အခန်း ၇၁ : ချန်ချန်ရွှယ်၏ ဘဝဇာတ်သိမ်း

​"မင်း အသက် (၈) နှစ် အရွယ်တုန်းက မင်းအမေက ထူးဆန်းတဲ့ ရောဂါ ခံစားနေရပြီး နှိပ်စက်ခံနေရတယ် ဆိုတဲ့ သတင်းဆိုး ငါ ရခဲ့တယ်... သူမကို ကုသပေးဖို့ နန်းတွင်း သမားတော်တွေကို စေလွှတ်ခဲ့ပေမယ့် နန်းတွင်း သမားတော်တွေနဲ့ ငါ မရောက်လာခင်မှာပဲ မင်းအမေက (၃) ရက်တောင် မခံဘဲ ကွယ်လွန်သွားခဲ့တယ်"

​ဒီအကြောင်း ပြောသည့်အခါ မဟာဝေ ဧကရာဇ်မင်းမြတ်ရဲ့ မျက်နှာပေါ်မှာ စိတ်ဓာတ်ကျမှုတို့ဖြင့်  ပြည့်နက်နေခဲ့လေသည်။

​သူက နှစ်ရာပေါင်းများစွာ ရှင်သန်ခဲ့ပြီး နှစ်ပေါင်း (၂၀၀) ကြာ ဧကရာဇ် ဖြစ်လာခဲ့ပေမယ့် အမျိုးသမီး တစ်ယောက်ကိုတောင်  မကာကွယ်ပေးနိုင်ခဲ့ချေ။

​ဒါက သူ့ကို ကြီးမားတဲ့ စိတ်ပိုင်းဆိုင်ရာ ထိုးနှက်ချက်တို့ ပေးခဲ့ပေသည်။

​သူ လေတစ်ချက် အဝရှူသွင်းလိုက်၏။

​ချန်ဖုန်းယင်ဟာ ချန်ချန်ရွှယ်ကို ကြည့်ပြီး ဆက်ပြောလိုက်သည်။"ငါ မင်းအမေကို နန်းတော်ထဲ ပြန်ခေါ်လာခဲ့ပြီး နန်းတွင်း ကိုယ်လုပ်တော်ဘွဲ့ထူး အပ်နှင်းခဲ့တယ်.... သူမကို ဧကရာဇ် ဂူသင်္ချိုင်းတော်မှာ မြှုပ်နှံခဲ့တယ်.... အဲဒီအချိန်တုန်းက မင်းကိုလည်း ငါ နန်းတော်ထဲ ပြန်ခေါ်လာခဲ့တာ"

​"ဒါပေမဲ့ နန်းတွင်း သမားတော်က ငါ့ကို သတင်းဆိုး တစ်ခုပေးခဲ့တယ်... မင်းမှာ မင်းအမေလိုပဲ တူညီတဲ့ ထူးဆန်းတဲ့ ရောဂါ ရှိနေတယ်တဲ့... ဒါပေမဲ့ မင်းရဲ့ ရောဂါလက္ခဏာတွေက ပိုသက်သာပုံ ရတယ်တဲ့"

​"ဘယ်နည်းနဲ့မဆို မင်းကို ပြန်ကောင်းလာအောင် ကုသပေးဖို့ နန်းတွင်း သမားတော်တွေကို ငါ အမိန့်ပေးခဲ့တယ်"

​"ဒါပေမဲ့... နန်းတွင်း သမားတော်တွေက မရေမတွက်နိုင်တဲ့ နည်းလမ်းတွေ ကြိုးစားခဲ့ကြတယ်.... ဧကရာဇ် တိုက်ဇူကိုတောင် မင်းကို လာကြည့်ခိုင်းခဲ့ပေမယ့် သူလည်း အကြောင်းရင်းကို မမြင်နိုင်ခဲ့ဘူး"

​"နေ့တိုင်း နာကျင်နေတဲ့ မင်းမျက်နှာလေးကို ငါ မြင်နေရပြီး မခံမရပ်နိုင်အောင် နာကျင်စွာ အော်ဟစ်သံတွေကို ကြားနေရတာက ငါ့ရင်ထဲမှာ အရမ်းနာကျင်စေတယ်.."

