အခန်း ၆၇ : သူတော်စင်- ကိုယ်ရဲ့ တာအိုလက်တွဲဖော် ဖြစ်နိုင်မလား.... သူတော်စင်မ- ထွက်သွားစမ်း
"သောက်ကျိုးနည်းဟေ့... ကြေးဝါရောင် တံခါးကြီး အတွင်းဘက်မှာ ဒီလောက်များတဲ့ ထူးထူးဆန်းဆန်း အရာတွေကို ဘယ်သူ ဖန်တီးခဲ့တာလဲ.... အန္တရာယ်များတဲ့ သတ်ဖြတ်ခြင်း အစီအရင်တွေနဲ့ ဝင်တိုးလိုက်တာနဲ့ လူကို ဇဝေဇဝါ ဖြစ်စေနိုင်တဲ့ အဲဒီ ထင်ယောင်ထင်မှား အစီအရင်တွေ အပြင်..."
လက်တွေ့ဘဝကို ပြန်ရောက်လာတဲ့ ချင်းကျောက် ချက်ချင်း အံကြိတ်လိုက်၏။ "ရုပ်သေး သားရဲဆိုတဲ့ အရာမျိုးတောင် ရှိသေးတယ်"
"အဲဒီမှာ အားအနည်းဆုံး ရုပ်သေး သားရဲရဲ့ ခွန်အားကတောင် အခြေတည်အဆင့်နဲ့ ယှဉ်နိုင်နေတယ်...
ဖြစ်နိုင်တာက ရှေးခေတ်တုန်းက အခြေတည်အဆင့် ဆိုတာ ဒီလောက် တန်ဖိုးမရှိတဲ့ အရာတွေ ဖြစ်ခဲ့တာလား...."
သိထားရမှာက ကျင်းရှင်း နန်းတော်မှာ အခြေတည်အဆင့်ကျင့်ကြံသူ တစ်ယောက်က အတွင်းစည်းတာဝန်ခံဖြစ်ဖို့ လုံလောက်နေပေပြီ။
ဒါအပြင် ၎င်းက ဂိုဏ်းထဲမှာ အလယ်အလတ် ရာထူး တစ်ခုဖြစ်၏။
နောက်ဆုံးတော့ ရုပ်သေး သားရဲ တစ်ကောင်မှာတောင် အခြေတည်အဆင့် ခွန်အား ရှိနေခဲ့လေသည်။
ဒါက ချင်းကျောက်ကို စိတ်ပေါက်ကွဲလုနီးပါး ဖြစ်သွားစေခဲ့သည်။
ကံကောင်းတာက အကြိမ်ကြိမ် သေဆုံးရတာက သူမရဲ့ စိတ်ဓာတ်ကို အရင်ကထက် အနည်းငယ် ပိုကောင်းစေခဲ့သည်။
သူမ ရင်ထဲက ဒေါသတွေ အမြန် ပျောက်ကွယ်သွားပြီး ဒီအချိန်မှာစာသား သတိပေးချက် တစ်ခု တက်လာခဲ့သည်။
......
[သင်သည် အောင်မြင်မှု တစ်ခုကို အသက်သွင်းနိုင်ခဲ့ပြီး ထပ်ဆောင်း ဆုလာဘ် တစ်ခု ရရှိလိုက်ပါသည်။ သင်သည် အောက်ပါ ဆုလာဘ်များကို ရရှိလိုက်ပါသည်]
[ဆုလာဘ် - အခြေတည်အဆင့် (၁) ၏ ဝိညာဉ်စွမ်းအင် တစ်ဝက် (သင့်ကို အခြေတည်အဆင့်သို့ ချိုးဖျက်ဝင်ရောက်စေရန် လုံလောက်မည့်ပုံ ရှိသည်)]
[ထပ်ဆောင်း ဆုလာဘ် - သရဲမျက်လုံး စပျစ်နွယ် တစ်ပင် (သရဲမျက်လုံး စပျစ်နွယ် တစ်ပင်သည် စားသုံးပြီးနောက် အခြေတည်အဆင့် (၁၀) လူတစ်ယောက်ကို သေစေနိုင်သည်)]
ချင်းကျောက်ရဲ့ မျက်လုံးတွေ ရုတ်တရက် ပြူးကျယ်သွားခဲ့သည်။ "လခွမ်း... ငါ့မှာ ဝိညာဉ်ဆေးပင်တွေ အများကြီး ရှိတယ်လေ.... ပြီးတော့ ဝိညာဉ်ကျောက်တုံးတွေ အများကြီးလည်းရှိသေးတာတောင် နင်က ငါ့ကို ဝိညာဉ်ဆေးပင် တစ်ပင်တည်း ပေးတာလား"
"တစ်ပင်တည်း..."
