အခန်း ၉၁ : ချန်ချန်ရွှယ်၏ နာမည်ကြားရ၍ တုန်လှုပ်သွားသည့် ချင်းကျောက်
"ဝေါင်း..."
ညင်သာသည့် သားရဲ ဟိန်းသံ တစ်ခုကို ကြားလိုက်ရပြီး ၎င်းဟိန်းသံထဲတွင် စိတ်လှုပ်ရှားမှုနှင့် စူးစမ်းလိုစိတ် အရိပ်အယောင် အနည်းငယ်တို့ ပါဝင်နေခဲ့သည်။ ဤအသံက တကယ်တော့ ဝိုက်တီ ထုတ်လွှတ်လိုက်ခြင်း ဖြစ်၏။
ဒီနှစ် အတွင်း ၎င်းက တော်တော်လေး ကြီးထွားလာခဲ့ပြီး အရွယ်အစားက မီးပုံးပျံ တစ်လုံးကို လေမှုတ်သွင်းလိုက်သကဲ့သို့ အလွန် လျင်မြန်စွာ ကြီးထွားလာခဲ့လေသည်။
နှစ်အနည်းငယ် အတွင်း ဝိုက်တီ၏ အရပ်က (၂) မီတာ နီးပါး မြင့်မားလာခဲ့ပြီး ၎င်း၏ ခန္ဓာကိုယ်ကလည်း သာမန် မြင်းတစ်ကောင်ထက် ပိုမို ကြီးမားလာခဲ့သည်။
ချင်းကျောက်ဟာ ယခု ဝိုက်တီ၏ ကျောပေါ်တွင် စီးနင်းလိုက်ပါလာပြီး မိုးထိအောင် မြင့်မားသည့် မြို့ရိုးကြီးကို မော့ကြည့်လိုက်၏။
သူမဟာ အာရုံစိုက်မှု သိပ်အများကြီးအား မဆွဲဆောင်နိုင်ခဲ့ပေ။
အဘယ်ကြောင့်ဆိုသော် အခြားကျင့်ကြံသူ အချို့၏ စီးတော်ယာဉ်များက သူမထက် ပို၍ပင် ထူးဆန်းနေနိုင်သောကြောင့် ဖြစ်သည်။
အချို့က ငှက်ကြီးများ၏ ကျောပေါ်တွင် ထိုင်နေကြသပြီး အချို့က ဘူးသီးခြောက်ပေါ်တွင် စီးနင်းနေခဲ့ကြသည်။ အချို့ကတော့ စပါးအုံးမြွေကြီးများပေါ်တွင် မတ်တပ်ရပ်နေခဲ့ကြလေသည်။
မဟာဝေ မင်းဆက်၏ နေပြည်တော်က အခြား ကျင့်ကြံခြင်း ဂိုဏ်းများနှင့် နှိုင်းယှဉ်လျှင် နိမ့်ကျမနေသလို ဤနေရာတွင် ကျင့်ကြံသူ ရှားပါးခြင်း မရှိပေ။
သူတို့ထဲတွင်... သဘာဝကျကျပင် ချီစုစည်းမှု အဆင့် ကျင့်ကြံသူက အများစု ဖြစ်ကြ၏။
ချင်းကျောက် တစ်ချက် ကြည့်လိုက်ရာ ချီစုစည်းမှု အဆင့် ကျင့်ကြံသူ ထောင်ချီ ရှိနေကြောင်း သူမ တွေ့ရှိလိုက်ရ၏။
ဒါက သူမ မြင်တွေ့နိုင်သမျှ ဖြစ်ပြီး မမြင်တွေ့နိုင်သည့် သူများများလည်း များပြားစွာ ရှိနေပေဦးမည်။
"ကလေးမလေး ဒီနေရာမှာ သိပ်အသံကျယ်ကျယ် မလုပ်နဲ့" အဘွားအို၏ အသံက ရုတ်တရက် ထွက်ပေါ်လာခဲ့သည်။ "ဒီမြို့ရိုး အပေါ်မှာတင် စောင့်ကြပ်နေတဲ့ ရွှေအမြုတေ အဆင့် ကျင့်ကြံသူ (၄) ယောက် ရှိတယ်... တစ်ယောက်က ရွှေအမြုတေ အဆင့် (၅) .... (၃) ယောက်က ရွှေအမြုတေ အဆင့် (၁) တွေပဲ.. ဒီမဟာဝေ မင်းဆက်ကို လျှော့တွက်လို့ မရဘူး"
......
