အခန်း ၇၆ : ဒုတိယအကြိမ်မြောက် မင်းသမီးချန်နင်ဘဝ စတင်ခြင်း
"နှစ်ယောက်လုံး ရောက်လာကြပြီပဲ"
အဝေးမှာရှိနေသည့် ပိုင်ယီဟာ မသေမျိုးကျင့်ကြံခြင်း သရုပ်ဖော် စနစ်ရဲ့ လုပ်ပိုင်ခွင့်အများစုကို ပိုင်ဆိုင်ထားသူဖြစ်ရာ ချင်းကျောက်နဲ့ ချန်ချန်ရွှယ်ရဲ့ အသိစိတ်အာရုံ ချိတ်ဆက်မှုကို သဘာဝကျကျပဲ အာရုံခံမိလိုက်သည်။
တိုက်ဆိုင်မှု ဟုတ်မဟုတ် မသိရပေမယ့် ဒီတစ်ခါ သူတို့နှစ်ယောက်စလုံး သရုပ်ဖော် စနစ်ထဲသို့ တပြိုင်နက်တည်း ဝင်ရောက်လာခဲ့ကြသည်။
[အသက် ၁၄ နှစ် - ချန်ချန်ရွှယ်သည် အံ့သြဖွယ် ကျင့်ကြံခြင်း အခြေခံအုတ်မြစ်ကို ပြသခဲ့ပြီး နန်းတော်၏ ရတနာဆောင် အတွင်းသို့ ဝင်ရောက်ခွင့် ရရှိခဲ့သည်။ သူမသည် အတွင်းထဲမှ နက်နဲထူးဆန်းသော မျက်နှာဖုံးကို နောက်တစ်ကြိမ် ထပ်မံ ရရှိခဲ့ပြန်သည်။]
[သို့သော် သူမ ပထမဆုံးအကြိမ် မသေမျိုးကျင့်ကြံခြင်းကို သရုပ်ဖော်စဉ်က ကဲ့သို့ပင် သူမဟာ နည်းလမ်းပေါင်းစုံ ကြိုးစားခဲ့သော်လည်း မျက်နှာဖုံး၏ လျှို့ဝှက်ချက်ကို မသိနိုင်ခဲ့ပေ။]
[အသက် ၁၅ နှစ် - ချီစုစည်းမှု အဆင့် (၄) သို့ ရောက်ရှိနေပြီ ဖြစ်သည့် ချန်ချန်ရွှယ်ဟာ မဟာဝေ ဧကရာဇ်မင်းမြတ်အား သူမ အတိတ်က အရာတချို့ကို ပြန်လည် သတိရလာပုံရကြောင်း ဝန်ခံခဲ့သည်။ ပြီးခဲ့တဲ့ မသေမျိုးကျင့်ကြံခြင်း သရုပ်ဖော် ဘဝတုန်းက ချန်ဖုန်းယင် သူမကို ပြောခဲ့တဲ့ အရာအားလုံးကို သူမ ပြန်ပြောပြလိုက်သည်။]
[မဟာဝေ ဧကရာဇ်မင်းမြတ် ချန်ဖုန်းယင်သည် မရပ်မနား သက်ပြင်းချလိုက်၏။ သူ့သမီးတော်က အဲဒီ နာကျင်စရာ ကောင်းတဲ့ မှတ်ဉာဏ်တွေကို ပြန်သတိရလာခဲ့ပြီလေ။]
[သို့သော် ချန်ချန်ရွှယ်ဟာ အရေးကြီးသော သတင်းအချက်အလက် တစ်ခုကို ထုတ်ဖော် ပြောကြားလိုက်သည်။ ထိုအရာက ချန်ဖုန်းယင်ကို ဒေါသထွက်သွားစေခဲ့သည်။]
ဒါကို ဖတ်ပြီးနောက်မှာ ပိုင်ယီ မျက်ခုံးပင့်လိုက်သည်။
ချန်ချန်ရွှယ်ရဲ့ စရိုက်က တည်ငြိမ်မှုပြီး အန္တရာယ် အားလုံးကို ဖယ်ရှားပစ်ဖို့ အတတ်နိုင်ဆုံး လုပ်ဆောင်နေခဲ့သည်။
သူမဝန်းကျင်မှ အန္တရာယ်တို့ မရှိမှသာ သူမ ဘေးကင်းစွာ အသက်ရှင်နိုင်ပေမည်။
ချန်ချန်ရွှယ် ထုတ်ဖော်လိုက်တဲ့ သတင်းအချက်အလက်က တကယ်တော့ ပြီးခဲ့တဲ့ မသေမျိုးကျင့်ကြံခြင်း သရုပ်ဖော် ဘဝတုန်းက သူမကို အဆိပ်ခတ်ချင်ခဲ့တဲ့ လူအုပ်စု အကြောင်းပင်။
......