​ပြောပြီးတာနဲ့ ချန်ဖုန်းယင်ဟာ သူ့ရင်ထဲက ခံစားချက်တွေကို ပြန်လည် ဖိနှိပ်လိုက်၏။ နှစ်ရာပေါင်းများစွာ ရှင်သန်ခဲ့တဲ့ မဟာဝေ ဧကရာဇ်မင်းမြတ်ဖြစ်သည်နှင့်အညီ ဆုံးရှုံးမှု ခံစားချက်တွေက မြန်မြန် လာပြီး မြန်မြန် ပျောက်ကွယ်သွားခဲ့လေသည်။

​နောက်ခဏ၌ သူ့မျက်လုံးထဲမှာ အေးစက်တဲ့ အလင်းရောင် တစ်ချက် လက်သွားခဲ့သည်။ "မူလက ဒါ တိုက်ဆိုင်မှု တစ်ခုပဲလို့ ငါ ထင်ခဲ့တာ... ကျင့်ကြံသူတွေ အတွက်တောင် မွေးခြင်း၊ အိုခြင်း၊ နာခြင်း၊ သေခြင်း ဆိုတာ မရှားပါဘူး... ပြီးတော့ ကျင့်ကြံသူတွေ ကိုယ်တိုင်တောင် မရှောင်လွှဲနိုင်တဲ့ ထူးခြားတဲ့ ရောဂါတချို့ ရှိတတ်ကြတယ်"

​"ဒါပေမဲ့ နန်းတွင်း အပျိုတော်ရဲ့ သေဆုံးမှုက... သဲလွန်စ တချို့ကို ငါကို ရှာတွေ့သွားစေခဲ့တယ်... လူတချို့က မင်းကို အရာတချို့ မမှတ်မိစေချင်ကြဘူး.... ပြီးတော့ လူတချို့က မင်းကို အတိတ်ကို လုံးဝ မေ့သွားစေချင်ကြတယ်"

​"အဲဒီလူက ဘယ်သူလဲ ဆိုတာ ငါ မသိသေးပေမယ့်  မင်းအမေရဲ့ သေဆုံးမှုနဲ့ မင်းရဲ့ ထူးဆန်းတဲ့ ရောဂါ အကြောင်း ငါ သိလိုက်ရပြီ... လုံးဝ ဒါ တိုက်ဆိုင်မှု မဟုတ်ဘူး...."

​ကြောက်မက်ဖွယ် အရှိန်ဝါတစ်ခု ဒီအချိန်မှာ ပေါက်ကွဲထွက်လာခဲ့သည်။ ဒါပေမဲ့ ချန်ချန်ရွှယ်ကို ပစ်မှတ်ထားတာ မဟုတ်ပေ။

​ချန်ချန်ရွှယ်ဟာ သူမဖခင်ရဲ့ ခန္ဓာကိုယ်ထဲကနေ တုန်လှုပ်စရာ ကောင်းတဲ့ အရှိန်အဝါတစ်ခု ပေါက်ကွဲထွက်လာတာကိုပဲ ခံစားလိုက်ရ၏။

​အဲဒီ အရှိန်အဝါမျိုးက ဧကရာဇ်တွေမှာပဲ ရှိတဲ့ ထူးခြားတဲ့ အရာပင်။

​'ကြောက်စရာကောင်းလိုက်တာ...'

​"ချန်နင်... မင်း အသက် (၁၆) နှစ် ရှိနေပြီဆိုတော့ မင်းကို ငါ ဖုံးကွယ်မထားမယ့် အရာတချို့ ရှိတယ်... အနာဂတ်ကျရင် မင်း ကိုယ့်ကိုယ်ကိုယ် ကာကွယ်နိုင်အောင် မင်းအတွက် အဆင်မပြေတဲ့ အရာတချို့ကို သတိထားမိစေချင်တယ်"

