အာဒမ် မျက်လုံးပွင့်လာသည်နှင့် ပထမဆုံးလုပ်မိသည့်အရာမှာ ထိတ်လန့်တကြား သူ၏လည်ပင်းကို စမ်းကြည့်လိုက်ခြင်းဖြစ်သည်။ သူ၏လည်ပင်းမှာ နဂိုအတိုင်းရှိနေသေးသည်ကို အတည်ပြုပြီးမှသာ သက်ပြင်းချနိုင်တော့သည်။
"ဟူး! အဲဒီအတုယောင်ကမ္ဘာက တကယ့်ကို အစစ်အတိုင်းပဲ!"
သူ အပြင်ကို လွင့်မထွက်လာခင် စက္ကန့်ပိုင်းအလိုက ခွေးအများက သူ့ကို မြေပြင်ပေါ် ဖိချထားပြီး သွေးဆာနေသော ခွေးအတစ်ကောင်က သူ၏လည်ပင်းကို ရက်ရက်စက်စက် ကိုက်ချလိုက်သည်ကို နောက်ဆုံးမြင်လိုက်ရခြင်းဖြစ်သည်။
အာဒမ်သည် မျက်နှာပေါ်က ချွေးများကို သုတ်ပြီး ဖြည်းဖြည်းချင်း ထရပ်လိုက်သည်။ ပတ်ဝန်းကျင်ကို ဝေ့ကြည့်လိုက်ရာ ဖျာများအားလုံး လွတ်နေပြီဖြစ်ကြောင်း တွေ့ရသည်။ ရာနှင့်ချီသော ကျောင်းသားများသည် သူ့ကို မိစ္ဆာတစ်ကောင်ကို ကြည့်သကဲ့သို့ တိတ်ဆိတ်စွာ စိုက်ကြည့်နေကြသည်။ ရုတ်တရက် ပရော်ဖက်ဆာဂေါ့ဒ်ဖရေး၏ နူးညံ့သောအသံက တိတ်ဆိတ်မှုကို ဖြိုခွင်းလိုက်သည်။
"ဂုဏ်ယူပါတယ် အာဒမ်။ မင်းဟာ ၇ မိနစ်နဲ့ ၁၈ စက္ကန့်အထိ ခံနိုင်ခဲ့တယ်။ အခုဆိုရင် မင်းဟာ တရားဝင် ပထမနှစ်ကျောင်းသားတွေထဲမှာ အဆင့်တစ် (Rank 1) ရရှိသွားပြီဖြစ်ပါတယ်။"
ကျောင်းသားများသာမက ပါမောက္ခများဆီမှပါ ကျယ်လောင်သော လက်ခုပ်သံများ ထွက်ပေါ်လာသည်။အေးစက်လှသော လီဆာပင်လျှင် အာဒမ်၏ တိုက်ခိုက်ရေးစွမ်းရည်ကို အသိအမှတ်ပြုသည့်အနေဖြင့် နှစ်စက္ကန့်ခန့် လက်ခုပ်တီးပေးခဲ့သည်။ လက်ခုပ်မတီးသည့်သူများမှာ ဂျက်ဖရီနှင့် သူ၏ အပေါင်းအပါများသာ ဖြစ်သည်။
လက်ခုပ်သံများ တိတ်သွားပြီးနောက် အာဒမ်သည် ကျောင်းအုပ်ကြီးကို ကြည့်ကာ ရိုသေစွာ ပြန်ပြောလိုက်သည်။ "ကျေးဇူးတင်ပါတယ် ပရော်ဖက်ဆာ။ ကျွန်တော် မေးခွန်းတစ်ခုလောက် မေးလို့ရမလား ခင်ဗျာ?"
