အခန်း ၇၄ : ကျင်းရှင်းနန်းတော်သခင်မ၊ ချင်းကျောက်၏ မိခင်
ပိရွှီ ပြောတဲ့ အရာတွေက နားလည်ရလွယ်လေသည်။ ပြည်နယ် မြို့တော်နဲ့ နေပြည်တော်က အရေးကြီးတဲ့ ပုဂ္ဂိုလ်တွေ မလာခင် သူက ဒီအဖြစ်အပျက်ကို အနည်းငယ် ပုံကြီးချဲ့ပြီး အကျိုးမြတ်ရရှိအောင် လုပ်ချင်တာပင်။
ထို့အပြင် ဒီအကျပ်အတည်းကို ဖြေရှင်းခဲ့တဲ့ ပိုင်ယီအား ချင်းဟယ် ခရိုင် နန်းတော်ရဲ့ ဧည့်သည်တော် ဝန်ကြီး ဖြစ်လာစေပြီး မိစ္ဆာကျင့်ကြံသူတွေ ခရိုင်ရုံးထဲ စိမ့်ဝင်လာတာက သူတို့အကြံစည်ဖြစ်ပြီး အမြစ်ဖြတ် ရှင်းပြစ်ချင်၍ ဟူသည့် အကြောင်းပြချက်ပေရန်ပင်။
ဒါနဲ့ ပတ်သက်ပြီး ပိုင်ယီဟာ ငြင်းပယ်လိုက်၏။ "နန်းတော်ရဲ့ ဧည့်သည်တော် ဝန်ကြီး ဖြစ်လာဖို့ ကျွန်တော် စိတ်မဝင်စားပါဘူး"
ကျင့်ကြံသူ တချို့က နန်းတော်ရဲ့ အာဏာကို စွဲလမ်းကြပေမယ့် တချို့လူတွေကတော့ လိုချင်တပ်မက်စိတ် နည်းနည်းလေးမှ မရှိကြပေ။
သိသာထင်ရှားစွာပင် ပိုင်ယီကလည်း ဒုတိယလူအမျိုးစားထဲ ပါဝင်ပေသည်။
ပိုင်ယီရဲ့ လက်ရှိ ကျင့်ကြံမှုနဲ့ မသေမျိုးကျင့်ကြံခြင်း အခြေခံအုတ်မြစ်အရ သူဟာ ဘယ်အင်အားစုကိုပဲ ဝင်ဝင် သူဟာ အဆင့်တန်းမြင့်သည့်ဘဝသို့ တက်လှမ်းသွားနိုင်လေသည်။
ဒါ့အပြင် သူက လူအများအပြားရဲ့ အာရုံစိုက်မှုတို့အား ရယူနိုင်ပေမည်။
အကယ်၍ သူသာ ဝိညာဉ်ဓားဂိုဏ်းလို ဂိုဏ်းတစ်ခုကို ဝင်လိုက်ရင် သူတော်စင်ဖြစ်လာဖို့က ရိုးရှင်းတဲ့ ကိစ္စပဲလို့ ပိုင်ယီ ခံစားမိပေမဲ့ အဲဒီလို မလုပ်ခဲ့ချေ။
အဓိက အကြောင်းရင်းက ဒုက္ခများလွန်းပြီး ပြဿနာတွေကြားထဲ ဝင်မပါချင်တာကြောင့် ဖြစ်၏။
......
အရင်တုန်းက သူဟာ အကြိမ်ကြိမ် ပစ်မှတ်ထား ခံခဲ့ရသလို အကြိမ်တိုင်း တစ်ဖက်လူကသာ သူ့ကို အရင် စတိုက်ခိုက်ခဲ့ကြသည်။
ထို့ကြောင့်သာ သူက ပြန်တိုက်ခဲ့ရပြီး မဟုတ်ပါက သူဟာ တိုက်ခိုက်ရမည်ကို စိတ်မဝင်စားချေ။
ပိရွှီရဲ့ မျက်နှာပေါ်မှာ ခါးသက်မှုတွေ ပြည့်နှက်နေခဲ့သည်။ သူ့ရဲ့ တောင်းဆိုမှုက သိပ်အတင်းအကြပ် ဆန်လွန်းနေတယ် ဆိုတာ သူလည်း သိပြီး ကျင့်ကြံသူပိုင်လို ဖြူစင်တဲ့ နှလုံးသား ပိုင်ရှင်က သူ့လို လူမျိုးနဲ့ ဘယ်လိုလုပ် ပူးပေါင်းနိုင်မည်နည်း။
'ဖြစ်နိုင်တာက ဒါကြောင့်ပဲ ကျင့်ကြံသူပိုင်က အခြေတည်အဆင့် ကျင့်ကြံသူ ဖြစ်လာနိုင်ပြီး သူကတော့ ချီစုစည်းမှု အဆင့်ကနေ တက်မလာနိုင်တာ ဖြစ်မယ်....'
