အခန်း ၉၆ : ကောင်းကင်ဝါးမျိုမိစ္ဆာနည်းစနစ်၏ မပြည့်စုံသော ဗားရှင်း၊ နေပြည်တော် ရှုတ်ထွေးလာခြင်း

​[ဆုလာဘ် ၁ - ကောင်းကင်ဝါးမျိုးခြင်း မိစ္ဆာ နည်းစနစ်၏ မပြည့်စုံသော ဗားရှင်း (စိတ်မပူပါနှင့် သင် ဒါကို သင်ယူလိုက်လျှင် ဆံပင်နီသွားမည် မဟုတ်ပါ....)]

​[ဆုလာဘ် ၂ - ပြာလဲ့တိမ်တိုက် ဓား (နန်းတော် ရတနာဆောင်ထဲတွင် ချန်ချန်ရွှယ် ရရှိခဲ့သည့် ဝိညာဉ်ဓား)]

​[ဆုလာဘ် ၃ - (၂၇) နှစ်စာ ကျင့်ကြံခြင်း အတွေ့အကြုံ (တန်ဖိုးရှိသည်ပ ကျင့်ကြံခြင်း အတွေ့အကြုံ တစ်ခု)]

​[ကျေးဇူးပြု၍ ရွေးချယ်ပါ]

​ဒီတစ်ခါ သူဟာ ဆုလာဘ် (၃) ခုထဲက တစ်ခု ရွေးချယ်နိုင်ပေသည်။ ပိုင်ယီ သရုပ်ဖော် စနစ်ပေါ်တွင် ပေါ်လာသည့် စာသား သတိပေးချက်ကို ကြည့်ပြီး သက်ပြင်းမချဘဲ မနေနိုင်တော့ပေ။ "နက်နဲထူးဆန်းတဲ့ မျက်နှာဖုံးရဲ့ ထူးခြားဆန်းကြယ်တဲ့ ဂုဏ်သတ္တိတွေက ချန်ချန်ရွှယ်လို သတိထားတတ်တဲ့ သူတော်စင်မ တစ်ယောက်တောင် မခုခံနိုင်တဲ့ အရာ ဖြစ်ပုံရတယ်"

​ချန်ချန်ရွှယ်ဟာ ကောင်းကင်အကျဉ်းထောင်ထဲ ဝင်ချင်တုန်းက ဒီရွေးချယ်ခံက မကြာခင် သေတော့မည် ဆိုတာ ပိုင်ယီ သိနေခဲ့သည်။

​မျှော်လင့်ထားသည့် အတိုင်းပင် သူ့ခန့်မှန်းချက်က အလွန် တိကျခဲ့သည်။ ချန်ချန်ရွှယ် အဲဒီညမှာပဲ သေဆုံးသွားခဲ့သည်။ နှစ်ကြိမ်စလုံး သူမ တူညီသော နည်းလမ်းဖြင့် သေဆုံးခဲ့ရသည်။

​ဒီတစ်ခါ အကြောင်းရင်း တစ်ခုခုကြောင့် ချန်ချန်ရွှယ်၏ မာကျောရက်စက်သော လူကြမ်းကြီးပါရမီ အလုပ်မလုပ်ခဲ့ပေ။

​ရလဒ်အနေဖြင့် သူမ အောင်မြင်မှုကို အသက်သွင်းရန် မည်သည့် အခွင့်အရေးမှ မရရှိခဲ့ပေ။

​ယခု ရမှတ် တွက်ချက်ရမည့် အချိန်တွင် မည်သည့် ထပ်ဆောင်း ဆုလာဘ်မှ မရှိပေ။

​ဒီဆုလာဘ် (၃) ခု အတွက်မူ... ပိုင်ယီဟာ ဆုလာဘ် (၁) ကို ရွေးချယ်လိုက်၏။

​......

​ချက်ချင်းပင် သတင်းအချက်အလက် စီးကြောင်း တစ်ခု သူ့ခေါင်းထဲသို့ တိုးဝင်လာခဲ့သည်။ ဤသတင်းအချက်အလက် ပမာဏမှာ စိတ်ကူးကြည့်၍ မရနိုင်လောက်အောင် များပြားလှပြီး ပိုင်ယီ မျက်လုံးများကို မှိတ်ထားပြီး အချိန်အကြာကြီး ချေဖျက်ပြီးနောက်မှသာ ဤမျှ များပြားသော သတင်းအချက်အလက် ပမာဏကို  ချေဖျက်နိုင်ခဲ့သည်။

​"ကိုယ့်ခွန်အား တိုးပွားလာအောင် အရာရာတိုင်းရဲ့ မူလစွမ်းအင်ကို ဝါးမျိုးတာပဲ... ငါ့မှတ်ဉာဏ်ထဲက ကျင့်စဉ် နည်းစနစ်နဲ့ နီးပါး ထပ်တူညီနေတယ်...."