ပြီးခဲ့တဲ့ မသေမျိုးကျင့်ကြံခြင်း သရုပ်ဖော် ဘဝတုန်းက အသက် (၂၀) အရွယ် ချန်ချန်ရွှယ်ဟာ အဆိပ်ကြောင့် သေလုနီးပါး ဖြစ်ခဲ့ရသည်။ အဲဒီအချိန်တုန်းက မဟာဝေ ဧကရာဇ်မင်းမြတ် ဒေါသထွက်ပြီး ဒီကိစ္စကို စေ့စေ့စပ်စပ် စုံစမ်းစစ်ဆေးဖို့ အမိန့်ပေးခဲ့သည်။ သက်သေအထောက်အထား အမြောက်အမြား တွေ့ရှိခဲ့ပြီး လူအများအပြား အသတ်ခံခဲ့ရလေသည်။
အဲဒီလူတွေ အားလုံးက မင်းသမီးကို အဆိပ်ခတ်တဲ့ အမှုမှာ ပါဝင်ပတ်သက်ခဲ့ကြပြီး သူတို့ ဒီအစီအစဉ်ကို (၈) နှစ်လောက် ကြာအောင် ကြံစည်ခဲ့ကြခြင်းပင်။
အသက် (၁၂) နှစ် အရွယ် ချန်ချန်ရွှယ်ဟာ ငရဲတံခါးဝကနေ ပြန်လာတဲ့ သူမအား အဆိပ်ခတ်သတ်ဖို့ သူတို့ စီစဉ်နေခဲ့ကြပေသည်။
ဒီတစ်ခါ ချန်ချန်ရွှယ်ဟာ ပါးနပ်စွာ ဝင်ရောက်စွတ်ဖက်လိုက်ပြီး အန္တရာယ်ကို ကြိုတင် ဖယ်ရှားလိုက်၏
သူမရဲ့ လုပ်ဆောင်ချက်က ထိရောက်ခဲ့ပြီး မဟာဝေ ဧကရာဇ်မင်းမြတ်က သံသယ တချို့ ရှိနေပေမယ့် ဒီကိစ္စကို တိတ်တဆိတ် စေ့စေ့စပ်စပ် စုံစမ်းစစ်ဆေးဖို့ လူလွှတ်လိုက်လေသည်။
နောက်ဆုံးတော့ သူဟာ သဲလွန်စ အများကြီးကို ရှာတွေ့သွားခဲ့ပြီး အလွန်ဒေါသထွက်သွားခဲ့သည်။
...
မသေမျိုးကျင့်ကြံခြင်း သရုပ်ဖော် စနစ်ထဲတွင်....
မဟာဝေ မင်းဆက်...
နန်းတော်၏ ပင်မခန်းမဆောင်အတွင်း၌...
