အခန်း ၈၅ : ရွေးချယ်ခံ အမှတ် (၃) အား ရှာတွေ့ခြင်း

​'လေလွှင့်ကျင့်ကြံသူ.....'

​'ရွှေအမြုတေ အဆင့် လေလွှင့်ကျင့်ကြံသူ ဟုတ်လား...'

​အခြားတစ်ဖက်တွင် နေပြည်တော်နှင့် ပြည်နယ်မြို့တော်မှ ကျင့်ကြံသူ အဖွဲ့ဟာ တစ်ယောက်ကို တစ်ယောက် တုန်လှုပ်စွာ ကြည့်မနေဘဲ မနေနိုင်တော့ပေ။ သူတို့အားလုံးဟာ တစ်ယောက်မျက်လုံးထဲက အံ့သြမှင်သက်မှုကို တစ်ယောက် မြင်နေခဲ့ရသည်။

​လေလွှင့် ကျင့်ကြံသူများတွင် ပုံမှန်အားဖြင့် ဆရာသခင်များ မရှိကြသလို သူတို့ အသုံးပြုသော ကျင့်စဉ်များကလည်း အမျိုးမျိုး ကွဲပြားနေတတ်ကြလေသည်။

​နှစ်ပေါင်းများစွာ ပင်ပင်ပန်းပန်း ကျင့်ကြံပြီးနောက် အခြေတည်အဆင့် (၁) ကို ရောက်ရှိနိုင်ခြင်းကပင် လေလွှင့်ကျင့်ကြံသူများကြား၌ ထူးခြားသော ပါရမီရှင် ဖြစ်နေပေပြီ။

​သို့သော် ယခု၌ ရွှေအမြုတေ အဆင့် လေလွှင့်ကျင့်ကြံသူ တစ်ယောက် တကယ် ရှိနေခဲ့လေသည်။

​ယုံနိုင်စရာ မရှိသလို တစ်ခါမှလည်း မကြားဖူးခဲ့ပေ။

​သို့မဟုတ် တစ်ဖက်လူက သတိရှိပြီး သူတို့ဂိုဏ်းကို ထုတ်မပြောချင်တာလည်း ဖြစ်နိုင်ပေသည်။

​မဟာယန် မင်းဆက်မှ မင်းသမီးက အနက်ရောင်ဝတ် အဘိုးအိုကို အကြည့်တစ်ချက် ပေးလိုက်၏။

​အနက်ရောင်ဝတ် အဘိုးအိုက ချက်ချင်း နားလည်လိုက်ပြီး အသံလွှင့်ကာ ဆက်ပြောလိုက်သည်။

​"ငါတို့က မဟာယန် မင်းဆက်က ကျင့်ကြံသူတွေပါ...  မိစ္ဆာဂိုဏ်းက လူဆိုးလူမိုက်တွေ မဟုတ်ပါဘူး... ဒီလို လူသူကင်းမဲ့တဲ့ တောင်တန်းထဲမှာ တွေ့ဆုံရတာ ရေစက် ပါနေမှတော့ ကိုယ့်ကိုယ်ကိုယ် မဖော်ပြဘဲ ဘာလို့ နေနေမှာလဲ"

​မသိသော ကျင့်ကြံသူ တစ်ဦး ရှိနေသည်ကို မသိချင်ယောင်ဆောင်ရန် ထင်ရှားစွာပင် မဖြစ်နိုင်ပေ။

​အထူးသဖြင့် သူတို့ အန္တရာယ်ရှိသော အခြေအနေမှ ထွက်ပြေးလွတ်မြောက်လာတာ မကြာသေးသဖြင့် သူတို့၏ အာရုံကြောများက အနည်းငယ် တင်းမာနေသေးခဲ့သည်။

​ထို့ကြောင့် လျှို့ဝှက်ဆန်းကြယ်သည့် ကျွမ်းကျင်သူ တစ်ဦးက အမှောင်ထဲတွင် ဆက်လက် ပုန်းအောင်းနေခြင်းကို လုံးဝ သည်းမခံနိုင်ပေ။

​တစ်ဖက်လူက ဘာမှ မလုပ်လျှင်တောင် သူတို့ အကြောင်းပြချက် မရှိဘဲ တွေးတော ပူပန်နေရပေလိမ့်မည်။

​အပြန်အလှန် သံသယ ဝင်နေခြင်းကို ရှောင်ရှားရန် တစ်ယောက်နှင့် တစ်ယောက် ရိုးသားပြီး ရှင်းရှင်းလင်းလင်း ပြောဆိုလိုက်ခြင်းက ပိုကောင်းပေလိမ့်မည်။

​သို့မဟုတ်လျှင်...

