အခန်း ၆၈ : ချန်ချန်ရွှယ်၏ ဘဝသစ်၊ မင်းသမီး ချန်နင်အဖြစ် ဝိညာဥ်ကူးပြောင်းခြင်း
မသေမျိုးကျင့်ကြံခြင်း သရုပ်ဖော် စနစ်ထဲမှာ နှစ်ပေါင်းများစွာ နေထိုင်ခဲ့ပြီးနောက် ချန်ချန်ရွှယ်ဟာ နှစ်ရာချီ ရှင်သန်ခဲ့ပြီးပေပြီ။ ထို့ကြောင့် စီနီယာ အစ်ကို သူတော်စင်ရဲ့ အတွင်းစိတ်ကို သူမ ဘယ်လိုလုပ် အကဲမခတ်မိဘဲ နေမည်နည်း။
တစ်ဖက်လူက သူ့စိတ်ကို သူ ကောင်းကောင်း ဖုံးကွယ်ထားတယ်လို့ ထင်နေပေမဲ့ ချန်ချန်ရွှယ်ဟာ သဲလွန်စ တချို့ကို မြင်နေရတုန်းပင်။
ရည်မှန်းချက်....လောဘ.....
ဒီနှစ်ခုလုံးက သူမကို သိပ်မပျော်မရွှင် ဖြစ်စေခဲ့သည်။
လူတစ်ယောက်မှာ ရည်မှန်းချက်နဲ့ လောဘ ရှိတာက ကိစ္စမရှိပေ။ သို့သော် ပြဿနာက ဒီလို ရည်မှန်းချက်နဲ့ လောဘမျိုးကို သူမအပေါ် လာပုံချဖို့ ကြိုးစားနေတာခြင်းပင်။
၎င်းက သူမအား ရွံရှာသွားစေခဲ့သည်။
"အချိန်နောက်ကျနေပြီ" ချန်ချန်ရွှယ် ကိုယ့်ကိုယ်ကိုယ် ရေရွတ်လိုက်၏။ သူမခေါင်းထဲက ရှုပ်ထွေးနေတဲ့ အတွေးတွေကို ခါထုတ်လိုက်ပြီး ဒီကိစ္စတွေကို ဂရုမစိုက်တော့ပဲ ထိုအစား သူမဟာ မသေမျိုးကျင့်ကြံခြင်း သရုပ်ဖော် စနစ်နဲ့ အသိစိတ်အာရုံ ချိတ်ဆက်မှုကို တည်ဆောက်လိုက်၏။
ဒီတစ်ခါ သူမ အသစ်စက်စက် သရုပ်ဖော် မသေမျိုးကျင့်ကြံခြင်း ဘဝတစ်ခုကို ပြန်စတော့မည်ဖြစ်ရာ ကွဲပြားနေပေလိမ့်မည်။
[သင်သည် သာရုပ်ဖော် ဘဝသစ် တစ်ခုကို ပြန်လည် စတင်ရန် ရွေးချယ်လိုက်သည်။ ကျေးဇူးပြု၍ အောက်ပါ မွေးရာပါ ပါရမီ (၁၀) ခု အနက်မှ (၃) ခုကို သင့်ပြန်လည်ဝင်စားခြင်း ပါရမီအဖြစ် ရွေးချယ်ပါ]
[၁။ မာကျောရက်စက်သော လူကြမ်းကြီး (သင့်ဘဝသည် ယုတ္တိမရှိသော၊ မှော်ဆန်သော မာကျောရက်စက်သည့် မြင်ကွင်းမျိုးစုံဖြင့် ပြည့်နှက်နေလိမ့်မည်)]
[၂။ ထင်ရှားကျော်ကြားသော မိသားစု နောက်ခံ (သင့်မိဘများသည် အလွန် ဂုဏ်သရေရှိသူများ ဖြစ်ကြသည်)]
[၃။ ခသူးလူး (Cthulhu) (ဝါးဘီ ဝါးဘီ၊ ဝါးဘီ ဘာဘူ)]
......
