အခန်း ၉၈ : မဟာဝေမင်းဆက် ဖရိုဖရဲ ဖြစ်ခြင်း
"မဟာဝေ ဧကရာဇ်မင်းမြတ် နတ်ရွာစံသွားပြီတဲ့လား..."
ဒီရုတ်တရက် သတင်းက ချင်းကျောက်ကို ကြောင်အသွားစေခဲ့သည် ။
သူမ သိထားတာက မဟာဝေ ဧကရာဇ်မင်းမြတ်က အနည်းဆုံး မူလဝိညာဉ် အဆင့် ကျင့်ကြံသူ တစ်ယောက်ဖြစ်ပြီး မူလဝိညာဉ် အဆင့် ကျင့်ကြံသူ တစ်ယောက်က ဒီအတိုင်းပဲ နတ်ရွာစံသွားသည်တဲ့လား။
'ချီသွေဖည်သွားတာ.... ဒါက စိတ်နှလုံးမိစ္ဆာကြောင့်လား...'
နောက်ကွယ်က ကြိုးကိုင်သူရဲ့ ရည်ရွယ်ချက် အစစ်အမှန်ကို ချင်းကျောက်ဟာ ရုတ်တရက် နားလည်သွားခဲ့သည်။ သူတို့ရဲ့ ပန်းတိုင်က မဟာဝေ ဧကရာဇ်မင်းမြတ်ရဲ့ ရင်ထဲမှာ စိတ်နှလုံးမိစ္ဆာ ဖြစ်ပေါ်လာအောင်လုပ်ဖို့ ရည်ရွယ်တာပင်။
"ရှူး.."
ချင်းကျောက် လေအေးတစ်ချက် ရှူသွင်းလိုက်မိသည်။ ဒီလို နည်းလမ်းမျိုးက တကယ် မကြားဖူးပေ။
ဆိုလိုတာက နောက်ကွယ်က ကြိုးကိုင်သူက မဟာဝေ ဧကရာဇ်မင်းမြတ် အကြောင်း ကောင်းကောင်း သိထားပြီး သူက သူ့မိသားစုကို ဂရုအစိုက်ဆုံး ဆိုတာ သိထားလေသည်။
ဧကရာဇ်မင်းမြတ်ရဲ့ မိသားစုကို ထိခိုက်လိုက်တာနဲ့ သူ့ရဲ့ စိတ်အခြေအနေက ပျက်စီးသွားမယ် ဆိုတာ သိထားခဲ့သည်။
ထိုနောက် စိတ်နှလုံးမိစ္ဆာ မွေးဖွားလာခဲ့လေသည်။
......
ကျင့်ကြံသူ တစ်ယောက် အနေနဲ့ စိတ်နှလုံးမိစ္ဆာတွေ ဘယ်လောက် ကြောက်စရာ ကောင်းလဲ ဆိုတာ ချင်းကျောက် ကောင်းကောင်း သိထားခဲ့သည်။
ကျင့်ကြံခြင်း လောက၌ စိတ်နှလုံးမိစ္ဆာဆိုတဲ့ စကားလုံး တစ်လုံးတည်းနဲ့တင် လူတွေရဲ့ မျက်နှာထား ပြောင်းလဲသွားစေဖို့ လုံလောက်တယ်လို့ ပြောလို့ ရပေသည်။
ကျင့်ကြံမှု အဆင့် ရှိတဲ့ ဘယ်ကျင့်ကြံသူမဆို စိတ်နှလုံးမိစ္ဆာ ဝင်ရောက်နိုင်ပြီး မူလဝိညာဉ် အဆင့်လည်း ချွင်းချက် မဟုတ်ပေ။
"မဟာဝေ မင်းဆက်ရဲ့ ဧကရာဇ်မင်းမြတ်က အရူးလုပ်ခံလိုက်ရတာပဲ... သူ့ကို အရူးလုပ်တဲ့ လူကလည်း သူ့အကြောင်း သိလွန်းအားကြီးနေတယ်... ဖြစ်နိုင်တာက ဒါက နောက်ကွယ်က ကြိုးကိုင်သူရဲ့ ထောင်ပေါင်းများစွာသော အစီအစဉ်တွေထဲက တစ်ခုပဲ ဖြစ်မယ်... အဲဒီလူတောင် သူ့အစီအစဉ်က ဒီလောက် လွယ်လွယ်ကူကူ အောင်မြင်သွားလိမ့်မယ်လို့ မျှော်လင့်မထားခဲ့လောက်ဘူး"
အဘွားအို၏ အသံ ထွက်ပေါ်လာခဲ့သည်။ "ငါ မူလဝိညာဉ်အဆင့် ကျင့်ကြံသူ တစ်ယောက် ရူးသွားတာမြင်ဖူးတယ်.... သူက မိစ္ဆာလမ်းစဉ်ထဲ ကျရောက်သွားပြီး ပြဿနာကောင် မိစ္ဆာကျင့်ကြံသူ ဖြစ်သွားခဲ့တယ်"
"မဟာဝေ မင်းဆက်ရဲ့ ဧကရာဇ်မင်းမြတ် ရူးသွားတာက ငါမြင်ဖူးသမျှထက် ပိုပြင်းထန်တယ်..."