"မေးပါ" ဟု ပရော်ဖက်ဆာဂေါ့ဒ်ဖရေးက ပြုံးလျက် ဖြေသည်။
"အကယ်ဒမီရဲ့ ဝင်ခွင့်စာမေးပွဲ သမိုင်းတစ်လျှောက်မှာ အတုယောင်အင်းကွက်ထဲမှာ အကြာဆုံး ခံနိုင်ခဲ့တဲ့ ကျောင်းသားက ဘယ်လောက်အထိ ကြာခဲ့တာလဲ ခင်ဗျာ?" အာဒမ်က မျှော်လင့်တကြီး မေးလိုက်သည်။
"၇ မိနစ်နဲ့ ၄၅ စက္ကန့်ပဲ" ဟု ပရော်ဖက်ဆာဂေါ့ဒ်ဖရေးက ဆိုသည်။ "မင်းဟာ အကယ်ဒမီ စတင်တည်ထောင်ချိန်ကစပြီး တိုက်ခိုက်ရေးစစ်ဆေးမှု ရလဒ်အားလုံးကို ခြုံကြည့်မယ်ဆိုရင် တတိယနေရာမှာ ရှိနေတာပဲ အာဒမ်။"
ကျောင်းသားအားလုံးဆီမှ အံ့သြတုန်လှုပ်သံများ ထွက်ပေါ်လာသည်။ သူတို့ မှင်တက်သွားကြပြီ! သမိုင်းတစ်လျှောက် ရလဒ်အားလုံးထဲမှာ တတိယနေရာရတယ်ဆိုတာ... ဘာကို ဆိုလိုတာလဲ? ၎င်းက တကယ့်ကို တုန်လှုပ်စရာပင်။ ကလိုဗာ အကယ်ဒမီသည် လမင်းမြို့တော်တွင် တည်ထောင်ခဲ့သည်မှာ နှစ်ပေါင်း ရာနှင့်ချီနေပြီဖြစ်ကြောင်း သိထားရမည်။ အမှန်စင်စစ် ဤအကယ်ဒမီသည် နိုက်တင်ဂေးလ် ဘုရင့်နိုင်ငံ မတည်ထောင်မီကတည်းက ရှိနေခဲ့ခြင်းဖြစ်သည်။
ဆူညံသံများ တိတ်သွားပြီးနောက် အာဒမ်သည် ဖျာပေါ်မှဆင်းကာ ကျောင်းသားသစ်များကြားတွင် နေရာယူလိုက်သည်။ ပရော်ဖက်ဆာဂေါ့ဒ်ဖရေးက အားလုံးကို တစ်ဖန် ဂုဏ်ပြုစကားပြောပြန်သည်။
"အခု အဆင့်သတ်မှတ်ချက်တွေ ထွက်လာပြီဆိုတော့ မင်းတို့အားလုံး အဆောင်တွေကို သွားလို့ရပါပြီ။ ဒါပေမဲ့ အဲဒီမတိုင်ခင် အကယ်ဒမီရဲ့ စီမံခန့်ခွဲရေးအဆောက်အဦးမှာ မှတ်ပုံတင်ခြင်းကို အပြီးသတ်ရပါမယ်။ မင်းတို့ရဲ့ စီနီယာတွေက လုပ်ငန်းစဉ်တွေကို လမ်းညွှန်ပေးပါလိမ့်မယ်။ မနက်ဖြန်မှာတော့ ကျောင်းသားဟောင်းတွေနဲ့ ဆရာအချို့က အကယ်ဒမီထဲက နေရာအသီးသီးကို မိတ်ဆက်ပေးမယ့် Orientation (လမ်းညွှန်မိတ်ဆက်ခြင်း) အစီအစဥ်ရှိပါမယ်။ နောက် နှစ်ရက်အကြာမှာတော့ မင်းတို့ရဲ့ အတန်းတွေ တရားဝင် စတင်ပါလိမ့်မယ်။ ကြိုးစားပြီး လေ့လာကြပါ၊ လေ့ကျင့်ကြပါ။ မင်းတို့ဟာ ကလိုဗာ အကယ်ဒမီရဲ့ အနာဂတ်တွေပဲ!"
