အခန်း ၈၂ : ချင်းကျောက်- အကျင့်ယုတ်တဲ့ စနစ်
[သင်သည် မသေမျိုးကျင့်ကြံခြင်း သရုပ်ဖော် ဘဝတွင် အောင်မြင်မှု တစ်ခုကို အသက်သွင်းနိုင်ခဲ့ပါသည်။ သင်သည် အောက်ပါ ဆုလာဘ်ကို ရရှိခဲ့ပါသည် ]
[ဆုလာဘ် - ရွှေအမြုတေ အဆင့် (၁) ရှိသည့် လူသားရုပ်သေး တစ်ရုပ် (အမွှေးတိုင် တစ်တိုင် ထွန်းညှိချိန်ခန့်သာ အသုံးပြုနိုင်သည်)]
[ထပ်ဆောင်း ဆုလာဘ် - အလယ်အလတ်အဆင့် ဝိညာဉ်ကျောက်တုံး ၁,၀၀၀ (သရုပ်ဖော် မသေမျိုးကျင့်ကြံသူ၏ ကိုယ်ပိုင်ငွေကြေး)]
ချန်ချန်ရွှယ်ဟာလည်း သူမ၏ သရုပ်ဖော် ဆုလာဘ်ကို လက်ခံရရှိခဲ့သည်။
"ရွှေအမြုတေ အဆင့် (၁) လူသားရုပ်သေးနဲ့ အလယ်အလတ်အဆင့် ဝိညာဉ်ကျောက်တုံး ၁,၀၀၀..."
ပြောရမည် ဆိုလျှင် ချန်ချန်ရွှယ်၏ မသေမျိုးကျင့်ကြံခြင်း သရုပ်ဖော် ဆုလာဘ်ကလည်း တော်တော်လေး ရက်ရောသည်ဟု ဆိုရပေမည်။ ၎င်းက သူမအား တော်တော်လေး ကျေနပ်သွားစေခဲ့သည်။
ဤလူသားရုပ်သေးကို အမွှေးတိုင် တစ်တိုင် ထွန်းညှိချိန်ခန့်သာ အသုံးပြုနိုင်မည် ဖြစ်သော်လည်း...
ဒါက ရွှေအမြုတေ အဆင့် (၁) ခွန်အားရှိသည့် လူသားရုပ်သေး ဖြစ်လေသည်။
ထိုကဲ့သို့သော ခွန်အားဖြင့် အမွှေးတိုင် တစ်တိုင် ထွန်းညှိချိန်ခန့် အသုံးပြုခွင့် ရခြင်းကပင် အလွန်ကြီးမားသော ဝှက်ဖဲ တစ်ခု ဖြစ်နေပေပြီ။
အလယ်အလတ်အဆင့် ဝိညာဉ်ကျောက်တုံး ၁,၀၀၀ အတွက်မူ ၎င်းကလည်း ပမာဏ မနည်းလှပေ။
ဝိညာဉ်ဓားဂိုဏ်း၏ သူတော်စင်မ အနေဖြင့် ချန်ချန်ရွှယ်ဟာ ပစ္စည်းတချို့ ဝယ်ယူရန်နှင့် သူမ၏ ကျင့်ကြံမှုကို အထောက်အကူ ပြုရန် ဂိုဏ်းမှ လစဉ် အလယ်အလတ်အဆင့် ဝိညာဉ်ကျောက်တုံး (၁၀၀) ခန့် ရရှိသည်။
ဤအလယ်အလတ်အဆင့် ဝိညာဉ်ကျောက်တုံး ၁,၀၀၀က သူမအတွက် ဂိုဏ်းမှ (၁၀) လစာ လစာငွေနှင့် ညီမျှနေပြီ ဖြစ်၏။
"ဒီလူသားရုပ်သေးနဲ့ ဆိုရင် ဖြစ်နိုင်တာက... ငါ ဝိညာဉ်ဓားဂိုဏ်းကနေ အချိန်ကာလ တစ်ခုလောက် ထွက်ခွာဖို့ ကြိုးစားသင့်တယ်"
......
