အခန်း ၈၃ : လူကုန်ကူးဖို့ကြံနေတဲ့ ပိုင်ယီ၊ ပြည်နယ်မြို့တော်မှ အရှင်မင်းသမီး
ရွှေအမြုတေ အဆင့် လူသားရုပ်သေးက ရွှေအမြုတေ အဆင့် (၁) ခွန်အား ရှိရုံသာမကပဲ ပိုင်ယီရဲ့ အတွေးတွေ ပုံစံအစုံ ပြောင်းလဲလို့ ရပေသည်။
အမျိုးသား....
အမျိုးသမီး...
ကလေးငယ်...
အဘိုးအို...
ပိုင်ယီရဲ့ အသိစိတ် ထိန်းချုပ်မှု အောက်မှာ ရွှေအမြုတေ အဆင့် လူသားရုပ်သေးက အသက်ရှူချိန် အနည်းငယ် အတွင်းမှာပဲ ကွဲပြားတဲ့ ပုံစံ (၄) မျိုး ပြောင်းလဲနိုင်ပြီး တော်တော်လေး မှော်ဆန်လေသည်။
မသေမျိုးကျင့်ကြံခြင်း သရုပ်ဖော် စနစ်ထဲမှာ မဟာဝေ ဧကရာဇ်မင်းမြတ်က ချန်ချန်ရွှယ်အား သူမကိုယ်သူမ ကာကွယ်နိုင်အောင် ဒီရွှေအမြုတေ အဆင့် လူသားရုပ်သေးကို ပေးခဲ့တာ အံ့သြစရာ မဟုတ်တော့ပေ။
ဒီအရာက စွမ်းအားကြီးတဲ့ ရုပ်ဆသးရုပ် ဖြစ်ပြီး ဒီလို ထူးခြားတဲ့ စွမ်းရည်မျိုးလည်း ပိုင်ဆိုင်ထားသေးပေသည်။
သို့ပေမဲ့ ကန့်သတ်ချက်မရှိတာတော့ မဟုတ်ချေ။
ရွှေအမြုတေ အဆင့် လူသားရုပ်သေးက ခန္ဓာကိုယ် ပုံသဏ္ဍာန် ပြောင်းလဲတဲ့အခါ အမြင့်ဆုံး အရပ်အမောင်းက (၂) မီတာထက် မကျော်လွန်နိုင်သလို အနိမ့်ဆုံး အရပ်အမောင်းက (၁) မီတာထက် မနိမ့်နိုင်ပေ။
ဒါ့အပြင် ခန္ဓာကိုယ် ပုံသဏ္ဍာန် ပြောင်းလဲတဲ့အခါမှာ စွမ်းအင် အများကြီး ကုန်ဆုံးလေသည်။ ပိုင်ယီ အထဲမှာ ထည့်ထားတဲ့ အလယ်အလတ်အဆင့် ဝိညာဉ်ကျောက်တုံးက အရင်တုန်းကလို အရောင်တောက်ပြောင်မှုမျိုး မရှိတော့ပဲ ဝိညာဉ်ကျောက်တုံးထဲက စွမ်းအင် တစ်ဝက်ကျော်လောက် ကုန်ဆုံးသွားပုံ ရ၏။
......
"လခွမ်း... ဒါက တကယ့်ကို ရွှေမျိုတဲ့ သားရဲပဲ...."
