အပိုင်း - (၂၈): ကြယ်ရောင်စဉ် တိုက်ပွဲကလပ်
"ဘွူး..."
ဖန်ယွမ် စကားမစရသေးခင်မှာပင် အီဗီ ီ က တစ်ခုခုကို ကြိုတင်ခံစားမိသွားသလိုမျိုး သူတို့နှစ်ယောက်ကို စိုးရိမ်တကြီး လှမ်းကြည့်လိုက်သည်။ မဖြစ်နိုင်တာ... ဆိုဖာပေါ်မှာ ဇိမ်ကျကျလှဲပြီး တီဗီကြည့်ရတဲ့ နေ့ရက်တွေက မစရသေးခင်မှာပဲ ပြီးဆုံးသွားတော့မှာလား။
"စိတ်အေးအေးထားစမ်းပါ" ဖန်ယွမ်က အီဗီ ီ ခေါင်းလေးကို ခပ်ဖွဖွပွတ်သပ်ပေးရင်း ဝင်မရှုပ်ဖို့ အချက်ပြလိုက်သည်။ လူကြီးတွေ စကားပြောနေချိန်ဆို ကလေးတွေက ငြိမ်ငြိမ်လေး နားထောင်ရတယ်လေ။
"ကိုယ် ရှင်းပြမယ်။ ကြယ်ရောင်စဉ် တိုက်ပွဲကလပ်ဆိုတာ နည်းပြတွေ သူတို့ရဲ့စွမ်းရည်တွေကို စမ်းသပ်ဖို့နဲ့ လေ့ကျင့်ပျိုးထောင်ဖို့ သီးသန့်ဖွင့်ထားတဲ့ နေရာတစ်ခုပဲ။ အဲဒီမှာ တိုက်ပွဲကွင်းပြင်တွေ၊ လေ့ကျင့်ရေး ကိရိယာတွေ ရှိတဲ့အပြင် တိုက်ပွဲအဖော်တွေ၊ ကိုယ်ပိုင်နည်းပြတွေနဲ့ တခြား ဝန်ဆောင်မှုတွေလည်း အများကြီးပေးထားတယ်။ မင်းလုပ်ရမှာက ကလပ်ကနေ ချထားပေးမယ့် တိုက်ပွဲတာဝန်တွေကို ပြီးမြောက်အောင် လုပ်ဖို့ပဲ။ ကိုယ်ပိုင်နည်းပြရဲ့ အကြံပေးချက်တွေကို လိုက်နာဖို့ကတော့ မင်းသဘောပဲလေ"
"ကျွန်တော့်လို လူသစ်နည်းပြတစ်ယောက်ကရော တိုက်ပွဲအဖော်အနေနဲ့ လုပ်လို့ရပါ့မလား" ဖန်ယွမ်က အံ့သြတကြီး မေးလိုက်သည်။
"သာမန်အခြေအနေမျိုးမှာဆိုရင်တော့ သေချာပေါက် မရဘူးပေါ့။ ဒါပေမဲ့ ကိုယ်က အဲဒီက ပိုင်ရှင်နဲ့ သိနေတော့ မင်းအတွက် ရိုးရှင်းတဲ့ တာဝန်လေးတွေ စီစဉ်ပေးဖို့က ပြဿနာမရှိပါဘူး။ ဥပမာ... လူသစ်နည်းပြတွေဖြစ်တဲ့ ဖောက်သည်တွေနဲ့ တိုက်ပွဲဝင်ပေးရတာမျိုးပေါ့"
"ဒီကာလအတွင်းမှာ မင်းရဲ့လစာကို နေ့စားအနေနဲ့ တွက်ပေးလိမ့်မယ်။ သတ်မှတ်ထားတဲ့ အချိန်လေးတွေမှာပဲ သွားဖို့လိုတာမို့ မင်းရဲ့အချိန်တွေကို သိပ်ပြီးတော့ အကုန်ခံစရာ မလိုပါဘူး"