​"နန်းတော် ဆိုတာ ဂိုဏ်းတွေနဲ့ ယှဉ်လို့ မရဘူး... နန်းတော် အတွင်းက တိုက်ပွဲတွေက အလွန် ကြောက်မက်ဖွယ် ကောင်းတယ်... မဟာဝေ မင်းဆက်နဲ့ နယ်နိမိတ်ချင်း ထိစပ်နေတဲ့ နိုင်ငံငယ်လေး တစ်ခုမှာ မူလဝိညာဉ် အဆင့်ကျင့်ကြံမှု ရှိတဲ့ ဧကရာဇ် တစ်ပါးတောင် လုပ်ကြံခံလိုက်ရတယ်"

​ချန်ဖုန်းယင် သူ့သမီးကို လေးလေးနက်နက် သင်ကြားပေးနေခဲ့သည်။ သူ့မျက်လုံးထဲမှာတော့ သူ့သမီးက မှတ်ဉာဏ်တွေ ပျောက်ဆုံးသွားရာ သူမရဲ့ ဘဝ အတွေ့အကြုံက စာရွက်ဖြူ တစ်ရွက်လို လုံးဝ ဗလာဖြစ်နေတာကြောင့် သူ့သမီးရဲ့ စိတ်အခြေအနေကို သူ ခိုင်မာအောင် လုပ်ပေးဖို့ လိုပေသည်။

​နားထောင်ပြီးနောက် ချန်ချန်ရွှယ် ခေါင်းငြိမ့်ပြီး ပြန်ဖြေလိုက်သည် - "ဟုတ်ကဲ့ပါ"

​ဒီအချက် ရောက်တော့မှ ပြဿနာကို သူမ နောက်ဆုံးတော့ နားလည်လိုက်၏။ သူမရဲ့ မူလခန္ဓာကိုယ် ခံစားခဲ့ရတဲ့ ထူးဆန်းတဲ့ ရောဂါက မတော်တဆမှု မဟုတ်ဘဲ တစ်ယောက်ယောက်က တမင်သက်သက် လုပ်ကြံထားတာ ဖြစ်နေခဲ့သည်။

​မူလခန္ဓာကိုယ်နဲ့ မူလခန္ဓာကိုယ်ရဲ့ မိခင်ကို ဒုက္ခပေးရတဲ့ တစ်ဖက်လူရဲ့ ရည်ရွယ်ချက်က သူတို့သားအမိကို ပစ်မှတ်ထားတာ မဟုတ်ဘဲ ဧကရာဇ် ချန်ဖုန်းယင် ကို ပစ်မှတ်ထားခြင်းပင်။

​ဘာလို့ တစ်ဖက်လူက ဒီလို ဝေ့လည်ကြောင်ပတ်လုပ်နေရတာလဲ ဆိုတော့...

​ဖြစ်နိုင်တာက ဒီလို ဧကရာဇ် တစ်ပါးကို တိုက်ရိုက် တိုက်ခိုက်တာက စည်းမျဉ်းတချို့ကို ချိုးဖောက်ရာ ရောက်နေလို့ ဖြစ်ပေမည်။

​ဒါမှမဟုတ် မဟာဝေ ဧကရာဇ်မင်းမြတ်ရဲ့ ခွန်အားက သိပ်သန်မာလွန်းလို့ ဒီနည်းလမ်းတွေက သူ့အတွက် သိပ်အသုံးမဝင်လို့လည်း ဖြစ်နိုင်လေသည်။

​ဒါကြောင့် တစ်ဖက်လူက ဖြတ်လမ်းနည်းကို သုံးလိုက်ခြင်း ဖြစ်ပေမည်။

​မဟာဝေ ဧကရာဇ်မင်းမြတ်ရဲ့ ဘေးနားက လူတွေကို အန္တရာယ်ပြုပြီး သူ့ရင်ထဲမှာ စိတ်နှလုံးမိစ္ဆာဖြစ်ပေါ်လာအောင် ကြံစည်နေခြင်း ဖြစ်၏။

​မသေမျိုးကျင့်ကြံခြင်း သရုပ်ဖော် စနစ်ထဲမှာ စိတ်နှလုံးမိစ္ဆာ ဖြစ်ပေါ်ဖူးတဲ့ ချန်ချန်ရွှယ်ဟာ ဒီအရာက ဘယ်လောက် ကြောက်စရာ ကောင်းလဲ ဆိုတာ ရှင်းရှင်းလင်းလင်း သိပေသည်။