အကယ်၍ ပိုင်ယီ့လက်ထဲမှာ ဝိညာဉ်ကျောက်တုံးတွေ မရှိခဲ့ရင် အခုချိန် သူ ရင်ကွဲပက်လက် ဖြစ်နေရလောက်ပေပြီ။
ဒီလို ရွှေအမြုတေ အဆင့် လူသားရုပ်သေး ရှိလာတာနဲ့ ပိုင်ယီရဲ့ အတွေးတွေ ချက်ချင်း တက်ကြွလာခဲ့ အတွေးတစ်ခုပြီး တစ်ခု ပေါ်လာခဲ့သည်။
လက်ရှိအချိန်မှာ ပိုင်ယီရဲ့ ကျင့်ကြံမှု အခြေခံက အခြေတည်အဆင့် (၄) မှာ ရှိနေပြီးဖြစ်ရာ မသေမျိုးကျင့်ကြံခြင်း သရုပ်ဖော် စနစ်ရဲ့ လုပ်ပိုင်ခွင့်အရ မသေမျိုးကျင့်ကြံခြင်း သရုပ်ဖော်မှု အတွက် အချိန်ပိုင်း အလုပ်သမား ဖြစ်လာဖို့ နောက်ထပ် ရွေးချယ်ခံ တစ်ယောက်ကို ဖိတ်ခေါ်လို့ ရနေပေပြီ။
ဒါပေမဲ့ ပိုင်ယီရွေးချယ်ခံ တစ်ယောက်ကို တွေ့ကရာ မခေါ်ချင်ပဲ သူ လိုအပ်တာက ချန်ချန်ရွှယ် နဲ့ ချင်းကျောက်တို့လို ပါရမီရှင်တွေပင်။
သုံးစားမရသည့် လူတွေကို သူ အသုံးမပြုချင်ပေ။
ဒီလို အခြေအနေမျိုး၌ သူဟာ တတိယမြောက် ရွေးချယ်ခံတစ်ယောက် ရှာချင်ပါက ချင်းဟယ် ခရိုင်ကနေ ထွက်ခွာမှပဲ ရပေမည်။
ဘာလို့လဲဆိုတော့ ချင်းဟယ် ခရိုင်ထဲမှာ သူ့လိုအပ်ချက်တွေနဲ့ ကိုက်ညီတဲ့ ရွေးချယ်ခံ မရှိတော့လို့ပင်။
ဒါပေမဲ့ သူ တစ်ယောက်တည်း ချင်းဟယ် ခရိုင်ကနေ မထွက်ခွာသွားချင်ပေ။
အခြေတည်အဆင့် (၄) ခွန်အားက ချင်းဟယ် ခရိုင်ထဲမှာ အဆင်ပြေပေမယ့် အကယ်၍ သူ အပြင်မှာ လျှောက်သွားမယ် ဆိုရင် သူ့ခွန်အားက နည်းနည်း လိုအပ်ချက် ရှိနေအုံးပေမည်။
သရုပ်ဖော် စနစ်ထဲက ရွေးချယ်ခံတွေရဲ့ ဆိုးရွားတဲ့ ဘဝတွေကို သူမြင်နေခဲ့ဖူးရာ ပိုင်ယီဟာ သူတို့ရဲ့ လမ်းဟောင်းအတိုင်း မလိုက်ချင်ပေ။
ထို့အပြင် သူတို့က သရုပ်ဖော် စနစ်ထဲမှာ အချိန်မရွေး ပြန်စလို့ ရပေမယ့် လက်တွေ့ဘဝမှာတော့ မတူချေ။
လက်တွေ့ဘဝမှာ သေသွားတာနဲ့ တကယ် ပျောက်ကွယ်သွားပေမည်။
"ဒါပေမဲ့ ငါ ဒီရွှေအမြုတေ အဆင့် လူသားရုပ်သေးကို သုံးမယ် ဆိုရင်ရော" ပိုင်ယီ မေးစေ့ကို ပွတ်လိုက်ပြီး သူ့စိတ်ကူးက ဖြစ်နိုင်ချေ ရှိတယ်လို့ ခံစားလိုက်ရ၏။ "ရွှေအမြုတေ အဆင့် (၁) ခွန်အား ဆိုတာ မသေမျိုးကျင့်ကြံခြင်း လောကမှာ မဆိုးဘူးလို့ သတ်မှတ်လို့ ရတယ် မဟုတ်လား"
"အဲဒီ အရည်အချင်း ပြည့်မီတဲ့ ရွေးချယ်ခံတွေကို ရှာဖွေဖို့ ငါ ဒီရုပ်သေးရုပ်ကို အပြင်လွှတ်လိုက်မယ်... ပြီးတော့ အဲဒီ ရွေးချယ်ခံတွေရဲ့ အခြေခံ အချက်အလက်တွေကို ရှာဖွေခိုင်းမယ်... ပြီးရင် သူတို့ကို တစ်ယောက်ပြီး တစ်ယောက် သတိလွတ်အောင် ရိုက်... ဂုန်နီအိတ်တွေထဲ ထည့် ပြီးရင် ချင်းဟယ် ခရိုင်ဆီ ပို့ခိုင်းလိုက်မယ်..."
"ပြီးတော့ သူတို့ မနိုးခင် သူတို့ကို အကုန် ပြန်လွှတ်လိုက်မယ်ဆိုရင်ကော..."
"ရှူး..."