တစ်ခဲနက် အော်ဟစ်အားပေးကြပြီးနောက် ကျောင်းသားသစ်များအားလုံး ခန်းမကြီးထဲမှ စိတ်လှုပ်ရှားစွာ ထွက်ခွာလာပြီး စီနီယာကျောင်းသားများနောက်သို့ လိုက်ကာ စီမံခန့်ခွဲရေးအဆောက်အဦးသို့ သွားကြသည်။ မှတ်ပုံတင်ခြင်းမှာ အချိန်အများကြီး မပေးရပေ။ ကျောင်းသားများသည် ကိုယ်ရေးအချက်အလက်အချို့ကို ဖြည့်စွက်ရပြီး ပထမပညာသင်နှစ်အတွက် ပလက်တီနမ်ဒင်္ဂါး ၁၀ ပြား ပေးဆောင်ရသည်။ အကယ်ဒမီသည် ကျောင်းလခအတွက် အလွန်တင်းကြပ်ပြီး ပလက်တီနမ်ဒင်္ဂါးမှလွဲ၍ အခြားမည်သည့်အရာကိုမျှ လက်မခံပေ။
စာရွက်စာတမ်းများ ပြီးစီးသွားသောအခါ ကျောင်းသားတစ်ဦးစီကို သစ်သားသေတ္တာတစ်လုံးစီ ပေးအပ်ပြီး အဆောင်ခန်းများ သတ်မှတ်ပေးသည်။ တစ်နာရီအတွင်းမှာပင် ကျောင်းသားသစ်များအားလုံး သူတို့၏ သက်ဆိုင်ရာ အဆောင်များသို့ ရောက်ရှိသွားကြသည်။ ယောက်ျားလေးဆောင်မှာ ကျောင်းဝင်း၏ အရှေ့ဘက်တွင်ရှိပြီး မိန်းကလေးဆောင်မှာ အနောက်ဘက်တွင် ရှိသည်။
စီမံခန့်ခွဲရေးအဆောက်အဦးမှာကတည်းက အာဒမ်နှင့် အက်ဒဝပ်တို့သည် အခန်းဖော်ဖြစ်ရန် ဆုံးဖြတ်ခဲ့ကြပြီးဖြစ်သည်။ ကျောင်းသားတိုင်းကို အခန်းဖော် ကျပန်းသတ်မှတ်ပေးမည်ဖြစ်သော်လည်း သူတို့နှစ်ဦးမှာ ရင်းနှီးပြီးသားဖြစ်၍ အတူနေရန် တောင်းဆိုခဲ့ကြခြင်းဖြစ်သည်။
ယောက်ျားလေးဆောင်၏ တတိယထပ်တွင် အာဒမ်နှင့် အက်ဒဝပ်တို့သည် အခန်းနံပါတ် ၅၂A ရှေ့၌ စိတ်လှုပ်ရှားစွာ ရပ်နေကြသည်။ အာဒမ်က သေတ္တာကြီးကို ကြမ်းပြင်ပေါ်ချပြီး တံခါးကို ဖွင့်လိုက်သည်။ အခန်းထဲသို့ ဝင်လိုက်ချိန်တွင် အခန်းဖွဲ့စည်းပုံကို ကြည့်ပြီး သူတို့၏ မျက်လုံးများ တောက်ပသွားတော့သည်။ အက်ဒဝပ်မှာ ချမ်းသာကြွယ်ဝသော မိသားစုမှ လာသူဖြစ်၍ သိပ်မထူးဆန်းသော်လည်း အာဒမ်အတွက်မူ ထိုသို့မဟုတ်ချေ။
"ဝါး! ဒါက ငါတို့ နောက်တစ်နှစ်လုံး နေရမယ့်နေရာလား? မိုက်လိုက်တာ!" အာဒမ် အံ့သြမဆုံး ဖြစ်နေသည်။အကယ်ဒမီ၏ အဆောင်မှာ အတော်လေး ကျယ်ဝန်းလှသည်။ အခန်းထဲဝင်လျှင် ဧည့်ခန်းကျယ်ကြီးတစ်ခုကို အရင်တွေ့ရသည်။ မျက်နှာကျက်တွင် တပ်ဆင်ထားသော လှပသည့် (Crystal Chandelier) ဖန်မီးဆိုင်းကြီးက အခန်းတစ်ခုလုံးကို လင်းထိန်စေသည်။ ကြမ်းပြင်ပေါ်တွင် အရည်အသွေးမြင့် ကော်ဇောကို ခင်းထားသည်။ ဆိုဖာအစုံနှင့် အနုပညာဆန်သော စားပွဲဝိုင်းလေးတစ်ခုလည်း ရှိသေးသည်။