"ပြီးတော့ ပြောရဦးမယ်၊ သူတို့ကောက်ခံတဲ့ နှုန်းထားတွေက မသေးဘူးနော်။ အဲဒီနေရာက လူကုံထံတွေ သွားလာကြတဲ့ နေရာဖြစ်လို့ ရိုးရှင်းတဲ့ တာဝန်လေးတွေကအစ ဝင်ငွေကောင်းတယ်။ လက်တွေ့ အတွေ့အကြုံရတာက ဒုတိယအချက်ပဲ။ ကြယ်ရောင်စဉ် တိုက်ပွဲကလပ်ရဲ့ ဝန်ထမ်းတစ်ယောက်ဆိုတဲ့ ဂုဏ်ပုဒ်နဲ့တင် ပိုကီမွန်စင်တာကနေ အကျိုးခံစားခွင့်တွေ အများကြီး ထပ်ရနိုင်သေးတယ်။ မှတ်မှတ်ရရဆို သူတို့ကလပ်က ပိုကီမွန်စင်တာနဲ့ ဘက်စုံ မိတ်ဖက်စာချုပ် ချုပ်ဆိုထားတာ" ဟု ယန်ဟန်က ရှင်းပြသည်။
ဖန်ယွမ်ကတော့ စိတ်ဝင်စားနေပြီဖြစ်သည်။ ကြယ်ရောင်စဉ် တိုက်ပွဲကလပ်ဆိုတာ သူ့အတွက်တော့ အဆင့်မြင့်နေရာတစ်ခု ဖြစ်ပြီး၊ ဒီလိုနေရာမျိုးကို စောစောစီးစီး ဝင်ထွက်ခွင့်ရမယ်ဆိုရင် ကိုယ့်ဘာသာ အမှောင်ထဲ စမ်းတဝါးဝါး လျှောက်နေရတဲ့ ဒုက္ခကနေ ကင်းဝေးသွားမည်ဖြစ်သည်။ အီဗီ ီ ကို အထူးလေ့ကျင့်ပေးဖို့အတွက် သူ ဦးနှောက်ဆဲလ်တွေ အများကြီး အသေခံခဲ့ရပြီးပြီ။ စာလုပ်ရတာထက်တောင် ပိုပင်ပန်းသေးသည်။ အချိန်ကြာလာရင် သူ့ဆံပင်တွေတောင် ပြောင်သွားနိုင်ခြေရှိသည်။
"ဒါဆိုရင်လည်း ကျွန်တော် အားနာမနေတော့ဘူးနော်။ ကျေးဇူးအများကြီးတင်ပါတယ် အစ်ကိုယန်" ဖန်ယွမ်က ရယ်မောရင်း ပြောလိုက်သည်။ ဒီလို အခွင့်အရေးကောင်းမျိုးက လက်လွှတ်ခံဖို့ လုံးဝမသင့်တော်ပေ။ ထပ်ပြီး ယဉ်ကျေးနေရင်တောင် သူ့ကိုယ်သူ နေရခက်လာလိမ့်မည်။
"မင်းရဲ့ စိတ်အားထက်သန်မှုကို ကိုယ်သဘောကျတယ်။ ဒါပေမဲ့ ကိုယ် သတိပေးချင်တာက ကိုယ်ပြောခဲ့တဲ့ ကိုယ်ပိုင်နည်းပြဆိုတာ မင်းကို တစ်စိတ်တစ်ပိုင်းလောက်ပဲ ကူညီပေးနိုင်မှာနော်။ ဘယ်လောက်အထိ တိုးတက်လာမလဲဆိုတာက မင်းနဲ့ အီဗီ ီ ရဲ့ ကြိုးစားအားထုတ်မှုပေါ်မှာပဲ မူတည်တယ်"
"သေချာပေါက်ပေါ့ဗျာ၊ ကျွန်တော် နားလည်ပါတယ်"
"ကောင်းပြီ။ မနက်ဖြန်ကျရင် ကတ်ပြားပေါ်က လိပ်စာနဲ့ ဆက်သွယ်ရန်ဖုန်းနံပါတ်ကို ဆက်သွယ်ပြီး သွားလိုက်တော့။ ပြီးတော့ ဖလားပြိုင်ပွဲအတွက်လည်း ကြိုပြီးတော့ ဆုတောင်းပေးလိုက်ပါတယ်"
ယန်ဟန်က အလျင်စလို ရောက်လာသလို၊ အလျင်စလိုပင် ပြန်ထွက်သွားခဲ့သည်။ ဖန်ယွမ့်လက်ထဲတွင်တော့ ကတ်ပြားလေးတစ်ကတ်သာ ကျန်ရစ်ခဲ့၏။