​ပိုင်ယီ မျက်လုံးများကို ဖွင့်လိုက်၏။

​အကယ်၍ များပြားလှသည့် သတင်းအချက်အလက် ပမာဏကို စာအုပ်တစ်အုပ် အဖြစ် ရေးသားပြီး သာမန်လူများ နားလည်နိုင်မည့် အရပ်သုံး စကားသို့ ဘာသာပြန်လိုက်ဖို့ဆိုပါက အနည်းဆုံး စာလုံးရေ သန်းပေါင်းများစွာ ရှည်လျားပေလိမ့်မည်။

​သို့သော်... ဤသည်က ဤကျင့်စဉ် နည်းစနစ်၏ အစိတ်အပိုင်း အသေးစားလေး တစ်ခုသာ ရှိသေးပေသည်။

​ဖြစ်နိုင်သည်မှာ... ဆယ်ပုံတစ်ပုံလောက်ပင်။

​ပိုင်ယီ ရုတ်တရက် သူ့လက်ကို ဘေးဘက်သို့ ဝှေ့ယမ်းလိုက်ရာ မမြင်နိုင်သည့် ဆွဲငင်အားတစ်ခုဟာ မမြင်နိုင်သော လက်တစ်ဖက် အဖြစ် ပြောင်းလဲသွားပြီး သူ ဘွန်ဆိုင်းအပင်အဖြစ် ထားရှိသော ဝိညာဉ်ဆေးပင် တစ်ပင်ကို ဆွဲယူလိုက်သည်။

​ရုတ်တရက် မူလက သက်စောင့်အားနှင့် ပြည့်နှက်နေပြီး စိမ်းလန်းစိုပြေနေသည့် ဝိညာဉ်ဆေးပင်ဟာ သာမန် မျက်စိဖြင့် မြင်နိုင်သော နှုန်းထားဖြင့် ညှိုးနွမ်းသွားခဲ့သည်။

​နုနယ်သည့် အစိမ်းရောင် အကိုင်းအခက်များနှင့် အရွက်များဟာ လျင်မြန်စွာ ဝါသွားခဲ့ပြီး ဝိညာဉ်ဆေးပင် တစ်ပင်၏ ဝိညာဉ်အနှစ်သာရ မရှိတော့ပေ။

​ဝိညာဉ်ဆေးပင်မှ မူလက ထုတ်လွှတ်သည့် သင်းပျံ့သော မွှေးရနံ့များဟာလည်း ခြေရာလက်ရာ မကျန် ပျောက်ကွယ်သွားခဲ့သည်။

​အသက်ရှူချိန် အနည်းငယ် မပြည့်မီမှာပင် ဈေးမပေါသော ဝိညာဉ်ဆေးပင် တစ်ပင်က လမ်းဘေးရှိ ညှိုးနွမ်းနေသော ပေါင်းပင်များကဲ့သို့ ဖြစ်သွားခဲ့ရသည်။

​"ဟူး..." ပိုင်ယီ ဖြည်းညှင်းစွာ လေမှုတ်ထုတ်လိုက်ပြီး အရင်က တစ်ခါမှ မခံစားဖူးသည့် လန်းဆန်းသောခံစားချက်မျိုးကို ခံစားလိုက်ရလေသည်။

​ဒါက သူ့ကို တော်တော်လေး အံ့အားသင့်သွားစေခဲ့သည်။

​ထို့နောက် သူ ဝိညာဉ်ဆေးပင်ကို ကြည့်လိုက်ပြီး စုတ်မသပ်ပဲ မနေနိုင်တော့ပေ။

​"ဒါက ကောင်းကင်ဝါးမျိုးခြင်း မိစ္ဆာ နည်းစနစ်လား... တကယ့်ကို လွှမ်းမိုးချုပ်ကိုင်နိုင်ပါလား ....နည်းစနစ်ရဲ့ ဆယ်ပုံတစ်ပုံပဲ ရှိသေးတာတောင် အရာရာတိုင်းရဲ့ မူလအစကို ဝါးမျိုးနိုင်စွမ်း ရှိနေတုန်းပဲ... ဒါ့အပြင် မူလအစကို ဝါးမျိုးပြီး ကိုယ့်အတွက် အသုံးပြုနိုင်သေးတယ်"