ချန်ချန်ရွှယ် ကိုယ့်ကိုယ်ကိုယ် ရေရွတ်လိုက်၏။
သူမဟာ ဂိုဏ်းကနေ ယာယီ ထွက်ခွာချင်နေခဲ့ပေသည်။
အဘယ်ကြောင့်ဆိုသော် ဝိညာဉ်ဓားဂိုဏ်းထဲတွင် မျိုးရိုးအမည် ယုဟု ခေါ်သော အဓိပတိ အကြီးအကဲ တစ်ယောက် ရှိနေသလို ဝိညာဉ်ဓားဂိုဏ်း၏ သူတော်စင်လည်း ရှိနေကာ သူတို့က သူမအား နှောင့်ယှက်နေကြရာ သူတို့အား ငြီးငွေ့နေပြီ ဖြစ်လေသည်။
သူမ၏ ယခင် ပြတ်သားသော ငြင်းပယ်မှုကလည်း အဓိပတိ အကြီးအကဲ၏ မျက်နှာကို ဖြတ်ရိုက်လိုက်သကဲ့သို့ ဖြစ်သွားကြောင်း ချန်ချန်ရွှယ် သိပေသည်။
ထို့အပြင် ထိုလူက မူလဝိညာဉ် အဆင့် ကျင့်ကြံသူ တစ်ယောက် ဖြစ်ရာ တစ်ဖက်လူက အောက်တန်းကျသော နည်းလမ်းများကို အသုံးပြုလာမည် မဟုတ်ကြောင်း သူမ အာမ မခံရဲပေ။
မသေမျိုးကျင့်ကြံခြင်း သရုပ်ဖော် စနစ်ကို အချိန်အကြာကြီး တွေ့ကြုံခံစားဖူးသော ချန်ချန်ရွှယ် အနေဖြင့် ဖြောင့်မတ်လမ်းစဉ်မှ လူတချို့သးဟာ ကိစ္စများ လုပ်ဆောင်ရာတွင် ကျွမ်းကျင်သော မိစ္ဆာကျင့်ကြံသူများနှင့် တူညီကြောင်း သိထား၏။
သူတို့နှင့် မိစ္ဆာကျင့်ကြံသူများကြားတွင် ကွာခြားချက် မရှိပေ။
"သူတော်စင်မ... ဂိုဏ်းတာဝန် ယူချင်လို့လား"
ဝိညာဉ်ဓားဂိုဏ်း၏ မြင့်မားသော တောင်ထိပ်တစ်ခုပေါ်တွင် ရွှေအမြုတေ အဆင့် ကျင့်ကြံမှု ရှိသည့် ဝိညာဉ်ဓားဂိုဏ်း အကြီးအကဲ တစ်ဦးဟာ အံ့သြသည့် အမူအရာဖြင့် မေးလိုက်၏။
ဤအကြီးအကဲက ဝိညာဉ်ဓားဂိုဏ်းမှ ထုတ်ပြန်သော ဂိုဏ်းတာဝန်များကို တာဝန်ယူထားရသည့် အကြီးအကဲပင်။
သူဟာ ဂိုဏ်းအတွင်းရှိ တပည့်များ၏ အတွေ့အကြုံလေ့လာသင်ယူမှုကို အဓိက တာဝန်ယူရသူ ဖြစ်သည်။
ဝိညာဉ်ဓားဂိုဏ်း၏ သူတော်စင်မဟာ သူ့နေရာသို့ တကယ် ရောက်လာလိမ့်မည်ဟု သူ မမျှော်လင့်ထားခဲ့ပေ။
ချန်ချန်ရွှယ် ခေါင်းငြိမ့်ပြီး ပြန်ဖြေလိုက်သည်။
"အကြီးအကဲ... ဘာဂိုဏ်းတာဝန်တွေ ရှိလဲ ဆိုတာ ပြပေးလို့ ရမလား"
ထိုအကြီးအကဲဟာ တုန်လှုပ်မှုမှ ပြန်လည် သတိဝင်လာခဲ့ပြီး ခေါင်းငြိမ့်ပြလိုက်သည်။
ထို့နောက် သူဟာ ကျောက်စိမ်းပြားတစ်ခုကို ထုတ်ယူပြီး ချန်ချန်ရွှယ်အား ကမ်းပေးလိုက်ကာ ပြောလိုက်သည်။