နှစ်ဖက်စလုံးရဲ့ စိတ်နေသဘောထားကြားမှာ ကြီးမားတဲ့ ကွာခြားချက် ရှိနေပေသာ်။
'ငါက အာဏာကို သိပ်ဂရုစိုက်လွန်းနေတာပဲ...'
"ဒါပေမဲ့..." ပိုင်ယီ ဆက်ပြောလိုက်သည်။ "အကယ်၍ ပြည်နယ် မြို့တော်က ကျင့်ကြံသူတွေ ဒီကိစ္စကို စုံစမ်းစစ်ဆေးဖို့ ဆင်းလာတဲ့အခါ သူတို့ ကျွန်တော့်ကို မေးခွန်းတချို့ မေးလာရင် ဒါက အိုးထဲက လိပ်ကို ဖမ်းဖို့ ခရိုင်အစိုးရရဲ့ အစီအစဉ်ပါလို့ ကျွန်တော် သူတို့ကို ပြောပေးပါ့မယ်.... ရည်ရွယ်ချက်က မြွေကို တွင်းထဲက ထွက်လာအောင် မျှားခေါ်ပြီး မိစ္ဆာကျင့်ကြံသူ အားလုံးကို တစ်ခါတည်း ဖမ်းဆီးဖို့ပါလို့ ပြောပေးပါ့မယ်"
မျက်တောင်တစ်ခတ် အတွင်းမှာပဲ ပိရွှီရဲ့ မျက်နှာပေါ်က ခါးသက်မှုတွေ ပျောက်ကွယ်သွားခဲ့ပြီး အလွန်အမင်း ပျော်ရွှင်မှု တို့ အစားထိုးဝင်ရောက်လာခဲ့လေသည်။ ဒီအချိန်မှာ သူ့ရင်ထဲက ပိုင်ယီရဲ့ ပုံရိပ်က ရုတ်တရက် အဆပေါင်း မရေမတွက်နိုင်အောင် မြင့်မားသွားခဲ့သည်။
ဟိုးအရင်နှစ်တွေတုန်းက သူ့ကို ကျင့်ကြံခြင်း လမ်းစဉ်ပေါ် ခေါ်ဆောင်လာပေးခဲ့တဲ့ ကျွမ်းကျင်သူကိုတောင် ကျော်လွန်သွားပြီး ပိုင်ယီကို ဦးညွှတ်ချင်လုနီးပါး ဖြစ်သွားခဲ့ရပေသည်။
"ကျေးဇူး အများကြီး တင်ပါတယ်... ကျင့်ကြံသူပိုင်" ပိရွှီ အံကြိတ်လိုက်ပြီး နောက်ထပ် သိုလှောင်အိတ် တစ်လုံး ထုတ်လိုက်၏။ ဒီသိုလှောင်အိတ်က ရှင်းရှင်းလင်းလင်းပဲ သူ့ကိုယ်ပိုင် ပစ္စည်းပင်။ "ကျင့်ကြံသူပိုင်... ကျေးဇူးပြုပြီး ဒီကျေးဇူးတင်လက်ဆောင်ကို လက်ခံပေးပါ"
"မလိုပါဘူး" ပိုင်ယီ ပြုံးပြီး ခေါင်းခါလိုက်သည်။ "ခင်ဗျား မူလရည်ရွယ်ချက်ကို မမေ့ဘဲ ပြည်သူတွေကို ကာကွယ်ပေးချင်တဲ့ စိတ်နှလုံး ရှိနေသရွေ့ ရပါပြီ"
ပိုင်ယီ ပိရွှီကို ဒီအကူအညီ ပေးလိုက်တာက အဓိကအားဖြင့် ပိရွှီမှာ ရှားပါးပြီး တန်ဖိုးရှိတဲ့ အားသာချက်တစ်ခု ရှိနေလို့ပင်။
အဲဒါကတော့ ချင်းဟယ် ခရိုင် အကျပ်အတည်း ကြုံတွေ့ရတဲ့အခါ တစ်ဖက်လူက ထွက်လာရဲပေသည်။
ဒါက နားထောင်ရတာ ဘာမှ မဟုတ်ဘူးလို့ ထင်ရပေမယ့် ဒီလို ကျင့်ကြံခြင်း လောကမျိုးမှာ ဒါက တကယ့်ကို ရှားပါးပြီး တန်ဖိုးရှိပေသည်။
ပိရွှီက ချင်းဟယ် ခရိုင်ရဲ့ တစ်ဦးတည်းသော ဧည့်သည်တော် ဝန်ကြီး မဟုတ်ပေ။ ဒါပေမဲ့ မြင့်မြတ်သောနှလုံးသား နန်းတော်က မိစ္ဆာကျင့်ကြံသူတွေကို ကိုင်တွယ်ဖို့ သူတစ်ယောက်တည်းသာ ရှေ့ထွက်လာရဲသူဖြစ်ပေသည်။
သူ့ရဲ့ ရည်ရွယ်ချက်က ဘာပဲဖြစ်ဖြစ် သာမန် ပြည်သူတွေကို ကာကွယ်ပေးဖို့ ဆန္ဒရှိနေသရွေ့ သူက လူကောင်းပင်။
ပိုင်ယီ သူ့ရင်ထဲမှာ ပိရွှီကို လူကောင်း ကဒ်ပြားတစ်ကဒ် တိတ်တဆိတ် ပေးလိုက်၏။
မျှော်လင့်တာကတော့... သူဟာ ပိုင်ယီကို စိတ်ပျက်အောင် မလုပ်ဖို့ပင်။
...