​"ဒါပေမဲ့..." ပိုင်ယီ ကိုယ့်ကိုယ်ကိုယ် သုံးသပ်လိုက်၏။ "ကျင့်စဉ် နည်းစနစ်က မပြည့်စုံသေးလို့ ဝါးမျိုးလိုက်တဲ့ မူလစွမ်းအင်က ၁၀၀ ရာခိုင်နှုန်း ပြောင်းလဲခြင်း မရှိသေးပုံ ရတယ်... တစ်စိတ်တစ်ပိုင်းက ကမ္ဘာမြေနဲ့ ကောင်းကင် ကြားမှာ ကွယ်ပျောက်သွားတယ်"

​"တစ်နည်းအားဖြင့် ဝိညာဉ်ဆေးပင် တစ်ပင်ရဲ့ မူလစွမ်းအင်က အမှတ် (၁၀၀) ရှိရင် ငါက အမှတ် (၁၀) ပဲ သန့်စင်နိုင်တာပဲ"

​"ကျန်တာတွေကိုတော့ သန့်စင်လို့ မရဘူး..."

​သို့ပေမဲ့ ပိုင်ယီ မကျေနပ်တာမျိုး မရှိပေ။ ဤမျှ တုန်လှုပ်စရာ ကောင်းသည့် ကျင့်စဉ် နည်းစနစ်က ကျင့်ကြံခြင်း လောက တစ်ခုလုံးကို တုန်လှုပ်သွားစေရန် လုံလောက်ပေသည်။

​ဒီတစ်ခါ ချန်ချန်ရွှယ်၏ မသေမျိုးကျင့်ကြံခြင်း သရုပ်ဖော်မှုတွင် အောင်မြင်မှု အသက်သွင်းခြင်းမှ မည်သည့် ထပ်ဆောင်း ဆုလာဘ်မှ မရရှိခဲ့သော်လည်း လုံလောက်နေပေပြီ။

​သူ့ရင်ထဲ ပေါ်လာသည့် ခံစားချက် ပေါင်းစုံကို ရှင်းလင်းပြီးနောက် ပိုင်ယီဟာ သူ့အာရုံစိုက်မှု တစ်စိတ်တစ်ပိုင်းကို မသေမျိုးကျင့်ကြံခြင်း သရုပ်ဖော် စနစ် အပေါ် ဆက်လက် ထားရှိလိုက်သည်။

​ထို့နောက် သူဟာ ရွေးချယ်ခံအမှတ် (၂) ကို အာရုံစိုက်လိုက်၏။

​ချင်းကျောက်ဟာ မဟာဝေ မင်းဆက်၏ နေပြည်တော်ကို စစ်တပ်က ပိတ်ဆို့ထားကြောင်း ရုတ်တရက် သတိပြုမိလိုက်သည်။ ကျင့်ကြံသူများကိုပင် နေပြည်တော်မှ ထွက်ခွာခွင့် မပြုပေ။ သူမ ကိုယ်တိုင် မျက်မြင် ကြုံတွေ့ခဲ့ရသည်။ မြို့စောင့် စစ်သားများ၏ အကြံပေးချက်ကို နားမထောင်သည့် ရွှေအမြုတေ အဆင့် (၁) ကျွမ်းကျင်သူ တစ်ဦးဟာ နေပြည်တော်မှ အတင်းအကြပ် ထွက်ခွာချင်ခဲ့ပြီး စစ်သား အနည်းငယ်ကို ဒဏ်ရာရစေခဲ့သည်။ နောက်ဆုံးတွင် နန်းတော်မှ ရွှေအမြုတေ အဆင့် (၄) ကျွမ်းကျင်သူ တစ်ဦး လှုပ်ရှားလိုက်ပြီး လက်ဖဝါး တစ်ချက်တည်းဖြင့် ရိုက်သတ်ပြစ်လိုက်သည်။

​[ချင်းကျောက် အလွန် တုန်လှုပ်သွားပြီး နေပြည်တော် အတွင်း၌သာ လိမ္မာစွာ ဆက်နေလိုက်ရသည်။အာရုံစိုက် မခံရအောင် နေပြည်တော်မှ ထွက်ခွာမည့် အကြံအစည်ကို ဖျောက်ဖျက်လိုက်ပြီး ရက်အနည်းငယ် ကြာပြီးနောက်မှသာ ဘာဖြစ်ခဲ့လဲ ဆိုသည်ကို သူမ သိလိုက်ရ၏။]