"ဒါတွေ အားလုံးက အတွင်းစည်း တပည့်တွေပဲ ယူလို့ရတဲ့ ဂိုဏ်းတာဝန်တွေပါ... သူတော်စင်မ အနေနဲ့ ဒီအထဲက တစ်ခု နှစ်ခုလောက် ရွေးချယ်လို့ ရပါတယ်"
သူ ပြောနေစဉ်မှာပင် သူမအား သတိပေးလိုက်သည်။
"ဒီဂိုဏ်းတာဝန် အများစုက အလွန် အန္တရာယ်များတယ်... အကယ်၍ သူတော်စင်မ အနေနဲ့ ကြီးမားတဲ့ အန္တရာယ်နဲ့ ကြုံတွေ့ရရင် တာဝန်ကို စွန့်လွှတ်ဖို့ ရွေးချယ်လို့ ရပါတယ်"
"ကျွန်မ နားလည်ပါတယ်... သတိပေးတဲ့ အတွက် ကျေးဇူးတင်ပါတယ် အကြီးအကဲ"
ချန်ချန်ရွှယ် ကျောက်စိမ်းပြားကို ယူလိုက်ပြီး အတွင်းထဲသို့ စစ်ဆေးရန် သူမရဲ့ နတ်ဘုရားအာရုံကို အသုံးပြုလိုက်သည်။
သူမဟာ ဂိုဏ်းတာဝန် တစ်ခုပြီး တစ်ခု တွေ့မြင်လိုက်ရပြီး ၎င်းတို့ အားလုံးတွင် အန္တရာယ် အတိုင်းအတာ တစ်ခုစီ ပါရှိနေခဲ့လေသည်။
ဥပမာအားဖြင့် ဝိညာဉ်ဆေးပင် တစ်မျိုးမျိုးကို ရှာဖွေရန် အန္တရာယ်များသော နေရာတစ်ခုသို့ သွားရောက်ခြင်း။
အလွန် ရက်စက်သော မိစ္ဆာကျင့်ကြံသူ တစ်ဦးကို လိုက်လံ ဖမ်းဆီးခြင်း။
သို့မဟုတ် ရှားပါးသော မိစ္ဆာသားရဲ တစ်ကောင်ကို ဖမ်းဆီးခြင်း...
"မြင့်မြတ်သောနှလုံးသား နန်းတော်..."
ချန်ချန်ရွှယ်ဟာ ဤဂိုဏ်းတာဝန်များထဲတွင် ရင်းနှီးသော ဝေါဟာရ တစ်ခုကို တွေ့လိုက်ရပြီး မျက်မှောင်ကြုတ်လိုက်သည်။
"ဘာလို့ ကျင်းရှင်း နန်းတော်နဲ့ နာမည် နည်းနည်း ဆင်တူနေရတာလဲ"
အကြီးအကဲက ရှင်းပြလိုက်သည်။
"ဒါက မင်းဆက် နယ်မြေအတွင်းက မိစ္ဆာကျင့်ကြံသူ ဂိုဏ်းတစ်ခုပါ... ကျွန်တော် သိသလောက်တော့ ကျင်းရှင်း နန်းတော်နဲ့ ဘာမှ မဆိုင်ပါဘူး.... နာမည် နည်းနည်း ဆင်တူနေရုံပါပဲ"
"ကောင်းပြီ"
ချန်ချန်ရွှယ် ခေါင်းငြိမ့်ပြီး ပြောလိုက်၏။
"ဒါကို ကျွန်မ ယူလိုက်မယ်"
အကြီးအကဲ ကြောင်အသွားခဲ့သည်။
"သူတော်စင်မ... ဒီမြင့်မြတ်သောနှလုံးသား နန်းတော်က လွန်ခဲ့တဲ့ ရက်အနည်းငယ်တုန်းက နန်းတော်က ကျွမ်းကျင်သူတွေရဲ့ ဝိုင်းရံတိုက်ခိုက်တာ ခံခဲ့ရတယ်... ဒါပေမဲ့ မိစ္ဆာကျင့်ကြံသူ တစ်စိတ်တစ်ပိုင်းက ထွက်ပြေးလွတ်မြောက်သွားတုန်းပဲ... ဆိုလိုတာက ဒီမိစ္ဆာကျင့်ကြံသူ ဂိုဏ်းက ရိုးရှင်းမနေဘူး.... ပြီးတော့ အန္တရာယ် ရှိနိုင်ခြေက မြင့်မားတယ်..."