​ကျင့်ကြံမှု အဆင့်ဘယ်လောက်မြင့်မားနေပါစေ စိတ်နှလုံးမိစ္ဆာလို ထူးခြားတဲ့ တည်ရှိမှုမျိုး မွေးဖွားလာပြီး ဖယ်ရှားဖို့ နည်းလမ်း မရှိတော့ရင် သေဆုံးဖို့က နောက်ကျမလား စောမလားပင်။

​ထို့ကြောင့် သူမ တုန်လှုပ်သွားခဲ့၏။

​သူမ ရွေးချယ်လိုက်တဲ့ ပါရမီက သူမဘဝကို အထူး မှော်ဆန်ပြီး စိတ်လှုပ်ရှားစရာ ကောင်းစေတယ်ဆိုပေမဲ့ အစကတည်းက သူမအတွက် ဒီလို ကစားပွဲကြီး စီစဉ်ပေးထားမယ်လို့ ချန်ချန်ရွှယ် မမျှော်လင့်ထားခဲ့ပေ။

​ဒါက မင်းဆက်တစ်ခုရဲ့ အတွင်းပိုင်း ပဋိပက္ခနဲ့ သက်ဆိုင်နေပြီး ဒီပဋိပက္ခက ဝန်ကြီးတွေကြား ပဋိပက္ခ မဟုတ်သလို ဝန်ကြီးတွေနဲ့ စစ်ဗိုလ်ချုပ်တွေကြား ပဋိပက္ခလည်း မဟုတ်ချေ။

​ဒါက သူမ မသိတဲ့ စွမ်းအားကြီးတဲ့ လူတချို့နဲ့ မဟာဝေ ဧကရာဇ်မင်းမြတ် ကြားက ပဋိပက္ခဖြစ်ပေသည်။

​'အင်း...

​တစ်ဖက်လူက ပုန်ကန်မှုကို ကြံစည်ဖို့ အထူး နည်းလမ်း တစ်ခုခု သုံးနေတာလား...'

​'တစ်ဖက်လူက ပေါက်ကရတွေ ပြောနေတဲ့ နန်းတွင်း အပျိုတော် နှစ်ယောက်ကို သတ်လိုက်တယ်... ဖြစ်နိုင်တာက သူမ တစ်ခုခုကို မှတ်မိသွားမှာ စိုးရိမ်လို့လား...'.

​'တစ်နည်းအားဖြင့် မူလခန္ဓာကိုယ်က လျှို့ဝှက်ချက် တချို့ကို သိနေနိုင်တာလား...

​ဒါဆို ဘာလို့ သူမ စောစောကတည်းက ထုတ်မပြောခဲ့တာလဲ.... 'ချန်ချန်ရွှယ် အဆုံးစွန် တွေးတောဆင်ခြင်ခြင်းထဲသို့ ကျရောက်သွားခဲ့သည်။

​ဒါပေမဲ့ သူမ အဖြေကို ခန့်မှန်းလို့ မရခဲ့ပေ။

​'ထားလိုက်ပါတော့..'

​သူမ အခုမှ ချီစုစည်းမှု အဆင့်ပဲ ရှိသေးပြီး သူမ စတင်ကျင့်ကြံမှုက သိပ်နောက်ကျသွားတဲ့ အတွက် သဘာဝ ရတနာ အမြောက်အမြားနဲ့ ကောင်းမွန်တဲ့ ကျင့်ကြံခြင်း အမြစ် ရှိရင်တောင် အသက် (၂၀) အရွယ်မှ အခြေတည်အဆင့်ကို မနည်း ချိုးဖျက်ရပေမည်။

ထို့အပြင် ​ဒီလောက် နိမ့်ကျတဲ့ ခွန်အားနဲ့ ချီစုစည်းမှု အဆင့်က ခွေးလောက်တောင် အရာမဝင်ဘဲ အခြေတည်အဆင့် ကျင့်ကြံသူတွေ နေရာတိုင်းမှာ ရှိနေတဲ့ နန်းတော်ထဲမှာ ဘယ်သူမှ ဂရုမစိုက်တဲ့ မင်းသမီးလေး အဖြစ် နေတာက ပိုကောင်းပေမည်။