မွန်းတည့်ချိန်.....
မသေမျိုးကျင့်ကြံခြင်း သရုပ်ဖော် စနစ်ရဲ့ စောင့်ဆိုင်းရမယ့် အချိန်က နောက်တစ်ကြိမ် ပြီးဆုံးသွားခဲ့ပေမဲ့ ရွေးချယ်ခံ အမှတ် (၁) ပဲ ဖြစ်ဖြစ်၊ အမှတ် (၂) ပဲ ဖြစ်ဖြစ်၊ ဘယ်သူမှ မသေမျိုးကျင့်ကြံခြင်း သရုပ်ဖော် စနစ်နဲ့ မချိတ်ဆက်ခဲ့ကြသေးပေ။ သူတို့နှစ်ယောက်စလုံးဟာ တစ်ချိန်တည်းမှာ တစ်ခုခုကြောင့် အလုပ်ရှုပ်နေခဲ့ကြပုံပင်။
ကျင်းရှင်း နန်းတော်...
ဝတ်ရုံရှည် ဝတ်ဆင်ထားတဲ့ အမျိုးသမီး တစ်ယောက်ဟာ အေးစက်စွာ ပြောလိုက်သည် - "နောက်ဆုံးတော့ မင်း ပြန်လာဖို့ ဆန္ဒရှိပြီပေါ့.... အပြင်လောကကို ဒီလောက် ကြိုက်နှစ်သက်နေမှတော့ မင်း တစ်ဘဝလုံး အပြင်မှာပဲ အေးအေးဆေးဆေး နေရအောင် အပြင်မှာ အိမ်တစ်လုံး ဝယ်ပေးထားရမလား"
အမျိုးသမီးရဲ့ အရှိန်ဝါကရေအိုင်နက်ကြီး တစ်ခုကဲ့သို့ပင် ၎င်းရဲ့ အနက်ကို ခန့်မှန်းလို့ မရနိုင်ပေ။
ထိုအမျိုးသမီးဟာ ချင်းကျောက်နဲ့ ရုပ်ချင်းဆင်ပေမဲ့ သူမက ချင်းကျောက်ရဲ့ ရင့်ကျက်တဲ့ ဗားရှင်းနဲ့ ပိုတူနေခဲ့သည်။
အမျိုးသမီးရဲ့အကြည့်ကြောင့် ချင်းကျောက်ဟာ မသက်မသာ ဖြစ်နေခဲ့ပြီး နည်းနည်းလည်း ကြောက်နေခဲ့လေသည်။
ထို့ကြောင့် သူမဟာ မဆင်မခြင် မလုပ်ရဲပဲ တိုးညှင်းစွာဖြင့် ပြောလိုက်၏။"အမေ... သမီး မှားသွားပါတယ်... သမီး အခု ပြန်ရောက်နေပြီပဲ"
သူမ အမှားကို ဝန်ခံလိုက်၏။
"ဟမ့် တကယ်လို့ ငါသာ မင်းရဲ့ စီနီယာ အစ်ကို (၃) ယောက်ကို ပြန်မခေါ်လာခိုင်းခဲ့ရင် မင်းက ပြန်လာဖို့ ဆန္ဒရှိအုံးမှာတဲ့လား"
သိသာထင်ရှားစွာပင် ထိုအမျိုးသမီးက ချင်းကျောက်ရဲ့ မိခင်ဖြစ်သည့် ကျင်းရှင်း နန်းတော်ရဲ့ နန်းတော်သခင်မပင်။
ကျင်းရှင်း နန်းတော် နဲ့ ဝိညာဉ်ဓားဂိုဏ်း နှစ်ခုစလုံးဟာ နာမည်ဂုဏ်သတင်း ရှိတဲ့ ဂိုဏ်းတွေဖြစ်ပေမဲ့ ကျင်းရှင်း နန်းတော်ရဲ့ ယေဘုယျ အတိုင်းအတာကသေးငယ်ပြီး တပည့် ဦးရေကလည်း ဝိညာဉ်ဓားဂိုဏ်းနဲ့ ယှဉ်လို့ မရပေ။