'ရွှေအမြုတေ အဆင့် ကျင့်ကြံသူ (၄) ယောက်တောင်လား....'
ချင်းကျောက် တော်တော်လေး အံ့အားသင့်သွားခဲ့သည်။ ရွှေအမြုတေ အဆင့် ကျင့်ကြံသူများက တွေ့ရ မလွယ်ကူကြောင်း သိထားရပေမည်။
လက်တွေ့တွင် ရွှေအမြုတေ အဆင့် ရောက်နေသရွေ့ လေးစားခြင်း ခံရမည် ဖြစ်ပြီး သူတို့၏ ကျင်းရှင်း နန်းတော်၌ပင် ဂိုဏ်းတံခါးဝကို စောင့်ကြပ်နေသည့် ရွှေအမြုတေ အဆင့် အကြီးအကဲ နှစ်ယောက်သာ ရှိလေသည်။
ချင်းကျောက် သူမစိတ်ထဲတွင် ရေရွတ်လိုက်၏။
'မင်းဆက်က ကျင့်ကြံခြင်း ဂိုဏ်းတွေကို အမြဲတမ်း ဖိနှိပ်ထားနိုင်တာ အံ့သြစရာ မဟုတ်တော့ပါဘူး... ဘာပဲဖြစ်ဖြစ် မင်းဆက် တစ်ခုက နှစ်သောင်းချီ သက်တမ်းရှည်လာခဲ့တာပဲလေ.... ဟုတ်တယ်မလား'
မင်းဆက် တစ်ခု၏ အခြေခံအုတ်မြစ်က ဂိုဏ်းတစ်ခု ယှဉ်နိုင်သည့် အရာ မဟုတ်ပေ။ ချင်းကျောက် အနည်းငယ် သတိရှိသွားခဲ့သည်။
သူမ ဤမျှ အန္တရာယ်များသည့် နေရာသို့ ဝင်ရောက်လာခဲ့ပြီ ဖြစ်ရာ ဂရုစိုက်ရပေမည်။
အခြားနေရာများတွင် ဆိုလျှင် သူမ၏ အခြေတည်အဆင့် (၃) ကျင့်ကြံမှုဖြင့် လူအများစုကို အထင်သေးရန် လုံလောက်သည်။
အကယ်၍ သူမထက် သန်မာသည့် အခြေတည်အဆင့် ကျင့်ကြံသူနှင့် တွေ့ဆုံလျှင်တောင် မနိုင်ပါကထွက်ပြေးနိုင်သေးလေသည်။
သို့သော် နေပြည်တော်ထဲတွင် ရွှေအမြုတေ အဆင့် ကျင့်ကြံသူ မနည်းမနော ရှိနေရာ ရွှေအမြုတေ အဆင့်ကျင့်ကြံသူတွေ လက်ထဲမှ လွှတ်အောင် ပြေးနိုင်မည်မဟုတ်ပေ။
...
"ရွေးချယ်ခံတွေက တစ်ယောက်နဲ့ တစ်ယောက် တကယ် ဆွဲဆောင်နေကြတာတော့ မဟုတ်ဘူးမလား..."
ပိုင်ယီထပ်မံ၍ သံသယ ဝင်မိခဲ့ပြန်ပေသည်။
ချင်းကျောက် ကျွန်းပေါ်မှ ထွက်ခွာပြီး မဟာဝေ မင်းဆက်၏ နေပြည်တော်ဆီ တည့်တည့်မတ်မတ် ဦးတည်သွားနေသည်ကို သူ မျှော်လင့်ချက်မဲ့စွာ ကြည့်နေမိ၏။
အကြောင်းမှာ ချန်ချန်ရွှယ်ဟာ မဟာဝေ မင်းဆက်၏ နေပြည်တော်ထဲတွင် ရှိနေတာကြောင့်ပင်။
'အကယ်၍ ဒီလူနှစ်ယောက် နေပြည်တော်ထဲမှာ ဆုံတွေ့ကြရင် ဘယ်လို မီးပွားတွေ လွင့်စင်လာမလဲ...'