အရပ်ဘက် စစ်ဘက် အရာရှိတွေ၊ မိန်းမစိုးတွေ၊ နဲ့ အစောင့်တွေဟာ တစ်ယောက်မှ အသက်ပြင်းပြင်း မရှူရဲကြပေ။
ဒီလူတွေထဲမှာ ရွှေအမြုတေ အဆင့် မသေမျိုးကျင့်ကြံသူတွေနှင့် မူလဝိညာဉ် အဆင့် ကျင့်ကြံသူတွေတောင် ပါရှိလေသည်။
သို့သော် မဟာဝေ ဧကရာဇ်မင်းမြတ် ပေးတဲ့ ဖိအားကို ရင်ဆိုင်ရတဲ့အခါ ဒီလူတွေရဲ့ နဖူးပေါ်မှာ ချွေးအေးတွေ ထွက်ပေါ်နေခဲ့ကြသည်။
ပင်မခန်းမဆောင် တစ်ခုလုံးဟာ သတ်ဖြတ်ခြင်းအငွေ့သက်တွေနဲ့ ပြည့်နှက်နေခဲ့ရာ လူတိုင်း၏ ဦးရေပြားတို့အား ထုံကျင်သွားစေခဲ့သည်။
ထို့အခိုက်တန့်၌ မဟာဝေ ဧကရာဇ်မင်းမြတ်၊ ချန်ဖုန်းယင်၏ မျက်နှာက အလွန် မှိုင်းညို့နေခဲ့သည်။
ယုတ္တိနည်းကျကျ ပြောရရင် ဧကရာဇ် တစ်ပါး အနေနဲ့ အရေးကြီးဆုံး အချက်က ကိုယ့်ခံစားချက်ကို ထုတ်မပြမိဖို့ပင်။ အောက်က အရပ်ဘက် စစ်ဘက် အရာရှိတွေကို ကိုယ့်အတွေးတွေ အမြင်ခံလို့ မဖြစ်ပေ။
သို့သော် သူ့ရင်ထဲက ဒေါသတွေကို ဖိနိပ်ဖို့ အလွန်ခက်ခဲနေခဲ့လေသည်။ သူ့သမီးအား ငရဲတံခါးဝကနေ ပြန်ခေါ်လာဖို့ သူဟာ မနည်း ကြိုးစားခဲ့ရသည်။
ယခု၌ သူ့သမီးအား ငရဲတံခါးဝဆီ နောက်တစ်ကြိမ် ပို့ချင်နေတဲ့ လူတစ်ယောက် တကယ် ရှိနေလေသည်။
ဒါ့အပြင်...
သူရင်းနှီးသည့်လူတွေပင် ပါဝင်နေခဲ့ပေသည်။
ရာထူးအကြီးဆုံး လူက အဆင့် (၃) အရာရှိတစ်ယောက် တကယ် ဖြစ်ပြီး နေ့တိုင်း ညီလာခံတက်ရောက်ခွင့် ရှိတဲ့ လူတစ်ယောက်ဖြစ်၏။
အလွန် ဖိနှိပ်ချုပ်ချယ်ထားတဲ့ လေထု အခြေအနေအောက်မှာ ချန်ဖုန်းယင် နောက်ဆုံးတော့ စကားပြောလိုက်သည်။ "ပုံမှန် ညီလာခံ တက်ရောက်နေကျ အရပ်ဘက် စစ်ဘက် အရာရှိ စုစုပေါင်း (၁၆၉) ယောက် ရှိတယ်... ဒီနေ့ (၁၆၄) ယောက်ပဲ ရှိတယ်.... သူတို့ထဲမှာ (၅) ယောက်က သူတို့ရဲ့ ကျင့်ကြံမှုကို ဖျက်ဆီးခံလိုက်ရပြီး ထောင်ထဲ အပို့ခံလိုက်ရပြီ"
"အဲဒီ (၅) ယောက်ထဲမှာ ဘယ်သူက မဟာဝေရဲ့ အဓိကထောက်တိုင်တွေမဟုတ်လို့လဲ.... သူတို့ထဲက ဘယ်သူက မဟာဝေ အတွက် အနည်းဆုံး နှစ် (၁၀၀) လောက် အကျိုးမပြုခဲ့ဖူးလို့လဲ... ဒါပေမဲ့ ငါ သည်းမခံနိုင်တဲ့ ကိစ္စတစ်ခု သူတို့ လုပ်ခဲ့ကြတယ်.."