[၄။ ဗန်မား ကွန်ဂျီရို (မနက်ခင်းမှာ သင့်အိမ်ပြန်လမ်းကို သင် သိရင် ညနေခင်းကျရင် သင် သေလိမ့်မယ်)]
[၅။ လက်သင်္ကေတ ဘယ်သူ လိုလို့လဲ (မန္တန် တစ်ခုခု ရွတ်ဖတ်ရန် လက်သင်္ကေတ လုပ်စရာ မလိုပါ)]
[၆။ နက်နဲထူးဆန်းသော မျက်နှာဖုံးများ (ရယ်မောနေသလို၊ ငိုကြွေးနေသလို ပုံစံရှိသော ထူးဆန်းသည့် မျက်နှာဖုံးများ)]
[၇။ သူတို့က တကယ် သိပ်ကြီးလွန်းတယ် (သင့်အတွင်းခံ အဝတ်အစားများကို အထူးမှာယူ ချုပ်လုပ်ရလိမ့်မည်)]
[၈။ တူးဖော်ရေး တိုက်ခိုက်ရေး ဧကရာဇ် (ဧကရာဇ်ကြီးသည် ခြေတစ်လှမ်းတည်းဖြင့် (၁၀) မီတာ ခရီးရောက်နိုင်သည်)]
[၉။ မြင့်မြတ်သော အလင်း တုတ်တံ(မျက်နှာဖုံးစွပ် သူရဲကောင်း ၏ နိဂုံး ရောက်ရှိလာပြီ)]
[၁၀။ လူ ခြောက်သောင်းတောင် သင့်ကို မသတ်နိုင်ဘူး(ဓားအမျိုးအစား လက်နက်များသည် သင့်ကို သေစေလောက်သော ဒဏ်ရာ မရရှိစေနိုင်ပါ)]
[ကျေးဇူးပြု၍ ရွေးချယ်ပါ]
"ကြည့်ရတာ... ငါ့ရဲ့ အရင် ပါရမီတွေထက် နည်းနည်း ပိုကောင်းမယ့်ပုံပဲ"
ဒီမွေးရာပါ ပါရမီ (၁၀) ခုကို ကြည့်ရင်း ချန်ချန်ရွှယ်ဟာ အတွေးနက်သွားခဲ့သည်။
သူမ နားမလည်နိုင်တဲ့ ပါရမီအသစ် အများကြီး ပါနေသေးပေမယ့် သူမ နားလည်နိုင်တဲ့ ပါရမီအနည်းငယ်ကိုတော့ တော်တော်လေး ကျေနပ်မိသည်။
"ပါရမီ (၁) က ငါ့ဘဝ အတွေ့အကြုံကို ပိုပြီး စိတ်လှုပ်ရှားစရာ ကောင်းစေလောက်တယ် မဟုတ်လား။ မသေမျိုးကျင့်ကြံခြင်း သရုပ်ဖော် စနစ်ရဲ့ ဆုလာဘ်တွေက ရက်ရောသည် ဖြစ်စေ၊ မရက်ရောသည် ဖြစ်စေ အရေးကြီးတဲ့ အချက်တစ်ခုက ကိုယ့်ဘဝက ဘယ်လောက် စိတ်လှုပ်ရှားစရာ ကောင်းခဲ့လဲ ဆိုတာပဲ... ဒါ့အပြင် ဘဝ အတွေ့အကြုံက ပိုစိတ်လှုပ်ရှားစရာ ကောင်းလေလေ အောင်မြင်မှု ဆုလာဘ်ကို အသက်သွင်းဖို့ ပိုလွယ်လေလေပဲ"
"ပါရမီ (၂) က ငါ့နောက်ခံကို ပိုပြီး ထင်ရှားကျော်ကြားစေနိုင်တယ်.... ဒါက သိပ်အရေးကြီးတယ်... ဒါက ငါ့ရဲ့ စမှတ်ကို မြင့်မားသွားစေနိုင်ပြီး ငါလိုအပ်တဲ့ ကျင့်ကြံခြင်း အရင်းအမြစ် တချို့ကို စောစောစီးစီး ရစေနိုင်တယ်"
"ပါရမီ (၃)... ဒါ အရင်တုန်းက ပေါ်ဖူးပေါ်လာတာ မှတ်မိတယ်"
"ပါရမီ (၄)ကိုတော့ ငါ သိပ်နားမလည်ဘူး"
"ပါရမီ (၅).. မန္တန် ရွတ်ဖတ်ဖို့ လက်သင်္ကေတ သုံးစရာ မလိုဘူး.... မဆိုးဘူးပဲ... တိုက်ခိုက်တဲ့အခါ ငါ အချိန်နည်းနည်း သက်သာနိုင်ပြီး ပြိုင်ဘက်ကို အနိုင်ယူဖို့ အခွင့်အရေး ပိုရလာနိုင်တယ်"
"ပါရမီ (၆)... ဒါကို ရွေးချယ်ရာမှာ မသေချာမရေရာတဲ့ အန္တရာယ်တချို့ ရှိနိုင်တယ်.... ကောင်းလား ဆိုးလား ငါ မသိဘူး"
"ပါရမီ (၇)... အဟွတ်....ဘာတွေ လာပြောနေတာလဲ"
"ပါရမီ (၈).... ပါရမီ (၉).... ငါ နားမလည်ဘူး"
"ပါရမီ (၁၀)... ဓားအမျိုးအစား လက်နက်တွေ အတွက်ပဲ ကန့်သတ်ထားတာလား.... ဓားသုံးတဲ့ မသေမျိုးကျင့်ကြံသူတွေ မရှိတာတော့ မဟုတ်ဘူး ဒါပေမဲ့ သူတို့ အများစုက ဓားရှည် ကို သုံးကြတာ မဟုတ်လား"
"..."