သူမရဲ့ အသံက ဘယ်လောက် ဒက်စီဘယ်အထိ မြင့်တက်သွားမှန်း မသိပေမဲ့ တည်းခိုခန်းထဲက လူတိုင်း ကြားလိုက်ကြရ၏။ အကယ်၍ သူမအား ကျင့်ကြံသူ ဆိုတာ တည်းခိုခန်းထဲက လူတိုင်း မသိခဲ့ကြရင် သူတို့ ကျိန်ဆဲကြလောက်ပေပြီ။
"သောက်ကျိုးနည်း"
ချင်းကျောက် နောက်တစ်ကြိမ် အံကြိတ်လိုက်၏။ "ဒီလို ဆုလာဘ်မျိုးကို ငါ လက်မခံနိုင်တာ မဟုတ်ပေမယ့် ငါ မျှော်လင့်ထားတာနဲ့ အများကြီး ဝေးကွာနေသေးတယ်"
တကယ်တော့ သူမကို အခြေတည်အဆင့် ရောက်စေနိုင်တဲ့အပြင် ဝိညာဉ်ဆေးပင် တစ်ပင်ကိုပါ ရထားတာက တော်တော်လေး တန်ဖိုးရှိနေပေသည်။
သူမ လက်ခံလို့ ရပေသည်။
ပြဿနာက သူမရဲ့ စိတ်ကူးယဉ်မှုထဲမှာတော့ သူမရဲ့ ဆုလာဘ်က ဒီထက် ပိုရက်ရောသင့်သည်ဟု တွေးထားခဲ့လေသည်။
"ဖြစ်နိုင်တာက..."
ချင်းကျောက် မျက်မှောင်ကြုတ်ပြီး ခန့်မှန်းလိုက်၏။ "ငါ စောစော သေသွားလို့များလား"
သူမရဲ့ ဘဝက တော်တော်လေး စိတ်လှုပ်ရှားစရာ ကောင်းတယ်လို့ ခံစားရပြီး ကြီးမားတဲ့ ကြေးဝါရောင် တံခါးကြီးလို အခွင့်အရေးမျိုးကို ကျင့်ကြံခြင်း လောက တစ်ခုလုံးမှာ သူမကလွဲရင် ဘယ်သူ ကြုံတွေ့ဖူးမည်နည်း။
ပြဿနာ တစ်ခုက သူမ စောစော သေသွားတာကြောင့် ဖြစ်ကာ သူမဟာ တစ်ခါ ဝင်ရင် အနှစ် (၂၀) (၃၀) လောက်ပဲ နေနိုင်ခဲ့လေသည်။
'ဒါ အကြောင်းရင်း ဖြစ်နိုင်တယ်...'