​အရာတချို့ကို မဟာဝေ ဧကရာဇ်မင်းမြတ် ချန်ဖုန်းယင်ဆီ စုံစမ်းစစ်ဆေးဖို့နဲ့ ကိုင်တွယ်ဖို့ လွှဲထားလိုက်တော့ပေမည်။

​အကယ်၍ ဧကရာဇ် တစ်ပါး ဒေါသထွက်ပြီး ကိစ္စတစ်ခုကို စုံစမ်းစစ်ဆေးရင် သဲလွန်စ တချို့ သေချာပေါက် ရှာတွေ့နိုင်ပေမည်။

​ထိုသို့တွေးပြီး ချန်ချန်ရွှယ် အနည်းငယ် စိတ်အေးသွားခဲ့သည်။

​ဒီဘဝမှာ သူမ၌ ကျောထောက်နောက်ခံရှိလေသည်။

​[အသက် ၁၇ နှစ် - သင့်ခမည်းတော် ဧကရာဇ် စေလွှတ်လိုက်သော လူများက သဲလွန်စ တချို့ ရှာတွေ့ပြီးပြီ ဖြစ်ကြောင်း သင် သိရှိလိုက်ရသည်။ နောက်တစ်နေ့တွင် ရုတ်တရက် မီးလောင်မှု တစ်ခု ဖြစ်ပွားပြီး သက်သေအထောက်အထား အားလုံး ပျက်စီးသွားခဲ့သည်။ သင့်ဖခင်ဟာ အမျက်ဒေါသ ထွက်ပြီး လူအများအပြားကို ကွပ်မျက်ရန် အမိန့်ပေးလိုက်သည်။ သက်သေအထောက်အထား အားလုံးကို အထူး သေတ္တာ တစ်လုံးထဲတွင် သိမ်းဆည်းထားခဲ့တာဖြစ်ပြီး ၎င်းတို့ အားလုံးကို လောင်ကျွမ်းသွားစေနိုင်သော မီးသည် သေချာပေါက် သာမန်မီး မဟုတ်ပေ]

​[အသက် ၁၈ နှစ် - သင်သည် နက်နဲထူးဆန်းသော မျက်နှာဖုံးကို ဝိညာဉ်စွမ်းအင်ဖြင့် အားဖြည့်ပေးရန် ကြိုးစားခဲ့သည်။ သို့သော် ဝိညာဉ်စွမ်းအင် အမြောက်အမြား ဝင်ရောက်သွားသော်လည်း ကျောက်တုံး တစ်တုံး ပင်လယ်ထဲ နစ်မြုပ်သွားသလို ဘာဂယက်မှ မထခဲ့ပေ။]

​[အသက် ၂၀ နှစ် - သင် အခြေတည်အဆင့် (၁) သို့ ချိုးဖျက်ဝင်ရောက်နိုင်ခဲ့သည်။ သင့်၏ အံ့မခန်း ကျင့်ကြံခြင်း အခြေခံအုတ်မြစ်ကြောင့် လူတချို့၏ အမြင်အာရုံထဲသို့ သင့်အား နောက်တစ်ကြိမ် ဝင်ရောက်သွားစေသည်။ သင် အဆိပ်ခတ်ခံလိုက်ရသည်]

​[သင့်၏ သတိကြီးမှုက အရေးပါသော အခန်းကဏ္ဍမှ ပါဝင်ခဲ့သည်။ ကံကောင်းထောက်မစွာ သင် အဆိပ် ဆေးလုံးကို မစားမိခဲ့ပေ။ သင် သင့်ဖခင်ကို အသိပေးလိုက်သည်။]