ချန်ချန်ရွှယ် သူမ ဘာရွေးရမလဲ ဆိုတာ ခွဲခြမ်းစိတ်ဖြာလိုက်၏။ သူမဟာ အသက်ရှူချိန် ဒါဇင်ပေါင်းများစွာ ကြာအောင် စဉ်းစားလိုက်ရပြီး နောက်ဆုံးတော့ သူမ ရွေးချယ်လိုက်၏။
"၁... ၂... ၆..."
ပါရမီ (၁) နဲ့ ပါရမီ (၂) ကို ရွေးတာက သိပ်ပုံမှန်ပင်။ ပါရမီ (၁) က သူမရဲ့ အောင်မြင်မှုတွေကို အသက်သွင်းဖို့ ပိုလွယ်ကူစေနိုင်ပြီး ပါရမီ (၂) က သူမရဲ့ စမှတ်ကို ပိုမြင့်မားစေနိုင်ပေသည်။
ပါရမီ (၆) အတွက်တော့ သူမ လောင်းကြေးထပ်ဖို့ ဆုံးဖြတ်လိုက်ခြင်းပင်။
သိပ်သတိကြီးတဲ့ သူမကို လောင်းကြေးထပ်လာအောင် လုပ်နိုင်တာက မသေမျိုးကျင့်ကြံခြင်း သရုပ်ဖော် စနစ်ထဲမှာ သူမ မသေနိုင်လို့ပင်။
အကယ်၍ မသေမျိုးကျင့်ကြံခြင်း သရုပ်ဖော် စနစ်ထဲမှာ သေဆုံးသွားရင် လက်တွေ့ဘဝမှာလည်း တန်ပြန်မှုခံစားရမယ် ဆိုရင်တော့ ချန်ချန်ရွှယ် သေချာပေါက် ပါရမီ (၁၀) ကို ရွေးချယ်မည်ပင်။
ဓားအတွက်ပဲ ကန့်သတ်ထားတယ် ဆိုပေမယ့် အနည်းဆုံးတော့ သူမအသက်ကို ကယ်တင်နိုင်ပေသည်။
[ရေတွက်ခြင်း စတင်ပါပြီ]
ရေတွက်မှု ပြီးဆုံးမယ့် အချိန်ကို ချန်ချန်ရွှယ် တိတ်ဆိတ်စွာ စောင့်ဆိုင်းနေလိုက်၏။ ရေတွက်မှု (၀) ဖြစ်သွားတဲ့အခါ သူမရဲ့ အသိစိတ်အာရုံ အေးခဲသွားသလို ခံစားလိုက်ရပေမယ့်ဟဒီမသက်မသာ ခံစားချက်က သိပ်မကြာလိုက်ပေ။
သူမ နိုးလာပြီး မျက်လုံး ဖွင့်လိုက်သည်။
ဝိညာဉ်ဓားဂိုဏ်းနဲ့ လုံးဝ မတူညီတဲ့ ဝိညာဉ်စွမ်းအင် သိပ်သည်းဆကို ခံစားလိုက်ရပြီး သူမ အောင်မြင်စွာ ပြန်လည်ဝင်စားလာပြီ ဆိုတာ ချန်ချန်ရွှယ် သိလိုက်၏။
'နေပါဦး…'
သူမ ရုတ်တရက် တစ်ခုခုကို သတိပြုမိလိုက်သည်။
၎င်းက ပြန်လည်ဝင်စားပြီးနောက် သူမ အလွန် အားနည်းတယ်လို့ ခံစားရပေမယ့် မွေးကင်းစ ကလေးငယ်တစ်ယောက်ရဲ့ ခန္ဓာကိုယ်နဲ့ ယှဉ်ရင်ဟဒီခန္ဓာကိုယ်က သိပ်သန်မာလွန်းနေပေရာ အနည်းငယ် တုန်လှုပ်သွားခဲ့ရသည်။
နောက်တစ်ခဏမှာ အံ့သြတကြီး အော်သံတစ်ခု သူမနားထဲ ဝင်ရောက်လာခဲ့၏။ "မင်းသမီးလေး... မင်းသမီးလေး သတိရလာပြီ"
'မင်းသမီးလေး...'