"သူ့ရဲ့ စိတ်နှလုံးမိစ္ဆာက သူ့ကို တန်ပြန်မှုခံစားရစေခဲ့တယ်....ပြီးတော့ သူက တန်ပြန်မှုကို ခံနိုင်ရည် မရှိတော့ဘဲ စိတ်နှလုံးမိစ္ဆာရဲ့ သတ်ဖြတ်ခြင်း ခံလိုက်ရတာပဲ"
ဒီအချက် ရောက်တော့ အဘွားအို သက်ပြင်းမချဘဲ မနေနိုင်တော့ပေ။ "မူလဝိညာဉ်အဆင့် ကျင့်ကြံသူတွေတောင် တစ်ခါတလေ သာမန်လူတွေလိုပဲ ကျိုးပဲ့လွယ် တယ်"
"ကလေးမလေး... မင်း နေပြည်တော်ထဲမှာ တမင်သက်သက် နေခဲ့တာ ဖြစ်နိုင်တာက မင်း ဒီနေ့ကို စောင့်နေခဲ့တာလား"
"နေပြည်တော်ထဲမှာ ဒီလောက် ကြီးမားတဲ့ ကိစ္စကြီးဖြစ်လာမယ် ဆိုတာ မင်း သိနေခဲ့တာလား"
အဘွားအိုရဲ့ ရုတ်တရက် မေးခွန်းက ချင်းကျောက်ရဲ့ မျက်နှာကို တောင့်တင်းသွားစေလုနီးပါး ဖြစ်သွားခဲ့သည်။
ချင်းကျောက် ခေါင်းခါပြီး ပြောလိုက်သည်။"အနာဂတ်ကို ကြိုသိနိုင်စွမ်း ကျွန်မမှာ ဘယ်လိုလုပ် ရှိမှာလဲ"
ထို့နောက် သူမ ခေါင်းစဉ် ချက်ချင်း ပြောင်းလိုက်၏။ "အကယ်၍ မင်းဆက် တစ်ခုရဲ့ ဧကရာဇ်မင်းမြတ် ရုတ်တရက် သေဆုံးသွားရင် မင်းဆက်က မကြာခင် ဖရိုဖရဲ ဖြစ်တော့မယ်လို့ ဆိုလိုတာလား"
အဘွားအို ပြောလိုက်သည် - "ဖရိုဖရဲ ဖြစ်မှုက သေချာပေါက် ဖြစ်လာမှာပါ....အဲဒီထီးနန်းပေါ်မှာ ထိုင်နေသရွေ့ တိုင်းပြည် တစ်ခုရဲ့ ကံတရားကို ထိန်းချုပ်နိုင်တယ်လေ"
"မဟာဝေ မင်းဆက် တစ်ခုလုံးရဲ့ အရင်းအမြစ်တွေကို ထိန်းချုပ်နိုင်မှာ... ဒီလို အခြေအနေမျိုးကို... ဘယ်သူက သွေးမဆောင်ခံရဘဲ နေမှာလဲ"
ချင်းကျောက် တစ်ခုခုကို ရုတ်တရက် တွေးမိလိုက်ပြီး မျက်မှောင်ကြုတ်ကာ မေးလိုက်သည်။ "မဟာဝေ မင်းဆက်ရဲ့ ပြီးခဲ့တဲ့ ဧကရာဇ်က မသေသေးဘူး မဟုတ်လား... ဘာပဲဖြစ်ဖြစ် သူကလည်း အနည်းဆုံး မူလဝိညာဉ် အဆင့် ဖြစ်နေလောက်ပြီလေ... သူ နှစ်တစ်ထောင် နှစ်ထောင်လောက်တော့ အသက်ရှင်နိုင်သင့်တာပဲ"
"ဒီအချိန်မှာ သူ ထွက်လာပြီး အခြေအနေကို တာဝန်ယူဖြေရှင်းမှာ မဟုတ်ဘူးလား.... ရှင်ကျန်ရစ်နေတဲ့ မဟာဝေ မင်းဆက်ရဲ့ ဧကရာဇ်ဟောင်းက တစ်ပါးမက ရှိမယ်လို့တောင် ကျွန်မ ထင်တယ်"
"ဘယ်သူ သိမှာလဲ" ဒီမေးခွန်းကို ဘယ်လို ဖြေရမလဲ ဆိုတာ အဘွားအို မသိပေ။
ဖြစ်နိုင်တာက အဲဒီ ဧကရာဇ်ဟောင်းတွေက မင်းဆက်ရဲ့ ကိစ္စတွေမှာ ဝင်မပါချင်ကြတော့တာလည်း ဖြစ်ကောင်ဖြစ်နိုင်လေသည်။