လူကုန်ကူးမှုကို အထူး လုပ်ကိုင်နေသည့်ရာဇဝတ်ကောင် တစ်ယောက် ဖြစ်နေသလို ပိုင်ယီ ခံစားလိုက်ရသည်။
ဒါပေမဲ့ သူ စိတ်လှုပ်ရှားနေမိလေသည်။
ဘာပဲဖြစ်ဖြစ် သူက သူတို့ အသက်ကို အန္တရာယ် ပေးမှာ မဟုတ်သလို တစ်ဖက်လူကို စိတ်ပိုင်းဆိုင်ရာ ထိခိုက်မှုတစ်ခုခု ရသွားမလား မရသွားဘူးလား ဆိုတာနဲ့ ပတ်သက်ပြီးတော့...
ကိစ္စ မရှိပေ.....
အချိန်က စိတ်ပိုင်းဆိုင်ရာ ထိခိုက်မှု အများစုကို အခြေခံအားဖြင့် ဖျက်ပစ်နိုင်ပြီး အကယ်၍ တစ်နှစ်နဲ့ မလုံလောက်ရင် (၁၀) နှစ်။ အကယ်၍ (၁၀) နှစ်နဲ့ မလုံလောက်ရင် နှစ် (၁၀၀)။ ဘာပဲဖြစ်ဖြစ် မသေမျိုးကျင့်ကြံသူတွေက အသက်ရှည်ရှည် နေရတာပင်.......
"ဟုတ်တယ်...
ဒါက ပြဿနာကြီး မဟုတ်ဘူး..."
ပိုင်ယီဟာ ပြောတဲ့အတိုင်း လုပ်တတ်တဲ့ လူမျိုးဖြစမရာ ချက်ချင်းပင် အနည်းဆုံး လူတစ်ယောက်နဲ့ တူအောင် ရွှေအမြုတေ အဆင့် လူသားရုပ်သေးရဲ့ မျက်နှာကို ဂရုတစိုက် ပုံဖော်နေခဲ့ပေပြီ။
အမွှေးတိုင် တစ်တိုင် ထွန်းညှိချိန်လောက် ကြာပြီးနောက်မှာ ကမ္ဘာမြေ တုန်လှုပ်လောက်အောင် ပြောင်းလဲသွားတဲ့ ရွှေအမြုတေ အဆင့် လူသားရုပ်သေးကို ပိုင်ယီ ကြည့်လိုက်ပြီး ကျေနပ်အားရစွာ ခေါင်းမငြိမ့်ဘဲ မနေနိုင်တော့ပေ။
"မဆိုးဘူး"
"ငါ့လောက် မချောတာ တစ်ခုပဲ"
သူ့ရဲ့ ပုံဖော်ဖန်တီးမှုအောက်မှာ ရွှေအမြုတေ အဆင့် လူသားရုပ်သေးက ရွှင်လန်းတက်ကြွပုံရတဲ့လူငယ်တစ်ယောက် အဖြစ် ပြောင်းလဲသွားခဲ့သည်။
၎င်းရုပ်သေး၌ ဓားသွားလို မျက်ခုံးတန်းတွေနဲ့ ကြယ်ရောင်လို မျက်လုံးတွေ ရှိနေခဲ့လေသည်
ထို့အပြင် ခန့်ညားထည်ဝါတဲ့ ဟန်ပန်အမူအရာလည်းရှိနေခဲ့သည်။
ဒါပေမဲ့ မျက်နှာတစ်ခုလုံးရဲ့ ခန့်ညားတဲ့ အငွေ့အသက်ကို ဖျက်ဆီးနေတာက ရက်စက်ကြမ်းကြုတ်တဲ့ အရှိန်ဝါ အနည်းငယ် ပါရှိနေတဲ့ မျက်လုံးတစ်စုံပင်။
တစ်ချက်ကြည့်လိုက်ရင် သူက လူကောင်း တစ်ယောက်နဲ့ လုံးဝ မတူနေခဲ့ပေ။
ဒါက ပိုင်ယီ တမင်သက်သက် လုပ်ထားတာဖြစ်ပြီး အကယ်၍ သူသာ ပြီးပြည့်စုံလွန်းအောင် ပုံဖော်လိုက်ရင် သိပ်အတုဆန်သွားပေလိမ့်မည်။
ပိုင်ယီရဲ့ စိတ်ထဲက အတွေး တစ်ချက်နဲ့အတူ ရွှေအမြုတေ အဆင့် လူသားရုပ်သေးက ရုတ်တရက် လှုပ်ရှားလာခဲ့သည်။
ရွှေအမြုတေ အဆင့် လူသားရုပ်သေးဟာ အိမ်ထဲက ထွက်လာပြီး ကောင်းကင်သို့ မော့ကြည့်လိုက်၏။
မျက်စိကျိန်းလောက်အောင် တောက်ပတဲ့ နေရောင်ခြည်က သူ့မျက်လုံးတွေကို စနိုးစနှောက် ဖြစ်အောင် နည်းနည်းလေးမှ မလုပ်နိုင်ပေ။
ထို့နောက် သူ့၏ အနည်းငယ် နိမ့်ပြီး အက်ကွဲနေသည့် အသံက ရုတ်တရက် ထွက်ပေါ်လာခဲ့သည်။
"ငါ..."