'သူတို့က ငါ့ကို ပြောနေကြတာလား...'
ချန်ချန်ရွှယ်ဟာ လဲလျောင်းနေတဲ့ အနေအထားကနေ ထထိုင်ဖို့ အတတ်နိုင်ဆုံး ကြိုးစားလိုက်၏။
သူမရဲ့ ဖြူဝင်းတဲ့ လက်တွေကို ကြည့်ပြီး သူမ အချိန်မီ မတုံ့ပြန်နိုင် ဖြစ်သွားခဲ့ရသည်။
'သူမ ကလေးလေး အဖြစ် ပြောင်းသွားရမှာ မဟုတ်ဘူးလား...
ဘာလို့လဲ...'
ဒီအချိန်မှာ မသေမျိုးကျင့်ကြံခြင်း သရုပ်ဖော် စနစ်ရဲ့ စာသား သတိပေးချက် တက်လာပြီး သူမ ရင်ထဲက သံသယတွေကို ဖြေကြားပေးလိုက်၏။
[အသက် ၁၂ နှစ် - သင့်ဝိညာဉ်သည် မဟာဝေ မင်းဆက်၏ နန်းတော် အတွင်းရှိ မင်းသမီးလေး တစ်ပါး၏ ခန္ဓာကိုယ်ပေါ်သို့ ကူးပြောင်းရောက်ရှိသွားပါသည်။ ပြောပြစရာ ရှိသည်မှာ ဤမဟာဝေ မင်းဆက်မှ မင်းသမီးလေးသည် သင်နှင့် ရုပ်ချင်း တစ်ထပ်တည်း တူညီနေခြင်း ဖြစ်သည်။]
'ဝိညာဉ် ကူးပြောင်းခြင်း.....'
ချန်ချန်ရွှယ် ခဏလောက် ကြောင်အသွားခဲ့သည်။ သေချာ စဉ်းစားပြီးနောက် ဒါဘာကို ဆိုလိုလဲ ဆိုတာ သူမ အကြမ်းဖျင်း နားလည်လိုက်ပေသည်။
မသေမျိုးကျင့်ကြံခြင်း သရုပ်ဖော် စနစ်ရဲ့ ကမ္ဘာထဲမှာ မဟာဝေ မင်းဆက် လို့ခေါ်တဲ့ မင်းဆက်တစ်ခု ရှိကာ ဒီမင်းဆက်ထဲမှာ ပြင်းပြင်းထန်ထန် ဖျားနာနေတဲ့ မင်းသမီးလေး တစ်ပါး ရှိပေသည်။
ဒီမင်းသမီးလေးက ချူချာလွန်းတာကြောင့် နန်းတွင်း သမားတော်တွေဟာ လက်မြှောက်ထားရပြီး မကြာခင်မှာပဲ သူမဟာ သေဆုံးသွားခဲ့ရသည်။
ဒီအချိန်မှာ ချန်ချန်ရွှယ်က မသေမျိုးကျင့်ကြံခြင်း သရုပ်ဖော် စနစ်ထဲ ဝင်ရောက်လာတာနဲ့ ကွက်တိ ဖြစ်သွားပြီး သူမရဲ့ ဝိညာဉ်က ဒီမင်းသမီးလေးရဲ့ ခန္ဓာကိုယ်ထဲ ဝင်ရောက်ကာ ထူးဆန်းတဲ့ နည်းလမ်းနဲ့ အသက်ပြန်ရှင်လာခြင်းပင်။
ချန်ချန်ရွှယ် ရုတ်တရက် တုံ့ပြန်လိုက်၏။ 'ဒါက မသေမျိုးကျင့်ကြံခြင်း လောကက လူတိုင်း မပြောရဲကြတဲ့ ကိုယ်ခန္ဓာ ဝင်ပူးခြင်းမဟုတ်ဘူးလား...'