ဧည့်ခန်း၏ ဘယ်ဘက်တွင် ရေချိုးခန်းရှိသည်။ စကျင်ကျောက်ပြားများ ကပ်ထားသော ရေချိုးကန်နှင့် သီးသန့် အိမ်သာခန်းလေးတစ်ခု ပါဝင်သည်။ မှန်အရှည်ကြီး၊ လက်ဆေးကန်နှင့် မျက်နှာသုတ်ပုဝါများ ထားရန် စင်များလည်း ရှိသည်။ ဧည့်ခန်း၏ ညာဘက်တွင် နှစ်ထပ်ကုတင်ရှိပြီး ကုတင်ဘေးတွင် ဗီရိုနှစ်လုံး ရှိသည်။ နောက်ဆုံးတွင် ဧည့်ခန်းနှင့် မျက်နှာချင်းဆိုင်၌ စာကြည့်ခန်းအဖြစ် သုံးနိုင်မည့် နေရာလေးတစ်ခု ရှိသည်။
"မဆိုးပါဘူး" အက်ဒဝပ်က အခန်းကို စစ်ဆေးပြီး ကုတင်ပေါ် လှဲချလိုက်သည်။ "ငါက အောက်ကုတင်ကို ယူမယ်နော် ဟီးဟီး။"
အာဒမ်က မျက်လုံးလှန်ကြည့်လိုက်ပြီး စိတ်ထဲမှ တွေးလိုက်သည်။ ‘မင်းက ဝနေတော့ အပေါ်ကုတင်ကိုလည်း တက်နိုင်မှာ မဟုတ်ပါဘူးလေ’
အာဒမ်သည် သူ၏ပစ္စည်းများကို သိမ်းဆည်းပြီးနောက် ဧည့်ခန်းရှိ ဆိုဖာပေါ်တွင်ထိုင်ကာ သစ်သားသေတ္တာထဲက ပစ္စည်းများကို စတင်ကြည့်ရှုတော့သည်။ အက်ဒဝပ်လည်း ထိုနည်းတူပင်။ သေတ္တာကို ဖွင့်လိုက်သည်နှင့် ပထမဆုံး မြင်ရသည်မှာ အကယ်ဒမီ၏ ကျောင်းဝတ်စုံဖြစ်သော အစိမ်းရင့်ရောင် ဝတ်ရုံပင်ဖြစ်သည်။ ၎င်းမှာ မှော်ဆရာ အဲလက်စ်တို့ ဝတ်ထားသည့် ဝတ်ရုံမျိုး ဖြစ်သည်။
ဝတ်ရုံပေါ်ရှိ လေးရွက်ကလိုဗာ အမှတ်တံဆိပ်ကို မြင်သောအခါ အာဒမ် စိတ်လှုပ်ရှားသွားသည်။ သူသည် ဝတ်ရုံကို ဝတ်ကြည့်ကာ သူရဲကောင်းတစ်ယောက်လို ပို့စ်ပေးလိုက်သည်။ "ဟီးဟီးဟီး" သူသည် ကလေးတစ်ယောက်လို ရယ်နေမိသည်။ ဝတ်ရုံသစ်ကြီးနှင့် ပို့စ်ပေးပြီးနောက် အာဒမ် ပြန်ထိုင်ကာ သေတ္တာထဲက ကျန်ရှိသော ပစ္စည်းများကို စစ်ဆေးလိုက်သည်။
သေတ္တာထဲတွင် စာအုပ်အထူကြီး နှစ်အုပ် ရှိသည်။ ပထမစာအုပ်မှာ 'မှော်အတတ် ပညာရပ် နိဒါန်း' (Introduction to Arcane Magic) ဖြစ်ပြီး၊ ဒုတိယစာအုပ်မှာ ''မှော်ဂါထာ ရွတ်ဖတ်ခြင်း အခြေခံ' (Basics of Spell-casting)ဖြစ်သည်။ ထိုစာအုပ်နှစ်အုပ်အပြင် အာဒမ်ကို ဆွဲဆောင်နေသည့် ထူးဆန်းသော အရှိန်အဝါရှိသည့် စာအုပ်တစ်အုပ်လည်း ပါသေးသည်။ ၎င်းမှာ အနက်ရောင် မျက်နှာဖုံးအမာနှင့်ဖြစ်ပြီး အပေါ်တွင် ဆန်းကြယ်သော ဂျီဩမေတြီပုံစံများ ထွင်းထုထားသည်။
"အက်ဒဝပ်၊ ဒါက ဘာလဲဆိုတာ မင်းသိလား?" သူက စူးစမ်းစွာ မေးလိုက်သည်။
"ဟင်?" အက်ဒဝပ်က စာအုပ်တစ်အုပ်ကို လှန်ကြည့်နေရာမှ လှည့်ကြည့်ပြီး ဖြေသည်။ "ဪ၊ အဲဒါလား။ အဲဒါက 'ဂရီမွား'လို့ ခေါ်တယ်။ အထူးပစ္စည်းတွေနဲ့ လုပ်ထားတာမို့ စာမျက်နှာတွေက ကုန်သွားတယ်လို့ မရှိဘူး။ မှော်ဆရာတွေက သူတို့ရဲ့ မှော်ဂါထာပုံစံ (Spell models) တွေနဲ့ တခြားအရေးကြီးတဲ့ မှတ်စုတွေ ရေးဖို့ သုံးကြတာ။"