"ကျွန်မ ယူလိုက်မယ်"
ချန်ချန်ရွှယ် ထပ်ပြောလိုက်သည်။
၎င်းက အခက်အခဲက အလွန် မြင့်မားသည်ဖြစ်ရာ ဤအခွင့်အရေးကို အသုံးပြုပြီး ဝိညာဉ်ဓားဂိုဏ်းမှ တစ်နှစ်ခွဲလောက် ထွက်ခွာသွားလျှင် ပြဿနာ ရှိမည် မဟုတ်ပေ။
"ဒါ..."
"ကောင်းပါပြီ"
ထိုကဲ့သို့ပင် ချန်ချန်ရွှယ် ဂိုဏ်းတာဝန်တစ်ခုအား လက်ခံခဲ့သည်။
ထို့အပြင် သူမဟာ ဤကိစ္စကို လူသိရှင်ကြား မဖြစ်စေရန် အကြီးအကဲအား တောင်းဆိုခဲ့၏။ ဂိုဏ်းချုပ်ကြီးကို ပြောပြခြင်းမှလွဲ၍ အခြားလူများကို မပြောပြဘဲ နေရန် အတတ်နိုင်ဆုံး ထိန်းထားပေးရန် ပြောလိုက်လေသည်။
အကြီးအကဲက နားလည်သဘောပေါက်စွာဖြင့် သဘောတူလိုက်သည်။
အဘယ်ကြောင့်ဆိုသော် ချန်ချန်ရွှယ်တွင် ထူးခြားသော အဆင့်အတန်း ရှိသည်ကို သူလည်း သိထားသောကြောင့် ဖြစ်၏။ သူတော်စင်မ တစ်ယောက်က ဂိုဏ်းတာဝန် တစ်ခု လက်ခံပြီး ဝိညာဉ်ဓားဂိုဏ်းမှ တစ်ယောက်တည်း ထွက်ခွာသွားခြင်းဖြစ်ပြီး အလွန် ဝေးကွာသော နေရာသို့ပင် သွားရနိုင်လေသည်။
အကယ်၍ ဤကဲ့သို့သော ကိစ္စမျိုး ပျံ့နှံ့သွားပါက ချန်ချန်ရွှယ်ဟာ အန္တရာယ်များစွာနှင့် ကြုံတွေ့ရနိုင်ခြေ ရှိသည်။
ချန်ချန်ရွှယ် ချင်းဟယ် ခရိုင်သို့ ရောက်ရှိစဉ်က သူမ၏ ခြေရာများကို အဘယ်ကြောင့် တမင်သက်သက် ဖုံးကွယ်မထားခဲ့သနည်း ဟူသည့် မေးခွန်းအတွက်မူ...
အဘယ်ကြောင့်ဆိုသော် ချင်းဟယ် ခရိုင်က ဝိညာဉ်ဓားဂိုဏ်းနှင့် အလွန် နီးကပ်သောကြောင့် ဖြစ်ပြီး ဂိုဏ်းမှ စစ်ကူများဟာ မျက်တောင်တစ်ခတ် အတွင်း ရောက်လာနိုင်တာကြောင့်ပင်။
အထူးသဖြင့် မူလဝိညာဉ် အဆင့် ကျင့်ကြံသူများ အတွက် ဤအကွာအဝေးက အသက်ရှူချိန် အနည်းငယ်မျှသာ ကြာလေသည်။
...