ဒါမှမဟုတ် တစ်ခုခုကြောင့် ကြန့်ကြာနေပြီး ဝင်မပါနိုင်တာလည်း ဖြစ်နိုင်ပေသည်။
[မဟာဝေ ဧကရာဇ်မင်းမြတ်၏ ရုတ်တရက် သေဆုံးမှုက ကမ္ဘာလောကကြီးကို တုန်လှုပ်သွားစေပြီး နေပြည်တော်ကို နောက်တစ်ကြိမ် တင်းကြပ်စွာ ပိတ်ဆို့လိုက်သည်။ အမိန့်ပေးလိုက်သူမှာ မဟာဝေ မင်းဆက်၏ အိမ်ရှေ့စံ မင်းသား ဖြစ်သည်။ သင်ဟာ နေပြည်တော်မှ ထွက်ခွာ၍ မရနိုင်ပြန်ကြောင်း သိလိုက်ရသည်။ အကယ်၍ ဒီလို အခြေအနေမျိုးမှာ တိတ်တဆိတ် ထွက်ခွာပါက သင်အား အပြစ်သားအဖြစ် သတ်မှတ်ခံရပြီး ချက်ချင်း အသတ်ခံရလိမ့်မည်။]
[နေပြည်တော် အတွင်း ဤမျှ ကြာရှည်စွာ နေထိုင်ခဲ့သော သင်ဟာ အောင်မြင်မှု မရှိဘဲ နေခဲ့သည် မဟုတ်ပေ။ နေပြည်တော် အတွင်းရှိ လူအများအပြားကို လာဘ်ထိုးရန် ဝိညာဉ်ကျောက်တုံးဖြင့် ပေါက်ခြင်းနည်းလမ်းကို သင် အသုံးပြုခဲ့သည်။ သူတို့သည် သင့်မျက်လုံးနှင့် နားများ ဖြစ်လာကြပြီး နေပြည်တော် အတွင်းနှင့် နေပြည်တော် အပြင်ဘက်မှ သတင်းအချက်အလက် အချို့ကို အချိန်မရွေး သင့်ထံ ယူဆောင်လာပေးကြသည်။]
[စစ်သည် တစ်သန်းကို ကွပ်ကဲပြီး ကိုယ့်ကိုယ်ကိုယ် ဘုရင်အဖြစ် ကြေညာလိုက်သည့် မဟာဝေ စစ်သူကြီး တစ်ဦး ရှိကြောင်း သင် သိလိုက်ရသဖြင့် အနာဂတ်သည် သင် ရင်းနှီးသော ဦးတည်ချက်အတိုင်း ဖွံ့ဖြိုးတိုးတက်လာတော့မည်ကို သင် သိလိုက်သည်။]
[အသစ် တက်လာသည့် အိမ်ရှေ့စံ မင်းသားက အောက်ကလူများကို မဖိနှိပ်နိုင်ဘဲ မဟာဝေ မင်းဆက်သည် စစ်မီးလျှံများ အတွင်း နစ်မြုပ်သွားခဲ့သည်။]
[အိမ်ရှေ့စံ မင်းသား ရေနစ်သေဆုံးသွားကြောင်း သင် ကြားသိလိုက်ရသောအခါ ၎င်းက အလွန် ရယ်စရာကောင်းပြီး ဟာသဆန်သည်ဟု သင် ခံစားလိုက်ရသည်။ တိုင်းပြည် တစ်ခု၏ အိမ်ရှေ့စံ မင်းသားက အနည်းဆုံး အခြေတည်အဆင့် ဖြစ်နေပြီး ရွှေအမြုတေ အဆင့်တောင် ဖြစ်ကောင်း ဖြစ်နိုင်ပေရာ ဘယ်လိုလုပ် ရေနစ်သေဆုံးနိုင်မလဲဟု တွေးမိလိုက်သည်။]
[အသက် ၃၀ နှစ် - ချင်းမိသားစုမှ တပည့်တစ်ဦး နေပြည်တော်သို့ ရောက်ရှိလာခဲ့သည်။ သူ့ထံမှ တဆင့်... ချင်းမိသားစု ပျက်စီးသွားပြီ ဖြစ်ကြောင်း သင် သိလိုက်ရသည်]
[ချင်းမိသားစု ပျက်စီးခြင်း လုပ်ငန်းစဉ်သည် ပြီးခဲ့သည့် မသေမျိုးကျင့်ကြံခြင်း သရုပ်ဖော် ဘဝနှင့် အတိအကျ တူညီနေခဲ့သည်။]
[သင် အနည်းငယ်မျှ မအံ့သြမိပေ။]
[...]