"ဪ... နားလည်ပြီ" အာဒမ် ခေါင်းညိတ်လိုက်သည်။ သူသည် ဂရီမွားကို ဖွင့်ကြည့်လိုက်ရာ စာမျက်နှာများမှာ ဗလာဖြစ်နေသည်။ သူ ခဏမျှ လှန်လှောကြည့်ပြီးနောက် ဘေးတွင် ခေတ္တချထားလိုက်သည်။
သေတ္တာထဲတွင် ကျန်ရှိနေသည်မှာ သားရေသေတ္တာလေးတစ်လုံး၊ ဖန်ဘူးတစ်ဘူးနှင့် လိပ်ထားသော စာလိပ်တစ်ခုသာ ဖြစ်သည်။ အာဒမ်သည် သားရေသေတ္တာလေးကို ယူကာ ဖွင့်လိုက်သည်။ အတွင်း၌ ပိုးသားပေါ်တွင် တင်ထားသော ပစ္စည်းနှစ်ခုကို တွေ့ရသည်။ တစ်ခုမှာ ဖောက်ထွင်းမြင်ရသည့် ဖန်ပုလင်းငယ်လေးဖြစ်ပြီး နောက်တစ်ခုမှာ ဖန်လုံး တစ်ခုဖြစ်သည်။
၎င်းကို မြင်သောအခါ အာဒမ်၏ မျက်လုံးများ တောက်ပသွားသည်။ ဤသည်မှာ ကျောင်းသားအဆင့်သတ်မှတ်ချက်တွင် ပထမရရှိခဲ့သည့်အတွက် ရရှိသည့် ဆုလာဘ်ပင် ဖြစ်သည်! စီမံခန့်ခွဲရေးဌာနက ဆရာတစ်ဦး၏ ပြောပြချက်အရ ဖန်ပုလင်းထဲက အရည်မှာ 'ခန္ဓာကိုယ် သန့်စင်ဆီ' ဟု ခေါ်သည်။ ဤအရည်သည် ခန္ဓာကိုယ်အတွင်းရှိ အညစ်အကြေးများကို ထိရောက်စွာ ဖယ်ရှားပေးနိုင်သည်။ တစ်ချိန်တည်းမှာပင် ၎င်းက ခန္ဓာကိုယ်ဖွဲ့စည်းပုံကို ပြန်လည်ပြုပြင်ပေးပြီး အလွန်အမင်း သန်မာလာစေသည်။ ၎င်းမှာ အလွန်ရှားပါးပြီး ဈေးကြီးသော ဆေးရည်တစ်မျိုးဖြစ်သည်။
ဖန်လုံးထဲတွင်မူ အဆင့် ၁ မှော်ပညာဖြစ်သည့် 'လျှို့ဝှက်ဆန်းကြယ် ရောင်ခြည်' (အဲလ်ဒရစ် အလင်းတန်း) ဆိုင်ရာ ဗဟုသုတများ ပါရှိသည်။ ဤအဝေးပစ်မှော်ပညာသည် အဆင့် ၁ မှော်ပညာများထဲတွင် ဖျက်အားအပြင်းဆုံး တိုက်ခိုက်မှုများထဲမှ တစ်ခုဖြစ်သည်။ ၎င်း၏ ဈေးကွက်ပေါက်ဈေးမှာ ပလက်တီနမ်ဒင်္ဂါး ၁၅ ပြားပင် ရှိသည်!
သူသည် ထိုပစ္စည်းနှစ်ခုကို သားရေသေတ္တာထဲသို့ ဂရုတစိုက် ပြန်ထည့်လိုက်သည်။ အခုဆိုလျှင် ပစ္စည်းနှစ်ခုသာ ကျန်တော့သည်— ဖန်ဘူးနှင့် စာလိပ်။ သေတ္တာထဲရှိ ပစ္စည်းအားလုံးထဲတွင် ဤနှစ်ခုမှာ တန်ဖိုးအရှိဆုံး ဖြစ်သည်။ အာဒမ်သည် စိတ်လှုပ်ရှားစွာ တုန်ယင်နေသော လက်များဖြင့် ၎င်းတို့ကို လှမ်းကိုင်လိုက်သည်။ သူ၏ မျက်လုံးထဲတွင် စိတ်လှုပ်ရှားမှုနှင့် မျှော်လင့်ချက်များ အပြည့်ရှိနေသည်။
အကြောင်းမှာ... ဤပစ္စည်းနှစ်ခုသည် သူ့ကို မှော်ဆရာတစ်ယောက် ဖြစ်လာစေရန် တိုက်ရိုက် ကူညီပေးမည့်အရာများ ဖြစ်သောကြောင့်ပင်!