ချင်းကျောက် ပြဿနာကို သဘောပေါက်လိုက်ပြီလို့ ခံစားလိုက်ရပေမယ့် နည်းနည်း နောက်ကျသွားပုံ ရလေသည်။ အကယ်၍ သူမသာ သရုပ်ဖော် စနစ်ထဲမှာ သဘောပေါက်ခဲ့ရင် သူမ ဒီလောက် စောစော သေမှာ မဟုတ်ချေ။
အနည်းဆုံးတော့ မသေခင် နောက်ထပ် အနှစ် (၂၀) လောက် သူမ နေနိုင်ခဲ့မည်ပင်။
သူမ ရေရွတ်နေတုန်းမှာပဲ ဆုလာဘ် ရောက်ရှိလာခဲ့သည်။
သန့်စင်တဲ့ ဝိညာဉ်စွမ်းအင်တွေ သူမခန္ဓာကိုယ်ထဲ တိုးဝင်လာတာ ခံစားလိုက်ရပြီး ချင်းကျောက် ကုတင်ပေါ်မှာ အမြန် တင်ပျဉ်ခွေ ထိုင်လိုက်ကာ ကျင်းရှင်း နန်းတော်ရဲ့ ထူးခြားတဲ့ ကျင့်စဉ်ကို လှည့်ပတ်လိုက်၏။ သူမခေါင်းထဲက အာရုံလွဲစေတဲ့ အတွေးမျိုးစုံကို လွှင့်ပစ်လိုက်ပြီး အခြေတည်အဆင့် ရောက်ဖို့ စတင် ကြိုးစားလိုက်သည်။
ဝိညာဉ်ခန္ဓာ တစ်ပိုင်းပိုင်ဆိုင်ထားတာကြောင့် ရွှေအမြုတေ အဆင့်အောက်မှာ ချင်းကျောက် အတွက် ဘာပိတ်ဆို့မှုမှ မရှိပေ။
'ဘုန်း'
သူမ အားတောင် မစိုက်ရသေးခင်မှာပဲ သူမဟာ အဆင့်ချိုးဖျက်နိုင်သွားခဲ့ပေသည်။
ချင်းကျောက် အခြေတည်အဆင့်ကို ချိုးဖျက်ဝင်ရောက်တဲ့ လှုပ်ရှားမှုက မသေးငယ်ရာ တည်းခိုခန်းထဲက လူတိုင်း တစ်ခုခု ဖြစ်သွားပြီလို့ ထင်လိုက်ကြသည်။ ငလျင်လှုပ်တယ်လို့ သူတို့ဟာ ထင်လိုက်ကြပြီး အပြင်ကို အမြန် ပြေးထွက်ပြီး ခိုလှုံလိုက်ကြ၏။
အနီးအနားမှာ ရှိနေတဲ့ ချင်းဟယ် ခရိုင်က လေလွင့်ကျင့်ကြံသူ တချို့ဟာ တည်းခိုခန်း ဘက်ကို မယုံကြည်နိုင်တဲ့ အကြည့်နဲ့ ကြည့်လိုက်ကြလေသည်။
သူတို့ အံ့သြနေခဲ့ကြပေသညါ။
"ဒါ... အခြေတည်အဆင့် ကျင့်ကြံသူ ဘယ်နှယောက်တောင် ရှိနေတာလဲ"
နှစ်ပေါင်း (၁၀၀) နီးပါး အချိန်ဖြုန်းခဲ့ပြီး အခုထိ ချီစုစည်းမှု အဆင့် (၂) ပဲ ရှိသေးတဲ့ လေလွင့်ကျင့်ကြံသူ တစ်ယောက် ကြောင်အ နေခဲ့သည်။ "လွန်ခဲ့တဲ့ ရက်ပိုင်းကမှ အခြေတည်အဆင့် တစ်ယောက် ချိုးဖျက်ဝင်ရောက်သွားတာ... အခု ဒီနေ့ နောက်ထပ် အခြေတည်အဆင့် တစ်ယောက် ချိုးဖျက်ဝင်ရောက်ပြန်ပြီ.... ချင်းဟယ် ခရိုင်မှာ အခြေတည်အဆင့် ကျင့်ကြံသူတွေ ဒီလောက် အများကြီး ဘယ်တုန်းက ရှိသွားတာလဲ"