​အရင်က သူတို့ကြားတွင် ရန်ငြိုး မရှိခဲ့လျှင်တောင်  ရန်ငြိုးက တဖြည်းဖြည်း ကြီးထွားလာလိမ့်မည်။

​မကြာမီပင် ဤလူအုပ်စု၏ အကြည့်အောက်၌ ပုံရိပ်တစ်ခု ည၏ အမှောင်ထုထဲမှ ထွက်ပေါ်လာခဲ့သည်။

​ထိုပုံရိပ်အား ကြည့်ကာ လူတိုင်း ကြောင်အသွားခဲ့ကြသည်။

​'ငယ်လိုက်တာ...'

​'သိပ်ငယ်လွန်းတယ်...'

​သူတို့စိတ်ထဲတွင် ရွှေအမြုတေ အဆင့် ကျင့်ကြံသူ တစ်ဦး ဆိုလျှင် သက်လတ်ပိုင်း အမျိုးသား တစ်ဦး၏ ပုံရိပ်မျိုး ရှိရမည် မဟုတ်လော။

​အထူးသဖြင့် တစ်ဖက်လူက လေလွှင့်ကျင့်ကြံသူ ဖြစ်သည်ဟု ပြောဆိုထားရာ လေလွှင့်ကျင့်ကြံသူ တစ်ဦး ရွှေအမြုတေ အဆင့်သို့ ချိုးဖျက်ဝင်ရောက်ရန် ပို၍ပင် အချိန်ကြာမြင့်မည်ဖြစ်ရာ ဆံပင်ဖြူ အဘိုးအို တစ်ဦး၏ ပုံရိပ်မျိုး ဖြစ်သင့်ပေသည်။

'​ဒါ...'

သူတို့ထဲမှ လူအနည်းငယ်ဟာ သူတို့၏ အကြည့်များအား  မင်းသမီးဆီ ရွှေ့မကြည့်ဘဲ မနေနိုင်တော့ပေ။

​အဘယ်ကြောင့်ဆိုသော် အပေါ်ယံ ကြည့်လျှင် ထိုလူ၏ အသက်က မင်းသမီးနှင့် နီးပါး တူညီပုံ ရနေသောကြောင့် ဖြစ်၏။

​ထို့အပြင် တစ်ဖက်လူက ရွှေအမြုတေ အဆင့်သို့ ရောက်ရှိနေပြီ ဖြစ်ပြီး မင်းသမီးမှာမူ အခြေတည်အဆင့် (၂) တွင်သာ ရှိသေးလေသည်...

​"အဟွတ် အဟွတ်"

​လူတိုင်း ချက်ချင်း သူတို့အကြည့်များကို ပြန်ရုပ်သိမ်းလိုက်ပြီး သူတို့ရင်ထဲမှ အတွေးများကို ဖျောက်ဖျက်လိုက်သည်။

​လေလွှင့်ကျင့်ကြံသူ တစ်ဦးက ပါရမီချင်း ယှဉ်ရာတွင် မင်းသမီးနှင့် ဘယ်လိုလုပ် ယှဉ်နိုင်မည်နည်း။  ဒါ သေချာပေါက် သူ့ရုပ်ရည်သွင်ပြင်ကို ထိန်းသိမ်းထားနိုင်စွမ်း ရှိသည့် ဘိုးတော်ကြီး တစ်ကောင်သာ ဖြစ်ရပေမည်။

​"အရှင်.... အရှင် သတိထားနေတယ် ဆိုတာ ကျွန်မ သိပါတယ်... ဒါက မဟာယန် မင်းဆက်ရဲ့ တော်ဝင် စာရွက်စာတမ်းပါ... အဲဒီအပေါ်မှာ မဟာယန် မင်းဆက်ရဲ့ ရွှေတံဆိပ်တုံး ပါရှိပြီး တိုင်းပြည်ရဲ့ ကံတရားအငွေ့အသက် အနည်းငယ် ပါရှိတယ်... ဒီပစ္စည်းက ကျွန်မတို့ မိစ္ဆာဂိုဏ်းက လူဆိုးတွေ မဟုတ်ကြောင်း သက်သေပြနိုင်ပါတယ်"

