အခန်း ၈၁ : ရွှေအမြုတေအဆင့် လူသားရုပ်သေး၊ အခြေတည်အဆင့်( ၄ )သို့ ချိုးဖျက်ဝင်ရောက်ခြင်း

​ချင်းဟယ် ခရိုင်...

​ရွေးချယ်ခံ (၂) ယောက် မသေမျိုးကျင့်ကြံခြင်းကို သရုပ်ဖော်လို့ ပြီးသွားတာ မြင်တော့ ပိုင်ယီဟာဆုလာဘ်တွေကို စတင် စစ်ဆေးလိုက်သည်။

​[ချန်ချန်ရွှယ်သည် သရုပ်ဖော် မသေမျိုးကျင့်ကြံခြင်း ဘဝတွင် မင်းပြန်လာမှာကို သေမျိုးကမ္ဘာထဲမှာ စောင့်နေတယ်ဆိုသော အောင်မြင်မှုတစ်ခုကို အသက်သွင်းနိုင်ခဲ့ပါသည်။ သင်သည် ထပ်ဆောင်း ဆုလာဘ်တစ်ခုကို ရရှိခဲ့ပါသည်။ သင်သည် အောက်ပါ ဆုလာဘ်ကို ရရှိခဲ့သည် ]

​[ဆုလာဘ် ၁ - ရွှေအမြုတေ အဆင့် (၁) ခွန်အား ရှိသည့် လူသားရုပ်သေးတစ်ရုပ် (မဟာဝေ ဧကရာဇ်မင်းမြတ်က သူ့သမီးအငယ်ဆုံးကို ပေးခဲ့သော လူသားရုပ်သေး)]

​[ဆုလာဘ် ၂ - အလယ်အလတ်အဆင့် ဝိညာဉ်ကျောက်တုံး (၁၀,၀၀၀) (မဟာဝေ မင်းဆက် မင်းသမီး တစ်ပါး အနေဖြင့် ချန်ချန်ရွှယ်၏ ကိုယ်ပိုင်ငွေကြေး)]

​[ဆုလာဘ် ၃ - မာကျောရက်စက်သော လူကြမ်းကြီး(သင့်ဘဝ အတွေ့အကြုံသည် မှော်ဆန်သော၊ ယုတ္တိမရှိသော ဇာတ်လမ်းများဖြင့် ပြည့်နှက်နေသည်)]

​[ထပ်ဆောင်း ဆုလာဘ် - နတ်ဘုရား ထွက်ပြေးလွတ်မြောက်ခြင်း အဆောင်တစ်ခု (အသုံးပြုပြီးနောက် သင်ညာ မိုင်ရာချီ ဝေးကွာသော နေရာသို့ ချက်ချင်း ထွက်ပြေးလွတ်မြောက်နိုင်သည်)]

​ဒီတစ်ခါ ရွေးချယ်ခံအမှတ် (၁) ရဲ့ ဆုလာဘ်က အထူး ရက်ရောနေခဲ့သည်။ ပိုင်ယီဟာ အဲဒီ လူသားရုပ်သေးကို ချက်ချင်း သဘောကျသွားခဲ့၏။

​ဒီဆုလာဘ်နဲ့ ယှဉ်လိုက်ရင် တခြား ဆုလာဘ်တွေက သိပ်မကောင်းလှသလို ထပ်ဆောင်း ဆုလာဘ်ကတောင် ဒီဆုလာဘ်လောက် မကောင်းချေ။

​ရွှေအမြုတေ အဆင့် (၁) ခွန်အား ရှိတဲ့ လူသားရုပ်သေး ဆိုတာက ဝိညာဉ်ဓားဂိုဏ်း သို့မဟုတ် ဖြောင့်မတ်သောနှလုံးသား နန်းတော်လို မသေမျိုးကျင့်ကြံခြင်း ဂိုဏ်းတစ်ခုမှာ အလွယ်တကူ ထားလိုက်ရင် အကြီးအကဲ တစ်ယောက် ဖြစ်လာဖို့ လုံလောက်ပေသည်။

​အကယ်၍ အလယ်အလတ်စား ဂိုဏ်းတစ်ခုမှာ ထားလိုက်ရင် ဂိုဏ်းချုပ်ဖြစ်လာဖို့တောင် လုံလောက်၏

​၎င်းအား စွမ်းအားကြီးတဲ့ တိုက်ခိုက်ရေးသမား တစ်ယောက်လို့ ပြောရပေမည်။

​......