သူ စိတ်ကူးကြည့်လို့ မရနိုင်တော့ပေ။
ပိုင်ယီဟာ အလုပ်နှစ်ခုအား တစ်ပြိုင်နက် လုပ်တတ်နေပြီဖြစ်ရာ သူ့စိတ်အာရုံခွဲကာ တစ်ခုအား ရွေးချယ်ခံ နှစ်ယောက်အပေါ် ထားရှိပြီး မသေမျိုးကျင့်ကြံခြင်း သရုပ်ဖော် စနစ်ထဲမှ သူတို့၏ စွမ်းဆောင်ရည်ကို စောင့်ကြည့်နေခဲ့သည်။
တစ်ချိန်တည်းမှာပင် သူဟာ ရွှေအမြုတေ အဆင့် (၁) လူသားရုပ်သေးကို ထိန်းချုပ်ပြီး မဟာယန် မင်းဆက်၏ မင်းသမီးလေးကို ဆက်လက် ကာကွယ် စောင့်ရှောက်နေခဲ့သည်။
မင်းသမီးလေး ရောက်လာတဲ့ အခါကျရင်...
အဲဒီကျရင်... သူ့ရဲ့ တတိယမြောက် ရွေးချယ်ခံတစ်ယောက် ရရှိတော့ပေမည်။
[ချင်းကျောက်သည် နေပြည်တော် အတွင်း၌ အိမ်တစ်လုံး ရှာဖွေတွေ့ရှိခဲ့ပြီး ဝယ်ယူလိုက်သည်။ ကံကောင်းစွာဖြင့် အိမ်ထဲတွင် ဝိညာဉ်စုစည်းခြင်း အစီအရင်တစ်ခုပင် ရှိနေခဲ့သည်။]
[ပြင်ပလူ တစ်ယောက်က နေပြည်တော် အတွင်း ဝိညာဉ်ကျောက်တုံးများ သုံးစွဲနေခြင်းက လူအချို့၏ အာရုံစိုက်မှုကို မလွဲမသွေ ဆွဲဆောင်နိုင်ခဲ့သည်။]
[သို့သော် သူတို့ဟာ ချင်းကျောက်၏ ခွန်အားကို မှားယွင်းစွာ တွက်ချက်မိခဲ့ကြသည်။ ချင်းကျောက် သူတို့အားလုံးကို အလွယ်တကူ ဖြေရှင်းလိုက်သည်။]
[ဒီနေ့...]
[ချင်းကျောက် ရုတ်တရက် သတိရလိုက်သည်မှာ ပြီးခဲ့သည့် မသေမျိုးကျင့်ကြံခြင်း သရုပ်ဖော် ဘဝတုန်းက နေပြည်တော် အတွင်းရှိ မင်းသမီးများနှင့် မင်းသားများ အများအပြား သေဆုံးသွားခဲ့ကြောင်း သူမ ကြားသိခဲ့ရသည်။ ဒီတစ်ခါ မသေမျိုးကျင့်ကြံခြင်း သရုပ်ဖော် ဘဝမှာကျတော့ ဘာလို့ ဒီလို မဖြစ်ရသည်နည်း။]
[သူမ နေပြည်တော်သို့ ရောက်ရှိလာပြီး အနာဂတ် ဇာတ်လမ်းကို ပြောင်းလဲသွားစေခဲ့သောကြောင့် ဖြစ်မည်ဟု သူမ သံသယ ဝင်နေခဲ့သည်။]
[...]
တစ်ခုခု မှားယွင်းနေကြောင်း ချင်းကျောက် သတိထားမိလိုက်တာကို ပိုင်ယီ မအံ့သြပေ။
သူမ ချန်ချန်ရွှယ်နှင့် နည်းနည်း ပိုနီးကပ်သွားသရွေ့ တစ်ခုခု မှားယွင်းနေကြောင်း သူမ သတိထားမိပေလိမ့်မည်။
အဘယ်ကြောင့်ဆိုသော် ချန်ချန်ရွှယ်သည်လည်း အနာဂတ်၏ ဦးတည်ချက်ကို လွှမ်းမိုးနေသောကြောင့် ဖြစ်သည်။
အနာဂတ်၏ ဦးတည်ချက်တွင် ပြောင်းလဲမှု တစ်စုံတစ်ရာ ရှိလာသည်နှင့် ရွေးချယ်ခံများက ၎င်းအရင်သတိထားမိမည်ဖြစ်ပြီး သူတို့ရင်ထဲတွင် သံသယ အရိပ်အယောင်တစ်ခု ဖြစ်ပေါ်လာပေလိမ့်မည်။
ထို့ကြောင့် အနာဂတ် ပြောင်းလဲသွားရခြင်းမှာ သူမကြောင့်သာ ဖြစ်သည်ဟု ချင်းကျောက် ရိုးရိုးရှင်းရှင်း တွေး၍ မရနိုင်ပေ။
ထိုသို့ တွေးခြင်းမှာ သူမ အလွန် တုန်လှုပ်သွားသောကြောင့်သာ ဖြစ်ပြီး စိတ်ပိုင်းဆိုင်ရာ နှစ်သိမ့်မှု အချို့ ရရှိရန် ဆင်ခြေတစ်ခုသာ ဖြစ်၏။
...