​နေပြည်တော်နှင့် ပြည်နယ်မြို့တော်မှ လူအုပ်စုထဲတွင် တစ်စုံတစ်ယောက်က စာရွက်စာတမ်း တစ်ခု ထုတ်ယူပြီး ဖြန့်ပြလိုက်သည်။

​ခန့်ညားထည်ဝါပြီး ဖြောင့်မတ်သည့် အရှိန်ဝါတစ်ခု ကောင်းကင်ယံသို့ ထိုးတက်သွားသော်လည်း အနက်ရောင်ဝတ် အဘိုးအိုက လျင်မြန်စွာ ဖိနှိပ်လိုက်၏။

​အနက်ရောင်ဝတ် အဘိုးအို၏ မျက်နှာက အေးစက်သွားပြီး မျက်မှောင်ကြုတ်ကာ ကြိမ်းမောင်းလိုက်သည်။

​"မင်း မိစ္ဆာကြီး တစ်ကောင်ကို မျှားခေါ်ချင်နေတာလား"

​ထိုလူဟာ ရုတ်တရက် သဘောပေါက်သွားပြီး စာရွက်စာတမ်းကို အလျင်စလို ပြန်သိမ်းလိုက်သည်။ သူ့မျက်နှာတွင် အရှက်ရမှုများ ပြည့်နှက်နေခဲ့လေသည်။

​ရုတ်တရက် နူးညံ့သောအသံ တစ်သံ ထွက်ပေါ်လာခဲ့သည်။

​"အရှင်... အကယ်၍ အရှင် အဲဒီဘက်ကို သွားချင်တယ် ဆိုရင် လမ်းလွှဲကသွားတာ ပိုကောင်းပါလိမ့်မယ်.... ကျွန်မတို့ ရွှေအမြုတေ အဆင့် (၁၀) မိစ္ဆာကြီး တစ်ကောင်ရဲ့ လိုက်ဖမ်းတာ ခံခဲ့ရလို့ပါ.... အဲဒီ မိစ္ဆာကြီးက အနောက်ကနေ ထပ်ကြပ်မကွာ လိုက်လာသေးလား ဆိုတာ ကျွန်မတို့ မသိပါဘူး"

​"တစ်လမ်းလုံး ထွက်ပြေးလာပြီးနောက်မှာ ကျွန်မတို့ စီးလာတဲ့ ပျံသန်းရေး လှေကလည်း ဆိုးဆိုးရွားရွား ပျက်စီးသွားပြီး အခုကျွန်မတို့ ဓားစီးပြီးပဲ သွားလို့ ရပါတော့တယ်"

​"အကယ်၍ အရှင် အဲဒီဘက်ကို သွားမယ် ဆိုရင် အဲဒီ မိစ္ဆာကြီးနဲ့ တွေ့ဆုံဖို့ ဖြစ်နိုင်ခြေ သိပ်များပါတယ်"

​"အဲဒါက အမွေးမပါတဲ့ ငှက်တစ်ကောင်နဲ့ တူတဲ့ မိစ္ဆာကြီးပါ... အဲဒါက စွမ်းအားကြီးပြီး အလွန် ကြမ်းတမ်းပါတယ်.... အရှင်သတိထားဖို့ လိုပါလိမ့်မယ်"

​သူမ၏ ကြင်နာသော သတိပေးမှုက လူသားရုပ်သေး၏ အာရုံကို ဆွဲဆောင်သွားပြီး လှမ်းကြည့်လိုက်သည်။

​အသက် နှစ်ဆယ်ကျော် အရွယ်ခန့် ရှိပုံရသော အမျိုးသမီး တစ်ဦးဖြစ်ကာ သူမက ပိုင်ယီထက် နှစ်အနည်းငယ်ခန့် ပိုကြီးလောက်ပေသည်။

​သူမ၌ ထူးခြားသည့် အရှိန်ဝါတစ်ခု ရှိနေပြီး အကယ်၍ သာမန် ချီစုစည်းမှု အဆင့် ကျင့်ကြံသူ တစ်ယောက်သာ သူမနှင့် တွေ့ဆုံပါက ဤအရှိန်ဝါ၏ ဖိအားအောက်တွင်  ခေါင်းမော့ပြီး သူမမျက်လုံးကို ကြည့်ရဲသည့် သတ္တိပင် ရှိလိမ့်မည် မဟုတ်ပေ။