​[တစ်ပတ်အကြာတွင် မဟာဝေ ဧကရာဇ်မင်းမြတ်၏ တတိယအဆင့် အရာရှိဖြစ်သော ရွှေအမြုတေ အဆင့် ကျင့်ကြံသူ တစ်ဦးသည် ကိုယ့်ကိုယ်ကိုယ် အဆုံးစီရင်သွားပြီး ဝန်ခံချက်တစ်စောင် ချန်ထားခဲ့သည်။ သူက သင့်ကို တိုက်ခိုက်ခဲ့ကြောင်း ဝန်ခံပြီး အကြောင်းပြချက် တစ်ခု ပေးခဲ့သည်။ သို့သော် သူသည် ဓားစာခံသာ ဖြစ်သည်ဟု သင် ခံစားလိုက်ရသည်။]

​[အသက် ၂၃ နှစ် - သင်နှင့် မင်းသား မင်းသမီး အနည်းငယ် နွေဦး အမဲလိုက်ပွဲထွက်ခဲ့ကြသော်လည်း  ဤနေရာတွင် မရှိသင့်သော စွမ်းအားကြီးသည့် မိစ္ဆာသားရဲတစ်ကောင်နှင့် ကြုံတွေ့ခဲ့ရသည်။ သင့်ကို တိတ်တဆိတ် ကာကွယ်ပေးနေသော လျှို့ဝှက် အစောင့်များအားလုံး သေဆုံးသွားခဲ့ကြသည်။ မင်းသား (၃) ပါးနှင့် မင်းသမီး (၂) ပါး သေဆုံးသွားခဲ့သည်]

​[သင်လည်း သေဆုံးသွားခဲ့သည်]

​...

​"ဝါး... ဒီလောက် မြန်မြန် ပြီးသွားတာလား"

​ဖြစ်နိုင်တာက ချန်ချန်ရွှယ် မသေမျိုးကျင့်ကြံခြင်း သရုပ်ဖော် ဘဝကို အဆုံးမသတ်ခင် နှစ်ပေါင်း (၁၀၀) ကျော် ရှင်သန်တာကို ပိုင်ယီကျင့်သားရနေပြီ ထင်၏။ ဒါပေမဲ့ အခု သူမဟာ အသက် (၂၃) နှစ်မှာ ရုတ်တရက် ဘဝဆုံးသွားတာကြောင့် ပိုင်ယီ  အနည်းငယ် အံ့သြသွားခဲ့သည်။

​ပြောရမယ် ဆိုရင် ဒီတစ်ခါ ချန်ချန်ရွှယ်ရဲ့ စမှတ်က  မြင့်မားပေမယ့် ရှင်သန်ရပ်တည်နိုင်ဖို့ ခက်ခဲမှုကလည်း မြင့်မားနေခဲ့သည်။

​ချန်ချန်ရွှယ်နဲ့ ပတ်သက်တဲ့ ဘဝ အတွေ့အကြုံ ဆက်တိုက် ဖြစ်စဉ်တွေကို ကြည့်ပြီး မသေမျိုးကျင့်ကြံခြင်း သရုပ်ဖော် စနစ်ထဲမှာ သူမကို တစ်ယောက်ယောက်က ပစ်မှတ်ထားနေမှန်း ပိုင်ယီ သဘာဝကျကျ သိလိုက်သည်။

​ဒါပေမဲ့ တစ်ဖက်လူက သူမကို ပစ်မှတ်ထားတာ မဟုတ်ပေ။

​တစ်ဖက်လူက မဟာဝေ မင်းဆက်ရဲ့ ဧကရာဇ်မင်းမြတ်ကို ပစ်မှတ်ထားတာ ဖြစ်ပြီး သူမပါ ရောပါသွားခြင်း ဖြစ်လေသည်။ ထို့အပြင် သူမရဲ့မောင်နှမ အများအပြားလည်း သူမနဲ့အတူ ရောပါသွားခဲ့ကြရသည်။

​ထို့ကြောင့် သူမ နည်းနည်း ကံဆိုးတယ်လို့ပဲ ပြောလို့ ရပေတော့မည်။

​[ချန်ချန်ရွှယ်သည် သရုပ်ဖော် မသေမျိုးကျင့်ကြံခြင်း ဘဝတွင် (၂၃) နှစ်၊ (၀၅) လ၊ (၀၁) ရက် ရှင်သန်ခဲ့ပါသည်။ သင်သည် အောက်ပါ ဆုလာဘ်များကို ရရှိလိုက်ပါသည်]

​[...]

​[...]