အခန်း ၉၇ : မဟာဝေမင်းဆက် ဧကရာဇ် ချန်ဖုန်းယင် သေဆုံးခြင်း
အဘွားအိုက ပြောလ်ိုက်သည် - "ဖြစ်နိုင်တာက သူတို့တွေက ဧကရာဇ်မင်းမြတ် စေလွှတ်လိုက်တဲ့ လူသတ်သမားကို စုံစမ်းစစ်ဆေးနေတဲ့ လူတွေ ဖြစ်နေမလား"
သူမ ဒီစကား ပြောလိုက်တာနဲ့ ချင်းကျောက် ရုတ်တရက် အဓိပ္ပာယ် ရှိသည်ဟု ခံစားလိုက်ရသည်။
ငြင်းစရာ နည်းလမ်း မရှိပေ။
အဘွားအိုက ဝိညာဉ်အကြွင်းအကျန် အခြေအနေတွင် ရှိနေသလို သူမ၌ တိုက်ခိုက်ရေး ခွန်အား သိပ်မရှိပေ။
သို့သော်… သူမခေါင်းထဲမှ ဗဟုသုတနှင့် အတွေ့အကြုံများက ဤမျှ ကြာရှည်စွာ ရှင်သန်လာပြီးနောက် အကြီးမားဆုံး ရတနာများ ဖြစ်လာခဲ့သည်။
ထို့အပြင် ချင်းကျောက်က အဘွားအို၏ ဂူသင်္ချိုင်းသို့ သွားရောက်ပြီး လုယူရန် အခွင့်အရေး မရှာတွေ့သေးပေ…
'အဟွတ် အဟွတ်...'
သူမစိတ်ထဲမှ ထူးဆန်းသော အတွေးများကို ဘေးဖယ်ထားလိုက်ပြီး ချင်းကျောက် မျက်မှောင် အနည်းငယ် ကြုတ်လိုက်ကာ အသံနိမ့်နိမ့်ဖြင့် ပြောလိုက်သည်။ "ပြဿနာက အခု နေပြည်တော်ကနေ ထွက်ခွာဖို့ နည်းလမ်း မရှိတာပဲ... မဟာဝေ မင်းဆက်ရဲ့ မြို့စောင့် စစ်တပ်က လွယ်လွယ်ကူကူ လှည့်စားလို့ ရတဲ့ အရာ မဟုတ်ဘူး"
"မြို့ရိုးပေါ်က ရွှေအမြုတေအဆင့် ကျင့်ကြံသူတွေက ငါ့ကို ထွက်ခွာခွင့် ပြုမှာ မဟုတ်ဘူး"
အဘွားအို ပြောလိုက်၏။"ဒါဆိုရင် ပုန်းအောင်းဖို့ နေရာတစ်ခု ရှာလိုက်... တစ်ချိန်လုံး နေရာတစ်ခုတည်းမှာပဲ မနေနဲ့"
[သင် အဘွားအို၏ အကြံပြုချက်ကို လက်ခံလိုက်ပြီး နေပြည်တော် အတွင်း၌ ဝေးလံခေါင်သီသော ဧည့်ဂေဟာတစ်ခု ရှာဖွေတွေ့ရှိခဲ့သည်။ သင်ဟာ ဤဧည့်ဂေဟာတွင် တည်းခိုပြီး ရက်အနည်းငယ်ကြာ ပုန်းအောင်းရန် ပြင်ဆင်လိုက်သည်။]
[အသက် ၂၈ နှစ် - သင် ကောလာဟလ တစ်ခု ကြားသိခဲ့ရသည်။ မဟာဝေ မင်းဆက်မှ မင်းသားများနှင့် မင်းသမီးများ အများအပြား အမဲလိုက်ကွင်းရှိ နွေဦး အမဲလိုက်ပွဲ အတွင်း မိစ္ဆာသားရဲများ၏ သတ်ဖြတ်ခြင်း ခံလိုက်ရသည်]
[ရင်းနှီးသော ဇာတ်လမ်းက သင့်၏ စိတ်ကို လန်းဆန်းသွားစေသည်]
......