​ဤကဲ့သို့သော အရှိန်ဝါက လူများကို သူမ၏ ပြိုင်ဘက်ကင်းသော အလှတရားကို အလွယ်တကူ ကျော်ကြည့်သွားစေနိုင်ပေသည်။ ထိုအချက်မှ တဆင့် သူမ၏ ကိုယ်ပိုင်အမှတ်အသား ရိုးရှင်းမည် မဟုတ်ကြောင်း မြင်နိုင်လေသည်။

​ဤလူအုပ်စု ချင်းဟယ် ခရိုင်သို့ မရောက်သေးသည့် အကြောင်းရင်းမှာ အံ့သြစရာ မဟုတ်တော့ပေ။ တကယ်တော့ သူတို့ လမ်းတွင် ဤကဲ့သို့သော ကိစ္စမျိုး ကြုံတွေ့ခဲ့ရခြင်း ဖြစ်၏။

​အကယ်၍ ဤလူများ ပျံသန်းရေး လှေကို ပုံမှန် မောင်းနှင်လာခဲ့ပါက သူတို့ဟာ ချင်းဟယ် ခရိုင်သို့ တစ်ရက်အတွင်း ရောက်ရှိနိုင်သည်။

​ပျံသန်းရေး လှေ အချို့၏ အမြန်နှုန်းက မူလဝိညာဉ် အဆင့်နှင့် ယှဉ်နိုင်ပေသည်။ သို့သော် သူတို့၏ ပျံသန်းရေး လှေ ပျက်စီးသွားပြီ ဖြစ်သဖြင့် သူတို့၏ အမြန်နှုန်းကို ဆိုးရွားစွာ နှေးကွေးသွားစေခဲ့သည်။

​အထူးသဖြင့် ဤလူအုပ်စု အတွင်း၌ ရွှေအမြုတေ အဆင့် ကျင့်ကြံသူ တစ်ဦးတည်းသာ ရှိပြီး ကျန်သူများမှာ အခြေတည်အဆင့် ကျင့်ကြံသူများ ဖြစ်ကြသည်။

​အခြေတည်အဆင့် ကျင့်ကြံသူတစ်စုဖြင့် ဓားစီးပြီး ဘယ်လောက် မြန်မြန် ပျံသန်းနိုင်မည်နည်း။

​ယခု လူသားရုပ်သေး၏ မြင်ကွင်းမှ တဆင့် နေပြည်တော်မှ ထိုပုဂ္ဂိုလ်ကြီးက လက်ရှိ မဟာယန် မင်းဆက် ဧကရာဇ်မင်းမြတ်၏ သမီးတော် သို့မဟုတ် မြေးတော် ဖြစ်ကြောင်း ပိုင်ယီ အတည်ပြုလိုက်သည်။

​သူမ တကယ့်ကို ပုဂ္ဂိုလ်ကြီး တစ်ယောက် ဖြစ်ပေသည်။

​ထို့အပြင် ဤကဲ့သို့ ငယ်ရွယ်သော အရွယ်တွင် အခြေတည်အဆင့် (၂) သို့ ရောက်ရှိနေပြီ ဖြစ်ရာ ကျင့်ကြံခြင်း အမြစ်ဟာလည်း ချန်ချန်ရွှယ် နှင့် ချင်းကျောက် တို့ထက် နိမ့်ကျမည် မဟုတ်ပေ။ ဆိုလိုသည်မှာ ဤသည်က ရွေးချယ်ခံအမှတ် (၃) အတွက် အကောင်းဆုံး ကိုယ်စားလှယ်လောင်းဖြစ်နေသည်ဆိုတာပင်။

​ပိုင်ယီဟာ လူသားရုပ်သေးကို ထိန်းချုပ်ပြီး လျှောက်သွားနေရခြင်း၏ ရည်ရွယ်ချက်မှာ ရွေးချယ်ခံ အမှတ် (၃)အား ရှာဖွေရန် ဖြစ်လေသည်။

