ၊ ဒိုင်လူကြီးတွေ... ပြီးတော့ ငါ့ရဲ့ ယခင်အလုပ်ဖြစ်တဲ့ တိုက်ပွဲကလပ်အသီးသီးက ပရော်ဖက်ရှင်နယ် နည်းပြတွေအဖြစ် တခြားလေ့ကျင့်ရေးဆရာတွေအတွက် လေ့ကျင့်ရေး အစီအစဉ်တွေ ဆွဲပေးတာမျိုးပေါ့"

"နောက်ဆုံးအဆင့်ကတော့ 'ပရော်ဖက်ရှင်နယ်လေ့ကျင့်ရေးဆရာ' တွေပဲ။ သူတို့ကတော့ ရှေ့တန်းစစ်မျက်နှာတွေမှာ တိုက်ပွဲဝင်ကြရပြီး လျှို့ဝှက်နယ်မြေတွေကရတဲ့ အရင်းအမြစ်တွေကို ခံစားခွင့်ရှိကြတယ်။ ဒါပေမဲ့ တစ်ချိန်တည်းမှာပဲ လျှို့ဝှက်နယ်မြေတွေကနေ ဖြစ်ပေါ်လာမယ့် ဘေးအန္တရာယ်တွေကနေ အရပ်သားတွေကို ကာကွယ်စောင့်ရှောက်ဖို့၊ ထိုနယ်မြေတွေကို ထိန်းသိမ်းစောင့်ရှောက်ဖို့နဲ့ နယ်မြေအသစ်တွေ ရှာဖွေဖော်ထုတ်ဖို့ တာဝန်ရှိကြတယ်။ ရန်ဟန်က မင်းကို ကိုယ်တိုင်မသင်ပေးနိုင်ဘဲ ငါ့ဆီ ဘာလို့အပ်ခဲ့လဲ မင်းသိလား... ဘာဖြစ်လို့လဲဆိုတော့ ပရော်ဖက်ရှင်နယ် လေ့ကျင့်ရေးဆရာတိုင်းဟာ အမြဲတမ်း အလုပ်များနေကြပြီး သာမန်လူတွေ မြင်တွေ့နေရသလို လှပဆန်းပြားမနေလို့ပဲ။ ပရော်ဖက်ရှင်နယ် လေ့ကျင့်ရေးဆရာတွေရဲ့ သေဆုံးမှုနှုန်းဟာ အလွန်မြင့်မားလှတယ်"

"ဒါကြောင့်မို့လို့ ငါက မင်းကို ခြေလှမ်းမှန်မှန်နဲ့ အောက်ခြေခိုင်အောင် လုပ်ပါလို့ ပြောရတာပေါ့။ နောင်အနာဂတ်မှာ လျှောက်လှမ်းရမယ့် ခရီးလမ်းက သိပ်ကို ရှည်လျားလွန်းပါသေးတယ်..."

"တကယ်ကို ရှည်လျားလှတာပဲ..." ဖန်ယွမ်သည် ထိုစကားလုံးများကို သူ၏နှလုံးသားထဲတွင် တိတ်တဆိတ် မှတ်သားထားလိုက်သည်။

လေ့ကျင့်ရေးဆရာအသစ်၊ သာမန်လေ့ကျင့်ရေးဆရာ၊ အထူးချွန်ဆုံးလေ့ကျင့်ရေးဆရာ၊ စီနီယာလေ့ကျင့်ရေးဆရာ၊ ပရော်ဖက်ရှင်နယ်လေ့ကျင့်ရေးဆရာ...။

လေ့ကျင့်ရေးဆရာတစ်ဦး၏ အဆင့်ငါးဆင့်ကို အတွေ့အကြုံရင့်ကျက်လှသော ဦးလေးရှန်က ထိထိမိမိ ရှင်းလင်းပြခဲ့ရာ ဖန်ယွမ်ကိုယ်တိုင် နားလည်ထားခဲ့သည်ထက် ပိုမိုပြည့်စုံပြီး ကွက်ကွက်ကွင်းကွင်း ရှိလှပေသည်။

"ကျေးဇူးတင်ပါတယ် ဦးလေးရှန်... ခင်ဗျားပြောတာကို ကျွန်တော် ကောင်းကောင်းနားလည်ပါပြီ။ ဒါဆို ကျွန်တော်နဲ့ အီဗီ လေး လေ့ကျင့်ရေး သွားလုပ်လိုက်ပါဦးမယ်"

"အေးအေး... သွားကြ၊ သွားကြ..." ဦးလေးရှန်က ပြုံး၍ ခေါင်းညိတ်ခွင့်ပြုလိုက်လေတော့သည်။