သူ မျက်လုံးမှေးလိုက်ပြီး လူအုပ်ကြီးကို တစ်ချက် ဝေ့ကြည့်လိုက်ပြီး မျက်နှာအမူရာ ပြောင်းလဲမှု အားလုံးကို စောင့်ကြည့်လိုက်သည်။
"ဒီစကားပုံကို မင်းတို့ ကြားဖူးလားတော့ မသိဘူး.... တိုင်းပြည်တွေက အထက်ကနေ စပုပ်တတ်တယ်တဲ့"
"အကယ်၍ မင်းတို့ ပုပ်သိုးနေရင်... မဟာဝေ ပုပ်သိုးသွားလိမ့်မယ်"
"ဘာဖြစ်ခဲ့လဲ ဆိုတာ မင်းတို့ အားလုံး သိကြပြီးသားမို့ ငါ့အာပေါက်အောင် ပြောနေစရာမလိုတော့ဘူး.... သူတို့ (၅) ယောက်လုံးက မွန်းတည့်ချိန်မှာ ကွပ်မျက်ခံရလိမ့်မယ်... ဒါက ဒီလိုကိစ္စမျိုး လုပ်ခဲ့တဲ့အတွက် သူတို့ ပေးဆပ်ရမယ့် တန်ဖိုးပဲ"
"..."
ချန်ဖုန်းယင်ရဲ့ စကားတွေက ဖိအားလှိုင်းတွေကို သယ်ဆောင်လာပြီး အဆင့်နိမ့် အရပ်ဘက် အမှုထမ်း အများအပြားရဲ့ မျက်နှာတို့အား ဖြူဖပ်ဖြူရော် ဖြစ်သွားစေခဲ့သည်။
သူတို့ဟာ နည်းနည်း မူးဝေလာသလို ခံစားလိုက်ရကြရပြီး ပိုဆိုးရွားတဲ့ လူတချို့ ဆိုရင် မတ်တတ်ရပ်နိုင်ဖို့ ခန်းမဆောင်ထဲက တိုင်တွေကို အမှီပြုထားရသည် အထိပင်။
ချန်ဖုန်းယင်ရဲ့ ဒေါသအောက်မှာ သူတို့ဟာ မုန်တိုင်းထန်တဲ့ ပင်လယ်ပြင်ထဲက လှေငယ်လေးလို လှိုင်းပုတ်ဒဏ်အား ခံစားနေခဲ့ကြရသည်။
...