အခြားတစ်ဖက်...
ကျင်းရှင်း နန်းတော်ထဲတွင်...
ချင်းကျောက်ဟာလည်း သူမ၏ ဆုလာဘ် တွက်ချက်မှုကို လက်ခံရရှိခဲ့သည်။
"အနည်းဆုံးတော့ သရုပ်ဖော် စနစ်မှာ အသိစိတ်နည်းနည်း ရှိပါသေးတယ်... ဒီတစ်ခါ ငါ ဝိညာဉ်ဆေးပင် (၅) ပင်နဲ့ ဝိညာဉ်လက်နက် ဆေးဖော်စပ်တဲ့ မီးဖိုတစ်လုံး ရခဲ့တယ်"
သူမ ရုတ်တရက် တစ်ခုခု မှားယွင်းနေကြောင်း သတိထားမိလိုက်သည်။
"တစ်ခုခုတော့ မှားနေပြီ"
"ဒီ ဝိညာဉ်ဆေးပင် (၅) ပင်ကို ကြေးဝါတံခါးကြီး အတွင်းကနေ ငါ တူးခဲ့တာလေ... ဒီဆေးဖော်စပ်တဲ့ မီးဖိုကလည်း ငါ သရုပ်ဖော် ကျင့်ကြံနေတုန်း ငါ့မိသားစုဝင်တွေ ဝိညာဉ်ကျောက်တုံးတွေနဲ့ ဝယ်ပေးခဲ့တာ... တစ်နည်းအားဖြင့် ဒါတွေက မူလကတည်းက ငါ့ပစ္စည်းတွေ မဟုတ်လား"
ချင်းကျောက် ရုတ်တရက် တုံ့ပြန်လိုက်၏။
"ဒီ မသေမျိုးကျင့်ကြံခြင်း သရုပ်ဖော် စနစ်က ငါ့ပစ္စည်းတွေကို ငါ့ဆီ ဆုလာဘ် အနေနဲ့ ပြန်ပေးနေတာလား"
သူမ သတိပြန်ဝင်လာသောအခါ ကြောင်အသွားခဲ့ရသည်။
'ဒါဆို ဒီလို ဖြစ်နေတာပေါ့....'
"သောက်ကျိုးနည်း..."
ချင်းကျောက် မပျော်မရွှင် ညည်းတွားလိုက်သည်။
"နင်က ယုတ်မာတာပဲ... ဘာလို့ နည်းနည်းလောက် ပိုမရက်ရောနိုင်ရတာလဲ.... အနည်းဆုံးတော့ ငါ့ကို ဝိညာဉ်ဆေးပင် ဒါဇင် အနည်းငယ်လောက် ပေးသင့်တာပေါ့.... ဟုတ်တယ်မလား"
"ဒါမှမဟုတ် ငါ့ကို နောက်တစ်ကြိမ် အဆင့်ချိုးဖျက်ခွင့် ပေးလိုက်ပါလား"
"..."
ချင်းကျောက်ဟာ သူမ၏ ဆုလာဘ်ကို သန့်စင်သော ဝိညာဉ်စွမ်းအင်အဖြစ်သာ ပိုလိုချင်မိလေသည်။
ထိုသို့ဆိုလျှင်...
သူမ၏ မွေးရာပါ ဝိညာဉ်ခန္ဓာ တစ်ဝက်ဖြင့် ဆိုလျှင် အဆင့်ချိုးဖျက်ရန် သူမအတွက် သိပ်မခက်ခဲလှပေ။
အကယ်၍ သူမ အဆင့်မချိုးဖျက်နိုင်လျှင်တောင် ဆေးလုံး အနည်းငယ် သုံးလိုက်လျှင် ရနိုင်သည် မဟုတ်ပါလော။
'နှမြောစရာ ကောင်းလိုက်တာ...'
'မသေမျိုးကျင့်ကြံခြင်း သရုပ်ဖော် စနစ်က စောက်ကျင့်မကောင်းလိုက်တာ... ပြီးတော့ ကပ်စေးနည်းလွန်းတယ်...'