​အရင်တုန်းက သူ ရရှိခဲ့တဲ့ သွေးမိစ္ဆာတိုကင်နဲ့ ယှဉ်လိုက်ရင် ၎င်းက ပိုတောင် တုန်လှုပ်စရာ ကောင်းနေခဲ့သည်။

​အလယ်အလတ်အဆင့် ဝိညာဉ်ကျောက်တုံး (၁၀,၀၀၀) နဲ့ ဟို မာကျောရက်စက်သော လူကြမ်းကြီး ဆိုတဲ့ မွေးရာပါ ပါရမီ အတွက်တော့...

သူအတွက် မလိုအပ်ပေ။

​ပိုင်ယီ ဆုလာဘ်ကို ရွေးချယ်ပြီးနောက် ပုံရိပ်တစ်ခု လေထဲမှာ ရုတ်တရက်ပေါ်လာခဲ့သည်။ ၎င်းက အတွင်းခံအဝတ်အစား ဆိုင်က အရုပ်မော်ဒယ်နဲ့ တူတဲ့ မဲနက်နေတဲ့ ရုပ်သေးရုပ် တစ်ရုပ်ပင်။

​ဒါပေမဲ့ ၎င်းမှာ ထူးခြားတဲ့ သတ္တုရောင်လက် တစ်ခုလည်း ရှိနေသည်။ အနီးကပ် လေ့လာကြည့်လိုက်ရင် ရုပ်သေးရုပ်ရဲ့ ခန္ဓာကိုယ်ပေါ်မှာ သေသပ်လှပတဲ့ အသေးစား အစီအရင် တွေ တစ်ခုပြီး တစ်ခု ဖုံးလွှမ်းနေခဲ့သည်။

​ဒီအသေးစား အစီအရင်တွေက လူသားရုပ်သေးရဲ့ ခန္ဓာကိုယ်ပေါ်မှာ တစ်ခုနဲ့ တစ်ခု ချိတ်ဆက်နေကြပြီး လူသားရုပ်သေးရဲ့ ခန္ဓာကိုယ် တစ်ခုလုံးကို ဖုံးလွှမ်းထားတဲ့ အစီအရင်ကြီး တစ်ခုလို ဖြစ်နေခဲ့လေသည်။

​ဝိညာဥ်ကျောက်တုံး ထဲ့သွင်းရန်အတွက် လူသားရုပ်သေးရဲ့ ရင်ဘတ် အလယ်တည့်တည့်မှာ ဝိုင်းစက်ပြီး ချိုင့်ဝင်နေတဲ့ အပေါက် တစ်ပေါက်ရှိနေခဲ့၏။

​ဒီအရာကို လှုပ်ရှာနိုင်စေရန်အတွက် အလယ်အလတ်အဆင့် ဝိညာဉ်ကျောက်တုံး သို့မဟုတ် အဲဒီထက် မြင့်မားတဲ့ ဝိညာဥ်​ကျောက်တုံး မှသာ အသုံးဝင်မည်ဖြစ်ပြီး အကယ်၍ အဆင့်နိမ့် ဝိညာဉ်ကျောက်တုံးကို သုံးမယ် ဆိုရင် ဝိညာဉ်ကျောက်တုံး ဘယ်လောက်များများ ထည့်ထည့် ၎င်းက လှုပ်ရှားနိုင်မှာ မဟုတ်ချေ။