သူမဖခင်က သူမကြောင့် ညီလာခံက အရာရှိတွေကို နှစ်နာရီကျော်ကြာအောင် ပြစ်တင်ကြိမ်းမောင်းခဲ့ကြောင်း တော်ဝင် မောင်နှမတစ်ယောက်ဆီကနေ ချန်ချန်ရွှယ် ကြားသိခဲ့ရသည်။ ကျင့်ကြံမှု နိမ့်တဲ့ အရပ်ဘက် အရာရှိအိုကြီး အနည်းငယ် ဆိုရင် သတိမေ့သွားလို့ ထမ်းထုတ်သွားရသည်ဟုပင် ပြောလေသည်။
ဒါကို ကြားတော့ သူမ နည်းနည်း ပြောစရာ စကားမဲ့သွားခဲ့သလို နည်းနည်းလည်း စိတ်လှုပ်ရှားသွားခဲ့ရသည်။
ဝန်ခံရမည်ဆိုပါက မင်းသမီး တစ်ပါးရဲ့ အဆင့်အတန်းက တကယ် မဆိုးချေ။ အထူးသဖြင့် ဧကရာဇ်မင်းမြတ် အချစ်ဆုံး မင်းသမီးလေးဖြစ်ရာ မဟာဝေ နန်းတော်ထဲမှာ ချန်ချန်ရွှယ်က သူမ လိုချင်တာ မှန်သမျှ လက်တွေ့ကျကျ လုပ်နိုင်ပေသည်။
အကယ်၍ သူမသာ ယောက်ျားလေး ဖြစ်ခဲ့ရင် လူဘယ်နှယောက်လောက် သူမအတွက် အလုပ်လုပ်ပေးချင်မလဲ ဘယ်သူ သိနိုင်မည်နည်း။ ဘာလို့လဲဆိုတော့ ဧကရာဇ်မင်းမြတ်ရဲ့ အချစ်နဲ့ ဆိုရင် အကယ်၍ သူမသာ ယောက်ျားလေး ဖြစ်ခဲ့ရင် အိမ်ရှေ့စံနဲ့ ယှဉ်ပြိုင်ဖို့ အရည်အချင်း သေချာပေါက် ရှိမည်ပင်။
ဒါပေမဲ့ မဟာဝေ မင်းဆက်မှာ မဟာဧကရီဘုရင်မ တစ်ခါမှ မပေါ်ပေါက်ဖူးသလို မင်းသမီးတစ်ပါးက ဧကရာဇ် ဖြစ်လာတဲ့ ဓလေ့ထုံးတမ်းလည်း မရှိရာ သဘာဝကျကျပင် သူမ၌ အခွင့်အရေး မရှိပေ။
"ငါ့ကို သတ်ချင်တဲ့ ပထမအသုတ် လူတွေကိုတော့ ရှင်းပစ်လိုက်ပြီ... ဒါပေမဲ့ ဒုတိယအသုတ် လူတွေရဲ့ ကိုယ်ပိုင်အမှတ်အသားကို ငါ မသိသေးဘူး... ဒါက နည်းနည်း ဒုက္ခများတယ်" ချန်ချန်ရွှယ် ကိုယ့်ကိုယ်ကိုယ် ရေရွတ်လိုက်၏။
သူမ ရည်ညွှန်းတဲ့ ဒုတိယအသုတ် လူတွေဆိုတာက ပြီးခဲ့တဲ့ မသေမျိုးကျင့်ကြံခြင်း သရုပ်ဖော် ဘဝတုန်းက သူမကို သေဆုံးစေခဲ့တဲ့ လူတွေပင်။
ဒီလောက်များတဲ့ လူတွေကြားထဲကနေ ဒီလောက် စွမ်းအားကြီးတဲ့ မိစ္ဆာသားရဲ တစ်ကောင်ကို ခိုးသွင်းလာပြီး အမဲလိုက်ကွင်းထဲ ထည့်ထားနိုင်လောက်အောင် ဘယ်သူက ဒီလောက် စွမ်းဆောင်ရည် ရှိနေတာလဲ ဆိုတာ သူမ မသိပေ။
သူမ ကြိုတင် ရှင်းပစ်လိုက်တဲ့ လူတွေက နောက်ကွယ်က တကယ့် ကြိုးကိုင်သူတွေနဲ့ ယှဉ်လိုက်ရင် ဘာမှ မဟုတ်ပဲ ငါးအသေးလေးတွေသာ ဖြစ်ပေသည်။