မသေမျိုးကျင့်ကြံခြင်း သရုပ်ဖော် စနစ်ထဲတွင်..
ချင်းကျောက်ဟာ နေပြည်တော် အတွင်းရှိ ရှုပ်ထွေးသော ယာဉ်ကြောပိတ်ဆို့မှုကို ကြည့်ပြီး မျက်မှောင်ကြုတ်လိုက်၏။ သူမ နန်းတော် အတွင်းမှ သတင်းများကို အပြင်ဘက်မှ စုံစမ်းမေးမြန်းခဲ့ပြီး မကြာသေးမီက နန်းတော် အတွင်း ဘာမှ မဖြစ်ပွားခဲ့ကြောင်း သိရှိလိုက်ရသည်။
မဟာဝေ မင်းဆက်မှ မင်းသားများနှင့် မင်းသမီးများကလည်း အားလုံး အသက်ရှင် ကျန်းမာနေခဲ့ကြသည်။
'ထူးဆန်းလိုက်တာ...'
'ငါ့ကြောင့် တကယ်ပဲလား... မဟုတ်သေးပါဘူး... ငါ နေပြည်တော်ထဲ ရောက်နေတာ မကြာသေးဘူးလေ.... ငါ နေပြည်တော် အပြင်ဘက်မှာ ရှိနေတုန်းက အနာဂတ်က နေပြည်တော် အတွင်း ဖြစ်ပျက်မယ့် ကိစ္စတွေကို ဘယ်လိုလုပ် လွှမ်းမိုးနိုင်မှာလဲ'
သူမရင်ထဲတွင် မရေမတွက်နိုင်သည့် မေးခွန်းများ ပေါ်လာသော်လည်း ယခု သူမအတွက် ဘယ်သူမှ ဖြေရှင်းပေးနိုင်ခြင်း မရှိပေ။
ချင်းကျောက်ဟာ အဘွားအိုက သူမကို လမ်းညွှန်မှုအချို့ ပေးရန် အလွန် လိုလားမိပေသည်။
ကံမကောင်းစွာနဲ့...
အဘွားအိုက သရုပ်ဖော် စနစ်ထဲမှ ဒေသခံတစ်ဦးသာ ဖြစ်လေသည်။
အကယ်၍ သူမ ဒီအကြောင်း အဘွားအိုကို ပြောပြလိုက်လျှင် မသေမျိုးကျင့်ကြံခြင်း သရုပ်ဖော် စနစ် ရှိနေကြောင်း ပေါက်ကြားသွားမည်ဖြစ်ကာ အကျိုးဆက်တွေ ဘယ်လို ဖြစ်လာမလဲ မသိနိုင်ချေ။
ချင်းကျောက်ဟာ နေပြည်တော် အတွင်းရှိ လမ်းမတစ်ခုပေါ်တွင် လျှောက်သွားနေခဲ့သည်။ နေပြည်တော် အတွင်းတွင် စည်းမျဉ်းစည်းကမ်းများစွာ ရှိပြီး....
ဥပမာအားဖြင့် —
ရွှေအမြုတေ အဆင့်အောက် ကျင့်ကြံသူများဟာ နေပြည်တော် အထက် ကောင်းကင်ယံတွင် ဓားစီးပျံသန်းခွင့် မရှိပေ။
ထို့ကြောင့် ချင်းကျောက်ဟာ ဝိုက်တီ အပေါ်တွင်သာ စီးနင်းလိုက်ပါနိုင်လေသည်။
သူမဟာ လျှောက်သွားနေရင်း အတွေးများ နက်ရှိုင်းနေခဲ့သည်။
ရုတ်တရက် သူမ၏ စူးရှသော အကြားအာရုံဖြင့် လှုပ်ရှားမှု အချို့ကို ကြားလိုက်ရသဖြင့်ချက်ချင်း နားစွင့်လိုက်ပြီး တိုးညှင်းစွာ ပြောလိုက်သည်။ "ဝိုက်တီ... နေဦး.... ခဏ ရပ်လိုက်"
ချင်းကျောက် ကြားလိုက်ရသော အသံမှာ သိပ်မဝေးမနီးမှာရှိသည့် နေပြည်တော် အစောင့်အနည်းငယ်၏ အသံ ဖြစ်နေခဲ့သည်။
အစောင့်များ၏ စကားများထဲတွင် ရင်းနှီးသည့် စကားလုံး တစ်လုံး ပါဝင်နေသဖြင့် သူမ အာရုံစိုက်မိသွားခြင်း ဖြစ်ပေသည်။
'ချန်ရွှယ်...'