တစ်ယောက်နဲ့တစ်ယောက် အတန်ကြာ အကြည့်ချင်းဖလှယ်ပြီးနောက်တွင်တော့ အီဗီ က လက်မြှောက်အရှုံးပေးကာ ဆိုဖာပေါ်တွင် လူးလှိမ့်နေတော့သည်။
"ကြည့်စမ်း အီဗီ ၊ ဒါက ငါတို့ လက်လွှတ်မခံသင့်တဲ့ အခွင့်အရေးကောင်းကြီးတစ်ခုပဲ။ ကျွမ်းကျင်တဲ့ နည်းပြဆီကနေ လမ်းညွှန်မှုခံယူရတာက ငါတို့ဘာသာ မျက်ကန်းတလုံး လေ့ကျင့်နေရတာထက် အများကြီး ပိုကောင်းတာပေါ့။ မင်းကို အမှောင်စွမ်းအင်သုံး 'ကိုက်ဖြတ်ခြင်း' စွမ်းရည် ဘယ်လိုသင်ပေးရမလဲဆိုတာ ငါ ခေါင်းစားနေတာ" ဟု ဖန်ယွမ်က ပြောလိုက်သည်။
"ဘွူး..." အီဗီ က လျှာလေးထုတ်ပြပြီး တီဗီပြန်ကြည့်နေလိုက်သည်။ ဒီလို ပူပင်သောကကင်းတဲ့ အချိန်လေးတွေရဲ့ နောက်ဆုံးလက်ကျန်ကို အရယူဖို့က အရေးအကြီးဆုံးပဲလေ။
...
အီဗီ က အပြင်ပန်းမှာ စိတ်မပါသလို ဖြစ်နေပေမဲ့ နောက်နေ့မနက်မှာတော့ ဖန်ယွမ်ထက်တောင် ပိုပြီး တက်တက်ကြွကြွ နိုးထလာခဲ့သည်။
"အင်း..." မျက်နှာပေါ်က ပိုးပဝါကို ဆွဲဖယ်လိုက်ရင်း ဖန်ယွမ်က အီဗီ ကို မကျေမနပ် လှမ်းကြည့်လိုက်သည်။ သူ အသက်ရှူကျပ်ပြီး သေတော့မလို့။ နည်းပြကို လုပ်ကြံသတ်ဖြတ်ဖို့ ကြိုးစားနေတာလား။
"ဘွူး!" အီဗီ က ခေါင်းခါပြရင်း အိပ်ရာကနေ မြန်မြန်ထဖို့ ဖန်ယွမ်ကို အချက်ပြသည်။ ဟိုလျှို့ဝှက်နေရာတုန်းက ကြုံခဲ့ရတဲ့ အဖြစ်ဆိုးမျိုးကို ထပ်ပြီး အဖြစ်မခံနိုင်တော့ပေ။ ထို 'ပစ်ဂျော့' (Pidgeot) ထက် ပိုပြီး အင်အားကြီးလာဖို့ဆိုတာ အီဗီ ချမှတ်ထားတဲ့ နောက်ထပ် ရည်မှန်းချက်တစ်ခု ဖြစ်သည်။
ပထမဆုံး ရည်မှန်းချက်ကတော့... လွန်ခဲ့တဲ့ ရက်အနည်းငယ်က ဖန်ယွမ် ပြောခဲ့တဲ့အတိုင်း ဖီးနစ်ငှက်ငယ်ဖလားကို ဆွတ်ခူးပြီး ကိုယ်ပိုင် စမတ်ဖုန်းတစ်လုံး ရဖို့ပင်။ ဒါလေးတစ်ခုအတွက်နဲ့တော့ လမ်းတစ်ဝက်မှာ အရှုံးပေးလို့ မဖြစ်ဘူးလေ။ စမတ်ဖုန်းကို တွေးမိလိုက်သည်နှင့် အီဗီ ၏ မျက်လုံးလေးများက စိတ်လှုပ်ရှားမှုကြောင့် ချက်ချင်း အရောင်လက်သွားသည်။
"ကဲပါ... အရင်ဆုံး မနက်စာစားကြတာပေါ့။ ပြီးမှ ထွက်ကြမယ်" ဖန်ယွမ်က စုတ်ဖွားဖြစ်နေသော ဆံပင်ကို ကုတ်ရင်း ပြောလိုက်သည်။