"ငါ့ နာမည်က လီဖေးယွီ"
ဒါက ပိုင်ယီ သူ့ကို ပေးထားတဲ့ နာမည်ပင်။
...
ချင်းဟယ် ခရိုင်နဲ့ အနည်းငယ် ဝေးကွာတဲ့ လူသူကင်းမဲ့တဲ့ တောင်တန်း တစ်ခုထဲ၌ ပျက်စီးယိုယွင်းနေတဲ့ ပျံသန်းရေး သင်္ဘောတစ်စင်း မြေပြင်ပေါ်သို့ ရောက်နေခဲ့လေသည်။ ပျံသန်းရေး သင်္ဘော ဘေးနားမှာ ထူးခြားတဲ့ အရှိန်ဝါရှိသည့် ကျင့်ကြံသူ တစ်စု ရပ်နေခဲ့ကြပြီး သူတို့ရဲ့ မျက်နှာတွေနဲ့ စိတ်အခြေအနေတွေက အပေါ်ယံကြည့်ရင် သိပ်မကောင်းနေခဲ့ပေ။
"ဒီလို ကံဆိုးတဲ့ ကိစ္စမျိုး ကြုံတွေ့ရတယ်လို့ကွာ.."
သူတို့ထဲမှာ တရားဝင် ဝတ်စုံဝတ်ဆင်ထားတဲ့ သက်လတ်ပိုင်း အမျိုးသား တစ်ယောက် ပါဝင်နေခဲ့ပြီး အံကြိတ်ကာ မနေနိုင်တော့ဘဲ ပြောလိုက်သည်။ "အဲဒီ မိစ္ဆာသားရဲက ငါတို့ကို အကြောင်းပြချက် မရှိဘဲ တိုက်ခိုက်ခဲ့တယ်... တကယ်လို့ ပျံသန်းရေး သင်္ဘောက မြန်မြန် မပျံသန်းနိုင်ခဲ့ရင် မီတာ (၁၀,၀၀၀) အမြင့်မှာ ငါတို့ အဲဒီ မိစ္ဆာသားရဲရဲ့ အစာ ဖြစ်သွားလောက်ပြီ"
"ငါတို့ မိစ္ဆာသားရဲရဲ့ လက်သည်းကြားကနေ သီသီလေး လွတ်မြောက်လာခဲ့ပေမယ့် အကြောင်း အမျိုးမျိုးကြောင့် ပျံသန်းရေး သင်္ဘောကို ဆက်သုံးလို့ မရတော့ဘူး... ငါတို့ ပြုပြင်ဖို့ ကြိုးစားလို့ ရပေမယ့် ပြင်ဖို့ အနည်းဆုံး တစ်လလောက် ကြာလိမ့်မယ်"
ဒီလိုပြောရင်း သူ့ရင်ထဲမှာ ကြောက်ရွံ့မှု အကြွင်းအကျန်တချို့ ရှိနေတုန်းပင်။
ဒီလို မတော်တဆမှုကို ဘယ်သူက တွေးမိမည်နည်း။
သူတို့ ပြည်နယ်မြို့တော်ကနေ ပျံသန်းရေး လှေ စီးလာကြရာ လမ်းမှာ ရွှေအမြုတေ အဆင့် (၁၀) မိစ္ဆာသားရဲ တစ်ကောင်နဲ့ တကယ် သွားတိုးခဲ့ရလေသည်။
သူတို့ အဖွဲ့ထဲမှာ အရှင်သခင်တစ်ပါး ပါလာပြီး ထူးခြားတဲ့ သူဖြစ်ရာ အကယ်၍ ဒီအရှင်သခင်သာ တစ်ခုခု ဖြစ်သွားခဲ့ရင် သူတို့ ခေါင်းတွေ အဖြတ်ခံရပေလိမ့်မည်။
သက်လတ်ပိုင်း အမျိုးသားက သူ့ဘေးနားက လူကို ကြည့်ပြီး လေသံနှိမ့်ကာ ပြောလိုက်၏။ "အရှင်မင်းသမီး... ဒီနှိမ့်ကျတဲ့ လက်အောက်ငယ်သားရဲ့ အပြစ်ပါ.... ကျွန်တော် အရှင်မင်းသမီးကို ထိတ်လန့်သွားစေခဲ့ပါတယ်"
အဲဒီလူ ခေါင်းခါလိုက်သည်။
"ကိစ္စ မရှိပါဘူး"