"တစ်ခုခု မှားနေတယ်... တစ်ခုခု မှားနေတယ်" ချင်းကျောက် တူညီသော စကားလုံးများကို ထပ်ခါတလဲလဲ ပြောနေခဲ့သည်။
သူမ သတင်းရရှိပြီးနောက် ဧည့်ဂေဟာ၏ ဧည့်ခန်းထဲတွင် ခေါက်တုံ့ခေါက်ပြန် လမ်းလျှောက်နေခဲ့သည်။
သူမ အသံနိမ့်နိမ့်ဖြင့် ကိုယ့်ကိုယ်ကိုယ် ရေရွတ်လိုက်သည်။ "မင်းသားနဲ့ မင်းသမီးက အမဲလိုက်ကွင်းကို သွားတာလေ... သူတို့ထက် သန်မာတဲ့ မိစ္ဆာသားရဲ ဘယ်လိုလုပ် ရှိနေနိုင်မှာလဲ... ဒါ့အပြင် ဒီလောက် မြင့်မြတ်တဲ့ လူတွေရဲ့ ဘေးနားမှာ ဘယ်လိုလုပ် အစောင့်တွေ မရှိဘဲ နေမှာလဲ"
"ဒါတောင် သူတို့က အမဲလိုက်ကွင်းထဲမှာ မိစ္ဆာသားရဲရဲ့ သတ်ဖြတ်တာ ခံလိုက်ရတုန်းပဲ.... အဲဒါက ဆိုလိုတာ တစ်ခုပဲ ရှိတယ်....မိစ္ဆာသားရဲက သန်မာပြီး တစ်ယောက်ယောက်က အဲဒီ မိစ္ဆာသားရဲကို တမင်သက်သက် ဝင်ခွင့် ပြုလိုက်တာပဲ"
"ဒါဆိုရင် ဘာလို့ တစ်ယောက်ယောက်က အဲဒီလို လုပ်ရတာလဲ....သူတို့ရဲ့ ရည်ရွယ်ချက်က ဘာလဲ"
"လွန်ခဲ့တဲ့ တစ်နှစ်က မင်းသမီး ချန်နင်ရဲ့ သေဆုံးမှုကရော ဒီကိစ္စနဲ့ ဆက်စပ်နေမလား"
"အကြီးအကဲ ချင်း.... အရှင် ဘယ်လိုထင်လဲ"
အကြီးအကဲ ချင်းဆိုသည်မှာ ချင်းကျောက် အဘွားအိုကို ခေါ်ဝေါ်သော နာမည် ဖြစ်ကာ အဘွားအို၏ မျိုးရိုးအမည်မှာ ချင်း ဖြစ်သောကြောင့် ဖြစ်သည်။
"ငါ့မှာ လွန်ခဲ့တဲ့ တစ်နှစ်က အကြံပြုချက် အတိုင်းပဲ ရှိသေးတယ်... နေပြည်တော်ကနေ ထွက်ခွာဖို့ နည်းလမ်း တစ်ခု စဉ်းစား.... ဒီနေရာက ရေတွေ ပိုပိုပြီး နောက်ကျိလာပြီ.... ငါ သိပ်နားမလည်တာက နေပြည်တော်က လွန်ခဲ့တဲ့ နှစ်ဝက်ကတည်းက ပိတ်ဆို့ထားတာကို ပြန်ဖွင့်ပေးလိုက်ပြီလေ... ကလေးမလေး ... မင်း ဘာလို့ မထွက်သွားတာလဲ.... ဘာလို့ ဒီနေရာမှာ ဆက်နေနေသေးတာလဲ"
အဘွားအိုက ပြန်ဖြေပြီး သူမကို နှစ်ဝက်လောက်ကြာအောင် နားမလည်နိုင် ဖြစ်စေခဲ့သော မေးခွန်းကို မေးလိုက်၏။
'သူမ ဘာလို့ မထွက်သွားတာလဲ...'
အကြောင်းမှာ လာမည့် နှစ်အနည်းငယ်အတွင်း မဟာဝေ မင်းဆက်၌ ဘာဖြစ်လာမလဲ ဆိုသည်ကို သူမ သိချင်သောကြောင့် ဖြစ်လေသည်။
'သူမ ဒီအရာတွေကို အရင် ဖော်ထုတ်ရမယ် ဒါမှ နောက်တစ်ကြိမ် မသေမျိုးကျင့်ကြံခြင်းကို သရုပ်ဖော်သည့် အခါကျလျှင် တည်ငြိမ်မှု ရှိမှာ...'
သူမ စိတ်ထဲတွင် ထိုသို့ တွေးလိုက်၏။
သို့သော် ချင်းကျောက်က ဤသို့ ပြောလိုက်၏။ "နေပြည်တော်ထဲမှာ ကျွန်မ ရှာဖို့ လိုအပ်တဲ့ အရာတစ်ခု ရှိနေလို့ပါ"
ဒီအဖြေက မဖြစ်နိုင်မှန်း သိပေသည်။
သူမဟာ ချင်းကျောက်၏ ဒီအဖြေကို တစ်ဒါဇင်ကျော် ကြားခဲ့ပြီးပေပြီ။
သူမ ဆင်ခြေတောင် မပြောင်းလဲပေ။
သူမ သက်ပြင်းချလိုက်၏။ "ကလေးမလေး... ဒါက တော်ဝင် အာဏာပါဝင်ပတ်သက်နေတဲ့ တိုက်ပွဲ ဖြစ်နေပြီ.... မင်း အခု ပါဝင်ပတ်သက်ဖို့ အရည်အချင်း မပြည့်မီသေးဘူး.... အကယ်၍ မင်းက မူလဝိညာဉ် အဆင့်ကျင့်ကြံသူ တစ်ယောက် ဆိုရင်တော့ သူတို့က မင်းကို မျက်နှာသာ ပေးကောင်း ပေးနိုင်တယ်"
"ဒါပေမဲ့ မင်းက အခု အခြေတည်အဆင့်မှာပဲ ရှိသေးတာ... တကယ်လို့ မင်း ဒီလိုကိစ္စမျိုးမှာ ပါဝင်ပတ်သက်ရင် မင်းကို အပိုင်းပိုင်း အစစ ဖြစ်အောင် ချေမွပစ်နိုင်တဲ့ နောက်ဆက်တွဲ ဂယက်ရိုက်ခတ်မှုတွေ ဖြစ်သွားနိုင်တယ်"
"တော်ဝင် အာဏာ လုပွဲလား..." ချင်းကျောက် သူမ၏ လှပသော မျက်လုံးများကို ပြူးကျယ်လိုက်ပြီး အံ့သြစွာ ပြောလိုက်သည်။ "တစ်ယောက်ယောက်က မဟာဝေ မင်းဆက်ရဲ့ ဧကရာဇ်မင်းမြတ်ကို ဆွဲချပြီး ကိုယ်တိုင် ထီးနန်းပေါ် တက်ထိုင်ချင်နေတာလား"
"ရှူး..."