ကြယ်ရောင်စဉ် တိုက်ပွဲကလပ်သည် အလွန်နာမည်ကြီးပြီး၊ ဌာနချုပ်က ကျိုတိုတွင်ရှိကာ လူကုံထံအသိုင်းအဝိုင်း၏ အထူးနှစ်သက်မှုကို ရရှိထားသော နေရာဖြစ်သည်။
မနက်စာ စားပြီးသည်နှင့် ယန်ဟန်ပေးထားသော ကတ်ပြားပေါ်မှ လိပ်စာအတိုင်း ဖျင်ချန် ရုံးခွဲဆီသို့ ဖန်ယွမ်နှင့် အီဗီ တို့ ထွက်လာခဲ့ကြသည်။ အိမ်နှင့် အတော်လေးဝေးသော်လည်း ကံကောင်းထောက်မစွာဖြင့် သယ်ယူပို့ဆောင်ရေး စနစ်က ကောင်းမွန်နေခဲ့သည်။
"ကြယ်ရောင်စဉ် တိုက်ပွဲကလပ်..."
အချိန်အတော်ကြာ သွားပြီးနောက်မှာတော့ ဖန်ယွမ်တစ်ယောက် အဆိုပါနေရာသို့ ရောက်ရှိလာခဲ့သည်။ အဆောက်အအုံပေါ်တွင် ရေးထိုးထားသော စာလုံးများကို ဖတ်ပြီးနောက် ဧည့်ခန်းမဆောင်ထဲသို့ သူ တိုက်ရိုက် ဝင်သွားလိုက်သည်။
ကြယ်ရောင်စဉ် တိုက်ပွဲကလပ်၏ ဧရိယာက အလွန်ကျယ်ဝန်းပြီး၊ ရုံးခွဲတစ်ခုဖြစ်လင့်ကစား အင်မတန် ခမ်းနားထည်ဝါလှသည်။ ဧည့်ခန်းမဆောင်ကြီးက လင်းထိန်နေပြီး တိုင်လုံးကြီးများက မားမားမတ်မတ် ရပ်တည်နေကြသည်။ အနီးကပ် သေချာကြည့်လိုက်သောအခါ တိုင်တစ်တိုင်ချင်းစီတိုင်းတွင် ကြယ်ပုံသဏ္ဍာန်များ ထွင်းထုထားပြီး တစ်ခုလုံး၏ အပြင်အဆင်ကို အလွန်ထူးခြားသွားစေကြောင်း ဖန်ယွမ် သတိထားမိလိုက်သည်။
ပတ်ဝန်းကျင်ကို ဝေ့ဝဲကြည့်လိုက်ရာ မိမိတို့၏ ပိုကီမွန်များကို ခေါ်ဆောင်လာရင်း စကားစမြည် ပြောဆိုနေကြသော နည်းပြများစွာကိုလည်း တွေ့လိုက်ရသည်။ ဖန်ယွမ်က နေရာအနှံ့ အကဲခတ်ကြည့်ပြီးနောက် ဧည့်ကြိုကောင်တာဆီသို့ လျှောက်သွားကာ နုနယ်သိမ်မွေ့ပုံရသည့် ဧည့်ကြိုကောင်မလေးကို မေးလိုက်သည်။
"တစ်ဆိတ်လောက်ဗျာ... မစ္စတာဆန်းမီ ဘယ်မှာများ..."
"အာ... ဟုတ်ပြီ။ ကျွန်တော်တို့ ဒီကိုမလာခင် ကြိုပြီး ချိန်းထားပါတယ်။ ကျွန်တော့်နာမည်က ဖန် ပါ"
"မင်္ဂလာပါရှင်" ဧည့်ကြိုကောင်မလေးက အနည်းငယ် ပြုံးပြရင်း "ခဏလောက် စောင့်ပေးပါရှင်၊ သူဌေးနဲ့ ဆက်သွယ်ပေးပါ့မယ်" ဟု ပြန်ဖြေသည်။
...