​အခြေတည်အဆင့် လေလွှင့်ကျင့်ကြံသူတစ်ယောက်အတွက် အလယ်အလတ်အဆင့် ဝိညာဉ်ကျောက်တုံး အနည်းငယ်ကတောင် ကြီးမားသည့်ပမာဏပင်။

​ပြောရမယ် ဆိုရင် ဒီအရာကို သုံးရတာက ပိုက်ဆံကို မီးရှို့နေသလိုဖြစ်ကာ အကယ်၍ လူတစ်ယောက်မှာ ပိုက်ဆံ မရှိရင် ဒါကို သုံးဖို့ ရှာနေရတာနဲ့တင် မွဲသွားနိုင်ပေသည်။

​သို့ပေမဲ့ ပိုင်ယီကတော့ မဆင်းရဲပေ။

အရင် သရုပ်ဖော် မသေမျိုးကျင့်ကြံခြင်း ဘဝတုန်းက ရွေးချယ်ခံ အမှတ် (၂)ကြောင့် သူ့ဟာ သိုလှောင်အိတ် တစ်လုံး ဆုလာဘ် အနေနဲ့ ရရှိခဲ့ပြီး အဲဒီ သိုလှောင်အိတ်ထဲမှာ ဝိညာဉ်ဆေးပင်တွေနဲ့ ဝိညာဉ်ကျောက်တုံးတွေ အမြောက်အမြား ပါဝင်နေခဲ့သည်။

​ထို့အပြင် အဲဒီအထဲမှာ အလယ်အလတ်အဆင့် ဝိညာဉ်ကျောက်တုံးတွေလည်း မနည်းမနော ရှိနေပေသည်။

​ပိုင်ယီဟာ အလယ်အလတ်အဆင့် ဝိညာဉ်ကျောက်တုံး အရေအတွက်ကို အကြမ်းဖျင်း ရေတွက်ကြည့်လိုက်ရာ အတုံးကြီး (၅၀) ကနေ (၆၀) လောက် အထိ ရှိနေလေသည်။

​တခြားလူတွေက ဝိညာဉ်ကျောက်တုံးကို အတုံးသေးယူနစ်နဲ့ သုံးကြပေမယ့် ပိုင်ယီက အတုံးကြီးယူနစ်နဲ့ သုံးပေသည်။

​အဓိက အကြောင်းရင်းက ချင်းကျောက် ကောက်လာခဲ့တဲ့ ဝိညာဉ်ကျောက်တုံးတွေက သိပ်ကြီးမားလွန်းပြီး အသေးဆုံး အတုံးက လူခေါင်းလောက်ရှိတာကြောင့်ပင်။ ထို့ကြောင့် သူဟာ ဝိညာဉ်ကျောက်တုံးတွေကို လူသားရုပ်သေးရဲ့ ခန္ဓာကိုယ်ထဲ ထည့်မည်ဆိုပါက အတုံးသေးသေးလေးတွေ ဖြစ်အောင် ဖြတ်ဖို့ နည်းလမ်း ရှာရပေအုံးမည်။

.............

​ထပ်ဆောင်း ဆုလာဘ် အတွက်တော့ ပြောစရာ သိပ်မရှိချေ။ ဒီပစ္စည်းက အသက်ကယ် ပစ္စည်းတစ်ခုဖြစ်ရာ  အန္တရာယ် ကြုံတဲ့ အချိန်ကျရင် သုံးလို့ ရပြီး တစ်ခြားအချိန်၌ လှောင်အိတ်ထဲမှာပဲ ထည့်ထားလို့ ရပေသည်။

​[ချင်းကျောက်သည် သရုပ်ဖော် မသေမျိုးကျင့်ကြံခြင်း ဘဝတွင် သားရဲအသုံးပြုသူဆိုသော အောင်မြင်မှု တစ်ခုကို အသက်သွင်းနိုင်ခဲ့ပါသည်။ သင်သည် ထပ်ဆောင်း ဆုလာဘ် တစ်ခုကို ရရှိခဲ့ပါသည်။ သင်သည် အောက်ပါ ဆုလာဘ်ကို ရရှိခဲ့သည် ]