သို့ပေမဲ့ ဝိညာဉ်ဓားဂိုဏ်းထက် မနိမ့်ကျပဲ ဆန့်ကျင်ဘက် အနေနဲ့ ကျင်းရှင်း နန်းတော်က ထူးချွန်သူတွေကိုပဲ ရွေးချယ်တဲ့ မဟာဗျူဟာကို အမြဲ လိုက်နာခဲ့ရာ အပြင်စည်း တပည့်တွေတောင် ဝိညာဉ်ဓားဂိုဏ်းက အတွင်းစည်း တပည့်တွေနဲ့ ယှဉ်နိုင်ပေသည်။
၎င်းအကြောင်းရင်းကြောင့်ပဲ ကျင်းရှင်း နန်းတော်မှာ တပည့် အများကြီး မရှိတာဖြစ်ပေသည်။
အရည်အသွေးအရ ဆိုရင်တော့ လုံးဝ နိမ့်ကျမနေပေ။
"ဒါ့အပြင်..." ကျင်းရှင်း နန်းတော်သခင်မ မျက်မှောင် အနည်းငယ် ကြုတ်လိုက်ပြီး လေးနက်သော အသံဖြင့် ပြောလိုက်သည် - "အပြင်မှာ မသင်ယူသင့်တဲ့ အရာတစ်ခုခု သင်ယူခဲ့သေးလား... ဘာလို့ မင်းဆီကနေ မိစ္ဆာအနံ့ရနေတာလဲ.... ပြီးတော့ မင်းရဲ့ ကျင့်ကြံမှုက အခြေတည်အဆင့်ကို ဘယ်တုန်းက ချိုးဖျက်ဝင်ရောက်သွားတာလဲ"
ချင်းကျောက်ရဲ့ မျက်နှာထား အေးခဲသွားခဲ့သည်။
သူမ အခြေတည်အဆင့်ကို ချိုးဖျက်ဝင်ရောက်သွားတာ သူမအမေ မြင်နိုင်တာကို မအံ့သြသွားခဲ့ပေမဲ့ မိစ္ဆာနည်းစနစ်အား ကျင့်ကြံထားတာကိုတောင် သူမအမေ မြင်နိုင်လိမ့်မယ်လို့တော့ မမျှော်လင့်ထားခဲ့ပေ။
'ရှူး...'
ချင်းကျောက် လေအေးတစ်ချက် မရှူဘဲ မနေနိုင်တော့ပေ။ သူမ တကယ်ပဲ နည်းနည်း ပေါ့ဆမိသွားခဲ့သည်။
သူမဟာ မသေမျိုးကျင့်ကြံခြင်း သရုပ်ဖော် စနစ် ရှိနေကြောင်း လုံးဝ ထုတ်ဖော်လို့ မဖြစ်ပေ။ ဘာလို့လဲဆိုတော့ သရုပ်ဖော် စနစ်မှာ ဉာဏ်ရည်ရှိနေမှာ သူမ စိုးရိမ်ပြီး အကယ်၍ သူမ ထုတ်ဖော်လိုက်လို့ စနစ်က သူမကို စွန့်ပစ်လိုက်ရင် ငိုစရာ နေရာတောင် ရှိတော့မည် မဟုတ်ပေ။
ဒါကြောင့် သူမ ပြောနိုင်တာက "သမီး ချင်းဟယ် ခရိုင်မှာ ရှိတုန်းက မြင့်မြတ်သောနှလုံးသား နန်းတော်က အခြေတည်အဆင့် မိစ္ဆာကျင့်ကြံသူ တစ်ယောက်နဲ့ တွေ့ခဲ့တယ်.... အဲဒီအချိန်တုန်းက ကျင့်ကြံသူ တစ်ယောက် သူ့ကို လိုက်ဖမ်းနေတာ... အဲ့တာနဲ့ သမီး အဲဒီ မိစ္ဆာကျင့်ကြံသူကို တားဆီးလိုက်ပြီး တိုက်ခိုက်ခဲ့တယ်"
"သူ့ကို သတ်ပြီးနောက် အလောင်းတွေကို ထိန်းချုပ်လို့ရတဲ့ ကျင့်စဉ်တစ်ခုကို သူ့ဆီက ရခဲ့တယ်လေ...ဒါနဲ့... သမီးလည်း စူးစမ်းချင်စိတ်နဲ့ စမ်းကြည့်လိုက်တာပါ"