တစ်ချိန်တည်းမှာပင်။ ကြယ်ရောင်စဉ် တိုက်ပွဲကလပ်၏ ဧည့်တွေ့ခန်းအတွင်း၌။
ဒီရုံးခွဲ၏ တာဝန်ခံဖြစ်သူ မစ္စတာဆန်းမီက ခန္ဓာကိုယ် ခပ်ဝဝ ဧည့်သည်နှစ်ဦးကို ဧည့်ခံနေသည်။ မစ္စတာဆန်းမီသည် အသက်လေးဆယ်နီးပါးခန့်ရှိပြီး သပ်သပ်ရပ်ရပ် ဝတ်စားဆင်ယင်ထားကာ အောင်မြင်နေသော စီးပွားရေးသမားတစ်ဦး၏ အသွင်အပြင် အပြည့်အဝရှိသည်။
သူ့ရှေ့ မျက်နှာချင်းဆိုင်တွင်တော့ သူ့အရွယ်ခန့်ရှိ ဝဝဖိုင့်ဖိုင့် လူလတ်ပိုင်းအမျိုးသားကြီးတစ်ဦးက အချိုရည်တစ်ခွက်ကို မော့သောက်လိုက်ပြီးနောက် အားရပါးရ ရယ်မောလိုက်သည်။
"မိတ်ဆွေကြီးရာ... သူ့ကို မြှောက်ပေးနေစရာ မလိုပါဘူး။ ငါ့ကောင်အကြောင်းကို ငါအသိဆုံးပါ"
ပြောပြီးသည်နှင့် ထိုလူလတ်ပိုင်းကြီးက သူ့ဘေးတွင် ငိုက်မျဉ်းနေသော ခပ်တုတ်တုတ် ကောင်လေးတစ်ယောက်ကို လှမ်းကြည့်လိုက်ပြီး ကောင်လေး၏ ခေါင်းကို ခပ်ပြင်းပြင်း တစ်ချက် ရိုက်ချလိုက်သည်။ ထိုကောင်လေးမှာ အသက် ဆယ့်ငါး၊ ဆယ့်ခြောက်နှစ်ခန့်ရှိပြီး စန်းဆင်းနေသော ပါးပြင်များကြားတွင် မျက်လုံးပေါက်ကျဉ်းကျဉ်းလေးများ ရှိကာ မျက်နှာက နီရဲနေသည်။ အရိုက်ခံလိုက်ရ၍ နိုးလာသော ကောင်လေး၏ မျက်လုံးများက ချက်ချင်းပင် ဟိုဟိုဒီဒီ ကလူးကလူး ကလဲလဲ ဖြစ်သွားတော့သည်။
"မင်း ငယ်ငယ်တုန်းက အတိုင်းပဲ" မစ္စတာဆန်းမီက ခေါင်းခါရင်း ရယ်မောကာ ပြောလိုက်သည်။
"သူသာ ငါ့ငယ်ငယ်က ဇွဲလုံ့လမျိုး တစ်ဝက်လောက်ရှိရင် သိပ်ကောင်းမှာပဲ" ဟု ဝဝဖိုင့်ဖိုင့် လူလတ်ပိုင်းကြီးက လက်မှိုင်ချချင်စရာ လေသံဖြင့် ပြောသည်။ ဒီနှစ်တွင် အသက်ဆယ့်ခြောက်နှစ် ပြည့်ပြီဖြစ်သော သူ၏ တစ်ဦးတည်းသောသားသည် ပိုကီမွန်နှင့် ပတ်သက်သည့် ကိစ္စများကို စိတ်ဝင်စားမှုမရှိသော လူသစ်နည်းပြတစ်ဦး ဖြစ်နေသည်။ သူတို့မိသားစုက ချမ်းသာကြွယ်ဝပြီး စားဝတ်နေရေးအတွက် ပူပန်စရာမလိုသော်လည်း ထိုအမျိုးသားကြီးက သူ့သားကို ပရော်ဖက်ရှင်နယ် နည်းပြတစ်ဦး ဖြစ်လာစေချင်သေးသည်။ ပရော်ဖက်ရှင်နယ် နည်းပြလိုင်စင်တစ်ခု လက်ထဲတွင် ရှိနေခြင်းက ဘွဲ့လက်မှတ်တစ်ခု ရှိနေသကဲ့သို့ပင် အသုံးဝင်ပြီး အခွင့်အလမ်းပေါင်းများစွာအတွက် ခြေလှမ်းစရာ ကျောက်ဆောင်တစ်ခု ဖြစ်လာနိုင်ပေသည်။