​[ဆုလာဘ် ၁ - အခြေတည်အဆင့် (၄) ၏ ဝိညာဉ်စွမ်းအင် အားလုံး (ချင်းကျောက်၏ နှစ်ပေါင်းများစွာ ကြိုးစားအားထုတ်မှု ရလဒ်)]

​[ဆုလာဘ် ၂ - သေသပ်လှပသော သိုလှောင်အိတ် (ဝိညာဉ်အရည်များဖြင့် ပြည့်နှက်နေသော သိုလှောင်အိတ် တစ်လုံး)]

​[ဆုလာဘ် ၃ - ယန်ပြန်လည်ရရှိခြင်း အသီး (အကယ်၍ သင် အသက်ရှူနေသေးသရွေ့ ကျန်းမာရေး အပြည့်ဖြင့် ပြန်လည် အသက်ရှင်နိုင်သည်ဟု ဆိုကြသည်)]

​[ထပ်ဆောင်း ဆုလာဘ် - အစီအရင် ကျွမ်းကျင်မှု(အစီအရင် လမ်းစဉ်အပေါ် ချင်းကျောက်၏ နားလည်မှုနှင့် ထိုးထွင်းသိမြင်မှု)]

​ပိုင်ယီ အံ့သြသွားတာက ရွေးချယ်ခံအမှတ် (၂) လည်း အောင်မြင်မှု တစ်ခု အသက်သွင်းနိုင်ခဲ့တာပင်။

​သူ ဆုလာဘ် တွက်ချက်တဲ့အခါ သူ့ဟာ ထပ်ဆောင်း ဆုလာဘ် တစ်ခုထပ်ပြီး ရရှိခဲ့ပြန်လေသည်။

​ဆုလာဘ် (၃) ခု အတွက်တော့ ပိုင်ယီဟာ တွန့်ဆုတ်မနေဘဲ ဆုလာဘ် (၁) ကို ရွေးချယ်လိုက်၏။

​ချက်ချင်းပင် များပြားလှသည့် ဝိညာဉ်စွမ်းအင်တွေဟာ သူ့ခန္ဓာကိုယ်ထဲ တိုးဝင်လာခဲ့ပြီး မွေးရာပါ ဝိညာဉ်ခန္ဓာရဲ့ အကူအညီနဲ့ သူဟာ မျှော်လင့်ထားတဲ့ အတိုင်း အခြေတည်အဆင့် (၄) ကို ချိုးဖျက်ဝင်ရောက်နိုင်ခဲ့သည်။

​ဒီတစ်ခါတွင်လည်း အဆင့်ချိုးဖျက်မှုက မသေးငယ်ခဲ့ရာ အာရုံစိုက်မှု အများအပြားကို နောက်တစ်ကြိမ် ဆွဲဆောင်လိုက်ခဲ့ပြန်လေသည်။

​"ရှူး... အဲဒါက.... ဒီလောက် တုန်လှုပ်စရာ ကောင်းတဲ့ အဆင့်ချိုးဖျက်မှု ဆိုတော့ နောက်ထပ် အခြေတည်အဆင့် ကျင့်ကြံသူ တစ်ယောက်များလား... ချင်းဟယ် ခရိုင်မှာ ဘယ်လိုလုပ်ပြီး ဒီလောက်များတဲ့ အခြေတည်အဆင့် ကျင့်ကြံသူတွေ ရှိနေရတာလဲ"

​"အဲဒီ ဘက်ခြမ်းက ကြည့်ရတာ နည်းနည်း ရင်းနှီးနေသလိုပဲ... ပြီးခဲ့တဲ့ တစ်ခေါက်တုန်းကလည်း အဲဒီ ဘက်ခြမ်းမှာပဲ မဟုတ်လား"