"အဲဒါ မင်းသမီး ချန်နင်ရဲ့ နာမည် တကယ်ပဲလား.... ငါ မှတ်မိတာ မမှားဘူး ဆိုရင် မင်းသမီးတွေရဲ့ နာမည်ကို ပြည်သူလူထုဆီ ဖြန့်ဝေခဲတယ်လေ.... မင်း ဘယ်လို သိတာလဲ... မဟုတ်မှ မင်းထွင်ပြောတာလား"
အရပ်ရှည်ရှည်နှင့် နေပြည်တော် အစောင့် တစ်ဦးက မယုံကြည်နိုင်စွာ မေးလိုက်၏။ "ချန်ရွှယ်.... မင်းသမီး တစ်ပါးက ဘယ်လိုလုပ် ဒီနာမည်မျိုး ဖြစ်နိုင်မှာလဲ"
"နားထောင်လို့ မဆိုးပါဘူး... ဒါပေမဲ့ ခံစားရတာက..."
"မင်းသမီး တစ်ပါး ပိုင်ဆိုင်သင့်တဲ့ နာမည်နဲ့ မတူဘူး"
ဘေးနားတွင် အခြား အစောင့် တစ်ဦးက နှုတ်ခမ်းမဲ့ပြီး ပြောလိုက်၏။ "နန်းတော် အပြင်ဘက်က လူတွေပဲ မင်းသမီးတွေရဲ့ နာမည်ကို မသိကြတာပါ.. နန်းတော်ထဲမှာ ဘယ်သူက သူတို့နာမည်ကို မသိဘဲ နေမှာလဲ..... ဒါက လျှို့ဝှက်ချက် မဟုတ်ပါဘူး"
"..."
သူတို့၏ အသံများက အလွန် တိုးညှင်းလှပြီး တားမြစ်ထားသော စကားလုံးအချို့ ပြောသည့်အခါ သုံးသည့် အသံလွှင့် နည်းစနစ်များပင် အသုံးပြုနေခဲ့ကြသည်။
ကံမကောင်းစွာနဲ့ သူတို့၏ အသံလွှင့် နည်းစနစ်များက ကောင်းစွာ လေ့ကျင့်မထားသဖြင့် ချင်းကျောက်ဟာ သူတို့ပြောစကားများကို ခိုးနားထောင်နိုင်လေသည်။
ယုတ္တိကျကျ ပြောရရင်... ကျင့်ကြံသူ အများစုက မင်းသမီး၏ နာမည်ကို စိတ်ဝင်စားကြမည် မဟုတ်ပေ။
အတင်းအဖျင်းပြောပြီး အချိန်ဖြုန်းနေမည့်အစား ကျင့်ကြံနေတာက ပိုကောင်းပေလိမ့်မည်။
သို့သော် ချင်းကျောက်ကတော့ စိတ်ဝင်စားနေလေသည်။
ချန်ရွှယ်ဆိုသည့် စကားလုံးများက သူမနှင့် သိပ်ရင်းနှီးလွန်းနေပြီး သူမ ပြာဖြစ်သွားလျှင်တောင် ဤစကားလုံးများကို သူမ မှတ်မိနေပေလိမ့်မည်။
ဒါ့အပြင်...မဟာဝေ မင်းဆက်၏ တော်ဝင် မိသားစု မျိုးရိုးအမည်မှာ ချန်ဖြစ်ကြောင်း ချင်းကျောက် သိထားလေသည်။
'ချန်ရွှယ်...'
'ချန်...'
'ရှူး..'
'ချန်ချန်ရွှယ်....'
ချင်းကျောက်၏ မျက်လုံးများက ရုတ်တရက် ပြူးကျယ်သွားပြီး တည်ငြိမ်မှု ပျက်ပြားလုနီးပါး ဖြစ်သွားခဲ့သည်။
…