​ယခု၌ သူဟာ ရှာတွေ့ခဲ့ပေပြီ။

​သို့သော် သူမအား တိုက်ရိုက် ပြန်ပေးဆွဲရန် မဖြစ်နိုင်ပေ။ ဘေးတွင် စောင့်ကြည့်နေသော ရွှေအမြုတေ အဆင့် ကျင့်ကြံသူ တစ်ယောက် ရှိနေခဲ့သည်။

​သို့သော် ကံကောင်းသည်က သူမအား ပြန်ပေးဆွဲရန် မလိုအပ်ပေ။ အဘယ်ကြောင့်ဆိုသော် သူမက ချင်းဟယ် ခရိုင်သို့ သွားနေသောကြောင့် ဖြစ်၏။

​လစ်ဟင်းနေသော တစ်ခုတည်းသော အရာမှာ တစ်ဖက်လူနှင့် ပတ်သက်သည့် အခြေခံ သတင်းအချက်အလက်ပင် ဖြစ်သည်။

​သူမကို ကျင့်ကြံခြင်း သရုပ်ဖော် စနစ်ထဲ ဖိတ်ခေါ်နိုင်ရန် အတွက် ပိုင်ယီဟာ မင်းသမီးနှင့် ပတ်သက်သည့် အခြေခံ သတင်းအချက်အလက်ကို သိရှိထားရန် လိုအပ်ပေသည်။

​သူမကို သူ့၏ ရွေးချယ်ခံလူသား ဖြစ်လာစေချင်သည်။

​ပိုင်ယီ လူသားရုပ်သေးကို ထိန်းချုပ်ပြီး ပြန်ပြောလိုက်သည်။

​"သတိပေးတဲ့ အတွက် ကျေးဇူးတင်ပါတယ်...  ကျွန်တော် ဘယ်မှ မသွားပါဘူး.... အနီးအနားမှာ မြင့်မြတ်သောနှလုံးသား နန်းတော်က မိစ္ဆာကျင့်ကြံသူတွေ ရှိနေတယ်... ကျွန်တော် ဒီမှာ သဲလွန်စ တချို့ ရှာနေတာပါ"

​ပိုင်ယီဟာ သူတို့ ချင်းဟယ် ခရိုင်ကို လာရသည့် ရည်ရွယ်ချက်ကို ကောင်းစွာ သိရှိထားသဖြင့်  မြင့်မြတ်သောနှလုံးသား နန်းတော်ဆိုသည့် စကားလုံးကို ပေါ့ပေါ့ပါးပါး ပစ်ပေးလိုက်ခြင်း ဖြစ်၏။

​ဒါက တစ်ဖက်လူနှင့် ပိုမို နက်ရှိုင်းသည့် စကားဝိုင်းတစ်ခု ပြောဆိုနိုင်ရန် အတွက် ဖြစ်လေသည်။

​ထင်ထားသည့် အတိုင်းပင်။ လူသားရုပ်သေးက မြင့်မြတ်သောနှလုံးသား နန်းတော်ဟု ပြောလိုက်သောအခါ ဤလူများ၏ မျက်နှာများက ပြောင်းလဲသွားခဲ့ကြသည်။ ပြောင်းလဲမှုက သိပ်သေးငယ်သော်လည်း လူသားရုပ်သေးက ဖမ်းမိလိုက်တုန်းပင်။

​မင်းသမီး ခဏလောက် စဉ်းစားလိုက်ပြီး မေးလိုက်သည်။

​"အရှင်... အရှင်က မြင့်မြတ်သောနှလုံးသား နန်းတော်က မိစ္ဆာကျင့်ကြံသူတွေကို ရှာဖွေနေတာလား"

​လူသားရုပ်သေးက ပြန်ဖြေလိုက်၏။

​"ဒီမိစ္ဆာကျင့်ကြံသူတွေက အရပ်မျက်နှာ အားလုံးမှာ ဖျက်ဆီးမှုတွေ လုပ်နေကြတယ်ဆိုတော့ လူတိုင်းက သူတို့ကို သတ်ပစ်ရမယ်"

​သူ့အသံက အေးစက်ပြီး အက်ကွဲနေခဲ့ကာ သတ်ဖြတ်လိုစိတ်တစ်ခု ပျံ့နှံ့ထွက်လာခဲ့သည်။ သို့ပေမဲ့ ဤသတ်ဖြတ်လိုစိတ်က သူတို့အား ကြောက်ရွံ့မသွားစေခဲ့ပဲ ထိုအစား  သူတို့အား သက်ပြင်းချနိုင်သွားစေခဲ့သည်။

​ဖြောင့်မတ် လမ်းစဉ်....