ကျင့်ကြံခြင်း ဂိုဏ်းတွေကကျင့်ကြံသူ တချို့လည်း အနည်းငယ် အံ့သြသွားတဲ့ မျက်နှာတွေ ထုတ်ဖော်လိုက်ကြ၏။ "ဘယ် စီနီယာက အခြေတည်အဆင့်ကို ချိုးဖျက်ဝင်ရောက်သွားတာလဲ မသိဘူး... ဝိညာဉ်စွမ်းအင် သိပ်မရှိတဲ့ ချင်းဟယ် ခရိုင်လို နေရာမျိုးမှာ လူတွေ တကယ် အဆင့်ချိုးဖျက်နိုင်ကြတာလား"
သူတို့ထဲမှာ တုံ့ပြန်မှု အပြင်းထန်ဆုံး လူတွေကတော့ ကျင်းရှင်း နန်းတော်က ကံဆိုးတဲ့ လူ (၃) ယောက်ကလွဲရင် ဘယ်သူ ဖြစ်နိုင်ဦးမည်နည်း။
သူတို့ဟာ ချင်းဟယ် ခရိုင်ထဲက လူတွေကို အခုထိ လိုက်ရှာနေတုန်းဖြစ်ကာ ဘာသဲလွန်စမှ မတွေ့ရသေးပေ။
ထို့ကြောင့် ချင်းကျောက် တစ်ခုခု ဖြစ်သွားပြီလား ဆိုပြီး သူတို့ စိုးရိမ်စပြုလာကြလေသည်။
ဘာပဲဖြစ်ဖြစ် ချင်းဟယ် ခရိုင်ထဲမှာ မြင့်မြတ်သောနှလုံးသား နန်းတော် မိစ္ဆာဂိုဏ်းက မိစ္ဆာကျင့်ကြံသူ အများအပြား ပုန်းခိုနေကြရာ သူတို့ (၃) ယောက် ပြန်သွားပြီး နန်းတော်သခင်မဆီ သတင်းပို့ကာ လူထပ်လွှတ်ပေးဖို့ တောင်းဆိုချင်နေကြပေပြီ။
ဒါပေမဲ့ ပြန်ဖို့ ပြင်ဆင်နေကြတဲ့အချိန်မှာပဲ သူတို့ ဂျူနီယာ ညီမလေးရဲ့ ခြေရာကို တကယ် ရှာတွေ့လိုက်လေသည်။
"ဟုတ်တယ်.." သူတို့ထဲက တစ်ယောက် ရေရွတ်လိုက်သည်။ "ဒီလို ဝိညာဉ် လှုပ်ရှားမှုမျိုးက သေချာပေါက် ဂျူနီယာ ညီမလေးပဲ... သူမ တောင်အောက်ဆင်းတုန်းက ရှင်းရှင်းလင်းလင်း ချီစုစည်းမှု အဆင့် (၁၀) ပဲ ရှိသေးတာလေ... ဘယ်နှရက် ရှိသေးလို့လဲ.... သူမ အခြေတည်အဆင့် ရောက်သွားပြီလား"
နောက်တစ်ယောက်က ရေရွတ်၏။"ငါတို့ အားလုံးက အခြေတည်အဆင့်တွေပဲ... အကယ်၍ ဂျူနီယာ ညီမလေးသာ အတင်း ထွက်ပြေးမယ် ဆိုရင် ငါတို့ သူမကို မီအောင် လိုက်ဖို့ ခက်ခဲလိမ့်မယ်.."
နောက်ဆုံးလူက မျက်လုံးပြူးပြီး ပြောလိုက်ပြန်သည်။ "မမီနိုင်ရင်တောင် ငါတို့ မီအောင် လိုက်ရမယ်... မဟုတ်ရင် ငါတို့ ပြန်သွားရင် နန်းတော်သခင်မရဲ့ အပြစ်ပေးတာကို ခံနေရမယ်.."
သူတို့ (၃) ယောက် တစ်ယောက်ပြီး တစ်ယောက် ပြောလိုက်ကြသည်။
ထို့နောက် သူတို့ဟာ အဆင့်ချိုးဖျက်တဲ့ နေရာဆီ အမြန် ပြေးသွားခဲ့ကြလေသည်။
...