ထို့ကြောင့် သူမ သတိလျှော့လို့ မဖြစ်ပေ။
[အသက် ၁၇ နှစ် - မဟာဝေ ဧကရာဇ်မင်းမြတ်၏ သွေးသံရဲရဲ နည်းလမ်းများက ထိရောက်မှု ရှိပုံရခဲ့သည်။ မဟာဝေ နန်းတော်သည် ဤ (၂) နှစ်တာ ကာလအတွင်း အေးချမ်းနေခဲ့သည်။ သင်သည် (၂) နှစ်တာ ကာလကို အေးချမ်းစွာ ဖြတ်သန်းခဲ့ပြီး သင့်ကျင့်ကြံမှုကလည်း ချီစုစည်းမှု အဆင့် (၈) သို့ ရောက်ရှိခဲ့သည်။]
[သင့်တော်ဝင် ညီမများထဲမှ တစ်ယောက်က သင့်ကို ကဗျာရွတ်ပွဲတွင် ပါဝင်ရန် ဖိတ်ကြားခဲ့သည်။ သင်ဟာ အန္တရာယ်ရှိသော အခြေအနေတွင် ရှိနေဆဲ ဖြစ်ကြောင်း သိသဖြင့် သူမ၏ ဖိတ်ကြားချက်ကို ငြင်းပယ်လိုက်သည်။]
[အသက် ၂၀ နှစ် - သင်သည် အခြေတည်အဆင့် (၁) သို့ ဘေးကင်းစွာ ချိုးဖျက်ဝင်ရောက်နိုင်ခဲ့သည်။]
[မဟာဝေ မင်းဆက် နယ်နိမိတ် အတွင်းရှိ ချင်းမိသားစု ဟု ခေါ်သော မသေမျိုးကျင့်ကြံခြင်း မိသားစု တစ်စုဟာ တစ်ညတည်းဖြင့် ပျောက်ကွယ်သွားကြောင်း သင် ကြားသိလိုက်ရသည်။ လူဦးရေ တစ်ထောင်ကျော် ရှိသော မိသားစု တစ်ခုလုံး ပျောက်ကွယ်သွားခြင်းက တော်တော်လေး လှုပ်လှုပ်ခတ်ခတ် ဖြစ်စေခဲ့သည်။]
[အသက် ၂၂ နှစ် - သင်သည် နန်းတော် ပြင်ပရှိ အမဲလိုက်ကွင်းသို့ သွားရောက် ကြည့်ရှုလိုကြောင်း မဟာဝေ ဧကရာဇ်မင်းမြတ်အား တောင်းဆိုခဲ့ရာ သူက အလွယ်တကူ သဘောတူခဲ့သည်။ အမဲလိုက်ကွင်းထဲတွင် မည်သည့် မှားယွင်းမှုမျှ သင် မတွေ့ရှိခဲ့ပေ။]
[အသက် ၂၃ နှစ် - မင်းသားနှင့် မင်းသမီး အနည်းငယ်သည် နွေဦး အမဲလိုက်ပွဲအတွက် အမဲလိုက်ကွင်းသို့ အတူတကွ သွားရောက်ရန် ပြင်ဆင်နေကြပြီး သင့်ကို ဖိတ်ကြားခဲ့ကြသည်။ မသွားကြဖို့ သူတို့ကို ဘယ်လို ဖျောင်းဖျရမလဲ သင် မသိပေ။ ဘာလို့လဲဆိုတော့ သင် အကြောင်းပြချက် ရှာမတွေ့လို့ပင်။]
[မဟာဝေ မင်းဆက်ကို တုန်လှုပ်စေခဲ့သော ဖြစ်ရပ်ကြီးတစ်ခု ဖြစ်ပွားခဲ့သည်။]
[ရွှေအမြုတေ အဆင့် (၁၀) မိစ္ဆာကြီးတစ်ကောင်ဟာ အမဲလိုက်ကွင်းထဲတွင် ပေါ်လာတာကြောင့် မင်းသားနှင့် မင်းသမီး အများအပြား နေရာတင် ပွဲချင်းပြီး သေဆုံးသွားခဲ့ကြသည်]
[မဟာဝေ ဧကရာဇ်မင်းမြတ် ဒေါသထွက်သွားခဲ့သည်]
[...]
...