​"ဖြစ်နိုင်တာက... အဲဒီ စီနီယာပဲလား"

​"ခင်ဗျား နောက်နေတာလား... ရက်အနည်းငယ် အတွင်း ကျင့်ကြံမှု အဆင့် (၂) ဆင့် ချိုးဖျက်နိုင်တဲ့ လူ ဘယ်လိုလုပ် ရှိနိုင်မှာလဲ"

​"ဖြစ်နိုင်တာက ချင်းဟယ် ခရိုင်မှာ ကိစ္စကြီး တစ်ခုခု ဖြစ်တော့မှာလား... ဘာလို့ ဒီလောက်များတဲ့ အခြေတည်အဆင့် ကျင့်ကြံသူတွေ စုဝေးနေကြတာလဲ"

​"ဘယ်သူ သိမှာလဲ..."

​"..."

​ချင်းဟယ် ခရိုင်က လေလွှင့်ကျင့်ကြံသူတွေဟာ ထုံကျင်လုနီးပါး ဖြစ်နေခဲ့ကြပေပြီ။ အရင်တုန်းက သူတို့ဟာ အခြေတည်အဆင့် ကျင့်ကြံသူ တစ်ယောက်မှ မမြင်ဖူးဘဲ ပြီးခဲ့တဲ့ ရက်အနည်းငယ် အတွင်းမှာတော့  အခြေတည်အဆင့် ကျင့်ကြံသူတွေက ပေါင်းပင်တွေလို ပေါ်ထွက်လာခဲ့ကြသည်။

​သူတို့က ဂေါ်ဖီထုပ်တွေလို တန်ဖိုးမရှိ ဖြစ်နေကြပေပြီ။

​အဲဒီ အခြေတည်အဆင့် ကျင့်ကြံသူတွေက ဘယ်သူတွေလဲ ဆိုတာ သူတို့ သိချင်ကြပေမယ့် ဘယ်သူမှ မစုံစမ်းရဲကြပေ။

​သူတို့က ချီစုစည်းမှု အဆင့်ရှိတဲ့ လေလွှင့်ကျင့်ကြံသူတွေသာ ဖြစ်ရာ အခြေတည်အဆင့်ကို ဘယ်လိုလုပ် စုံစမ်းရဲမည်နည်း။

​ပိုင်ယီ မျက်လုံးဖွင့်လိုက်တဲ့အခါ သူနေထိုင်တဲ့ နေရာက နောက်တစ်ကြိမ်  ရှုပ်ပွနေတာကို တွေ့လိုက်ရ၏။

​ပြီးခဲ့တဲ့ တစ်ခေါက် သူ အဆင့်ချိုးဖျက်တုန်းကလည်း ခြံဝင်းအား ရှုပ်ပွသွားစေခဲ့လေသည်။

​ထိုအခါကလည်း ရှင်းလင်းရတာ မလွယ်ကူသလို အခု နောက်တစ်ကြိမ် ရှုပ်ပွသွားခဲ့ပြန်ရာ စိတ်ညစ်သွားခဲ့ရ၏။

​သူ့ခေါင်းထဲမှာ ကြီးမားတဲ့ အစီအရင် ဗဟုသုတ ပမာဏကို ခံစားရင်း ပိုင်ယီ ကိုယ့်ကိုယ်ကိုယ် ရေရွတ်လိုက်သည်။"ငါနေတဲ့ နေရာကို အားဖြည့်ဖို့ အချိန်တန်ပြီ... အခြေတည်အဆင့် အဆင့်ချိုးဖျက်မှုကတောင် ဒီလောက် ကြီးမားနေတာ အကယ်၍ အနာဂတ်မှာ ငါ ရွှေအမြုတေ အဆင့်ကို ချိုးဖျက်ဝင်ရောက်ရင် ငါ့အိမ်က ကုန်းကောက်စရာ ကျန်တော့မှမဟုတ်ဘူး"