ဒီလို ပြောလိုက်မှ မဟာဝေ မင်းဆက်၏ မင်းသားများနှင့် မင်းသမီးများ တစ်ယောက်ပြီး တစ်ယောက် အသတ်ခံရခြင်းမှာ အဓိပ္ပာယ် ရှိသွားခဲ့သည်။
အစက မဟာဝေမင်းဆက် တော်ဝင်မိသားစု၏ မျိုးဆက်များက ကံဆိုးလွန်းသည်ဟုသာ သူမ ထင်ခဲ့မိသည်။
သူတို့ ဘယ်သွားသွား သေဆုံးကြရလေသည်။
'တကယ်တော့... မဟာဝေ မင်းဆက်၏ တော်ဝင် အာဏာကို သိမ်းပိုက်ချင်တဲ့ နောက်ကွယ်က ကြိုးကိုင်သူတစ်ယောက် တကယ် ရှိနေတာလား..'
ချင်းကျောက် သူမ၏ ချောမွေ့ပြီး ဖြူဖွေးသည့် မေးစေ့လေးကို ကိုင်လိုက်၏။
သူမ ရေရွတ်လိုက်သည် "သူတို့ ဘာလို့ အဲဒီ ဧကရာဇ်မင်းမြတ်ကို တိုက်ရိုက် မတိုက်ခိုက်ကြတာလဲ... အဲဒီ ဧကရာဇ်မင်းမြတ်က သိပ်စွမ်းအားကြီးလွန်းလို့လား.... ဟုတ်သားပဲ... ကျင့်ကြံခြင်း လောကထဲက ဧကရာဇ် တစ်ပါးက ဂိုဏ်းတစ်ခုရဲ့ ဂိုဏ်းချုပ် နဲ့ တူတာပဲ... တကယ်လို့ သူသာ စွမ်းအားမကြီးရင် တိုင်းပြည်ထဲက လူပေါင်း သောင်းချီကို ဘယ်လိုလုပ် ထိန်းချုပ်နိုင်မှာလဲ"
"ဒါကြောင့် နောက်ကွယ်က ကြိုးကိုင်သူက ဧကရာဇ်မင်းမြတ်ရဲ့ ဝန်းကျင်က လူတွေကို တိုက်ခိုက်မယ့် နည်းလမ်းကိုပဲ စဉ်းစားနိုင်တာ.... အဲဒီ မင်းသားတွေနဲ့ မင်းသမီးတွေက ပစ်မှတ်ကောင်းတွေပဲ"
" သူတို့က ဧကရာဇ်မင်းမြတ်ကို မယှဥ်နိုင်သာသိတော့ သူတန်ဖိုးထားရတဲ့ လူတွေကို ဒုက္ခပေးလိုက်တာပဲ"
"ငါ သဘောပေါက်ပြီ"
သို့သော် မကြာမီ သူမ မျက်မှောင် ထပ်ကြုတ်လိုက်သည်။
အကယ်၍ ဤကိစ္စက လာမည့် နှစ်အနည်းငယ် အတွင်း မဟာဝေ မင်းဆက်၏ ဆူပူသောင်းကျန်းမှုနှင့် ပဋိပက္ခတို့နှင့် ဆက်စပ်နေသည် ဆိုပါက....
'ဆိုလိုတာက နောက်ကွယ်က ကြိုးကိုင်သူ အောင်မြင်သွားပြီ ဆိုတဲ့ သဘောလား...'
[အသက် ၂၉ နှစ် - သင်ဟာ တုန်လှုပ်ဖွယ်ရာ သတင်းတစ်ပုဒ်ကို ရုတ်တရက် ကြားသိလိုက်ရသည်။ မဟာဝေ ဧကရာဇ်မင်းမြတ် ချန်ဖုန်းယင်ဟာ ချီသွေဖည်ခြင်းကြောင့် သေဆုံးသွားခဲ့သည်]
[...]
...