ချက်ချင်းပင် သူမ မေးလိုက်သည်။ "ဒီနေရာကနေ ချင်းဟယ် ခရိုင် ရောက်ဖို့ ဘယ်လောက် လိုသေးလဲ... ဓားပျံစီးပြီး သွားရင် ဘယ်လောက် ကြာမလဲ"
သက်လတ်ပိုင်း အမျိုးသား အလျင်စလို ပြန်ဖြေလိုက်၏။"အကယ်၍ ကျွန်တော်တို့ ပျံသန်းရေး လှေ စီးသွားရင် ချင်းဟယ် ခရိုင် ရောက်ဖို့ နေ့ဝက်လောက်ပဲ လိုတော့တာ... ဒါပေမဲ့ ဓားပျံစီးပြီး သွားရင် ရက်အနည်းငယ်လောက် ကြာနိုင်ပါတယ်"
"အရှင်မင်းသမီး... မိစ္ဆာသားရဲက ကျွန်တော်တို့နောက်ကို လိုက်နေတုန်းပဲ... တကယ်လို့ ကျွန်တော်တို့ ချင်းဟယ် ခရိုင်ဆီ ဆက်သွားရင် အန္တရာယ် များလွန်းပါတယ်"
"ကျွန်တော် အထင်တော့ ကျွန်တော်တို့ အခု ပြည်နယ်မြို့တော်ဆီ ပြန်လှည့်ဖို့ လိုပါတယ်"
"ဒီနည်းနဲ့ ပြည်နယ်မြို့တော်က လူတွေ ကျွန်တော်တို့ကို အမြန် လာကြိုနိုင်လိမ့်မယ်"
အရှင်မင်းသမီးလို့ အခေါ်ခံရတဲ့ အမျိုးသမီး ခေါင်းထပ်ခါလိုက်သည်။
သူမ ကြည့်ရတာ အနည်းငယ် ကြောက်လန့်နေပုံရလေသည်။ ဘာပဲဖြစ်ဖြစ် သူမက ရွှေအမြုတေ အဆင့် (၁၀) မိစ္ဆာသားရဲရဲ့ လိုက်ဖမ်းတာကို ဒီလောက်ကြာအောင် ခံခဲ့ရရာ သူမ မကြောက်နေရင်သာ ထူးဆန်းနေပေလိမ့်မည်။
ကံကောင်းတာက သူမရဲ့ မျက်နှာအပြင်ပန်း၌ တည်ငြိမ်နေခဲ့လေသည်။
သူမ ပြောလိုက်သည် - "မိစ္ဆာသားရဲက ငါတို့ အနောက်မှာ ရှိနေတာ... ပြည်နယ်မြို့တော်ဆီ ပြန်တဲ့ လမ်းကလည်း ငါတို့ အနောက်မှာပဲ ရှိတာ... အကယ်၍ ငါတို့ ဒီအတိုင်း ပြန်လှည့်သွားရင် အဲဒီ မိစ္ဆာသားရဲနဲ့ ထိပ်တိုက်သွားတိုးနိုင်ခြေ များတယ်"
"ငါတို့ဘက်မှာ အသန်မာဆုံး လူက ရွှေအမြုတေ အဆင့် (၅) ပဲ ရှိတာ... တကယ်လို့ ရွှေအမြုတေ အဆင့် (၁၀) မိစ္ဆာသားရဲနဲ့ တွေ့ရင်... ပြီးတော့ ထွက်ပြေးဖို့ ပျံသန်းရေး လှေလည်း မရှိရင် သေခြင်းတရားကပဲ ငါတို့ကို စောင့်ကြိုနေလိမ့်မယ်"
"အခု ငါတို့ ရှေ့ဆက်သွားပြီး အဲဒီ သားရဲက ငါတို့ကို စိတ်မဝင်စားတော့ဘူး လို့ လောင်းကြေးထပ်ကြည့်ရုံပဲ ရှိတော့တယ်"
သက်လတ်ပိုင်း အမျိုးသား ဘာမှ ထပ်မပြောနိုင်တော့ပေ။
အရှင်မင်းသမီး ပြောတာ မှန်နေရာ သူ ဘယ်လို ငြင်းချက်ထုတ်ရမလဲ မသိတော့ပေ။
...