"အဆင့်ချိုးဖျက်တာနဲ့ ပတ်သက်ပြီးတော့ သမီးက အမေ့သမီးလေ... အခြေတည်အဆင့်ကို ချိုးဖျက်ဝင်ရောက်နိုင်တာက သဘာဝကျတယ်မဟုတ်လား"
"အသက် (၁၇) နှစ် အရွယ်မှာ အခြေတည်အဆင့် မရောက်သေးတဲ့ လူတွေ ရှိနေသေးတာတော့ မဟုတ်ဘူးမလား"
ပြောပြီးတာနဲ့ ချင်းကျောက် အခြေတည်အဆင့် အလောင်းကို ထုတ်လိုက်ပြီး ကျင်းရှင်း နန်းတော်သခင်မကို ပြလိုက်လေသည်။
ကံကောင်းလို့ ချင်းကျောက် အလောင်းကို အဝတ်အစားတွေ ဟိုးကတည်းက သေသေချာချာ ဝတ်ပေးထားလို့ပင်။မဟုတ်ရင် မျက်စိစူးစရာ မြင်ကွင်းတစ်ခု ပေါ်လာပေမည်။
အနီရောင် သင်္ကေတတွေ မျဉ်းကြောင်းတွေ ဖုံးလွှမ်းနေတဲ့ အခြေတည်အဆင့် အလောင်းကို ကြည့်ကာ ကျင်းရှင်း နန်းတော်သခင်မဟာ သူမမျက်လုံးတွေကို မှေးလိုက်၏။
'မြင့်မြတ်သောနှလုံးသား နန်းတော်...'
ကျင်းရှင်း နန်းတော်သခင်မ အနေနဲ့ ဒီနာမည်က သူမနှင့် မစိမ်းပေ။
အလောင်းကိုကြည့်ပြီး သူမဟာ ချင်းကျောက်ရဲ့ စကားကို ယာယီ ယုံကြည်လိုက်ပြီး သတိပေးလိုက်သည်။ "အနာဂတ်ကျရင် ဒီအရာတွေကို မျက်စိမှိတ်ပြီး မကျင့်ကြံနဲ့... မိစ္ဆာကျင့်ကြံသူတွေရဲ့ ကျင့်စဉ်တွေမှာ သေစေနိုင်လောက်တဲ့ အားနည်းချက်တချို့ ရှိတတ်တယ်.... ဒီသေစေနိုင်လောက်တဲ့ အားနည်းချက်တွေက တိုက်ပွဲအတွင်းမှာ မင်းအသက်ကို ယူသွားလိမ့်မယ်"
ဒီအချက် ရောက်တော့ ရှားရှားပါးပါး ကျေနပ်တဲ့ အမူအရာ တစ်ခု ကျင်းရှင်း နန်းတော်သခင်မရဲ့ မျက်နှာပေါ်မှာ ပေါ်လာခဲ့သည်။
သူမ ဆက်ပြောလိုက်၏။ "အသက် (၁၇) နှစ် အရွယ်နဲ့ အခြေတည်အဆင့် (၁) ကို ရောက်နိုင်တာ မဆိုးပါဘူး"
"မင်းက ငါ့သမီးပဲလေ... တကယ့်ကို ဖြစ်သင့်ဖြစ်ထိုက်တဲ့ ကိစ္စပဲ...'
ချင်းကျောက် လျှာထုတ်လိုက်သည်။
'အမေက တကယ့်ကို ကိုယ့်ကိုယ်ကိုယ် အထင်ကြီးလွန်းပါတယ်...'
အကယ်၍ မသေမျိုးကျင့်ကြံခြင်း သရုပ်ဖော် စနစ်သာ မရှိရင် သူမ အခြေတည်အဆင့် (၁) ကို ချိုးဖျက်ဝင်ရောက်နိုင်ဖို့ နောက်ထပ် နှစ်နှစ်လောက် စောင့်ရလောက်ပေသည်။
…