​မိစ္ဆာ လမ်းစဉ်....

ကျင့်ကြံခြင်း လောကထဲ၌ ဒီအင်အားစုကြီး (၂) ခုက ရေနဲ့ မီး လိုပင်။

​ကြည့်ရတာ ဒီအလွန် ငယ်ရွယ်သည့် ရွှေအမြုတေ အဆင့် လေလွှင့်ကျင့်ကြံသူက ဖြောင့်မတ်လမ်းစဉ်ရဲ့ အစိတ်အပိုင်း တစ်ခု ဖြစ်ပုံရပြီး ဆိုလိုတာက သူက ရန်သူ မဟုတ်ပေ။

​'ဒါ ကောင်းတယ်..'

​"ကျွန်မတို့ ဒီကို လာရတဲ့ ရည်ရွယ်ချက်ကလည်း မြင့်မြတ်သောနှလုံးသား နန်းတော်က မိစ္ဆာကျင့်ကြံသူတွေကို စေ့စေ့စပ်စပ် စုံစမ်းစစ်ဆေးဖို့ပါပဲ" မဟာယန် မင်းဆက်၏ မင်းသမီးက တိုးညှင်းစွာ ပြောလိုက်၏။ "လွန်ခဲ့တဲ့ ရက်အနည်းငယ်တုန်းက နန်းတော်က မြင့်မြတ်သောနှလုံးသား နန်းတော်ကို ဝိုင်းရံပြီး အမြစ်ဖြတ် ချေမှုန်းခဲ့တယ်"

​"ဒါပေမဲ့ မိစ္ဆာတွေက ဉာဏ်များလွန်းတော့ ပိုက်ကွန်ထဲကနေ လွတ်မြောက်သွားတဲ့သူတွေ မနည်းမနော ရှိနေခဲ့တယ်.... ဒါ့အပြင်... မြင့်မြတ်သောနှလုံးသား နန်းတော်ရဲ့ နန်းတော်သခင်လည်း နန်းတော်က မသေမျိုးကျင့်ကြံသူတွေကို မယှဉ်နိုင်တဲ့နောက်မှာ လျှို့ဝှက် နည်းစနစ်တစ်ခု သုံးပြီး ထွက်ပြေးလွတ်မြောက်သွားခဲ့တယ်"

​"ဒီမှာ မြင့်မြတ်သောနှလုံးသား နန်းတော်က မိစ္ဆာကျင့်ကြံသူတွေ ရှိနေတယ်လို့ ကျွန်မတို့ သိလိုက်ရလို့ မိစ္ဆာတွေရဲ့ ခြေရာတွေကို စုံစမ်းစစ်ဆေးဖို့ ဒီကို လာခဲ့တာပါ"

​"ကျွန်မတို့ ရှာတွေ့တာနဲ့..."

​သူမ စကားမဆုံးခင်မှာပင် သူမ၏ မျက်နှာက သိသိသာသာ ပြောင်းလဲသွားသလို တခြားသူများလည်း ထိုနည်းတူပင်။

​အဘယ်ကြောင့်ဆိုသော် ဤအချိန်တွင် ကြောက်မက်ဖွယ် ကောင်းသည့် အရှိန်ဝါတစ်ခု ဖိချလာသောကြောင့် ဖြစ်၏။

​လူတိုင်း အလျင်စလို ခေါင်းမော့ပြီး မဲနက်နေသော မိုးကုပ်စက်ဝိုင်းကို ကြည့်လိုက်ကြပြီး သူတို့၏ မျက်နှာများက လေးနက်သွားခဲ့ကြသည်။

​"သောက်ကျိုးနည်း"

​ပြည်နယ် အစိုးရ အရာရှိ တစ်ဦး အံကြိတ်ပြီး ပြောလိုက်၏။

​"အဲဒီ မိစ္ဆာကြီး လိုက်မီလာပြီ"

​"ချီး.... ဘာလို့ သူက ငါတို့ကို ဒီလောက် သဲသဲမဲမဲ လိုက်နေရတာလဲ"

​…