'အကျင့်ယုတ်တဲ့ လောက်ကောင်စုတ်.... '
ထိုသို့ ကျိန်ဆဲရုံမှလွဲ၍ သူမဟာ ဘာမှ မတက်နိုင်ခဲ့ချေ။
ဒါက မင်းလုပ်လိုက်သည့် စီမံကိန်းက မင်းသူဌေးကို သန်းပေါင်းများစွာ ရှာပေးနိုင်ကြောင်း သိနေသော်လည်း မင်းကတော့ တစ်လကို လစာ ငါးထောင်လောက်သာ ရနေသလိုပင်။ မင်း ဘယ်လောက်ပဲ ဒေါသထွက်နေပါစေ ဒါက ဘာမှ ပြောင်းလဲသွားစေမည် မဟုတ်ပေ။
အင်း မင်းတက်နိုင်တာ တစ်ခုတော့ ရှိပြီး ဒါက အလုပ်ထွက်လိုက်တာပင်.......
သို့သော်...
ချင်းကျောက်က မသေမျိုးကျင့်ကြံခြင်း သရုပ်ဖော် စနစ်ကို ဖယ်ရှားပစ်ချင်မည်လား....
သေချာတာကတော့ မသေမျိုးကျင့်ကြံခြင်း သရုပ်ဖော် စနစ်ကို ဖယ်ရှားပစ်ရမည့်အစား သူမဟာ ကိုယ့်ကိုယ်ကိုယ် သတ်သေလိုက်မည်သာ ဖြစ်လေသည်။
မသေမျိုးကျင့်ကြံခြင်း သရုပ်ဖော် စနစ်၏ အကျိုးကျေးဇူးများကို ခံစားဖူးပြီးနောက်မှာ ချင်းကျောက် ထိုကဲ့သို့သော အတွေးမျိုး တွေးရန် မဖြစ်နိုင်တော့ပေ။
သူမ ပိုသန်မာလာပြီး ချန်ချန်ရွှယ်အား လက်စားချေရမည်....
သူမက အလွန် ရန်ငြိုးထားတတ်ပြီး ဤကဲ့သို့သော ကိစ္စမျိုးကို ဘယ်တော့မှ မမေ့ပေ။
...
တစ်ချိန်တည်းမှာပင်....
ချင်းဟယ် ခရိုင်....
ပိုင်ယီဟာ ရွေးချယ်ခံနှစ်ယောက် ဘာတွေးနေသည်ကို ဂရုမစိုက်ပေ။ ဒီအချိန်မှာ သူဟာ ရရှိထားသည့် ရွှေအမြုတေ အဆင့် လူသားရုပ်သေးကို အသုံးပြုရန် ကြိုးစားနေခဲ့သည်။
အလယ်အလတ်အဆင့် ဝိညာဉ်ကျောက်တုံးကို စွမ်းအင် အရင်းအမြစ် အဖြစ် အသုံးပြုလိုက်သည့်အခါ ရုပ်သေးရုပ်ကို သူ၏ အသိစိတ်အာရုံဖြင့် ထိန်းချုပ်နိုင်လာခဲ့သည်။
၎င်းက အလွန် ထူးဆန်းသည့် ခံစားချက် တစ်ခုလိုပင်။
သူ စိတ်ကြိုက် ထိန်းချုပ်နိုင်သည့် ကိုယ်ပွားတစ်ခု အပို ရရှိလာသကဲ့သို့ပင်။
ရုပ်သေးရုပ်တွင် အသိစိတ် မရှိပေ။
ပိုင်ယီဟာ ဤရုပ်သေးရုပ်ကို ထိန်းချုပ်လိုက်သောအခါ အရင်က မြင်ဖူးသလိုလို ခံစားချက်ကို ရရှိလိုက်ပြီး ၎င်းက ဂိမ်းဇာတ်ကောင် တစ်ကောင်ကို ထိန်းချုပ်နေရသကဲ့သို့ ခံစားချက်ပင်။
…