တစ်ချိန်တည်းမှာပင် ဝိညာဉ်ဓားဂိုဏ်း။
ဒီနေ့ ချန်ချန်ရွှယ်ဟာ မသေမျိုးကျင့်ကြံခြင်း ဘဝကို သရုပ်ဖော်ဖို့ စနစ်ထဲ မဝင်ရောက်ရသေးပေ။ သူမ မဝင်ချင်လို့ မဟုတ်ပဲ သူမရှေ့မှာ လူတစ်ယောက် ရောက်လာလို့ပင်။
ဒါက သူမကို တစ်ဖက်လူကို ကန်ထုတ်ပစ်ချင်စိတ် ပေါက်သွားခဲ့၏။ ဒါပေမဲ့ ဝမ်းနည်းစရာ ကောင်းတာက တစ်ဖက်လူက သူမရဲ့ ဂိုဏ်းတူ အစ်ကိုဖြစ်နေခြင်းပင်။
ဒါ့အပြင် တစ်ဖက်လူရဲ့ ကျင့်ကြံမှုက သူမထက် ပိုမြင့်ရာ သူမဟာ တစ်ဖက်လူကို မကန်ထုတ်နိုင်ပေ။
ချန်ချန်ရွှယ် မျက်မှောင်ကြုတ်လိုက်ပြီး သူမမျက်နှာမှာ ငြင်းဆန်မှုတွေ ပြည့်နှက်နေခဲ့သည်။
သူမဟာ လုံးဝ ဖုံးကွယ်မထားပဲ အေးစက်စွာ ပြောလိုက်သည် - "စီနီယာ အစ်ကို... ကျေးဇူးပြုပြီး ဒီပစ္စည်းတွေကို ပြန်ယူသွားပါ... ကျွန်မ ဝိညာဉ်ဓားဂိုဏ်းထဲ ဝင်ရောက်ရတဲ့ ရည်ရွယ်ချက်က တစ်ကိုယ်တည်း မသေမျိုး ဖြစ်လာဖို့ပါပဲ..... ဒါကြောင့် ကျွန်မမှာ တခြားသူတွေနဲ့ တာအိုလက်တွဲဖော်ဖြစ်ဖို့ ရည်ရွယ်ချက် မရှိပါဘူး"
"ရှင်က ဝိညာဉ်ဓားဂိုဏ်းရဲ့ သူတော်စင်လေ... ကျေးဇူးပြုပြီး ရှင့်ရဲ့ အနေအထား ကို ဂရုစိုက်ပါ.... အကယ်၍ ဆရာသခင်သာ ရှင် ကျင့်ကြံမှုကို လစ်လျူရှုပြီး တစ်နေ့ကုန် လက်တွေ့မကျတဲ့ အရာတွေကို တွေးနေမှန်း သိသွားရင် သူ ရှင့်ကို သေချာပေါက် အပြစ်ပေးလိမ့်မယ်"
လိင်တစ်မျိုးတည်းလက်ခံတဲ့ ဂိုဏ်းတွေကလွဲရင် အခြားဂိုဏ်းတွေမှာ သူတော်စင်မ ရှိသလို သူတော်စင်လည်း ရှိတတ်ကြ၏။
ဝိညာဉ်ဓားဂိုဏ်းကလည်း အဲဒီလိုပင်။
သူတော်စင်မ နဲ့ သူတော်စင် နှစ်ယောက်စလုံးက ဝိညာဉ်ဓားဂိုဏ်းရဲ့ နောက်ထပ် ဆက်ခံသူဖြစ်လာမယ့် ကိုယ်စားလှယ်လောင်းတွေဖြစ်ကာ ချန်ချန်ရွှယ်က ဒီမျိုးဆက်ရဲ့ သူတော်စင်မ ဖြစ်ပြီး ဝိညာဉ်ဓားဂိုဏ်းရဲ့ သူတော်စင်ကတော့ ချန်ချန်ရွှယ် ရှေ့မှာ ရောက်နေတဲ့ လူငယ်လေး ပင်။
လူငယ်လေးလို့ ခေါ်ပေမယ့် တကယ်တော့ သူက လူငယ်ပုံ ပေါက်နေရုံသာ ဖြစ်ပြီး ဝိညာဉ်ဓားဂိုဏ်းရဲ့ သူတော်စင်က အသက် (၅၀) ကျော်နေပေပြီ။
ကျင့်ကြံမှု အဆင့်အရ ဆိုရင် ချန်ချန်ရွှယ်က ငယ်ရွယ်သေးတာမို့ နိမ့်ကျနေခဲ့သည်။
သူမက တခြားသူတွေထက် နောက်ကျမှ စတင်ခဲ့တာ ဖြစ်ပြီး သူမဟာ သရုပ်ဖော်စနစ်ထဲ၌ အချိန်ကြာမြင့်စွာ ကျင့်ကြံခဲ့တယ် ဆိုပေမယ့် လက်တွေ့ အချိန်က တခြားသူတွေထက် ပိုတိုတောင်းနေပေသည်။
ဒါပေမဲ့ မွေးရာပါ စွမ်းရည်နဲ့ ပါရမီအရ ဆိုရင်တော့ ချန်ချန်ရွှယ်က ဝိညာဉ်ဓားဂိုဏ်းမှာ သေချာပေါက် နံပါတ်တစ်ဖြစ်လေသည်။
ဒါကို ဝိညာဉ်ဓားဂိုဏ်းရဲ့ ဂိုဏ်းချုပ်ကြီးတောင် အသိအမှတ် ပြုထားခဲ့၏။
ဒီနေ့ ဖြစ်ပျက်ခဲ့တာကလည်း ရိုးရှင်းပြီး ပြဿနာ ဖြစ်စေတာက သူမရဲ့ ကိုယ်ပိုင် မျက်နှာအလှကြောင့်ပင်။
သို့ပေမဲ့ ချန်ချန်ရွှယ်ဟာ ဒီသူတော်စင်ကို စိတ်မဝင်စားချေ။
သူမ ဆက်ပြောလိုက်သည် - "ကျေးဇူးပြုပြီး ပြန်ပါတော့ စီနီယာ အစ်ကို..."