ချင်းကျောက် မျက်လုံးဖွင့်ပြီး ဖြည်းညှင်းစွာ လေမှုတ်ထုတ်လိုက်၏။ သူမ နေပြည်တော် အတွင်း၌ အခြေတည်အဆင့် (၄) သို့ ချိုးဖျက်ဝင်ရောက်နိုင်ခဲ့ပေပြီ။
မကြာသေးမီက ကြီးမားသော ကိစ္စရပ်များ အများအပြား ဖြစ်ပွားခဲ့သဖြင့် သူမ ကျင့်ကြံတာက ကြန့်ကြာခဲ့ရသည်။
ရလဒ်အနေဖြင့် သူမဟာ ပြီးခဲ့သည့် အကြိမ်ထက် တစ်နှစ်နောက်ကျပြီးမှ အခြေတည်အဆင့် (၄) သို့ ရောက်ရှိနိုင်ခဲ့သည်။
နေပြည်တော်ကို ဆက်တိုက် ပိတ်ဆို့ထားခြင်းက မြို့ထဲက ကျင့်ကြံသူတွေကို ညည်းညူစေခဲ့သည်။
အခု...မဟာဝေ မင်းဆက်ရဲ့ ဧကရာဇ်မင်းမြတ်နဲ့ အိမ်ရှေ့စံ မင်းသားတို့ အကြောင်းပြချက် မရှိဘဲ တစ်ယောက်ပြီး တစ်ယောက် သေဆုံးသွားတာနဲ့ အတူ နေပြည်တော်အား ပိတ်ဆို့ထားခြင်းကို နောက်ဆုံးတော့ ဖယ်ရှားလိုက်ပေပြီ။
ယခု သူမသာ ထပ်မံ သရုပ်ဖော်နိုင်လျှင်တောင် ဤနေရာတွင် ကြာရှည် မနေနိုင်ကြောင်း ချင်းကျောက် သိလေသည်။ ဘာပဲဖြစ်ဖြစ် မသေမျိုးကျင့်ကြံခြင်း သရုပ်ဖော် စနစ်ထဲမှာ သေလမ်းရှာခြင်းက သူမအတွက် ပြဿနာ မဟုတ်ပေ။
သို့သော် သူမ မသေခင် အချိန်အနည်းငယ် ပိုကြာအောင် အသက်ရှင်ချင်သေးလေသည်။ အကယ်၍ သူမသာ အချိန်အနည်းငယ် ပိုကြာအောင် အသက်ရှင်ရင် အနာဂတ် အကြောင်း ပိုသိရပေမည်။
ထိုအပြင် သူမဟာ အချိန်အနည်းငယ် ပိုကြာအောင် အသက်ရှင်ရင် သူမ သေဆုံးပြီးနောက် ရရှိမယ့် ဆုလာဘ်တွေက ပိုကြွယ်ဝပေလိမ့်မည်။
နှမြောစရာ ကောင်းတာက သူမ ပိုကြာကြာ အသက်ရှင်ချင်ပေမယ့် လူတချို့က သူမကို အသက်ရှင်ခွင့် မပေးချင်ကြောင်း ချင်းကျောက် မကြာမီ သိလိုက်ရသည်။
…