​ချင်းကျောက် နှစ်ပေါင်းများစွာ ပင်ပင်ပန်းပန်း လေ့လာခဲ့တဲ့ အစီအရင် ဗဟုသုတက အသုံးဝင်လှပြီး ပိုင်ယီဟာ သူ့ခေါင်းထဲ၌ မရေမတွက်နိုင်တဲ့ စိတ်ကူးများ ရှိနေခဲ့လေသည်။

​ပထမဆုံး အနေနဲ့ အိမ်ကို အားဖြည့်ရမည်..

​အားဖြည့်တဲ့ နည်းလမ်းကလည်း ရိုးရှင်းပြီး အားဖြည့် အစီအရင်အနည်းငယ် တပ်ဆင်လိုက်ရုံပင်။

​ဒါတွေ အားလုံးက အခြေခံကျတဲ့ အစီအရင် ဗဟုသုတတွေဖြစ်ပြီး အရင်တုန်းက ပိုင်ယီ အတွက်တော့ ဒီလို သိပ်အခြေခံကျတဲ့ ဗဟုသုတက သူ့ကို ခေါင်းခြောက်သွားစေနိုင်ပေမဲ့ လက်ရှိ ပိုင်ယီ အတွက်တော့ ဒါက ပြဿနာကြီး မဟုတ်တော့ပေ။

​ဒုတိယ အချက်.....

​အိမ်အတွက် ပုံရိပ်ယောင် အစီအရင်တစ်ခု တပ်ဆင်ဖို့ လိုပါသေးပြီး သူ အဆင့်ချိုးဖျက်တိုင်း ဒီလောက်များတဲ့ လူတွေ မြင်သွားအောင် ခွင့်ပြုလို့ မဖြစ်ချေ။ ဒီပုံရိပ်ယောင် အစီအရင်တွေက အိမ်ထဲမှာ ဘာဖြစ်နေလဲ ဆိုတာ ကောင်းကောင်း ဖုံးကွယ်ထားနိုင်လေသည်။

​အကယ်၍ ပိုင်ယီ နောက်တစ်ကြိမ် အဆင့်ချိုးဖျက်ရင်တောင် ပြင်ပလူတွေရဲ့ မျက်လုံးထဲမှာတော့ တည်ငြိမ်ပြီး အေးချမ်းနေတုန်းဖြစ်နေပေမည်။

​ပုံရိပ်ယောင် အစီအရင်ကို အဓိကအားဖြင့် လူတွေရဲ့ အာရုံခံစားမှုတွေကို ရှုပ်ထွေးသွားအောင် လုပ်ဖို့ သုံးနိုင်ပြီး အထူးသဖြင့် အမြင်၊ အကြား၊ အနံ့...

​ပိုပြီး နက်နဲတဲ့ ပုံရိပ်ယောင် အစီအရင် တချို့ ဆိုရင် တခြားသူတွေရဲ့ အထိအတွေ့ကိုတောင် ရှုပ်ထွေးသွားစေနိုင်လေသည်။

ကျင့်ကြံသူတွေရဲ့ ဝိညာဉ်အာရုံကိုတောင် ရှုပ်ထွေးသွားစေနိုင်တဲ့ ပုံရိပ်ယောင် အစီအရင် တချို့လည်း ရှိပါသေးပေသည်။

​အစီအရင် တာအိုက ကျယ်ပြန့်တဲ့ ကြယ်ပင်လယ်ကြီးလိုပင်။

​ချင်းကျောက်ရဲ့ အတွေ့အကြုံက အနည်းငယ် ကျွမ်းကျင်ရုံသာ ရှိပြီး သိပ်ပြောင်မြောက်လှသည်တော့ မဟုတ်ပေ။

​ဒါပေမဲ့ ၎င်းက လုံလောက်ပေ​ပြီ။

​...