"အား!" ခပ်တုတ်တုတ် ကောင်လေးက အသံကျယ်ကျယ်ဖြင့် ကန့်ကွက်လိုက်သည်။ "ဆယ့်ကိုးပွဲချ၊ ဆယ့်ကိုးပွဲ နိုင်ထားတာနော်"
"ပါးစပ်ပိတ်ထားစမ်း။ မင်းကို ဒီခေါ်လာတာက အစစ်အမှန် နည်းပြတစ်ယောက်က ဘယ်လိုမျိုးလဲဆိုတာ ပြချင်လို့" ဖခင်ဖြစ်သူက သူ့ကို ထပ်ရိုက်လိုက်ပြန်သည်။ ဆိုဖာထဲ ချိုင့်ဝင်သွားသည်အထိ ကောင်လေးကို ဖိချပြီးမှ သူက လက်လွှတ်ပေးလိုက်သည်။
"စိတ်ဝင်စားစရာပဲ။ ခင်ဗျားတို့သာ ဒီထက်စောပြီး ရောက်လာရင် ကလပ်မှာ သင့်တော်တဲ့ လေ့ကျင့်ရေးအဖော် ရှိချင်မှရှိမှာ။ ဒါပေမဲ့ အခုတော့... တကယ့်ကို အနေတော်ဖြစ်မယ့်သူတစ်ယောက် ရှိနေတယ်" မစ္စတာဆန်းမီက ပြုံးလျက် ပြောလိုက်သည်။ "လွန်ခဲ့တဲ့ရက်ပိုင်းက ကျွန်တော့် မိတ်ဖက်တစ်ယောက်က လူသစ်နည်းပြတစ်ယောက်အတွက် တိုက်ပွဲအဖော်နဲ့ အချိန်ပိုင်း နည်းပြအလုပ်လေး ရှာပေးဖို့ အကူအညီတောင်းထားတယ်။ သူ့အပြောအရဆိုရင်တော့ အဲဒီလူသစ်နည်းပြလေးကလည်း တော်တော်လေး ထူးချွန်တယ်တဲ့။ ဒီလူသစ်နည်းပြနှစ်ယောက်ကို တိုက်ပွဲဖြစ်ခိုင်းပြီး စမ်းကြည့်ရင် ကောင်းမယ်ထင်တယ်။ အဲဒီက ထွက်လာမယ့် ရလဒ်က ပိုပြီးတော့ လက်တွေ့ကျလိမ့်မယ်"
"သိပ်ကောင်းတာပေါ့" ဝဝဖိုင့်ဖိုင့် အမျိုးသားကြီး၏ မျက်လုံးများက ပြုံးလိုက်သောအခါ မှေးကျဉ်းသွားသည်။ "ဒါထက် ကောင်းတာ မရှိတော့ဘူး"
သူတို့ စကားပြောနေစဉ်မှာပင် တစ်စုံတစ်ယောက်က တံခါးလာခေါက်ပြီး မစ္စတာဆန်းမီ၏ အတွင်းရေးမှူးက ဧည့်ကြိုကောင်တာမှ သတင်းကို လာရောက်ပို့ဆောင်ပေးသည်။ အတွင်းရေးမှူး ထွက်သွားပြီးနောက် မစ္စတာဆန်းမီ၏ အပြုံးက ပိုမိုကျယ်ပြန့်သွားခဲ့သည်။
"ကဲ... တိုက်တိုက်ဆိုင်ဆိုင်ပဲဗျာ။ ကျွန်တော် ခုနကပြောတဲ့ လူသစ်နည်းပြလေး ရောက်လာပြီ။ ခင်ဗျားတို့ အခု အားလား"
"အခုပဲ စလိုက်ကြတာပေါ့" ဝဝဖိုင့်ဖိုင့် လူလတ်ပိုင်းကြီးက မတ်တတ်ထရပ်ရင်း ပြောလိုက်သည်။