​[မဟာဝေ တော်ဝင် မိသားစု၏ မင်းသမီး ချန်နင်သည် မသိရသော အကြောင်းရင်း တစ်ခုခုကြောင့် ရုတ်တရက် သေဆုံးသွားခဲ့သည်။ မဟာဝေ ဧကရာဇ်မင်းမြတ်သည် အလွန် ဒေါသထွက်ပြီး လူသတ်သမားကို ရှာဖွေဖော်ထုတ်ရန် ရည်ရွယ်ချက်ဖြင့် နေပြည်တော် တစ်ခုလုံးကို ပိတ်ဆို့ထားရန် အမိန့်ပေးလိုက်သည်]

​[ဘာဖြစ်ခဲ့လဲ ဆိုသည်ကို သိရှိပြီးနောက် လာမည့် နှစ်အနည်းငယ် အတွင်း မဟာဝေ မင်းဆက်၌ ဖြစ်ပွားမည့် စစ်ပွဲသည် ဤကိစ္စနှင့် ဆက်စပ်မှု ရှိနိုင်ခြေ မြင့်မားကြောင်း ချင်းကျောက် ခံစားလိုက်ရသည်]

​[သူမ အမှန်တရားနှင့် ပိုပိုပြီး နီးကပ်လာပြီဟု ခံစားခဲ့ရသည်။ နေပြည်တော် အတွင်း အချိန်ကာလ တစ်ခုလောက် ဆက်နေသရွေ့ မဟာဝေ စစ်ပွဲ ဖြစ်ပွားရသည့် အကြောင်းရင်းကို  မကြာခင် သိရှိရတော့ပေမည်။]

​[...]

​...

​မသေမျိုးကျင့်ကြံခြင်း သရုပ်ဖော် စနစ်ထဲတွင်...

​"ကလေးမလေး....နေပြည်တော်ထဲက ရေက ပိုပိုပြီး နောက်ကျိလာပြီ... ငါတောင် အခြေအနေကို ရှင်းရှင်းလင်းလင်း မမြင်ရတော့ဘူး... အကယ်၍ မင်း အသက်ရှင်ချင်ရင် ဒီနေရာကနေ ထွက်ခွာဖို့ ငါ အကြံပြုချင်တယ်... မဟုတ်ရင် မင်း သေချာပေါက် အသတ်ခံရလိမ့်မယ်"

​သူမနှင့် အတူပါလာသည့် အဘွားအိုက ချင်းကျောက်ကို ပြောလိုက်၏။"မင်း နေပြည်တော်ကို ရောက်တာ မကြာသေးဘူး ဆိုတာ မမေ့နဲ့.... မင်းရဲ့ ကြွယ်ဝချမ်းသာမှုကို ထုတ်ပြလိုက်မိလို့ လူတချို့ရဲ့ ပစ်မှတ်ထားတာ ခံနေရပြီ"

​"မင်း အဲဒီ လူအသေးအမွှားတွေကို ဖြေရှင်းလိုက်နိုင်ပေမယ့် သူတို့နောက်ကွယ်မှာ ဘယ်သူမှ မရှိဘူးလို့ မင်း အာမခံနိုင်လား"

​သူမ စကား ခဏရပ်လိုက်ပြီး ဆက်ပြောလိုက်သည်။ "သူတို့နောက်ကွယ်က လူတွေက အကြောင်းပြချက် တစ်ခုခုကြောင့် မင်းကို ဖြေရှင်းဖို့ မလှုပ်ရှားသေးတာ ဖြစ်နိုင်တယ်... ဒါပေမဲ့ နေပြည်တော် ဖရိုဖရဲ ဖြစ်သွားတာနဲ့ သူတို့ အရာရာ လုပ်လာနိုင်တယ်"

​ချင်းကျောက် ကြောင်အသွားခဲ့ပြီး နားမလည်နိုင်စွာ မေးလိုက်သည်။

​"အဲဒီ ဧကရာဇ်မင်းမြတ်က မင်းသမီး ချန်နင်ရဲ့ လူသတ်သမားကို ရှာဖွေပြီး သတ်ပစ်ဖို့ လူတွေကို  စေလွှတ်ထားတယ် မဟုတ်လား.... ဒီလို အခြေအနေမျိုးမှာ စွန့်စားပြီး လှုပ်ရှားမယ့်သူ ရှိနေဦးမှာလား"

​"သူတို့ကဧကရာဇ်မင်းမြတ်ရဲ့ပစ်မှတ်ထားတာခံရမှာမကြောက်ကြဘူးလား"