သူမရှေ့ရှိ ဝိညာဉ်ဓားဂိုဏ်း သူတော်စင်ရဲ့ မျက်နှာက အနည်းငယ် တောင့်တင်းနေခဲ့ပြီး သူဟာ အနည်းငယ် မလိုလားစွာ ပြောလိုက်သည် - "ဂျူနီယာ ညီမလေး ချန်ရွှယ်... စီနီယာ အစ်ကို ဘာမှားနေတယ်လို့ ထင်လို့လဲ... ကိုယ် ပြောင်းလဲပစ်လိုက်မယ်... မင်းနဲ့ ကိုယ်က ဝိညာဉ်ဓားဂိုဏ်းရဲ့ သူတော်စင်မ နဲ့ သူတော်စင်လေ.... အကယ်၍ ငါတို့သာ ကျင့်ကြံခြင်း လက်တွဲဖော်တွေ ဖြစ်သွားကြရင် ဒါက မသေမျိုးကျင့်ကြံခြင်း လောကမှာ ကောင်းမွန်တဲ့ ဇာတ်လမ်းတစ်ပုဒ် ဖြစ်မလာဘူးလား"
"အနာဂတ်ကျရင် ငါတို့နှစ်ယောက် ဝိညာဉ်ဓားဂိုဏ်းကို အတူတကွ ဦးဆောင်နိုင်တယ်... မင်းက အတွင်းပိုင်းကို တာဝန်ယူ ကိုယ်က အပြင်ပိုင်းကို တာဝန်ယူမယ်... ဒါမှမဟုတ် ကိုယ်က အတွင်းပိုင်း မင်းက အပြင်ပိုင်းပေါ့... ဒီနည်းနဲ့ ဆိုရင် ငါတို့နှစ်ယောက် မသေမျိုးကျင့်ကြံခြင်း လောကရဲ့ မဟာလူသားကြီးတွေ ဖြစ်လာနိုင်တယ်.."
"စီနီယာ အစ်ကို..." ချန်ချန်ရွှယ် အေးစက်စွာ ပြော၏ - "ကျေးဇူးပြုပြီး ပြန်ပါတော့... ကျွန်မ ဆရာသခင်ကို လှမ်းခေါ်ရအောင် မလုပ်ပါနဲ့"
"..." တစ်ဖက်လူဟာ အချိန်အကြာကြီး ဆို့နင့်သွားပြီး ဘာဆက်ပြောရမှန်း မသိတော့ပေ။
သူဟာ လေတစ်ချက် အဝရှူသွင်းလိုက်ပြီး နောက်ဆုံးတော့ ထွက်ခွာသွားခဲ့သည်။
ချန်ချန်ရွှယ် မျက်မှောင်ကြုတ်လိုက်၏။ ဂိုဏ်းကို ပြန်ရောက်ပြီးတဲ့နောက် ဒီလို တုံးအတဲ့ ကိစ္စမျိုး ကြုံရမယ်လို့ သူမ မမျှော်လင့်ထားခဲ့ပေ။
အကယ်၍ သူမသာ စောစော သိခဲ့ရင် ချင်းဟယ် ခရိုင်မှာ အချိန်ကာလ ပိုကြာကြာ နေခဲ့မိပေမည်။
...