'သူမ ခန္ဓာကိုယ် တစ်ခုကို ဝင်ပူးလိုက်ပြီး တိုင်းပြည်တစ်ခုရဲ့ မင်းသမီး ဖြစ်လာတာလား...'
'ပါရမီ (၂) က အခန်းကဏ္ဍ တစ်ခုကနေ ပါဝင်ခဲ့တာ ဖြစ်ရမယ်... ထင်ရှားကျော်ကြားသော မိသားစု နောက်ခံ ဆိုတာက နည်းနည်းလေး ပိုလွန်းမနေဘူးလား' ချန်ချန်ရွှယ် တွေးလိုက်မိ၏။ ကြည့်ရတာ သူမ ပါရမီအမှားကို မရွေးချယ်မိခဲ့ပေ။
မဟာဝေ မင်းဆက် ဆိုတာ နိုင်ငံကြီးလား နိုင်ငံငယ်လား သူမ မသိပေမယ့် မသေမျိုးကျင့်ကြံခြင်း လောကထဲက မင်းဆက်တစ်ခု အနေနဲ့ နိုင်ငံငယ်လေး တစ်ခုကတောင် မသေမျိုးကျင့်ကြံခြင်း ဂိုဏ်းကြီး တစ်ခုရဲ့ အင်အားကို ပိုင်ဆိုင်ထားနိုင်လေသည်။
ဒါကြောင့်... ကျင့်ကြံခြင်း အရင်းအမြစ်တွေ ပြတ်လပ်နေမှာ သေချာပေါက် မဟုတ်ပေ။
ဒါ့အပြင် မြင့်မြတ်တဲ့ အဆင့်အတန်းကြောင့် မလိုအပ်တဲ့ အန္တရာယ်တွေကို ရှောင်ရှားနိုင်ပေလိမ့်မည်။
ဒီအချိန်မှာ ချန်ချန်ရွှယ် အပြင်ဘက်က ဆူညံသံကို ကြားလိုက်ရ၏။
"ချန်နင် တကယ် သတိရလာပြီလား... မြန်မြန် သမားတော်ကြီး ရွှီ... အထဲ မြန်မြန် ဝင်ပြီး ချန်နင် အဆင်ပြေရဲ့လား ကြည့်လိုက်စမ်း... အကယ်၍ ချန်နင် ပြန်သက်သာလာရင် သင့်ကို ဝိညာဉ်ဆေးပင် အပင် (၁၀၀) နဲ့ ဝိညာဉ်ကျောက်တုံး (၁၀၀၀) ဆုချမယ်.."
'ချန်နင်...'
'ငါ့ရဲ့ ဒီခန္ဓာကိုယ် နာမည်က ချန်နင်လား....'
ချက်ချင်းပင် လူတစ်စု တံခါးကို တွန်းဖွင့်ပြီး စိုးရိမ်တကြီး ဝင်ရောက်လာခဲ့ကြသည်။ သူတို့ အားလုံးက ချန်ချန်ရွှယ် မသိတဲ့ လူတွေချည်းပင်။
ချန်ချန်ရွှယ် သေစေနိုင်လောက်တဲ့ အချက် တစ်ခုကို တွေ့ရှိလိုက်ပြီး အဲဒါကတော့ သူမက မင်းသမီးလေးရဲ့ ခန္ဓာကိုယ်ကို ဆက်ခံရရှိခဲ့ပေမယ့် တစ်ဖက်လူရဲ့ မှတ်ဉာဏ်တွေကို သူမ ဆက်ခံမရရှိခဲ့ဖူးဆိုတာပင်။
သူမရှေ့မှာ ပေါ်လာတဲ့ ဘယ်သူ့ကိုမှ သူမ မမှတ်မိပေ။
ဒါက သူမကို ချက်ချင်း ထုံကျင်သွားသလို ခံစားသွားခဲ့စေပေသည်။ ဘာမှတ်ဉာဏ်မှ မဆက်ခံရရှိဘဲတာကြောင့် သူမဟာ လူယောင်ဆောင်ထားတဲ့သူအဖြစ် အဖမ်းခံရပြီး အသတ်ခံရပေတော့မည်။
…